الجزء الرابع (1)

اخواني دبب .. حارب دب .. راشد دب .. عمار دب .. ومحمد دب وياهم .. مسوي نفسه  ابو العتاهيه.. كل ما قلت له شي عطاني ابيات عن الموت والا ايه عن الموت .. اقولك عرس اختيه تقول لي موووت..!

فاتحه شعري وهو خرسان وادور ف البيت .. سايره فوق .. ونازله تحت والكل لابسنّي .. لا وفوق هذا كله .. فارين ثنّوي عندي

يلست تحت وانا ميلسه ثنّوي ف حظني .. وآكل تفاح اخضر ..

نزل حارب .. شافني حب اديه ورا وجدام .. ويلس حذالي .. يطمش ..

حارب: بعدج يالسه انتي ؟

شيخه: قررت اني ما اسير مكان ..

حارب: والله .. !

شيخه: هيه.. وبعدين انته شو ميلسنك هني .. يلا يلا برع .. شمه وحمده الحين بيشرفن وعماتك بعد وميثه تبا تاخذ راحتها .. ياخي اجلب ويهك ..

حارب: بجلبه بس على اي صفحه ..

راشد توه ياي: كفففك من بعيد ..

شيخه: والله انكم ناس سخيفين .. نشت سارت صوب الدريشه اللي اطل على حويهم

الحوي كله طاولات وكراسي .. وع اليمين صافين طاولات البوفيه .. وحاطين حاجز  بين فلتنا و فله عمو علايه يفصل الريايل عن الحريم.. اللون الازرق لاعب دور كبير ف منظر المكان .. ظنيت ان عرس ف البيت يمكن يكون بسيط او حتى ممل .. لكن اللي اشوفه غير عن اللي تخيلته .. حتى عمي خالد ما عيبه الحال .. سار ياب العمال اللي يتعامل معاهم .. وخلاهم يركبون ليتات من جدام بس .. عطى البيتين منظر جميل جدا وتقولون عرس ولده حاط على بيته ومسوي طاف لـ بيت عمي احمد .. !

الكوشه كانت ف الميلس .. ما كانت فخمه وايد .. لكنها جميله رغم بساطتها .. كل شي كان ازرق ف ازرق لان فستان مهره لونه ازرق .. يلست اضحك وانا اتخيل اليوم كيف بيكون.. الشباب كل واحد كيف شكله ومنو منهم بيّول ومنو منهم بيتحسب عمره المعرس.. يالله من زماااااااااااااان ما استوا عندنا عرس ..

حارب رد حب اديه ورا وجدام : والله اختتتتك مب صاحيه

راشد: لا تحلف امصدقنك والله ..

حارب: تضحك ويا عمرها .. الحمدلله والشكر قم قم انسير ..

وشيخه لابستنهم

راشد: اتصل الريال .. ؟

حارب: لا اتصلت الحرمه

راشد: هااه اشوووف قمنا نتعامل ويا حريم ..

حارب فتح الباب : بكرامتك اخي العزيز ..

ومن بندوا الباب شفت ابو العتاهيه بـ ويهي .. وياه مروان 

محمد: انتي بعدج ؟؟

شيخه: قلت لكم ما بسير مكان ..

محمد: وليش تتغلين .. سيري فوق ويا مهره ..

شيخه: وانتوا وين يعوركم ابا اعرف .. يمكن انا مابا احضر العرس ..

مروان: جي على كيفج هو ..

شيخه: ولو ما حضرت شو بيستوي ..

مروان: بتنظربين..

شيخه: ومنو بيظربني ان شاء الله ..

مروان: انا

شيخه: ترا هـ اللي قاصرني

مروان: حسستيني ان ف حياتج مب منظربه .. قووومي خلصي زين لا تنكدين على اختيه فرحتها .. كفايه النكد اللي قبل يومين خرب مودها

شيخه: انتو وين بتسيرون ..

