الجزء الـ25 (2)

ع الساعه 3 تقريبا .. ف حوي بيت احمد .. 

عبدالله ومحمد وعبدالعزيز .. يالسين صوب الكوار .. شمه وحمده يحطن الدياي ف الاسياخ .. وراشد يشل عنهن ويوديه صوب عبدالله ومحمد .. والباجيين .. يدحون ..

راشد: الحين انا اللي اتحرك رايح راد رايح راد .. وانتو ادحوووون يا ماال الدح ..

عبدالعزيز: عليهم بالعافيه انته بلاك ..

راشد: قلبي يعورني انا امشي وهم يدحون " صد صوب عبدالرحمن" انته يالدب .. نش ساعدني ..

عبدالرحمن: ماقدر انا اذا مشيت وايد اتعب ..

راشد: طبعا .. وين بتقدر تتنفس انته اذا نشيت ..

سيف: وليش هـ الحركات انتن الهنتين جي ما يلستن صوب الكوار ..!

حمده: الحين يالسات انسوي لكم احمدو ربكم بعد ..

سيف: بل .. حرم حارب اجوفها مقتبسه دوره هـ اليومين ..

ضحكت حمده وردت اتعابل الدياي ..

سيف: والثانيه بسم الله عليها قاصين لسانها ..

شمه اطالعته بـ نظره وردت نزلت راسها ..

سيف: خيبه .. آسفين بنت عمي ..

مايد: ههههههه هزلت والله ..

عبدالعزيز: شو عندك انته .. خل البنات ف حالهن ..

سيف: شسوي .. والله مفتقد مروان وعامر وفارس ..

احمد: يوم قالوولكم بييكم يوم وبتقولون ياريت ..

سيف: هيه والله ..

غانم: عيل ما كنت تعترف جدامهم ..

سيف: ماكنت اباهم يصدقون عمارهم ..

منصور: اصلا انتو مخسرين على عامر ومروان ع الفاضي .. من سارو وهم طايحين هناك ..

احمد: ههههههههه صدقك والله .. حتى لو ما مرضو .. بعد ما ينفعون ..

عبدالعزيز: ههههههه حرام عليكم لا تحطون عليهم ..

حمده صدت صوب شمه : باجي شويه .. شموه كمليه انا تعبت بسير اغسل ايدي ..

نشت حمده سارت داخل تغسل ايدها .. ووصل راشد صوب شمه يشل باجي الاسياخ ..

شمه: اصبر باجي شويه ..

راشد: انا بصبر ما ورايه شي .. بس انتي ليش زعلانه ..

شمه: مب زعلانه ..

راشد: الكل ملاحظ ..

شمه: محد ملاحظ .. بس اذا انته رمست اكثر بيلاحظون ..

راشد يلس: كلهم لاهين ..

شمه: حاول اتلهي عمرك وياهم لين ما اخلص ..

راشد: على فكره .. بعدج ما راضيتيني ..

شمه تنهدت: اعتذاري ما يكفيك ..؟

راشد: لا .. قلت لج كيف برضى ..

شمه: بس انته قلت لي انك مب زعلان ..

راشد: نفس الوقت ما كنت زعلان بس عقب زعلت ..

شمه: تبا اتذلني يعني ..؟

راشد: لا شو يخصه .. بس اباج ترجعين شمه اللي الكل افتقدها ..

شمه رفعت راسها وحطت عينها بـ عينه

راشد ابتسم: واللي انا بعد افتقدتها "ووقف" كملي اللي ف ايدج .. برجع اشله ..

صوب الباجيين ..

غانم:انا تراني طييرك .. اللي يحبك مووت .. لو حب قلبي غيرك .. بدعي علييه يموووت .. بدعي عليه يمووت ..

مايد: لحظه لحظه شوي  .. الحينه انته بتحب غيره .. شو يخصه الريال عشان تدعي عليه يموووت ..!

غانم: ههههههههه والله الكلمات اتقول جذه ..

مايد: يوووووم يقولولكم عبدالله ومحمد ان الاغاني كلها تافهه ..

