الأربعاء، 20 نوفمبر، 2013

الجزء الـ27 (1)


بدا فارس يسترد عافيته شوي شوي ..  رغم انه بعده يتألم من اديه .. بس بدت ايده تتقبل العلاج ووتتحسن .. طلعوه من العنايه وحولوه القسم ..و اليوم سوله اشعه ف ظهره والكل يالس عنده يتريا نتيجه الاشعه ..

مروان: دنوااااااااااااايوووه دانه ..
عامر: ما ذليتنا ويا هـ الاغنيه انته ..!
عليا: استغفر الله العظيم .. هذا بدال ما تدعي ربك
مروان: انا قلت لكم انه بخير ومافيه شي .. وصدقوني بتطلع رمستي صحيحه ..
خالد: ان شاء الله .. الله يسمع منك ..
مروان: عمي خالد اذا كلامي طلع صح شو بتعطيني ..
خالد: لك مني ايوزك الشقره على حسابي ..
عليا: خاالد شو تفر مخه انتته

ضحك خالد وصد صوب مروان

مروان: اتقص عليه انته اي حساب .. وايد عليها الف درهم هاي ..
خالد: بنسير السوق اتشرا على حسابي ..
مروان: مابا ..
خالد رفع حياته: طيب لك مني وعد اذا كلامك طلع صح .. وولديه رد يمشي على ريوله لـ اوديك فرنسا يا مروان ..
مروان: احلف ..
خالد: انا وعدتك ..
مروان: مابا احلف ..
فارس ضحك: لا ايذلك ابووويه .. ما عليك منه  ..
مروان: ايه ايه شو ماعليك منه انته الثاني .. عموه الحين بدعي على ولددددج هاه ..
عليا: ادعي انته وجوف جان ما قصيت لك لسانك ..
مروان رفع اديه: يااااااااارب ..
عليا: مروااااااااان ..
خالد سار صوبه وكفخه: بتيلس انته والا ..
مروان: احلف اول ..
خالد: والله بوووديك بس انطم ..
مروان: وين بتوديني ..
خالد: استغفر الله ..
مروان: قووول ..
خالد: والله العظيم بوديك فرنسا .. حلو جذه "ودزه وطاح مروان"
مروان: آآآآآآآآي .. ذلني الحينه لين ما توديني ..
خالد: ويينه حارب عنك .. يشلك ويفكني منك ..
عليا: فدييته ولديه .. مريض وطايح ع الفراش ..
عامر: بالتناوب نحن .. شكلي انا بطيح عقب حارب ..
مروان: حارب فديته .. وانا بقص لسانك ..
عليا: والله اتفديناك بس ما تستاهل .. ياي تدعي على ولديه ..
مروان: عمو يعني بالذمه .. مخج كيف استوعب ان انا ممكن ادعي على فارس ..
عليا: انته حق الهياته .. بتسوي كل شي ..
مروان: آآآه من قلب يا عامر صار لهم اسبوع مفتكين من ويهي .. الحين ياينهم وجذه يسووبي .. ويقولون عني
فارس: محد يعرف قدرك غيري .. تعال انا اباك ..
مروان: فديته والله ولد عمتيه ..

وسار صوبه ..

مروان: شخبارك ..
فارس: بخير .. بس اسكت ويلس ..
مروان: شكرا جزيلا ..
فارس: عيل مودرين حارب روحه ..؟ محد تم عنده ..؟
عامر: لا مب روحه .. وياه ..... "وسكت عقب ما شات مروان ريله"
مروان : وياه ربعه اللي يشوفونه ومايشوفهم ..
فارس: جان تميتو عنده انزين ..
مروان: كان راقد يوم طلعنا .. قلت بييك .. وبرجع من وقت بجابله ..
فارس: وانا بخير مافيني شي .. سر له ..
مروان: لا والله ماسرت قبل ما اطمن على مستقبلي ..
عامر: اي مستقبل بسم الله عليك ..
مروان: مستقبل فرررنسا ..

