من صوب ثاني .. نظرات ثانيه تتوجه لي ببرود.. قبل النظرات خلوني اقولكم سبب ظرابه امايه ويا ابويه وسبب عناد مهرو اللي مب طايعه تنزل من امس .. عمار اكبر اخواني من شهر تقريبا يايب ولده عندنا بس ليش .. ووين امه .. وشو سالفته اصلا .. محد يدري
قبل اسبوع تقريبا عبدالله ولد عمي خطب مهره .. وهي مب مقتنعه بهـ الزواج مب لـ عيب في عبدالله او انها مب مرتاحه..لا .. بس ثاني ولد عمار شاغل كل تفكيرها .. وتدري لو انها عرست محد بيهتم فيه ويمكن اصلا ما يلقى له مكان ف هـ البيت .. وامايه حاشره الدنيا لان مهره رافضه هـ الزواج عشان هـ السبب ..
شيخه: يا اختي الكريمه فكيني ونزلي .. اوعدج من ارد اخليها تهزأ فيا لين تقول بس.. بس الحين مالي مزاج خليني اسير امتحن بسلام .. عن اطرشني الامتحان مفلعه .. والا جزء من ويهي مشوّه
مهره: شيخو .. قتلج مب نازله يعني مب نازله
شيخه: لا تقولين لي انا .. تعالي قوليلها هي ..
مهره : مب طالعه من الحجره اصلا ..
شيخه : ابا افهم تعاندون منو بالضبط
مهره: مب قاعده اعاند حد .. بس خلاص مليت منها ..
شيخه رافعه حياتها : نعم نعم .. عيدي !!
مهره : حتى ابويه مب قادر عليها لين متى بنتم تحت رحمتها ..
شيخه: حبكت على اليوم استيعابج يتكرم ويفهم انه تحت رحمتها .. يابوج ارحميني انتي ونشي ..
عمار : صباحوو
رفعت راسي .. انصدمت يوم شفت عمار .. من اسبوع ما شفناه يتريق او يتغدى ويانا .. هاي اول مره بتشوفه امايه عقب ما رفضت مهره .. عز الله نجحت انا هـ الكورس
عمار: شفيكم ؟
مهره: مافينا شي .. شل اختك ونزلو تحت ..
شيخه: انت متى راد ..
عمار :الفير ..
شيخه: ع الساعه !
عمار : 4
شيخه: امم وشو موعنك الحين ..
عمار : عندي شغل بخلصه وبرد ..
حلو حلو .. الله يكثر اشغالك وبلاويك ..
عمار : وانتي شو تسوين هني ..
شيخه: امايه قالت لي ازقر مهره..
مهره : ومهره مب طايعه تنزل ..
شيخه: وتبين توهقيني انا..
عمار :ليش توهقج .. طوفي انا بقول لها
شيخه: هااه !!
عمار: امشي جدامي ..
شيخه: لا خلاص روحي بقول لها..
عمار: انتي امشي..
بلعت ريجي ومشيت جدامه .. مب خوفا منه .. ابدا ما يخوفني هـ العمار .. بس متخوفه من الموقف اللي بيصير الحين .. والله مافيا انظرب ع الصبح
مبطأه خطواتي .. وامشي بهدوء .. و حظرته ابرد عنه ماشي .. مسير وياي ويمشي بهدوء شراتي .. من حطيت ريلي ع الارض .. خذت نفس وسكتت .. معطتني ظهرها وماشافتني .. بس عرفت اني موجوده ..
بدور: جان ما نزلتي ..
شيخه: امايه ..
بدور : ماكلمج انتي .. صخي ..
شيخه: بس مهره ..
بدور صدت صوب شيخه : ما تفهمين شو اقولــ .. قبل ما تقول لي صخي .. صخت بروحها ..
وقفت واجدمت من عمار ..
بدور :هلا هلا .. اسفرت وانورت ..
مايد بصوت واطي: اوه رضت بالواقع .. نشت اتزفه ..
راشد: صخ يالهرم والله بتنسفك
بدور : لك ويه .. لك عين .. نازل تحت ..
عمار: رب العالمين مكمل خلقي .. تبيني انكر ان لي عين .. ولي ويه واندس ف الحجره ليش .. واجدم من الطاوله ..
