الأربعاء، 20 نوفمبر، 2013

الجزء الـ35


ف البلكونه .. وين يجتمع البرد مع اعلى مراتب الحب .. لـ يعلون للعالم .. ان قلوبهم .. انولدت على حب طاهر .. غير عن الحب اللي لوثه المجتمع بـ افعاله ..

رغم بروده الجو .. الا اني مكتفيه بـ احساسه وصوته الدافي عشان يدفي قلبي اللي ذاب بـ حبه ..
ايمانا مني ان للشتا عشق .. ما يفهمه الا المحبين


حمد: ما تعودت اسير الجامعه بدون ماشوفج .. شويخ ..
شيخه: ولا انا تعودت انش الصبح .. بدون ما اطفر بك ..
حمد ابتسم: اهم شي انج تكونين مسانسه ..
شيخه: عشانهم بس .. والا المكان اللي ماتكون فيه .. ماحس انه يفرحني ..
حمد: فديييت شيختي والله محد يسواااااج " سكت شويه" فاضيه اليوم ..
شيخه ضحكت: انا دومي فاضيه ..
حمد: اقصد .. يعني متفيجه لو نطلع اليوم ..!
شيخه: امم وين ..!
حمد: نتمشى شويه ..
شيخه: اوكي ليش لا ..
حمد: العصر ان شاء الله ..!
شيخه: اوكي " وابتسمت" شو الدراسه ..
حمد: افف سكتي .. احس مستواي نزل ..!
شيخه: ليش ..!
حمد: من بعادج ..
شيخه: عن الحركات عاد ..
حمد: بسسج ردي .. والله ماصبر عنج
شيخه: برد ان شاء الله .. كلها يومين بس لين ما يرجع عمي خالد ..
حمد: متى بيرجع ..!
شيخه: آخر هـ الاسبوع ..
حمد: يا الله .. يعني امطوله ..
شيخه: من قبل قتلك اني بتم اسبوع ..
حمد: واااااااايد والله انه وااااااايد .. وانا عشان ماكسر بخاطرج قتلج سيري .. بس ماقدر خلاص مصختيها..
شيخه: لهـ الدرجه اشتقت لي ..!
حمد: واكثر بعد ..
شيخه: انزين بقولك شي بس لا تعصب عليه ..
حمد: قولي ..
شيخه: ما بتعصب ..!
حمد: يعتمد ع اللي بتقولينه ..
شيخه: اممم ..
حمد: لا دام انها اممم .. ف شكلي بظهر لج من التيلفون .. قولي قولي ..
شيخه :لا والله شي مب وايد كبير ..
حمد: قووولي انزين وانا بحكم ..
شيخه: عمييي .. خالد .. باجر بيرجع  ..
حمد: ووو شحقى اتقصين عليه ..
شيخه: بس جذه اتدلع عليك .. واختبر غلاتي ..
حمد: ليش .. شاكه اني احبج ..
شيخه: لا .. بس كنت ابا اجيس نبضك
حمد: شحقى ..
شيخه: امم ابا اعرف .. لو قتلك .. ابا ارجع البلاد وياهم .. بتخليني ..!
حمد عقد حياته: ليش هم متى بيرجعون ..!
شيخه: الدكاتره قالولهم بالكثير شهر .. ما بيطولون اكثر عن شهر .. ويقدرون يكملون باجي العلاج ف البلاد ..
حمد: يعني آخر 12 او بدايه 1
شيخه: تقريبا ..
حمد: وتبين تردين وياهم ..!
شيخه: اذا بترضى ..!
حمد اتبسم: ماقدر اجبرج على شي انتي ما تبينه .. واذا مليتي من القعده هني .. مابجبرج اتمين .. بخليج اتسيرين بس حطي ف بالج شي واحد .. حتى لو قتلج سيري بس عشان ماكسر بخاطرج .. لكن من داخلي ماباج تسيرين.. 
شيخه: ليش ..!
حمد: لاني احبج وماقدر على بعادج .. ولاني بشتاق لج واايد ..
شيخه: وايد ..!
حمد: واااااااايد .. اكثر مما تتوقعين..
شيخه ابتسمت: وتتووقع انا .. بقدر ارد البلاد بدونك ..!
حمد تنهد: مادري ..
شيخه: عيل شكلك لين الحين ماتدري انا شكثر احبك يالمينون ..
حمد: مب كثري ..
شيخه: ادري انا اكثر ..
حمد: مستحيييل ..
شيخه: المشكله ان قلبي مب ف ايدي عشان اقولك مستحيل .. انته يالس هناك .. وتتحكم بـ مشاعري وعواطفي وانا هني .. اشتاق لك ف كل لحظه وكل دقيقه وكل ثانيه تمر عليه " ابتسمت" لـ درجه اني احيانا ابا ازقر باسمك من كثر مافكر فيك وف اخر لحظه اتذكر انك بعيد عني ويرد مزاجي يتعكر .. يوم اتغدا افكر اذا رديت من الجامعه والا بعدك .. وشو بتتغدى وويا منو وشو بتسوي عقب.. واذا اتعشى .. احس بغصه .. و اتمنى لو كنت عندك .. لان وقت العشا .. هو الوقت الوحيد اللي تفضى لي .. ما تشغل نفسك بالجامعه او بالدراسه او تكون راقد من التعب .. الوقت الوحيد اللي تيلس معاي ب قلبك وعقلك والوقت الوحيد اللي اترياه يوميا عشان اشوف عيونك وهي بعيده عن هم الدراسه .. واسرح فيهن .. براحتي

