السبت، 16 نوفمبر، 2013

الجزء العاشر (1)


كنت مجابله اللاب توب واخواني كلهم مرتزين جدامي و مهره اختيه وميثه مرت محمد اخويه.. كلهم ويايه باستثناء عمار.... وانا على اعصابي مره اضحك اخفف عن عمريه وارفع معنوياتي و10 مرات اصيح ف داخلي من شده الخوف اللي تملكني..لدرجه اني سكتت وما قمت ارمسهم عشان ما انتفض .. نزلت راسي ويلست استغفر من الخوف

مروان: شيخووووووو خلاااص لوعتي جبدنا ..
حارب: حشى مب نتيجه هاي ميلستنج على اعصابج
مهره: قومي عن اللاب توب .. مايد الفاضي بيسوي رفرش .. يوم بيوصل الايميل بيخبرج ..
مايد: يالسه وحارقه اعصابها .. لا واللي قاهربي تعرف انها ما بتييب اقل عن 90
حارب: هذا انا غاسل ايدي منه
مروان: بـ ديتول وكلوركس ..
حارب: وكل منظفات دعايات سما دبي ..
ومايد مطنشنهم ومندمج ف البيري ..
مروان: يا ابني عمك اصمخ .. اتكلم منو انته ..
ميثه: عايش حياته الريال شو تبون فيه ..
مايد: وانا ادري عنهم مرت اخوويه .. الحين انا يالس ف حال سبيلي ..  الله حافظ لساني عنهم .. شحقى ينغزوون مادري .. ..محمد انصحهم باخذ حسناتهم..
مروان: ما عندنا حسنات نحن
مايد: برايه بعطيكم ذنوبي.. عندي وايد ذنوب انا..
محمد: استغفر الله ههههههههه
مروان: شيخوووه .. والله لااااعت جبدي خلاص بندي اللاب تووب ..
محمد: شيخه خلاص .. انتي حتى ايام الامتحانات ماكنتي متوتره جذه ..

وانا لابستنهم وصبعي ع الـ F5 كل دقيقه اسوي رفرش للصفحه والايميل ما وصل .. ماااااااوصل ..
نش مروان وهو متنرفز .. سحب اللاب توب عني ..

مروان: بس خلاص خلاص ..
شيخه: عن الاستهبال ..
مروان: شيخوووه والله مب زين جذه .. بيستوي بج شي ..
شيخه: مروان لا توتر لي اعصابي زياده .. عطني اللاب تووب ..
مروان: ما بعطيج ..
شيخه: عطني اللاب تووب .. افففففف ..

نزلت راسي وطاحت دموعي .. صدق نرفزني ووترني زياده .. انصدمو اخواني من موقفي .. وانصدم مروان قبلهم ..

حارب: اييه شيخووو .. لاتسوين جذه والله مب زيين ..
ميثه: يا بنيه عن يستوي بج شي بسم الله ..

نشت مهره .. ييت صوبي ومدت لي اديها ..

مهره: قومي ..
وشيخه ساكته ..
مهره: قومي شيخو ..
ماردت عليها ..
مهره: جوفي انا ماقدر اوخي .. بس اذا ما نشيتي .. بضطر اني اوخي وكيفج عاد لو استوا بي شي .. وانته .. ييب اللاب توب بسرعه
مروان: خلها تنش قبل ..
مهره: ما بتنش .. انته ييب اللاب توب ..

شل مروان اللاب توب .. وهو عينه ع الشاشه .. والفضول اللي فيه جبره يمد اديه ويسوي رفرش .. ومره وحده وقف ..

مروان: شيخو .. وصل ايميل يقولج نتيجه الـ ...

وقبل ما يكمل .. نشيت بسرعه وسحبت اللاب توب من ايد مروان حطيته ع الطاوله وفتحت الايميل ..


ف الوقت اللي يفتح فيه الايميل .. حطيت ايدي ع الشاشه ورديت اصيح ..
يا ترى شو تحت ايدي الحين .. هل نسبه اتبشرو الا سواد ويه ؟
تعب الـ 12 سنه.. كلام مهره اختيه اللي دومه كان يرفع معنوياتي..دعوات محمد ونصحه لي.. عيون عمار وحنيته وحرصه عليه.. سخافات راشد اللي كانت تحاول تغير مودي شوي ..  ومروان اللي دومه رافع معنوياتي وهو يقول لي يالزلمه .. نحن ندري انج قدها.. حارب اخويه  اللي يحاول يحمسني ويسأل شو سويتي اليوم وباجر شو عليج.. وعمو عليا اللي قالت لي انا ادعي لج ف كل صلاه.. حتى مايد الطمه اللي مايدري عن الدنيا ادري انه يحاتيني لانه  كان ولازال اجرب اخواني لي..يا ترى هل بفرّح هـ الناس كلها والا !!
افكار جننتني كانت ادور ف بالي وانا مغطيه الإيميل بديه واصيح لين ما توكلت ع رب العالمين وشليت اديه ومره وحده صرخت وصحت..

