الأربعاء، 20 نوفمبر، 2013

الجزء الـ31 (1)

صباحي غير عن اي صباح ثاني عشته ف ألمانيا .. صباحي ضحكتهم .. وفرحتهم ولمتهم .. صباحي يكفيه .. وجودهم في صباحه ..!

كنت واقفه جدام الفرن .. لاحظو .. في كلمه اذكرها لـ اول مره .. الفرن .. الله يخليكم لا تسون عماركم منصدمين .. خلاص استويت حرمه .. راعيه بييت الحينه .. واجب اني اوقف جدام الفرن .. واحرق لي كم جدر و اخبص لي كم اكله .. اسوي العيش هريس والجاي بلاليط .. والحياه حلوه ..!

ظربت قشره البيضه ب السجينه .. حسيت ان الشي اللي داخلها ناضي .. بندت الفرن وصديت ورايه ..

حمد توه ياي من برع: ياعيييييييني ..
شيخه مستحيه: شرايك ..
حمد: رايي ف شووو .. الحممممدلله انهم اخوانج والا جان افتضحنا جدام العرب ..
شيخه بنص عين: تطنز حظرتك ..
حمد: شو رايج انتي ..!
شيخه: شسووووي .. والله انا ماعرف اسوي شي ..
حمد: عاد اتقومين اتصفين لي كل انواع البيض .. بيض طماط .. بيض عيون .. يبض مفور .. وهالبيض مادري من اي صنف .. والله شكله غريب .. شوو ناويه تسوينا دياي انتي اليوم ..
شيخه: والله محد يعزم الاوادم ع الريوووق ..
حمد: ليش الاخت تعرف تسوي غوزي عشان اعزمهم ع الغدا ..!
شيخه: اطنز زياده انزييين .. والله انكم يا الرياييل .. ما تستاهلون شي .. نحن لو كويتو قميص واحد عنا نيلس نتمدح فيكم طول العمر .. وانتو هـ الكثر انسوي لكم ولا تشكرون .. ما تستاهل قم قم سر يب لي المونيوم .. بطرش الاكل وقف برع ..
حمد: وقف حق منو .. اللي مجابلينا ف الديسكو ..
شيخه: ع الاقل يمكن يشكرون ..
حمد: يشكرون ويسكرون .. خلصي خلصي يلا ..
شيخه: شو يبت انته ..
حمد: جام .. اجبان .. زيتون وهالخرابيط .. وفي خبز طازج بعد حاار ..
شيخه: هيه امسوينه ويا اللي يسكرون فيه ..
حمد: هههههههههه لالا .. ماخذنه من اربيعي المصري .. مسلم الريال .. ف اخذ من عنده وانا مغمظ ..
شيخه: لا حبيبي .. ف اوروبا انته .. افتح عينك عدل مب تغمضها واتوهقنا ..
حمد: اخاف افتح عيني .. واطيح على شي ثاني ..
شيخه: شي مثل شو بالله ..!
حمد: شي جذه اشقر .. ف نصه عيون خضر والا زرق .. مافينا بعد عوذ بالله هـ الانسانه اتحرضني ع المنكر ..
شيخه: والله محد غيرك المنكر ..
حمد: شو مستوي فيج انتي اليوم .. وايد تتحرطمين ..
شيخه: باجر دوام انته ..!
حمد: ليش .. مليتي مني ..!
شيخه: لا حشا .. انا قلت اني مليت منك ..!
حمد:عيل ليش هـ السؤال ..
شيخه: آسفين استاذ حمد .. ما بنسأل مره ثاني ..
حمد: شويخ ..
شيخه: نعم ..
حمد: ما تلاحظين ان لسانج مستوي طويل ..!
شيخه: هههههههههه لا ما ألاحظ .. انا من يومي لساني طويل .. انته اللي توك تتعرف عليه ..
حمد: انا تعرفت عليج قبل 4شهور .. بس ما كنتي جذه ..
شيخه: كنت اخاف منك ..! اخاف اطول لساني عليك ..!
حمد: اونه ..!
شيخه: جفت عاد .. شكلك يخوفني ..

شلت الصينيه وودتها ع الطاوله وحمد سار وراها ووقف جدام المنظره يطالع عمره ..