سكت حمد .. وسرح بكلامها .. وهو يترجم صوتها لـ احساس .. يدفيه ويدفي مشاعره وقلبه من بروده الجو .. يالله شكثر اشتاق لها واشتاق لـ وجودها معاه ف الشقه .. اشتاق لحشرتها كل ماكان يدرس ف حجرته .. واشتاق لـ زعلها كل صبح وهو ساير الجامعه .. هذا وبينهم 10 دقايق وهو مب متحمل الفرقا .. بعد وين لو صدق ردت البلاد ويا اهلها ..!


..



ف حديقه البيتين ..
وين يجتمع الينون بـ وجودهم .. ووين رد العالم الثاني يرتبش بـ حشرتهم و ربشتهم

يلس مايد جدام الحوض .. وهو كل شوي يلقط شي من الارض ويفره ف الماي .. مره حصا .. مره حشيش ومره .. يوصل لـ اعلى مراتب لوعه الجبد .. ويشل اي حشره جدامه ويفرها ..

اذا لحق يمسكها .. ف يشلها بـ ايده .. واذا ما لحق .. يحبسها ف شبك اشبه بـ المصفاه الصغير ..


سيف وهو مغطي ويهه بـ قميصه: عيال عمي بدر .. ناس مب طبيييييييييييييعيييييييين ..
حارب: صدق مايد .. شو هـ الطفاسه .. فشلتنا والله
سيف: لا تحاول .. والله كللللكم طفووووس .. اخوك قبل فتره يكفخ الذباب بـ ايده وهذا اليوم ويا الحشرات ..
مايد: انزين مافيهم دم ..
شمه: الله يلوع جبدك ان شاء الله ..
مايد ضحك ورد كمل شغله ..
مي: وانته ليش تسوي جذه .. الله بيحاسبك ..                
مايد: هـ الحشرات اتأذينا .. وظروري نتخلص منها ..
مي: اذتك ..!
مايد: عموووه جوووفيهم .. نمل هـ المتن .. ولا المشكله انهم بـ رتبه طيار .. يعني عادي الحين واحد منهم يمشي وايي صوبج ويأذيج .. ف ظروري نتخلص منهم
منصور: تتخلص منهم بـ فليت .. بف باف .. اي مسحوق من دعايات سما دبي .. من جذه يالوصخ
مروان: هههههههههه خلكم من اللي يسويه .. سألوه بس من ويين يايب هـ اللي ف ايده ..

سكت مايد وهو يمرر عيونه على الكل .. وبـ اللي ف ايده .. يظربه بـ كف ايده الثانيه .. وكل شوي اطير حشره من الحشرات اللي تموت ف الماي وترد تستقر ف الشبك .. وتلزق ف راحه ايده ..

