الجزء الـ21 (2)

نزل فونه عن ذنيه .. رد طلب الرقم ودق ارسال .. وحط الفون عند اذنه ..

وبعد محد يرد ..

حارب: اخ لااا شو هـ الاخوان .. حاله هاي الحينه ..

ثواني ورن مبايله .. رفع حارب حياته .. ورد ع الرقم بـ كل هدوء واحترام ..

حارب: ألو ..

شيخه: يا عيني ع الرقه ..

حارب: يالسخييييييييييييييييييييييفه...

شيخه: انتتتتتتتتتتته شيييييييي مستحيييييييييييييل .. ملللللجت وبعدك دفش ..

حارب: جب جب صخي .. ما ترمسين ..

شيخه تضحك: عيل ليش متصله ومخسره ..

حارب: قلت لج جبببب .. شخباااارج ..

شيخه:ماعرفنالك .. شخباري والا جب ..

حارب ضحك: شخبارج شخبارج شخباااااااااااااااااااااااااااااارج يالدبه ..

شيخه:بخير الحمدلله .. انته اشحالك ..

حارب: اسمع هـ الصوت وماتبيني اكون بخير ..!

شيخه: فدييتك والله ..

حارب: شو ألمانيا وشو جو ألمانيا ..

شيخه: اوووكي ..

حارب: وشووو حمد ..!

شيخه ابتسمت عقب مافهمت قصده: الحمدلله ..

حارب: زين معاج ..!

شيخه: الحمدلله ..

حارب: شيخه ..

شيخه: بلاك .. والله اننا بخيير .. هذو متفيزر حذالي ويطمش بدال ما يركز ويطالع الشارع اللي جدامه 

حمد: ترمسون عني ثركم ..

شيخه: هووو يحش فيك انا ما يخصني ..

حمد: ماقدر اسوق .. احس باحساس الشخص اللي يرمسون عنه ..

حارب منصدم: روحه يسوق ..!

شيخه: حسيت ..! امصدق عمره ..

حمد: لا اله الا الله ..

شيخه تضحك: مستغرب انك اتسوق ..

حمد: عادي انزين سكان يسار شرات البلاد .. والقوانين هني ما تمشي عليه .. انا حكومه ..

شيخه: قلت لك هذا وايد مصدق عمره مسوي عمره حكومه وامشي الكون على كيفه .. قول لي .. اخواني شخبارهم ..

حارب: بخير الحمدلله ..

شيخه: ومهرو شحالها ..

حارب: سكتي الله يخليج .. مسوتلنا فلم هـ المهرو ..

شيخه: بعدها ما ربت ..!

حارب: لا .. تترياج ..

شيخه: وييه بتتريا وايد عيل ..

حارب: ليش ..

شيخه تغير السالفه جدام حمد: ماشي سلامتك ..

حارب: شويخ فيج شي ..!

شيخه: والله ف السياره انا وحمد سايرين عند خواته .. امس مادري اليوم وصلن ..

حارب عقب مافهم قصدها: حبيبتي شوييخ ..

شيخه: جب زييين ..

حارب: ثرج ما تستحيين ..

شيخه: مادري عنك ..

حارب: ههههههههه انزين سيري خله حمد ينفعج ..

شيخه: طبعا بينفعني .. ريلي .. عيل انتو بتنفعوني ..

حمد: سايرين ورادين على هـ الحمد .. بدددددددددعم ثرني ..

حارب: لالالا دخيلكم .. يلا يلا مع السلامه ..

شيخه تضحك: بلاااااااااك ..

حارب: ماشي .. والله ما تتوقعين شكثر مستانس لاني سمعت صوتج واطمنت عليج ..

شيخه: مب وقت عتاب الحينه ..

حارب: متى ما فضيتي خبريني بكلمج ..

شيخه: ثرني فعلت الخدمه .. ف لين فليل يمكن تشوفوني منوره مبايلاتكم ..

حارب: اي فليل اختيه ..

شيخه:وايد لا تتفلسف انته .. عندنا المغرب ..

حارب: هههههههههه انزيييييين يلا سلمي على حمد ..