سيف: اسكت انته .. حرف التاء ..

مايد يلس حط ريل على ريل مد ظهره وهو متعذب : تدري لييييييييييييييش ازعل علييييييييك اعشقك واموووت فيييك .. تكسر الخاطر بدووني ينكسر قلبي واجيييك ..

ومكمل الحبيب والباجين ميتين عليه من الضحك

سيف: من ويييييييييين طلعتها ..

مايد: من التراث الاصيل .. كاااف .. 

منصور: مافي حرف الكاف ..

مايد: فييي دورو ..

منصور: مااافي ..

سيف: امبلى امبلى " ركض صوب عبدالعزيز سحب النظاره عنه ورد وقف وهو سامت" كييف اسييبك .. طلالالا .. كييف اسيبك .. وانته نظر عيني .. وانا حبيييبك تتن .. وان حصل واختلفنا او في يوم افترقنا شوق يعني ترارا راا

والكل ضحك عليه ..

مايد: ترارارا يعني الف .. 

غانم: ايدي بيدك يا حبيبي من الفجر حتى المغيبي يا شمس لالا لاتغيبي

مايد: غبرتووووووووووووووووونا .. يامال الغبار

سيف: ياااااااء ..

اتربع مايد وصفق . .

مايد: يا مصلي الخميسين

سيف: لا اله الا الله

مايد: هذي عطايا الراحمييين ..

سيف: لا اله الا الله ..

مايد: يا خويتم باليمين .. وعليه سعيد .. وعليه مبارك .. وعسى ايتبارك .. وسمعونا احلى صفقه للمعاريس

وقام يصفق ويحرك راسه يمين ويسار .. والباجين ميتين عليه من الضحك ..

راشد: اي حرف ..؟ 

منصور: هههههههههههههههههه سييين

راشد يا صوبهم وهو يصفق: ستووووووووووب .. قولو قولو قولو قولو نغني ليلنا بطولوو قولو قولو قولو قولو يا ورد وماس ولولو ياشاشاشاشا عقبب ماعرف شنوو .. غنوو غنوو ويانا غنو ويانا ياسلام غنو ويانا دن دن ودانا دانا  شوفو شوفو محلانا وانتو وانتو ويانا هيااااااااااااااااااااا ودنا دانا دن دن دن دنا دانا  برم رم   إحنا وانتو برم رم وين ماكنتو .. ياللي تعبان .. ياللي زعلان .. الليل فرح .. ما نباا احزااان .. وتاتاراااا 

مايد: شو هـ الغبار انته وياااه ..

منصور: ههههههههههههه لا .. هاااي  قوووويه الصراحه ..

سيف: اسمييييييك غبرتناااا .. ههههههههه ..

راشد: عاد اللي تغنونه من الصبح وايد يديد ..

منصور: حرف الالف ..

عبدالرحمن:اني مارق مريييت جمب ابوااب البيت ..

مايد: عن الغش هاي واني مارق .. مب اني ..

عبدالرحمن ماشي واو

سيف  : بيت اللي كاااانو سكاااانو .. عبوابو دقييت  ..  مافي حد لقيت .. ع بوابو دقيت مافي حد ف البيت .. ردو علييي حيطانوو ..

راشد: وااااااااااو .. شو ها كله حرف الواو ..

سيف: بس خلصت الاغاني بـ حرف الواو ..

عبدالعزيز: انزين ردو حق الف .. بما انه اول حرف ..

محمد: ماشاء الله عليك عمي .. ونعم القدوه ..

عبدالعزيز ضحك وخذ له سيخ ..

راشد وهو يهز رقبته: الله مكبر غلااااااااااك .. ينبض بحبك فوادي من يشبهك يا ملاااك من يشبهك يا ودادي ورهييب والله رهيييب .. سرااا .. عاشو الحاضرين .. عاشو اللي يصفقوون .. ورهيب والله رهيب

منصور: بااااااااااء

سيف: امبااااااااااااع .. راشد .. عندي لك راي ..

راشد: شلك طهف على قولت عمار ..

مايد: خيبه انزين خله يتنفس انزين ماقال شي ..

