السبت، 16 نوفمبر، 2013

الجزء الثامن (2)

وعلى آهات هاديه  .. شل حارب الخاتم .. ومسك ايد حمده وهو مبتسم .. ولبسها ..
كان مقهور من كل هـ الفوضى .. بس عيبته السالفه عقب ما لبسها ..
رد مد لها اديه .. وبكل رقه .. دخلت الخاتم ف صبعه ..
اجدمت مهره تساعده عشان يلبسها الشبكه .. لانه مول ما توهّق

وعقب ما خلصو .. يلس ويلست هي حذاله .. دقايق ووصلو محارمها من الشباب ..
دخل سعيد ودخل وراه عبدالرحمن وخالد .. اجدم غانم ووقف حذال حارب ..

حارب ابتسم: اكملت ..
ضحكت حمده ونزلت راسها ..
شمه: خير .. ليكون تتحسب عمرك معرس ..
غانم: ليش ما يليق عليّه .. ؟ .. يلا صوروني ..
مي: ف خاطرك اتعرس يعني .. يلا اشر من باجر بنخطب لك ..
غانم: ما صدقتي انتي لااا .. عشان تاخذين حجرتي و حجره سيف ..
مي ضحكت: هيه طمعانه فيها مالت عليكم .. ع الاقل بكفر عن ذنوب الحجره شوي ..
غانم سوا عمره يكح عشان يغطي ع الموضوع والكل ضحك عليه ..
احمد توه ياي: فاتني شي .. !
شمه: هيييه .. هني عرسو وطلقو .. كل السوالف فاتتك ..
احمد: اونه .. عيدو عيدو .. الله يخليكم ..
شيخه: عمي شو نعيد انته بعد .. حد يصدق هـ الخراطه ..
احمد: زين يلا بنتصوّر ..
عبدالعزيز: السلام عليكم ..
الكل: وعليكم السلام ..
احمد: يلاااا ..
شمه: بلاااك متحمس انته ..
احمد: خلصووونا  ..
شمه: اصبر انزين طارق ومنصور ما ....
قبل ما تخلص جملتها شافتهم ف ويهها ..
احمد: شو تسوون انتو الثنينه ..
عبدالعزيز: كل واحد مصدق عمره .. يتحسبون عمارهم حارب ..
غانم ابتسم باستهزاء: خلهم يتحسبون زياده .. طاع ويه حارب انته .. عقب ارمس ..
حارب صد صوبه: قم من هني .. انته قم قم ..
غانم: خلاص خلاص والله آسف ..
احمد: يلاااا خلصووونا ..
شيخه: على شو مستعيلين انتو ..
عبدالعزيز: وانتن شعليكن .. ورانا شغل نحن ..
مي: منو اللي ما يا لين الحين ..
شمه: منو بعد غيره ..
وصدت صوب شيخه اللي انتبهت على نظراتها بس طنشت .. ووصل اللي يتريونه ..
فارس وهو مبتسم: تأخرت ..
غانم: كنت اتنظف نعالك .. !
فارس: لا ليش .. ؟
غانم:لانك ساعه تتسبح ساعه تتلبس ساعه تسحي شعرك .. وانا قبل شوي كنت وياك وانت مخلص ف اذا ما كنت اتنظف نعالك .. ليش متأخر .. !
فارس: مب شغلك .. قم من هني"واجدم من حارب وكفخ اديه بـ ايد حارب" مبروك بن عمي ..
حارب: الله يبارك فيك " وابتسم" عقباااالك "وغمز له"
فارس ابتسم وما رد على حارب .. ابتعد عنه ووقف حذال اخته ..
مهره: يلا وقفوا انزين .. حاشرينا من الصبح بسرعه وبسرعه ..
احمد: ابا اعرف شو اللي ف الكرتوون .. !
عقب ما قال احمد جملته الكل استغرب .. صدق شو اللي ف الكرتون ..!
عليا: منو يايبنه اصلا .. !
شمه: اعتقد عمار .. مساعه كان شالنه ..
احمد: شوووفييييه ..!
غانم: عن الفضووول .. يمكن الريال يايب هديه حق اخوه ..
احمد: هديه حق اخوه ..! شو ذبيحه مغلفه مثلا ..
وسار صوب الكرتون وفتحه
احمد: يا عيني .. يا قلبي .. ياروحي .. اشزييييينك ..
عبدالعزيز: الله الله الله .. حركات والله .. !
خالد: منو اللي مسوي هـ التصميم ..
مهره: عمار ..
خالد: والله وحركات هـ العمار .. ماشاء الله عليه ..

