السبت، 16 نوفمبر، 2013

الجزء السابع (2)


نزل الجريده عنه للمره الرابعه اذا ما كانت الخامسه .. فصخ نظارته الطبيه ورد تنهد ..

سعيد: شمووووه ..
شمه من وراه تضحك: انزين شسوي به .. ما يقر ..
سعيد: اذا ما يلس .. بشله بوديه بيتهم .. وين ابوه ..
شمه: شدراني اسأله ..
سعيد: وين ابوك ..
ثاني: بويه دوام ..
شمه ابتسمت: وين يداوم ابوك ..
ثاني بدلع: يويو
سعيد رافع حياته: شوو ..!
شمه: قصده وي وي .. صوت الونان مال الشرطه ..
سعيد: بس ابوه ف المطار احيده ..
ثاني:لالا .. بابا يويو يداوم
سعيد: ههههههههه انا منو ..
ثاني هز جتفه بـ حركه طفوليه .. بـ معنى .. ماعرف ..
سعيد: هههههههههه هذا انا يوم الخميس الا اوديه ويايه ..
شمه: يوم الخميس عمي احمد عازمّنا ع العشى ف بيتهم ..
سعيد: ليش شو عنده .. كل يوم والثاني عازمنّا ع العشى
شمه: مادري..
سعيد: بيعرس .. ؟
شمه: يوم بتشوفه اسأله ..
سعيد رد يكلم ثاني : قول سعييد ..
شمه بطرف عينها: عمي سعيد هذا ..
سعيد: عمي عاد ..!
شمه: تتحسب عمرك صغير .. !
سعيد: هيه .. بس اخوج بيشيبنا ..
شمه: ثركم ما تستحون .. هذا اللي اصغر عنكم بيعرس وانتو شعر راسكم ابيض ولا شفنا عيالكم ..
سعيد: والله هو المستخف .. على شو مستعيل ..
شمه: خله خله يعرس احسن .. تباه يتم عزابي شراتكم انت واخوك الدب ..
سعيد: حلااااااااااتها حياه العزوبيه ..
شمه: هيه .. بعد حمدوه بتعرس الحين بتحلو زياده . .شموه ودي شموه يبي شموه حطي شموه شلي .. بشكاره ابوكم شموه
سعيد: شو خانتج انتي عيل .. ؟
شمه: خانتي .. اخدم شخص واحد بس .. مب جيش ..
سعيد: ومنو هـ الشخص ان شاء الله ..
شمه بـ شغب: ريلي ..
سعيد: ما تستحين انتي والله
شمه: ويييييييه شخباري .. استحي اونه .. ابوي طاح سوق المستحى الحين
عليا توها يايه: ويديه
سعيد: وايد عليج امايه .. لو ام ثانيه جان كفختها على راسها ..
عليا: مافيها مذهب هـ البنيه .. عيزت وانا أأدب فيها ..
سعيد: تبيني أأدبلج اياها ..
شمه: انته انته ياللي ما تذكر الطاقه الا مره ف السنه .. يلس مكانك اشووف .. ثنوي تعال ..
سعيد سحبه: جان فيج خير تعالي شليه ..
شمه: بسير برع ما بوديك ..
سعيد: ماشي .. يلس مكانك انته بعد ..
شمه: ثنووووي .. باااااااااااي ..

شل سعيد المخده بيفلع شمه اللي شردت .. وبنفس الوقت ثاني سحب عمره وياي بيشرد بس وقفه صوت سعيد وهو يصرخ ..وقف ثاني ثواني وهو  خايف عقبها صاح ..

سعيد: اويه لالا .. ههههههههههههه
عليا: حسبي الله على بليسكم من عيال .. طلعه برع ..
سعيد: ما يخصني ..
عليا: ما يخصك .. عقب ما صيحت الولد .. " وسارت صوبه " تعال حبيبي ..

شلته وطلعت برع .. شيخه وراشد يالسين .. مجابلينهم منصور ومايد اللي طايح ع الكرسي وميوّد البيري ف ايده ..وحارب ميود النشابه بديه وما خلا حد ما فلعه ..

