الجزء الأخير (2)

مهره

ماعندي وقت ارمس فيه .. هـ المشاغبين الثنينه مبهدليني عدل .. واحد البووس والثاني تلميذه.. وابوهم بس فالح يضحك عليهم ويقول لي مايخصج ف عيالي ..

الشي اللي اتغير ف حياتي .. ان اللي زرعتهم ف داخلي .. و انعقدو بقلبي .. وازهرو بهـ الدنيا.. كبرو اليوم وكملو عامهم الثالث .. محمد ومروان .. عيالي اللي ما يبت غيرهم .. عيالي .. اللي ملوو فراغ كبير كان موجود بحياتي .. وشاركو ابوهم قلبي ..

بس لكل واحد منهم .. زاويه خاصه .. و حب خاص .. بداخلي ..

مهره: اسغفر الله العظيييم ..

سيف: حرمت اخويه والله ظمنت الجنه من كثر ما تستغفر بسبب هـ الثنينه ..

مايد: والله فديته مروان .. اهدا عنه ماشي .. اما محمد ف صدقوووني من اسمه .. انتو بس غيرو اسمه .. سموه مايد وجوفو كيف بيتغير ..

مهره: انته غير طبعه الخايس .. وانا من باجر مودتنه المحكمه مغيره اسمه ..

محمد: لا والله ..!

مهره: ههههههه "اجدمت منه" فديتك والله .. امباركن عيدك ..

محمد ابتسم: عساج من العايدين والسالمين ..

مهره: ماعتقد اني اكون من السالمين .. ماااعتقد ..

غانم: ههههههههه وحده مهره ووحده حمده والله كاسرات خاطري هـ الهنتين بسبب المفترسين اللي عندهن..!

حارب: لا اتقولون عن ولدييه مفترس لوو سمحتوو ..!

عامر: عيل شووو ولدك ..

حارب: ولديه ما تعرفون تتصرفون وياه انتو .. والله ف البيت اهدا عنه ماشي ..

فارس: امبيين ماشاء الله يوم ايي هني .. مافي ياهل ما يحصل عظه منه ..

حارب:ههههههههه انته حاقد عليه لانه اخر مره عظ خطييبتك ..

فارس: الا ف خاااطري اعظظظه .. بس لو ايي صوبي ..

حارب: جررب انته بس جان ما صيحت هـ اللي ع ريلك ..

حمد رفع حياته: لا والله .. ماخذ راحتك واتهدد اجوفك ..!

حارب: اووه اسمح لنا نسيناك انته الثاني ..

حمد: والله ولدك مفترس ع قولتهم .. بنتي فديتها شو يخصها تهددهم بها ..

حارب: بنتتتك السخييفه .. اصلا ترفع الضغط .. دلوعه وامصخ عنها ماشي " صد صوب عليا الصغيره وهو معصب" قسسم بالله انا اللي خاطري اعظج مب ولديييه ..

كانت حاطه صبعها ف ثمها بكل براءه .. وفجاه صاحت عقب ما علا صوت حارب..

حارب: اويه آسف آسف .. والله فدييييتج

نزل ولده عن ريله .. ونش سار صوب فارس .. سحب عنه عليا الصغيره ..

حارب: يا حياه خالي انتيي .. والله آآآآسف ..

كنت نازله من الدري .. قبل شموه اللي طردتني عقب ما طردت اخويه وعياله .. ف نص الدرب سمعتها شاله البيت ع راسها من الصياح .. ورغم اني انتبهت ع باب الفله اللي اتطبل .. ودخل منه راشد .. بس ما قدرت اوقف لين ما يتجدم وايي صوبي عشان اسلم عليه .. مشيت عنه بسرعه وانا سايره الميلس..

شيخه: امنو امصيح بنتي ..!

حمد: هذا اللي حاظننها .. وامسوي عمره برييئ 

شيخه: يالسخيييف انته ..

حارب: يا .. يزاااج الله خيير انتي ..

شيخه: يبها ..

حارب: لا مابا .. لازم اسكتها .. حرام بتحقد عليه عقب ..

شيخه: اصلا هي من زمان حاقده عليك بسبب ولدك ..!

حارب: هههههههه .. والله بنتتتج وايد ماصخه ..

شيخه: شكرا يببها ..

حارب: خلها تسكت اول ..

شيخه: لا تحاول وياها .. هاي صدق دلوعه ما بتكست ..

حارب: زييين يوم اعترفتي .. انها صدق دلوعه وماصخه .. وطفسه بعد .. شليها شليها عن اشلها افرها برع .. والله فريت ولديه ع الأرض ونشيت من مكاني عشان اراضيها .. والاخت ذابحه عمرها من الصياح اتقول ذابحينها هي بدال خروف العيد .. شليها شليها .. ماااالت ..

قبل ما يرمس حمد .. او ينش فارس يعفد على حارب .. او اتكرم انا واسحب بنتي عن ريله .. وصل راشد .. روح الطرب والوناسه والربشه .. اللي الكل يفتقد قصايده واشعاره اذا غاب عنهم  ..!

راشد

تبون على قلبي فوق والا قاتلتي تمشي حافيه القدمين ..! لا تغبروني لاااه .. كبرت اليوم وكبرت احلامي وطموحاتي .. هيه نعم طموحاتي ..

عقب ما كان همي الوحيد اني اتخرج من الجامعه .. لحظه لحظه .. خلوني اصدق عمري شوي .. انا راشد بدر محمد .. خريج جامعه الشاارجه الامريكيه .. حاليا موظف في دائره حكوميه بدون واسطه وبراتب محترم جدا ..

اليوم اعيش احلى حياه مع اروع انسانه اختارها قلبي اللي هي ميره بنت خالي ..

انا ماحاربت كثر عمار .. ولا انحرمت كثر شيخه .. ولا حتى انظلمت كثر مروان ومايد .. انا بس حبيت .. وماعرفت كيف اوصل للحب هذا.. ظننا مني ان ميره مش مستوا ابويه واميه .. بس اليوم اكتشفت شو الفرق بين ريم وميره .. وشو المستوا اللي يقصدون به

ابويه عمره ما اهتم للمستوا المادي عشان يحس ب يوم ان ريم مش ب مستوا عمار .. الا انه كان مصر على رايه

لان مستوا اخلاق عمار اعلى عن مستوا اخلاق ريم ..

لان طبيعه عمار وطيبته وحنانه وحبه .. اكبر من انهم يجتمعون مع ريم اللي ماتتمتع بذره من هـ الصفات

راشد: سلااااااااااااااااااااااام ..

عامر: وعلييييييييييييييييييييكم " سكت شويه عقب ما لاحظ نظرات عبدالله" مثلما قلتم

والكل ضحك علييه ..

راشد سار صوب حارب: كل عام وانته بخير ..!

عامر: هذا يعرف آداب المجلس والا ما يعرفه ..

عبدالعزيز:ههههههه وانته ليش مقهور ..!

عامر: يعني انا يمينه .. ودرني وسار صوب اخوه ليش .. ليش يعني .. انا مب تارس عينه ..!

سيف: عشان تعرف شو يعني اخووو .. مالت عليك ..

عليا: عوذ بالله منكم .. انتو ما بتصخون يعني ..

عامر: بذمتج يوم انصخ .. ما تشتاقين لنا ..!

عليا: لا

عامر: شكرا ..

حارب: شويييخ بنتج صمختناااا

شيخه: افف بس اسكت عني .. انته اللي صيحتها  

حارب: حلفي انج اتسكتيني عشان هاي ..

شيخه رفعت حياتها: والله

حارب: لا تخليني اهزبها الحيين ..

فارس: اهزبها .. جان ما ادبببت لك ولدك انا اليوووم ..

عبدالعزيز: حاطين راسهم .. ب راس هـ الياهل ..

حارب: الحين انتو كلكككم ضدي .. عشان هاي ..

منصور: اسكت اسكت الله يخليك .. خطيبها يالس حذالك .. والله بينسى الهيبه والكشخه والرزه الحين وبيستنزل .. ومفاليع شلته بيرزون ويههم وياه حتى لو ما يدرون شو السالفه ..

راشد: هههههههههه صدقك والله .. بس تعالو شلته ناقصه ..!

عامر: هذي هذي اكتملت ..

ابتسم عامر من قلبه .. وهو ساير صوب الباب يفتحه .. عشان يساعد ولد عمه اللي ياي وهو يدز جدامه .. كرسي  .. متحرك .. رغم انه اتوماتك بس روح مروان فضلت انها تبذل من جهدها الخاص لروح ابوها ..

مروان

اووه .. دووري اني ارمس عن نفسي .. سوري انشغلت مع ابويه ..

هيه ابويه ..

عطيته جزء من احساسي مع الجزء اللي عطيته من ظلوعي .. عشان نبض بداخله .. يرجع للحياه اليوم ..! وتشوفونه يالس بيننا مبتسم ..!

بدر ابويه يالس بين هله وعياله والضحكه مرسومه على ويهه

وبعيد عن ابويه .. هناك وين كبرنا عشان ايي اليوم اللي نسرد لكم فيه قصتنا .. كبرنا عشان نحظن مستقبلنا ونكمل دراستنا.. كبرنا وكبرت علاقه الاخوه اللي تجمعنا .. وتقوي رابطه الدم اللي يجري بعروق كل واحد منا

ماقصد عمار ولا راشد ولا محمد وحارب .. ولا حتى اقصد شيخه او مهره

اللي اقصدهم .. هم ربعي .. هم الشي اللي ما يتجزا مني .. هم اخوان فرقني عنهم الاسم .. لكن جمعنا دم واحد يجري بعروق مختلفه .. عشان يقول للزمن ان علاقتنا هاي اقوى من اي رابط ثاني ف الدنيا

هم شلتي .. شله الفساد .. فارس وعامر

كملنا سنتين من دراستنا هناك .. وماباجي لنا غير سنتين وبنتخرج ان شاء الله ..

بدر مبتسم: السلام عليكم..

الكل: وعليكم السلام ..

بدر

ماقدرت اميز اصواتهم ف اذني عقب ما اداخلت ف بعض .. بس اللي قدرت اميزه امبين كل اللي يالسين جدامي .. هم عيالي ..

احساسي ما كان له نصيب ف صفحات هـ القصه .. و موقفي ما كان لهتبرير ف كل اللي قريتوه ..  

ما خبروكم بشعوري ف كل موقف ولا خبروكم عن احساسي مع كل حدث ..

انا كانت لي روح تحس .. بس طلعت من جسدي.. كان لي قلب ينبض .. بس مات .. انا ماتت فيني روح الانسانيه .. مات فيني الاحساس .. مات فيني الضمير .. مات فيني النبض

بـ اي وصف كانت بتوصفني شيخه وهي تسرد مواقفي .. اذا انا بنفسي .. ماكنت عارف نفسي في كل موقف ..

بـ اي احساس بترجم شي بداخلي فقد الحياه .. وبـ اي حروف بتصيغ احساسيس ابوه .. ماتت فيني ..

وردوه عيالي للحياه ..

عامر: شووف عمي .. خلنا حبايب .. بدون مشاكل وبدون عوار راس وصدعه .. عطني عيديتي وخلني اتوكل ..

احمد: انته ما تستحي ع ويهك انته ..!

عامر: آآه ليش استحي .. والله يعني ايوووب اللي بس فالح يلقط الحصا احسن عني ..!

بدر ابتسم: كم تبا ..

مايد: لا .. ويسأله بعد ..!

بدر: اعرف انه ما بيهدني الا اذا عطيته ..

عامر: فدييته والله .. انسااان متفااهم ويايه .. يعني شوف عشان ما اضغط عليك بس .. انته كريم وانا استاهل ..

بدر: انزين ..

