الخميس، 29 سبتمبر، 2011

قصتي الاولى + فقيد الكوره الاماراتيه

السلام عليكم ورحمه الله وبركاته 

وانا اكتب السلام .. حاسه ان محد بيعطيني ويه وبيرد عليه .. 
والصفحه بتم فاضيه .. الا من ذكرياتي 

ف ان ابى الاشخاص ان يخطوا لي ردا .. 
ف سأكتفي بتدوين ذكرياتي وكل ما يجوف في خاطري هنا .. في عالمي الخاص 


هـ الفتره .. ظهرت قوانين يديده ف الدوله .. وتغيرت كثير من الانظمه 
ازدادت الراقبه المروريه في الشوارع والقناص مب امقصر في صيدهم 

وكل ذلك .. لان الامارات وفي تاريخ 25-9-2011 بالذات 
افتقدت أغلى شباب ابوظبي عفوا .. بل اغلى شباب الامارات 

ذياب عوانه 

اترككم مع هذه النشيده التي مزقتني بحجم الحزن الذي سكن قلبي على فراق هذا الشاب الخلوق 
رغم اني لا اعرفه .. ولم اتعرفه عليه الا في يوم وفاته .. 

ولكن قبل الرابط .. كان لابد ان اقدم اعتذارا على " الدراما اللي سويتها فوق " بعد ان قررت ان اخصص صفحه من صفحاتي الخاصه له 
لا اعلم لماذا ولكني مؤمنه بـ الله اذا احب عبدا .. حببه الى الناس وحبب الناس اليه
رحمك الله " يا ذياب " واسكنك فسيح جناته 


الأربعاء، 20 يوليو، 2011

سواليفي من بعد غيبه

كم شهر ما حدرت هـ البلوق ..!
والله ماعرف نسيت..!

السلام عليكم ورحمه الله وبركاته 

والله يحز ف خاطري اني اختفي بالشهور .. ارجع .. اشوف اللي يتابعوني زادو
واللي يبلغوني تحياتهم .. كثرو

واللي اشتاقولي .. كفايه نكاتهم اللي يحطولي اياها ع المسن 
>> المسن ..!
شخبااااري ...!

والله احترررت وانا اتريا هـ الصفحه تفتح
"يعني اوني اترييت وااايد"
يا ترى عن شو اكتب..!

آخر شي قررت
بقولكم كلمتين وبمشي


أنا حاولت أنسى 
طالبه في جامعه زايد 
تخصصي " الى الآن " تغذيه 
يمكن اغيره السنه اليايه 
عمري 20 سنه >> لاتصدقون البيانات اللي ف المدونه 
احب العقرب .. واكره اسبونج بوب
تواجدي .. في منتدى درايش
كنت عضوه سودا " يعني عاديه " ^__^"
اصبحت منتجه " اناشيد مب فرقه شعبيه "
عقبها اطورت وصرت مشرفه الميديا
والآن انا إداريه مفلوعه بالأحمر

حاليا .. اشتغل على منوعات انشاديه اسمها كلر مكس
واخرى " تصدقون اني نسيت اسمه @.@ "
مع مجموعه من اعضاء درايش

وسيدي ثالث منوعات قرآنيه 

كل هذا عشان ننشره ف رمضان 

امم شو استوا بعد ف الفتره اللي غبت فيها ..! 

هيه .. عندي قصه جريب بتنزل بإذن الله في منتديات  ألم الإمارات بـ قلمي أنا .. حاولت أنسى
قصه إجتماعيه .. تتناول قضايه اجتماعيه موجوده في المجتمع العربي
بعيد عن الجذب والتأليف والخريط 
هدفها .. نقل احساس .. يمكن ما نقلته اي كاتبه ثانيه
>>ما امدح عمري خخ بس .. تقربووو القصه اذا حابّين 
هيه نسيت اخبركم .. باللغه العربيه المفلعه " يعني العاميه

واظن ف هـ الفتره خلوني طقاقه ..! 
مافي حد ما قال لي ضبطي لي نشيده عرسي مادري حد قالهم اني شرف دي جي مثلا..!


حسيت اني بديت ابتعد عن رب العالمين .. وايماني بدا يقل .. والشيطان لقى له فرصه انه يقتحمني
وينكد عليه 
 ف استعذب بالله منه .. ودخلت في معركه .. اسمها معركه العناد تحت شعار
يا انا يا انته يا ابليس ..!