حطت اديها ع صدره ودزته .. طاح عمار عليّه .. وزين ما نتفني .. تيود بحديده الدري...
بدور: انت عندك احساس .. وصرخت .. حاس .. مستوعب اللي مسونه .. فاهم شو الصح وشو الغلط
عمار هز راسه بـ لاء : بليد ..
بدور: نعم !!
عمار : انا بالذات من بد كل اخوانيه غير .. غير .. جذه سبحان الله .. انا طالع غير .. طالع بليد وعديم احساس .. قاسي ونذل .. تدرين حتى ولديه قاسي عليه واكرهه وودي لو اشرب من دمّه ..
رفع اديه وهو قابضنها بقوّه ..
عمار: بالضبط شرات ما انتي قاسيه ولئيمه وتشربين من دم عيالج كل يوم ..
ما حس الا بصفعه على ويهه .. من امايه ..
عمار حط ايده ع ويهه وابتسم باستهزاء: ع بالج صحصحت بالطراق .. والا ضميري عاش عقبه .. لا .. هذا الطراق يا بـ وقته .. عشان يأكد على كلامي ..
بدور: اطلع بررررررررررع
عمار: ما يحتاي تصرخين واتعبين عمرج .. انا اطلع وادش ف هـ البيت على كيفي .. والحين بطلع .. مب بناء على طلبج .. لا .. لاني انا نازل من فوق وحاط ف بالي اني اطلع اصلا
طلع عمار .. اجدمت امايه من الطاوله .. سحبت لها كرسي ويلست .. وردت اتصارخ
بدور : ليش ساكتين انتو بعد .. كملوها كملوها على اخوكم الزفت هذا
محمد: الحمدلله .. ونش ..
مايد وقف .. ووقفت انا طلعت وراه .. وقفت عند الباب اتريا راشد وانا اطالع المنظر حولي
بيتين ف سور واحد كل بيت يفصله عن الثاني حديقه عوده وف نص الحديقه فيه شلال صناعي.. يمتد منه جدول يسير فيه الماي ف الحديقه بطولها لين ما يوصل لورا الفلتين .. هـ البيتين شرات بعض ف تصاميمهم ولونهم ومجابل هـ البيتين بيت شبيه لهم بس طابق واحد كل بيت يضم شخصيات مميزه اعجز اني اوصفها احيانا..بس لي اعرفه ان في شخص ف بيت من هـ البيوت له قلب .. قلب غير عن هـ البشر كلهم..
طلع راشد كفخني على راسي وسار .. ما عطاني فرصه حتى اني ارمس..ركبت السياره ويا راشد .. وطلعنا من البيت وانا ساكته وهو ساكت ويايه
شيخه: راشد
راشد: نعم ..
شيخه: بسألك سؤال ..
راشد: واذا قتلج ما تسألين .. يعني بتصخين ؟؟ ما بتسألين ؟
شيخه: صدق صدق والله ..
راشد: سألي انزين ليش تحلفين ..
شيخه: لو كانت تكرهني انا .. يمكن لاني مب بنتها وابويه عرس عليها ف كل ما تشوفني تذكر كيف ابويه عرس عليها وجذه .. بس انتو ليش ما تحبكم ؟
راشد: شيخو تبين كرك !!
شيخه: رشوود انا احاول استنتج المسأله اللي طرحتها عليك .. انت تقول لي تبين كرك ؟
راشد: والله تبين تستنتجين .. سيري جابلي امتحانج ويلسي استنتجي على كيفج .. لا تيلسين من صباح الله خير تألفين على مخي وتقولين بستنتج .. تراني موووول مب ف المود
شيخه: انته مول ما تنفع ..
راشد وقف ف البارك : ماتبين كرك .. والله بيعدل مزاجج .. بدشين الامتحان وانتي فرش .. بيدفيج ف هـ الجو
شيخه: من هـني ؟
راشد: ليش امج خلتنا نشرب ف البيت ؟
شيخه: لا شكرا .. روحك اشرب خسي انا اشرب من هني ..
راشد: مالت عليج شوفي الزحمه انتي بس .. يموتون عليه
شيخه: ههههههههه سر سر بالعافيه .. بس لا تتأخر لانك بتأخرني ابا اراجع شوي ..
