اسبوعين .. !
اسبوعييين ..!
اسبوعيييين ..!
لاتسألوني عن احساسي اللي اتبعثر.. لا تسألوني عن شعوري
اللي انصرق .. لا تسألوني عن فرحتي اللي انهدمت.. لا تسألوني عن قلبي اللي فقد
نبضه..
اسبوعين ..! هه ..!
ابويه حرقهم .. حرق هـ الاسبوعين .. حرق فرحتي .. حرق
قلبي .. حرق سعادتي .. حرق روحي اللي بدت
تحبه وتتعلق فيه .. حرق ضحكه اختفت قبل لا تنرسم .. حرق قلب مات قبل لا ينبض ..
حرق حياه انهدمت قبل لا تنبني .. حرق حلم ظاع قبل لا يتحقق .. حرق عروس قبل لا
تنزف لـ فارسها .. فارس احلامها .. ابويه حرقني .. حرقني و حرق الاسبوعين وحرق
فارس ..
شو اللي صار مادري.. شو اللي استوا بينه وبين اخواني ..
مب مهم .. نسيت كل لحظاتي نسيت كل احاسيسي ومشاعري .. نسيت اخواني ونسيت حتى
نفسي.. الشي الوحيد اللي ف بالي ومستحيل
انساه هو ابويه ..وكلامه اللي يرن ف اذني .. كلامه اللي حرق قلبي .. حرق اللحظات
اللي كنت اترياها تمر عشان يمرن الاسبوعين .. بس ابويه طوفهن ف لحظه وحده .. وحرق
يومي ..
بندت عيني بـ ألم وانا اسمع كلامه اللي يرن ف اذني يوم
قال بـ كل عصبيه ..
بدر : ما بتاخذين فارس يعني ما بتاخذينه .. طول ما انا
حي .. وشرات ما فرحت قلبج ووافقت .. حرقته حرقته وانا اقول لـ خالد ان ماشي نصيب
.. حرقته عشان تعرفين كيف حرقتيني يوم سودتي ويهي معاه .. حرقته اليوم وانا اقول
حق الريال اللي خطبج حق ولده.. انج وافقتي عليه .. وبتاخذينه غصبا عنج .. والا
والله لا اخوج ولا ربعه بيدخلون الدوره اللي يحلمون بها .. كثر ما حرقتي قلبي بحرق
قلبج .. بحرقه وبهدم حياه الناس لي تحبينهم وبتشوفين يا شويخ ..
هدّني .. وسار .. وسار يا اميه
آآآآآه .. آآآه يا اميه آآآه .. ليتج كنتي موجوده ..
تشوفين اللي سواه ابويه .. وتسمعين اللي قاله .. وتراقبين بنتج كيف تحترق وتذوب
..ليتج كنتي موجوده .. يالسه عند راسي وتمسحين على شعري .. وتوقفين بـ ويهه
وتقوليله ما تقدر .. ماتقدر تحرم بنتي من هـ الشي يا بدر .. ماتقدر تغصبها على شي
ما تباه ..
ليش ما ذبحتيني وياج.. ليش ما خذتي روحي وياج يوم رحتي
.. ليش يبتيني لهـ الدنيا وهديتيني.. ليش ما تسمعيني وانا اشكي .. ليش ما اجاوبيني
وانا اسأل ..
امايه ابويه ذبحني .. ذبحني ..
رديت حطيت راسي ع المخده .. وانا قابظه ايدي واظرب الشبريه بالقو .. من
القهر اللي ف داخلي ..
..
ف المستشفى
مروان: راسي يعورني .. يركبولي جلكوز .. بطني يعورني
يركبولي جلكوز .. حشى انا بمووت .. ف الرمق الاخير وهذيل بيركضون ورايه يركبولي
جلكوز .. ابا افهم انسان ادوخ وطاح .. شحقى مركبين له جلكوز..!
راشد: انته ما صدعتنا .. وبعدين بخبرك .. يوم بتموت بعد
كيف بتركض عشان هم يركضون وراك .. !