صحت تعبي .. صحت شقاي..صحت فرحتي ..صحت سنين عمري..سهري ..قله ارقادي..صحت اجمل سنين عمريه اللي قضيتهن بين روضه..ابتدائيه .. عداديه.. واليوم خريجة ثنويه عامه

كانت مهره اجرب وحده لي .. عفدت عليها وحظنتها من الخاطر .. وصحت . .

مروان: يالدحيييييييييييييييييييييييييييييييحه .. وشاله البيت على راسها تقول وحده واثقه انها بتييب دور ثاني ..
حارب: ههههههههه كم .. ؟
مروان ابتسم: 95.9
شيخه: يعني 96
مروان: لا مب يعني 96
شيخه: يعني 96 مب على كييييفك ..

ظحك مروان وسحبني عن مهره .. وحظني ..

مروان: مبرووووك .. والله تستاهلين كل خير ..
شيخه تظربه على جتفه: الله يبارك فيك .. يالدبببب ..
محمد: ماشاء الله عليج شويخ .. مبروك حبيبتي .. الله يحفظج ويوفقج ..
شيخه: الله يبارك فيج ..
حارب: جييي اباج اختيه طالعه على اخووج .. مب بعض الناس .. حتى ايميلهم متعايزين انهم يجيكونه.. "وحظنها"  تستاهلين كل خير حبيبتي ..
مايد: اسغفررررر الله ..

والكل ضحك عليه ..

سلم عليّه محمد .. وعقبه ميثه .. وقفت .. وحطيت عيني بـ عين راشد اللي ماله حس .. اجدم مني وحظنّي .. والباجين مرتبشين ويا مايد اللي توه تكرم وخذ اللاب توب ..

راشد: مبروك حبيبتي ..
شيخه: الله يبارك فيك ..
راشد: عقبال الشهاده الجامعيه ..
شيخه تنهدت: شفيك .. ؟
راشد: مافيني شي..
شيخه: راشد ..
راشد: والله مافيني شي .. خلينا مستانسين ..

وسحبني عن حظنه .. وابتسم رديت له الابتسامه وصديت صوب مايد اللي صرخ وهو يكفخ اديه ف بعض بحركه انتصار ويقول .. ييييس ..