شيخه: الله يسلمك .. وانته بعد سلم عليهم كلهم ..

حارب: الله يسلمج حبيبتي .. مع السلامه ..

شيخه: مع السلامه ..

بندت شيخه وصدت صوب حمد اللي كان يضحك عليها ..

شيخه: خيير ..

حمد: والله اتضحكين انتي نزلي نزلي ..

شيخه: ليش ..

حمد: ماشي يعني لازم تهزبينهم ..

شيخه: هييييييه .. بعدني زعلانه منهم ..

حمد ضحك: نزلي نزلي الله يهدييييج بس ..

نزلت شيخه سارت صوب حمد ومسكت اديه .. ما يحتاي ترمس واتبرر له سبب الحركه .. حمد بدا يفهم شيخه اكثر من نفسها .. ويقرا اللي ف خاطرها من عيونها .. يعرف انها جبانه وبنفس الوقت مستحيه من خواته .. وهو الشخص الوحيد اللي ترتاح له وتطمن معاه .. عشان جذه .. مسكت اديه

بـ سويج الموتر .. دق الباب ووقف ثواني .. فتح الباب .. ولد امبين من شكله ان عمره 6 او 5 سنوات ..

ومن شافنا بويهه صرخ ..

مانع: خااااااااااااااااااااااالي حممممممممممممد ويا العرووووووووووووووووووس هنييييييييييييي ..

ضحكت من خاطري على جملته .. وابتسم حمد وهو ساحب الولد صوبه ولوا عليه .. اجدم للصاله وضحك ..

حمد: فضحنا هـ الولد ..

آمنه: خله كيفه مستانس ..

حمد: شووو قلنا نحن ..

واجدمت من شيخه ..

آمنه: شخبارج يالعروووس ..

شيخه: بخير الحمدلله .. انتي شحالج ..

آمنه: الحمدلله ..

شيخه: الحمدلله ع السلامه ..

آمنه: الله يسلمج فديتج ..

حمد: بسسسج زيين .. السلام الوطني .. خلي حرمتيه تيلس ..

آمنه: يوووزناااك قلنا بتعقل .. طلع العقل غاسل اديه منك ..

حمد: ههههههه وين خواتيه ..

طلعت وحده من داخل .. ماشفتها ف العرس ولا حتى لمحتها .. اجدمت مني .. وسلمت عليه ..

وديمه: شخبارج ..

شيخه: بخير الحمدلله .. الحمدلله ع السلامه ..

وديمه: الله يسلمج ..

عطتنا ظهرها وسارت يلست .. وحمد عينه عليها ..

آمنه: بتمون واقفين يعني ..

حمد: شكلج ما تبين ادخلينا ..

آمنه: قم زيين .. ماصخ واحد .. تفضلو ..

حمد: لالا خلاص بنسير بيتنا نحن ..

مانع: خالي حمد تعال ويا العروس ..

حمد ضحك: انته تباني انا والا تبا عروستي ..!

مانع: اباكم انتو الثنينه ..

حمد صد صوبي: وابويه اتخبل عليج هذا ..

ضحكت مش على رمسه حمد .. بس على نظرات مانع .. يطالعني بـ بكل براءه وكأنه معجب فيني بس بطريقه طفوليه ضحكتني .. اجدمنا للكنبه .. يلس حمد ويلست انا حذاله .. آمنه يلست على يمينا .. وجدامنا كانت يالسه اخت حمد اللي لين الحينه ما عرفت اسمها ..

حمد: عيل هنّود وينها ..

من خلص حمد جملته .. طلعت وحده من داخل .. بـ كل رقه .. من شفتها انصدمت .. نقلت نظراتي بينها وبين حمد .. يالله شكثر تشبهه .. وكأنهم توم .. بس لا والله ريلي احلى .. ع الاقل يبتسم .. هاي رافعه حياتها وتطالعني بـ طرف عينها .. حتى ما ييت سلمت عليه

هند: شخباركم ..

حمد: بخير الحمدلله .. آنسه ..

اجدمت .. ويلست حذال اختها ..

آمنه: بلاج شيخه .. هههههههه مستغربه لانهم يتشابهون  ..

شيخه: واايد ..