سيف: وانا ادري .. كلني قبل لا ارمس ..

مايد: دخيلك عطنا شله بدال هالاغاني المغبره ..

راشد: مافي شي ف بالي .. ومب داق ف راسي اشل .. ردو غنو ..

مايد: فيكم طرب ..

الكل: ايوووه ..

مايد: فييكم وناسه ..

الكل: يلااا ..

مايد: يلا يلا يلا وقولو قولو يلا يلا ..

والكل بدا يرد وراه ويخترش ويكمل عليه بـ اغاني مغبره ربشه .. واللي مب مشاركنهم الحشره مكتفي انه يطالعهم ويضحك عليهم ..

داخل .. دقت مي باب الحجره ووقفت .. خمس دقايق وردت دقته ..

مهره: تعالي ..

فتحت مي الباب واجدمت منها وهي شاله الصينيه ..

مي: بلاج ..!

مهره هزت راسها بـ تعبت ..

مي: بلاج مهره .. بتسيرين المستشفى ..!

مهره وهي تمشي ف الحجره: لا ..

مي: شكلج تعبان ..

مهره: مابا اسير ..

مي: ايه لا تسوين لنا هـ الحركات .. مافينا يستوي بج شي عقب..

يلست مهره ع الشبريه بدون ما ترد عليها ..

مهره: تعبانه عموه .. بس احس اني بعدني ..

مي: وانتي على كيفج .. والا على كيف احساسج .. نشي يلا ..

مهره: مابا ..

مي: بزقر لج عبدالله ..

مهره: عن الحركات ..

مي: ما بتتعشين ..

مهره هزت راسها بـ لا ..

مي: مهرووو ..

سكتت عنها مهره وردت تمشي ..

مي: تعالي رقدي عندي اليوم ..

مهره: مابا  ..

مي: ماقدر اخليج ..

مهره: عبدالله هني .. 

مي رفعت حياتها: ما اثق ..

مهره: عموه .. سكتي عني الله يخليج ..

مي: مهررره .. والله ماقدر انا بسير ازقر عبدالله ..

وقبل ما ترمس مهره او تقول شي .. اتصلت مي ف عبدالله .. ماحبت تزقره جدام الكل عشان ما يحشر الدنيا والباجيين يسوونها حفله .. ثواني ووصل عبدالله ..

عبدالله: بلاها ..

مي: تعبانه بس ماصخه .. ما تبا اتسير المستشفى ..

عبدالله اجدم من مهره: شفيج ..

مهره: ولاشي ..

عبدالله: امبين من ويهج ان مافيج شي .. نشي بسرعه ..

مهره: مابا ..

عبدالله: مب على كيفج ..

مهره ردت يلست: مابا ..

عبدالله اجدم منها وحط ايده على جتفها: قتلج مب على كيفج ..

مهره خذت نفس ودمعت عيونها .. وعصب عبدالله زياده ..

ركض صوب الدرسنج رووم اييب عباتها وسارت مي لبست عباتها وردت صوبهم  .. طلعو برع وكلهم صخو ونسو ابو الاغنيه اللي كانت ف مخهم ..

راشد: بلاها ..

عبدالله ابتسم: ولاشي رد دح انته .. بس تعبانه شوي ..

راشد: الحين ولاشي والا تعبانه شوي .. اعترف ها تتبلى على اختيه ..

عبدالله: ولاشي ولاشي ..

راشد: عيل انتو وين بتسيرون ..

عبدالله: بنسير حديقه .. رد دحححح انته ..

احمد ضحك: صدق شفيها ..

مي: مافيها شي .. بس هذا يبالغ .. هي تعبانه شوي وهو يبا يطمن عليها ..

عبدالله: لا اكثر .. ردو غنو الله يرضى عليكم ..

محمد رفع حياته: ويديه عبدالله .. غنو والله يرضى عليكم بعد كييف ..؟

والكل ضحك عليه .. وهو ابتسم ومشى ساير صوب السياره ويا مهره اللي ماسكنها من صوب ومي ماسكتنها من صوب ..