والكل ضحك عليه .. بنفس الوقت وصل الدكتور وطلب خالد عنده ف المكتب

مروان نقز: لحظه لحظه انا بكلمه ..
خالد: قم قم .. عشان اتقص علينا ولو في شي اتقول مافي شي ..
مروان: لالا والله ..

وخالد ما سواله سالفه وسار ومروان سار وياه ..

دقايق ورد خالد وهو منزل راسه .. ومروان ساكت مب عارف شو يقول ..

عليا: بلاكم ..!
وبعدهم ساكتين ..
عليا: خالد شو قالك الدكتور ..

خالد خذ نفس .. ورفع راسه وهو يطالعهم بـ الم .. ومروان يطالعهم وهو حاس انه ظايع .. اما فارس.. عدل يلسته وهو يتألم .. بس عشان يسمع منهم اي خبر ممكن يريحه ..

عليا: خالد اررررمس عقيت لي قلبي ..

هز خالد راسه بـ لا .. تنهد فارس وحط راسه ع الشبريه عقب ما فهم من تعابير ويههم .. ان ماشي امل .. يا انه يسوي العمليه .. او يتم طول عمره يالس ع الكرسي ..
صد عنهم الصوب  الثاني وهو امبند عينه بـ الم .. ورد فتحها بسرعه عقب ما سمع ابوه يصرخ باسمه

خالد: فااارس فاارس .. الله يغربل افكارك الشيطانيه يا مروان ..
عامر: بلااااااااااااااااكم .. رمسوووو ..
خالد ابتسم من قلبه: الحمممممدلله ..
عليا وقفت وهي تصيح: شووو قال لكم الدكتور ..
مروان يا صوبهم هو يسوي بايده حركه النصر :يسسسسسسسسس .. قال ان مافيه شي وان نحن نقدر انسير فرنسا من باجر  ..
عليا وهي متوتره : اسكت عني انته .. انطممم مابا اسمع صوتك ..
مروان: خييييييييييييييييييييييييييييييييييييييييبه  
عليا: بسس جبب .. قلت لك مابا اسمع صوتك .. خاالد ارمس
خالد: اسميكم  سويتولنا قصه .. وهذا الهرم خلاااني اسوي لكم فلم .. انا كيف طاوعته مادري ..
فارس بخوف وهو منصدم  : ابووويه ..!
خالد اجدم منه ومسكه من اديه: الحمدلله قالو ما يحتاي عمليه .. الموضوع طلع بسيط .. وبتبدا بالعلاج الطبيعي من الاسبوع الياي " ومسك جتفه بـ قوه" وانته قدها .. بتساعدهم وبتساعد نفسك عشان ترجع وتمشي على ريولك .. انا متاكد من هالشي ..
فارس رفع راسه لـ فوق ثواني ودمعت عيونها : الحمدلله ..

ابتسم فارس ف ويه ابوه وطاحت دمعته .. اجدم خالد اكثر من ولده وحظنه .. ثواني .. ويت عليا صوبهم وهي اتصيح اتجدمت من ولدها وحظنته هي الثانيه ..

عامر صفق: كمان كمان .. المشد دا عاوز احساس عالي .. يلا يا عاليا خلينا انعيدو ..
خالد: هههههههه والله انتووو ..
عليا: يالله .. والله اني مب قادره اوصف فرحتي .. الحمد والشكر لك يارب .. الحمدلله
مروان: انا شووو قلت لكم .. ربيعي واعرفه عدل ما يستسلم بسرعه ..

صد صوب فارس وهو يضحك ..

فارس: اسميني كارهنك من قلبي ..
مروان: افا ..
فارس: خليتني على اعصابي .. وانا اشوف اشكالكم ..
مروان: شكلك نسيت عمرك يوم وقفت لي قلبي ف البلاد ..
فارس: مااالت عليييك ..
مروان: ثر الخبر الحلو .. لازم ينقال بطريقه .. تفرح قلب الشخص .. ما يستوي جذه اتي واتعق الرمسه .. والا شو رايك يا اخ عامر ..

ضحك عامر .. وفارس ابتسم لـ مروان ابتسامه طالعه من قلبه ..

