السبت، 16 نوفمبر، 2013

الجزء التاسع (2)


مرت الأيام ..


بدت تتوتر شيخه اكثر .. باجي لها امتحان واحد وحضرته فارس كل يومين يقول لها ابا اشوفج .. وهي تعرف ان اللي يسوونه غلط .. ولو ابوها جافهم .. بيقص راسها وراس فارس فوقها ..
عامر شو اللي فيه بالضبط.. ما يدرون مره يقولون التهاب ومره يقولون فايرس.. بعده تعبان وطايح ع الفراش .. وسيف وغانم مب مقصرين وياه ابدا بس طبعا مع جرعات الخبال اللي متعودين عليها .. وعليا كل مره تفور له نوع من الاعشاب وتجبر كل اللي وياه ف البيت انهم يشربون خصوصا مهره بما انها حامل

الصبح .. نزلت من السياره بـ حركه جنونيه وسارت صوب عمتها اللي كانت يالسه ف الحوي ويا بنتها ..

شيخه: سلام
شمه: وعليكم ..
عليا: عوووذ بالله .. يهود يسلمون على يهود
شيخه: ويا هـ الحرررر
عليا: ليش الناس ما تسلم ف الحر .. ؟
شيخه: اتسلم بس ما تتريق ..
عليا: جي ما نزل اخووج ..؟
شيخه: منو مروان .. ؟ سار يغازل .. "ويلست"  
عليا: نشي اجوف .. ردي سلمي .. وسيري بدلي ثيابج وغسلي اديج عقب تعالي ..
شيخه: خيييييييييييبه عمووووووووووه ..
عليا: يلا يلا يلا بسرررعه .. جدامي ..
شيخه: والله .. مالي بااااااااااااارض ..
عليا: انتي على منو طالعه هيزه ..
شيخه: على بنتج المعتووووهه ..
شمه: مالت عليج ..
عليا نشت: قومي بسرعه .. قووومي
شيخه تصرخ: عمووووه ..
عليا كفختها على راسها: لا تصرررخين ..
شيخه: مابا ابدل .. خلاص باجر آخر يوم البس فيه لبس المدرسه .. حرام والله بشتاق حق المريول .. 
عليا: خليه عندج ف الكبت .. وكل ما تولهتي ع المدرسه ردي لبسيه .. والا اقولج .. بنفصل لج فستان ملجتج على شكل مريول .. امشي اجوووف ..

نشت عليا .. سحبت شيخه وودتها بيتهم .. وشمه تضحك عليها وهي تقول لها احسن ..
فتحت عليا باب فله بدر اخوها .. وشيخه تمشي وهي ميته من الضحك .. على عمتها اللي ساحبتنها جذه وراها .. وعلى آخر جمله قالتها ..
وصلن للدري ووقفت شيخه ..

شيخه: صبري صبري بضحك ..
وردت تضحك من الخاطر ..
عليا: هـ البنت مب صاحيه .. 
شيخه: انزيين هديني .. ادل الدرب ..
عليا: لو ادلينه ما بتخليني اسحبج واييبج لين هني ياللي ما تستحين ..
شيخه: ناويه اتيين لين الحجره بعد .. ؟
عليا: ليش عندج مانع ..؟
شيخه: لا ماعندي .. يلا طوفي جدامي اجووف ..

طلعت عليا  عينها على شيخه اللي ركضت ووصلت لـ نص الدري وهي تضحك على عمتها ..

شيخه:عمووه انتي ف بيتكم ماتقدرين تسيرين فوق اجوفين عيالج .. عمي خالد قالج بركب لج لفت.. اما ف بيتنا تحلمين يحطولج حبل حتى .. عشان تسلقين منه .. لان كل هـ الاوادم اللي فوق .. ما يهمون هـ الآدميين اللي تحت ..
عليا: انتي يا قليله الادب .. خلني اوصل بس .. انا براويج ..
ضحكت شيخه .. سارت لين آخر الدري يلست ..
شيخه: شو بتراويني.. هاه اترياج يلا .. 