نزل راشد سار ياخذ له كرك .. انا بس شفت شكل المكان اللي ياخذون منه وجزيت .. هـ الشباب كيف بتلذذون وهم يشربون مادري .. لا وزحمه عنده بعد
يلست اتعبث بـ سيارته وافتش فيها .. سيارته قمه الفوضى مع انها يديده من كم شهر بس عنده.. احسها احيانا بيت مب سياره على عكس سياره حارب اللي مستحيل اتشوفون فيها ورقه وحده .. رفعت راسي ادور راشد اللي سار ولا رد طاحت عيني بـ عيون اللي واقف جدامي
يالله هـ الملامح كم تعذبني انا .. خاطري اعرف شو اللي ورا هـ النظرات ليش هالانسان دومه مهموم دومه هادي .. ملامحه جامده ابدا ما يضحك .. يطالعك بـ برود وجمود .. انسان انا ما اعرف شو هو بالضبط.. ساكت ومب ساكت.. ما يغير ملامح ويهه ابد حتى اني احيانا احس ان عضلاته الحسيه ميته بس خاطري اعرف الغموض اللي ف نظراته ..
مرت دقايق وانا اطالعه وهو يطالعني وعقبها استوعبت اني لازلت اطالع فـ عيونه .. اتأففت منه ونزلت راسي ورديت اتعبث بـ موتر راشد
راشد: ايه ايه ايه .. نعم خير شو ادورين ..
شيخه: ادور بقعه نظيفه مافيها وصخ ..
راشد: حبيبتي .. هـ الحركه تحسسج بـ معنى العزوبيه ..
شيخه: تحسسني بمعنى الارف يالارف انته
عقب ما خلصت جملتي شخط راشد وانا صرخت
شيخه: يالسخيف ..
راشد: عشان تتعلمين كيف تستخدمين كلمات ارقى وانتي تكلميني ..
شيخه: انت حتى هـ الكلمات وايد عليك.. استخسر فيك الكلمات المحترمه ..
راشد: قلييييييييييله ادب .. وزاد الريس
شيخه تضحك: حرام عليك .. اليوم آخر يوم خلني امتحن واشوف نسبتي عقب دعم فيا واجتلني ..
خف راشد عقب ما قلت الجمله .. على اساس اني عورت قلبه من الجمله بس انا فاهمه عدل من شو عوره قلبه ..
ع الساعه 10 .. بالتحديد ف حديقه بيت عمتيه عليا
بما ان عيال الجامعه وعيال المدارس اللي ف المرحله الابتدائيه والاعداديه مأجزين قبلنا ف معناته بدت اجازة الربيع تقريبا .. وبدت الربشه والحشره ف هـ البيتين .. او خلني اقول ف بيت قوم عمو علايه
نزل راشد من موتره وسار صوب الشله ..
راشد: سلام ..
عامر: وعليكم ..
عليا: عوذ بالله منكم .. يهود يهود مب مسلمين ..
راشد: علااايوه شو تسوين ..
منصور: رقاااق ..
راشد: لو سمحتي واحد جبن .. وكوب جاي حليب الله يخليج
منصور: انت تتحسب امايه راعي الكرك ؟
راشد: لا والله .. راع الكرك اللي يتحسب عمره امك ..
عامر: علايوه .. تسمعين ولد اخوج اللي مافيه مذهب يشبهج بـ منو ..
راشد: ياخي مسوله راس هـ اليومين .. اذا استعيلته يقولك اصببر ماتشوف الزحمه
عامر: يقولك اصبر ما تشوف الزحمه ؟
راشد: هيه وحياتك ..
عامر: وانته جي تحلف بـ حياتي ؟
راشد: تباني احلف بـ كشتك ؟
عامر: هاااء .. رشود اتأدب والا اخبر عليك محمد اخوك ..
راشد: انته تعال .. شو ميلسنك هني ؟
عامر: خلصنا وردينا .. شو بعدك شو ميلسنك هني ؟
راشد: مروان وفارس ردوا وياك ؟
عامر: يس يس..
راشد: عيل شيخو ومايد بعدهم !