كانت صدق تعبانه .. وتكابر .. وعبدالله ومي يدرون انها تعبانه .. بس ما بينو جدام الباجيين .. عشان مايسوولهم حفله ثانيه .. خصوصا اخوانها راشد ومايد ومحمد ..

..

ف ألمانيا ..

تمشي وهو يمشي حذالها .. شالين المظلات لان ف اي لحظه .. ممكن ينزل مطر ..

كانت بردانه .. ميته من البرد رغم انها لابسه جاكيت وقفاز وشال .. وبعدها تترقص .. حظنت اديها وهي تنفخ فيهن

حمد: بلاج ..

شيخه: ميته من البرد ..

حمد ابتسم: تعالي ..

سحبها صوبه وحظنها ..

حمد: يوم انج بردانه شحقى مب مااااخذتلج جاكيت غليظ

شيخه: عشان تسحبني جدام الناس جذه وتحظني ..!

حمد: ههههههههههه عادي .. المكان هادي ومافيه حد اصلا .. وكل اللي هني لاهين بـ عمارهم ولا يدرون عنا .. بس صدق مستغرب منج.. قالولج المانيا وف عز الشتا كيف مايايبه وياج جاكيت طويل وغليط ..

شيخه تنهدت: يوم بنرد البيت بقولك ليش ..

حمد: اي بيت ..

شيخه: البيت اللي فيه جحرك ..

حمد: بدت تنغز هـ البنت ..

شيخه ضحكت: ثره ما يهمني ..

حمد: جذابه من عينج ..

شيخه صدت صوبه وهي رافعه حياتها ..

حمد: لا اجوفيني جذه.. ادري بج ميته تبين تعرفين شو فيها الحجره ..

شيخه: عادي والله .. مب مهم .. اذا انته تحسه مكان خاص بك .. وماتبا حد يدخله ويعرف شو فيه غيرك .. ف ليش ادخل ف خصوصياتك انا ..!

حمد: تحسين في خصوصيات بين الحرمه وريلها ..!

شيخه: مادري ..

حمد: تدرين ان ربعي كانو يدخلونها عادي ..

شيخه: عجيب.. يوم ان ربعك كانو يدخلونها عادي .. شحقى ما تخليني انا ادخلها ..

حمد: لانج رافضه اني ادخل حياتج ..

شيخه تنهدت: انته دخلت وخلصت ..

حمد: دخلت اسم فقط .. اما ف الواقع .. لا .. انا حتى مب عارف انتي بنت منو ..

شيخه رفعت حياتها: ماتعرف اسمي ..

حمد: اعرف اسمج .. واعرف ابوج .. بس كنت حاط ف بالي ان عمتج هي امج ..و طلعت عمتج .. واتقولين ان مهره امج لان انتي ماعندج ام .. عيل الحرمه اللي سلمتي عليها وانتي اتصيحين قبل ما انا ادخل منو ..!

شيخه: آمنه خبرتك عنها ..!

حمد هز راسه بـ هيه: وقالو ان هاي امج

شيخه: هاي مب اميه .. هاي ام اخواني .. انا ماعندي ام ..

حمد رفع حياته: كيف يعني ماعندج ام ..

شيخه:انا ماعرف منو اميه ..

تغير شكل حمد .. وعقبها رفع حياته .. وشيخه عطته ظهرها ومشت..

حمد سار صوبها: كيف يعني ماتعرفين منو امج..!

شيخه: يعني ماعرف شو يعني يكون لك ام تحبها اكثر من اي شي ثاني ف هـ الدنيا .. ماعرف شو يعني انك تمرض وامك تكون يالسه عند راسك .. ماعرف شو يعني انك تنجح .. وامك تسحبك لحظنها وهي مفتخره بنجاحك .. ماعرف شو يعني انك تعرس وامك تكون معاك .. تفرح وياك وتبارك لك .. ماعرف شو يعني انك اتسافر وهي ف البلاد تترياك تتصل بها واطمنها بوصولك .. انا ماعرف هـ الشي .. ولا جربت هـ الاحساس .. بس دايما اسمعهم يقولون .. ان الام هي اغلى شي عند الانسان .. ومافي احساس اكبر واعظم من هذا .. ف تخيل شخص فاقد هـ الاحساس وفاقد هـ الحب .. اصلا مب مجربنه ولا يعرف طعمه .. تتوقع بيهتم لـ حجره مب عارف شو فيها .. او بيتحسس من كلام ناس هو مب عارف اصلا ليش ما يحبونه ..!

