السبت، 16 نوفمبر، 2013

الجزء الثالث (1)


حط راشد راسه ع الكنبه .. وحط اديه عند ذنيه وغمض عيونه

راشد: آآآه من الدنيا وآآه من القهر والقدر لو حل ما منه حجاب كلها قدرة عزيز مقتدر .. ادعي الله واتمنى الاستجاب الله يمتع ذويهم بالصبر .. اللي هم نحن طبعا
مروان عقب ما شرب الماي .. فر الكاس على راشد ..
راشد: والله بغني لكم قاتلتي تمشي حافيه القدمين هاه ..
مايد: لا لا دخيلك .. رد حق شلتك ..
مروان وهو يضحك: والله انك سخيف .. شرقت بسبتك .. تدري لو سمعتك شو بتسوي بك ؟
راشد :بتخليني ابادلك الشفت .. وبرقد طول الليل  برع ف البرد ..
مروان: عشان تحس بس ..
حارب مجابل المكسرات ولا مفتكر: راشد يحس .. لو يحس جان صخ ما رمس ..
راشد: رااااسي عووورني .. ليل نهااااار وهي تزاعج .. بس خلاص خلاص .. هذا تعببب .. وهو يأشر على راسه..
مايد: مهره تعرف ان امايه حشره .. عشان جذه حطت هـ الشرط
حارب: والله اختك طلعت ذكيه .. تدري انها كبرت ف عيني ..
مروان بطرف عينه: ليش شو كانت ؟
حارب: قلت يمكن هـ الغبيه اللي وياها ف الحجره تأثر عليها ..
شيخه توها يايه: غبيه حرمتك اللي بتاخذها .. شلّه
مروان وهو يشل ثاني: تعال يا ابو المصايب انته ..
حارب: لو طاري المليون ..
شيخه: عشان مره ثانيه ما تسبني ..
حارب: انا سبيتج ؟
راشد: هاي يسمونها غيبه ونميمه ..
محمد توه ياي وهو مبتسم: تعرف شو يعني غيبه ونميمه ؟
راشد: افا عليك اخويه .. اعجبك انا ..
مروان: حياااك حيااك بو مروان استريح ..
محمد اشر تحت ..
مروان: والله لا تسألنا العلوم عندك انته ..
مايد: بس العلوم ؟ قول الرياضيات والعربي والدين .. اهم شي الدين عاد ..
محمد: والله .. !
مايد: هيه .. دينك يطلع شرات ابوك ثرني من الحين اقولك .. مروان بيشل ولدك
مروان: محمد مب ع السمي هااه خلنا حبايب 
محمد: قم قم انته صب لي حليب .. مينون انا اسمي ولديه عليك
مروان: انزييين يا محمد .. لا تسمي ولدك عليه .. باجر يوم بدورني وما بتلقاني بتتمنى لو ما كسرت خاطري ف هـ اللحظه
شيخه: انتتتتتتتتته ذبحتنا ..
مروان: شيخو .. انا ف كل الاحوال طالع من البيت .. يا اسير الشرطه بكرامتي .. والا امج بتروغني .. ف شو الافضل .. !
مايد: انته لا  ترفع ضغطها .. ما بتطردك ..
مروان: يعني هي ترفع ضغطنا عادي.. نحن نرفع ضغطها لا ؟
راشد: صخ انته .. صصصخ .. زين تسوي بك من تفكيرك الغبي هذا
شيخه: انزييين حماده ..
محمد: حماده ف عينج ..
شيخه: هاه هاه .. شو قلنا .. ما نسب .. 
محمد: ما يبالها ظرب هاي .. !
حارب: اظربها ..
شيخه: والله بزعل صدق ..
محمد: انزين ما سويت شي ..
شيخه: ادري بك انته اتحب اتكفخني .. انزين قوول ..
محمد: شو عندج ..
شيخه: متى العرس ؟
محمد: تاريخ 9
شيخه: اي شهر ..
محمد: الشهر الياي ..
مروان: احلف ..
محمد: والله ..
راشد عدل يلسته : تسعه يركضون وراك ان شاء الله .. محمد لا تستهبل

حط محمد ايده على راس شيخه .. ونزله تحت .. وفلع راشد بالمخده ..