رفع حارب حياته واجدم .. كانت كيكه .. كبيره نوعا ما عليها تصميم هادي .. لكنه جميل .. جدا جميل .. وفيه صوره يهال .. بنت وولد .. ومكتوب تحت الصوره 

يا بختها به ويا بخت اللي حاز بها
كل(ن) يكمل بـ نوره روعه الصوره  

ابتسم .. حارب .. ابتسامه طالعه من قلبه ..

احمد: خاطري فيها ..
شمه: شكلكم ما بتصورون اليوم ..
احمد: يلا بسرعه .. والله ابا اتصوّر ..
شمه: يلا وقفو عدل ..

اصطفو كلهم .. وبدت شمه اتصورهم كذا صوره .. واللي يستهبل يسوي حركات واللي مايوقف عدل واللي مب عايبنه مكانه .. وهي كل شوي تصرخ عليهم .. وتعصب وتقول ما بصور ويردون يقصون عليها يخلونها تصور ..

عبدالعزيز: فوقه فوووقه ..
احمد: نبا الكييييكه ..
غانم: تعالو قصوها ..
عليا: المعاريس خلهم يقصونها .. 
سكتت حمده وبين عليها انها ما تبا .. ف رد عليهم حارب ..
حارب: لالا دخيلج عمو .. خليهم يقصونها .. ويفكونا من صدعتهم ..
عليا: انا ما بيلس تحت .. والله ماقدر ..
غانم: انتي خلج حق الرقاق والخمير ..
شمه: انا بعد ما يخصنيييي ..
غانم: مالت .. شو انتي ..
احمد: ترا والله بقصها روحي وبلعب فيها .. وبشوّه خلقكم انتو الثنينه ..
والكل ضحك عليه .. 
شيخه: انا بقصها ..

توها بس طلعت جدامه .. وتوه بس سمع حسها يرن ف اذنه .. توه بس ردت له الروح والفرحه وكل الاحاسيس الحلوه ف هـ الدنيا .. توه بس حس بـ طعم الفرح .. والسعاده .. توه بس بدا ينبض قلبه .. يالله ومن الصبح وينج .. وييينج ..!

اجدمت شيخه ونزلت بـ مستوى الطاوله وبدت اتقص والشباب حاشرين الدنيا .. اللي سار واللي جلب علبه الكلنكس وسواها دمبك .. واللي يصفق واللي يغني ..

شيخه: وانتي شو خانتج .. تعالي وزعي يلا ..
شمه: انا بس بعطي المعرس والعروس .. ما يخصني ف حد .. اللي يباه خله ايي ياخذ له .. انا ما اشتغل عندهم ..
شيخه: لا انا اللي اشتغل عندج ..
فارس: انا بوزع ..

حتى ما صدت صوبه .. ولا ردت عليه .. كملت شغلها .. واول قطعتين طرشتهن صوب حارب وحمده .. وفارس يالس يراقب الجزء من التصميم .. اللي يسير مع كل قطعه .. ويوم وصلت عند القلبين اللي على يمين التصميم .. وصل فارس وشل صحنين ..

فارس: هـ القطعه خليها حقي "ابتسم"  انا اباها ..

صدت صوبه .. وهو سار يودي القطعتين لـ امه وابوه اللي قامو يرمسونه ويضحكون .. وهو يضحك وياهم 


كان حارب شخص ثاني هـ اليوم .. كان يحس بـ فرحه كبيييييييييره .. كان وده يسير صوب اخوانه ويحظنهم واحد واحد .. ويقول لهم شكرا على كل اللي سويتووه .. شكرا على كل اللحظات الحلوه اللي اهديتوني اياها .. شكرا لانكم فرحتوني .. شكرا لانكم شاركتوني سعادتي ف هـ اللحظه .. شكرا لانكم وقفتو وياي وحاولتو انكم ترسمولي الفرح بـ اي طريقه .. شكرا .. وشكرا لك يارب .. لانك عطيتني احلى واغلى اخوان ف هـ الدنيا ..

..