مروان: صخخ زين انا لايعه جبدي .. ابا اطلع ..
راشد: تو الناس باجي ساعه ونص .. وعقبه في واحد ثاني
رفع مروان راسه .. حط عينه بـ عين راشد ..
راشد: ساعة وداعك دمع الأعيان مسفوح منك وعليكم
من المحاجر ضياعه .. الحب يجبر يا حبيبي على البوح .. والشوق يفقد ف القلوب
المناعه ..
مروان: رشود انا روحي لايعه جبدي ..
وفر مبايله ..
راشد: بلاك ..
مروان: من الصبح اتصل بـ فارس .. واكلمه ع البي بي ..
مايرد عليه ..
راشد: على فكره ..
مروان: خير ..
راشد: حتى اذا خلص هذا وخلص اللي عقبه .. بعد ما بتطلع
..
مروان: ليش ان شاء الله .. معجبين فيني ..
راشد: يتريون نتايج التحاليل لين باجر ..
مروان: وحد قالهم ان فيني مرررررض..!
راشد: والله من خريط اخوانك .. حتى انا صدقت ان فيك مرض
..
مروان: يعني ابويه مثلا بيطلع لهم ف النتايج ..
سكت راشد وضحك على اخوه ..
مروان: اففففففف..
راشد: بطنك يعورك ..!
مروان رفع راسه وبند عيونه : وايد ..
اجدم راشد منه وحط ايده ع جتفه سكت ثواني ..
راشد: اييب لك شي من الدكان
مروان باستهزاء: دكان ابوك ..
راشد ضحك: شدراني دكان سوبرماركت المهم ..
مروان: ابا ماي باااااارد ..
هز راشد راسه وطلع من الحجره ورد مروان رفع مبايله واتصل
بـ ولد عمته ..
نزل راشد تحت .. وسار صوب السوبرماركت .. وقف عند الباب
وجدم ريله خطوه .. ووقف ..
طاحت عينه بـ عينها وهو بعده واقف .. خذت هي نفس ..
واجدمت خطوه ..
ميره: لو سمحت
ابتعد راشد .. طلعت من السوبرماركت ومشت عنه .. وهو مشى وراها .. حست انه يلحقها .. بس ما
صدت صوبه ولا علقت عشان ما تفضحه جدام الناس وتنفضح وياه ..!
وصلت عند اللفت ضغطت ع الزر .. وصدت صوبه ..
ميره: ممكن اعرف ليش تلحقني ..
راشد: منو قالج اني الحق .. شاكه بنفسج ..
سكتت عنه وهي متنرفزه .. ركبت اللفت وهو ركب معاها ..
ضغطت على رقم الطابق .. وهو ساكت ويطالعها .. وصل اللفت للطابق اللي تباه .. نزلت
وصاحبنا نزل معاها ..
مشت ومشت .. لين ما وصلت عند باب الحجره وراشد بعده
يلحقها .. وقفت ميره وصدت صوبه وهي معصبه ..
ميره: شو اللي تباه انته.. ليش تلحقني ..
راشد: ابوج ف المستشفى .. !
ميره: مايخصك..
سكت عنها راشد .. اجدم خطوه ورفع راسه .. ركز ع الاسم
اللي مكتوب ع الباب اللي واقفين حذاله واتغير شكله ..
راشد علي راشد .. رد قراه مره ثانيه .. راشد علي راشد ..
صد صوب ميره وهو منصدم .. ورد اطالع الاسم .. بدور علي راشد ..!
وسمعو صوت شيبه .. يزقر : مييره .. ميره ..
صدت ميره عن راشد .. فتحت الباب ودخلت .. وراشد واقف
يراقب الموقف بصمت ..
اجدمت منه يلست ع الشبريه حذاله.. مسك اديها و قال لها
كلمتين .. ضحكت .. ودموعها ترست عيونها ..