حط ايده ف جيبه .. وهو يسحب النوط .. ثواني وجدم خمسين درهم لـ عامر ..

عامر بملامح خاليه من التعبير: هذا شو بالضبط .. صدقه عن روح المرحوم ..!

والكل ضحك عليه ..

عبدالعزيز: تعال انثبرررر هني ..!

عامر: انتو والله بس تحبووون تجرحون المجرووح انتو .. يعني عاملوني بلطف ع الاقل جدام الـ " سكت شويه" البنات يعني

واشر على هند اللي كانت يالسه حذال سعيد وهي تضحك عليه من الخاطر ..

عبدالله: فشلتنا والله فشلتنا ..!

مروان: عاد اتصدق عبدالله .. نحن مووول ما نعرفه.. مجابلين ويهه من 21 سنه .. ومن سنتين نحن نرقد وياه ف بيت واحد .. عرفناه اكثر من نفسنا حتى ..

عامر: وليش كل هـ التعبير .. قول انك تحبني وخلاص ..

مايد: شووو يخصه ..

عامر: جب انته الثاني ..

عليا: لا اله الا الله ..

بدر: هههههههه بس بس صخووو " سكت شويه" وين الكتاكييت ..!

وقبل ما يكمل كلامه .. او يتبع كلمة كتاكيت بـ اي اسم .. اتجدمو منه التوام عيال مهره .. واحد صعد ع ريله بكل هدوء وبدا يتعبث ب ازرار الكرسي .. والثاني يالس ع الأرض .. وهو مثبت ايده ع ريل يده ..

عامر: الله .. الصراحه هالثنينه .. مب مخلين حد .. ما حاشمينه ..!

مهره: هههههههه حسييييييت .. والا حسيييت .. قسما بالله مفشليني .. بس راقب الحركات .. واحد الاستاذ والثاني تلميذه ..

عامر: استحوو يا بابا استحوو ..

عبداللله: ما يخصك ف عيالي ..

مايد: انا خاطري اسمعك اتقول غير هـ الجمله .. كل ما قلنا شي عنهم .. قال ما يخصكم بهم .. بدال ما تعطيهم كف يدوخون ويرقدون عشان يفكونا من حشرررتهم ..

عبدالله: وشحقى كل هذااا.. اذوووك حشروووك .. كفخووك ..!

مايد: واترياهم يكفخووني عشان اعطيهم كف ..!

بدر: خلووهم خلووهم .. مستانس وياهم ..

سيف: بلاك ما عرفتهم عميي.. لو عرفتهم عدل جان شليتهم وفريتهم برع ف جدول الماي .. يخمهم ايوب ويكفنا منهم ..

مهره: هههههههه حرام عليكم والله .. محمد مرواان .. تعالو هني ..!

نش مروان بكل هدوء وسار صوب امه .. اما محمد ف بعده يالس ..

مهره: مستحييل .. هالانسان بديت اشك ان عنده مشكله ف السمع .. والله لو تتامرون عليه لين باجر ولا بيسوي لكم سالفه .. استغفر الله ..

نشت من مكانها .. مسكت ايد ولدها .. وسحبته عن ريل ابوها ..

مروان: يعني الكلام ما ينفع معاه .. لازم فعل ..!

مهره: هذا اصلااا ما يفهم ابدا .. 

مروان : زين خبرتيني .. بتشوفين عيل فعلي معاه ..

عبدالله: هييه .. انزين وانا اتريا ..

مروان: هههههه عيل اكلمه ويطنشني .. كففف والله

بدر: وين ثاني ..!!

كان واقف ف نص الميلس يوم سمع اسمه .. وقبل ما يصد صوب الشخص اللي زقره .. ركز ثاني عينه ف عين ابوه .. وكأنه يقول له " قم تعال ويايه "

وبلغه .. متصله بين قلبين .. نش عمار اللي فهم نظرات ولده .. مسك ايده وهو ساير صوب ابوه ..

بدر مد ايده: شخبارك ..

مسك عمار ايد ثاني وجدمها من بدر .. عشان يشبك ايد ولده ف ايد ابوه ..

ثاني: بخير ..

بدر جدم ايده الثانيه عشان يشله: تعال ..

رفعه عمار ويلسه على ريل ابوه  ..

بدر: وين البيبي مالكم ..!

ثاني يدورها بعيونه: عند عموه عليا ..

بدر: اتحبها ..

ثاني: واااااايد ..

بدر: قد شو ..

ثاني: قد الدنياااااااااا ..

بدر: وابوك ..!

ابتسم ثاني بدون ما يرد على بدر .. ابتسامته هاي كانت كافيه انها ترد عليه وتوصل احساس لبدر ولكل اللي يالسين ف الميلس .. بـ ان ثاني .. مب بس يحب ابوه .. ثاني يعشق روح ابوه اللي موجوده بجسده ..!

بدر: انزين وين البيبي .. سر يبها .. ابا اجوفها ..

نزل ثاني عن ريله .. وسار صوب عليا .. وقف جدامها وسكت شويه ..

ثاني: ماقدر اشلها بعدين بطيح " صد صوب ابوه" بابا تعال شلها ..

ضحك عمار على براءه ولده .. نش من مكانه وسار صوب عليا خذ بنته من ايد عليا عمته .. وهو ساير صوب ابوه ..

نزل بمستوى ريوله اللي فقدت احساسها بالحياه .. وحطها ..

بدر مسح بيده ع ويهها: ماشاء الله .. ربي يحفظها " رفع راسه" وين امها عيل ..!

عند بدايه الميلس .. صوب الباب .. سمعو صوتها وهي ترد عليه ..

شمه: هني امها ..

ابتسم بدر وهو يرفع بنت عمار عن ريله .. وكانه يقول حق شمه تعالي خذيها .. اتجدمت منه شمه .. نزلت بمستواه وشلت بنتها .. بس قبل ما ترفع عمرها .. وقفها بدر .. طلع من جيبه ظرف .. وحطه بين قماط بنتها ..

عامر كفخ يبهته: هـ المشهد ليييش ما حذفتوووه من الفلللم .. يعني بس تحبووون تجرحوون انتو ..

ضحك عليه بدر من الخاطر .. والكل ضحك وياه .. عقبها خذت شيخه نفس وهي سايره صوبه ..!

بدر: لا عاد هااي .. ما نقدر انقول لها شي ..

حارب: شفتي .. حتى ابويه يقول ان بنتج سخيفه ..

بدر: لا حشى ما قلت هـ الكلام ..

حارب: قول قول عادي .. لان هذا الصدق ..

سار صوبه وهو شال ولده ..

حارب: والله راقبو اللقطه ..

اجدم حارب من ابوه .. وحط ولده ع ريل ابوه .. حذال عليا الصغيره اللي من جافت خالد الصغير وهو ييلس حذالها .. سحبت عمرها صوب امها وهي خايفه ..

حارب: بذمتكم هاي مب مااصخه ..

غمضت عليا عينها وتيودت ف ايد امها .. ثواني وصاحت عقبها ..

حارب: ههههههههه والله خاااطري اصفعها ..

شيخه شلت بنتها: والله ولدددك مسبب لها رعب ..

بدر: هههه ليش عاد ..

شيخه: ماصخ .. كل ما يشوفها يتذكر ظروسه اللي توها بدت تظهر .. ويقويهن ع بنتي ..

بدر: ههههههه الله يحفظهم ..

مايد: امايه وينها عيل ..!

حرك مروان شفايه عشان يرد على اخوه اللي سكت الكل بسؤاله .. بس حركه بدور كانت اسرع من رد مروان .. وهي ماده أيدها لـ مقبض الباب وتسحبه عكس اتجاهها .. عشان تفتحه ..

اتجدمت وهي لازالت ماسكه الباب بيدها اليمين .. دخلت .. ومن وراها .. كانت ماسكه بنت اخوها بيدها اليسار ..

بدور: السلام عليكم ..

مايد: مرررحب مرررحب .. لا سلام على طعام عموه حارمتنا منه عشان يكتمل العدد دخييلج دخلي بدون ما تسلمين قسسما بالله ميت من اليوم ..

ضحكت بدور .. وكل اللي ف الميلس ضحكو وياها ..!

دخلت وميره دخلت معاها .. بنفس البراءه اللي عرفتوها بها .. بس هـ المره كانت ورده .. فقدت الأرض اللي انغرست بها طول عمرها ..

بدور

بيدي مسكتها .. عشان اقول لها .. ان هـ المره .. لو تخلى عنج العالم كله .. انا ما بتخلى عنج .. حتى لو ما كنتي حرمت ولديه ..

لانها بنت اخويه .. اخويه اللي جفت حبه بعيون عليا .. جفت خوفه ونبضه وروحه .. جفت احساسه .. جفت حزنه .. جفت ألمه ..

باليوم اللي طاح فيه بدر .. ويت فيه عليا اخته المستشفى .. عشان تصدمني برده فعلها رغم كل اللي سواه .. استوعبت حزتها ان كل شي ف الكون يتعوض .. الا الاخو .. عرفت ان كل شي ف الحياه له مثيل الا الاخو ..

اخوي .. اللي غرس روحه .. بروح ميره بنته .. حافظ عليها طول عمره .. لين اليوم اللي سلمها ف ايدي عشان يقول لي فيه .. ان بنته امانه عندي .. وسلم هو .. امانته .. لرب العالمين ..!

عامر: ام ام ام ..

احمد: جب .. قبل ما تكمل جملتك ..

سعيد: انته انسان .. تركض ورا التهزيئ ..

عامر: انزييين ما خليتووني ارمس .. قسما بالله مابا عيديه .. وكنت بقول لها ام شيخي مطوع .. يمكن قلبها يحن اكثر وانا اربطه بالدين .. عشان تحس ان في كائن حي هني ميت من اليووع وتدخل بدون مراسم العيييد .. والا شو رايك مايد .. مب هزلت ..

مايد: اسكت .. هزلت وخلصت .. وماتت من اليوع بعد ..

عامر: بس ويين اللي يحس ويين ..!

بدور: يعني افهم من كلامك اني .. اسير من ويين ما ييت ..!

عامر: لا .. افا علييج ام عمريييك

احمد: استغفر الله العظييم ..

عامر: انته ما اتفك عمرك وتتبرا مني ..!

منصور: خالي احمد وده اليوم قبل باجر..

عامر: والله ما يخليني اركب جملتين على بعض .. كل ما قلت شي سكتني

خالد: هههههههههه يا وييه استح ..

بدور: هههههه وين سميتي ..!

راشد: يعني امايه .. سلمي انزين ع الاقل ..

بدور: اول شي اشوف سميتي .. وعقب اسلم عليكم ..

راشد: لا والله لعبببببببببببببببها صحححح هـ العمار ..

ضحك عمار وهو يراقب بنته اللي شلتها شمه وودتها صوب بدور ..

بدور: علني فدااا هـ الويه .. ياربيي .. الله يحفظها ..

عامر: ثرررنا .. كائنات حيه نحن بعد ..

بدور: ههههه دخيلكم حطو الغدا فكوونا منه هذا .. بدون شي وانا ماتحمل رمسته بعد يوعان ..!

عامر: شو قصدج يعني .. انا انسان لا أطاق ..!

بدور :انا قلت جذه .. ؟؟!!

عامر: عيل شو قصدج انج ما تتحملين رمستي ..

بدور: اقصد ان دمك من كثر ما هو خفيف .. يخليني اضحك بدون شي .. هـ المره يوعان بعد ..! بتعق الرمسه بدون حساب .. وانا بيلس هني بضحك عليك ..

عامر: انزين ام عمريك يعني كم مره بتعيشين انتي .. حياه وحده الا هي .. اضحكي اضحكي .. وخلي همومج على الـ.....

وقبل ما يكمل كلامه .. سحبه ابوه صوبه ويلسه ع الكنبه ..