راشد: شكراً على النسيان آسف على اللي كان الحب ورد ومات ذبل على الأغصان خذك الزمان ورحت مع خالص التقدير انسان عادي كنت وانا أحسبك شي غير
عامر: الله يغربل اغانيك ان شاء الله ..
راشد: يابوي انا هذا استايلي انزييين ماعرف بعد ..
سيف: صخ صخ .. غبرنا اونه استايل ..
راشد: اشعرفك انته بالطرب الاصيل ..
مروان: اي اصيييل .. انا الربو رد لي وهذا يقول لي اصيل ..
راشد: تبون شلّه .. ؟
مايد: بصوتك البايخ طبعا لا ..
راشد: تبون بصوت حلو .. ؟
عامر: انزين صوتك مب حلو ..
راشد: انتتته تبا شله بـ صوت حلو .. ؟
عامر: سمعنا ..
راشد: صدق  ما امزح ..
عامر: انزين يلا .. بنسمع ..
راشد: عمريييييك ..
عمار هز راسـه بمعنى .. نعم خير .. !
راشد: الله يخليييييييييييييييييييييييييييييييك وغلاااااااااااااااة ثنووووي عندك .. بس مقطع صغيرووون .. هالكبرررر ..
عمار: وحد قالك اني فاتح فرقه شراتك ..
راشد: مقطع بسسسسس مقطع .. يلا لا عشان حارب ..
عمار: وحارب شو يخصه ..!
راشد: ايهي علينا يلا لا ..
عامر: يدور اي حجه .. عشان ما تقفطه ..
سيف: قفطه قفطه الله يخليك ..
عمار: هههههههه ما يهون عليه ..
راشد: فديييت خشمك والله ..
عامر: يلا يلا عمريييك يلا ..
ضحك عمار واتحمحم وبدا يشل . .
عمار: فرصه سعيده وافترقنا على خير كنت اتمنى تكون قسمه حياتي هذا نصيبي ولي جنته المقادير تبعد وانا ابعد في سكون وسكاتي ..حب(ن) يتيم ذوبته التفاكير ماتت غصونه وانتهى بالفواتي والله لو يشكي الجفن بالتعاسير لا كان يشكي دمع جرح شفاتي .. ذكراك هاذي وانتهت دون تفسير صارت تسمى ماضي ف ذكرياتي فرصه سعيده جمعتنا على خير خلك بقايا ساكنه ماضياتي

بـ صوت حزين .. وقلب مكسور .. وكلمات طالعه من قلبه كان يشل عمار وهو ف عالم ثاني .. يمكن هـ الفرصه ردته 3 سنين من حياته ورا .. ويمكن هـ الفرصه ذكرته بـ اوقات يتمنى ينساها .. ينسى شخصها .. ينسى مواقفها واحداثها وألمها وكل شي متعلق فيها .. ولو قدر ينسى كل هذا .. بيذكره ولده بـ كل لحظه وكل ثانيه وكل دقيقه وكل ساعه عاشها مع الانسانه اللي حبها قلبه ورفضها مستوى ابوه ..

سكت راشد .. سكت عامر .. سكت سيف ومايد ومروان .. سكتو .. وفضلوا  انهم يشغلولهم حربيه وايولون عليها .. هربا من الموقف .. صدق فيهم نذاله مب طبيعيه ..!!!


..


عيال الدوامات يسرحون ويمرحون ف دواماتهم .. وعيال المدارس بدت امتحاناتهم .. مروان وفارس وعامر لازال مصيرهم معلق عند لجنة الرحمه والرأفه واساميهم لين اليوم ما طلعت .. حارب زادت سيراته لـ بيت عمته عشان يشوف حرمته ومهره متبهدله ويا اول شهور الحمل.. اما مي .. ف علاقتها بـ ريلها بدت تتوتر  ..


كانت طالعه من الحمام وسمعت صوت الباب وهو يتبد .. نزلت الفوده عن ويهها واستقبلها بـ ابتسامه ..

خليفه: مرحبا ..
مي: مرحبتين ..
خليفه: كيفو ..
مي: زينه ..
خليفه: افا بس زينه ..

فرت مي الفوده وسارت يلست ع الكنبه .. شلت الجهاز وبدت اجلب ف القنوات ..