آمنه: اجووف  " ومسكت ويه حمد" لا لا اختيه احلى ..

مانع: خالي حمد أحلى ..

وااي فديته هذا الولد .. والله قال اللي ماقدرت اقوله ..

هند حطت ريل على ريل: مايهم .. فديته اخويه خله يكون احلى عني ..

حمد: ويييييه ويييه وييه .. هنوود اتقول عادي خله يكون احلى عني .. العاده تحشر الدنيا اذا قلنا لها فلانه احلى عنج ..

هند: قلت فلااانه .. مب اخوويه ..

حمد صد صوبي وابتسم: هذيل خواتيه ..

آمنه: اتصدق .. عبالي ان اخوانك ..

حمد ظربها ع ريلها بدون ما يصد صوبها: هاي الطمه اللي ورايه .. واللي حشرتيني بها ..

شيخه ابتسمت: ادري .. آمنه ..

آمنه: فديتج والله ..

حمد: حشرتني حشرتني من عرفت ان انتي رازه ويهج ويايه .. تخيلي ساعه يالس اترياها لين ما اتنش .. من قلت لها آمنه نقزززت سارت تتلبس ..

آمنه: حبيبتييييييييييه والله ..

حمد: تعالي صدق .. ناصر وموزه وينهم ..

آمنه: رقووود ..

حمد: شو هذييل .. بقايا هل الكهف ..

آمنه: ما يخصك ف ريلي وبنتي ..

حمد :بس بس .. وهذا الزعيم .. مانع ولدها ..

ضحكت على نظراته اللي امبينه ان استحى يوم قالي حمد عن اسمه ..

حمد صد صوب اللي طلعت اول شي:  هاي وديمه .. نادررررا ما بتسمعين صوتها ..

وديمه وهي تلعب بـ ظفورها: برنسيستي ما تسمح لي .. ارمس وايد

حمد: بدت عاد .. وهاااي .. اللي مسويه عمرها اصغر وحده .. لكنها ثالث اكبر وحده .. هند ..

هند: والله انا بعدني صغييره انزيين ..

حمد: انزين ليش تدلعين .. حرمتيه اصغر عنج بـ وايد ..

سكتت هند .. حسيتها انقهرت من رده بس حمد ما عبرها .. وصد صوبي ..

حمد: وهااي .. شيخه ..

آمنه: اتصصصدق .. ماكنت ادري .. بس سبحان الله من شفتها حسيت انها شيخه..

حمد ابتسم: بس اللي ما تعرفينه .. انها اعز واغلى انسانه .. بـ وجودي .. واقرب وحده لـ روحي ..

خذت نفس واتغير شكلي .. يالله هذا الانسان كيف يحطني ف مواقف .. يمكن لو كنا ف الشقه روحنا جان اتصرفت معاه تصرف غير عن كل مره .. جان حظنته وقلت له ان انته بعد .. اقرب  شخص لي .. بس جدام خواته .. حتى ما قدرت احط عيني بـ عينه .. ولا بعين وحده منهن ..

..

ف ستي مردف

حاط راسه ع الطاوله ويدق ..

سيف: متى بتفكنا من معلايتك انته ..

مروان: يوووم باااااااااااااكل ..

عامر: يوم انك مستعيل ع الاكل .. جان طلبت لك من ماكدونالز ..

مروان: والله ماكدونالز هذا مستواك انته ..

سيف: وانته اللي طالب وحاط الصينيه جذه ديكور .. جي ما تاكل ..؟

عامر: ما يهون عليه مروان .. انا اكل وهو يطالعني  .. يوم بييب اكله ببتدي اكل

مايد اللي ياكل ولا مفتكر ف حد: والله انكم حركات انتو .. محد يعطيكم ويه ..

سيف: هيه والله محد يعطيكم ويه ..

مايد: وانته ليش ما تاكل ..

سيف: مب يوعان ..

عامر: عيل ليش ياي ..!

سيف: ابا اسوي فيكم خير ..

عامر: مستحيل ماعندك شي هني .. وياي جذه .. قول شو عندك ..

سيف ضحك: بسير المحل شويه ..

عامر: بتسوي بنا خير لا ..