ويلست ع الدري و منزله راسها ادندن .. دقايق وماحست الا بـ شخص فالعنها ..

شيخه: يااااااااااااااااا ..
عليا: يا شوووو .. ؟
شيخه: ياااااااا ولا شي .. والله شو هـ الحركات .. عيايز اخر زمن ..
عليا: تدرين لو انج مب بنت اخويه ..
شيخه: جان ما شفتيني واقفه هني ..
عليا: جان عطيتج كف .. علمتج الأدب ..
شيخه: جااااان كنت عايشه ف مكانه مرموووقه ..
عليا: شدراج .. يمكن تكونين بنت ناس على قد حالهم
شيخه حاست ثمها: ع الاقل .. اسمهم نااس ..
عليا طلعت عينها ..
شيخه: وايد لاتسوين عمرج منصدمه ومتأثره ومب قادره تتحملين قله ادبنا يعني .. هـ الحركات نعرفها..

فتحت الباب .. واجدمت عليا وكفختها

عليا: لسانج هذا .. قصريه ..
شيخه: عمووه يعووور والله يعور .. آآه اتفضلي ..
عليا: غيرتي الحجره ..
شيخه: عقب ما عرست مهرووو على طووووول .. بس انتي عالم ثاني ..
عليا: يحليلها طلعتي شبريتها ..
شيخه: خذت وحده .. حقي وحقها .. ليش اسوي زحمه شبريتين ع الفاضي .. من زود ما اتي ترقد عندي يعني .. هاي زينه وحده حق شخصين .. 
عليا: زين بنجوفج باجر يوم بتعرسين .. بتين ترقدين هني .. ؟
شيخه: ماعندي سالفه بعد ارد هـ البيت ..
عليا تضحك: فكينا من لسانج .. ويلا ع الحمام ..
شيخه: بعد بتيين وياي الحمام .. ؟
عليا: لا .. بشوف باجي الحجر ..
شيخه: خذي راحتج حبيبتي .. البيت بيتج .. لا تستحين ..
عليا:طوفي طوفي ..

ضحكت شيخه وسارت اتبدل .. طلعت عمتها من حجرتها ودشت الحجره اللي مجابلتنها ..
كانت بااارده .. المكيف شغال والليت مسكر .. وفي شخص راقد ع الشبريه الثانيه .. اجدمت منه وشلت اللحاف عن ويهه .. ورفعت حياتها ..

عليا: راشد ..
راشد: .......
عليا: راااشد .. "وهزته"
راشد نقز مره وحده: هااه ..
عليا: بسم الله عليك اميه ..

فتح راشد عينه بـ كسل .. صد صوب عمته .. ورد نزل راسه وهو يثاوب ..

عليا: بلااك ..
راشد:  الساعه كم الحين ..!
عليا: 11
راشد بصدمه: حلفي   ..
عليا: والله ..
راشد: يغربلك يا حارب "ورد حط راسه"
عليا: اييه انته ..
راشد: خلص كلاسي الحين ..
عليا: ويوم انك بتسير الجامعه .. جي راقد لين الحين ..
راشد: مادري ..
عليا: فيك شي .. ؟
راشد: لا ..
عليا: مريض .. تعبان .. ؟
راشد: لا ..
عليا: متأكد .. ؟
راشد ابتسم: والله متأكد ..
عليا: وجي راقد لي هـ الحزه .. ؟
راشد: الحين بنش ..
عليا مشت خطوتين وردت وقفت: راشد .. متأكد مافيك شي ..
راشد شل اللحاف عن وييها وابتسم: عموه والله متأكد ..
وقفت عليا دقايق تطالعه .. رفع راشد اديه وسوالها fly kiss
عليا: يالماصخ  ..
راشد يضحك: لازم يعني نسوي لج حركه عشان تتأكدين ان مافينا شي.. وعقبها تقولين طفووس تراكم ..
عليا: عن الهذره الزايده يلا نش ..
راشد: على هـ الخشم ..