احمد: اسكت .. بس اليوم .. دخييلك يا عامر .. بس اليوم ..

عامر: وباجر بتقول لي بس اليوم واللي عقبه بس اليوم .. وطويل العمر بيسافر ويا حرمته وبتحرمونهم من وناستي ..

حمد: ههههههههه منو قال ان ننحرم منك .. وانته تخلينا نشتاق لك ..؟ كل يومين عافد صوبنا ..

عامر: والله انا والا هذاااا " اشر ع فارس" ميييت ع بنتكم .. ياخي خلونا انوديها ويانا لندن .. شحقى هـ الخساير كل يوم ظاربين خط ويايين عندكم .. ياريييت لو ع شي يسوا بعد .. من زييينها الخسسسفه..

هني بس .. انجبر حمد يسوي حركه .. الكل ميود عمره عنها من الصبح .. احتراما لـ طقوس العيد .. بس عامر وين يقدر يخلي الواحد يمسك اعصابه ..

من مكانه .. شل حمد المخده وفرها على عامر من خاطره .. وفارس اللي كان ناوي انه ينش له.. ضحك من خاطره على حركه حمد اللي امبين من شكله انه كفخ عامر .. من قلبه وهو معصب عليه ..

ضحكو .. وعلقو .. و هـ المره كلهم وقفو ف صف حمد .. باستثناء شخص واحد

نش عمار عقب ما رن مبايله وانتبه ع الرقم .. رفع راسه يجوف كل اللي جدامه .. وهو منبته انه ما يقدر يرد ع المكالمه وهو بينهم ..

شل بعمره وسار برع .. وسار عبدالعزيز وراه .. بس وقف من بعيد .. يراقب صمته رغم انه يرمس .. بس ف داخله شي ساكن من الاحساس ..!

بند .. يا صوبه وهو ياخذ نفس ..

عبدالعزيز: ريل امه ..!

عمار: هيه ..

عبدالعزيز: بيودونه اليوم ..!

عمار: عقب الغدا .. انته شو عندك طالع ..!

عبدالعزيز: ماشي .. حسيتك متوتر قلت بطلع اجوفك ..

عمار ابتسم: ماعلييك .. مافيني شي ..

عبدالعزيز رد له الابتسامه: الكل يجوف ان مافيك شي .. بس انا ادري ان كل يوم يسير فيه ولدك عنك.. تحس فيه بالحزن ..

عمار خذ نفس: لاني كل يوم .. اتعلق فيه اكثر عن اليوم اللي قبله ..

عبدالعزيز: عندك حرمه وبنت الحينه..!

عمار: هههههههه ادري .. بس فرحتي الاولى غيير ..

عبدالعزيز بنص عين: ياريتك كنت حاس من البدايه انه فرحتك الاولى ..

عمار: استغفر الله .. انته بتردنا للايام الخوالي الحييين ..!

عبدالعزيز: لالا .. بس انته وايد اتحب الدراما شكلك .. طوف انسير ..

وقبل ما يتحركون سمعو  من وراهم صوتها وهي اتقول لهم ..!

مي: يعني مندمجين ع الاخر .. لدرجه انهم ما حسوو بوجودي .. على قولت عامر شو هـ الاهل ..

عمار: هههههههه انتي يايه جنج نمله ويا بنتج .. قسما بالله ولا حسينا بشي ..

مي: من سوالفكم .. اعترفووو .. كنتو مندمجين ب شوو ..

عبدالعزيز: سوالف خاصه ..

مي: لا والله .. شووو .. ان شاء الله قررت اتعرس ..

عبدالعزيز خذ نفس: لا لا اطمني .. بعدني عند رايي ..

مي: الله يهديييك بس .. انسان ياائس من الحياه لابعد حد ..

عمار: وانا ادري عنه .. جوفنا جدامك .. اثنين .. عشنا اتعس حياه زوجيه بس الحمدلله .. اليوم نحن اسعد اثنين .. والا شو رايج عمتيه العزيزه..

مي: رايي من رايك ولد اخويه ..

عبدالعزيز: انا الله مثبتني وحافظني من صدعه العرس وبلاويه .. ف لا تخربون مخك ..

عمار: انته مخك من زمان خربان ..

عبدالعزيز: ياريااال اسسستح .. عمك انا ..

ضحك عمار وهو ساير صوب مي ..

عمار: كل عام وانتي احلى مي ف الوجود ..

مي رفعت حياتها: ليش تعرف مي غيري ..

عمار: عوووذ بالله منك يا بليس .. عمووه انتي ليكون اتكلمين ريلج جذه .. والله بتضيعينه مره ثانيه .. ياخي الريال اتغير .. حسسيه انج واثقه فيه مب كل ما قالج احلى مي قلتي له تعرف غيري ..

مي: ههههههه وليش احترررشت والله بس اسولف ..

عمار رفع حياته: لا تسولفين معاه جذه ..

مي: لالا .. ما اسولف عن هـ الخربطان ..!

عبدالعزيز: امباركن عيدج ام نوره..

مي: عساك من العايدين والسالمين ..

عبدالعزيز نزل بمستوى نوره: بوسه بوسه بوسه حق خالي ..

نوره ابتسمت وباسته ع خده

عبدالعزيز: فدييت اللي تستحي والله " وشلها"

عمار: وين رييلج ..

مي: اتاخرنا وايد اليوم .. سرنا سلمنا على امه .. يا هني .. نزلني وقال بيمر اخوه شوي .. بيسلم عشان ييلس وياكم ع راحته و ما يضطر يطلع عنكم عقب الغدا ..

عبدالعزيز: خسنا من الحرر انزيين .. يلا انسير داخل ..

مي: شو مطلعنكم برع انتو .. اصلا عن شو كنتو ترمسون " رفعت حياتها" اعترفو كنت اراقب تعابير ويوهكم اللي امبينه ان فيكم شي ..!

عبدالعزيز: موضوع عادي .. بس ولد اخوج وايد حساس ..

مي: اللي هو ..

عبدالعزيز: عقب الغدا بيودي ثاني عند امه ..

سار عبدالعزيز بدون ما يتريا رد مي .. او تعليق عمار .. اللي خذ نفس وصد عن عمته وهو يتجدم خطوه عشان يحلق عبدالعزيز..

مي: عمار ..

عمار ابتسم: مافيييني شي .. والله بس اخوج مكبر الموضوع ..

مي: اعرفك عدل ..

عمار: وانا كل واحد ايني يقول لي اعرفك عدل ..!

مي: هههههه مب كثري ..

عمار: وشو اللي تعرفينه فيني عدل ..!

مي: اعرف انك مهما حبيت ..ومهما تعلقت ب ناس .. ومهما حاولت اتعيش حياتك .. يظل ثاني غير ..

ابتسمت  .. رد لها عمار الابتسامه .. ومن داخله شي .. فقد الاحساس بهالحياه .. عقب ما اتصل به سالم .. خبره ان وقت وجود ثاني معاهم اليوم .. خلص

خلص وقته .. وخلصت اوقاتهم .. وخلصنا نحن ..

خلصو هم .. ويا دوري ارمس .. يا دوري اختم قصتي اللي بديتها معاكم ..

مافي شي يخصني .. ماعرفتوه عني .. سردت لكم ابسط الفراغ اللي بداخلي .. وفضفضت عن كل احساس كتمته ف قلبي وحتى اللي ف اعمق مكان بروحي .. سبحتو  فيه وعرفتو عنه ..

الا شي .. واحد .. هو الطيف اللي ف حياتي ما تخيلته ..

يوم شفتها .. ماحسيت بـ اي احساس .. ماحسيت بالشوق .. ماحسيت بالحب .. يوم شفتها .. نسيت الدنيا كلها واتذكرت شخص واحد بس ..

اتذكرت ابويه ..

ابويه ما ظلمني .. ابويه ارحم انسان عرفته ف حياتي .. لانه ما خلاني لها اكبر وادمر بتربيتها .. اذا كانت بتربيني اصلا ..

ابويه عرف كيف يحافظ عليه.. ابويه حب شرات ما حبيت وتألم شرات ما تألمت .. بس الفرق بيني وبينه .. اني عشت حياتي مع ريلي وقدرت انسى لان ما عندي شي جدامي يذكرني به .. اما ابويه ف كان عنده قطعه من قلبه .. كل لحظه تذكره بها .. تذكره ان في انسانه حبها من كل قلبه وخانته ..

وهالقطعه كانت انا .. 

ايام من حياتي اليديده .. سردتها لكم .. حياتي مع نفسي .. حياتي مع اسرتي الصغيره بين ريلي وبنتي .. حياتي مع اهلي اللي تجمعهم البيوت الثلاث .. وحياتي من موقف جمعني ب اميه .. اللي عشت طول عمري اتمنى لو اعرفها .. ويوم عرفتها .. تمنيت لو اني .. ما تمنيت ..!!

حياتي بدت من يوم ميلادي .. وانتو بديتو تقرونها بيوم ميلاد قلبي .. حياتي .. وقفت عند كذا محطه .. عرقلتني و كسرتني .. وانتو تعرفتو عليها .. باليوم اللي انكسر فيه قلبي .. حياتي بدت عند اول دمعه بريئه نزلت من عيوني .. واول صرخه طفوليه طلعت من داخلي .. عشان تثبت تاريخ هذا اليوم .. من كل عام .. بـ انه يوم ميلادي ..

وانتو قريتو حروفها مع اول دمعه نزلت على خدي ممزوجه بـ ملوحه الألم  .. وعشتو معاي تفاصيلها .. مع اول صرخه طلعت من داخلي .. حطمتني .. وحطمت كل الاحاسيس الحلوه اللي انولدت معاي قبل لا تلوثها ايامي ..

قصتي .. هي مجرد مواقف مرت بـ حياتي .. مع هـ الناس اللي حبيتهم وحبوني .. قصتي .. مجرد احداث يمكن تمر ب حياة اي انسان ..

لكن بحياتي انا ..

كانت بطولتها شيخه بدر .. زمانها.. يوم ميلاد قلب .. خسر فرحه بهـ الدنيا .. مكانها .. البيوت الثلاث .. والحب اللي انولد بينهم .. حدثها .. كل حرف قريتوه .. وكل الم عشتوه .. وكل واقع تمنيتو لو كان بحياتكم واقع ..

وعنوانها .. خلني بعطيك من عيني دموع .. 

لاني حبيتهم .. لاني عشتهم وعايشتهم .. لانهم جزء من روحي .. وانا جزء من واقعهم .. لاني شخصيه ف حياتهم .. وهم حياتي بـ اكملها ..

ف كان مش ولابد مني .. اني اعطيهم من عيني .. ولو دموع ..

حاولت أنسى

الجزء الأخير (1)

بضع واربعون من قصه دموعي قد رحلو مني .. ولم يبقى الا الفصل الاخير .. اغزل فيه من خيوط الحرف حلما .. بات اليوم واقعا .. بعد مرور سنه من عمر آخر الفصول ..!

51

برفقه شي من خيالي .. اللي قدر يصرق طيفها

ويرسم لها صوره ف داخلي .. بدون لا يكون لقلبي اي نصيب من ملامحها اللي ماقدر انه يتخيلها ..

وفي زاويه .. تعصف بحزن .. وهي تصرق من قلبي ألم

بعثرته بـ اول زاويه حظنت فيها نفسي ف أول موقف سطرت حروفه لكم بدون لا تفهمونه 

كانت بدايتي .. بدايه الحزن اللي غرس نبتته بداخلي

وبدا يسقيها من دمي .. عشان يسطرني قصه قرتها روحكم ..

بـ عنوان .. ماكان غير الحب مشحون بمعانيه ..!