راشد وهو ميود شيخه ويهزها:  والله محد راحمنك غير بنت عمي والزعطوط اللي ياي ف الدرب .. والا جان راويتك شغلك ..
شيخه: انته ايييييييييييه ..
مايد: ايه ايه .. ذبحتها
راشد: محد قال لها تستوي ضيحه اخوها ..
شيخه: بس ضحييييه اخوك انا  .. !
ومره وحده سمعوا صوت الباب ..
مروان: مظارب يهود بني النظير قاعدين نحن .. بتشوفوني انا الضحيه عقب شوي

نش محمد على حشره ابوه ونش راشد وحارب والباجيين وراهم وبدا ثاني يصيح
وقفوا عند اول الدري .. شافوا ابوهم بـ ويههم وهو معصب .. ما سوا لهم سالفه .. وسار صوب حجره
مهره .. ودق الباب .. اجدم محمد منه ..

بدر: لا ترمسني .. ثرها واصله عندي هني .. واشر على خشمه ..
محمد: بس ممكن اعرف شو اللي تباه منها
بدر يدق ع الباب: فتحي الباب ..
فتحت مهره الباب وهي مستغربه من الحشره .. وقف جدامها وهو مصعب ..
بدر: انتي ما تستحين على ويهج .. مب ريايل نحن جدامج ..
مهره: ليش .. شو مستوي ..
بدر: وبعد تسأليني شو مستوي..
مهره: ابويه بـل...

ماقدرت اتكمل رمستها اصلا .. عقب الكف اللي عطاها .. مسكها من شعرها ودخلها داخل وحارب ركض سار صوبه  .. والكل منصدم ..

مهره: لـ .. ليش ؟؟
بدر: ساير ارمس اخويه ويصدمني برمسته .. يقول لي بنتك تبا العرس والملجه ف يوم واحد .. جذه تفشليني جدامه .. مب ريال انا جدامج .. تقومين تصرفين على كيفج بدون لا تشاورين
حارب: انته هدها ..
بدر: قم عن ويهي انت الثاني ..
حارب: ابويه بس هدها ..
محمد اللي ميود ايد ابوه: انته خليتنا نرمس قبل لا اتي هني .. !
بدر: عقب شو .. عقب ما هاي الجلبه .. سوت اللي براسها .. الا تبا تحرق قلبي ..
محمد: خلاص هدها ..

محمد من صوب وراشد من صوب سحبوه عنها ..  يلست مهره ع الشبريه وهي تصيح من خاطرها ..
بدر: زين يا مهره .. سويتي اللي براسج وكسرتي كلمتنا .. بس قلبج هذا بحرقه شرات ما حرقتي قلبي وفشلتيني ..
صد صوب مروان اللي شال ثاني وهو يصيح .. واجدم منه مد ايده  ووقفت شيخه بـ ويهه هـ المره ..

شيخه: ثاني لا .. ما يخصك به ..
بدر سكت ووقف .. جدم اديه من شيخه ويود ويهها: طلع لج حس يا بنت الـ ....
شيخه بندت عينها: انا .. بنتك انته

وقف جدامها دقايق .. وكان الصمت هو سيد الموقف .. عقب دزها .. وطاحت على مروان .. سكتت وما قالت شي .. نش محمد طلع .. وراشد ومايد وياه .. ومروان وهو شال ثاني .. طلع وياه .. تم حارب وياهم .. نقل نظراته بين مهره اللي طايحه ع الشبريه اتصيح .. وبين شيخه اللي يالسه وويها احمر من ايد ابوها ويمكن بعد من العبره اللي خانقتنها

لاني واثقه ان ثاني بخير وهو عند اخواني .. لاني واثقه من نفسي ومن حب أخواني لي .. ما فكرت اني اهتم بـ كلام ابويه .. ولا فكرت اني انزل دمعه وحده عشانه ..