طلعت عليا اتكمل جولتها على حجره مروان ومايد وعمار .. وشيخه بعدها ما طلعت من الحجره عشان تحشر عمتها وترد تتقارض وياها ..
اما شمه ف كانت يالسه تحت ومندمجه بـ الفون .. ما حست منو ساير ومنو ياي ومنو ساعه يالس جدامها ..

شل الدله .. وصب له حليب .. ونقزت شمه على صوت الحليب ..

شمه: عوذ بالله منك يا ابليس ..
عمار: يعني انا بليس
شمه: ماقصدتك ..
عمار: صار لي ساعه يالس .. وانتي ف بر ثاني ..
شمه: سوري .. ما انتبهت
عمار: يالسه روحج "وجدم الكوب من ثمه"
شمه: ثنوي راقد ..
عمار رد الكوب: ليش مافي حد ف هـ الدنيا غير ثنوي ..
شمه: ماعتقد في موضوع ثاني  بيني وبينك غيره ..
عمار: انتي ليش جذه رسميه .. ؟
شمه: كيف رسميه ..
عمار هد الكوب: يعني .. اشوفج كول ويا حارب وراشد ومروان ومايد .. حتى ويا محمد .. بس وياي انا
" وقف" جني وحش يالس جدامج .. ومشى ساير عنها
شمه تصرخ: بووو ثاني ..
عمار صد صوبها وفصخ النظاره الشمسيه: نعم مكتب عقار .. !
شمه: أنا آسـفه ..
عمار: على .. ؟
شمه:اسلوبي اللي ما عيبك  ..
عمار ابتسم: ولا يهمج مكتب عقار ..

حط النظاره على عيونه وسار .. يلست شمه وهي تتحرطم

شمه: مكتب عقار ..! .. حررررمتك مكتب عقار

بالباجر المسا .. ف بيت احمد

عامر توه ياي: انتهى بي الاجل
حارب: ويييه سلامات ولد عمّي ..
عامر: الله يسلمك ..
حارب: طاعو الويييه كيف وارم ..
عامر: يوم بتمرض .. بتحس ..
حارب: هههههههههههههه شو مشربينك ..
عامر: مادري والله .. اليوم اللي طلعت فيه ويا اخوك وولد عمتك طحت .. حاقدين عليه .. لين الحين ما قبلونا بسبب فعايل هـ الثنينه .. مادري شو جايفين عليهم .. قالو ما يستوي .. يمسكون علينا شي وعمور لا .. نشو عزموني ومادري شو حطولي ف الاكل ..
مروان: احمممد ربك عطيناك ويييه .. انت مال مطعم انته .. انت حدك كرك وبراتا
عامر: صار لي 19 سنه آكل براتا واشرب كرك .. ما طحت هـ الطيحه ..
مروان: تراك ويييه فقر .. مع احترامي لك عمي احمد
احمد: لاحبيبي خذ راحتك .. انت من زمان بايعنها .. خاربه خاربه يت ع اليووم يعني ..
مروان يضحك: شسوي عمي يوم ان ولدك هذا ويا كشته ربيعي ..
سيف: تدري مروان .. انا يوم سرت وياه المستشفى .. توقعت الدكتور يقول ان الفايرس ف كشته ..
حارب: صدق لا .. جي ما تحلق .. والله شكلك يلوع الجبد ..
عامر: اييهي .. انا منو ظربني على راسي وقال لي اطلع من الحجره .. خلني ارد امرض احسن لي .. ع الاقل كانو مدلعيني كل يوم عصير فرش ..
منصور: اشرب عصير فرش .. ووهقنا نحن بالزعتر والينسون ..
حارب: شربنا لين ما اندحقنا ..
منصور: حسيت .. والله شوف ويه حارب .. كاسر خاطري .. ايي بيتنا بدال ما يعطونه عصير شي يدلعونه فيه .. امايه اطرش له ينسون وزعتر .. ويلا تنقى .. اثنينتهم يلوعون الجبد .. بس اونه يعني اذا غير راييه من واحد ياخذ الثاني .. وف النهايه غصبا عن خشمه يشرب..