الركعتين خليتهم اربع .. والاربع خليتهم ثمانيه
تعرفت على وااااااااااااايد قرّاء جدد .. عشان نفسي الاماره بالسوء ما تقول لي 
بس مليت من صوت هـ القارئ
سرت خميت المكتبه .. وخذت لي وايد كتب عشان اسلي نفسي وابحث عن فايده وحده ع الاقل بين سطورها

سويت فورمات حق فوني .. ورجعت حطيت نك " حاولت أنسى
بعد أن قضيت سنه كامله وانا متنكره بـ نك درايش 
لاني كنت ماسكه خدمه البنات 
استمتعت وااايد بـ المهمه .. وحبيتها وحبيت اعضائها

حاليا .. في فكره يديده ف مخي .. وهي 
بعد ان استبدلت النظارات بالعدسات اللاصقه 
افكر اني اسوي عمليه " الليزك" كي اريح نفسي وارجع بصري 6 على 6
في شي ف داخلي يقول لي هيه .. وشي يقول لي لا 
تبون الصدق الخوف هو الشي الوحيد اللي يقول لي لا 

نظري بدا يقل اكثر ف اكثر ف اكثر 
القرنيه اصبحت واضحه بشكل كبير انها نازله قليلا عن عدسه العين 
وفي هـ الفراغ اللون مائل للرمادي 
ف صارت اطراف عيوني رماديه كـ قطه ملبوسه 
@_@

اظن خلصو الكلمتين ^__^




السبت، 23 أبريل، 2011

وأي أمل { .. أضاعوا


السلام عليكم ورحمه الله وبركاته

التاريخ
غير محدد



اليوم
لم اشهده بعد

الشخصيات
لم يسبق أن تبادلت أطراف الحديث معها

اللحظات
خارجه عن نطاقنا

الهدف
حلم قد طال انتظاره



فراشات ll تحصي ~ أنفاسها وزهور قد { .. ذبلت قبل موعدها
على حروف تلك النشيده كانت الدموع ( تنتظر
وعلى ايقاعها { أبت روحـي } إلا ان تعبّر 



ل، تحكي جروح لا تزول ،,في قصه تختلف فيها الفصول
هكذا {..هي..} مشاعري
وهذا ما دفعني اليه [ روحي ]




لمشاهده الفيديو
الأمل ممكن .. } للمنشد محمد العمري 




أول مره استخدم هـ البرنامج .. اذيت وحده معايه في درايش وطفرتها الفقيره 
اتريا انتقاداتكم البناءه (=

الأربعاء، 30 مارس، 2011

يعني عقلت يعني ..!!



كملت العشرين ولين اليوم كاتبه في البلوق .. ان عمري 19 سنه
قبل يومين شفت وحده من الأهل .. والقهر انها تقرب لي .. يعني جريبه مني واشوفها دوم
تقول لي تعالي يالصغيره اللي مسويه عمرج كبيره
قتلها كيف يعني
جان تقول لي مادري عنج عمرج 17ومسويه نفسج حرمه

قلت عفوا .. ولكني دخلت العشرين
كادت ان ( تشرق ) بالماي وقالت لي بكل برود وأمام جميع الحضور
حذااااااااااااااااااابه

ادري اختفيت فتره طويله .. وانقطعت عن النت بشكل تام

اعذروني فكل ذلك كان .. غصبا عني

خذت اجازه من النت .. لإعيد ترتيب اوراقي .. واسوي فورمات لـ مخي
يمكن اقتنع اني دخلت العشرين واعقل شوي .. !!

فتحت عيني ..  الساعه 7  وربع  صرخت نشيت بسرعه بسرعه ازهب .. ماعندي وقت ..
7 ونص لازم اظهر من البيت .. كلاسي يبتدي 8
وبسرعه خلصت ... ازهبت .. ركبت السياره واشخط للجامعه اللي تقولون رحله قريش ( الشتاء والصيف)
وصلت .. حطيت شنطتي  .. بديت اظهر قشّي

كتابي .. فايلي .. لابي .. فوني النوكيا وفوني البـلاك بيــ ...
بس لحظه وينوه !

فضيت شنطتي بكبرها .. ومالقيته
فوني وينه !!!

اتصلت عليه .. حرقته .. محد رد عليه
اعتقد اني نسيته ف البيت .. !
او يمكن كان ف حظني و يوم نزلت ف البارك طاح عني ..
او يمكن ف كاراج البيت ظيعته
والله مخي افتر ماعرف وين فريته

الموهيم .. اتصلت بـ اختي .. قلت لها يوم بتين الجامعه شوفيه ف حجرتي اذا لقيتيه يبيه

قالت لي اوكي

ولبستني !_!
اي شي اتصلت بها ما سوت لي سالفه

يلست ف الكلاس ومندمجه ويا السير .. اول وحده حليت الاوراق اللي عطانا وسلمتهن ..
وهي يطالعني بـ كل استغراب .. العاده ما اسلم الورقه الا عقب ما انهزب .. !