شافها حارب .. ابتسمت له .. رد لها الابتسامه وسار صوب مهره .. يلس حذالها وسحبها لـ حظنه .. وصاحت من الخاطر ..

..


وين يلتقي الماي في النقطه اللي تعتبر نهايه جدول الماي .. وين الهدوء والطبيعه .. بعيد عن حشره البيت بعيد عن صدعه عيال العم وعيال الخال .. هناك .. وين تيلس مع قلبك وتفضفض له عن كل اللي فيك بدون لا حد يسمعك او يراقبك .. بالضبط بين بيت بدر وبيت عليا ..
ف الحديقه ورا ..
فر مروان الحصى ف الماي .. وصد صوب ثاني وابتسم .. ثاني وهو حاط صبعه ف ثمه  ابتسم ويا مروان

مروان: عايش حياتك والله .. تضحك ومستانس ولا همك الله .. وبيتنا منجلب فوق تحت بسبتك .. يلس بس يلس ..

يلس مروان وحط ثاني ف حظنه .. وهم مجابلين الماي .. يفر الحصى .. ويشوف الماي وهو يهتز لين ما يرد يسكن .. يرد مروان يفر مره ثانيه .. لين ما حس بالملل  ويلس .. شاف ثاني .. ورد اطالع الماي اللي اهتز هـ المره بدون لايفر مروان اي شي .. رفع مروان راسه.. وابتسم ف ويه ولد عمته اللي يلس حذاله

مروان: اللي يجوف ويهك مايقول ان هذا يقدر يغير مزاج الواحد
فارس: تتمنى ويهي انته بس .. ليش ميلس الولد ف البرد ..
مروان: داخل وايد حر ..
فارس: ليش .. !
مروان: ليش بعد .. ورد فر الحصى ف الماي ..
فارس: انا محد كاسر خاطري غير ايوب ..
مروان: وايوب شو يخصه  ..
فارس: متغرب من بلاده بس عشان يوصل ابوك .. وويلس ينظف الماي من الحصى اللي حظرتك تفره..
مروان: ع الاقل احلل فلوسه ..
فارس: حليله والله .. ياخي قم شل الولد وده داخل
مروان: والله اذا وديته داخل ما بتشوف رقعه ويهه مره ثانيه ..
فارس: ليش ..
مروان: ليش بعد .. بيتنا اليوم منجلب فوق تحت .. شيخو بغت تنذبح بسبته اليوم ..
فارس بسرعه: ليش .. شو صار .. استوابها شي ؟
مروان: ومن الصبح تسوي عمرك مهتم بـ ولد اخويه ..!
فارس: مروان عن الحركات ارمس ..
مروان: والله محد غيرك اللي يسوي حركات ..
فارس: مروااااااان ..
مروان: بلااااااك انته لاتصرخ ولد اخويه يخاف ..
فارس حط ايده على رقبت مروان من ورا .. مروان رفع راسه وضحك ..
مروان: شل ايدك يالدب..
فارس: مب شالنها .. ارمس ..
مروان: ماعرف اذا فيها شي والا .. ودرتها وطلعت ..
فارس: ليش شو صار ..
مروان: شل ايييييدك ماقدر ارمس ..
نزل فارس اديه واطالع مروان بـ نظره .. ضحك عليها مروان من خاطره ..
فارس: لا تخليني .. "ورد رفع اديه"
مروان: برمس برررررمس .. افف مشكله يوم الواحد يعرف نقاط الضعف  اللي فيك
فارس: انزين .. !
رد مروان ضحك ..
فارس: مروااانووه ..
مروان: والله برمس انزين .. بس نزل اديك واجدم شوي.. ماقدر جذه .. انته ما تضحك .. بس ويهك يضحك
فارس: ليش نكتتته ويهي ؟؟
مروان: فديت خشمك بن عمي .. نزل اديك واجدم
فارس: اديه بنزلها .. بس مب مجدم ..
مروان: ماقدر .. احس ان فيا حساسيه من ويهك .. اجددددم ..
فارس بنبره حاده: مروااان ..
مروان: شو اللي صار بالضبط مادري .. كنا متيمعين كالعاده ف الصاله اللي فوق .. يا خالك وهو معصب سار صوب مهره ..
فارس: انزين .. !
مروان: وظربها ..
فارس: وعقب ؟
مروان: يا صوبي .. وانا شال ثنوي .. جدم اديه بيشله .. ووقفت شيخه بويهه ..
فارس: شو سوا بها ؟
مروان: ولا شي ..
فارس: بغط راسك ف الماي الحين .. لين تموت .. ارمس ..
مروان: والله ما سوا بها شي ..
فارس: توك اتقول بغت تنذبح ..
مروان: كااااان بيذبحها .. بس غير رايه ..
فارس: ليش ..
مروان: ابويه ما يحس .. قلبه مييت ياخي ..تخيل مسك ويهها بكل قوّه .. وكعادته ياي يسب .. يا بنت الـ .... وبنت الـ .... وقبل لا يقول اي شي.. قالت له .. انا بنتك انته .. سكت عنها .. دزها عليّه وسار ..
فارس: شو استوابها .؟؟
مروان: ما استوا بها شي انا اللي تكسرت ظلوعي ..
فارس: مالت عليك انته ..
مروان: والله .. !
فارس: صدق ما استوا بها شي ؟
مروان: فارس والله ماعرف شو اقولك .. قلبي يتقطع على خواتيه يوم اشوفهن جذه .. بس شو تبانا انسوي ..
فارس: واخوانك .. !
امروان: بلاهم
فارس: ماقالوا له شي ..!
مروان: اخواني بس يفجون النزاع ..
فارس: نزاااع !! .. ابوك كل يوم والثاني طايح ف واحد منكم .. وامك حافظين عقابها وياك .. اي نزاع هذا..!
مروان: يا رررررجل خلها على الله بس .. وقوم معايه ..
فارس: على وين .. !
مروان: وده عند اختك شويه ما اقدر اوديه عند خواتيه .. برررد عليه اذا انا اجمدت بعد وين هذا الزعطوط