حمد: ما حسيت .. كل اللي يشوفني يقول لي شكلك طيب ..
شيخه: شكلك طيب .. بس .. مادري يمكن لاني ماكنت متعوده عليك .. وكنت خايفه اني مسافره ويا واحد ماعرفه .. ولاني اول مره اصلا اسير مكان بدون اخواني ..
حمد ابتسم: تدرين شويخ .. احسدج على علاقتج بـ اخوانج ..
شيخه: ليش ..
حمد سحب له كرسي ويلس: كل ما كنتي ترمسين عنهم .. اتمنى لو كنت واحد منهم .. عشان تحبيني كثر ما تحبينهم .. وتكونين قريبه مني كثر ما انتي قريبه منهم .. وتشتاقين لي وتفتقديني وتخافين عليه .. بالضبط شرات ما تسوين معاهم .. وحتى يوم رقدتي عند اهلج قبل كم يوم .. ما اتصلت بج .. كنت اباج تزعلين وتتنرفزين مني شرات ما زعلتي منهم يوم ما اتصلو بج اول الايام ..
شيخه: وانا صدق زعلت منك واتنرفزت ..
حمد: ادري .. عشان جذه يوم قلتي لي جي ما اتصلت بي .. ارتحت وايد .. وفرحت لـ درجه ما تتوقعينها ..

ابتسمت شيخه.. اجدمت منه و وقفت وراه ..  مسكت اديه وحطت راسها على راسه..

شيخه: اخواني شي .. وانته شي ثاني .. لا تشبه نفسك بهم .. كلهم احبهم نفس الحب .. ما افضل حد على حد .. قريبه منهم كلهم واشتاق لهم كلهم .. يعني جوف اول الايام .. يوم اشتقت لهم وزعلت منهم .. اشتقت للكل وزعلت من الكل .. مافضلت حد على حد . .بس اذا انته ابتعدت عني .. شوقي لك وزعلي منك بيكونون اكبر .. من شوقي وزعلي منهم .. لانك قريب مني.. اكثر من اي شخص ثاني ف الكون .. واحبك .. اكثر عن اي شي ثاني ..

ابتسم حمد ابتسامه طالعه من قلبه .. ابتسامه ذوبت كل مافيه .. ولعبت ف كيانه واحساسه .. مسك اديها بـ قوه .. وباسها..

وسمعو صوت الجرس ..

شيخه: غربلات بليسك .. وصلو وانا بعدني ادور بـ ريحه البيض ..
حمد: ههههههههه محد قالج ..
شيخه: قم افتح الباب .. لين ما اييب الحليب واسير ابدل .. ما بيمديني اتسبح ..

وقف حمد .. ظرب خشمها بـ صبعه ومشى وياها .. سار هو صوب الباب .. وسارت هي صوب المطبخ اللي مجابل الباب ..


ابتسم حمد وفتح الباب: مرحبـــ

صخ .. عقب ما صد يمين ويسار .. ماشاف جدامه غير ياهل .. يبلغ من العمر سنتين ونص تقريبا ..
عقب ما شافته ساكت ومب قادر يكمل كلامه .. وما سمعت اي رد من الطرف الثاني ..

صدت صوبه تشوف شو السالفه ..
طاحت عينها ع الياهل وصرخت من الخاطر...

شيخه: ثنوووووووووووووووووووووووووووي ....
ودرت الصينيه وركضت صوبه .. نزلت بـ مستواه وحظنته من الخاطر ..
شيخه: يا حيااااااااااااااتي .. مستحييييييييييل والله ..
حارب طلع بويهها: شو المستحييل ..
حظنت شيخه ويه ثاني وباسته .. وردت حظنته وهي تشله ..
شيخه: سخيييفييين .. مووول ماحبكم ..
عمار اجدم: ليش ..!
طلعت شيخه عيونها واجدمت منه وهي شاله ثاني
شيخه: جبببببببببببب .. وحظنته ..
عمار: ياعيني على رومانسية اخواني ..
شيخه: اسكت عني .. اسكتتتتت ..
عمار ضحك: حد يشتاق بهـ الطريقه .. ويا ويهج هذا ..