من بدا البريك سرت فوق ( مقرنا ) وانا منتبه ان اللفت وصل وبدون لا ادعم لي ستين واحد ف الدرب

طلعت نعالي .. وحطيته بـ ادب بدون لا افره ويطير لين نص الحجره اللي نيلس بها
سلمت ع الكل .. ورديت السلام بدون لا اطنش و احط عيني ف مبايلي 

يلست بدون لا اسحب اي واير .. او اي جارج عشان اركب جارج فوني 

في قمه الادب والاحترام والذوق .. ومن قالت اربيعتي منو بتتريق وياي
قلت لها أناااااااااااااااااا

هنا .. صُدم الجميع

انتي يالهيييزه .. بتمشين لييييييييييين درب الكانتين !!

حاولت بسم الله عليج شو استوا بج

جان ارد بـ كل عصبيه .. يعني شووو حرام الواحد يعقل .. والله ..!
طلعت وانا ادري ان كل وحده ميته من الضحك ف داخلها بس ما ضحكت عشان ما اعصب زياده

رديت البيت .. شليت فوني وحظنته .. تعبثت فيه
الشاشه سوده !_!
ركبته ف الجارج .. ساعه ساعتين3  .. 5.. 4..

يا جماعه من الظهر فوني مركب ف الجارج لين اليوم الثاني
ومااااااااااااا اشتغل
سرت الجامعه اليوم الثاني .. وبنفس الهدووووء
اربيعاتي
آمنن بـ رب العالمين
خلاص حاولت عقلت .. وما بترد تسحب الجراجه مره ثانيه
او تشوت لابتوباتنا .. او تفر النعل
ثوني
وسألتني وحده فضوليه .. وين فونج
قلتلها مافيه جرج .. وما يطيع يفتح اصلا

قالت افا .. يبيه

مددت يدي واعطيتها هاتفي البلاك بيري
وطلعت جراجتها وركبت فوني فيه

ربع ساعه .. وعاد هاتفي للحياه

صرخت .. وحشرت الدنيا وشليت المصلى فوق راسي
اول شي سويته اني فلعتها على راسها
بعدها رفست لابتوب اللي مجابلتني
ورفضت كل المغريات اللي قدمتها اربيعتي
مقابل اني اسير معاها الى الكانتين

والكل يطالعني بهـ النظره
@.@

جان تقول لي وحده

ماااااااااااااااااااالت على هـ العشرين اللي دخل حياتج قبل لا يشوف ويهج
عيل انتي ويهج ويه وحده عمرها عشرين سنه
قالت كبرت قالت !!

..

من أمس واحس ان لثتي وارمه
عقب ظرابه ومشاورات وكشف وفحص
اكتشفت ان ظرس العقل بيظهر لي

يعني لو شلووووه ...اغسلو ايدكم اني اعقل ..!

الثلاثاء، 15 فبراير، 2011

عظم الله أجري



كـ عادتي كل يوم ( حفظني الله ورعاني ) اني انش ( استيقظ ) على صوت المنبه
استعداد لـ يوم جديد في حياتي الجامعيّه

بعد ما ابند المنبه .. اشوف مسنجر البلاك بيري .. والقي نظره على احدث البرودكاستات ( الرسائل)
اخذ نبذه عنهم بـ مجرد رؤية الرساله من الخارج .. اي بدون لا افتحها

اليوم .. كررت الحركه الروتينيه

طاحت عيني على أول رساله

انتقلت الى رحمه الله تعالى
فـلانه فلان فلان فلان الـ عائله الفلانيه
اليوم الثلاثاء 15-2-2011
ودعاء للمتوفى

فركت عيني ورديت قريت الرساله مره ثانيه

هذا اسمي واسم ابويه ويدي ويد ابويه والعايله

شفت نفسي ورديت شفت البيري .. بس انا لازلت حيّه ارزق

عقب ما صحصحت .. استوعبت انه تشابه اسماء
حطيت فوني ع السايلنت وسرت الجامعه 

ع الساعه 10 رن موبايلي .. رديت عليه

كلمتني اربيعتي ( صديقتي الصدوووقه ) هلا شخبارج شعلومج
وينج انتي شو عندج ويا منو يالسه وووو