جدمه من ويهه .. وباسه .. ونش ورا فارس سايرين صوب فلتهم ..

عقب يومين ..
 المسا وبالتحديد ف الحوي ..

عمو علايه جالبه الدنيا .. ومشغله الشباب كللهم .. اللي يشل واللي يحط واللي ما ادري شو يخبص..طبعا شله الفساد اللي تخصصهم الفساد لازم بيفتشون الشي لي شالينه قطعه قطعه ويعرفون شو خانته ف البيت..

مروان: معرس معرس مب عمي خالد ... 
عامر: ماتكرف عيالها المتاااااااان .. عبدالرحمن الدب وجبل طارق.. بس طايحه فينا نحن
عليا: طوفو  وانتو صاخين..
مروان: بذمتج عمو شحقى كل هذا
عليا: حق عرس ابوك..
مروان: قاصرين نحن بعد اييب لنا عله ثانيه
مايد: امش وانت ساكت.. عساكر .. امش وانت ساكت
عليا: سيف وغانم يلااا
سيف: عمو نحن تعبانين .. امس مقدمين آخر امتحان نبا انريح شوي
عامر: مقدمين مغازل انتو ..
غانم: انته اسكت انته ولا تبهدلنا ويا عمتك
عامر : ابهدلك لا .. زين انا براويك
غانم: علايه .. دريول اخوج مرتز هناك  والخدامات اللي ما ادري شحقى متغربات من بلادهن ويايات هني ..واتخلينا نحن حليلنا نشل..
عبدالرحمن: جفت عاد
سيف: انته بالذات يبالك صوره .. شكلك واعدينك ايبولك غوزي اذا اشتغلت اليوم..

