السبت، 16 نوفمبر، 2013

الجزء العاشر (2)


بالباجر الصبح


طلعت الشمس على هدوء ما تعودنا عليه .. بيتنا هادي .. اخواني مش موجودين .. مريت على حجره حجره .. نزلت تحت .. وما لقيتهم .. طلعت برع .. الحديقه فاضيه ..
هذيل اللي حاشرينا من أمس .. حطو اغراضكم ف السياره وما بنترياكم لو تأخرتو .. ؟
صار لهم شهر يخططون لهـ اليوم .. حاجزين فندق الحمرا ريزيدنس ف راس الخيمه .. وحاشريني انا ورشود ومايد .. لاننا الوحيدين اللي انداوم وما نقدر ناخذ اجازه وعلى قولتهم مأخرين كل شي .. راعو مشاعري انا ومايد .. بس راشد ما سووله سالفه .. ف حجزو الخميس واليمعه والسبت ..

يودت البيري .. سرت عند اسم حارب .. وسألته وينه .. قال لي تعالي بيت قوم عمي أحمد .. اتنهدت من الخاطر وسرت ..

دخلت .. وسرت صوب باب الفله .. انتبهت ع الورقه اللي موجوده جدامي ..

" الشيخه .. اتبعي الخطوات اللي جدامج "

رفعت حياتي ومشيت .. هذيل ناس مب صاحيين والله .. حاشريني من شهر .. خلصي وخلصي ونبا نطلع .. عشان يعلقون هـ الورقه جدامي ..
مشيت ورا الخطوات .. مادري مسوينها بـ ريل روضه والا ثاني .. وصلت الصاله .. ووقفت ..

على يساري  سبوره نوره المتوسطه ..مكتوب عليها

شيخه بدر محمد .. 95,9 وجدامها طاوله ملياااانه .. حتى ما عرفت اميّز شو اللي عليها بالضبط .. اجدمت اكثر من الطاوله وماحسيت الا بمدفع ناقع فوق راسي.. وصوت الشباب وهم يصرخون ..


مروان يدق وعامر يصفق وينشد

عامر: على طاري الفرح نحكي حكايه حفلنا الليله حكايه عن طموح كبير في رؤيتنا تفاصيله
أحمد: استغرب من عيالي يوم يقولون شي خاص بالمسلمين ..
عامر: ليييش .. مخلللف يهووود ..!
احمد دز عامر واجدم من شيخه وحظنها: مبرووووووووووووك .. يا أحلى بنت اخو ف هـ الدنيا
شيخه تضحك: الله يبارك فيييك يا أحلى عمي أحمد ..
مي: حبيبتي .. والله اني مستانسه لـ درجه ما تتوقعينها ..
شيخه وهي تحظنها: بيضت ويهج عمووه ..
مي: هييه غلبتيني ..
شيخه: يعني انا اللي فزززت .. هاه ويين هديتي ..
خليفه : ياللحفه ..
شيخه: يلا يلا .. لاتغييير السالفه .. وعد الحررر دييين ..
خليفه: هههههههه انتي خلصي سلامات والأخذ بالاحضان عقب سيري شوفي هديتج ..
شيخه: شوو خلصي سلامات .. كنت تقول لي خلصي امتحانات .. وخلصت والحين تقول لي خلصي سلامات .. مابا .. اخاف اسلم وانقهر عقب .. اتقصون عليه تاخذوني بالأحضان بس
عبدالعزيز: بلاج انتي .. مستويه اخس عن مايد..
شيخه: هههههه وينه ميوود .. ما يا يشاركنا الحشره .. 
مروان: مايد اصلا دارس ومتخرج بس عشان الهدايا ..
عبدالعزيز يضحك: مبروك حبيبتي ..
شيخه: الله يبارك فييك عمي ..
مايد توه ياي وسيف وياه: هزززلت يا مايد بدر .. لأجل هـ العيون ما برد عليك يا مروان .. والا انا سمعتك
سيف: بنت عمي .. مبروووك .. كنا ناوين انسوي  مفاجأه حقج وحق هـ التنك بس اخوج ويهه مب ويه مفاجآت
مايد: والمفاجاه عاد .. لا تحسسني ..
عبدالعزيز يضحك: والله ما تستاهل انته .. يب يب اللي عطيتك ..
مايد: لالا لا والله .. امزح وياك