استغربت من اتصالها في هذا الوقت .. واستغربت من صوتها
نبره صوتها مب عايبتني ( لم تعجبني )
حسيت ان فيها شي وسألتها .. واجابتني بكل برود
لا مافي شي بس متصله اشوفج
وبندت

ما اقتنعت بـ سببها .. ولكن .. انهيت المكالمه

عدت الى المنزل .. و بدات في تناول وجبه الغدا
بعدها ( جابلت ) اللاب توب لـ انهي واجباتي الدراسيّه
الى الساعه السابعه من مساء اليوم
خذت المبايل .. وقلت بشوف الرسائل .. فتحت اول رساله

حاولت حبيبتي انتي بخير صح .. !

حاولت .. مستحيل .. اصلا لو انتي متّي بيوصلني اكيد لان امي تعرف امج ..

انا وصلني الخبر وزغت الصراحه .. انتي بخير؟؟

انا خفت .. بس ابا اكلمج عشان اتأكدت

وحده استوي اربيعت اختها .. قرت البرودكاست قالت لـ اختها
اتصلي بها تأكدي



نشيت وكتبت رساله وطرشتها للكل

الرساله تقول :

لكل من يبا يتأكد من الخبر
يا جماعه انا بخير الحمدلله مافيّا شي .. بعدني حيّه ما مت
البرودكاست عن وحده ثانيه توفت اسمها بالكامل مطابق لـ اسمي
ربي يرحمها .. ويحفظني قولوا آمين

بس شكلهم ما فهموا @.@
ردوا طرشوا لي ..

والله اني احس بـ خوف .. البرودكاست يخوف .. كيف جي اسمها بالكامل شرات اسمج

انا كلمتج بس بعدني احس بـ خوف


يا أوادم قلت لكم اني بخير .. وحده منهن كلميتها وقلت لها اني بخير وهذا مجرد تشابه اسماء
بس منو يقول البنيه يالسه عزاي .. تصيح وذابحه عمرها
آخر شي قلت خلاص .. شكلي بسير لها لين باب بيتهم عشان تشوفني وتمسك ويهي وتتأكد اني لازلت حيّه أرزق

رغم ان الكل كان خايف .. خصوصا اني ما رديت عليهم في نفس الوقت اللي كلموني فيه
مما أدخل الخوف في قلوبهم
ف البعض بدأ بـ التوتر .. والبعض شعر بـ الخوف

والبعض منهم .. بدأ بـ البكاء واستقبال التعازي في حضره سموّي

الا ان ضحكتي شلت البيت على راسها
اقول لهم بخير .. يقولون لااااااااااااا .. بعدنا نحس بالخووف

الى ان دخل الخوف في قلبي

يارب .. لو تطابق اسمي مع شخصي في هذا اليوم
وقبضت روحي بدلا من روحها
يا ترى شو مصيري انا اليوم .. !
وماذا سيكون حالي
كيف بجابل رب العالمين .. وهل بقدر اجاوب على الاسئله الثلاثه اللي بنسأل عنها وانا في القبر
يا ترى قبري هل سيكون روضه من رياض الجنه .. اما حفره من حفر النيران

اسأله كثيره خطرت على بالي وانا اتخيل نفسي بدلا منها

اللهم ثبتها عند السؤال .. اللهم نور قبرها واجعله روضه من رياض الجنه
اللهم اغسلها بالماء والثلج والبرد ونقها من الذنوب والخطايا كما ينقى الثوب الابيض من الدنس
اللهم ارحمنا اذا صرنا منهم .. اللهم كن معنا اذا وارانا الاهل والاحباب وصار مثوانا تحت الارض بين الدود والتراب

اللهم آمين

الاثنين، 7 فبراير، 2011

لك يا قدس




كيف لانحزن والقدس تنادي الرجال

نطلب النصر اخيه والكفر منا نال

طال ليل الظلم فينا اين فجر المنال

اين من يأتي ويحمينا مــن

{ .. الاحتلال



//






//



أتيناك أتيناك في ظلام الدروب

حميناك حميناك ان طالت الحروب

فديـناك فديـناك بالمال والقلوب

ان لم  تفض ارواحنا حتما

{ .. نصرناك

من هـنـا

جديد المنشد : محمد العوده

جديده بـ ذكريات قديمه .. ذكريات مؤلمه
سمعوه يوم يقول .. حتما نصرناك .. بنبره جدا حزينه )"=