خالد: والله هـ البشاره ما يبالها فرنسا ..
مروان: هاااااا بديييينا بـ حركات المنافقين .. اوووعد واخللف ..
عامر: هههههههههه استح ع ويهك زيين
خالد: ويا ويييهك بوديك العمرره ..
مروان: اتوديني فرنسا واتوديني العمره .. انته وعدت وحلفت .. يعني الذنب ذنبين ..
خالد: زييين زيين .. لا تاكل فوادي الحينه ..
مروان: انته اللي بتذلني الحينه .. خلاص خلاص .. انته ودني وانا اللي بدفع عنك ..
خالد: لا اتضحكني وايد .. انته مصروفك يمكن خلص ع التذكره بس .. من وييين عندك تدفع عني وعنك بعد ..
مروان: شكرا ع الاهانه يا ابا سعيد ..
خالد ضحك: عفوا ..

والكل ضحك وياه ..

عامر: الصراحه .. الموضوع مب مخلني اتحمل اليلسه ..
مروان: سر انتحر .. هذي الدريشه ..
عامر: انتحر روحي .. لا والله ما ايووز .. قم انتحر ويايه ..
مروان: يلا ..

نش عامر ونش مروان وياه وهو لاوي عليه .. عليا كفخت يبهتها ..

عليا: استغفر الله العظيم ..
عامر: من كل ذنب عظيم ..
مروان: والله الجووو طرر .. قومو ننزل تحت ..
خالد: سر.. حد ماسكنك ..
عامر: كلنا كللنا .. يلا فرووس ويانا بعد .. بننزل الحديقه ..
فارس: لا انا مب نازل وياكم ..
عامر: مب على كيفك .. يلاا طوووف ..

نقز مروان من فوق .. سار صوب الكرسي المتحرك .. سحبه ويابه صوب فارس ..

مروان: يلا يلا ..
فارس: مابا ..
خالد: ما مليت من القعده هني ..؟
عليا: ننزل شوي تحت اتغير جو ..
خالد: انا بسير عند الدكتور دقايق وبرجع .. شوي شوي على ولديه .. مب اتكسرون اظلوعه وانتو تيلسونه ع الكرسي ..
وغمز لـ فارس اللي ابتسم وعدل يلسته عشان ايلسونه ع الكرسي ..
مروان: اريييي واااا .. يلا يلا جلديي ..

وفرك اديه ف بعض .. وكفخه فارس على جتفه .. وعليا واقفه وتضحك عليهم .. صدق لو عامر ومروان مب يايين وياهم .. جان مات فارس من الهم وموت قلب عليا وياه ..

لكن الحين .. ردت لهم الروووح.. شله الفساد .. ردت لهم الروح .. وهم ردو الروح للعايله .. ردو لهم ضحكتهم وفرحتهم وسعادتهم .. ردو وناستهم وحشرتهم وربشتهم .. مش بس لـ خالد وحارب وعليا .. حتى لأهلهم اللي ف دبي .. ردو لهم كل الاحاسيس الحلوه اللي فقدوها .. واشتاقولها ف اليوم اللي طاح فيه فارس .. وطيح معاه مروان وعامر ..

..

وقفت عند الباب ودقت الجرس .. واجدم حمد حط صبعه ع العين السحريه ..

شيخه: شو مشكلتك ويا هـ الحركه ..
حمد: جذه .. احب اخوف خلق الله ..
شيخه: عرفو حركاتك ..
حمد: حركات فرييج ..! اخوج مايعرفها..
شيخه: ولا بيهتم .. عادي بيفتح الباب وبيرد يرقد ..

وفعلا بنفس الوقت .. فتح حارب الباب وهو منتهي .. ويهه احمر .. وعيونه وارمه من التعب ..