عشان يكتب بمحتواه اول حروف حبي .. لـ روح .. عشقتها  روحي

ايام عشناها .. بكل سعاده .. بكل فرح.. بكل حب

ايام .. وهبتنا من ايامها حياه .. وخذت حياتنا من روح ايامها

ف ليله بارده ..!

حظنت فيها نفسي بنفس الزاويه .. بعد ما سردت لكم .. قصه حب

انتهت قبل لا تبتدي ..

عشان استبدل عنوان هالحب .. بـ قصه .. سطرت من دموع عيني .. عنوان لها ..!

بنجوم

فقدت لـ نورها

وبـ شوق ..

هدم آخر ذره صبر ف داخلي

داخلي

اللي بدت تصرخ لـ روح عشقها الحزن

وهي ..

عشقت الطعن عقب ما خدرها الالم

عشان يتوالى نزيف الحزن .. ويقلب عنواني ..

لـ عنوانين مبطنه ..

لـ ألم ..

لـ أمل .. راحل

لـ غياب .. صار كـ أمواس .. استصعبنا الهرب منها ..

لـ شوق بنى قصوره

عشان تصرقها الريح.. واتيبها الذكرى في كل وقت ..

اعتذر .. لكل شخص قرا سطوري ..

اعتذر لكل شخص .. جبرته حروفي .. انه يذرف دموعه مع دموع قصتي ..

قريتوها في بدايه قصتي .. بدون لا تفهمون منها شي

واليوم اكررها .. عشان امسح الضباب اللي منعكم تقرون حياتي بـ اقل سطور دونتها في اول صفحه من حياتي وارجع اليوم اعيد صياغتها في نهايتها ...

شيخه بدر ..

..

من بعيد .. كنت اراقبهم وهم يايين صوبي .. مب قادره اركز عليهم.. مب قادره المح طيفهم .. او ادقق ف تفاصيل ملامحهم .. مب قادره روحي انها تصرق شي من انفاسهم .. عشان اتريح لي انفاسي ..

خبرتني اللحظه .. بـ ان روحي بتحظن روحهم فيها .. ف جبرت نفسي اني اغطي ويهي ب أديه الهنتين وانزل راسي .. عشان ما اجوف شي ..

اتبطل الباب .. انحط شي بكل حنان على ريلي .. ورد اتسكر .. ثواني .. ورد الباب اتبطل .. بس من الصوب الثاني .. ركب .. وهو يضحك من الخاطر على اللقطه ..

حمد: وياااا راااسج .. بتطيييح البنيه .. وانتي مغطيه ويهج بيدج ..

شيخه: مابا اجووفها ..

حمد: جوفيها جوفيها .. ما بتنصدمين..

شيخه: اصلا انا منصدمه قبل ما اجوووفها .. منصدمه من مخييي .. كيف رضا انه يطرشها وياك ..

حمد: فتحي عينج .. عشان تثبتين لـ مخج .. ان ريلج قد الثقه ..

شيخه: حمممد والله مابا انصدم ..

حمد: انزيين فتحي عينج .. عشان ما تنصدمين ..

شيخه: بسم الله الرحمن الرحييم ..

حمد: يالحركات يلا ..

جدمت ايدي قبل ما افتح عيني .. ومسكتها بكل حنان بس عشان ما اطيح .. عقبها رفعت ايدي شوي شوي لين شعرها .. وانا اتحسس اذا في شي ممكن يصدمني والا لا ..!

حمد: يعني من طول شعرها الحييينه عشان تتحسين .. يلا عاد ..

بنص عين .. شفتها .. واتاكدت ان كم خصله من جدام .. مقصوصات بشكل مرتب .. انا متعوده عليه ..

خذت نفس ابين له مدى راحتي من اللي جفته لين الحين .. رد ضحك وهو يحرك السياره .. وعيوني تراقب توتره عقب ما بلع ريجه وهو يستهبل ..

وهي يالسه على ريلي .. لفيتها بكل رقه وانا قاصده ان ظهرها يكون صوبي عشان اجوف شعرها من ورا .. بس رفضت انها اتشل عيونها عني رغم اني غيرت يلستها .. فضلت اتثبت راسها صوبي .. وهي مركزه عيونها بعيوني .. بكل براءه ..

شيخه وهي حاظنه ويهها: فدييت هـ العيووون انا ..

بمجرد ما سمعت جملتي .. شي طفولي ف داخلها اتحرك .. وترجم حنان الامومه بروحها .. بدت اتناقز بشغب وهي اتمتم بحروف طفوليه ما افهمها .. بس كافيه روحي انها تتشبع من الحب الطفولي اللي تهديني اياه ..

شيخه: انزيين يلسي شوي خليني اتفاااهم مع ابووج ..

حمد: هههههههه ما تباااج تهزبيني .. بيبي قولي حق ماما .. نو نو نو

وبنته معاه بعد .. رفعت اديها الهنتين .. وهي حاظنه كل صبوعها باستثناء السبابتين اللي رافعتنهن وهي تحرك اديها بويهي .. ماده البوز وهي اتقول لي بكل طفوله " نو نو نو نو "

شيخه: والله انك ماصخ وبنتك امصخ عنك .. حممممد شو هالاستااايل البايخ هذااا ..

حمد: هذا يزاااي .. ثلاث ساعات يالس ف الحلاق اتريا الاوادم ويا عيالهم .. انا ابا افهم .. الناس يعني ما يتذكرون كشه عيالهم الا ليله العييد ..!

شيخه: ليش انته اللي متذكر قبل يعني ..!

حمد: وانا اقد انسى شي يخص بنتي ..! متذكر بس مالحقت ..

شيخه: هم بعد ما لحقو ..

حمد: انا حاله استثنائيه .. لين ما خلصنا امور السفر وترتيبات العيد .. ظاع وقتنا

شيخه: هم بعد لهم مشاويرهم اللي ظيعت وقتهم ..

حمد: وانتي شحقى ادافعين عنهم .. يقربون لج ..!

شيخه: اخواني ف الله ..

حمد: لا والله .. وانا ريييلج ف الله وسنته ومب راااضيه عليه حظرتج ..!

شيخه:اسسسكت عني .. والله معصبه منك .. آخر مره ف حياتي اطرششها وياااك .. مسوولي اياها ولد ويايبنها .. والله لايعه جبدي من كشتها ..

حمد: لو سمحتي لا اتقولين عن بنتي كشه ..

شيخه: سوق سوق الله يخليك .. انته وبنتك .. محد بيخبل بي غيركم .. اففف ..

حمد: ولاااا تتأففين ..

رفع ايده .. وبكل هدوء .. شل الايفون وعطاه في ايد بنته ..بدا يسوق وانا بديت انقل نظراتي بينه وبين بنته اللي يلست ادقدق ف الفون وهي مستمتعه بالموضوع بدون لا تدري شو السالفه ..

حطيت ايدي ع يبهتي وانا متذمره من تصرفه .. وهو يراقبني بطرف عينه ويضحك ..

متعبني هـ الانسان .. انا بدال ما اربي وحده .. قاعده اربي اثنين .. اربي بنتي اللي توها تتعلم اساسيات الحياه .. واربيه هو .. اللي ما يعرف شي عن اساسيات التربيه ..!!!!

وصلنا البيت .. والاخ ما كلف على عمره انه ينزل الخرايط اللي ف السياره .. كل اللي سواه انه ياا صوبي وسحب بنته عن ريلي ..

شيخه: وتترياني انا انزل الاغراض ..!

حمد: محد قالج اتنزلين شي .. خليهن .. الخدامات بينزلن كل شي ..!

وسار ..! وخلاني يالسه مكاني وانا رافعه حياتي مستنكره حركته .. بس هـ المره .. وانا معصبه صدق..

نزلت ..ومشيت وراه بدون لا ارمس او اعلق ع الموضوع .. اجدمت وياه من الباب .. حط ايده ع المقبض وهو يفتح الباب بكل هدوء و بكل هدوء اتجدم ..

كان الظلام مبعثر سواده ف المكان .. والهدوء .. فارض سيطرته على كل زاويه .. بدون لا اسمع حشره خواته اللي تعودت عليها .. بدون لا تستقبلني دعوات امه وهي تسحبني لحضنها .. بدون لا المح ضحكه ابوه وابتسامته ..

دخلنا .. وعقب ما اتجدمنا خطوتين .. لمحنا ع يمين الصاله .. بقعه .. منوره فيها شمعتين .. رفعت حياتي وانا مستغربه من الوضع .. ثواني .. وسمعت حشرتهم .. بصوت يردد ..!

Happy bairth day 2 you

ونقع المدفع الملون فوق راسنا ..

حمد: خير خير شو مستوي ..!

آمنه: فدييييييييييييت الـ نيووو لوووك انااا    

شمسه: انته اسكت .. وبنجوف الخير .. اما اذا رمست .. ف صدقني الخير ما يدل بيتنا ..

حمد: انا ما قلت لج اني مابا اجوفج واعيه يوم برجع ..!

شمسه:ان شاء الله عمي .. بس سامحني هـ المره نسيييت ..!       

حمد: بسسس سكتي ..

اتجدم من الكيكه وهو شال بنته .. واتجدمت انا معاه .. وانا اخذ نفس كل ما وضحت لي الصوره اللي ع الكيكه ..

  وصلت عند الطاوله .. ووقفت بالضبط جدام الكيكه .. ابتسمت وانا اخذ نفس .. وعيوني تراقب ملامح الطفوله اللي ع الكيكه ..

نفس الروح اللي كانت مغروسه بروحي .. نفس النبض .. اللي كان ينبض بين احشائي .. نفس الامل اللي انولد مني .. عشان يولد لي الامل .. نفس الابتسامه .. اللي طلعت من داخلي .. عشان ترسم لي الابتسامه ..!

هي فرحتي .. هي .. سعادتي .. هي ضحكتي .. هي دمعتي .. هي عيوني ..

هي .... عليا بنتي ..

نزل حمد بمستوى الكيكه وهو حاظن عليا الصغيره ..

حمد: فديييت هـ الويه انا .. جوفي بابا ..

جدمها اكثر .. لين ما حطت صبعها ع الكيكه .. ويلست تتامل الكريمه اللي خيست أيدها

شمسه: انتتته طفس وبنتتتك اطفس عنك .. الله ياخذ بليسج ان شاء الله ..

حمد: لا ادعيين على بنتي الله ياخذ رييلج ..

شمسه رفعت حياتها: بسم الله عليه .. الحييين ما رضيت على بليس بنتك .. قمت ودعيت ع ريلي ..!

وديمه: هههههه والله ما تستحيين .. جي تعرفينه ..!

شمسه: يعني لازم اعرفه عشان ما ارضى عليه ..!

ام حمد: صدعتوونا .. بس صخوو

حمد: عاد مادري منو بياخذج .. لو تحلمين من اليوم لين باجر بواحد شراتي ما بتحصلين ..

شمسه: شووو ابا فييك .. من زينك عشان اخذ واحد شراتك .. خسييي والله

حمد: خسى قدرج يا اللي ما تستحين ..

شمسه: امايه .. سكتييييي ولللدج ..!

خوله : بس جبببببببببب صدعتونا " وقفت ع الكنبه وصفقت عشان الكل ينتبه" بما انكم بتسافرون يوم الاربعا للاسف .. والله اعلم متى بتردون .. وكم شهر ما بنجوفكم .. وبما اننا بنفتقدكم  .. وباجر العيد يعني ابدا ما بنلحق نيلس وياكم ونشبع منكم .. ف اسمحولنا على هـ الحفله البسيطه اللي سويناها حقكم وحق  احلى علايه ف الوجود

حمد: شكرا شكرا .. اخجلتوني ..

وديمه: محد ياب طاريك .. قالو عليا ..

حمد: عادي ماشي فرق بيني وبين عليا ..