سيف: ميّود بتي ويايه ..

مايد: وين هني والا تحت ..

سيف: لا هني ..

مايد: اوكي يلا ..

نش سيف ونش مايد وراه ..

مروان: اظن انهم خلصو ..

عامر: يلا سر بسرعه فكنا ..

نش مروان سار اييب عشاه .. عامر شل الكتشب فتحه واندمج وهو يحطه ع البطاط .. رفع راسه وانصدم وهو بعده ميود الكتشب بيده ..

لو كان هو روحه .. كنت بشك اذا كان هو والا.. بس اللي وياه ثاني اللي كل يوم العب وياه كوره ف الحوي .. بس هاي منو .. وكيف جذه طالع وياها وثنوي وياهم .. ماخاف انه يفضحه ..

مروان: حووووووو ..

عامر: هااا ..

مروان: بلاك ..

عامر: متى ييت انته ..

مروان: انته سرحان ..

عامر: مروان .. بقولك شي ..

مروان: شو ..

عامر: جوف انا منصدم .. ومابا اصدمك بس تعرفني ماقدر ادس شي عنك ..

مروان: بلاك عامر .. فارس فيه شي ..

عامر: لالا .. يلس ..

مروان: ارررمس لا اخيس ويهك بهـ الكتشب اللي ف اديك ..

عامر: انته يللس ..

يلس مروان وهو يطالع عامر اللي بعده منصدم ..

مروان: عمووووووووور ..

عامر: الله يغربل ابليسك.. اسكت ..

مروان: اذا ما سكتت بصرررخ بخلي اللي ف المول كلهم يعرفون اسمك ..

عامر: اسكت اسكت ..

مروان: شو عندك ..

عامر: اسكت .. وصد وراك ..

سكت مروان .. وصد وراه بناء على امر عامر .. وهو الثاني انصدم .. بس ما بين .. وكأن الوضع عادي .. 

مروان: لحظه شوي ..

عامر: وين ساير انته ..

وقفت مروان واجدم خطوتين ..

مروان: ثنوووووووي ..

صد ثاني وراه واتشقق يوم جاف مروان .. نش من مكانه وركض ساار صوبه .. نزل مروان بـ مستواه وحظنه .. ووصل راشد ..

راشد: ماشاء الله .. شوعندكم انتو هني ..

مروان: انته اللي شو عندك هني ..

راشد: انا ياي العب هذا الزعطوط .. واعشيه ..

مروان: ولي امره اليوم ..

راشد: هيه ..

مروان: ووو " اشر بعيونه على ميره"

راشد تنهد: ف البيت ..

مروان بصوت واطي: انته صاحي ..!

راشد: قلت لك يوم برد البيت بكلمك .. يلا ثنوووي تعال ..

ثاني: انا بثير ويا عمي مروان ..

راشد: انزين تعال اتعشى وعقب سر ..

ثاني: بث مابا ..

راشد: خبلتو الولد ..

مروان: خله ..

راشد: نراكم على خير ..

وسار صوب ميره اللي وقفت .. ومشت وياه ..

عامر: الحياه حلوه..!

مروان: هاي .. بنت خالي ..

عامر انصدم: نعم ..!

مروان: ما انتبهت على شكلها ..

عامر: لا .. كنت غاظ البصر ..

مروان: كيفك عيل ..

عامر: من وين طلع خالك ..

مروان: وييه سالفه طويله هاي .. اتعشى انته عقب بقولك ..

سكت عامر .. ورد اندمج بـ عشاه ولا كانه شي مستوي بـ حياته .. اما مروان .. كان ياكل غصبا عنه ومن داخله مقهور على حركه راشد الغبيه ..

من صوب ثاني .. كانت تمشي وهي معصبه ..

راشد: شفييييييج ..

ميره: الموقف واااااااااااايد باااايخ ..

راشد: ماعليج منهم انتي ..

ميره: شو ماعليه منهم .. انته ريال طبعا ما يهمك .. بس انا شو بيقولون عني ..

راشد: ميره .. هذيل اخواني .. وانا اعرفهم عدل ..

ميره: استغفر الله ..