يلست ع النهر ويلس حمد حذالها وهو ساكت ..

شيخه: انا ماعرف منو اميه  لـ درجه اني احيانا افكر هل ابويه كان ماخذ اميه يوم يابوني.. والا لا ..

حمد جدم اديه .. حطها على ايد شيخه وهو منصدم: شيخه ..!

شيخه: ادري انك منصدم من كلامي .. بس انته ماتعرف شي .. 

نزلت دمعتها .. وابتسمت ابتسامه بريئه جدا عورت قلب حمد ..

شيخه تمسح دموعها بكفها: ومادري عقب هالكلام .. بتتقبل اني اكون حرمتك والا لا ..

حمد اجدم منها: انا ماخذتج عشان اسم ومنصب واهل .. انا حتى شكلج ما شفته يوم رضيت اني اخذج .. تبيني الحينه عقب ماحبيتج واتعلقت فيج .. اودرج عشان شي انتي مالج ذنب فيه ..!

سحبها صوبه .. ولوا عليها ..

شيخه: حمد ..

حمد وهو يمسح على راسها: اووص .. بس سكتي .. والا اقولج صيحي صيحي .. لا ترمسين بس صيحي ..

صفحه من حياتها .. قراها اليوم .. سر من الاسرار اللي كان يقراه بعيونها ومب قادر يفهمه .. عرفه اليوم .. يا الله كيف معوره قلبه هـ البنت .. يوم عن يوم تصدمه بشي يديد يقطع قلب حمد اكثر .. ويخليه يتعلق بها اكثر و اكثر ..

..

ف دبي ..

وصل راشد ..وهو مب عارف وينهم اصلا .. يمشي ويصد يمين ويسار .. لين ما طاحت عينه على عبدالله..!

راشد هز راسه بـ معنى وينها ..!

عبدالله: شدراني .. علمي علمك  ..

مايد: يعني خلاص خلاص .. بستوي خال ان شاء الله ..

راشد: يلس يلس انته ..

عبدالله ابتسم: ان شاء الله ..

مايد اجدم ويلس حذال عبدالله وحط ريل على ريل: شعليك بتستوي ابو ..

عبدالله تنهد: خلها اتقوم بالسلامه قبل .. عقب قولي بتستوي ابو ..

مايد: اييه ياما سمعنا هـ الكلام .. ومن يشوفون عيالهم يتخبلون وينسون حريمهم ..

عبدالله صد صوب راشد وضحك: انته شحقى يايب هذا ..!

راشد: هو اللي يايبني " ويلس" اللوتي .. قال شكل مهرو ونظرات عبدالله ومي .. مايقولون انها بخير .. و مافيها شي .. ركب السياره وقال لي اذا بتي حياك .. واذا مابتي بالطقاق اللي يطقك .. عاد انا مارضيت ان الطقاق يطقني ..

عبدالله ضحك: الله يصبرني عليكم ..

مايد: ويصبرنا عليك .. يعني مسونا ثجال عليك وحاط ف بالك انك وايد خفيف علينا ..

راشد: خيبه مايد ..

عبدالله اشر بإيده بمعنى طاف: متعووود ع هاللسان ..

مايد: ودك انته ان شاء الله ولدك يطلع اخس عني ولسانه اطول عني ..

عبدالله: بسسسم الله عليه ..

مايد وقف: على فكره اشكالكم وايد اتضحك .. ياخي قوموا نسير مطعم .. يوم بتربي مي بتخبرنا ..

عبدالله: راشد الله يرضى عليك .. شل هذا عن ويهي ..

وقف راشد .. مسك مايد من شعره وسحبه صوبه

راشد: انثبر اشووف ..