وصلو الباجين .. والعدد اكتمل تقريبا .. بدت الحشره والربشه .. اللي يسلم واللي يبارك واللي يسمع التهديد من هـ الثنينه اللي مب جايفين خير ..

شمه: واااي فدييت اللي دومها امبيضه ويهي .. واخيييرا انضميتي لـ قطار البطاله
شيخه ضحكت وسارت صوبها.. حظنتها وهمست ف ذنيها: بدرس .. وبتشوفين يا شموه ..
شمه: فكيينا زيين .. مبروك دبووتي ..
شيخه: الله يبارك فيج ..
شمه: والله تستاهلين .. قلبي ما عورني ع الايام اللي ماشفتج فيها ..
شيخه: لا والله ..
شمه: هييه .. شو هداياج ..
حارب: خير خير خييير اخت شمه
شمه: الخير بويهك .. قم ..
حارب: يلا يلا .. مال اختيه واخويه .. انتي لييييييش ..
شمه: انا واختك واحد .. ماشي فرق ..
شيخه: بسسس لا تظاربون .. يالله .. متى بتعقلون انتو .. ؟
شمه: والله انا وعدته متى ماشسمه انا بتأدب وما بتقارض وياه .. بس اخوووج مب قد كلمته ..
حارب ضحك: زين انا براويج .. ان شاء الله يطلع اسمج عندي ..
شمه: خسي مابلعب وياك ..
حارب: مب على كيفج .. وانتي شدراااج اصلا اذا اسمج عندي والا ..
مي: بس صخووووو ..
منصور: صرخي من اليوم لين باجر .. محد بيسوي لج سالفه ..
مي: قله ادب .. شسوي بكم ..
غانم توه ياي وسار صوب الطاوله: خييييييييييييبه .. ف يوم واحد يمعت راتبي مال سنه كامله   انا ليش اداوم .. كل سنه بعيد الثنويه .. وبيمع هـ المبلغ بيعيشني سنه كامله ..
عبدالعزيز: تقولها وانت واثق من عمرك .. انت 85 ماقدرت اتييب بعد بتييب  95
شيخه: عفواااااا .. 96
غانم: لا والله تستاهلين بنت اخويه " واجدم منها" مبروووك يالدبببببببببببه
شيخه تضحك: الله يبارك فيك يالسلق ..
مي: وين الباجيين ..
منصور: منو ناقص اصلا ..
مي: سعيد و ..
سعيد قطع عليها: انا هني ..
مي ابتسمت ف ويهه: فديتك والله .. وين اخوك ..
سعيد: ياي ورايه  .. الدب ما قدر يسبقني
حارب: عوذ بالله من غضب الله .. سعيد هـ اليومين مجابل شمه انته .. ؟
سعيد: شدراك .. ؟
حارب: اشوفك قمت اتخربط ..
ضحك سعيد ووصل عبدالرحمن ووراه محمد وطارق
مي: اففف ملييييت وانا اترياا ..
عامر: وزعي واللي ما يلحق مشكلته ..
مايد: هاه  الأموات الثنينه وصلو ..
ضحكت مي وهي تطالع الباب ..
عمار: السلام عليكم..
الكل: وعليكم السلام ..
ابتسم عمار من قلبه واجدم مني ..
عمار: والله كنت ف الدواااااااااام .. بس وصلني الخبر من حارب .. حرقت تيلفونج ولا رديتي عليه ..
شيخه: كيفي ..
عمار: خيبه شويخ ..
شيخه: مابا .. لا تقص عليه بـ رمستك ..
عمار: عن هـ الحركات ..ولف ذراعه على رقبتها
شيخه بصوت واطي: شل اديك ..
عمار: ليش عشان احم احم .. وهو يأشر بعيونه على فارس اللي دخل بكل هدوء
شيخه: شل اييييدك ..
عمار: كيفي ..
شيخه: عمااار ..
عمار: مب انتي زعلتي بـ كيفج .. انا بعد بحظنج بـ كيفي 
شيخه: عمااااار شل اييييدك ..
عمار: زعلانه ..
شيخه: لالا .. شل ايدك ..
عمار ضحك وحظنها: انزين مبروك ..
شيخه: الله يبارك ..
عمار: والله ارد اسوي لج الحركه هاا ..
شيخه: فيك فييييييييك .. قم عني ..
عمار: مابا ..
شيخه: عن هـ الحركات الماصخه "وخذت نفس من الخاطر" قم عني .. دزته وسارت ...