مي وهي رافعه حياتها: من ويين يايبنه ..!
مايد: والله .. شقولكم بس ..
مروان: قول قول  .. هي خاربه خاربه .. بتتكفخ اليوم وبتنسب وبتتهزا بعد .. ف لا اتلف وادور ..
مي: ليكون من مطبخ عليا ..
شمه: والله لا اتييك امايه من هناك ..!
مروان: ياااااااارييييت لو من مطبببببخ عموه .. يااااااريييت .. المشكله اني ما اكتشفت الا عقب ما اصطاد اول حشره ..
حارب: شارنه ..!
مروان: لا بالغت انته عاد .. مايد يوصل لهـ المستوى من النظافه .. ينش يشتري واحد يديد عشان ينخل الحوي من الحشرات ..
حارب: عيل..!
مروان: ارمس ..!
مايد: لا انا .. تواضعي ما يسمح لي اقول ..
مروان: لا قووول .. وخل مهمه نقل الخبر لـ عبدالله .. عليه انا 
شمه تضحك: ههههههههه لا والسالفه اتخص عبدالله .. زيين بيسوي بك والله 
مروان: ياريت لو اتخص عبدالله بس .. ارمس ارمس ..
مايد: انتييييي ....... الظهر ....... مب ...... كنتيييييي.. شوووو يسموووونه .. هذااااك لاااا ..
مروان: شو يسمونه ..!
مايد: يووووم كنتتتتيي .. اتصلتيييي .. طلبتييييي ..
مي: مااااااااايد ارررمس بالزيييين ..
منصور: هههههههه تعرف ان هـ اللف والدوران وراه شي كبير ..
مايد: لحظه بسألج سؤال ..
مي رافعه حياتها: اسأل..
مايد: شو هذاك الشي الاسود .. اللي سويتيه حق عيال مهره ..!
مي: ماي وتمر ..
مايد: انزيين .. عقب ما فصلتي الماي عن التمر بالشبك .. انا استلمت الباجي .. جوفي كل واحد يسوي شي على قده .. انتي سويتي الماي والتمر بهذا الشي .. وانا خذته وكملت معروفي يعني ويزاي الله خيييير ..
مي انصدمت: حسبي الله  .....
مايد قطع عليها: لاااا تدعيين عليييه ..
حارب: نعععععععععم .. يعني عيال اختيييييييييييييه يشربووون حشرات 
مايد: لا .. بس من باجر ان شاء الله بيشربون ..
سيف: يغرررررررررربلك ويغرببببببببببببببببببببببببببببل افكااااااااااارك ..
مايد: هذا يسموووونه .. ضد الاسراف انزييين .. وبعدين للحشرات فوايد شعرفكم انتو
شمه: لوو ماخذ من مطبخ امايه ابرك لك .. شو انتتته ساير ماخذ مال اليهال واتقول لي فوايد..
مروان: والله .. اوووول مره ف حيااااتي .. اصدق شي ينقال عن واحد من اخواني .. انته مب بس مينون .. انته اجتزت مرحله الجنون .. كرتك ف جيبك انته .. مرفوع عنك القلم خلاص ..
مايد: عاد ما وصيكم .. خبرو عبدالله انزيين ..
مي: ما بنخبررره عيل .. انته اذا ما تبا عمرك .. تعال هـ اليومين بيت احمد اخويه وشوووف شو بيستوي بك ..
مروان: مينووون والله والله مينووون .. وحقود ولئيم بعد .. ماااااااااااااااااالت علييييييييييييك .. تبا تسمم السمي لانهم ما سموووه علييك يالحقووود

واي شي جدامه .. يشله ويفره على مايد .. اللي مره ينزل راسه يمين .. ومره يسار .. وحارب هو اللي يستقبل الظربه .. لين ما عصب حارب آخر شي ونش شل مايد وفره ف الحوض .. عشان يعرف فوايد الحشرات على قولته ..!


..


وقف عند الباب .. رفع اديه الهنتين وبدا يدق .. وهو يغني ..