محمد: طالبين كيكه بنمر ناخذها ..

شيخه: الحين انته .. صار لك ساعه مسوي عمرك ابو العتاهيه .. حاشرني .. الموت والموت .. والحين ساير تاخذ كيكه ..

محمد: ليش حرام .. !

شيخه: والله اسأل نفسك .. انا قتلك وصلني الصالون عطيتني محاضره هادم اللذات .. والله انك منكر انته سر سرررر ..

محمد: قتلج انا مشغول قلتي لي بسير ويا الدريول .. هنييي قتلج حرام ..

شيخه: خلااااااااااص سررر مب سايره مكان انا

مروان: خلني ارد واشوفج تحوطين بـ كشتج ويا هـ البجامه .. زين بسوي بج ..

شيخه: طوف طوف انته بعد .. وايد امصدق عمرك ..

مر مروان جدامي .. ويود ثاني من خده وباسه .. واتخبل ثاني الا يشله مروان النذل اللي سوا له طاف وطلع .. ونزل عمار .. لاحظوا اخواني يظهرون بالدور ...

عمار: هاي ..

شيخه: وعليكم الهايات ..

عمار: بلاج وارمه ..

شيخه: ماشي ..

عمار: ليش يالسه هني .. ما تخلصين عمرج ..

شيخه: مب متفيجه..

عمار اطالع ثاني : عشان هذا يعني ..

شيخه: لاء .. مب عشان .... هذا ..

عمار ابتسم: يبيه بوديه ويايه ..

شيخه: نعم .. !

عمار: وين كرسيه سيري يبيه بركبه ف السياره ..

شيخه: لا خله ..

عمار: بيبه جريب المغرب عقب ما تخلصين .. الحين بوديه عشان تفضين ..

شيخه: مابا خله ..

عمار: شفيج انتي "وابتسم" مب كنتو تبوني اشله واهتم به .. ثرني بشله الحين ليش خايفه .. ولديه هذا شيخوه ..

وشيخه تطالعه بـ طرف عينها

عمار: ابتسم: انا عمار اخوج .. لا تستهبلين شوفيني ف عيني قبل لا تكلميني .. انا مب ابوج ..

شيخه: زين اصبر .. بيب لك شنطته ..

عمار: اووكي ..

شيخه: عمار

عمار: نعم

شيخه: انا بتصل بك كل ربع ساعه .. والا تدري كل خمس دقايق .. ما أأمن الصراحه .. اذا سمعته يصيح صياح طالع من قلبه..

عمار يطالعها وهو رافع حياته: انزين .. !

شيخه: اول شي بصيح وياه .. عقب صدقني بزعل منك ..

عمار: طوووفي يبي اغراضه خلينا نذلف

شيخه: ايه ايه .. تبا تذلف .. اذلف روحك هاك الدرب .. ولد اخويه ما تذلفه وياك

عمار: ولد اخوج .. مب ولديه انا .. !

شيخه: لاع ..

عمار: اقوووووووول ذلفيييييييي عن ويهي .. وشل المخده وفرها عليها .. ضحكت وركضت سايره فوق 

و ابتسم عمار وسار صوب الباب ..

دش المسا والربشه ف بيت عليا كانت اكبر من بيت بدر.. الشباب كلهم كانو موجودين وكل واحد عاده وكشخته

عامر: ولا يبين لونك من الكندورة كلك ابيض جنك كاسبر بسم الله ما نروم انميز بينك وبين الكندوره جنكم اجسام شبه شفافه لا وبعد شال خيزرانه سوده عسب يعني محد يدعمك والا يخترقك لاقدر الله..

حارب:انته بالع راديو .. والا كاتب هـ الكلام قبل لا ترمسني .. عنبوك من وين ظهرت هـ الرمسه .. !

عامر: والله جوف ويهمك تقول مسبح بكلوركس..

حارب: طووف يالبايخ..

احمد: عميّر ..