اجدمت من الباب .. طاحت عيني بـ عين عموه حظنتها من الخاطر ..  صاحت  .. وصيحتي وياها

راشد اللي واقف وراهن: غريبه يا دموع العييين .. فرحنا نحزن تهلين ..
عليا: مبروووك حبيبتي .. تستاهلين كل خير ..
شيخه: الله يبارك فيييج عمو ..
عليا: عقبال ما افرح فيكم فرحة العمر ..
ابتسمت .. وما رديت عليها..
مي وهي حاطه اديها على خصرها: امطولين ..
الكل صرخ: لاااااااااااااااااااا ..
مي: الله ياخذ بليييس .. صمختوووني ..
عامر: يلا يلا وزعي .. انا اول واحد بسحب ..
مي: بنبدا من اليمين .. بس قبل ما امرر العلبه .. بخبركم بـ شروط اللعبه .. طبعا اللعبه عباره عن تهادو تحابو .. كل واحد بيسحب اسم .. وبيسوي مقالب ف صاحب الاسم .. بس في شروط .. اولا ما اتبالغون بـ حركاتكم كل اللي تسوونه يكون معقوول .. مب واحد يسير يغرق الثاني ويجتله يقول لي مقلب .. انزين وثانيا كل واحد يسحب و ما يخبر اي شخص ثاني عن الاسم اللي طلع له  .. عشان ما يوصل لـ صاحب الاسم وتستوي اللعبه مصخررره ..
عامر: هي من البدايه مصخره اصلا ..
مي: عامر برع ..
عامر: لالا والله آسف ..
مي: يلا شيخه وعليا .. كل وحده تاخذ ورقه واتمرر العلبه 

سحبت عليا ورقتين  .. وسحبت شيخه .. ومررن العلبه ع الباجيين ..

اللي مستانس واللي يحج راسه لانه اتوهق .. واللي حايس ثمه لان الاسم مب عايبنه شوي .. ف الاخير .. كل واحد وحظه .. ردت العلبه عند مي .. وعطتها حق عليا اللي سحبت مره ثانيه ..

شيخه: خيبه عمو كم مره تسحبين ..
عليا: المره الاولى سحبت حقي وحق ريلي .. هـ  المره حق شخص ..
شيخه بطرف عينها: ومنو هـ الشخص
عليا: ما يخصصصج ..
شيخه: ولللل ..
راشد: الاسم اللي عندي .. خطيييييييييييييييييييييييييييير ..
مايد وهو يضحك: حتى انا
مي: اييييه .. بعدنا ما بدينا وانتو رمستووو ..
حارب: فدييييت الاسم اللي طلع لي ..
مي: وبعدييييين .. بس صخو .. بدت اللعبه من هـ اللحظه .. وبنشووووف الحركات اللي بتسووونها ..
راشد يدق ع الطاوله: على قلبيييييييييييييي
حارب ابتسم من خاطره: فووووووووووووووووووووووق ..