والكل ضحك عليه..حارب وراشد توهم يايين .. راشد خطف جدام فارس ودق ع الكرتون ..

راشد: على قلبي ..
حارب: فوووووووووووووووق
وشاته فارس اللي واقف ساعه عشان راشد يخلص ربشته ..
راشد وهو يأشر على فارس: خلي على قلبي تمرد منه الشقى والحل بيديه
فارس: شووو يخصه .. قم عن ويهي زين ..
راشد وهو يلحن: لا .. تجررررررررح المجرووووح .. عااامر ..
عامر: هيه والله .. لا تجررررح المجروووح
حارب: سامحه بن عمي .. ثره راسب ف ماده وحده ..
راشد: يلعن شيطانك .. تفضحني ..!
حارب: ولا يحطون ف بالهم انك شووو يسمونه ..
راشد: شوو يسموونه ..
حارب: مكثر والا شي .. مزاجك فووق النخل ..
عليا: انتو الثنينه ..
حارب: نعم عمتي العزيزه .. !
عليا: سيروا نزلوا الاغراض اللي جدام .. وفرت سويج الموتر ..
حارب: تقول نزلاء .. طوووف يا ابن أمّ
راشد: هاي عمتك مادري وين ناويه توصلنا آخرتها .. يعني حلوه بحقي لو معرس وحرمتيه موجوده .. اتشوفني وانا جذه اكرف ..
حارب: انته واااااااااايد تحلم .. اقووولك طوووف زييين
راشد: طاف عليك مووتر ..
حارب: هههههه مالت عليييك .. تعال تعال

سار صوب الموتر .. بدا ينزل الاغراض واخوه يشلهم يوديهم مطبخ عمتهم عليا ..

راشد: سلامن عليكن بنيات ..
شيخه: وعليكم السلام بو الشباب .. وين اخوك..
راشد: اي اخو ؟
شيخه: ذيلك ..
راشد: عند الموتر ..
حط الكرتون رفع راسه ياي يظهر ودعم شخص ..
حارب فر الاغراض: اشلق انته ..
راشد: انت اللي كسرت رااااسي ..
حارب: ترا عيونك ف قمه راااااااااسك
راشد: يعني انت اللي عيونك تحت يبهتك ؟ .. مستانس من بياضه اللي يلوع بالجبد يتحسب خلاص كل شي فيه حلو ..مالت عليك

سار راشد .. وعيون حارب عليه .. رد صد صوب البنات وهو يضحك .. وسمع اصواتهن وهن يضحكن عليه

حارب وهو بعده منزل راسه يعدل الكارتون : اخوج خبل والله ..
شمه : كلكم خبايل ..
حارب: صخي انتي.. عن احطج مكان هـ الدياي الحين ..
شمه: سر سر انته ..
شيخه: حمدوه اسمحي لنا ..ترا اخواني مخرفين هـ اليومين .. 
صخ حارب عقب ما سمع اسم حمده .. وما رفع راسه حتى وشافها .. بسرعه عطاهن ظهره وطلع برع

ف نص الحوي عند باجي الشباب .. وصل احمد ومعاه عبدالعزيز..