عامر: شيخو ومايد رياضيات عندهم اليوم .. والمسائل يبالها وقت عشان جذه متأخرين ..
راشد: وانتو ؟
عامر: نحن استلمنا ورقه الامتحان .. خمس دقايق وردينا سلمناها
عليا: من فلاحته هو وربعه هـ الخمه .. تلقاهم او 3 طالعين من الامتحان ..
عامر: عمو والله الامتحان كان مااااااااي
عليا : كل يوم تقولون نفس الرمسه .. بنشوف نتايجكم ..
راشد: والله معورين راس عمتيه فديتها .. مبتليه فيكم ..
عامر :عمتك هاي مادري شو مشكلتها .. الحين انا ومروان بنقول عيال اخوانها ما تحبنا .. بس فارس شذنبه مبتلى بـ ام شراتها ..الحمدلله ان خلصنا .. ماقول غير الله يعين غانم وسيف اللي ثنويه عامه وشموه وياهم
عليا : صدق ما تستحي على ويهك .. مسود العين .. قم غير الماي اجوف ..
عامر: علااااااااايوه .. ازقري ايوب والله مالي بارض..
راشد: قالت لك قم .. يعني قم ..
عامر: افف .. زين زين ..
عليا: اف ف عينك عمى بعين عدوك..
ضحك عامر ونش من مكانه قبل لا تفلعه عمته ..
منصور: انتي ليش تحبين تخسرين ابويه ؟
عليا: انته ذبحتني ويا ابوك ..
راشد: بلاك انته .. ما بينعق .. باجر امك بتسوي به ثريد وبتقول يلا تعالوا تغدو عندي .. ذبحتنا ذبحتنا وهي تأكلنا ثريد
عليا: انزين مره ثانيه يوم بسوي .. بقول لـ كل اخوانك ايون الا انته
راشد: افا عموو ..
عليا : وين مروان ..
راشد: تسأليني انا ؟
عليا: ومهره ..
راشد: مهرو تلقينها راقده .. طول الليل كانت سهرانه ويا ثنوي .. اللي هز البيت بـ صياحه
عليا: وابوه وينه ؟
راشد: اي ابو بالضبط ؟
عليا: ابو ثنوي ..
راشد: منو تقصدين ..
عليا: بسم الله عليك رشود .. عمار اخوك وينه ؟
راشد: هذا لو عنده ابو جان مهرو من زمان ماخذه عبدالله ..تصدقين عموه .. لو انتي مب اكبر عني وقايلة توج بـ لسانج ان عمار اخويه .. جان انا شاك فيه ..
عليا: ليش !
راشد: تسأليني انا .. عمار ما نجوفه خير شر .. يطلع من اول الصبح مايرد الا نص الليل .. تقولين حاجز حجره ف فندق .. مب بيت
عليا: وابوك ما يرمسه .. ما ينصحه ..
راشد: ابويه ينصحه ؟؟ تبينه يكون من اللي يأمرون الناس بالمعروف وينسون انفسهم ؟
عليا: رشود شو هـ الرمسه ؟
راشد: عمو الله يخليج .. مزاجي رايق لاتعكرينه بـ سوالف بيتنا .. ما سدوج اللي سألتي عنهم الحين بتلفين على امايه .. صدق صدق بتغثيني بهـ الطاري
فتحت عليا عينها وصدت صوب راشد .. عامر توه ياي ..
عامر: جي تطالعينه وجنج جايفه حريجه .. تبيني اصب عليه الماي ؟
راشد: محشومه عموه .. حضرته غلط عليج جانج مب حاسه ..
عامر: انت وايد تخرط ..
راشد: انت قلت .. جنج جايفه حريجه .. يعني منو غيرها اللي اجوف الحريجه وتنصدم جذه ؟
عامر: استغغغفر الله .. وين اخووك انته ؟
راشد: عندي خمس اخوان .. اي واحد فيهم بالضبط ؟
منصور: القوطي اللي وياه ..
عامر: ويهك القوطي .. وينه مروان؟
راشد: والله مادري به سر جوفه ..
عامر يلس ع الارض وتربع: مينون انا .. راسي يعورني عشان ادش بيتكم المشوّط
راشد ابتسم: انزين اتصل به ..
عامر: ييب فونك ماعندي رصيد ..