راشد: يا ناسين الحبايب ليه ذي القسوه يا ناس ما تذكروا ليلاتنا الحلوه فين القلوب السليه اللي بها حنوه ردو على خل محرومن لقا محروم قولو قولو ردو على خل محرومن لقا محروووم وسراااااااا
رفعت راسها وهي تهزه بـ اسى وتضحك ..
ميره: الحمدلله والشكر .. تعال تعال ..
راشد دخل : علوووومهم ..
ميره: الحمدلله .. انته شحالك ..
راشد: تمام التمام .. ربي يعافيج " وقف جدام الشبريه واتنهد" شخباره ..
ميره: ماشي اخبار .. الحمدلله على كل حال "و ابتسمت" حياك ..
راشد: عندكم كرك ..!
ميره: لا .. عندنا اورنامين سي حار تبا ..!
راشد: لالا دخيلج .. والله سوا مفعول اخر مره ويا مصاريني .. امعائي ذابت .. كادت ان تخرج ..
ميره: وماخرجت ..!
راشد: لا بعدها صامده ..
ميره: زين الحمدلله .. شخبار الدراسه ..
راشد: لا تجرحين المجروح على قووولت عامر ..
ميره: منو عامر ..
راشد: ولد عمي ..
ميره: وليش ما اجررح المجرووح على قولت عامر ..!
راشد: والله احس ان دراستي هاي حراااام ..  مضيعة وقت
ميره: خييبه .. ليييش ..
راشد: ماخذ كرسي ف الجامعه ع الفاضي .. وادفع حق دراستي .. ع الفاضي...والله حرام .. انا مب ويه ينصرف لي جريب الستين الف على دراسه انا مب قدها ..
ميره: ليش اتقول جذه
راشد: صعببببببببه والله صعببببه ..
ميره: كم سنه باجي لك ..
راشد: المفروض سنه .. بس لاني شاطر بـ زياده ف سنه ونص ..
ميره: ههههههههههه ماشاء الله .. الله يوفقك ان شاء الله ..
راشد: آميين ..
ميره: شد حيلك .. ولاتخلي هـ الافكار ف بالك .. انته قدها ...
راشد: هيه ما يحتاي ..
ميره: مستصعب الانجليزي ..
راشد: ما افهم شي ف الانجليزي اصلا .. وراي وراي انا ايام الدراسه كنت ارسب طول السنه بسبب الانجليزي .. وآخر السنه بالدز انجح .. عمار من صوب ومهره من صوب .. وحارب ييلس على راسي .. وهه اييب 56 او 54 ..
ميره: وشو اللي مخلنك تدخل هـ الجامعه عيل ..!
راشد تنهد: لا تخليني ارمس عن اللي مدخلني هـ الجامعه ..
ميره: غصبا عنك يعني ..!
راشد ابتسم: نحن كل اللي انسويه ف هـ الدنيا غصبا عنا .. يت ع الدراسه يعني .. خليها على الله بس ..
ميره سكتت شويه: اممم اقدر اساعدك .. انا انجليزيتي اوكي ..
راشد: ماظن بتقدرين على انجليزيتنا ..
ميره: درست سنه ونص ف الجامعه .. ف ممكن افيدك ..
راشد منصدم: اونه ..!
ميره: والله .. جربني واذا ما نفعتك ما بظرك "وابتسمت"
راشد ابتسم وياها: اقصد اونج درستي ف الجامعه يعني ..!
ميره هزت راسها بـ هيه: من طاح ابويه .. وقفت ..
راشد: اسألج سؤال ..!
ميره: اسأل
راشد: كم عمرج انتي ..!
ميره: ليش ..!
راشد: جاوبي ..
ميره: 20 "ورفعت حياتها"
راشد: حلفي ..
ميره: تبا اتشوف هويتي ..!
راشد: لا جد ..!
ميره: والله ..
راشد: يعني انتي .. اصغر عني بـ سنه ..
ميره: والله ماعرف كم عمرك عشان اقول هيه او لا.. بس على فكره
راشد ساكت ..
ميره: انا بـ اخر الـ 20 عقب كم شهر بدخل 21
راشد: وانا بعد بـ آخر 21 عقب شهرين.. بدخل  22
ميره: انته وايد صغير .. توقعتك اكبر ..
راشد: وانا توقعتج اصغر ..
ميره: ادري .. شكلي صغير .. بس عقلي يوزن بلد ..
راشد: هيييه .. ما يحتاي ..
ميره: ههههههههههه اتششك ف هـ الكلام ..
راشد: من اول مره شفتج فيها وانا شاك ..
ميره ضحكت: ليش..!
راشد: عيل يايه بيتنا واتقولين لي سر بيتكم .. ولا تسوي عمرك طيب .. نععم انتي راد من الدوام امثل عليييج انا .. عشان تروغيني من بيتنا واتقولين لا تسوي عمرك طييب ..
ميره: هههههههههههه يالسخيييف ..

وشلت مبايلها ووقفت ..

ميره: عن اذنك بس .. دقايق ..
راشد: على ويين ..
ميره: بكلم وحده ..
راشد رفع حياته: وليش ما تكلمينها هني ..
ميره بنص عين: ماباها تسمع صوتك او تعرف انك هني .. وادري بك بتسوي لي حركات وبتضحكني .. ف يلس مكانك .. دقاييق وبرجع " وهي سايره صوب الباب" يالله شكثر يحب يطول الموضوع هـ الريال ..

وطلعت .. وراشد عينه عليها وهو يضحك ..


..

ف المانيا ..

حطيت البطاقه ف الباب .. رديت سحبتها وانا افتح الباب ..

شفته طايح ع الكرسي وهو حاط اللحاف على راسه ومغطي باجي جسمه .. ويطالع تلفزيون .. وماسك ف ايده مله شوربا