مايد: اصبر اصبر .. والله لمحت شخص ..

راشد: يللللللس ..

مايد: قسسسما بالله اني لمحت شخص ..

راشد: منو ..

قبل ما يقول مايد اسمه .. شاف عمار وثاني ف ويهه ..

راشد: ههأ اكملللت ..

عمار: سلام ..

مايد: وعليكم ..

عبدالله: عوذ بالله ..

عمار ابتسم واجدم منهم: شو الاخبار ..

مايد: نحن ابخير .. انته اللي .. شو الاخبار ..

عمار: الحمدلله ..

راشد: خير ان شاء الله .. شو عندك ..

عمار: والله انا ياي .. ياييب امايه انتو اللي شو عندكم ..

مايد: انا ياي ياييب عبدالله ..

عبدالله اطالعه بـ طرف عينه ورد نزل راسه ..

راشد: امايه .. هني ..!

عمار: هيه ..

راشد: احلف ..

عمار: والله ..

راشد: يعني هي اتصلت بك قالت لك تعال ودني المستشفى عند مهره ..

عمار: لا وسبتكم سب بعد انته و مايد ..

مايد: ليش ان شاء الله

عمار: شحقى مب مخبرينها ..

مايد: والله مادرينا ان يهمها ..

عمار تنهد: بس زيين ..

راشد صد صوب ثاني: مررحب ..

عمار: رمسه من اليوم لين باجر .. انته بالذات ما بيرد عليك ..

ابتسم راشد.. سحب ثاني صوبه وباسه .. وصاح ثاني ..

مايد: وييه بلاه مستوي حساس ..

عمار سحبه لحظنه: سكتو عنه .. ما يخصكم به

مرت الدقايق والثواني والساعات .. كم ثانيه مرت .. كم دقيقه وكم ساعه ..! الله اعلم من كثر ما حشرو الدنيا وشلو المستشفى على راسهم ..نسوو كم ساعه صار لهم وهم مرتزين ع الكراسي .. رغم انهم طولو .. وطولو وايد بعد ..

وعقب ما خبلو عبدالله اللي نفد صبره وجلبو المستشفى فوق رووسهم بـ حشرتهم .. وعقب ما طفرو ثنوي .. وصيحوه ولوعو جبد عمار اللي كل دقيقه يسكته .. وعقب ما اتصلو بـ اهل المانيا وكانو معاهم بث مباشر من قلب الحدث

طلعت مي من داخل وهي مبتسمه من الخاطر .. عبدالله يوم شاف ابتسامتها .. بند عينه .. ابتسم هو الثاني ووقف جدامها والباجيين عفدو علييها ..

راشد: بشرييييييييي ويا ويييهج ..

مي: جب انته قممم عن ويهي ..

عمار: عموووه ..

مي ضحكت ..

عبدالله: شخبارها ..

مي: الحمدلله .. تستاااهل سلااامتها .. وتستاهل ماياك ..

عبدالله هز راسه: بشري !!

مي: ولد ..

عبدالله بخوف: ولد ..!

مي: ليش كنت تبا بنيه ..!

عبدالله: اقصد يعني .. ولد بس ..!

مي رفعت حياتها: يعني تعرف ..؟

عبدالله: عمووووووووووه رمسيييي ..

مي ضحكت: ولدييين ولديين .. واااااااااي فديييييييييتهم .. يتربووون ف عززك ان شاء الله

عبدالله يلس وغطا ويهه بديه: الحمممدلله رب العالمين الحمدلله ..

مايد واقف وهو منصدم: آآآ يالنذل .. آآ ياللي مافيك خير ..

عبدالله ضحك: بسس زيييين ..

مايد: تووووووم وما تخبرنا ..

عبدالله: شووو كنت بتسوي يعني لو عرفت ..

مايد ضحك واجدم منه: ماشاااااااااء الله .. مبروووووووك بن عمي .. تستاهل سلامت ام مايد ومروان.. 

عمار: خير ان شااااااااء الله ..؟

عبدالله ضحك: الله يسلمك ..