مي: البيت شو ناقصنه ..
خليفه ضحك: عشان جذه امبوزه ..! .. ماباااجي شي .. اتريا الماي والكهربا والشهر الثاااني نحن هناك ان شاء الله ..
مي رفعت حياتها: ناوي تودينا هناك .. نرقد ع السرميك ..
خليفه: الاثاث ما يباله شي ..
مي: الاثاث اخس شي ..
خليفه: اذا مب متفيجه برايج .. عادي روحي بسير وبختار كل شي .. وبأثث البيت بكبره ..
مي: لا شكرا .. البيت بيتي وابا أأثثه على ذوقي ..
خليفه: كيفج بعد .. وين نوره ..
مي:ما شفتها برع ..!
خليفه: ما مريت الصاله اصلا ..
طاح ع الكنبه وهو يتعبث بالفون ..
مي: ما تبا تتغدى ..
خليفه: لا .. تغديت ويا الربع ..
مي ابتسمت باسهتزا وردت تطالع التلفزيون ..
خليفه: بلاج .. ؟
مي: ما بلايه شي ..
خليفه: جي ماده البوز .. لاني تغديت برع .. افا عليج بتغدى معاج انا كم مي عندي ..
مي: انا تغديت ..
خليفه: بدوني .. !
مي: نوره كانت يوعانه .. غديتها .. وتغديت وياها ..
خليفه: تتغدين بدوني ..!
مي: ثرك متغدي ويا ربعك ولا مفتكر فينا ..
خليفه: انا غييير .. " ظرب ع الطاوله" احتتتتج .. مي بنت محمد تتغدى وانا مب ف البيت ..
مي: انته اصلا كم مره تتغدى وياي ..!
خليفه: شسوي حبيبتي .. هـ الربع ما يخلوني ف حالي .. كل يوم واحد منهم يعزمني ..
مي: ماشاء الله وايد ربع عندك ..
خليفه: شو ذنبي انا يوم ربج خلقني حبوب .. الكل يحبني ..
ورد طاح ع الكنبه وصد صوبها .. وهو يضحك ..
خليفه: ليش .. تغارين ..!
مي: على شو ..
خليفه: لاني وايد ويا ربعي .. !
مي: لا .. ما اغار .. " وقفت" بس دير بالك عن اييك يوم وتندم بسبب هـ الربع .. اللي وايد يحبونك
خليفه: شو تقصدين ..
مي: ما اقصد شي ..
وسارت صوب الباب..
خليفه: وين سايره ..
مي: بييب بنتي ارقدها "وطلعت"
خليفه: ذلتنا هـ اليومين .. بنتي وبنتي .. وجنه محد عنده بنت غيرها ..

..

عقب كم يوم .. ف بيت بدر
بالتحديد ف حجره شيخه اللي يالسه وماسكه الكتاب جدامها .. رافعتنه شوي عشان يوم تسأل الحبيب اللي يالس جدامها .. ما يلقى مجال انه يغش .. ومجابلنهم راشد اللي يالس يطمش


مايد: لالالا .. غلط غلط ..
شيخه: ليش ..!
مايد: شو بعد ليش .. غلط وخلاص .. خلص السؤال ..
شيخه فرت عليه الكتاب: رد راجع
مايد: بس لا .. لاعت جبدي..
شيخه: مايد عن الاستهبال.. انته ميييح موول ماتعرف شي ..
مايد: ماعرف شي بالنسبه لج يالدحيحه .. اما بالنسبه لي .. ف انا زلمه
راشد: اما حياتن تطرب الروووح .. والا مماتن واحسن الله عزاكم
شيخه: دوووك .. رد راجع الوحده .. وانا ببدا بالوحده اللي عقبها .. برد بسألك وان ماعرفت اجاوب يا ويلك يا مايد
راشد: ههاي .. يحليلك يا مايد .. يلا ادرس ادرس ..
مايد: الله المستعان ..
حارب توه ياي: ما يذكر رب العالمين الا حزه الامتحانات ..
راشد: لا ويغش بعد
مايد: انزين .. درست ويبت نسبه واتخرجت ودحيتو من الحلوى اللي بوزعها يوم تخرجي .. وعقب ..!
راشد: عقب تختار لك جامعه خاصه .. راقيه وعلى مستوى .. او انك اتسير تدرس برع .. او ..
مايد: او اي دوام حكومي بـ واسطه ابويه ..
راشد: وايد لا تحلم .. جان وظف مروان ..
مايد: مروان روحه ما يبا ..
راشد: حبيبي .. ابويه يبا يمشي ويقول هيه هذا راشد ولديه اللي متخرج من امريكيه الشارجه .. هيه هذا مايد اللي دارس ف امريكا .. وهذا مروان اللي متخرج من بريطانيا .. مصدق عمرك انته ..
مايد: عيل جي مروان قدم ع الشرطه ..
راشد: مروان .. قدم .. بس ماسار ..
حارب: شو قصدك .. !
راشد: قصدي هذا ويهي .. تفل فيه اذا ابوك ما كان له علاقه بالسالفه ..
حارب: اي سالفه .. ؟
راشد: السالفه اللي ما خلت اسم مروان يطلع لين الحين .. ولان فارس وعامر عيال عمه ف يتحملون لي ايهم ..
حارب: ماعتقد ..
راشد: اعتقد اعتقد حبيبي .. تتحسبه ساكت جذه لله .. ابوك ما يمر شهرين الا طالع لنا بـ فنتك يديد .. مادري ياخي جذه من الله يحب يعصب ويجلب البيت .. يحقد علينا اذا شافنا مستانسين .. بس ليش مادري ..
مايد: وامك مستويه مسلسل تركي .. اتابع هـ الافلام اللي غسلت مخها وشغلتها عنا " رفع اديه" الحمدلله رب العالمين .. الهي احفظه ووفقه هذا اللي ترجم اول مسلسل تركي .. من يوم ما طلعت الافلام التركيه وهي ساكته .. اصلا مب متفيجه تشوف رقعه ويهنا .. ولا متفيجه اتعاقب مروان .. ولا متفيجه اتبارك حق حارب بعد .. يعني في مساوئ ف الموضوع .. بس والله ان خيره اكثر عن شره..
راشد شل الكتاب وكفخه: ادرس ادرس انته ..
حارب ضحك: انته مب صاحي .. يلا ادرررس .. "ونش"
مايد: بعده ما اذن العصر .. شو بتسير تتغدى عندهم .. ؟
حارب شل المخده وفرها عليه : قم اطلع برع انته واخوك .. خلها تدرس ..
مايد: آآآوج