وردت وقفت .. بـ اديها .. رفعت ايد ابوها وجدمتهن من ويهها .. وغطت كل
ملامح ويهها البريئه بتجاعيد ظاهره على اديه تشهد بمرور الزمن عليها ..
بعدها واقفه وهي
مركزه عيونها عليه .. على نظراته الدافيه وويهه الذابل .. وانفاسه اللي بدت
بالعد التنازلي .. حطت ميره اديها ع يبهته .. باسته .. وصدت صوب الباب ..
طاحت عينها بـ عين راشد اللي بعده واقف ويراقب بـ صمت ..
طلعت ميره برع وبندت الباب ..
راشد: متى بيرخصونه
ميره ابتسمت من ورا خاطرها: اتشوف وضعه يسمح انهم
يرخصونه ..!
راشد شويه: ليش شو فيه .. !
ميره سكتت عنه ومشت.. حس انها اضايجت من السؤال ف غيّر
السالفه ..
راشد: اسمج ميره عيل ..
ميره: وانته .. ولد بدور .. !
راشد: انا راشد " رفع حياته" ولد عمتج ..
سكتت .. وسكت معاها ..
ميره: ألم ف العظام والمفاصل .. تحول لـ نزيف .. اطوّر
لـ ورم في نخاع العظام واستمر لين انتشر ..
ووقفت عند باب الاستراحه ..
راشد: سرطان ..!
هزت ميره راسها بـ هيه .. ودخلت .. يلست ع الكرسي ..
ومسحت دمعتها اللي نزلت غصبا عنها ..
ميره: ماباه يموت ..
راشد يلس جدامها: وشو العلاج ..
ميره: كيماوي ..
راشد: ما تحسن ..!
ميره هزت راسها بـ لا: مب متقبل العلاج .. ما يباه ..
يقول رديني البيت يلستي ف المستشفى تمرضني اكثر ..
وقفت .. وسارت صوب الدريشه ..
ميره: انته ياي تطمش ..!
راشد: على خالي وبنته.. هذا ظنج فيا ..!
ميره ابتسمت باستهزاء ..
راشد وقف: لو كان عدوّي ف هـ الحال .. قلبي ما بيطاوعني
اني اجوفه جذه واسكت .. ف ما بالج بـ ناس من لحمي ودمي .. شكرا على حسن الظن ..
وعطاها ظهره ..
ميره: لحظه
صد راشد صوبها وسكت ..
ميره: أنا آسفه ..
راشد: مايحتاي ..
وسار عنها ..
..
ف بيت أحمد
رفعت ريلها عشان توصل لـ مقبض الباب .. نزلته ع تحت
وبسرعه دزت الباب وفتحته ..
طلعت برع وقفت جدام باب الحجره .. بدت اتفرك عيونها وهي
اتصيح من خاطرها
نشّت مي من آخر المكان ويلست ف نص الصاله عشان بنتها
تشوفها
مي: تعالي ماما ..
ركضت نوره وسارت صوب امها .. حطت راسها على ريلها وصاحت
بـ دلع ..
عامر وهو طايح ع الكنبه: اففف تقهرني هـ البنيييييييييه
.. احس بزووووع من دلعها الماصخ ..
غانم: حد قالك من قبل .. انك تلوع الجبد .. !
خليفه: وانته جي حاط راسك بـ راس بنتي..؟
عامر رفع راسه: خليفه .. تدري لو انا بدالك خسي اعرس
والله ..
خليفه: ليش ان شاء الله ..!
عامر: ياخي انته جايف ويهك ف المنظره .. متخيل ان هـ
الويه ويه ابو لا قدر الله .. !
سيف يضحك: كيف بعد لاقدر الله .. ثره استوا وخلص ..
خليفه: انا يوم اقول اخوك غبي .. عشان جذه ما قابلينه
لين الحين ..
عامر: اييه يا خليفه .. لا اتذر الملح ع اليرح ..