احمد: شو مستوي.. ! احيد العرس الشهر الياي مب الحين ..
مروان: خالي وايد واثق انته .. اونه العرس الشهر الياي .. فـ لنفترض كان الحين عموه بتدفع لكم كل هذا.. ! ليش نشاده عنكم ..
عليا: والله هـ الولد قليل ادب ..
احمد وهو ساير صوب مروان : نعرف انه قليل ادب انتي كملي شغلج ولا اتضيعين وقتج ويا هذا .. ولف ذراعه على رقبت مروان اللي ابتسم باستهبال .. عرف ان عقاب يديد يترياه ..
مروان: زين يعني ممكن اسير اشل ويا اخويه .. وهو يصرخ .. مايد فديتك اصبر انا ياي ..
وياي يركض .. مسكه احمد .. وسدحه
مايد وهو يركض: يا مجرميييييييين
عبدالعزيز: والله ان ييت لاربطك وياه ..
مايد وقف مكانه : هزلت يا مايد بدر .. اخوووك مربووط .. وصرخ .. فكووو أخي من أسره .. يااااااا خسئتم
عبدالعزيز مسير وياه بالفصحى: خسئ قدرك قول آمين ..
مايد يصرخ: فككككه فك الله عظامك يا عم ..
عبدالعزيز: والله يا ابن اخي ان مسكتك .. سوف اظهر دم من خشمك هااه اثنبر احسن لك ..
مايد شل علبه الكلنكس وفرها صوبهم : اتركووووووووووه ..
عبدالعزيز عقب ما ييت العلبه ف ظهره: احمد انت جابل هذا .. انا بسير استلم هذاك ..
مايد من شاف عبدالعزيز ياي صوبه ركض ع البطئ اول شي
مايد : دب ما يروم يتنفس بعد يبا يمسكني .. والكل ضحك عليه ..
عقب ما ركض عبدالعزيز .. ركض مايد ودز غانم اللي طاح على سيف وسار صوب مطبخ عليا
عبدالعزيز وهو يكلم غانم:مالت عليك مافيك قوّه وسار ورا مايد ..
مايد: قومن قومن قومن قووووومن ..
شمه: انته اييييه لا ادخلنا ف سوالفك ..
مايد: وانتي بـييي .. مفتقده حروب سيري طولي لسانج عليييه .. مب عليه ..
شمه: خايس والله .. عزوووووووووز تعال بسرعه .. وسارت صوب الباب اللي يودي للصاله وبندته
مايد: يالسخيييفه قووومي ..
شمه: مب قايمه ..
مايد: اقووولج قووومي .. وشل دبه الماي وفره عليها ..
شيخه: انته يالدبببب ..
شمه: ردييي له اياها ..

سارت شيخه صوب الدبه .. ومايد عفد من الدريشه وطلع برع .. سارت شيخه وفرت الدبه عليه .. من الدريشه
شرد مايد وعزوز وراه .. صخت شيخه .. وصخت شمه .. عقب ما شافن ويه فارس وهو ياي صوبهن .. وحاط اديه على راسه ..

شمه يلست ع الارض وهي تضحك ..
فارس يرمس من الدريشه : منو اللي فلعتني ؟
شمه ميته من الضحك وساكته .. وحمده منشغله ويا باجي الشباب وهم ايبون الاغراض .. اما شيخه ساكته وهي تطالع فارس ..
فارس فلع شمه: تأدبي انزين .. ومره ثانيه فتحي عيونج قبل لا تفرين اي شي ..
شمه: ههههههههه والله مب انا .. هاي اللي فرت عليك ..
فارس عطاهن ظهره: زين ... مردوده ..

وسار .. وشمه بعدها تضحك وشيخه واقفه لين ما اختفى فارس .. سارت شلت الدبه وفرتها على شمه ..

شيخه: الحين اضحكي كثر ما تبين انزييين .. سخيييفه وحده ..
سيف: انا ساير هاي تتحرطم .. انا راد هاي تتحرطم ..
شيخه: وانته سررررررر ول فوقها بعد
سيف: ليش اولي بنت عمي .. والله ورايه مستقبل .. حرمه عيال ..
شمه ضحكت: والله انك ما تستحي ..
سيف: ولييييييييش استحي.. يا معشر الشباب من استطاع منكم الباءه فليتزوج .. والله .. !
شيخه: الشباب حافظين خمس ايات وحديث واحد .. وباجي القرآن مايعرفون عنه ..
شمه: انته والله ما تستحي ..
سيف: بنت عمي .. والله اللي يستحي ما يعييش.. 
شمه: قصصصصدك اللي استحوو ماتو
سيف: الله يرحمهم ..

ضحكت عليه من خاطري .. وما سكتت الا عقب ما فلعتني شموه بالكلنكس .. يعني لازم اتردها .. !

..





ليست هناك تعليقات:

إرسال تعليق