عمار: حجرتي سبيل .. اللي يسوا واللي ما يسوا.. يشخط ويدخل ..
شيخه: يعني نحن ما نسوا لا .. وبعدين احمد ربك يايين نطمن عليك " اتجدمت منه" شخبارك ..
عمار: الحمدلله ..
شيخه: يقولون مريض ..
عمار: مرهق مرهق ..
شيخه: عنبو .. مب حوض سوابكم جذه انته وولدك ..
عمار: من نحاسه عمتج ..
شيخه طلعت عينها: استح على وييهك زيين " ويلست" شو صحتك الحينه ..
عمار: الحمدلله .. انتي شحالج ..
شيخه: تمام فديتك .. يسرك الحال ..  
عمار وهو يحط مله الشوربه ع الطاوله: شويخ ..
شيخه: نعم ..
عمار: منو اللي كانت اتغايض ثنوي امس ..!
شيخه: منو..؟
عمار: اللي كانت وياكم ف اللفت ..
شيخه: ماشاء الله .. صاروخ انته .. عينك عليها ..
عمار: حرام عليج .. لان اول ما وصلنا شاتها ثنوي بالكوره .. وحظرته سحبني لين عندها وفشلني وياها..
شيخه: وانته تفشلت ..!
عمار: شو رايج انتي ..!
شيخه خذت نفس: هاي اخت حمد ..
عمار: حلفي ..!
شيخه: ما لاحظت .. وايد تشبه ..
عمار: لا والله غظيت البصر .. لو كنت ادري جان بحلقت عيوني
شيخه: اسسسستتتح ع وييهك وخيّل شوي .. ويقول مريض بعد ..
عمار وهو يشل ملّت الشوربه: هههههههههه .. بلاها على ولديه ..
شيخه: معجبه فيه .. وتباه ..
عمار: نعم نعم ..
شيخه: نعم الله عليك .. تباها تنعجب فيك عيل ...!
عمار: والله.. عبالهم الدنيا جذه كل من هب ودب تبا ولديه ..
شيخه رفعت حياتها: تباااا ولدك ..!
عمار: صخي انتي الثانيه لازم ما تحاسبيني على كلامي وانا ب هـ الحال ..
شيخه: روحك وصلت عمرك لهـ الحال .. المهم..
عمار: اي مهم بعد ..
شيخه: انا بطلع ..!
عمار: وانا ولي امرج .. اتصلي ف ريلج استأذني منه .. والا نزلي تحت عند عمتج .. ثرها ظاربتنا بعرض الحيط ومستويه ولية امر الكل ..
شيخه: ههههههههههه بلاك انته .. ليش مستوي جذه ..
عمار: مادري والله .. من الملل والا من التعب ..
شيخه: ملان ..
عمار: وايد .. بس صدق تعبان ماقدر اتحرك .. وغامضني ثنوي .. من يينا وهو محبوس ف هـ الفندق ..
شيخه: ثرني يايه اقولك اني بطلعه وياي ..
عمار: وين بتسيرين ..
شيخه: بتمشى ويا حمد ..
عمار: وانتي طالعه ويا ريلج .. حاشره ولديه بينكم ليش ..
شيخه: توووك اتقووول انه ملان .. وانك ما تقدر تطلع عشان اطلعه ..
عمار: هيه والله .. مرهق انا ..
شيخه: ويوم انك مرهق وما تقدر .. عيل لا تتفلسف ..
عمار: ديروو بالكم عليه ..
شيخه: منو يوصي .. اللي من ثاني يوم مرضه ..!
عمار: اييهييي .. وجني مغير اسمي من عمار بدر .. لـ عمار كفار قريش .. ذليتووووني حشى انا لو اررررتد ما بتعلقون عليه جذه
شيخه: هههههههههههههههههه لو ترتد عموه بتجتلك ..
عمار ابتسم : انزين تعالي " وشل محفظته"
شيخه: انا هـ الحركات مادانيها ..
عمار: امحووول من الدرهم لليورو ع الفاضي خلوووني احس اني مسافر شوي ..
شيخه وقفت: يوم بتشبع ارهاق نش حسس عمرك انك مسافر .. وين جاكييت ثنوي الغليظ ..
عمار: شويخ عن الحركات ..
شيخه: انته اللي عن الحركات .. جي ولدك شو بيسوي والا كم بيخسرنا .. واصلا حمد لو عرف انك معطني اي مبلغ .. والله بيزعل مني ومنك ..
عمار: برايه خله يزعل .. عقب يومين بنرد البلاد وما بنجوفه الا عقب كم شهر .. ف يوم بيرجع بيكون ناسي السالفه ..
شيخه رفعت حياتها: انا ما بنسى .. وبذكره وبخليه يزعل منك ..
عمار: ثرج نحسه ..
شيخه: طالعه عليك .. وييين جاكيييت ثنووي ..
عمار: ف الحجره .. امعلّق ف الكبت ..

مشت شيخه وسارت صوب حجره عمار .. فتحت الباب .. واتجدمت من الكتب وهي ادور بـ عيونها على شي غليظ بـ حجم صغير امبين عشرات القمصان الكبار اللي تخص عمار .. لمحت الجاكيت بـ اخر الكبت .. سحبته .. وصدت صوب الشبريه عقب ما سمعت صوت المبايل وهو يرن ..

اجدمت من الشبريه .. شلت المبايل .. ثواني ورفعت حياتها عقب ما دققت ف الاسم .. والرقم ..

بندت باب الكبت .. طلعت من الحجره وسارت صوب عمار .. ومدت اديها ..

شيخه: مبايلك .. يرن ..
عمار : روحي مخلنه داخل .. مب متفيج اكلم حد ..
شيخه خلته ع الطاوله: عشان جذه مارديت عليّه يوم اتصلت بك .. وخليتني انزل من فوق ..
عمار: هيه كسبت شوفتج ..
شيخه: هيه وخليتني اسير لين حجرتك واشوف مبايلك وهو يرن .. عشان تكسب اتصالها ..!
عمار رفع حياته: منو..!
شيخه: انته ادرى بالاسم الفني اللي مختارنه لها .. عن اذنك ..