حارب وهو يشوف ثاني ياي صوبهم: منوووو امصيح ولد اخويه .. وليش ان شاء الله ..
منصور: والله اسال هاي متبنته ..
حارب: اشوف قم شوي ..
شمه نزلت راسها وحظنت شيخه: يا ويييلك ..
شيخه: ايه ايه .. قوومي عني بيفلعني ..
شمه: والله قولي حق اخووج ..
حارب: شيخو قوووومي ..
شمه تصرخ: اييييييه عن الحركات ..
حارب: ليييييش اتصيحين ولد اخويه ..
شمه: ما صيييييحته
وصلت عليا صوبهم وبنفس الوقت دخلت سياره ووقفت نص الحوي  ..
حارب: اعترفي ..
شمه: امايه وقسما بالله ان فلعني .. لافلعه بـ نعالي على راسه .. قولي شي عقب ..
حارب: تهدد بعد .. شيخو قووووووووومي ..
نزل صاحبنا جامه السياره
عمار: منو امصيح ولديه .. !
حارب وهو يأشر على شمه بـ النشابه: هااااااي .. افلعها ..
عمار: ليش .. !
شمه: والله مب انا " وهي تصيح بدون دموع" حارب عن المصااااخه امايه شوووفيه ..
عليا: زين يسوي بج ..
شمه: ايييييييييه ..
نزل عمار ويا صوب ولده
عمار: ليش بابا .. " ومسح دموعه"
ثاني: هذاك ظباني ..
عمار: ظاربيييينك .. ! ياكبرها عند الله .. منو هذاك ..
حارب: تستأنف الجلسه لين ما ناخذ اقوال المجني عليه .. ثاني عمار بدر .. صاحب الاسم المنقع والويه المفلع فدييييييييييييييته انا ..
عمار: منو هذاك .. ؟
ثاني: هذاك الثبال ..

عمار مطلع عينه .. و مايد فر البيري وهلك من الضحك ماقدر ايود عمره والباجين كلهم يضحكون على ثاني اللي يابها بـ طريقه ..

عمار وهو بعده مطلع عينه: عندنا سبلان ف البيت ..
عليا: عيييب ماما ..
رد ثاني شغل الونان وهو حاظن ابوه ..
ثاني: لا تيوون بيت انا .. لوحي بيتكم ..
عمار: عيب بابا .. انزين اسكت شوي وقول لي منو ظاربنك ..
مايد مسح دموعه اللي نزلت من الضحك: يلا لوحو لوحو بيتكم ..
حارب: انتي ياللوح لوحي ..
عمار: صدق منو ظاربنه..
عليا: محد ظاربنه ها ولدك ماصخ ..
راشد: دام علايه قالت ماصخ معناته سعيد مسوي به شي ..
شمه: ايه ايه .. اخويه مسكين لا تظلمه ..
راشد: ههاي .. عمووه .. عليج الله وامانه علميهم منهو المسكين ..
حارب: انته وقت قصايدك الحين  اسكت شوي وقم .. "ورد وجه النشابه صوب شمه "
شمه: امااااااااااااااااااااااااايه .. رمسي وفكيني من هـ المتوحححححش
عليا: هذا سعيد عصب عليه ..
حارب: واتقولين مسكيييييين ..
مايد: هززززززززلت يا مايد بدر ..
عليا: خير خير .. عن تكفخونه بس ..
مايد: هدوني عليه انتو ..
حارب: ما يحتاي اتكلف على عمرك .. من هني بفلعه بس قولّه يطلع ..
مايد يصرّخ: هززززززززززززلت ..
عليا: الله ياخذ بليسك بس صخ
مايد: هيييه يوم ولدج عصب على ولد اخويه ما قلتي له صخ ..
حارب وهو يسوي لها حركات بالنشابه: والحين يوم يينا بناخذ حقنا تقولين صخ ..
عليا سحبت النشابه من اديه : صخ انت وياه عورتولي راسي .. انا ما عندي سالفه اللي واقفه ساعه ارمسكم .. ويعلكم ما تسووونه

وفلعته بالنشابه .. وحارب واقف وحاط ايده على راسه وهو منصدم من حركة عمته

مايد هلك من الضحك وقال بصوت واطي: هزلت .. واهاها
شمه: دوااااااااااااااااااااااااااااااااااااااااااااااااااك .. زيييييييييييين تسوي بك .. اصلا محد ماخذ حقي منك غير امايه ..
حارب:صخي انتي  .. فديتها عمتيه لو تكسر راسي بعد عادي ..

ردت شمه ضحكت عليهم .. عمار اطالعهم وابتسم .. شل ولده وسار فوق يرقده وياه ..

..

يوم الخميس ..