شمسه: قم قم .. مصدق عمرك .. يوم بتكون بنتك عقب اتفلسف ..

حمد: لااا بنت اليران .. اتصدقين " وقف" وين ابوويه ..

آمنه: من العام ساير .. قال دقيقه وبرد .. كمل اكثر عن 10 دقايق ولا رد ..!

ام حمد: وحده منكن تنش تزقره ..

شيخه: انا انا بزقره ..

نشيت .. سرت صوب الحجره ودقيت الباب ..

سلطان: تعالي شيخه .. تعالي ابويه ..

ابتسمت ودخلت ..

شيخه: كيف عرفت اني شيخه ..

سلطان: كل وحده من بناتي .. لها دقّه خاصه ف اذني .. اعرف اميز بينكن من دقه الباب ..

شيخه ابتسمت: فديتك والله .. شو تسوووي ..

سلطان: يقولون يوم ميلاد بنت حمد اليوم ..

شيخه: لالا مش يوم ميلادها .. هي قبل شهرين كملت سنه ..

سلطان: عيل ..!

شيخه: بس جذه .. بـ خياسها محتفلين بها ..

سلطان: ههههههه برايها .. ف كل الحالات حلوه بنتي "وقف وسار صوبها" ويستوي يحتفلون ب حفيدتي .. بدون ما اعطيها شي ..!

شيخه:وام حفيدتك مافي شي حقها ..

سلطان: بدينا بـ غيره الحريم الحين ..

شيخه: هييه ..

سلطان: اغلى من الولد ولد الولد فديتج .. واغلى من ولديه .. بنته فديتها

شيخه: اشوف .. الكل قام يدلع هـ البنت على حسابي ..

سلطان ضحك: لااا شكله حمد ابدا مب قادر يعدل بينكن ..

شيخه: ههههههههه وكأنه ماخذ حرمتين .. عديلتي مب بنتيي

سلطان: اسميج انتي ..

اجدم مني اكثر .. لوا عليه ومشى ويايه سايرين برع .. بنص الدرب .. ميزت صوت بنتي امبين حشرتهم .. وعرفت انها اتصيح .. سحبت عمري عن ابويه سلطان .. وانا امشي بخطوات سريعه لين ما وصلت صوبهم ..

شيخه: منو امصيحنها ..!

خوله: حبيب القلب ..

شيخه صدت صوب مانع: افا .. ليييش ..

آمنه: بنتج ماصخه .. والله ولديه ما سوابها شي ..

حمد: لووو سمحتي .. لا اتقولييين حق بنتي ماصخه ..

آمنه: ذلنا ذلنا يا الله .. جنننه محد عنده بنت ف العالم غيررره ..

حمد: ههاااي .. ودددهم بوحده شرا بنتي .. يعلللهم ما يسووونها .. 

شيخه: اسمحوولي بس .. لازم اسير ارقدها ..

خوله: عن الحرررركات ..

شيخه: ما تسمعينها كيف اتصيح .. موعد رقادها الحين .. ومزاجها متعكر ..

شمسه: هاي بعد عندها مزاج يعرف يتعكر ..!

سلطان: يبيها صوبي شوي قبل ما توديها ..

اجدمت منه وانا شاله عليا اللي حشرت الدنيا .. وهي حاطه راسها ع جتفي واتفرك عيونها .. باسها ابويه ع راسها وهو مبتسم ..

سلطان وهو يدخل الاسوره ف ايدها: الله يحفظها ويخليها لكم يا رب ..!

حمد: آميين .. ويفكنا من بناتك ..

سلطان: لا ادعي ع خواتك يا حمد ..

حمد: ما دعيت ما دعيييت .. !!

شيخه وهي ماسكه ايد سلطان: شكرا " وباستهن "

رد لي الابتسامه وهو يرفع ايده .. لين ما حطها ع راسها .. وجبرني اميل صوبه .. عشان يحبني على يبهتي بكل حنان ..

خذت نفس وانا مبتسمه بعدني .. اما بنتي .. ف زادت جرعه صياحها وبدت اتصرخ ..

حمد: يلا يلا .. اسمحووووولنا ..

شمسه: سيرو سيرو .. انتو وبنتكم ..

حمد: جب .. تصبحون على خير ..

الكل: وانتو من هل الخير ..

فتحت باب الحجره .. بدون طاقه .. كل مافيني من جهد .. بذلته اليوم وانا اخلص كل اموري .. و هاللحظه بالذات .. خلتني انهار من التعب ..

حمد: رقدت فديتها ..

شيخه وهي تيلس ع الكنبه: مب عايبني الوضع ابا اسبحها ..

حمد: حرام عليج .. البنيه راقده .. واذا سبحتيها بترد اتصيح وتحشر الدنيا شو بيسكتها عقب ..

شيخه: حمد جوووف .. جسمها كله شعر ..

حمد: باجر الصبح سبحيها ..

شيخه: بتتحسس ..

حمد: ما بتتحسس بس بدليها .. مب لازم اتسبحينها

شيخه: ما يستووي .. والله ما يستوي .. كلها شعر ..

حمد: قلت لج ما اتسبحينها .. مافينا .. اذا مرضت بضطر اسافر واخليكن ..

شيخه: نعم نعم ..!

حمد: هيه عيل شو تتحرين .. بركب بنتي الطياره وهي تعبانه ..

شيخه: يلا يلا والله ما تميت ف البلاد دقيييقه وحدده بدونك ..

حمد رفع حياته: خليها عند خواتيه .. وعقب ما تتعافى بيطرشنها .. شرايج ..

شيخه: اوكي ..

حمد: حلفيييي انتييي بس ..

شيخه: ههههههه كيفك والله .. مابتم ف البلاد بدونك ..

حمد يلس حذالها وهو يلوي عليها: ولا انا اقدر اسير بدونج .. بس صدق اذا مرضت مستحيل اركبها الطياره ..!

شيخه: الطياره ما بتسوي بها شي ..!

حمد:ما بتسوي بها شي  .. بس بتسوي بج انتي اشيا واشيا انتي اللي بتتبهدين وبتتعبين وياها .. وغير جذه ادري بج هي تعبانه وانتي بتيلسين اتصيحين .. وانا قلبي بيعورني عليج وعليها ..

شيخه: انته عيار .. تيلس تضحك عليه يوم اصيح ..

حمد: ههههههه فديتج والله .. ما اضحك عليج لاني اطنز .. بس ابا اغير مودج لاني ماحب اشوفج جذه زعلانه .. كفايه بنتي تكون تعبانه وتعور لي قلبي .. بعد انتي ..

شيخه: انزيين .. ممكن ارقد الحينه .. وارقد وياها ..!  

حمد ثبت راسه ع جتفها .. وبدا يمسح بظهر ايده ع ويه بنته : لا مب ممكن ..

شيخه: حمـــد ..

حمد: مابا ارقد ..

شيخه: حمد والله اني تعباااااانه واخافها اتنش نص الليل وهي تعبانه وتحشر لي الدنيا .. وباجر العيد لازم انش من وقت واسبحها بعد .. ف دخيييلك ارقد وخلني ارقد .. واذا ما تبا ترقد .. رد تحت كمل يلستك ويا خواتك ..

حمد: طاعو والله ..!

شيخه: اونك ما تحب اتشوفني تعبانه ..!

حمد: ماحب اشوفج تعبانه .. و ماحبج ترقدين وتخليني ..

شيخه: يالله .. وقت دلع الحينه .. انا منتهييه ماقدر افتح عيني .. بترقد بتسير تحت عند خواتك .. بتسهر لين الصبح .. كيفك والله .. سو اللي تباه .. انا برقد

نشيت عنه وانا سايره صوب الشبريه احط عليا .. وعقبها سرت صوب الدرسنج رووم .. وانا اكمل كلامي ..

شيخه: بس دخيييلك مب اييي اشوووفك اموعي البنيه .. والله انته بتسكتها انا ما يخصني ..

يوم نشيت عنه .. كنت ساكته وكان ساكت .. حطيت بنتي ع الشبريه .. وانا ساكته وهو ساكت .. ورديت عقبها كملت كلامي .. وهو لازال ساكت ..!

استغربت من هدوءه .. سحبت عيوني صوبه عشان اشوف سبب صمته .. طاحت عيني بعينه .. وضحكت من خاطري على تعابير ويهه اللي اتخربطت واداخلت ف بعضها من كلامي ..!

حمد: ما يضحك ..

لازالت اضحك وانا سايره صوبه ..

شيخه: حياااااتي انته والله

وحظنته ..

حمد: ما يضحك ..

شيخه: انزين مابضحك ..

حمد: وقومي عني .. مابا ارمس ..

شيخه: ماباا ..

حمد: هديني ماباج ..

شيخه بدلع: حمد .. !!

حمد: توج تقولين كيفك سو اللي تباه ..

شيخه: ماقتلللك ازعل مني ..

حمد: كيفي انا ابا ازعل ..

شيخه برجى: حمد ..

حمد: قتلج قومي عني .. مابا ارمسج ..

شيخه: خلاص ما برقد

سحبت اديه وانا سايره وياه صوب الكنبه .. يلست وجبرته ييلس حذالي

شيخه: بتم وياك .. متى ما رقدت انا برقد ..

حمد حط ريل على ريل: اوكي ..

كنت صدق تعبانه ومب قادره افتح عيني .. وف داخلي ادعي ان بنتي ما تمرض عشان ما اتعبني باجر ف العيد .. وما تجبرني اتم ف البلاد بدون حمد .. عيوني مب قادره تصمد اكثر .. توصل لين النص .. وارد افتحهن عقب ما انتبه على نفسي ..رفعت راسي .. صديت صوب حمد اللي جابرني ايلس وياه وهو ساكت .. طاحت عيني ب عينه وضحك حظرته من الخاطر ..

حمد: هههههههههههههه نشي نشي الله يخليج .. نشي رقدي ..

شيخه: ما يضحك ..

حمد: قوومي والله ماقدر اشوووفج .. حسيت عمري ظالم وانا معذبنج ..

شيخه: ما بتزعل اذا رقدت ..!

حمد: لا .. اصلا انا فيا ارقاد .. بس قلت بشوفج اذا بتعبريني وبتمين ويايه .. والا بتسوين لي طاف وبترقدين ..

شيخه: يعني تختبر غلاتك مثلا ..!

حمد: تقريبا ..

شيخه حطت راسها على جفته: انته واحد مينون .. عقب كل اللي سويتلي اياه .. وبعدك شاك ف غلاتك ..

حمد: قلت يمكن .. بنتج خذت غلاتي بقلبج ..

شيخه ابتسمت: والله لو اييب عشر بنات .. ولا وحده فيهن بتاخذ غلاتك يالمينون ..

ضحك حمد .. وانا لازلت حاطه راسي ع جتفه .. وبطرف عيوني .. كنت اراقب عيونه .. اراقبه انفاسه .. اراقب حبه .. وكل شي ذوبني ف حبه ..

حمد: ويعلهم ما يسوونج يا شويخ ..!

شيخه: منو هم ..

حمد: هـ الكون كله ..

..

على أعظم صوت واعظم كلمات .. في اعظم ايام ..

اول يوم العيد ..

نزلت بـ مستوى الكرسي .. ابند السلسله اللي لفيتها على رقبت عليا بنتي .. عقب ما لبستها وقفتها جدامي .. مسكت اديها ..

شيخه: ان ييتيني قاصه هـ السلسله ياااا ويلج ..

ماحسيت الا بشخص لاف ذراعه على رقبتي بـ قوه

شيخه: حمد ..!!!

حمد: آخر مره تهددين بنتي يالزطييه ..