وبدت اللعبه من اللحظه اللي وصلو فيها راس الخيمه ..
بالتحديد فندق الحمرا ريزيدنس

الشباب كانوا تحت .. يساعدون العمال في نقل الأغراض لـ فوق .. والبنات كانن يشلن الاغراض ويحطنها ع صوب .. وعليا مجابله المطبخ وكل شي خاص فيه .. من الحلويات والماي والعصاير وهـ الخربطان

اما شيخه تمشي ورا عمتها اللي سايره المطبخ وراده الصاله كل دقيقه

شيخه: آخر ورقه سحبتيها .. حقها .. ؟
عليا: هيه ..
شيخه: وجيييييييييي ياييين ..
عليا: كيفهم .. انتي ليييش .. ؟
شيخه:افف حركات والله .. 
عليا: وانتي شو مشكلتج .. ما بيتمون هني .. بياخذولهم شقه ثانيه ..
شيخه: حتى لووو .. قالولج مانبا انيي .. انتي شحقى تسوين سالفه وتحلفين وراس ما راس .. صار لنا شهر ونحن انخطط وانسوي وهم ما يدرون عن شي .. تقومين حظرتج تعزمينهم .. وتحلفين عليهم اييوون .. عمو نحن ف البيت ما انشوفهم انتي يعني تبين اتسوين خير ف حياتج مخلتنهم ايون هني..؟
عليا: شيخه بسسسسسسسسسس صدعتيني .. كيفي انزين .. اخويه وكيفي ..
شيخه: اففف حرررركات انتي والله  ..
عليا: بس جب لاتتأففين..
شيخه: افف وافف واففففففف بعد ..
عليا سارت صوبها.. يودت جتفها وهزتها : بسسس صخي صخيي .. والا اقولج طلعي برع ..
شيخه: مابا ..
عليا تسحبها: يلا يلا بررع .. مابا اشوف ويهج ..
شيخه: ماااااااااابا ..
عليا: شويييخ صدعتيني .. طلعي برع وفكيني ..
شيخه: عشان تحسين كيف صدعتيني انتي بالخبر ..
عليا: خيبه ..
شيخه: تخيب العدو ان شاء الله يا علايوه ..

فتحت عينها وييت صوبي .. مسكت اديه وسحبتني لين باب المطبخ .. وانا اضحك وهي تتحرطم ..

عليا: يوم بتنزل تحت ودها وياك .. خلها هناك تتحرطم وتشبع لين اتخيس .. يوم بتصخ ردها .. افف الله يعيينك

ضحك فارس من الخاطر .. وسكتت وانا اطالع عموه بـ دلع+ قهر .. وبنفس الوقت متفلشه من فارس ..

..


تم تقسيم الحجر بينهم .. الـ 3 حجر اللي فوق

الاولى حق شمه .. شيخه .. حمده ..
الثانيه حق عليا .. مي وبنتها .. مهره وثنوي وياها ..

والحجره اللي ع الزاويه حق محمد و ميثه وروضه بنتهم


اما الحجرتين اللي تحت ..

الاولى حق مروان .. عامر .. فارس .. مايد .. منصور
الثانيه حق غانم .. سيف .. حارب .. محمد .. احمد

واللي تموّ .. عمار .. راشد .. سعيد .. طارق وخالد ..
اما خليفه .. عبدالعزيز.. عبدالرحمن  ف فضلو انهم يتمون ف دبي ومتى ما دق ف راسهم بيسيرون صوب اهلهم ..