شيخه نزلت ثاني .. وردت حظنت عمار من خاطرها .. هـ المره .. هو رفع اديه وحظنها .. ثواني وهم على هـ الحال والباجين ساكتين ويطالعونهم .. وعقبها .. طاحت دموع شيخه ..

عمار: انا لله وانا اليه راجعون ..

وكلهم ضحكو عليه ..

عمار: محد يعرف دواج غيري ..

نزل اديه .. ورد رفعها .. بس هالمره وهو رافع شيخه اللي بدت اتصرخ ..

شيخه: يالسخيييييييييف..
عمار: صار لج ساعه مسويه عمرج ياهل واتصيحين .. يوم شليتج استويت سخيف..
شيخه: واكبر سخيف بعد .. جييي ما تخبرتوني انكم بتوون ..
حارب: شو كنتي بتسوين يعني ..!
شيخه صدت صوب حمد وضحكت: بزيد انواع البيض ..
حارب: اوووونه شويخ مسويه بيض ..
شيخه: كل الانواع لعيونكم
حارب: بس مروان ما ياكل بيض ..

سكتت شيخه واختفت ضحكتها .. صدت صوب مروان اللي توها انتبهت عليه وابتسمت ..

شيخه: في خرابيط ثانيه جاهزه .. تفضلو ..

اجدم حارب .. واجدم وراه مروان وهو ساكت .. حتى ما كلف على عمره ورد الابتسامه لـ اخته .. وعمار من زمان دخل واتفيزر ع الكنبه هو وثاني وحمد ..!

شيخه: شحقى يالسين هني .. يلا تعالو بيبرد الاكل ..
حارب: انا ماباكل ..
شيخه: ليش ..
حارب: اخاف الصراحه ..
شيخه: من ..
حارب: مافييينا اخاف اكل واطيح اسبوع ع الفراش وانا ارجع .. مادري شو مسوتلنا انتي ..
شيخه: اييه عن السخااافه .. والله يوم اقول انكم سخيفين .. تسألون ليش بعد ..!
حارب:هههههههه متأكده ان مافي شي ..!
شيخه نزلت بمستوى ثاني ومسكت اديه: هيه متأكده " صدت صوب ثنوي" منو انا ..
ثاني رفع حياته بـ براءه .. وعقب عق عمره ع الكنبه حذال ابوه ..
شيخه: ليكووون نساني ..
عمار: لا ما نساج .. بس يتدلع ..
شيخه: قم يا ليّال ..
عمار: هههههههههه كبر الحينه يقولها عدل ..
شيخه: فديته والله .. قوول منو انا ..
ثاني بدلع: شيخو ..
شيخه :بنت ابووك شيخو ياللي ما تستحي " وشلته" يلا تعال بناكل ..
ثاني: ماباج انتي ..
شيخه: على فكره عمار .. ولدك ما يستحي على ويهه ..
عمار ضحك: صار له شهر وهو حاشرني عمي مروان وعمي مروان .. الحين يوم يا عند عمي مروان اتقولين له تعال عندي ..
شيخه: السالفه جذه يعني .. ما يباني ..
عمار: لا .. يبا مروان ..

سكتت شيخه .. سارت صوب مروان .. سحبت الكرسي اللي حذاله ويلست ثاني ..

شيخه: زيين .. بنيلسه عند مروان بس المره اليايه ما بخليه ..
حارب: اي المره اليايه .. نحن عقب يومين بنرد البلاد ..
عمار: والله انكم منكر .. ولديه ياي عشان مروان .. ومروان بيرد البلاد ..!
شيخه صدت صوبه وهي رافعه حياتها: لحظه لحظه .. منو انتو  ..!
حارب: انا ومروان..؟
شيخه: والباجيين ..؟
حارب: بعدهم .. بس نحن بنرجع ..
شيخه: ليش ..؟
حارب: بس .. خلص رصيدنا .. ما نقدر انتم اكثر ..
شيخه رفعت حياتها: رصيد شو ..
حارب: رصيد الاجازات ..
شيخه: انته خلص رصيدك .. ومروان ..!
حارب: مروان خلصت طاقته .. مل وهو يدور وحده شقرا ب عيون زرق .. بذل جهد ولا لقاها..
مروان ابتسم: وكلت امري لله .. وقلت برجع البلاد ادور لي وحده من هناك ..
شيخه رفعت حياتها: عن العياره ..
عمار: عياره شو ..!
شيخه صدت صوب مروان: ليش تبا ترجع ..
مروان ابتسم: اشتقت حق ميود .. وهو بعد اشتاق لي .. مادري به شو مخبص ف البلاد .. برجع الحق عليه عن ينزل راسنا ف الحظيظ ب افعاله الشينه ..
شيخه ركزت عينها بـ عينه: لاحق على مايد ..
مروان بعده مبتسم: وانتي بعد لاحقه علينا ..!