عامر: عيوونه ..

احمد صد صوب حارب وابتسم: والله انه لوتي يعرف اني بهزبه  "ورد يرمس عامر" تعال هني ..

عامر ياي صوب ابوه: امر

احمد: تدري مره ثانيه ان قلت لي ابا فلوس حق الحلاق شو بسوي بك

حارب: عمي احمد انته وااااااااايد معور راسك ويا هذا .. والله لو ولديه .. جان حسنت راسه بالموس ولا سويت له سالفه

عامر: ينعن يومك يا حروب .. جييييييييييي تخرب ابويه عليه

حارب: لانه واااااااااااايد مسوّلك سالفه ومعطنك ويه .. ويييين المليييييج والله يووعان انا ابا اتعشى

سيف: المليج في ملكوت الله يسبح..

منصور: الله يغربلك جي تجتل الريال..

غانم: وانته جي تغربل اربيعي ؟

سيف: الله يغربلنا نحن ليش .. الله يغربلك انت بعد ويانا

عامر: صدق وينه.. عمي بدر بعد اختفي ..

حارب ساير صوب الطاولات: عمك بدر زين منه يا وما فشلنا "وفجأه وقف"

طارق ابتسم: تعال تعال..

حارب: لا انا ما اي اخاف..

طارق: ليش..

حارب: اخاف من المرتفات انا..

ابتسم طارق وروح عنه..

محمد: جي تفشل الولد..!

حارب: عادي عادي... حبوب ولد عمتيه ما يزعل صح طارق..

طارق: صح..

سار حارب صوبه وحط ايده على جتفه وابتسم

محمد: والله ما عنده سالفه يرد عليك.. تدري لو انا مكانه جان عطيتك بالمسجبه ع راسك..

مروان: انته امبونك مجرم بعد الحين مربي لحيه ارهابي مستوي .. صدقها شيخو يوم سمتك ابو العتاهيه

فارس: اختك خلت حد ما علقت عليه ..

مروان باستهبال: انته شو لقبك ؟

فارس: اموات "وابتسم"

مروان: لا لا .. لازم اقول لها تغيره .. فارس ابتسم "وصرخ" فااااااااااااااارس ابتسسسسسسسسسم..

فارس ظربه على ظهره: اسسسسكت فشلتنا .. 

..

كنت ف بيت قوم عموه علايه.. لو اتشوفوني بس لو اتشوفوني.. والا لو عموه علايه اصلا اتشوفني بتبيعني والله .. مسويه فير لـ شعري كله .. ومخلتنه مفتوح .. من فوق بس رافعين لي اياه شويه .. هذا اللي رضيت اني اسويه .. عقب ما اتاخرت وقررت اني استشوره بس .. وراعيه الصالون اقترحت عليه هـ الاقتراح .. ما قلت لها لا .. وما حطيت شي ف ويهي  .. وحظرتي ادور ف بيت قوم عمو علايه متلبسه وكاشخه واتخيلو عاده شو ادور!!..

شيخه: حمدوه ولا واحد منهم يليق عليه ..

حمده: تستهبلين تراج .. كل يوم سايره وراده السوق .. جي ما خذتي لج واحد يناسب طولج ..

شيخه بصوت يكسر الخاطر: لا تطنزين عليه انزين .. يعني شو اسوي انا يوم ان ربج خالقني جذه قصيره ..

حمده: هههههه عن الاستهبال.. عندي واحد يديد ..

شيخه: لالا .. ما بلوثه اخاف امشي به ف مكان غلط.. تعرفيني ما بيود عمري وبصبر عن حشره الشباب ..

حمده: عيل سيري ولي .. انزيييين

شيخه: افا بنت عمي ..

حمده: طفرتيني .. خليني اخلص

شيخه: زين زين ببند .. بس قولي ويين الكعب .. !

حمده: ف الكبت ثاني باب تحت على يمينج ..