والكل ضحك على منصور ..

احمد: شرايكم نتعشى برع اليوم ..
منصور: بيطردونكم من المطعم ..
احمد: جي على كيفهم ..
منصور: هـ الجيش كله خالي وين بتوديهم .. انتو الفريج مب متحملنكم بعد تبا اتوديهم مطعم ..
عبدالعزيز:عندنا واحد من اسبوع طايح علينا والسبه اكل المطاعم .. انت تبا اتمرض العايله كلها ..
احمد يضحك بخبث: احسن عشان نفتك من لسانهم .. بس مهره ما بنوديها ..
حارب رافع حياته: وليش ان شاء الله ..
احمد: جذه ..
حارب: اذا اختيه ما ييت انا مب ياي ..
احمد: مافينا ياريال نتحاسب على روحين ..
حارب يضحك: حتى عبدالرحمن وطارق بتتحاسب على روحين اذا استوا بهم شي ..
احمد: الحين شوو .. بتسيرون والا ..
سيف: انا .. والا ..
غانم: مب على كيفك .. بنسير بنسير ..
سيف: مالي مزاااااااااااج ..
غانم: ياخي حد يفووت اكل المطاعم .. اكل اكل هذا .. حس .. شي فييه ريحه ..
مروان: على فكره .. المكان اللي بنسير له .. مافيه بنات ..
عبدالعزيز: فيه دح ..
احمد: شو الحين بتسيرون .. اتصل احجز .. ؟
سيف: شو تحجز .. ؟
احمد: كبينه .. ان شاء الله تبوني اوديكم ايلسكم جذه .. تسوولي فضيحه على وجوه الاشهاد ..
حارب: اتصل اتصل ..
احمد: حق كم شخص ..
حارب: الشباب بس ..
احمد: شو هـ العنصريه ..
حارب: يلا يلا .. البنات كفايه حاجزين لهن عقب يومين .. يحمدن ربهن ..
سيف: كل وحده تطلع ويا ريلها ..
غانم: حسستني يعني واللي ما عندها ريل ..
سيف: ويا اخوها .. يلا فكووونا .. والله ملينا من البيت
حارب: اصلا شيخه باجر  آخر امتحان لها .. يعني لو اترجيتوها من اليوم لين باجر ما بتسوي لكم سالفه سيف: اختتتك دحيييحه
حارب: الله اكبببببببببر ..
منصور: عشان جذه يقول بس الشباب .. والله وشمووه منو بيسكتها ..
حارب: والله مشكلتكم ويا اختكم ..
احمد: عمار هني .. ؟
حارب: هيه .. احسب حسابه ..
احمد: سعيد وعبدالرحمن .. ؟
منصور: انا بسير اشوفهم ..
احمد: اوكي .. وانته " ظرب مروان على راسه"
مروان: يعني ماااااااتعرف ترررمس بدون لاتستخدم اديييك .. انته اطبق نظام العسكريه عليه والا اتمرن عضلاتك فيا .. ؟
احمد: هههههههه اسكت .. ويلا اتصل بـ فارس شوفه جان بيي والا ..
عامر طاح ع الكنبه: مب على كيفه .. بيي ّ قول له عمور يقولك ..
مروان: ترا اذا قتله مروان ما بيطيع وبيسوي حركات .. واذا .. اذا رضى ايي .. بيتمخطر لين يوصل ..
غانم يضحك: واذا قتله عامر ..
مروان: بيزحف .. ويا راسك هذا ..
احمد: رشود وينه .. ما بيي .. ؟
غانم: تعالو صدق راشد وينه .. ؟ انا من امس مب جايفنه ..
سيف: رشود اصلا مخه مع الاسف .. مب معانا
غانم: ليش .. ؟
سيف: تسألني انا .. اسأل طبجته ..