عليا: وين ناوين ترقدون انتو .. ؟
راشد: هني .. ؟
عليا: وين هني ..
راشد: وين انتي يالسه .. ؟
عليا: هني هني على هـ الكنبه ..
راشد: لا هني هناك  .. انا واخويه فوق.. ريلج وعيالج تحت ع الارض
سعيد: نذاااله بالقو  ..
طارق: وف الاخير .. ظهرنا متكسر متكسر .. فوق والا تحت ..
عليا: نحن بننزل تحت وانتو خذو الثلاث حجر اللي فوووق ..
سعيد: امااايه ياين رحله نحن .. وبعدين الا هن ايام .. ما بيستوي بنا شي لو رقدنا تحت ..
عليا: وانته .. ؟
خالد: وانا .. ؟
عليا: بترقد هني .. ؟
خالد: وشو فيها ..
عليا: وظهرك ..
خالد ابتسم باستهبال: من بنش الصبح بسير اتسبح ف الحووض ..
راشد: وبنرد لج محترقييين ..
سعيد: بتسيرون الحييين .. ؟
عليا:لاتخببلهم ..
سعيد: امايه ..  3أيااااااام .. ياخييي خلووونا مستانسين ..
عليا: نش نش افتح الباب انته .. مادري منو هاللي مخبل بك

نش سعيد وهو يضحك .. فتح الباب طلع خليفه بـ ويهه وهو شال كرتوون .. كبير شوي ..

سعيد: خير اخويه .. بالغلط بالغلط محد طالب .. "وياي يبند الباب" ..
خليفه يضحك: عن الحرررركات ..
سعيد: هههههههههه شو هذا ..
خليفه دخل : هذا شي للكل .. ازقروووهم .. السلام عليكم
الكل: وعليكم السلام ..
راشد: شووو هذا .. ؟
خليفه: حركات الفقر هاي ما ادانيها ..
راشد: فقر الله ميزاااااااااااااااااان حسنااااااااااتك قول آمين ..
عليا مطلعه عيونها: رااااااااااااااااشد .. انتتتته مب طبيعي ..
راشد يضحك: فييييي حد ف هـ العايله طبيعي ..
عامر طالع من داخل: واااااااااااااااااااو عيد ميلاد منو .. ؟
عليا: عيد ميلاد ابوووك .. ازقر الشباب ..
عامر: ايييه شبااااب تعالو .. عيد ميلاد ابويه ..

طلعو من داخل وهم يصفقون ويغنون .. وعامر ومروان وفارس .. شالين الفندق ع راسهم وهم يغنون .. Happy birth day 2 a7maad

والبنات على حشرتهم نزلن من فوق ..

شمه: عيد ميلاد منو ..
عامر : ابووويه ..
شمه: اوونه كم كمّل ..
عامر: الرياييل ما ينسألون هـ السؤال ..
شمه: والله ..!
وانظمن لـ حشره الشباب ..
أحمد طالع من داخل وهو منصدم: منو محتفل بي ..
سيف: يقولون ان اليوم عيد ميلادك .. كل عام وانتتتتتتتتتتتتتتتتتتتتتتتتته ابوووووووووووويه ..
خليفه يطالع سيف بنص عين: اقولك اسكت انت واخوك .. وتعالي انتي قصي الكيكه يلااااا نبا اندح ..
راشد سوّأ حركه استهزائيه بـ ويهه: حركات فقر عيل هاه ..
خليفه يضحك: تعالي انتتييييي خلصينا ..

شيخه تأشر على نفسها وترد تأشر على شمه.. يعني انا والا هي ..!

خليفه: انتي انتي .. انتي وهـ الطمممه اللي وراج ..
مايد: رجااااااااء .. لا تهيييني ..
منصور: هزززلت ..
مايد: هي والله هزلت يا مايد بدر ..
راشد: خلصووونا ..
شيخه وهي مستغربه شوي: انزين ..

اجدمت .. فتحت الكرتون .. كيكه عوده .. عليها تصميم بسيط .. بس وايد حلو .. مكتوب عليه
Congratulation shikah & majed