راشد: ايوا ايوا بس استغفري ممكن تضمنين الجنه والا اي رغبه دنيويه .. بس لا تتحرطمين .. ما بتظمنين غير عوار الراس

ابتسمت ميره ومشت .. مش لانها راضيه على راشد .. بس لان هذا الراشد ماعنده شي اسمه

"جديّه" ف حياته .. ف كل المواقف لازم يمزح ويضيف لك جو من المرح .. يخليك تغير مودك غصبا عنك .. 

..

دق الباب .. سمحت له يدخل ..

ابتسم .. دخل وبند الباب وراه ..

سعيد: امااايه ..

عليا: عيووون اماايه ..

اجدم منها سعيد .. طاح حذالها وحط راسه على ريلها .. ويلست عليا تلعب بـ شعره

سعيد: آآخ .. خلاص غيرت رايي .. مب ساير الدوره ..

عليا: ليش ..

سعيد: بس امايه بفنش من الدوام ..

عليا: لا والله ..

سعيد: والله ماقدر اخليكم تسيرون روحكم

عليا: منو قالك ان روحنا .. حارب ومروان وعامر ويانا ..

سعيد: مروان وعامر لا تحسبين حسابهم ..

عليا: ههههه حارب فديته ما بيقصر ..

سعيد: ياعيني .. قمنا نتفدى بعد ..

عليا: ليش اتغار ..

سعيد: يوم ان عليا اللي تتفداهم .. طبعا اغااار ..

عليا: ويعلهم ما يسوونك ..

سعيد: هههههههه عن يسمعونج بس زين بيسوبي ..

عليا: متى بتطلع ..

سعيد: والله المفروض اكون طالع الحينه ..

عليا: وشو تتريا عيل ..

سعيد: لالا مب المفروض .. عادي وقتي بيدي اليوم ..

عليا: سعيد .. شوي شوي ع الدرب يا اميه .. لا تسرع الدنيا ظلام .. والدرب خطر .. كل يوم نسمع عن حادث بسم الله عليك ..

سعيد: من عيووووني .. كم عليا عندي انا ..

عليا: فديتك .. الله يوفقك ان شاء الله ف هـ الدوره وايسر لك كل امورك ..

سعيد: آميين ..

عليا: ويرزقك ببنت الحلال اللي تسعدك ..

سعيد: يصير خير ..

عليا: انته تعرف كم عمرك ..!

سعيد: امايه بعدنييي صغير ..

عليا كفخته ع يبهته:26 سنه وييين صغير ..

سعيد: امايه الحياه جدامي ..

عليا: بس انا ابا اشوف عيالك ..

سعيد: بتشوفينهم ان شاء الله .. بتشوفينهم ..

عليا: متى ..!

سعيد: امايه .. خليني اخلص من هـ الدوره .. وخلي فارس يقوم بالسلامه .. وعقب ان شاء الله يصير خير ..

عليا: ان شاء الله ..

من خلصت عليا جملتها سمعت حد يزقرها..

عليا: هاه .. وصلو المهرجين ..

سعيد: هههههه اسميني بشتاق لهم ..

نشت عليا وهي مبتسمه .. ونش سعيد وراها ..

مروان: علاااااااااااايووووووه ..

عليا: خير خير .. شو عندك انته وياه ..

مروان: اصلا ما نباج انتي ..

عامر: نحن يايين عشان سعيد ..

مايد: آآآخ يالجذووووب .. والله طول الدرب وهم يقولون عموه عليا وعموه عليا ..

عليا: ادريبهم الهروم حتى يستخسرون فيا كلمه عمتيه شحالج .. عمتيه اشتقنالج ..

مروان: افا بس افا .. عليا محمد حاطه ف خاطرها لاني ما قلت لها اشتقت لج .. وفديييت الزعلانه انا اللي يووومي ما يسوا بدوووونها والله وبدون عيووونها ..

عامر: و فدييييت عيوووونها والله .. ويعلللهم ما يسووونها ..

سعيد: ههههههههههههه يايين حق التمثيل انتو الثنينه ..

مايد: يايين حق الحشره .. يلا زييين سيرو بيوتكم خمدوو .. الاوادم بيرقدون ..