انا بعد .. من امس ماشفته تحت .. يعني مب بس انا اللي ملاحظ هـ التغيير عليه .. !
ودرهم حارب وسار بيتهم  يشوف اخوه .. وهو يقول ف خاطره هـ الكلام ..

دخل الحجره .. شافه طايح ع الشبريه .. وهو يطالع فوق 

حارب كفخه على ريله: حووو ..
وراشد سرحان..
حارب: حووو .. رشوووود ..
راشد: هاا..
حارب: وييين وصلت ..!
راشد تنهد : ولا مكان ..
حارب رفع حياته ..
راشد: تعال يلس ..
حارب: بلاك رشود ..!
راشد: افكر ..
حارب: في ..! لاتقول سيركم النحس .. بكفففخك ..
راشد: لالا .. مب ف السير ..
حارب: عيل ..
راشد: حارب بقولك شي ..
حارب: قول ..
راشد: تعال يلس قبل ...
حارب اجدم .. ويلس حذال راشد ..
راشد: قبل كم يوم .. رديت من الجامعه .. ييت بدخل البيت .. طلعت وحده بويهي ..
حارب: انزين .. !
راشد: حروب..كانت اتصييح من الخاطر
حارب: منو هاي ..
راشد: سألتها منو انتي .. قالت لي اذا امك مب معترفه فينا .. انت ليش تبا تعرف منو انا ..!
حارب: يعني ... تقرب حق امايه .. ؟
راشد: وتقرب لك انت بعد .. من جريب ..
حارب رفع حياته: متأكد ..
راشد: تشبهنا حروب .. تشبه امايه .. بس ما تشبهك انته
حارب: ههههههه سخيف والله ..  انزين .. وشو اللي تباه .. ليش يايه بيتنا .. ؟
راشد: السؤال مب ليش يايه بيتنا .. السؤال ليش طالعه من بيتنا اتصيح ..
حارب:يعني قالت لك اذا امك مب معترفه فينا .. اكيد امايه عقت عليها كلمتين يسمن البدن ..
راشد: كلمتين بس .. ؟ .. قول جمل .. قول دعاوي .. قول ديوان .. قول ابيات شعر ..
حارب: رشود اذا نحن عيالها وما سلمنا منها .. تبا البنيه تسلم منها ..
راشد: تدري شو قالت لي بعد ..
حارب: شو .. ؟
راشد: طلعت برع .. وقفت عند الباب .. ماهانت عليه والله عورت لي قلبي شكلها جدا صغير قول كبر شواخ  او يمكن اصغر بعد ..
حارب: انزين شو قالت ..!
راشد:قلت لها اخوج بيمرج .. قالت انا ماعندي اخو  ولا عندي اهل .. انا عندي ابو وبيموت .. ويلست اتصيح ..
حارب: عجيب ..!
رد راشد طاح ع الشبريه وحط اديه تحت راسه..
حارب: انزين وانته ليش ما نزلت تحت ..
راشد: مالي مزاج ..
حارب: تفكر فيها..؟
راشد: وايد ..
حارب: ووين وصلت .. ؟
راشد: ولا مكان ..
حارب: عيل ليش تفكر ..
راشد: مادري .. غصبا عني .. والله مب قادر انسى شكلها يوم يلست ع الارض تصيح .. كل ما اغمض عيني اذكر شكلها .. واتخيل ف لحظه لو شيخه اختيه مكانها .. قلبي اتقطع عليها حرووب
حارب: انزين .. !
راشد: شو انزين ..!
حارب: شو اللي ناوي تسويه ..!
راشد: مادري ..
حارب: لان اصلا مافي شي اتسويه .. قم بنسير نتعشى برع ..
راشد: مالي مزاج ..
حارب: خييبه رشود  .. قم لا ..
راشد: والله مالي مزاج ..