مايد كفخ يبهته: مااااجد عاد .. ؟
حارب: ليش ف الجواز شو اسمك ان شاء الله .. ؟
مايد: مايد طال عمرك..
حارب: هييه .. صدقنااك .. قم قم ماجد ..
مايد: اخ لاااا .. ماحب حد يزقرني ماجد ..
فارس: شو كانو يزقرونك ف المدرسه ..
مايد غيّر لهجته: ماااقد ..
عامر: ههههههههههه شو كل اللي يدرسونك زلمه ..
خليفه: يلااااااااا قصوووها وخلصووونا ..
شيخه وهي تطالع خليفه: امم .. من منو .. ؟
خليفه: مب منّي ..
شيخه: ادري بك ما بتسوي لي شي .. عشان جذه سألت من منو .. ؟
خليفه: من ناس ..
شيخه صدت صوب عمار: بس هذا ..
عمار: تصميمي .. بس والله مب مني الكيكه ..
شيخه: عيل .. ؟
مروان: اصلا الكيكه لج .. لان هذا " واشر على مايد" ما يستاهل .. بس كسر خاطرنا ف آخر لحظه وقلنا بنرز اسمه
شيخه: يعني منك .. ؟
مروان: لا طبعا .. انا ما عندي آكل بعد بسير اسوي لج كيكه هـ الكبر ..
والكل ضحك عليه ..
خليفه: انتي بتقصينها الحين والا انغوص فيها نحن ..
مروان عفد وهو يصرخ: لاااااااااااااااااااااا شوووو اتغوووص فيها .. هذا اكل اكللللل ..
عامر: عندك بحر وحوض تحت سر غوص واغرق وانتحر وسو اللي تبا تسويه محد بيحاسبك .. بس هني لا دخيلك ..
فارس: شو محد بيحاسبه انته بعد .. ربه فووق ..
عامر: والله مشكلته .. يعرف ان ربه فوووق ... ياهل هو انا اذكررره ..
مروان: قصووووووووووووووووووها ..
فارس: قصكم الله ..
عامر: شووو بعد قصكم الله .. استغفر الله عموو جووفيهم عيزت وانا اادب فيهم.. 
عليا: هييه صدقتك ياللوتي ..

شلت عليا البروش  وركضت وراهم .. شردو عنها الربع وهم يضحكون .. او خلنا انقول شله الفساد شرات ما كانو مسمينهم وهم صغار .. لان صدق ردت الروح للعايله بعد ما كل واحد منهم رد لـ شخصيته اللي تعود عليها الكل ..

قصيت الكيكه .. ومايد وياي .. وانا عيني ف عيون كل اللي واقفين جدامي .. ابا اقرا عيون الشخص اللي مسوّلي هـ الكيكه ..

انا ومايد انقص .. والباجين يصرخون ويغنون ..

مي: بيطردوووونكم من هني .. انتو مب مال هـ الاماكن ..
احمد: يتحسبوون عمارهم ف فريج ..
سيف: شيخو شو رايج اتأكلينه ..
شيخه: يلا يلا ماشي شغل ..
سيف: لازم عمو علايه اتأكلهم اثنينتهم ..
مايد: تعالي تعالي عمو ..

اجدمت عليا وهي تضحك .. دام هـ الشي يفرحهم ليش تقول لا .. اكلت شيخه قبل .. وعقب اكلت
مايد ..

منصور: كملي معروفج بعد وأكلي ابويه ..
حارب صفّر: عاااااااااااشت عموووو علااااايه ..
والكل قام يصفق ويلحن الجمله ويا حارب : عاشت عمو علايه .. عاااشت عمو علاااايه
غانم: يا عيني .. رومانسيه ع الكبر ..
ضحكت عليا بدون ما ترد عليهم .. سارت صوب خالد وأكلته .. والباجين ميتين من الضحك ..
عليا: زيييين جذه ..
سيف: وااااااااااو اقوا شي ...
أحمد: مي دووورج ..
مي: نعم ..!
أحمد: نعم الله عليج .. تعالي أكلي ريلج . .يلا يلا .. لاتسووولنا حركات .. كل وحده تأكل ريلها ..
مي سكتت ثواني وعقبها رمست: يعني لااازم هـ الحركات ..
مايد: هيييه .. يلا يلا .. اونكم عاد
مي: انزين ..

شلت قطعه من الكيكه وسارت صوب خليفه ولقمته ..