شمه: قوليلها والله ان ييت وشفتها مخربه الحجره لـ اخرب لها شعرها

شيخه: قوليلها سيري ولي ..

حمده: انا مب متبرضه لـ سخافتكن .. يوم بتين اظاربي وياها يلا مع السلامه

وسدت الخط بـ ويهي اللي ما تستحي

رحت حجره حمده وشمه ف المكان اللي قالت لي اياه.. فتحت الكبت وخذت الكعب اجربه ..يعني هـ الكعب بيخليني اوصل طول شمه ع الأقل.. لبتسه ووقفت .. بس تعالو قوموني الحينه.. شو ينششني ويني انا ووين الكعب الله يخليكم.. حطيت اديه ع الطاوله اثبت نفسي واحفظ توازني عن اطيح ع ويهي ويصير لي ميكب طبيعي.. وطاحت عيني ع الورقه اللي جدامي

حبيبي..

ليـه تــخـفي شو قـــك

وأخفي أنا شوقي.. 

تدري فــي قـــلـــبــي

وأدري أنا بقلبك.. 

لو في مـره الـتــقـيـنـا

بالسلام ترجف يدينا.. 

عيوننا فـيـهـاكـــــلام

والوله واضح علينا

ابتسمت..وانا رافعه حياتي .. هاي انا شاكه ف اصلها والله تقصد منو ف كلامها بالضبط .. اصلا هي نادرا ما تيلس ويانا ف الحديقه .. ونادرا ما تسولف وتاخذ وتعطي .. شو سالفتها هـ الحمده ..!.. هذا اللي قلته ف داخلي  رديت الورقه مكانها  وثبت عمري مشيت شوي شوي .. عقب شفت ان الموضوع عادي.. طلعت من الحجره سايره صوب الدري بس تعالو انا يالله  وصلت لين الدري وقدرت امشي من هناك لين هني هـ الدور انزل هـ الدري بطوووله.. يلست على اول الدري .. طلعت النعال شليته بـ ايدي توني يايه امشي سمعت صوته وهو يقول .. ساير حجرتي دقايق وبرد .. رديت خطوتين ورا بحيث انه ما يشوفني

ف البدايه صخيت .. وخفت ارمس .. بس لو ما رمست .. ووصل هني وحتى لو سرت حجره شمه وحمده .. البيت مافيه غيري انا وهو .. والله ابويه لو شافنا سيده بيودنا المحكمه  والا ليش المحكمه .. المليج بكبره هني ..

شيخه: ف .. فارس ..

فارس رفع راسه يدور مصدر الصوت ..

شيخه تصرخ : اطلع برع ..

فارس رافع حياته: نعم .. !

شيخه: عقب ما اطلع .. تعال

فارس: انتي اللي يايه بيتنا ..

شيخه " بدا يستهبل" : انزين اطلع .. لين ما انا اسير عقب تعال ..

فارس: ما يخصني ..

شيخه: لا تعور لي راسي والله مب متفيجه .. يلا اطلع ..

فارس: مب طالع .. كيفي .. دبري حالج

شيخه " ادبر حالي لا " وما حست بعمرها الا وهي فاره عليه النعال لي ف اديها: اطلع زييييييين

فارس: تبيني اسوي لج سالفه بعد لا ..

شيخه: اطلع بررررررررررررع يالأموااااااااااات..

فارس: عنادا فيج مب طالع .. وهـ الظربه رااااادلج اياها

شيخه: انت تعاند منو والله ابوي بيبيعني وبيبيعك فوقي لو شافنا

فارس: مشكلتج ..

شيخه: صح "واتنهدت "مشكلتي انه ابويه ومشكلته اني بنته "سكتت شويه وردت رمست بصوت يكسر الخاطر بس عشان يتاثر" الله يخليك سر .. تدري لو شافنا شو بيسوي ما اباه يجلب الدنيا الليله .. مب عشاني عشان اختيه بس.. الله يخليك سر