شيخه: وااي .. فديييت هـ الويه والله ..
حارب اشر بـ اديه بمعنى دخلي ..
حمد: اجر وعافيه ..
حارب: اوه انته وياها .. اسمح لي ما انتبهت ..
شيخه: عادي جان اشرت له بعد .. يعني هو قدرت اتكلمه .. وانا جني ذباب اتكشني ..
ابتسم حارب بتعب وسار صوب الكنبه وطاح ..
حارب: والله تعبان  "صد صوب حمد" اتفضل حمد .. 
حمد: لا بسير انا .. واحد من الشباب يترياني ..
حارب: مرابع لي ألمان ..
حمد: لالا ربعي من البلاد يدرسون ويايه هني ..
حارب ابتسم: اوكي .. الله يحفظك ..
حمد: جي ما تسير المستشفى انته ..
حارب: مالي بارض ..
شيخه: حارب انته شايف ويهك ..
حارب: مافيني شي ..

جدمت شيخه اديها .. حطتها ع يبهته ..

شيخه: شو مافيك شي .. محتررق انته ..
حارب: حسدوني من كثر ما قالو خال وما يليق عليك .. احترقت ..
شيخه ابتسمت: عن الحركات .. اقصد ان حرارتك وايد مرتفعه ..
حمد: نش نش انسير المستشفى ..
حارب: انتو وايد اتبالغون ..
شيخه: شو انبالغ .. انته اللي تمزح
حارب: شويخ والله مالي بارض .. شلي ريلج وسيرو ..
شيخه: استح ع ويهك زيين .. يلا نش ..
ضحك حمد واجدم من حارب .. مسكه من اديه ..
حارب: والله عايشين الدور انتو الثنينه ..
حمد: نش يلا ..
شيخه: شوف اذا ما نشيييت .. والله بصورك وبطرش الصوره حق حمده ..
حارب: اتهدد حرمتك ..
حمد: كيفك عاد .. اتفاهم ويا اختك ..
شيخه: اختار .. يا توصل الصوره حق حمده .. والا تتأدب واتنش ..

ورفعت مبايلها ..

حارب: شوييخ ..
ماسوت له سالفه وصورت ..
حارب: يلسيي لا ..
شيخه: والله بطرش لها ..!
حارب: زين زين خلاص بسير ..
شيخه: افف .. تعرف انك بتسير .. وغصبا عنك .. بس مادري ليش اتعب عمرك واتعور راسي معاك ..
حارب ابتسم: وايد مستويه حرمه انتي ..
شيخه بطرف عينها: جب .. نشش ..

ابتسم حارب .. وضحك حمد عليهم وهو ماسك حارب من اديه ويمشي وياه .. واايد تعيبه علاقتهم .. يحب ييلس وياهم ويشوفهم يسولفون ويمزحون وحتى يوم يتقارضون ويتضاربون .. سوالفهم وظرايبهم .. لها نكهة خاصه ف عيون حمد .. الله يحفظهم ويخليهم لـ بعض ..


..


كانت واقفه صوب الدريشه .. ومخها ف عالم ثاني .. اللي يشوفها يعرف انها مهمومه .. يعرف ان ف داخلها شي مب قادره تتحمله عشان جذه بدا يظهر على ويهها ويفضحها .. وهالشي هو اللي مانعنها انها اتسير واتي ..

تنهدت عقب ما حست بـ شخص حاط ايده على جفتها .. مسحت دمعتها و لفت صوبه ..

شمه: هلا خالووه 
مي رفعت حياتها: بلاج ..
شمه: ولاشي..
مي: شمه ..!
شمه صدت عنها : تعبانه شوي ..
مي: مهره من 3 ايام ف المستشفى .. وانتي ماسرتي لها غير اول يوم مال ربع ساعه  .. ؟
شمه:يوم بترد البيت بسير لها ..
مي: شمه شفيج ..!
شمه: ولاشي ..
مي مسكت جتفها بـ قوه اكثر: شموه ..!
شمه: تعبانه لا اكثر ..
مي: واللي يتعب .. يوقف عند الدريشه ويصيح ..

سكتت شمه .. سارت صوب الشبريه .. يلست وردت تمسح دموعها اللي ردت تنزل بغزاره على خدها

مي اجدمت منها: شمووه .. بلاج بسم الله ..!
شمه: خالوه والله تعبانه .. تعبااانه من كل شي ..

حطت ظهر ايدها على ثمها وبدت تشهق من الصياح ومي تطالعها وهي منصدمه ..