غانم: انتو لو امداومين جان الحين مظهريلكم مواتر
عامر: اهانه والله .. رياييل طول وعرض .. وكل واحد ابوه
مظهر له موتر من سنتين يدفع اقساطها
أحمد: احمد ربك زين ..
عامر: ابوييييييييه انتتته ما وراك شي .. المفروض تدفع
لي كاش
أحمد: بس جب يلا ..
عامر: خيبببببببببببه .. قووويه والله ..
غانم: اخافك تغازل وتصرف عليها..
أحمد طاح ع الكنبه: هيه ما غازلت ايام الشباب الحين بيي
بغازل ..
سيف: مراهق ف الاربعين ..
احمد: خليت المغازل حقك وحق عمك ..
عبدالعزيز: تقولها بكل برود .. انا خاطري اكسر ظلوعهم من
الظرب هـ اللي يغازلون ..
احمد: عليك بهم ..
عبدالعزيز: جان بتسلموني اياهم ماعندي مشكله ..
عامر: استلمهم عمي ..
خليفه: عمور شرايك اداوم ويا اخويه ..!
صد عبدالعزيز صوبه وعطاه نظره عقب ما حس ان خليفه يغير
السالفه ..
عامر: ليش اخوك عنده شركه خاصه ..!
خليفه: لا جي ولد منوه اخويه ..!
عامر: هااه لا تقول بتوظفني بيدار ف المزرعه .. والا
ناطور ف بيته اللي ينبني
خليفه: ههههههههه لالا .. هو عنده محل .. بس ما يقدر
يداوم فيه كل يوم .. ف يدور حد يسلمه اداره المحل في غيابه ..
عامر: والله وشو الفرق بين المزرعه والمحل يا استاذ
خليفه .. ف النهايه ناطور ..
خليفه: شو ناطوووووور .. ويا ويهك بيعطيك مكتب تيلس فيه
.. مب صندقه ..
عامر: اوونه ..!
خليفه: عيل ..
عامر: وألبس كل يوم كندوره وغتره وعقال .. واحط القلم
جذه .. وبعد ايووني يقولون استاذ عامر وقع .. استاذ عامر اختم .. وانا اقولهم عقب
عقب مب فاضي الحين ..
خليفه: هيه هيه .. شو قلت ..
أحمد: راسك يعورك انته توظف هذا عندك ..!
سيف: عز الله .. فقر اخوووك ..
خليفه: هههههههه ما عليك منهم عمور .. قوول شو رايك ..
عامر: والله عطني مهله افكر .. تدري بعد لين ما اشاور
الاهل والحرمه ..
سيف: عداااااااال اخويه .. عن لا تشاور بس ..
عامر: لو سمحتو لا تدخلون في خصوصياتي ..
عبدالعزيز متنرفز: صارت لك خصوصيات بعد من الحين ..
سيف: دخيلك خليفه .. حط في شروط العقد انه ما يطول شعره
..
عامر: آآآآآآآآآآآه يا جرح السنييييييين ..
مي: هههههههههه .. والله شكلك احلى جذه.. ادش الخاطر
اكثر ..
عامر: وقبل ما كنت ادش الخاطر يعني ..!
مي: قتلك اكثر لا تفسر كلامي على كيفك ..
عامر: لا تفسر كل صمتي لك جفا
..بعض الغلا ما يشرحه غير السكوت
سيف: خييير ان شاء الله استاذ عامر ..
غانم: شو تعاديت من رشود ..!
عامر: والله داق ف راسي اسمع شلّه بصوته ..
مي: سر و فكنا من حشرتك ..
عامر: ويييين الحين 10 ونص .. عيال عمي بدر مستحيل يسهرون لين هـ الحزه ..
احمد: عيل شراتكم انتو ..
عامر: الساعه 9 ابويه يصلون العشى ويخمدون ويا الدياي .. ما اجوفون عبدالله ومهره
رقوود من 9
غانم: ههههههه والله احسن لهم ..
عامر: هو من ناحيه احسن .. ف احسن ..