راشد: بس خاطري اعرف انت طالع على منو زطي ..
عامر: هههههههه زطي ف عينك والله ما عندي رصيد
عليا: عمور .. سيف وغانم وينهم ؟
عامر: عموه انتي جايفتني مسؤول عن العايله انا .. شدراني بهم
عليا: ولا واحد منكم ينفع ..
عامر وهو ينزل المبايل عن ذنيه: اف منه هـ المروان .. ردينا البيت قال لي ببدل وبيك وبينه ؟
منصور: دام ان مروان محد وفارس محد ..
راشد: معناته بلوى يديده ف الدرب..
عليا: الله اكبر ..
راشد: انا بسيير القطهم واحد واحد وبييبهم عموه ولا يهمج ..
عامر: تلقطفهم ؟ .. قطاوه شوارع مب اهل
طلع راشد من سور الفلتين توجه للبيت اللي مجابلنهم .. ومنصور وعامر وياه .. ما يحتاي يستأذنون يوم يدشون هـ البيت ولا حتى يحتاي ينبهون اصحاب البيت ان في حد دش .. اجدم راشد بس سبقه عامر وفتح الباب
عامر: بيتنا بيتنا .. انا اللي لازم اجدم
منصور: عدااال ..
عامر: حياكم حياكم اقربووو
راشد: منصور دخيلك شل ولد خالك عن ويهي .. عن اطير كشته ..
عامر: هذا الراشد ساير وراد على كشتي..ياخي اذا تغار بعلمك كيف تربي لك وحده شراتها ؟
راشد: خسي انا اخلي شعري يستوي ف يوم شرات شعرك ..
عامر: هه ودك ..
وقف عامر واساند على الايدار .. رفع ريل وحده وجتف اديه ..
عامر: تفضل جوف اهل بيتنا شو يسوون .. صدقني نسبتهم فوق التسعين .. وهذا اكبر دليل
وقف راشد عند باب الحجره وهز راسه بـ اسى .. احمد واقف جدام التسريحه يعدل الغتره .. وغانم وسيف واقفين فـ الكورنر .. وكل دقيقه يغيرون وقفتهم ويصورون ..
راشد: واقسسسسسسسم ان هـ الصور حق البنات
احمد: بسم الله الرحمن .. من وين طلعتو انتو ؟
راشد: كمل الرحيم .. خذ الاجر كله بعد ليش قطعت ..
احمد: تعالوا جابلوهم .. خبلوبي .. انا ساير ..
منصور: افا خالي اذا اتت المادري منو .. ذهبت المادري منو ؟
احمد: منو اللي اتى ومنو اللي ذهب الحين ؟
راشد: انت اختار عمي ما عندنا مشكله .. تراك ان كنت الملاك .. هـ الثنينه اللي وياي شياطين .. وان كنت انا الملاك ف الثنينه اللي وياك عفاريت من الجن
سيف: هذا منو قاص عليه وزارع فيه هـ الثقه العميه ؟
غانم: واحد عمي شراته
منصور: انتو اللي منو قاص عليكم وقايل لكم اصورو هـ الكثر .. المبايل احترق من ويوهكم
راشد: شو سويتو اليوم ؟
سيف: الامتحان ترتوب ياريال ..
راشد: انته اصلا في شي مب ترتوب ف حياتك .. يلا يلا خلص وقم ذاكر
غانم: لا تحسسني عاد انك مهتم وايد ..
راشد: ويا ويوهكم جي ما ييتو تتريقون ؟
سيف: شو ريوقكم؟
عامر: ما بنقول لكم .. اللي يبا ايي يجووف .. نحن مب بشاكيركم .. بعد ياين لين هني ويسألون بعد صدق ما تنعطون ويه ..
راشد: حسيت ؟؟ .. طوفو نسير ..
عامر: ابويه وين ميّوه ..
احمد: ف حجرتها ما ظهرت .. انت شو سويت اليوم
عامر: تماام التمااااااام .. كل شي كان تمااااام ..
احمد: كل شي بيبين عقب اسبوع ..
راشد: منو ردكم ؟
سيف: عبدالله
راشد: ليش عبدالله ما عنده دوام ؟؟..