عامر: والله انكم ظلاّم .. والله انكم ما تخافون ربكم .. ياخي حسو حسووووو .. أح  " واشر على رقبته" هني في شي يقوول أح .. يعني لازم اعرررس عشان آكل الكيكه ..
والكل ضحك عليه ..
مايد: نكسسسسسسسسست ..
عامر: ولا نكسسست ولا ناين وسست .. ياخي حسووو ..
مايد: ياللحف .. بتاكل .. بس اسكت .. 3 جدامك ..
عامر: خيييييييبه .. ابوي .. انا برقد يوم بتخلصون فقره عوار القلب خبروني ..
مايد همس ف ذنيه .. وضحك عامر عقبها .. وغير رايه ..
راشد: شوو قلت له .. اعترف ..
مايد: ما قلت شي ..
عامر: شرايك تعطينا شله بـ صوتك ..
راشد: آسف ..
عامر: يلا الله يخليييك ..
راشد: صوتي ما يسمح لي اشل جدامك ..
عامر: طاعو هذاااا .. شللللك طهف .. يعله ما يطيييع ..
عليا: ابا افهم .. من وييين اتيبون هـ الدعاوي انتوووو ..
سيف: لا تخربووون البارت .. يلا انكمل وعقب رشود بيشل .. انتو المطاوعه الثنينه ويا ولد عمكم ..
حارب: خير اخويه .. ؟
سيف: لا تسوولنا سوالف .. يلا يلا ..
وسار صوب الكيكه وخذ قطعتين .. حط كل قطعه ف صحن وسار صوب عبدالله ومحمد
سيف: يلا يلا ..
عامر: اندوووكم انتو .. " وضحك من الخاطر"
مروان: يلاااااااااااااااااااااااااااااااااااااااااااااااااااااااااااااااااا ..
حارب: الله يغربل بليسك .. صمختنا ..
مروان: يغرررربل شياطيييييينكم ان شاء الله .. والله ماقدر اقاوم .. خلصووونا ..

سكت عبدالله .. شل الصحن وسار صوب مهره اللي كانت يالسه ف الزاويه .. غمض عينه .. وجدم قطعه من الكيكه لـ ثمها ..
كلتها .. والكل صفق وضحك ..

عامر: والله انكم مب صاحين .. ههههههههههههههه ..
سيف: جبببب انته  " وقام يسوي حركات براسه " محمد يلا خلنا حبايب .. قم قم يلا ..
ومحمد قافط من الخاطر .. بس نش غصبا عنه وسار صوب ميثه .. وعطاها الصحن ..
مروان: ايييه بابو .. شووو بتان نحن تقص علينا .. اقول يلا يلا أكلها خلنا ناخذ نصيبنا ..
محمد يكلم ميثه بصوت واطي: يعني لازم  يفشلون الواحد ..

ميثه ابتسمت .. ومسكت اديه .. خذت قطعه .. وردت رفعت ايد محمد .. جدمتها لـ ثمها وكلتها ..
وقف راشد وصفر .. وصفق عقبها .. وكلهم صفقو وياه

راشد: على قلبيييييي ..
حارب: فوووووووووووووووووووووق ..
راشد: فوقه فوقه ..
حارب اللي فهم قصده .. نش بـ كل هدوء .. سار صوب الكيكه .. واتنقى له القطعه اللي عيبته .. و سار صوب حمده ..
حارب: قولي آآآآآ..
ضحكت حمده وفتحت ثمها .. ولقمها حارب ..
وصفقوا لهم ..
عامر: خلصتو عروضكم الترويجيه .. انتو شوووو ما اذكرتوا ان عندكم حريم ع ذمتكم الا الحيين   " غير لهجته"  لا بووووك ولا بو اللي جابوووك ..  يغربلك يا سيف ويغربل افكااااارك جانك حرمتني ربع ساعه من هـ الكيكه
عليا: ابا افهم شي واحد .. انتو على شو مربين عيالكم ..
حارب: على الفساااااد .. تراه واحد من شله الفساااد .. ووو على فكره عموه .. ولدج واحد منهم .. يعني لازم تقولين .. نحن على شو مربين عيالنا ..
صدت عليا صوبه وبدت تتحرطم وهي ادور اي شي تفلعه به .. وهو يندس مره ورا راشد .. ومره ورا سيف وهم يتكفخون وهو ما يصيبه شي ..