عامر: الى اكوووااااخ الدجاج .. سر ..

مروان: هههههههه سار عليك موتر يا عامر ..

عليا مبتسمه: لا ادعي عليه يا مروان ..

مروان: ما تسمعينه شو يقووول .. يسب بيتنا ..

عامر: سبيت بيتكم .. جماد لا ينفع ولا يضر .. ما سبيتك انته عشان ادعي عليه .. ع الاقل انا انفع

مايد: يلا لا ثنوي فديته مدوخ .. بيرقد الحينه ..

عليا صدت صوب ثاني اللي توها انتبهت عليه: فدييته كيف مسرحينه ..

مايد: منو مسرحنه بالضبط ..!

عليا: ابوه ..

مايد: ابوووه لو مب دوام شفتات .. جان ما خلاه دقيقه وحده عندنا ..

عامر: الفقير ما يدري انكم لاعبين فيه لعب ..

مروان: هذو رشود اتصل اكيد يبا ثنوي .. يلا انسير ..

عامر: يلااا بو عسكور .. بما انك بتسير الليله وما بنشوفك

ابتسم سعيد واجدم من عامر ووايهه ..

سعيد: الله يحفظكم ان شاء الله .. تروحون وتردون بالسلامه ..

عامر: الله يسلمك ..

مروان اجدم من سعيد: لا توصي لا توصي ..

سعيد: عاد انته لازم اطرش لك لسته وصايا ع البي بي ..

مروان: ههههههههههههه يحليلي انا .. لازم اتووصي امك عليه ..

سعيد شهق: خاف ربك .. اوصي اميه عليك .. والا اوصيك انته على اميييه وابويه واخويه وحتى على عيالي خالي ..

عامر: وصه وصه سعيد .. فيك الخير والله .. يلا مروان ..

سعيد ضحك : انا طالع وراكم " وصد صوب امه" يلا امايه ..

مد اديه عشان يسلم عليها .. وقبل ما يرمس.. صاحت عليا ..

مايد: شكلكم مب مخلصين انتو اليوم..

سعيد:امايه ..

عليا: دير بالك على روحك يا اميه .. وشوي شوي ف الدرب ..

سعيد: ان شاء الله ..

عليا: لا تسرع يا سعيد .. شوي شوي .. ومن توصل هناك اتصل بي طمني ..

سعيد: ان شاء الله امايه .. بس انتي لاتسوين بـ عمرج جذه .. ثرنا محتايينج كلنا .. وخصوصا فارس .. اذا شافج جذه بيضعف اكثر .. وصحته بتدهور " سكت شوي ومسح دموعها" تروحين وتردين بالسلامه ان شاء الله ..

عليا: الله يسلمك ..

مروان: الحين انتي بتسافرين وهو الا بيسير بوظبي مال ساعه .. ساعه ونص.. شحقى حاشره الدنيا ومخسره دموعج ..

عليا: الا بوظبي ..؟ عبالك درب بوظبي هين .. مول ما نسمع عن حادث كل يوم والثاني .. الا حادث ف الشارع الفلاني الا السياره الفلانيه داشه تحت شاحنه الا وفاه كذا شخص الا .............

ويلست عليا تهزأ ف مروان اللي ندم على جملته الاخيره .. اشكالهم سكارى هم الثلاثه مروان ومايد وعامر .. وعليا مصحصحه وتهزبهم من الخاطر .. وجنها صدق تهزب سكارى مب مستوعبين هي شو اتقول وسعيد واقف ميت عليهم من الضحك ..

سحب عامر عمره ومروان وراه .. ومايد يلس يسكت عمته شوي عقب ما طلع سعيد وردت اتصيح .. مب مضايجه من سيرة سعيد كثر ما مضايجه من ولدها اللي ف المستشفى .. ودها لو تعطيه صحتها وتاخذ تعبه والمه .. وده لو يرجع البيت بريوله .. ويقدر يحرك اديه شرات قبل .. واتم هي طول العمر شاله تعبه وطايحه ع الفراش

هذا قلب الام .. مافي اي حنان ف الدنيا .. يعادل ذره من حنانها ..