وطلعت من الحجره وعمار عينه عليها .. جدم عمره لين وصل للطاوله .. مد اديه وسحب المبايل وجييك اخر اتصال .. عقب ما فهم قصد اخته  فر الفون وهو متنرفز ... ثواني ورد طاح ع الكرسي وهو مبتسم..


..


ف حديقه البيتين .. عقب ما انشغل كل واحد واتجه للوجهه اللي مخطط لها ..
اتجه قلب حارب صوب نبضه .. هناك وين انشغل فكره وقلبه وروحه بها ..

بالضبط .. وين الزاويه المايله لـ بيت عليا ..

بين ابهامه وسبابته اللي ف ايده اليسار .. مثبت حصايه صغيره الحجره جدام عيونه .. رفع ايده اليمين .. وهو حابس قوه سبابته بـ الابهام .. ثواني واندفعت القوه اللي ف صبعه .. وطلقت السبابه عن الابهام .. عشان يظرب طرف صبعه بـ الحصايه ويطيرها ف جدول الماي ..

حمده: يعني تخترعون حركات .. المهم انكم توصلون الحصا للماي .. والمسكين ايوب ماعنده هم ثاني غير جدول الماي ..
حارب: هو عنده شغله ثانيه اصلا .. اونه ياي دريول .. اخواني يسوقون .. وخواتيه وحده عرست والثانيه يوزوها غصبا عنها ..
حمده ابتسمت: موجود حق امك وابوك ..
حارب: امايه الله هداها .. وماقامت تطلع من البيت .. وابويه اتشبب على اخر عمره ورد يسوق ..وو على فكره ..
حمده: هلا ..
حارب: بيسافر نص واحد .. والله اعلم متى بيرجع .. بس اللي اعرفه واللي مريحني .. انه فتره العرس ما بيكون هني ..
حمده رفعت حياتها: ليش مريحنك هـ الشي ..؟
حارب: لاني في غنا عن اي مشكله بيظهر لنا اياها .. وبتعكر فرحتنا ..
حمده: في حياتكم ما يلستو  وياه ..!
حارب: امبلى.. ايام ما كنا نتغدى مع بعض .. نيلس وجنه بوذيين ملتمين حوله وهو الاله المقدس .. وعاد اللي فيه خير .. يتجرأ ويفتح ثمه ويتلفظ بـ كلمه ..
حمده: هههههههههههه لا عاد مب لهـ الدرجه ..
حارب: والله يبالي اسكنج اسبوع عنده .. عشان ما تقهريبي مره ثانيه بهـ الكلام .. انتي عبالج كل الناس طيبين شراتج .. قومي الحين بوديج عنده .. اصلا من بتدخلين الصاله وانتي عارفه انه موجود ف الحجره .. اتحسين البيت فيه طقوس عجيبه .. كل اللي ف الصاله ينتفظ يخاف لا يكنسر عقب شوي على راس واحد منا ..
حمده: هههههههههههههههههه انته من ويين اتظهر هـ الكلام ..
حارب: انا ما ابالغ .. انا اقولج واااقع .. تبين قومي بوديج ..
حمده: الحين لا .. عقب العرس بنجرب الحياه اسبوع ..
حارب: ولا اسبوع ولا نص يوم .. بنرد من السفر وتنسين اني واحد من هـ البيتين .. عشان ما اتحنين ..
حمده: انته اللي انسى سالفه الشقه ..
حارب: انزين .. بنجووف ..
حمده: حارب .. والله اني مب متعوده ع الوحده ..
حارب: لازم بتتعودين .. حياتج ما بتم جذه على طول .. اكيد بتتغير عقب الزواج .. ف بتتعودين على هـ الشي ..
حمده: ليين متى ..!
حارب: لين ما اتكونين لج اسره خاصه من ريلج وعيالج .. وابتسم ..

اطالعته حمده بنص عين وهي متنرفزه منه .. وهو مع نظراته البارده .. سوالها fly kiss وهو مبتسم .. انصدمت حمده من جرأته .. صدت يمين ويسار .. وحمدت ربها ان مافي حد .. وكفخته على جتفه ..

..

ف بيت احمد ..