طلع حارب ومايد وراه .. اما راشد ف تم واقف مكانه وهو يراقب اخته اللي ماسوت لهم سالفه .. حطت اديها عند ذنيها وهي تقرا بـ صوت عالي ..

شيخه: لان .. لان .. لان .. صدت صوب راشد .. لانه شوووووووووووو ..!
راشد: وانا شدراني لانه شووو ..
شيخه: اففف .. شفت ويهك نسيت كل شي ..
راشد: طاعو .. اسير ايب لج كرك .. ؟
شيخه: من اربيعكم ..؟ لا شكرا ..
راشد: والله اوووكي .. يعدل المزاج ..
شيخه: انا مزاجي رااااايق .. لو ما اطفروبي انتو بس
راشد: كم امتحان باجي لج .. ؟
شيخه: ويييه البارحه امقدمه اول امتحان .. يعني اترياااا ..
راشد: شدي حيلج هاه .. مب تفكرين ف الملجه ومادري شو وتقومين تخبصين ..
شيخه: انتتته اطلع برع انا ما بخبص ان شاء الله ..
راشد: انزين انزييين ... ويا ويهج هذا .. بس لانج اخر سنه والا خسي اطلع ..  ولانج بعد بتستوين عروس ان شاء الله .. ف مابرد عليج

سكتت عنه شيخه .. وردت تسمع لـ عمرها .. ثواني .. وانتبهت عليه وهو يتحمحم ..

شيخه: يا راشد يا عيون شيخه  اسبوعين بس .. وعقبها بجابــ ... وسكتت ..
مروان وهو يلعب ف الاوراق: عقبها شو ..
شيخه:وعقبها خييييييييييييييييير ..!!!
مروان: ههههه ليش معصبه..
شيخه: ابا ادرس والله حرام عليكم .. بالدور اتون اطفروني
مروان: زييييييين .. يودي .. وعطاها مبايله ..
شيخه: خيير .. ؟
مروان: الخير بويهج .. يبي لي اياه عقب ..

شلت الفون وطلع مروان من الحجره .. كان فاتح على محادثه شخص  بس مب مكتوب شي ..

شيخه: بلاه هذا .. !
وبنفس الوقت قرت .. " حووو "
بس ما ردت عليه ..
رد طرش " شيخه ردي عليه ظروري"
شيخه: نعم ..!
رد عليها: شخبارج..
شيخه: بخير .. منو ..؟
رد عليها: شو الامتحانات .. ؟
شيخه: منو انته .. ؟
رد عليها: انا فارس (=
فرت الكتاب ويودت الفون ..
شيخه:هلا
فارس: شخبارج..
شيخه: بخير الحمدلله .. انته اشحالك .. ؟
فارس: دامج بخير .. انا اكيد بخير ..
شيخه: شو هـ النك اللي حاطنه .. ؟
فارس: اغرااااء اغراااء 
شيخه: لا والله .. عن الحركات ..
فارس: ههههههه ليش تغارين ..!
شيخه: شو رايك ..! " الفيس اللي رافع حياته"
فارس: (= .. اسمعيني ..
شيخه: كيف اسمعك ..
فارس: اقصد اقرييي .. خبريني قبل .. شو الامتحانات .. ؟
شيخه: لين الحين كل شي تمام ..
فارس: شدي حييلج .. نبا نسبه حلوه اتبيض الويه ..
شيخه: افا عليك ..
فارس: انزين سمعي ..
شيخه: آمر ..
فارس :ما يآمر عليج عدو .. باجر الساعه كم تخلصين ..!
شيخه: 10
فارس: انزين الساعه 11 اترياج ورا عند جدول الماي ..
شيخه: مواعد عيني عينك .. !
فارس: الله يخليج
شيخه: مب وقته الحين .. عقب الامتحانات ان شاء الله
فارس: بس خمس دقايق ابا اشوفج ..
شيخه: فااارس بليييز..!
فارس: اقوولج بس خمس دقايق .. مستخسرتنهم فيا ..؟
شيخه: لا والله ..!
فارس: هيه .. )=
شيخه: اوكي .. بس بشرط..
فارس: تآمرين انتي ..
شيخه: بس خمس .. دقااايق .. مب اتقول لي صبري شوي ومادري شو .. فارس والله مافيا ..
فارس: وعد .. خمس دقايق بس (=
شيخه: خلاص تم ..
فارس: ^__^ .. والحين ممكن اتسوين كلير للمحادثه ..
شيخه: خخخ اوكي ..
فارس: الله يحفظج ..
شيخه: ويحفظك يا رب ..