..

أذن العشا .. وعقب ما صلو واتعشو .. البنات سارن حجرهن .. اما الشباب حشرو الدنيا الا ينزلون تحت  ف الحديقه .. وعليا تقول لهم بيطردونكم .. وهم معاندين .. وآخر شي .. اكيد ما سمعو كلامها وسارو تحت ..


حارب: وانته ما تعرف تسوي شي غير الالعاب ..
عبدالعزيز: انا استثمر وقتكم عشان تنطموووون يالطمم
سيف طاح ع ظهره: انا ابا أتأمل النجوم .. والله النجوم هني شييي .. مب ف البلاد عفانا الله ما تشوف غير الابراج ..
غانم: هـ الجو .. يباله صوت رهيب يطربنا ..
عامر: تعالو انتو في كائن حي قال بيعطينا شله بـ صوته
راشد: كح كح كحححح .. انا مريض ..
مايد: بدينا بالخريط .. ابوووو التمثيل رشووود
مروان: بس ابوووه .. قول امه وهله وكل طوايفه ..
عامر: لا اذلنا عاد ..
سيف: من زين صوته ..
عامر: والله صوته طر بس هو يستهبل ..
راشد: تبا صوووت طر " وصد صوب عمار" عمريييييك .. وغلااااه
عمار قطع عليه: جب ..
راشد : مايد " وسوا نفسه مكسور ومجروح "
مايد: هززززززززززززززززززلت يا ماااااااااااااايد بدر ..
عامر: يلا عمريييك ..
عمار: شو عمريك انته ايييه .. ريال طول عرض ميلس جدامك ..
عامر: قال طول وعرض قال .. اخوووويه عطنا شله وخلصنا ..
احمد: يلا شل ..
سيف:   حراااااااااام ما تشل الحين .. ابووويه يطلب منك واترده .. ؟
عمار: عشان خاطر هـ العيون بشل ..
راشد: بس .. ممكن طلب ..
عمار: هلا ..
راشد: لو سمحت بلا مجروح ومكسور ومذبوح .. بنداوي جرحك ف الايام اليايه بس الحين عطنا شي حلو ..

ابتسم عمار .. تحمحم .. وبدا يشل وهو ف عالم ثاااااني

في ذمتي مالي حبايب سواكم .. انتو هنا عمري وسبة شجوني ودي بوصلكم واستريح بلقاكم وف بعدكم  الاشواق يا مسهروني في وسط روحي دوم ساكن غلاكم وف قربكم شفت السعاده بعيوني تبسم لي الدنيا بـ بسمه شفاكم واحس نفسي سيدن وسط كوني .. تدرون بي هايم ولا اقوا جفاكم تدرون بي عاشق وانتو فتوني .. حالي شرات الليل مظلم بلاكم والليل دون البدر ظلمه وسكوني اشوفني بموت اتبع خطاكم صارت حياتي بيدكم صدقوني

احمد يصفق له: يا عيني يا عيني .. منو هذيل ..
عمار ابتسم: بلا شك .. اخواني وخواتيه ..

ابتسم راشد .. ابتسم حارب.. ابتسم مروان وابتسم مايد ..

هذيل هم عيال بدر .. جمعو في نفوسهم .. اجمل مشاعر البشريه .. والاحساسيس الانسانيه .. رغم ان البيئه اللي عايشين فيها .. ما ربتهم على هـ التربيه .. بس دمهم هو اللي جمعهم على قلب واحساس واحد ..


ليست هناك تعليقات:

إرسال تعليق