مي: اشتقتي حق امج وابوج ..!
شمه: اشتقت حق كل حد .. اشتقت حق اميه ابويه .. اخويه .. شيخه .. سعيد .. حتى عامر ومروان وحارب.. اشتقت لهم ..
مي: هم بعد مشتاقين لنا .. بس مب بيدنا ولابيدهم..

سكتت شمه وماردت عليها .. اكتفت انها تصيح .. 

مي: وثاني ما اشتقتي له ..؟

ف هـ اللحظه .. انفجرت شمه .. صاحت من خاطرها ومي انصدمت اكثر من دموعها ..
وقفت مي ومسكت شمه من اديها..

مي: نشي انسير عنده ..
شمه: مابا ..
مي: شمووه
شمه: مابا اشوفه .. 

يلست مي ع الشبريه حذالها .. جدمت اديها منها .. ورفعت راسها ...

مي: شمه ليش جذه مسويه بـ عمرج .. وين شمه القويه .. ام لسان اللي محد يروم عليها .. 
شمه: والله ماعرف شفيني .. كارهه كل شي حولي .. مابا اشوف حد ولا ابا اكلم حد ..
مي:بس نحن نبا انشوفج ونبا انكلمج .. والله اشتقنالج شمه
شمه: خالووه ..
مي: يلااا نشي وبلا دلع ..

مسحت شمه دموعها .. نشت و سارت صوب الحمام وبنفس الوقت دخلت حمده وهي عينها على اختها اللي دخلت الحمام ..

حمده: بلاها ..
مي: انتي اللي وياها ف البيت .. ووياها ف الحجره تسأليني انا بلاها ..!
حمده: هي مضايجه من فتره .. بس ليش اتصيح الحينه ..
مي: مادري ..!

سكتت مي وسكتت حمده وياها ..

مي: حمده ..
حمده: نعم ..
مي: يوم يتي عند مهره اول يوم .. شمه ما ييت وياج ..!
حمده: امبلى ..
مي: عيل وين اختفت منو ردها البيت .. هي ييت ربع ساعه ومن هذاك اليوم ماشفناها
حمده سكتت شوي: تدرين ان مايا على بالي ..
مي: شو اللي ما يا على بالج ..!
حمده: نسيت انها ييت ويايه .. ونسيت انها طلعت وماردت  .. ويوم رديت البيت مايا على بالي انها كانت ويايه .. منو اللي ردها وعبدالرحمن يوم اتصلت به قال انه ف بوظبي من الظهر ومايقدر يمر ..!
مي رفعت حياتها: المفروض انا اللي اسأل كل هـ الاسئله .. مب انتي تسأليني ..

وسارت صوب الباب

مي: انا بسير بيت احمد اخويه عندي اغراض يايه اخذهن .. يوم اختج بتنزل تحت اتصلي بي ..
حمده: اوكي ..

وطلعت مي  .. وهي صدق منصدمه من هـ الشمه .. شحقى اتصيح جذه .. وهذاك اليوم ييت المستشفى ويا حمده .. بس مايت فوق عند مهره ..  وين سارت .. ومنو اللي ردها البيت ..!

كل هـ الاسئله ادور ف راس مي اللي قلبها معورنها على بنت اختها وهي تشوفها اول مره بهالحاله ..

..


ف بيت احمد


يالس ع الدري .. وعيونه ادور وهي مركزه ع شي واحد .. حرك راسه من اليمين شوي شوي لـ جهة اليسار .. لين ما ركز نظره بالضبط سيدا .. وفجأه .. كفخ اديه ف بعض