حارب كفخه على راسه: مالت عليك .. مستانس على خيبتك ..
مايد: رووح زين .. انت احمد ربك اخوك يايب هـ النسبه ..
مروان: هههههههههه فشلتنا والله .. ولا واحد منا ياب اقل عن خمسه وثمانين .. غير رشود اللي كان وده يدرس هندسه .. بس للاسف الظروف ضده ..
وراشد ابتسم واكتفى بالسكوت ..
شيخه تضحك: كم نسبتك
مايد:99,9
حارب: جي ديتووول ..!
شيخه: هههههههههههههههههههههه صدق كم .. !
مايد بكل فخر: 79,4
شيخه: زييين يوم ييب هـ الاربعه بعد
حارب: مبروك .. ولو انك سودت ويهنا ..
مايد: كححح الله يبارك فيك .. عقبالك ..
حارب: عقبال شو .. ما اسود ويه اخواني مالت عليك ..
مهره: ههههههههه حرام عليك حرووب .. والله فدييته اخويه ..
مايد: فديييييييييييييييت مهاري والله  اللي ما تكسر بـ خاطريه ..
محمد: بس حق التقردين فالح انته ..
مايد: شو تتحسبوني ناجح ع الفاضي .. يلا يلا ابويه .. اتريا الهدايا انا ..
مروان: والله ما تستحي انته .. شيخو ماشاء الله عليها اللي يابت هـ النسبه .. وما يابت طاري الهديه ..
شيخه وهي واقفه حذال راشد: منو قالك حبيبي .. كنت اترياكم تخلصون حشرتكم وعقب بطالبكم ..
مروان: انا مرفووع عني القلم .. ما اشتغل ..
شيخه: يلا يلا هـ الحركات مب علينا .. رشود بعد ما يداوم بس فديته ادري انه ما بيقصر ..
لويت عليه .. وابتسم راشد ..
مايد: عمار دوام .. ؟
حارب: لا ماخذ اجازه ..
مروان قطع عليه: لا .. اليوم عنده دوام .. اجازته من باجر بتبتدي ..
شيخه: بيي ويانا .. ؟
حارب: عيل راسه يعوره يطرش ثنوي روحه ..
شيخه: عداااال .. عن لا يطرشه بس .. والله انكم اضكون يا اخواني " وسحبت اديها عن راشد" كل واحد حاس بالمسؤوليه ومن هناك المسؤوليه متبريه من ويهه .وبكل هدوء سارت عنهم الحجره ..
حارب يصرخ: والله انج ما تستحين .. حمدي ربج انج متخرجه اليوم والا جان صيحتج ..
مايد: خيبه خيبه خيييبه .. يلا يلا نشو رقدو ومشكورين على حرصكم وسهركم ويانا " وهو يجوف الساعه" الساعه 11 الله يغربل ايميلهم اللي ذل اسلافنا لين تكرم ووصل ..
مروان: لاتحسسنا عاد انك مهتم .. انت لو شيخه مب ثنويه عامه .. جان ما عرفت عن الايميلات حتى..
مايد: اطنز اطنز .. باجر يوم بداوم ف الجيش .. وبستلم الراتب ..وانته بعدك ما قابلينك ف الشرطه ..  ترجاني اصرف عليك ..
محمد: تعال صدق .. كم شهر كملتو انتو الحينه ..
مروان: والله ما اذكر .. كله من ابويه .. اخرنا سنه كامله.. والحين يوم قدمنا سوولنا سالفه ف البدايه .. ولين الحين ماقبلونا .. ياااخي خلها على الله بس ..
مايد: تقول شيبه وخسر ف تجارته .. يلا ورانا رحللله باجر .. تصبحون على خير ..
الكل: وانت من هل الخير ..

نشو سارو حجرهم .. لانهم صدق اتأخرو اليوم .. الساعه 11 بالنسبه لهم .. وااااااايد متأخر ..


ف حجره حارب وراشد ..


حارب طايح وميود فونه ف ايده ومتشقق .. وراشد طايح وياه وهو سرحان ..
دقايق .. فر حارب الفون وصد صوب اخوه