راشد: يتربون ف عزك ان شاء الله ..

عبدالله: تسلم راشد ..

عمار: مبروووك مايااااك ولد عمي .. يتربون ف عزك ان شاء الله ..

عبدالله: الله يبارك فيك ..

راشد: حرووووب حررق تيلفوووني " وحط ع الاسبيكر" خيييير ..

حارب: الخيير بويهك مالت عليييك وعلى ويييهك ..

راشد وهو يكلم اخوانه : اسد بويهه هذا ..؟

حارب: جاااااااااب .. بشششر ..

راشد: بعدها ..

حارب: استغفر الله العظيم .. يلا باي ..

مايد يصرخ: يقص عليييييييييييك .. حروووب الجيناوي .. استوييت خال .. والله ما يليق عليك اللقب .. هـ البياض ويقولون خال ..!

والكل ضحك عليه ..

حارب: احللف ..

مايد: امزح وياك عيل .. فاضي لك انا اختيه تعبانه وانا متصل امزح .. بند بند رشووود

حارب: انا ما اصدقكم انتو الثنينه .. عطوني عبدالله ..

راشد: ارمس يسمعك ..

حارب: عبيييد ..

عبدالله: هلا حارب ..

حارب: انقول مبرووووك ..؟ 

عبدالله يضحك: قووول قووول ..

حارب ابتسم: الحممممدلله ..

مايد: الحين يوم قالك قول مبروك .. قلت الحمدلله ..!

حارب: جببب انتتته شو يابت ..

عمار: ولدين ولدييين ..

مايد: مااايد ومروااان

حارب: عن الجذذذذذذب .. عمار انا مب متعود انك تخرط عليه ..

عبدالله: ههههههه بلاكم مب مصدقيييين بس يلااا بتحسدوون عيالي ..

حارب: اووونه .. فديييييييييت اختييييييه والله .. مبروووك مبروووك عبدالله .. يتربوون ف عزك ان شاء الله..

عبدالله: الله يبارك فيييك .. عقبالك ان شاء الله ..

حارب: يلا يلا خلني اسير ابشر الباجيين ..

وقبل ما يقولون له اي شي .. سد الخط بويههم وركض صوب عمته وباجي اللي يالسين ف الصاله وخبرهم احلى خبر سمعوه اليوم .. او خلني اقول .. احلى خبر سمعوه هـ الفتره .. لان صار لهم مده طويله .. ما سمعو اخبار حلوه ..

هناك .. وين تفتح عينها بكل تعب .. تلمح نظراتهم البريئه .. تدمع عيونها وترد تبندهن .. وامها حذالها .. مبتسمه وهي تمسح على راسها .. وعمتها واقفه مجتفه اديها ..

صدت مي يسار عقب ماسمعت صوت الباب وهو يندق .. وابتسمت ..

مي: تعال ..

بدور: مبروك ما يووك ..

عبدالله خذ نفس: الله يبارك فييج ..

اجدم من حرمته اكثر .. وجدم وييه من الثنينه اللي حاطينهم بحظن مهره .. وابتسم ابتسامه طالعه من قلبه ..

عبدالله : فديتهم انا ..

فتحت مهره عينها .. شافت ريلها .. وردت شافت عيالها .. ودمعت عيونها

عبدالله مسح دمعتها بابهامه: الحمدلله ع السلامه ..

سكتت وماقدرت اترد عليه .. وسكت هو وياها واكتفى انه يمسح على راسها .. وهو يطالع عياله اللي واحد منهم مبند عيونه وراقد .. والثاني فاتح عيونه بـ كل براءه وهو يمص اديه ..

دقايق  .. وعقبها شلت مي واحد وجدمته من عبدالله اللي بدا يأذن ف اذنه ..

الله اكبر .. وكأن الكون كله يرددها مع عبدالله .. الله اكبر وكأن الكون كله .. خر جدام هـ الياهل اللي  ما يتتردد ف اذنه غير صوت ابوه وبس .. وهو يردد كلمات التوحيد ..

الله اكبر الله اكبر ..

لا إلـه إلا الله ..