شيخه: والله كل مره اشتريلها من خاااطري واتسير اتقصها او اتضيعها .. هـ المره ان ضيعتها ما بشتريلها بعد

حمد: انا بشتريلها بس لاتهددينها

شيخه: زين ممكن اتهدني لانك خنقتني ..

سحب حمد ايده ومسكني من جتفي وجبرني الف صوبه

حمد: كل عام وانتي بخير يا أحلى واغلى انسانه بـ وجودي ..

شيخه: منو اللي احلى واغلى انسانه .. انا والا هي ..

حمد: طبعا انتي ..

شيخه: اتقص عليه .. توك هازبني عشانها ..

حمد: وبكسر راسها عشانج ..

شيخه: يالله اشكثر يخرط هـ الانسان ..

حمد: ههههههههه ليش شاكه بغلاتج .. والله احبج ..

شيخه: بس اتحب بنتك اكثر ..

حمد: انتي شي وبنتي شي ثاني ..

شيخه: لا اتحاول .. ادري انك اتحبها اكثر ..

حمد حظن ويهها: هي قطعه مني .. من لحمي ودمي وقلبي .. بس انتي قلبي بكبره ..

جدمني منه .. وباسني بين عيوني .. وانا اخذ نفس ..

حمد: والا تدرين كيف .. انتي الخير لكل عام ..

شيخه ابتسمت: وانته بصحه وسلامه حبيبي .. امباركن عيدك

حمد: تو الناس .. انتي لازم تظاربين وعقب تهنين .. والا ما بتحسين بطعم المناسبه ..

شيخه: حرام عليك .. اظاربت وياك الحينه ..

حمد: ابدا "وصد صوب بنته" فديييييت هـ الكشخه انا ..

اجدمت عليا مني بخطوات مش متوازنه .. توها بدت تمشي .. وتدلع كل ما مشت خطوتين وعيون الكل تراقبها بحماس ..   

يت صوبي .. وهي تحاول اتدس ويهها ف حظني عشان ما تلمح نظرات ابوها اللي اتشوفها بكل حب

حمد: وفدييييت اللي تستحي ..

شلها ويلس ع الكرسي ويلست انا حذالهم ..  

حمد:تدرين شو احلى شي فيها ..

شيخه: بنتي بكبرها حلوه .. فديتها ..

حمد: قولي شو وبس .. لا تكبرين الموضوع ..  

شيخه: هههههه شووو ..

حمد: انها تشبهج ..

وباس عليا الصغيره ..

..

هناك .. صوب القلب ونبضه .. صوب الروح وجسده .. صوب عمار .. وثاني ولده ..

نزل عمار من الطابق الثاني من بيت عليا ..  وهو شال بنته اللي توها مكمله اسبوع ف حظنه .. وبيده الثانيه ماسك ولده اللي صار اقرب صديق له ولروحه .. رغم وجود حرمته و بنته ف حياته .. الا ان ثاني كان ولا زال .. غـــيـــر ..

عمار

من روحه انا انولدت .. مش هو اللي انولد من روحي .. ثاني عطاني عمر ثاني بهالدنيا .. عطاني حياه ثانيه وامل ثاني .. ثاني عطاني وجود عطاني فرحه عطاني ابتسامه انحفرت بداخلي قبل لا تظهر على ويهي .. ثاني عطاني حب قريتوه من اول موقف صار بيني وبين شمه .. عشان تصير اليوم نص عمار اللي ما يقدر يعيش نصه الثاني دونها

ثاني عطاني قلب ثاني .. غلفه لي الزمن وحفظه ب مكان ما توصل له اي قوه ف الكون .. وبعد شهور زفت لي اياها الايام عشان تبشرني بميلاد نبض ثاني .. انخلق من روحي .. هي بنتي

عمار: السلام عليكم ..

عليا: وعليكم السلام .. هلا حبيبي  ..

عمار اتجدم من عمته: كل عام وانتي بخير عموه ..

عليا: وانته بخير وصحه وسلامه فديتك ..

سحب عمار ايده عن ايد ثاني وهو يقول له بلغه ما يفهمها غير ولده " سر سلم عليها"

ابتسم ثاني وهو يتجدم صوب عليا اللي نزلت بـ مستواه وهي تبوسه ..

عليا: فديت هـ الويه .. الله يحفظك ويخليك لابوك قول آمين ..

ثاني رفع ايده: آمين ..

عمار خذ نفس: ويخليه لـ امه بعد

سكتت عليا وسكت معاها .. ثواني ورد رمس

عمار: كيف جذه.. مافي حد ..!

مايد: يعني انا مب تاااارس عينك ..!

عمار: اووه .. اتصدق اني ماشفتك ..

مايد ابتسم بشغب: وين متعود ع هالجمال انته ..

عمار وهو ساير صوبه: طبيعي ما بتعود .. يوم انك ما تكشخ الا ف الاعياد

ضحك مايد وهو يتجدم من اخوه .. يسلم عليه ..

مايد

سلمت عليه وانا روحي حاظنه روحه .. روحي انا .. هي اخواني الخمس .. وخواتيه مهره وشيخه .. حياتي انا .. هم .. وسعادتي هم .. وحتى مستقبلي .. هم ..

حياتي انا .. متعلقه بين لندن ودبي .. عشان احقق طموح .. فرضته عليه الايام ..

وروحي .. متعلقه بين ماضي وحاضر .. وبين مستقبل .. صرت احلم متى احظن فيه الطموح اللي انفرض عليه

نفسه الطموح اللي جبرني عليه ابويه .. نفسه الطموح .. اللي جبر مروان انه يبتعد عن البلاد .. عشاني .. ويسحب معاه ربعه .. عشاني

وعشانهم .. وعشان كل شخص وقف معايه وهو يشجعني .. عشان اهلي .. عشان اخواني .. عشان عموه عليا وامايه .. عشان خواتيه .. وفوق كل هذيل .. عشان ابويه .. بكمل مشوار حلم .. قطعته .. عشان احظنه بالواقع .. واهدي فرحته لهم ..!

مايد وهو ياخذ نفس: فديت عيونها وقلبها وريحتها وبراءتها وفديييت ابوووها ..

عمار ابتسم: ويا راسك هذا ..

مايد: يبببها ..

عليا: والله ما شليتها ..

مايد: ايهييي عمووه عن الحركات ..

عليا: والله يا مايد ما شليتها " وسارت صوب عمار" يبها يبها ..

عمار: عموه لازم يتعود ع اليهال ..  

عليا: خللله يسير اييب عيال ويتعود عليهم .. مب يتعود على بنتي ويكسر ظلوعها ..

مايد: انزين انا بيلس انتي حطيها على ريلي ..

عليا: ماشي ..

مايد: الله يخليج عموه ابا اصورها وهي ع ريلي ..

عليا: قول جذه تباها حق الصوره .. والا انته مب لله ياي اتشلها ..!

مايد: عموووه والله احبها احبها .. احبببببببببببببببها ..

عليا: مااايد هد البنيييه .. لوعت جبدها ..

عمار: طفرت بها بسسس  " صد صوب عمته" عموه وينهم .. مافي حد ..!

مايد: انته شبعان ارقاد .. ناش الحين ويا عيالك اتقول لي وينهم ..!

عمار: بعد قول لي انهم يالسين جدامي بس انا ماشوفهم لان عيني مب متعوده ع الجمال ..!

مايد: لالا .. لو هني جان شفتهم .. لان اصلا ولا واحد منهم يتشاهد عشان تربط ويههم ب الجمال

عمار: هههههههههه مالت عليييك ..

عليا: وانتو حتى يوم العيد لسانك هـ الطول .. ما تتأدب ..!

مايد: يعني تبييينا نستغنى عن شخصيتنا عشان خاطر العيييد ..!! " ومسك ايد ثنوي" يلاااا انسير ثنوي ..

مشى ثاني ومشوو وياهم عمار وعليا اللي كانت شاله بنت عمار ..

 سارو صوب الميلس .. وماكان في حد هناك غير سعيد ..!

مايد: بس .. دححح انته .. شي ثاني ماعندك .. عبدالرحمن الدرام ضعف .. ويا دورك انته تاخذ مكانه ..

عليا: الله يحفظظظهم عيالي .. خلهم يدحون ويمتنون .. انته شحقى شال همهم ..

مايد: عمووه انا شال هم عيالهم .. انا لو اترديني 20 سنه من عمري ورا .. واتقولين لي هذا ابوك "وهو ياشر على سعيد" قَلبي الصغير سوف لن يتحمل ...!!!

سعيد: هههههههههه مالت عليك وعلى قلبك " اتجدم منه" كل عام وانته بخير ..

مايد: وانته بخير وصحه وسلامه ووزن في تزايد ان شاء الله ..

سعيد: رووح زيين ..

عمار: وانتو حتى ف العيد على قولت عموه ظرابه .. شو هـ الحاله ثنووي ..!

ثاني رفع صبعه: اسمي ثاني ..

عمار: شو قلنا نحن .. مب انا الوحيد اللي اقدر ازقرك ثنوي ..!

ثاني: بعدين كلهم يزقروني ..!

عمار: لا اترد عليهم .. بس رد عليه انا ..! تمام ..!

ثاني: اوكي ..!

عمار: قلنا تمااام ..!

ثاني: تماااام

مايد: وليش ان شاء الله ..

عمار رفع حياته: بس اسم محتكر بين الابو وولده .. انته شحقى راز ويهك ..!

مايد: انا بعد عمه ..

عمار: عمه .. يعني اخو ابوه .. وابوه متبري منك .. يعني اسكت ولا تتفلسف وايد..

مايد: شكرا جزيلا ..

يلس مايد وهو يحاول يكسر خاطرهم .. ضحكت عليا وضحك معاها سعيد .. اللي انجبرو انهم يصدون صوب الباب .. عقب ما حسو بشغب عامر وهو يفتحه ..!

عامر: عيد زحل سعيييد جماعه الخير .. عساكم من الزاحلين ..

عليا: عوذ بالله .. شو هـ الكلام بعد ..

عامر: عمووه اتشوفين هـ الكشخه كلها والجمال اللي يدوخ ستين بنيه والريحه اللي تخليج تموتين واقفه ..

عليا: انزين ..!

عامر: تخيلي كل هـ الكشخه ف صباحيه رمضان ..!

عمار: كيف بعد صباحيه رمضان ..

سيف: يقولك اليوم 30 رمضان .. المفروض باجر اول يوم العيد .. نحن معيدين ع زحل مب ع الهلال ..

مايد: اونه ..!

سيف: والله ..

مايد: مابصوم والله مشكلتهم ..

عليا: والله بتصوم لربك انته .. مب لهم  

عامر:الله .. يا حلاتي عاد وانا كاشخ واعيد ف صباحيه رمضان

سيف سار صوب عمته ووايهها: امباركن عيدج عمتيه ..

عليا: عساك من العايدين والسالمين ..

عامر: كل عام وانتي بخير يا احلى عليا ..

سمعو صوت من وراهم يقول لهم ..

محمد: عنكم عاااد علايتنا غيير ..!

عليا: هيه .. انا ما تبووووني الحينه .. عندكم عليا غيري ..

محمد ابتسم: فدييتج عمووه ..

اجدم منها .. خذ نفس .. وكانه يغمس روحه ف روحها .. اللي مهما امتزجت عليه انفاس الكون .. تظل روح عليا .. غير

محمد

عرفتوني محمد الملتزم يوم راضين عليه .. شيخي مطوع يوم يمزحون معايه .. ويوم اطيح الميانه بيني وبينهم بدون لا اعقها انا .. يخلوني حمود او حماده .. يمكن ما اتجرأو انهم يقولون هـ الاسمين جدامكم .. بس ف الواقع هذا اسمي اللي يستمتعون انهم يزقروني به .. عشان يقهروني ..