حارب: شوف .. صار لك يومين وانت مب على بعضك .. قلت يمكن عندك شي خاص ما تبا تخبرني .. بس خلاص ياخي مصختها .. والله اشتقت لك .. واشتقت حق .....
راشد قطع عليه: على قلبي
حارب ضحك: اباها بنبره رشوديّه ..
راشد: مالي مزاج الحين ..
حارب: لاحظ ..صار لك يومين وانت مالك مزاج ..
راشد: حارب .. شكلها هني " وهو يأشر على راسه"  هني .. هني وهي تقول لي ابويه بيموت ..
حارب: انزين جان سألتها ..
راشد: هذا اللي بجتله وبدش به السجن .. اقوولك سألتها وما ردت عليه .. قلت لها انزين تعالي داخل ع الاقل .. قالت لي تخافون ان حد يمر ويشوفني واقفه .. ويعرف اني اقرب لكم " وابتسم باسهزاء"  تربيه بدور .. ما ألومك
حارب: لهـ الدرجه يعني امايه عورت قلبها .. ؟
راشد: انته حمده تباك والا ما تباك ..!
حارب: هههههههههه تباني تباني ..
راشد: بنش افرررك من البلكونه الحين .. خلها تشوفك كل ماسارت وردت ..
حارب: خيبه " وصرخ" كل هذا لانك اتفكرررررررر فيها يالظالم وانا ولد امك وابوك تقول لي بجتلك .. وتعور قلب بنت عمتيه عليه .. فدييييييييتها والله .. مالت عليك مب حاس بجيمتي
راشد: حارب والله حسيت بـ احساس غريب يوم شفتها اتصيح ..
حارب: أنا يوم شفتها تصيح اخذت درس كبير .. عرفت انها فقدت الشي الكثير
راشد يصرخ: حاااااااااااااارب
حارب: حسيييت باحساسي يوم اكون متنرفز وانته اتيي من هناك تعق كم بيت شعر واتسير
راشد: تبا ترد لي الحركه الحين ..؟
حارب: لا .. بس ابا اغيير مووودك والله ماحب اشوفك جذه رشوود .. يلا قم ..
راشد: حروب مالي مزاج .. 
حارب: انا لي مزاج .. بس اذا انته ما سرت .. انا مب ساير ..
راشد: عن الحركات..
حارب: والله مب ساير بدونك
راشد سكت .. وشاف حارب بـ نظرات ..
حارب: لا تشوفني جذه .. قم انسير .. ويوم بنرد .. لك مني وعد افكر ف الموضوع وياك .. وان شاء الله نوصل لها ..
راشد: نوصل لها .. ؟
حارب: ليش وانت شو اللي تفكر فيه من الصبح .. البنيه تقرب لنا .. وقالت لك ماعندي حد غير ابويه وبيموت .. تبانا انهدها ف هـ الظروف ونحن نعرف ان مالها غيرنا .. رشود .. اذا طلعت صدق تقرب لنا شرات ما تقول .. معناته بتكون هي وشمه وحمده واحد ..
راشد: هي وشمه فهمناها .. بس هي وحمده ..
حارب شل المخده: اقصد كـ بنت عمتيه .. ويا هـ الراااااااااااس .. والا حمدوه محد يسواااها .. وفرها على راشد ..
راشد: يضحك: ذبحتتنا ..
حارب: كيفي حرمتيه .. الله "وغير نبره صوته" يعلكم ماااااااااااا تسوووونها ..

ضحك راشد من خاطره على حارب اللي استخف زياده من يوم ملج .. صدق محد يقدر يغير موود حارب غير راشد .. ومحد يقدر يطلع اللي بخاطر راشد غير حارب ..


كلن منهم يكمل الثاني .. الله يحفظهم .. 

ليست هناك تعليقات:

إرسال تعليق