مي: وانته شو قلت له ..
عبدالعزيز: ماقدرت ارد عليه قبل ما اخذ رايج ..
مي: تاخذ رايي ف شو ..
عبدالعزيز: يبا يكلمج
مي ابتسمت باستهزاء: ويوم انه يبا يكلمني .. شحقى سار قطع رقمي
عبدالعزيز: و  منو خذ لج رقم ..!
مي: عمار..
عبدالعزيز: وجي ما خبرتيني ..!
مي: عرف بالموضوع قبلك .. وياب لي رقم ..
عبدالعزيز: وشمه ..
مي: اظني ... واحد من اخوانها ..
عبدالعزيز: منو واحد من اخوانها وسعيد بيرجع آخر هـ الشهر .. وفارس اللي متغربل هناك .. وعبدالرحمن تعرفينه اكثر عني .. مستحيل يتكرم ويسوي هـ الشي ..
مي: مادري .. المهم .. خلنا ف موضوعنا ..
عبدالعزيز رفع حياته: شكلها زادت مواضيعنا ..
مي: شو قصدك ..
عبدالعزيز: ماشي .. بتكلمينه ..!
مي: شو اللي يباه ..!
عبدالعزيز: يباج اتردين البيت..
مي: بس انا ماباه ..
عبدالعزيز: مي .. ادري انج ما بتسوين الا الشي اللي ف بالج .. ودام انج حاطه ف بالج انج ما تبينه ف محد بيقدر يقنعج او يجبرج انج تردين له .. بس سمعي رايي .. ولو مره وحده ف حياتج ..
مي جتفت اديها: قول .. اسمعك ..
عبدالعزيز: لا اطوفين الموضوع جذه .. خليه يعرف جيمتج ويحس شويه ..
مي: وشو اللي تباني اسويه اكثر من اللي سويته ..!
عبدالعزيز: ارفعي عليه قضيه .. وصليه للمحاكم .. واول شي بيسونه انهم بيوقفون راتبه .. بنجوفه عقب كيف بيقدر ياخذ لهن ويسوي لهن على حسابج ..
مي: وعقب ..!
عبدالعزيز: عقب الموضوع بيكون سهل .. اسهل بـ وايد من اللي تتخيلينه .. دام ان الموضوع يخصج .. ف الف بـ الميه بيتدخل بدر .. حزتها ما يحتاي اتعورين راسج وياه .. بدر الوحيد اللي بيقدر ياخذ حقج من خليفه بدون محاكم وبدون عوار راس ..  اذا كنتي مقتنعه انج ما تبينه ..!
مي نزلت راسها: ولا ابا اسمع اسمه حتى ..
عبدالعزيز: وبنتج ..
مي: تتوقع واحد مثل هذا .. بيقدر يربي بنته ..

سكت عبدالعزيز .. وهو يطالعها ..ويترياها تكمل كلامها..

مي: بنتي عندي ما بتظيع .. وانا مب خايفه انها تتربى بدون ابوها .. اللي خايفه منه شي واحد..
عبدالعزيز: اللي هو ..!
مي: خايفه .. ان رب العالمين .. يعاقبه ف اغلى شي عنده .. وانا ادري ان خليفه ماعنده اغلى من نوره ..

وطاحت دمعتها ..

..


عقب يومين ..
بالتحديد ف ألمانيا ..


رد عمي خالد من لندن .. ورديت انا لـ شقتي .. او عفوا بيتي .. حتى لو الكل انكر انه بيت بحكم الحجم..

قبل ساعتين طلع حمد ويا واحد من ربعه .. وبديت انا انظف واخم ف الشقه .. لا تستغربون من كلامي .. هذا الروتين اتعودت عليه من ثاني يوم العرس .. بس ما كنت اقولكم اياه عشان ما اصدمكم من البدايه ان كل اللي ف حياتي .. اتغير فجأه ..

خلصت من كل شي تقريبا .. بس باجي حجره حمد الصغيره .. واللي تعود حظرته انه ياكل ويودر كل شي هناك عقب ما سمح لي ادخل عشان القط وانظف وراه ..!

مشيت من الصاله .. متوجهه لهـ الحجره .. وترددت ف اخر دقيقه عقب ما سمعت صوت الجرس ..
اجدمت من الباب .. واطالعت من العين السحريه وانا مبتسمه .. وفتحت له الباب ..

شيخه: مرحبا ..
عمار رد لها الابتسامه: مرحبتييين ..
شيخه: اتفضل ..

دخل عمار .. اجدم من الكنبه ويلس .. ويلست شيخه حذاله ..

شيخه: شخبارك ..
عمار: بخير الحمدلله .. انتي اشحالج ..
شيخه: الحمدلله ..
عمار: شو تسوين ..!
شيخه: ماشي .. كنت سايره انظف حجره حمد ..!
عمار رفع حياته: حجره حمد ..!
شيخه هزت راسها ب هيه: اللي يدرس فيها.. 
عمار: اها .. وهذا حالج  من شهرين ..!
شيخه ابتسمت من ورا خاطرها: ولين كم شهر بعد ..
عمار: ليش ما خبرتينا ..
نشت شيخه من مكانها وسارت صوب المطبخ
شيخه: شو اللي كان بيتغير لو خبرتكم ..
عمار: ع الاقل انرتب امورنا ..