حياتي لازالت على نفس الهدوء اللي عرفتوه .. بين حرمتيه وبنتي .. بس اليوم بوجود عبدالله ولديه اللي تغار منه روضه .. حتى لو ابتسمت بويهه ..!

عامر: والله لو اتيبون ستين علايه .. ام سعيد غيير " لوا عليها" ويعلكم ما تسووونها .. لا انتو ولا علايتكم

حمد اللي توه واصل ويا حرمته اللي شاله بنته ..

حمد

دخلت وانا شابك ايدي بيدها .. لا ماكانت بنتي اللي توها بدت تتعلم المشي ..

كانت حرمتيه اللي شفتها أول مره وهي بملامح عليا بنتي ..

ف صوره فرض القدر اني اشوفها ف الايام اللي كان يجتمع بهن ابوها مع ابويه وهم يناقشون طبيعه عملهم ..طلب مني بيومها اني اييب له اوراق ناسنهن ابوها بمكتبه

سرت هناك وطاحت عيني ع الصوره قبل ما اطيح ع الاوراق ..

صورتها اللي شافتها آمنه اختيه عشان توصف لي اياها بكلمتين وهي اتقول لي " حلوه بكل مافيها" عقب ما وصلتها عن طريق ابويه .. اللي عطاه اياها عمي بدر ..

عشان يكون لاهلي الحق بانهم يجوفون البنت اللي حبها ولدهم بدون لا يعرفها

ابوها خلاني احبها قبل ما اعرفها .. خلاني اتعلق بها قبل ما اجوفها .. ابوها خلاني اعشقها وانا حتى ماعرف شكلها ..

حمد: بلاااها علايتهم ..

عامر: ويييه .. وصل الرادار .. قناص الا .. يالس لنا بالمرصاد .. عسى ماقلنا شي عن بنته الا عطانا بـ نظره .. تخلينا ننسى ابو اللغه اللي ذبحو عمارهم الانجليز وهم يعلمونا اياها 

حمد: هههههههههه وايد صعبه يعني ..

عامر: شو اللي وهقني انا وخلاني اسير ادرس وياهم .. لو ساير الجيش مب ابرك لي..

حمد: لا طبعا .. هناك ع الاقل .. شهادتهم قويه .. لها مستقبل

عامر: وانته تحس ويهي .. ويه مستقبل ..

حمد: كيف بتعرس باجر ..

عامر: خلاص قررت انظم لـ حزب مروان .. باخذ وحده اجنبيه امري لله .. بحرم نفسي شهر واحد من نص المصروف وبخلي الف واحد حق مهرها ...

عمار: مالت عليكم .. هذا مستقبل عامر وربعه .. ياخذون اجنبيه .. والله ماعندهم سالفه ابويه وعمي احمد اللي يدفعون حق دراستكم.. عشان باجر تهدون الشهاده لـ وحده اجنبيه ..

عامر: هـ الاجنيه يعني ما بنييب منها عيال .. والا بعد ما تبونا انفكر ف مستقبل عيالنا ..

شيخه: ههههههههههه والله ما تستحون انتو ..

حمد رفع حياته: وليش ما تنظم لـ حزب فارس ..!

عامر: اذا بتيبون لي بنيه ثانيه شرات هـ القمر .. ف بفكر انظم لـ حزب فارس ..

شيخه: يلا يلا زين .. ماشي شغل عاد ايوز بناتي .. لـ شواب .. كل واحد ريل والقبر

عامر: افا بنت عمي .. الحين نحن ريل والقبر ..!

شيخه: كم عمرك انته الحين ..!

عامر : 21

شيخه: احسب عقب 20 سنه بتكون 41 تخيل بس ايوزك بنتي وانته بهالعمر ..

عامر: ثر الشواب يدلعون اكثر .. بعدين شو تبا بنتج اكثر .. ما شاء الله عليه .. مال وجمال بس اسمحولنا انا اخلاقي زيرو ..

حمد: هههههههههه بعد .. شيبه وفوق هذا ماعنده اخلاق .. يلا يلا .. ماشي ..

عامر: لا تجرحون المجروح .. والله حرام عليكم ..

شيخه: قم زين "وسارت صوب عمتها" كل عام وانتي بخير عمووه ..

عليا: وانتي بخير وصحه وسلامه فديتج ..

ومشت شيخه صوب باجي اخوانها اتسلم عليهم ..

عامر: عموه قنعيهم .. والله ما يستوي جذه .. يعني ليش موافقين على ولدج وانا مب موافقين عليه ..

عليا: والله ولديه فديته عرف كيف يكسبهم .. من الحين امدلع بنتهم .. ومخلنها اتحبه .. انته بعدها البنيه ما وصلت واتقول حق اهلها ماعندي اخلاق .. 

عامر: ثرني صريح ماعرف اجذب ..

شيخه: ابدااا .. ثرني مينونه انا .. ايوز بنتي لـ واحد ماعنده اخلاق .. والجذب امقطعنه من راسه لين ريله .. والا الثاني انزين خله على صوب .. من يومه اموات ..

فارس توه ياي: اموات والا مب اموات .. المهم ان العروس راضيه " اتجدم من حمد ونزل عمره شوي جدامها " والا شرايج ..

ضحكت عليا الصغيره اللي كانت ف حظن ابوها .. وبدت تحرك اديها وريلها ب فرح  وبلغه ما يفهمها الا الاشخاص اللي يعشقون هـ القلوب الصغيره .. وهي تقول لـ فارس بـ حركاتها  .. شلني ..

فارس: فدييييت هـ الضحكه والله ..

حمد: سلم انزيين انته بعد .. لا ابويه انا مب ميوزنكم بناتي .. انتو مافيكم خير حق الابو .. بيكون فيكم خير حق البنات ..

فارس ضحك: اسمح لي .. هاي بالنسبه لي الام والابو والبنات ..

عامر: خييبه .. تباني اجاملهم جذه عشان يوافقون عليه .. لا حشى .. ماقدر .. انا لساني فالت من بيقولون شي .. ببتدي اسبهم .. اليوم بملج على بنتهم باجر بيخلوني اطلقها ..

والكل ضحك عليه .. ثواني .. ووصل خالد ..

عامر: مرررحب اللندني ..

خالد: مرحبتين بو لسان ..

عامر: يعني احترم العيد ع الاقل .. عشان عيد زحل والله مب عشاني .. والا انا ادري ويهي مب ويه حد يحترمه ..

خالد: عوذ بالله منك ومن افكارك .. انا قلت لك هـ الرمسه ..!

عامر: اصلا ما يحتاي تقول .. انته كل الكلام اللي خاطرك اتقول لي اياه عالق هني " واشر ع رقبته" في حُنْجُرتك .. بس ما تقدر اتطلعه .. عشان الهيبه لا تروح ..

خالد: سلم وانته ساكت ..

عامر: ان شاء الله " ووايهه " امباااركن عييدك بو سعييد ..

خالد: عساك من العايدين والسالمين..

ونشو الباجين واحد واحد .. يسلم عليه ..

خالد: ام عليا .. شحالج ..

شيخه ابتسمت: بخير الحمدلله عمي .. انته شحالك ..

خالد: يسرج الحال ابويه ..

عامر: تدري حرقت قلبي وانته اتقول ام عليا ..!

فارس: بدااا بدااا ..

حمد: هذا متى خلص عشان يبدا ..!

عامر: شو هـ العااايله هااي .. حتى طويل العمر خربوووه وياهم ..

حمد: ههههههههههه روحك امشوه صورتك بنفسك ..!

شيخه: شو محد ياي لين الحين ..!

عليا: سبقتيهم هـ المره يالهيزه ..

شيخه: عمتكم هاي متى بتغير هـ الافكار البايخه اللي ماخذتنها عني ..!

عامر: اسمحي لنا .. عمتج خلاااص وصلت مرحله الخرف .. يعني اغسلي ايدج انها تغير رايها ف شي..

عليا: انا وصلت لـ مرحله الخرف .. مسوّد الويه ..

ضحك وهو ساير صوب فارس يلاعب عليا الصغيره.. وشيخه سارت صوب عمتها ..

شيخه: انتي راس المال والله ..

سيف: هييه .. قصو عليها اكثر .. بنتكم وسميتوها عليها .. وولدها وخبلتوه عشان ياخذ بنتكم هـ النتفه.. ان شاء الله بعد ناويين تورثون وياهم باجر ..!

فارس: وانتو ليش كل هـ الحقد ابا افهم ..

سيف صد صوب حمد: حمد .. انته اموافق على فارس ..!

حمد: من زمان اموافق عليه ..

سيف: معناااته فرووووس ما يحتاي اتمثل اكثر .. بما انهم اموافقين فكنا واظهر على حقيقتك .. لا تمثل هـ الكثر ..

ضحك فارس وهو ساير صوب الكنبه .. يلس .. ويلس عليا الصغيره ع ريله .. وعقبها رفعها خلاها توقف بحظنه وهو لازال مبتسم .. يتأمل ملامحها بكل حنان ..

شيخه وهي تمسح بيدها على ويه بنت اخوها: هاي وين امها ..!

عمار: امها كشختنا وطردتنا من الحجره ..

شيخه: ههههههه ليش ..!

عمار باستهبال: ما سوينا شي نحن "صد صوب ثاني" ثنوي سوينا شي نحن ..!

ثاني هز راسه: لا .. ما سوينا شي 

شيخه: اجذب وعلم ولدك ع الجذب انزيين ..

ضحك عمار .. نشيت من مكاني وانا سايره صوب الباب اللي يوديني للصاله .. وقبل ما اطلع .. سمعت عامر وهو يقول .. !

عامر: اعوذ بكلمات الله التامات من شر ما خلق .. اعوذ بكلمات الله التامات من شر ما خلق .. اعوذ بكلمات الله التامات من شر ما خلق ..

صديت صوبهم .. وانا اجوف حارب توه ياي ويا حرمته .. وهو شال ولده ف حظنه .. ويضحك من خاطره على عامر ..

حارب

هذا اللي ف حظني .. نتيجه اروع زواج جمعني انا وبنت عمتيه حمده .. حياه هاديه الا من شغب ولديه وحشرته وازعاجه .. اللي يتذمر منه الكل .. الا ان روحي تلهث عطش كل ما غاب عني .. اليوم بس حسيت شو يعني يكون في انسان جدامك بهالدنيا مخلوق من روحك .. انسان قطعه من قلبك .. ولديه مش بس انخلق من قلبي .. ولديه .. هو قلبي بكبره ..

مع وجود حمده .. وضرتها راشد .. اللي حتى عقب ما عرس لازال يالس لي عظم ف البلعووووم ..!!

حارب: انتتتته ودككك ب هـ البراااءه هاي ..

عامر: اي براءه هاي .. براءه متوووحشه هاي .. شوف شوف وراك وقول براءه ..

صد حارب صوب فارس وهو عارف قصد عامر .. طاحت عينه على بنت اخته اللي ميوده الالف ف أيدها وهي تلعب فيه .. وفتح عينه ..!

حارب:آآآ يالظالم .. نووط بنفسجي ولا بعد تلعب فيه الاخت جنه لبان .. وولديه بتتصدق عليه بـ 100 درهم ..

سيف: احمد ربك .. اذا ما عطاك راس الغزال بو خمسين هههههههه  

فارس: شووو نشاد عنكم انا ..!

حارب: والله ما يخصني .. هذا ولد اختتتك ..

فارس: هذا ولد اختيه .. !؟؟ انته متاكد ان هذا اصلا كائن بشري .. والله شوف الفرق بين البرائتين .. فدييييتها والله .. علايتي عطيني بووسه ..

بكل براءه .. دخلت خدودها ع داخل عشان يساعدنها انها اتمد البوز وهي تسوي عمرها اتبوس فارس..