حذفت المحادثه وفرت الفون ع الشبريه .. ولا سوت سالفه لـ مروان حتى .. وردت اتسمّع التعريف اللي مب طايع يثبت ف مخها ..

..

ف بيت احمد

وقف جدام المغسله ورد يرجع .. خلاص تعب .. يحس ان روحه بتطلع من التعب .. غسل ويهه .. وطلع من الحمام .. شاف اخوه ف ويهه وهو ماد اديه يعطيه الفوده.. نشف ويهه وسار صوب الشبريه .. وطاح

عامر بتعب: اجز تعطيني اياها وانا ف الحمام ..
سيف: لاعت جبدي ويا لسانك هـ اللي ما يقصر حتى وهو مريض ..
عامر: بند الليت والباب .. واطلع برع ..
سيف: لا والله .. !
عامر: الله يخليك سيف والله جسمي متكسر..
سيف: شو ماكل انته ..
عامر: مب ماكل شي ..
سيف: عيل بلاك ..
عامر: مادري .. سيفو اطلع برع الله يخليك ..

سكت سيف وسار صوب الباب .. من فتحه شاف عمته ف ويهه 

سيف: هلا بالحب كلللللللله ..
ما عبرته وسارت صوب عامر ..
مي: عامر .. قم يلس ..
عامر: عموه .. ماقدر والله تعبان ..
مي: قم انزين .. اشرب شوي ورد ارقد ..
عامر: عمووه ..
مي: يوم انك ما تبا اتسير المستشفى .. قم اشرب .. والا بنوديك غصبا عنك ..

يلس عامر بتعب .. ويهه ذابل وعيونه حمرا مد اديه .. خذ الكاس وهو ينتفض .. شرب ربعه ورد حطه ع الكومدينو ..