الكل تقريبا متيمع  عقب صلاه العشى

بالتحديد ف بيت أحمد ..


مايد: خلونا من هـ السخافه انا بقول لكم شي مفيد
حارب: اتفضل قووول ..
مايد: تدري انك اذا يلست ويا ربع رشود مال الجامعه وكنت عطشان .. وقلت لـ واحد منهم صب لي ماي شو بيرد عليك
راشد: ع البااااااااااجلاااااااااااا .. ع البااااجلاااااا 
احمد مظهر عيونه: والله انكم مب صاحييين ..
مايد: عمي والله ماقص عليك .. سر يوم واحد وقول لهم .. بيردون عليك بهـ الرد ..
عامر: مفاليع ربعه
راشد: اذا ربعي انا مفاليع .. ربعك انته شو يالقوطي ..
عامر: اييييييييييييييييييييييه يا راااااااشد .. لا تجرررح المجروووح ..
مروان توه ياي: السلام عليكم ..
الكل: وعليكم السلام ..
عامر يفرك عيونه: ايعقل ما تراه عيني .. مروااااان ياي بيتنا ع العشى ..!
مروان: يعقل ونص .. قم اشوووف ..
عامر وهو مسيّر بالفصحى: أفيك حمى مروان ..
مروان: بضربك هاا ..
عامر: صدقا صدقا .. اهذا مروان ..
مروان: بطلع صدق مينون .. اذا فكرت ارد عليك ..
عامر: انته شو اللي يايبنك بيتنا.. !
مروان: مشتاق لويهك .. ياي اشوفك ..
عامر: على فكره محمد ..
محمد: هلا ..
 عامر: هذا اخوك مافيه ادب .. ومايستحي على ويهه ..
احمد: يعني انت اللي مقطع الادب ..
محمد: هههههههههه يحتاي ارد عليك بعد ..!
عامر وهو حاط المخده على ويهه: لا شكرا .. اصلا انا ابويه مب حاس بجيمتي ..
مروان ضحك: باجر يوم بيودرك وما بيلقاك بيقول ايييييييييه ليتني ما قلت هـ الجمله ..
احمد: قووومووو زيين .. خلهم يزقرونكم قبل ..
راشد: لالا عمي.. مب جذه
احمد: شو اللي مب جذه ..
راشد: قول لهم .. قووووووومووووووووو ولو زيييييييييييييين ..
عامر: ولت درجاتك ..
راشد مطلع عيونه: ولت كشتك ان شاء الله ..
وعبدالله يالس ويضحك ..
خليفه: والله بيخبلوبي هذيل بس صخووو ..

عبدالعزيز اطالع خليفه بـ طرف عينه ورد اندمج ويا الباجين .. ما يبا يحسس خليفه بـ اي شي ..

عامر: يعني لا تحسسنا انته بعد ..
مايد: قلنا لك من البدايه .. خذت وحده من هـ العايله .. لازم تتخبل ويانا
خليفه: لا والله ..
مايد: نسينا انحط هـ الشرط ف العقد ..
راشد: عشان المليج يشلكم ويا عمتكم يفركم برع ..
مايد: خسي والله ..
راشد: شو كنت بتسوي به يعني ..
عامر صد صوب عبدالله .. ورد اطالع محمد وقال:بحسن لحيته والله ..
كفخه عبدالله على راسه ..
مايد: جفففت خليفه.. حتى مطاوعتنا خبايل شراتنا ..
عامر: واللي يدش هـ العايله لازم يتخبل ويانا .. ف كيفك انته اذا مب عايبنك .. اطلع منها ..
خليفه: وكيف اطلع منها ان شاء الله ..
عامر: خل عمتنا وبنتها عندنا وتوكل على الله ..
عبدالله: عامر .. ممكن تسكت ..
مروان: عمور .. من يوم ما انا اختفيت لين اليوم .. كم مره انهنت ..
عامر بـ اسى: شقولك ولد عمي  .. هذيل اهل هذيل .. ! انا لو اعرس .. اعتقد اهل حرمتيه بيكونون احن عليه من هـ العايله هاي ..
راشد: قصّر لسانك محد بيقولك شي
عامر: حويرب..
اطالعه حارب بطرف عينه .. وبنظره جامده جدا ورد صد جدام ..
راشد: واتقول اهل حرمتك بيحنون عليك اكثر لا .. شوف الفرق انته بس "سكت راشد شوي ورد قال" على قلبييييييييييييييي
حارب: فوووووووووووووووووووق
عامر: هاي يسمونها مصاخه .. اخووك ماصخ بس يحب سوالف معلايه ..
عبدالله هلك من الضحك على عامر
احمد: انته بدال ما تكفخه بـ نعالك على راسك .. تقوم تضحك
عبدالله: ماقدر والله.. ابويه هذيل ناس مب طبيعيين..
احمد: انتو متى بتسيرون ..
مروان: وين..
احمد:الدوره..
مروان:مادري والله.. انا احس من قروو اسم عمور وشافوه مطابق لاسمي قالو ما بنزقره..
عامر: شافوا اسمي..؟ قوووول من شافو افعالك.. صار لك شهوووووور مختفي .. وهم يراقبون تحركاتك الله اعلم شو ماسكين عليك .. الحين انا بـ اي ويه ادخل الدوره وولد عمي .. مسود ويهي وفاتحين له ملف وقضيه عندهم
راشد: بسم الله على اخويه .. ويا ويهك شووو بالع راديو انته .. بس جبببببببببببب وشل المخده وفلعه