سكتت .. وماردت عليه .. ماقدرت اترد اصلا .. لين الحين ما قالت لـ اخوانها انها بتم ويا حمد لين شهر سبعه .. كانو حاطين ف بالهم انها بترد اخر هـ الشهر .. ويوم شافوها طولت .. قالو يمكن على بدايه الشهر الياي ترجع .. ف ما تبا الحين تنفجر جدام حمد .. واتقول حق مروان.. انها بتم هني لين اخر سبعه .. جدامها ايام وشهور .. بعدها ما شبعت منهم عشان يقول لها لاحقه علينا ..وبعدها ماشبعت منهم عشان تعوض شوقها لهم ف الايام اليايه بوجودهم معاها الحينه..!

..

ف دبي .. بالتحديد ف المستشفى ..

كان واقف عند الدريشه .. يراقب السيايير وهي سايره ويايه .. المطر ينزل بـ غزاره وهو بدا يحاتي اخوه اللي اتصل به وقال ربع ساعه واكون عندك ..

طاف من الوقت اكثر من نص ساعه .. وراشد يالس على اعصابه .. ومايد مايا .. ولا يرد ..!

ميره توها يايه: اتغير الشفت .. صرت انته اللي اتم هني ليل نهار وانا اللي اييكم زياره ..
راشد: والله انتي خامده اليوم .. انا شو يخصني ..
ميره: والله تعبانه .. احس اني من سنه مب راقده ..
راشد ابتسم: ريحي هـ اليومين بما اني هني ..
ميره: امس اتقول لي شهر ..
راشد: وانتي صدقتي .. بس ويكند .. ويوم الاحد برد البيت
ميره تنهدت ويلست ..
راشد: شفيج ..!
ميره: ولا شي "سكتت شويه" راشد
راشد: نعم ..
ميره: شكرا ..
راشد: على ..!
ميره: على .. كل شي ..
راشد: شو هـ الكل شي .. ماحس اني سويت شي ..
ميره: على وجودك .. وعلى اليومين اللي قضيتهم هني .. وعلى اتصالاتك ومسجاتك وسؤالك ..
راشد اجدم منها ويلس: تحسين يوم ولد الاخت يجابل خاله وبنته .. يعني سوا شي كبير يشكر عليه..؟
ميره: لو كنت اعرفك كـ ولد عمه .. كنت بقولك لا ..
راشد: عيل عرفتيني كـ شو .. بوي فرند ..!
ميره: يالسخيف .. اقصد يعني لو كنا متربين من الصغر ويا بعض ..
راشد: هذا ونحن مب متربين ويا بعض واتقولين لي سخيف ..؟ لو متربين شو كنتي بتقولين ..
ميره: ماكنت بقولك شكرا .. وكنت بقولك .. شل بعمرك واطلع برع ..
راشد: على كيفج هو .. يالس على جبدج .. وبتغدا هني .. بس اتريا اخويه اييب الغدا
ميره: لا والله انته واخوك ..!
راشد: وبتتغدين ويانا انتي ..
ميره: مابا ..
راشد: مب على كيفج ..
ميره: انته واخوانك امشيين الدنيا على كيفكم ..!
راشد: وانتي شو يخصج بـ اخواني .. شحقى اتيبين طاريهم ..
ميره: شمه شو تقرب لك ..!
راشد: شو تقرب لج انتي ..
ميره: اذا عرفت شو تقرب لك .. بعرف شو تقرب لي ..
راشد: ماشاء الله .. هذا وهي ما تقرب لج .. ويلستي وياها سوالف وصياح ..
ميره: استغفر الله .. يوم اقول انك سخيف ..

ضحك راشد .. وبنفس الوقت وصل مايد ..