عامر: انت ماتدري .. اخوي انا على كيفه متى يسير ومتى يرد ..
راشد: لا تحط على ولد عمي .. فديته والله .. حرام هذا اخوكم انتو
احمد: هههههههه عليك بهم .. يلا سلااام ..
الكل : وعليكم السلام ..
عامر ومنصور ردو صوب غانم وسيف .. اما راشد سوالهم طاف وسار صوب حجرة عمته .. دق الباب كذا مره وما ردت عليه .. فتح الباب ودش .. شافها راقده والحجره بااااااااارده .. سار صوبها ..
يلس ع الشبريه وشل اللحاف عن ويهها ..
راشد : ميوووه ..
مي : ...........
راشد: ميّ
مي: هممم ..
راشد: عموووه قومي ..
فتحت عينها بكسل
مي: شفيك ..
راشد: انا شو فيا ؟ .. انتي اللي شفيج .. 10 ونص الحين عموه انتي بعدج راقده ..
مي: حروب اطلع برع وبند الباب ماروم اتحرك .. جسمي كله متكسر ..
راشد: حوو.. اي حروب بسم الله عليج .. انا راشد .. عمو شفيج ..
مي: ماعرف .. ودمعت عيونها ..
رفع راشد حياته وحط ايده على يبهتها ..
راشد: افففففففف .. جسمج ظوو ..
مي: الله يخليك اطلع وبند الباب ..
راشد: شو اطلع وبند الباب .. قومي قومي يلا بوديج المستشفى ..
مي: رشوود والله ماروم اتحرك .. وبندت عينها
راشد: زين صبري شوي .. وسار صوب الباب وزقرهم .. ركضو اربعتهم ويو صوب حجره مي
سيف: بلاك ؟
راشد: انتو شو خانتكم ف هـ البيت .. ولا جنكم اوادم .. ولا جنه في وحده عايشه وياكم وانتو خبر خيير
غانم: ايه انته بلاها اختيه ..
راشد: الحمى بتذبحها .. زين يوم لحقت عليها
سيف: اووونه ..
راشد: غنوم .. دوك سويج سيارتي .. شغلها ويبها هني ..
سيف: انا اسير وياه؟
راشد: لا .. انت ييب عباتها ..
سيف: اي عباه
عامر: شو اي عباه .. جلابيه سوده معلقه ورا الباب اسمها عباه.. غبي ما تعرف شو يعني عباه ..
سيف : انزين بس اي وحده فيهم
راشد: اي وحده الحين ييبها انته ..جي سايره عرس هي ..
سيف: لا بس اخاف ايب وحده .. ويوم تلبسها تكون صدق سايره عرس ..
منصور: قم عن ويهي انته ماعندك خوات شعرفك بـ سوالف البنات ..
سيف: الله والخوات اللي عندك .. وحده ما يخصها بالدنيا والثانيه حالها حال اخوانك ماشي فرق بينهم
منصور: جب لا تحط على اختيه ..
سيف: قم زييين ..
راشد: ميوه ..
مي فتحت عينها ..
راشد: قومي يلسي شوي ..
يلست ولبسوها عباتها .. وبنفس الوقت سمعو صوت الهرن
سيف: قومها ..
عامر: هي مدوخه وراقده والا انها صدق فاقده الوعي ؟
سيف: والله شكلها تمثل عليكم ..
منصور: انته ايه خالتيه تعبانه لاتقول عنها تمثل .. قم قم سر بيتكم
سيف: هههه انته اللي سر بيتكم .. انا هذا بيتنا ويا ويهك
راشد: يلا قوومي ..
وقفت ويودها راشد من صوب .. وعامر اجدم ويودها من الصوب الثاني .. وسيف واقف يطالع عامر اللي مصدق عمره وايد
عامر: انته ما تنفع نص الدرب بتعقها .. قم قم ..
وصلو عند الباب .. طلعو منصور وسيف .. وعامر اجدمهم شوي ... حط راشد ريله عند الباب وحاول يجدمها ما قدر .. حس خطواتها ثجلت اكثر .. صد صوبها ياي يرمسها .. بس ما عطته اي فرصه ..
طاحت وهي تتنفس بـ صعوبه
ليست هناك تعليقات:
إرسال تعليق