احمد: اشك انهم رقود ع حشرتكم ..
عامر: اححح انتي احح ..
وهو ساير صوب نوره اللي ردت دفنت راسها بحظن امها وصاحت
عامر: مالت عليج .. ما تستاهلين حد يدلعج .. يلا يلا
بووويه . تصبحون على خير ..
نش عامر .. ونشو كلهم وراه سايرين حجرهم ..
..
بالباجر الصبح ..
ف حوي البيتين .. بالتحديد وين ثبتو مكان الحوض
عامر: واحد اثنين .. سلاسه ..
ونقز ف الحوض ..
ثاني وهو حاط ايده ع ويهه ويضحك: ثبا ماي عليّه ..
شمه: انزين لا تسير صوبه ..
عامر: ايه انته ..
ثاني: لاقول انته .. انا ثاني ..
عامر: هههههه
انزين تعال انا بشلك
ثاني: مابا ..
عامر: ما بتغرق يا ريال تعال ..
شمه: متعقد من حركاتك ف الشاليهات ..
عامر: اونه .. يعني ما نسى ..!
شمه: طبعا لا ..
عامر: اخافه متعقد من سالفه الليت عيل ..
شمه: اي ليت ..!
عامر: ماشي سلامتج ..
ورد دخل الحوض ..
منصور توه ياي وسار صوب الحوض ودخل ..
منصور: خيبه .. الماي مستورد من الدنمارك .. !
عامر: هههههههه وايد بارد ..
منصور: واااااااااااايد ..
عامر: سر ييب الهوز .. اثلجنا والله ..
شمه:زين الجو حار ..
عامر: تعالي حطي صبعج .. بتستوين شهييده تايتنك ..
شمه: خيبه ..
منصور: امايه البارحه حاطه فيه ثلج ..
عامر: خيييييييير ان شاء الله ..! امك ليكون تتحسب عمرها
ف فريج قوم يدك .. ايبون طربال ايمعون فيه ماي المطر واونه يعني حوض .. !
شمه: هههههههههه
عامر: والا اتيي البلديه تحفر .. ينصب مطر اليوم الثاني
.. والحبايب مسوينه حوض .. ماشي حلال حرام شباب وبنات كلهم يعني عايشين حياتهم ..
شمه: هههههههههه استغفر الله بس اسسسكت ..
عامر: وينه اخوج .. ؟
شمه: فارس .. مادري به .. امس رقد من وقت ..
عامر: من وقت .. ! الساعه كم يعني .. خمس العصر..!
شمه: هاهاها ..
عامر: اذا انتو 9 ونص بالنسبه لكم وايد متأخر .. و 10 ويه الفير .. بعد متى من وقت ان شاء الله ..
شمه: جذه ع الساعه 8ونص.. صلى العشا ورقد .. ما تعشا حتى ..
عامر: ليش مريض .. !
شمه: مادري به ..
عامر: ونعم الاخت ..
شمه: والله عنده ام ..
عامر: طاعو هاي .. تعال ثنويي ..
ثاني: ماباك انته .. انا .. انا ماحبش ..
عامر: بالطقاق .. عاد انا اللي ميت عليك .. مالت على هـ
الويه لو مغرقنك هذاك اليوم احسن ..
شمه: انته ايييييييييييييه لا تسب الولد ..
عامر: قومي انتي والولد .. ما ينعطى ويه .. هـ النتفه
ولسانه هـ الطول .. مستانسه بعد اتربيه بجوفه كيف بيحترمج وبيقدرج باجر ..
شمه: فديته والله .. بجووووف ..
عامر: ما يحتاي اجووف .. واضح .. اكيد لسانه بيكون هـ
الطول دامه ولد عمار..
رد عامر يتسبح ف الحوض .. وشمه شلت ثاني وسارت فلتهم ..
دامه ولد عمار ..! وجنه هووو مووول مب ملسون .. صدق يقهر هـ العامر
..
ليست هناك تعليقات:
إرسال تعليق