مي: كمله لـ النص ..
عامر: ماقدر .. والله ماقدر خلاص ..
مي: بسم الله عليك .. شو ماكل ..
عامر: ماعرف .. ورد حط راسه ..
مي: بطنك يعورك .. ؟
عامر: وااااااايد ..
مي: قم سر المستشفى ..
عامر: مابا ..
مي: مب على كيفك عموور .. شوف ويهك كيف مستوي ..
عامر: خلاص شربت شوي من العصـ...
ما قدر يكمل كلامه .. فر اللحاف وركض صوب الحمام .. ومي رافعه حياتها ومستغربه ..
مي: ويا منو طالع امس .. ؟
سيف: ويا ولد اختج وولد اخوج .. انا هـ الثنينه من زمان شاك ف اخلاقهم .. مادري شو معطين اخويه .. مشربينه شي والا مخلينه يبلع شي ..
سكتت عنه مي ولا سوت له سالفه .. رد عامر .. وطاح ع الشبريه ..
مي: عمووور ..
عامر: خلاص عموه .. اذا تعبت زياده وحسيت بـ الم اكثر .. بسير .. بس الحين ماقدر الله يخليكم طلعو برع ..
مي: عن الحركات ..
عامر: والله بسير .. بس مب الحين .. خليني ارقد شوي
مي: خلاص خلّه ..
وطلعت .. وطلع سيف وراها .. ووقفت تتأكد اذا سيف بند الباب او لا .. طلع سيف .. بند الباب وتم واقف مكانه يطالعها .. ما عبرته ومشت ..
سيف: عموووه ..
اجدم منها ويودها من جتفها ..
سيف: أنا آسف وحقج عليه .. ادري اني غلطان وادري اني قليل ادب وادري اني ما استحي على ويهي .. ياخي سبيني .. هزبيني سوي بي اللي تبينه .. بس الله يخليييييييج .. ردي عليه عبريني .. لاتزعلين .. عموه والله مب حاله يعني .. شوفي من كم يوم وانتي لابستني .. ع الغدا اكلمج ما تردين .. عقب الغدا امزح وياج ولا تصدين صوبي .. والعصر اصلا ما قمتي اتيين تيلسين ويانا ف الحديقه .. وطووول اليوم ولا جني موجود وياج ف البيت .. ولاتحسسيني اني انسان حالي حال هـ الأوادم اللي ف البيت ..
مي تطالعه بـ كل برود: اذا تبا عصير فرش سر المطبخ ..
سيف: طاعو .. مابا .. ولا بسير .. واذا شربته .. ان شاء الله امرض واطيح وارجع لين تطلع روووحي بعد انزين ..
مي: جب زييين ..
سيف: ليش اتسكتيني يوم اني ما همج ..
مي متنرفزه: سيييف ..
سيف: صدق زعلان وشال بخاطريه عليج لـ درجه ما تتوقعينها .. يعني يييت واعتذرت منج وحاولت أراضيج بـ اي طريقه .. غانم رضيتي عنه ويلستي ترمسينه وتسألين عن اخباره وعن دوامه .. وانا معاندتني وما تبين تسمعيني .. بس لانه اخووج يعني  ..!
اجدمت منه وهي رافعه حياتها
مي: وانته شو ..
سيف: افف مادري .. خلاص كيفج .. عطاها ظهره ..
مي: تعال وين ساير ..
سيف: بطلع ..
مي: مب على كيفك .. وقفت ساعه تهذر .. صدعتني وجنك بالع راديو .. الحين تقول لي خلاص بطلع .. تعال ..
سيف:شو تبين .. !
مي: اباك توديني الجمعيه ..
سيف: عموه لا تمزحين وياي ..
مي: والله ما امزح وياك .. انته من هذاك اليوم حاشرني بوديج وبوديج وانا مب طايعه اسير وياك مكان ..
سيف: انزين .. !
مي: الحين اقولك ودني الجمعيه ..
سيف: يعني اذا وديتج بترضين .. ؟
مي: هيه برضى ..
سيف: قولي والله ..
مي: عن الحركات بتذلني يعني .. ؟
سيف: طاااعو منو يرمس عن الذل ..
مي: هههههههه .. الحين شووو .. ؟
سيف: يلا انزين .. انا بسير السياره .. خلصي تعالي ..
مي: انزين .. نعال نوره حذال الباب.. سر الصاله شلها وياك ..
سيف: على هـ الخشم .. نشتغل عند ابو نوره نحن .. صارف لنا راتب خليفه عشان نخدم حرمته وبنته
مي: وبعدين .. ؟
سيف: والله ساير سااااااااااير .. يالله .. بتذلني الحين عشان ترضى ..

ضحكت مي وسارت حجرتها تلبس عباتها .. واتصلت بـ عليا اختها عشان ماتحشرها عقب اذا عرفت ان عامر مريض وهي مب مخبرتنها .. ولا بعد هادتنه وطالعه من البيت ..!

..

ف بيت عليا


مايد: هووود هووود ..
عليا: هدا هدا فديتك ..
مايد: السلام على من اتبع الهدى ..
فارس نازل من فوق: وانت ويين واللي اتبعو الهدى ويين ..
مايد: طوف طوف انته .. بسك مغازل ..
عليا رافعه حياتها: علمتوووه بعد ..!
مايد: والله سألي ولدج .. حابس عمره ف الحجره ليل نهار .. واذا يلس ويانا اميود هـ البيري ويبتسم ويا عمره ..
عليا:و اي حد يبتسم وهو يطالع الفون يعني يغازل ..!
مايد: عمووه .. ولدج ف حياته ما ابتسم لـ وجه الله .. تبين الحين اتفهميني انه يوزع صدقه بـ ظروسه..!
عليينا هـ الحركات .. طوف طوف الله يخليك .. بعد يقول بسمي بنتي عليا .. حرام هـ الاسم يتكرر ف هـ العايله .. لان عيالكم وييين .. وعمتيه وييين .. فديتها والله "وهو يقلدها" يعلكم ما تسووونها ...
وسار صوب عمته حظن ويهها وباس راسها .. وفارس واقف يضحك عليه
عليا: والله انك ماصخ ..
مايد: آه كيفي أغازل عمتيه .. فيها شي .. ؟
عليا: بلا هـ الرمسه البايخه .. قوول ..
مايد: آمري فديتج..
عليا: شو سويت ف إمتحان اليوم..
فارس: امايه هـ السؤال ما تسألينه مايد.. يعني شو سوا.. يا برياني دياي والا مجبوس لحم..
عليا: ميّووود..
مايد: عموه انا اسعى لـ رضاج .. مسولج أكلات شعبيه  مما لذ وطاب..هريس..  برياني .. مجبوس .. عرسيه .. بلاليط وبيض .. اللي تبييينه ..
عليا: نعم ..!
مايد: مألف على كيف كييفج ..
عليا: وجي ما تدرس.. وينها شيخوه عنك .. ؟
مايد: فديتها اختيه والله ذبحت عمرها عشان اخلص ربع الكتاب .. بس ولدج هذا ما يخليني ادرس.. يوم بديت اندمج ف المذاكره سحبني ويابني هني حتى ما خلاني ارتاح عشان ابتدي الوحده اللي عقبها ..
فارس: يالجذاب..
عليا: فارس جي ما تخليه يدرس ..هذا يدرس وما يفلح وانته بعد اتسير اتخرب عليه روحك اتخرجت وافتكيت تباه يعيد السنه ناقصين نحن ناقصين .. تخلي الولد يلعب و .......