وبدت الحشره .. وبدا الازعاج بين راشد وعامر .. والباجيين يضحكون ويعلقون .. واللي متفيج يدافع عن واحد ضد الثاني ..

عند الباب ..

رفعت راسها فوق وتنهدت

شيخه: وانا مكتوب عليه .. كل ما اوصل عند هـ الباب اتوهقّ
يلست ع الارض .. وثاني يلس حذالها ..
ثاني: ثو اثوين انتي ..!
شيخه: عباتي علقت .. اتروم اطلعها ..
ثاني: هييه .. انا ليّال ( ريال )
شيخه: يلس مكانك .. الحين بتتعور .. ويا هـ الباب النّحس .. انا قايله العبي اللي اكنسلها بحطها حق الفريج على قولت محمد .. بس شكلي ما اتأدب .. كل مره البس عباه يديده وايي..

صدت الصوب الثاني ييت بتسحبها.. سمعت صوته من وراها وهو يقول لها ..

فارس: ليش تتحرطمين ..
شيخه رفعت راسها وسكتت ..
فارس: اساعدج .. ؟
شيخه: لا شكرا ..
فارس اجدم منها .. وهي تطالعه بـ صدمه ..
شيخه بتوتر : سر المطبخ او اطلع برع .. لين ما اخلص بزقرك ..
فارس: بلاج .. ثرني خطيبج الحين .. والا " رفع حياته " نسيتي .. !
سكتت شيخه وردت تعابل بـ عباتها ..
فارس: اظهر لج اياها ..
شيخه: قصدك اطرلّج اياها
فارس: خلها تنطر .. باجر افصل لج غيرها ..
شيخه: لا والله ..!
فارس بهدوء: انا ثمي انطر عشانج .. وانتي مستخسره اطرين عباتج عشاني .. ؟

سكت .. وسكتت وياه ..

شيخه: انت شال بـ خاطرك عليه ..
فارس: لا ..
شيخه:  وعلى ابويه ..

سكت ولا رد عليها ..

شيخه: شال بخاطرك عليه عشانه .. ؟
فارس: وليش اشل بخاطري عليج عشانه .. بنفس اليوم اللي هاننّي .. هانج .. وبنفس اليوم اللي ظرني ظرّج ..

تنهدت شيخه وصدت جدام ..

فارس: ما اذاج عقب هـ اليوم .. !
شيخه: طلّع لي يوم ف حياتي هو مب مأذني فيه .. تعودت على اسلوبه .. ومعاملته الزفته لي .. مادري ليش يكرهني .. وليش يعاملني جذه .. كل اللي اعرفه .. اني خلاص .. ماباه ..
فارس: تحملي .. شهور وبتفتكين منه ان شاء الله ..

ابتسم لها .. ابتسامه طالعه من قلبه .. شافت غمازته بـ وضوح .. شافت ملامحه عدل .. خشمه عيونه شعره ولونه ..

سحبت عباتها وانطرّت .. صدت صوب ثاني وزقرته .. نقز ثاني وسار صوبها قبل ما توقف .. طاح ف حظنها وباسها شلته وسارو داخل .. وفارس لازال مبتسم .. وهو منصدم من علاقة شيخه بـ ثاني ما توقعها قويه ..

وشخص غيره بعد .. منصدم ..

ليست هناك تعليقات:

إرسال تعليق