فارس: فدييييييتها والله .. الحين انته اتشبه هـ الرقه بـ ولدك المفترس ..

حمده: بسسسم الله على ولدييه .. بنشوووف عيالك باجر كيف بيظهرون

شيخه: لووو سمحتووو .. خمس دقايق بس .. بسير وبرد .. دخييلكم لا تصيحووونها .. والله اذا صاحت ما بتسكت ..

فارس ابتسم: ما علييج بنت عمي .. بنتج في ايدي امينه .. سيري سيري انتي ..

طلعت من الميلس وانا سايره فوق .. صوب حجره شمه .. وقبل ما اوصل هناك .. وقفت .. او خلني اقولكم وقفتني هند .. اللي توها طالعه من حجرتها قاصده انها تنزل تحت ..

هند مبتسه: هلا والله ..

شيخه: اهليين ..!

اتجدمت مني اكثر ..وهي توايهني ..

هند: كل عام وانتي بخير ..

شيخه: وانتي بخير وصحه وسلامه ..

هند: شحالج ..!

شيخه: بخير وسهاله ربي يعافيج..انتي شحالج ..!

هند خذت نفس: الحمدلله .. شوفه عينج ..

شيخه: هههههههه كم باجي لج ..!

هند: وييه بعدني ..!

شيخه: ماعلييج ..  يوم بتشوفينه بحظنج بتنسين كل هـ التعب ..

هند: ان شاء الله .. وين علايه عيل ..!

شيخه: تحت عندهم ..

هند: وفارس تحت ..!

شيخه: هييه ..

هند: افف لا اتقولييين .. اكيد ميلسنها ف حظنه الحين وحارسنها .. ما يخلي اي شخص يشلها ..

شيخه: ههههه اتفاهمي وياه عاد اذا تبينها ..

هند: والله استحيييي منه ..!

شيخه رفعت حياتها: يالله .. من متى انتي وياه ف بيت واحد .. وبعدج تستحين ..

هند: يختييه ويهه ما يشجع ان الواحد يرمسه ..

شيخه: هههههههه كيفج عاد .. يا تتفاهمين ويا اخوج او ريلج .. او اتقوين قلبج واتكلمينه ..

هند: اففف امري لله .. بنذل عمرنا عند ريلج ..

شيخه: والا اتريني لين ما انزل .. واخذها عنه ..!

هند: لا ماقدر .. فدييتها والله من اسبوع مب شايفتنها .. وبتسافرون حظرتكم عقب يومين ..!

شيخه: كيفج بعد .. يلا بشوف شموه وبرجع لكم ..

هند: اوكي حبيبتي ..

ابتسمت هند .. رديت لها الابتسامه وانا سايره صوب حجره شمه ..

اتغيرت ..! وااايد .. كل مافيها اتغير .. يقولون ان مستحيل انغير طبع الشخص .. بس سعيد .. قدر يغيرها .. قدر يتلاعب ف احساسها وشخصيتها وطبعها بشكل كبير .. وقدر يغير منها وايد اشيا

وصلت صوب حجره شمه وقفت جدام الباب .. رفعت ايدي وانا ادقه ..

شمه: تعال ..

شيخه: يعني انتييي يالظالمه .. تخلين اخويه يستأذن منج قبل لا يدخل حجرته ..

شمه: هههههههه لا .. بس لاني طردته هو وولده .. وهزبتهم شويه .. ف يوم اسوي بهم هـ الحركه لازم يستأذنون عشان يطمنون اذا كنت راضيه والا برد اروغهم ..

شيخه: ويقولون شمه اتغيرت بعد .. كل هـ الدفاشه وين تغيرتي انتي ..

شمه: هههههههههه 

اجدمت منها .. وانا ابوسها ع خدها

شمه: كل عام وانتي اعز انسانه على قلبي ..

شيخه: حلفي بربج ..

شمه: والله ..

شيخه: وريلج وبنتج ..!

شمه: يعني لاتصدقين عمرج .. طبعا انتي مب اغلا عنهم .. بس بعد يعني .. احبج واعزج ..

شيخه:والله انج ما تستحيين ..

شمه: شسوي بج .. جاملتج ماعيبج .. عطيتج ف الويه بعد ما عيبج ..

شيخه: يلا يلا خلصي ونزلي ..

شمه: وين علايه ..

شيخه: عند خطيبها ..

شمه: ههههههه هذا جاهد ف الله حق جهاده عشان الام .. وماقدر ياخذها .. فديته اقتنع الحين ولف صوب البنت ..

شيخه: جب زيين ...

شمه: يعني اذا خطبها باجر بترفضونه ..

شيخه: لا تعالي .. بيوزه بنتي وهو بـ هالعمر ..

شمه: ليش تجرحينه مرتين ..

شيخه: سيري ولي زيين .. قتلج اذا يبا يعرس انا بنفسي بخطب له ..

شمه: قالج ما يبا غير بنتج ..

شيخه: كيفه .. اخوج روحه ناوي يجني على عمره .. ويعيش نفسه طول عمره ف الاحلام ..

شمه: انزين ساعديه عشان ما يحلم زياده ..

شيخه: والله .. انش ايوزه بنتي ..!

شمه: شو فيها ..

شيخه: اقووول ..سيري انتي واخوووج فوووقج ..ان شاء الله ماعرس طول عمره .. انا شو يخصني.. اقوم اوهق بنتي ايوزها واحد كبر ابوها ..

شمه: حرام عليج اصغر عن ابوها ب سنه ..

شيخه: لا والمضحك ف الموضوع .. ماما ثر هـ الانسان كان يحبني انا قبل لاياخذج ..

شمه: هههههه اصلا انتي وهو وبنتج فوقكم .. كلكم مصخره ..

شيخه: مصخره ف راسج .. يلا خلصينا وتعالي .. بعدين انتي ليش متأخره ...

شمه: آآخ سكتي عني والله طول الليل سهرانه ويا بنت اخوج الماصخه .. الفير خلاص زاد عن حدي .. خليته هو يسهر وياها وانا رقدت ..

شيخه: لا والله .. امخليه اخويه يسهر ويا بنتج وانتي راقده ..

شمه: هييه .. وولده وياه بعد ..

شيخه: ما بيسير عند امه ..!

شمه: مب طايع ..

شيخه: ليش ..!

..

ثاني عاقد حياته: تقول لي بتسافر ويانا ..

عمار: منو ..!

ثاني: ريم ..

عمار رفع حياته: قول ماما ..

ثاني جتف اديه: مابا ..

عمار: ثاني ..

ثاني: هاي مب امي ..

عمار: عيل ليش انته اتسير ترقد عندها ..

ثاني حط راسه على صدر ابوه وهو يطالع فوق: لان انته ما تحبني ..

عمار: انا ما احبك ..!

ثاني: انته ما تباني اتم عندك ..

عمار حظن رقبته وهو طايح ف حظنه: ثنوي .. بابا .. شرات ما انا احبك .. واباك اتم عندي لاني ابوك .. هي بعد اتحبك .. وتباك اتم عندها لانها امك ..

ثاني: انته اتقص عليه .. هاي مو امي ..

عمار: عيل انا مب ابوك ..

ثاني حط عينه بـ عين ابوه: عيل ليش انا اسمي ثاني عمار ..!

عمار: خلاص بمسح اسمي عنك ..

ثاني: مابا ..

عمار: اذا قلت مره ثانيه ريم .. وماقلت لها ماما .. بمسح اسمي عنك ..

ثاني: بتمسح اسمك عني ..!

عمار: هيه ..

ثاني نش عنه: انا بعد بمسح اسمي عنك .. انته الحينه .. قول حق هاذيلا مايقولون حقك ابو ثاني

عمار ضحك: تعال زين ..

ثاني: ماباك ..

مايد: لييييييييييش اتزعله ..

عمار: ههههههه اقول له بمسح اسمي عنك .. يقول لي انا بعد بمسح اسمي عنك .. انته مب بو ثاني

مايد: خيبه .. ليييش ..

ثاني: يقول لي سافر وياها .. هي ماماتك ..

مايد رفع حياته: منو قال ان هي ماماتك .. تعال زين ماعليك من ابوك .. دخل الثلاثين والخرف ظرب ف مخه ..

سكت عمار وتعابير ويهه امبينه انه مب متقبل كلام مايد .. هو يحاول يقنع ولده بـ وجود امه ف حياته .. ومايد من بد كل اخوانه .. رافض هـ الشي .. ويجذب كلام عمار اللي حتى ثاني مب قادر يستوعبه لين اليوم ..

عبدالرحمن شاف الساعه: مصخووها يعني وينهم اليووم ..!

عبدالعزيز: وشحقى مستعيل انته ..!

عامر: شحقى مستعيل بعد .. هو واخوه .. مستعيلين حق الدح ..

سعيد: وانته شو يخصك ف اخوه ..

عامر: وانته ليش شاك ف عمرك .. يمكن اقصد جبل طارق ..

احمد: هههههه حرام عليك .. والله ضعف طارق ..

سعيد: ودك انته توصل للي وصل له جبل طارق على قولتك .. شوفه فديته .. صلاه وعباده .. وحفظ قران ..

عامر: لا والله ف هالشي سكتتني الصراحه .. ماشاء الله قبل ما يقيم الصلاه هو ف المسيد .. وانا ما ادخل المسيد الا فايتتني ركعه او ركعتين ..

محمد: هههههههه ما تستحي ثررررك ..

عامر: والله انتو مستعيلين .. يعني مسيد فرييج .. اتريوونا لين ما نتيمع عقب صلو ..

محمد: والناس على حسااابك ..!

عامر: اي نااس .. غير المطوع وولده اللي صف سادس ملبسنه كندوره لين الركب .. وين تبا ياااخي ..!

محمد: هههههههه استغفر الله العظيم .. بس بس اسكت .. ما يخصك ف عيال الناس ..

عامر: ما يخصني ف عيال الناس .. بس يخصني ف عيال اخويه .. باجر بيكبرون عيال اخويه .. وبيلبسهم كنادير قصييره .. حلو والله ..!

غانم: كيفه الريال ويا عياله انته شو يخصك ..

عامر: لاااا والله مب  

قبل ما يرد عليه غانم .. وصل عبدالله ويا حرمته وعياله .. وهو رافع حياته ومجهز رد على عامر .. عقب ما سمع نص السالفه وهو واقف ف الصاله يسلم على عمته ..

عبدالله: السلام عليكم ..

الكل: وعليكم السلام ..

غانم: قطعك انته وعيالك ..!

عبدالله: ادري به ..

عامر: والله والله شوووف .. عيل هـ البراءه مب حرام يظمهم باجر لـ تنظيم القاعده ..!

اشر عامر على التوام .. اللي واحد منهم ماسك ايد امه وهو يصيح .. ويحاول يعق عمره ع الأرض .. بس مهره ماسكتنه .. والثاني واقف بكل براءه .. يراقب اخوه بصمت عشان يتتلمذ على ايده ..!كييفه ..

قبل ما يرد عليه غانم .. وصل عبدالله ويا حرمته وعياله .. وهو رافع حياته ومجهز رد على عامر .. عقب ما سمع نص السالفه وهو واقف ف الصاله يسلم على عمته ..

عبدالله: السلام عليكم ..

الكل: وعليكم السلام ..

غانم: قطعك انته وعيالك ..!

عبدالله: ادري به ..

عامر: والله والله شوووف .. عيل هـ البراءه مب حرام يظمهم باجر لـ تنظيم القاعده ..!

اشر عامر على التوام .. اللي واحد منهم ماسك ايد امه وهو يصيح .. ويحاول يعق عمره ع الأرض .. بس مهره ماسكتنه .. والثاني واقف بكل براءه .. يراقب اخوه بصمت عشان يتتلمذ على ايده ..