ويلست عليا اتهزأ ف فارس وفارس اي شي يحاول يسكتها او يقول لها  ع الأقل ان هـ اللي واقف جدامها اكبر خراط عرفته البشريه بس هي ما عطته فرصه يرمس.. ومايد حظرته واقف ويضحك


..


ف الجمعيه ..

سيف: يالله .. ابا افهم ودرتي الجمعيه اللي ورا بيتنا وساحبتنا هـ الجمعيه ليييييش .. عموه انتي وايد تحبين تتغلين ..
مي: وااااااايد لا تتحرطم .. كل اللي اباه احصله ف هـ الجمعيه ماعور راسي ..
سيف: والله اللي ورا بيتنا شحلاتها .. بس انتن يالحريييم ..
مي: اقووولك .. شرايك تودي نووره صوب الحلويات .. وتفكني من حشرتك ..
سيف: انتي بتذليني الحين لانج رضيتي عليه ..؟
مي: والله انته اللي بتذلني لانك يايبني هني ..
سيف: ما بذلج بس وين ساحبتنا .. جمعيه ف آخر دبي .. ع الحدووود 
مي: سيييف صدعتني .. شل نووره وسر يلا
سيف: تتأمر بعد حضرتها .. ماقووول غير الله يعينك ياخليفه جانها بتذلك كل ما تزعلها .. يلا انسير انتي بعد ..

مسك نوره من اديها .. ويوم شافها تدلع بـ مشيتها .. شلها وسار .. مشت مي والعربانه جدامها .. خلصت من هـ السيد .. لفت الصوب الثاني .. ادور بـ عيونها ع الغرض اللي تباه .. ومره وحده وقفت .. 

وقفت وهي منصدمه .. ثواني تتأمل الموقف ..
هذا هو .. لا مب هو .. امبلى هو .. هو .. عقت الغشوه عن ويهها عشان تطالعه عدل ..

هاي الساعه اللي ف اديه .. هي خذتله العام ف عيد زواجهم .. والكندوره اللي لابسنها .. هي كاوتنها قبل ساعتين ف حجرتهم .. والغتره والعقال والنعال .. وعيونها .. وقلبها ..
كلهم يقولون ان هـ الانسان اللي واقف جدامها هو خليفه .. ريلها

بس اللي حذاله منو .. منو ..!

ضحك خليفه ويا اللي واقفه حذاله .. ومشى ساير .. بدون ما ينتبه انه ترك وراه انسانه .. كسرها .. كسرها وكسر قلبها


هدّت مي العربانه .. طلعت مبايلها واتصلت بـ سيف .. ثواني ووصل ..

سيف: بلاج ..
مي: انرد البيت ..
سيف: نعم ..!
مي: سيف الله يخليك .. انرد البيت ..
سيف: ساحبتني من قلب العاصمه لين هني .. وآخرتها تقولين انرد البيت ..
مي نزلت دموعها: خلاص مابا شي .. 
سيف: عموه بلاج حد عق عليج كلمه والا سوابج شي ..
مي: لا..
سيف: عيل ليش اتصيحين ..
مي: ابا ارد البيت .. بتردني البيت والا اطلب تكسي ..
سيف رفع حياته بـ استغراب : بردج .. بس ..
مي صاحت من خاطرها: بس اسكت عنّي ..


انصدم سيف .. انصدم من دموعها وردها ونبرت صوتها .. اجدم منها مسك اديها بـ قوّه .. ومشى وياها رادين البيت ..

ليست هناك تعليقات:

إرسال تعليق