يت شيخه وهي يايبه وياها صينيه الحليب .. ورافعه حياتها من جمله عمار

شيخه: امور شو ..!
عمار: ماشي..
شيخه: وين ثنوي عيل ..!
عمار: ثنوي ولد عموه .. مادري عنده امه ..
شيخه: هههههههه زين تسوي بك ..
عمار رفع حياته: ولديييه انزيين ..
شيخه: ولدك اتقوم تجتله ..!
عمار: خيبه جتلته انا ..!
شيخه: نحن يالسين هني مجابلين الدفايات وميتين من البرد .. انته ساير مسبح الولد ف الحوض ف عز البرد .. وتقول لي ما جتلته ..!
عمار: كل اليهال يمرضون ..
شيخه: لا والله .. كل اليهال يمرضون ..! لو مب عمو عليا جان ولدك مادري شو استوا به .. كثر خيرها اللي مجابلتنه ومهتمه فيه ..
عمار: يعني انتي ما كنتي بتهتمين فيه ..!
شيخه: امبلى بس مب شرات عمو عليا .. انا عادي اطفر واصيح وياه ..!
عمار: هههههههه كيف بتجابلين عيالج انتي باجر ..
شيخه: اي عيال الله يخلييك " وحطت راسها على جتفه"
عمار: بلاج ..!
شيخه: ولاشي ..
عمار هز راسها بـ جتفه: بلااااج ..
شيخه: والله مافيني شي .. بس ميته من البرد .. تبا حليب ..!
عمار: روحي بصب ..

اجدم من الطاوله حط مبايله حذال الصينيه وهو يطالع الشاشه ومبتسم  .. صب له كوب  .. ورد اتساند ع الكنبه .. وشيخه تتطالعه بطرف عينها ..

عمار: شويخ ..
شيخه: نعم ..
عمار: تتوقعين .. انا قاعد اخون ثقه عمو عليا وعمي خالد ..
شيخه: لا حبيبي .. انته يوم انك خنت ثقتك بـ نفسك وخنت ضميرك ودينك.. بعد عمو عليا وعمي خالد منو عشان ما تخونهم ..!
عمار: استغفر الله ..

شل الكوب وبدا يشرب ..

شيخه: استغفر الله من اللي تسوونه ..
عمار خذ نفس: انزين .. ابا اقولج شي ..
شيخه: قول ..
عمار: بتكونين اول وحده اخبرها . .
شيخه: اسمعك .. قول ..
عمار سكت ..
شيخه: بلاك ..!
عمار: شيخو ..
شيخه: دام انك اتقول شيخو معناته بتقول شي ما بيعيبني .. قول قول شو مهبب ..
عمار: هههههههه بلاج ترمسين شرات العيايز ..
شيخه: بتقول والا ..
عمار: بقول بقول ..
شيخه: شووو ..!

رد عمار الكوب ع الطاوله .. نش من مكانه سار صوب الدريشه وهو يطالع برع ..

شيخه: انزين ..!
عمار: شيخو .. انا
شيخه: انته شو ..
عمار: قررت .. اعرس ..
شيخه وقفت: احلفففففف بربك ..
عمار: والله ..
شيخه: منوووووووو  سعيده الحظ ..!
عمار صد صوبها: قبل ما اقولج منو .. قولي لي تحسين اهلها بيوافقون عليه وانا عندي ولد ..
شيخه: اكييييد بيوافقون ..
عمار رفع حياته: شدراج ..
شيخه: اعرف انهم مستحيل يرفضونك ..

رد صد صوب الدريشه ..

عمار: تعرفينها ..!
شيخه: اعرفها اكثر من نفسي ..
عمار: شو علاقتج بها ..
شيخه: وااايد قوووويه .. وايد وايد رغم ان فارق السن اللي بيننا جدا كبير ..
عمار: زين الحمدلله .. يعني بتقدرين تكلمينها .. او ع الاقل.. اتكلمين اخوها عشان يفاتحها بالموضوع..!
شيخه ضاعت ملامحها بين فرح وصدمه: ليش .... منو البنيه اللي تباها ..
عمار مبتسم وهو صاد صوب الدريشه : اخت حمد .. اللي شفتها ف اللفت ..

اختفت ضحكتي .. او .. حاولت اخفيها .. مب عارفه شو الشعور اللي بداخلي .. اتلخبط كل شي فيني.. واختلطت دموعي بـ ابتسامتي .. مشاعر مضطربه .. بين شخص فرحان لـ فرح اخوه .. وشخص حزين على قلبه المكسور .. او .. اللي بينكسر عقب ما بيسمع ان اللي حبه .. قرر يعرس واخيرا .. بس بياخذ غيره ..!
رديت اطالعته وانا عيوني مليانه دموع .. وهو بعده صاد صوب الدريشه ومبتسم .. لاحظت انه مبتسم من الزجاج اللي عاكس لي شكله بصوره خفيفه .. ومن وراه ينزل الثلج يغطي الاراضي والبيوت .. وياريته لو بس يقدر يغطي قلوبنا .. ويغسلها عشان اندور مكان .. يستوعب الكلام اللي قاله عمار ..!

اخت حمد اللي شفتها ف اللفت ...

واللي تترياك ف البلاد يا عمار ..!

ليست هناك تعليقات:

إرسال تعليق