حارب: حووو .. على قلبي .. !
شافه راشد وسكت ..
حارب: وبعدين وياك رشود ..
راشد دفن راسه ف المخده:حارب والله ماقدر انساها .. ماقدر ..
حارب: بتخبرك انته .. هي كاسره خاطرك والا قلبك .. يعني انته تحاتيها من باب الشفقه .. والا تحبها مثلا وانا مادري ..
يلس راشد وحظن ريوله بـ اديه .. بـ طريقه شبابيه
راشد: حروب .. لاتمزح والله مالي مزاج ..
حارب: شويخ شو قالت لك يوم حظنتك .. ؟
راشد: سألتني ..
حارب: عن ..!
راشد: قالت لي شفيك ..
حارب: شفت .. يعني الكل ملاحظ انك متغير مب بس انا .. رشود لا اتم جذه والا ما بتقدر تسوي اي شي .. ان تميت على هـ الحاله .. الكل بيلاحظ وما بيسكتون لين ما يعرفون السالفه .. واذا امايه درت ان حضرتك من اسبوع ما تضحك ولا تسولف ولا تحشرنا بـ اغانيك البايته وقصايدك اللي تلوع الجبد .. عشان هاللي طلعت من بيتنا اتصيح .. ف ذنب البنيه بيكون ف رقبتك .. يمكن ما يسووبك شي عشان محد يعرف انها تقرب لنا .. بس صدقني ما بيخلون البنيه ف حالها .. خصوصا انها وحيده وماعندها غير ابوها ويمكن يموت ف اي لحظه على قولتها ..
راشد: حارب والله احاول اني اكون طبيعي .. بس ماقدر .. كل ما ايلس ف الحديقه .. واشوف الباب اذكرها .. وحتى اذا سرت بيت عمي احمد .. اذكر شكلها وهي يالسه برع تصيح .. حارب احس ان شي ف دمي يستفزني .. شي بداخلي يعورني ..
حط حارب اديه على ايد اخوه .. وحط راسه بالضبط جدام راس راشد وركز ف عينه  
حارب: كل هذا .. شفقه .. !
راشد سكت ثواني وعقبها رمس: كيف اقدر اوصل لها .. ؟
حارب: مب قايل لك ..
راشد فر ايد حارب عنه: عيل لا تسألني مره ثانيه وتسوي عمرك مهتم لـ نفسيتي اوكي .. تصبح على خير ..
حارب: خيبه .. انته ايه ..
راشد: ابا ارقد .. بديت اصدع ..
حارب: راشد ..
راشد: حارب .. قتلك ابا ارقد ..
حارب: انته تعرف اني مستحيل اخليك ترقد وانت زعلان مني ..
راشد: وانا مابا ارمسك ..
حارب: رشود ودر عنك سوالف اليهال .. وقم يلس ..
راشد: ياخي شو تبا انته ..
حارب: ليش معصب .. ماتبا تعرف كيف توصل لها .. !
راشد: بدبر حالي ..
حارب: لا تحسسني عاد .. انته ما عندك حد غيري تأمنه على اسرارك .. وربعك كلهم ربعي .. ماتخبرني كيف بدبر حالك ان شاء الله .. ؟
راشد وهو طفران: حااارب قم عن ويهي ..
حارب: هههههههههه والله ماقدر اشوووفك جذه رشوود .. شرات ما انت محترق على شكلها وهي تصيح .. انا بعد محترق على شكلك وانت مضايج " مد ايديه لـ اخوه" قم يلس ..
مسك راشد ايد حارب ويلس ..
حارب: اولا .. حركاتك الماصخه هاي .. ودرها .. مب كل ما قتلك شي .. حطيت راسك واونك زعلان ..
راشد: انزين ..!
حارب: ثانيا .. باجر ان شاء الله بنسير كلنا .. تيلس ويانا .. تضحك وتسولف وتحشرنا بـ غبارك ..
راشد: انزين ..!
حارب: ثالثا واخيرا .. وسكت ..
راشد: ثالثا .. !
حارب: عرفت كيف توصل لها  ..
راشد نقز: قول والله ..
حارب: والله ..
راشد: كيف ووين .. عندك عنوان بيتهم .. كيف طلعته ... وين بيتهم .. والا عندك رقمها .. ؟
حارب يطالعه بـ نظرات بارده: انته ايييييييييييييييييييييه .. بلاااااااااااك
راشد: اففففففففف حروووب ارممممس ..
حارب: اقووولك .. عرفففت كيف اوصل لها .. بس بعدني ما وصلت ..  اصبر عليه شوي .. وبعدين ما بخبرك الا بشرط ..
راشد: استغفر الله ..
حارب : كيفك  ونش ..
راشد سحبه من اديه: تعاااااااال زييين ..
حارب: نعم ..
راشد: شو شرطك ان شاء الله ..
حارب: انك تخبرني قبل ..
راشد: عن .. ؟
حارب: رشود .. انته صدق قلبك معورنك عليها وكاسره خاطرك لانها تقرب لك .. والا..
راشد: والا .. !
حارب: والا حبيتها ..
راشد: وانته تتحسب كل الناس شراتك .. حب من اول نظره
حارب بنص  عين : لا والله .. !
راشد: سوالف الحب هاي .. خليتها حقك .. انا البنيه كاسره خاطريه وبس .. لا اكثر ..
حارب: اوكي كاسره خاطرك فهمناها .. بس اللي اعرفه انها ساكنه ويا ابوها .. وماعندهم اي حد .. و ابوها مريض او ريال عود الله اعلم .. المهم انه ممكن يموت ف اي لحظه .. انزين وعقب .. ؟
راشد: شو اللي عقب .. ؟
حارب: اذا استوا به شي .. ؟
راشد: حارب .. انا .. هذا اللي افكر فيه من اسبوع .. هذا اللي ذااابحني ..
حارب: شو .. ؟
راشد: اذا استوا به شي  .. ؟
حارب: وشو اللي ناوي تسويه عقب  .. ؟

خذ راشد نفس وسكت

راشد: وين العنوان .. !
حارب: بجتلك وبدش بك السجن انا .. اقوووووووووووووووووووولك ما عنديييييييييي اصبر اصبر اصببببر .. ويقول لي كاسره خاطريه بعد " وكفخ اديه ف بعض" آآآه منك .. بجوفك باجر كيف بتقول لي كل الناس شراتك .. وتعال قول لي شسوي وكيف اتصرف .. يا " ورفع حياته" محترم ..


..

ليست هناك تعليقات:

إرسال تعليق