مايد: السلام عليكم ..
راشد وميره: وعليكم السلام ..
مايد: السموحه اتاخرت عليكم .. 
راشد: وين كنت ..
مايد: علقت ف الزحمه .. ف عصبت وغيرت الدرب اوني اشرد من الزحمه .. والدرب الثاني كان اخس ..
راشد: ظريبه اللي يتفلسف .. ومبايلك ..
مايد: بلاه ..!
راشد: احترق من كثر ما اتصل .. جي ما ترد ..!
مايد: اونه " وطلعه من جيبه" اوه ع السايلنت ..!
راشد: لا والله ..
مايد: سرت صليت اليمعه وخليته ع السايلنت ونسيته .. ليش كنت تبا شي..!
راشد: لا .. بس خفت عليك .. وايد اتأخرت واي شي اتصل بك ما ترد .. وشفت الجو واتوترت زياده ..

ابتسم مايد وسار صوب الباب ..

مايد: يلا اترخص انا ..
راشد: على وين ..!
مايد: راد البيت .. يلا مع السلامه ..

طول الوقت اللي يرمسون فيه .. كانت ميره ساكته واتراقبهم .. نش راشد وطلع ورا اخوه .. وقفو عند الباب وميره بعدها تطالعهم .. رغم انها ما تسمعهم شو يقولون بس كانت اتراقب حركاتهم وتعابير ويوههم ..

راشد: بلاك مايد ..!
مايد: ولاشي..؟
راشد: ملان .. تباني ارد البيت ..!
مايد: لا امس ما حسيت انك مب موجود ..
راشد ظربه على جتفه: مالت عليك ..
مايد: هههههه طول اليوم وانا ف بيت قوم عمي احمد .. رديت البيت وانا منتهي .. حطيت راسي ورقدت ..
راشد: عيل ليش زعلان ..!
مايد: بيني وبينك يعني .. مب متعود عليها .. ف مستحي منها شوي ..
راشد ضحك: والله خوفتني مالت عليك .. قلت في شي مستوي بعد ..
مايد: لا لا بسم الله ..
راشد: اكيد مافيك شي ..
مايد: والله مافيني شي .. المزاج رايق وتوني شباب .. ليش اعكر مزاجي واقصر من عمري ..
راشد: لا والله ..!
مايد: والله .. والحين ساير ايكيا بعد .. باخذ فراش يديد حقي وحق مرواااااااااااان ..
راشد: يالخااااااااااين ..
مايد: والله مشكلتك .. انا بسير اخذ حق ربيعي .. وانته شكلك رابعت واحد غير حارب ..
راشد كفخه على يبهته: ف راسك انزين ..
مايد: هههههه مادري عنك ..
راشد حط ايده ف جيبه: انزين خذ لنا وياك يعني ما بيستوي بك شي ..
مايد: انزين .. استريح وخل فلوسك حقك ..
راشد: عن الحركات ..
مايد: لا تحسسني عاد .. انا لو ماعندي جان مديت ايدي وخذت كل اللي ف جيبك بدون ما اسأل واشاور .. الشي الوحيد اللي يعطينا اياه ابوك هو الفلوس .. فاتح لنا رصيد وكل شهر يفلعنا ب مصروف
راشد: هههههههه عشان تلبس وتتكشخ وتشتري .. والناس ايقولون هذا ولد بدر ..
مايد اتنهد: سر سر اتغدا .. خلني ألف السوق شويه ..
راشد: ياعيني على ابو المسؤوليات ..
مايد: احسن عن اللي مطلق اخوه ومرابع لي غيره..
راشد: والله ايرررك كف الحييينه ..
مايد ضحك وهو يرفع حياته: سلم سلم ..
راشد: اجلب ويييهك زيين ..

ضحك مايد وسار عنه .. وراشد هز راسه ورد داخل .. وميره .. لازالت تطالعهم ..
ما تعرفهم .. ولا تعرف اسلوبهم ولا طبيعتهم ولا حتى علاقتهم ببعض .. بس من اللي شافته بين الاخوان لين الحين .. حست انهم فعلا غير .. غير عن امهم وابوهم .. ويمكن بعد .. غير عن اي اخوان ثانيين بهـ الدنيا ..

..


ليست هناك تعليقات:

إرسال تعليق