مايد: مااااااااااتت ..!
سيف: اخ عليييييييييييييييييييييييييك ..
راشد: وييييييييييين تمووووت يامااال المووت  اذتني حششششى مب ذبااااااااااابه .. 
غانم: ههههههههههه جتلتها ..!
راشد: لا .. ماجوف وصخ ف ايدي ..
احمد: شوووو هـ العيال الطفوووس
غانم: ههههه والله انك اتلووع الجبد ..
عبدالرحمن توه ياي: السلام عليكم
الكل: وعليكم السلام ..
عبدالرحمن: خير ان شاء الله .. شو عندكم ..
مايد: والله اسأل خالك .. استوا يد لـ اثنين  مره وحده .. واستخف ..
احمد: وانته شلك بـ احفادي ..
مايد: انا صار لي 19 سنه ولد اخوك .. ماقلت لك هاك مايد خمس ربيات سر خذ لك غرشه كوكاكولا من الدكان .. والا دخلت وانته يايب لي اسكريم توت بـ نص درهم  ..
احمد: هههههههههه نشاااد عنك انا .. هذييل عيااالي .. يوم بتعرس وبتييب  عيال عقب بتحس ..
غانم: منو بيحس .. هذا..!
عبدالرحمن: الحين كل هذا حق التوأم ..!
مايد: حق مايد ومروان طال عمرك ..
عبدالرحمن: اونه .. سموهم مايد ومروان ..!
منصور: حد يصدق هذا انته بعد ..؟
عبدالرحمن: انا قلت بعد ..
مايد: ليش ان شاء الله مب عايبتنكم اسامينا ..!
منصور: والله مروان عايبنا .. اما ماجد ف وضعه خطير ..
مايد: ماجد ف عيييييييييييييينك ..

نش من مكان وشل خشبه من القطع اللي طايحه جدامه .. وركض ورا منصور اللي سار بعيد عنهم ..


عبدالله توه ياي من داخل: هااه شرايكم ..
مايد: ف الباب والا ف عيالك ..
عبدالله: طبعا ف الباب .. والا عيالي احلى عنك .. شو ابا ف رايك ..
مايد: خيييييييييبه .. اذا  عبدالله لسانه طول عقب ما صار ابو .. بالله انا شو بيستوي بي باجر يوم بصير ابو ..
راشد: انته الشيطان بيقولك ما خليت لي شي الله يهديك ..
عبدالله: هههههههههههه استغفر الله .."اجدم منهم ويلس حذالهم" ..
راشد: ذوق منو هـ الباب ..
احمد: ذوق ابوهم ..
راشد: مب حلو ..
سيف: محد طلب راييك ..
راشد: شكرا جزيلا ..
مايد: عبوود ..

عبدالله اختفت ضحكته وسكت وهو يطالع مايد ..

مايد: بسم الله الرحمن الرحيم ..
احمد: ما تتأدب انته ..؟
راشد: عبدالله متى بتحلق عيالك ..
عبدالله رافع حياته من مايد: سابع يوم .. اذا رخصوهم ان شاء الله ..
راشد :يعني بتحلقهم ..!
عبدالله: اكييد ..
راشد: انزين ماوصيك دخيلك .. حلق هذا بنفس اليوم .. صفرررر .. ماتخلي شعره وحده ف راسه ..
مايد: هههههههههههه خسي والله ..
عبدالله: تباني اسمي ولديه مايد بعد لا .. مينووون انا ..!
مايد: لا تسميييه .. اصلا ولدك روحه بيركض ورايه .. بيقول لي الله يخلييك ابا اسمك ..
عبدالله ههههه قم زييين ..
مي توها يايه ونوره وياها : ماشاء الله .. متيمعين هني ..
سيف: فدييييييييييت هـ الويييه ..
مي: انته وايد عيااار ..
سيف: والله اشتقت لهاا عموووه ..

سار صوب نوره .. شلها وباسها..

راشد: عموووه شو رايج ف الباب اليديد..
مي: جميل ..
راشد: شكرا والله .. تدرين يوم اخترته الكل عارضني اونه وع وشو ها .. عقب ما يابوه وركبوه .. تخبلو عليه .. ما اتشوفينهم يالسين ع الدري جنهم عمال يتريون الباص ..
غانم:  الف من زمان بعد
مي: صدقتك ..
راشد: افا ..
مي: ولا جنه عبدالله مطرش لي الصوره قبل كم يوم وماخذ رايي ..
راشد: ثرني انا اللي اخترت وهو قال اصبر بشاور مي ..
مي: من جذذذبك .. ان عبدالله ما يقول لي مي .. دايما يقول لي عموه مي ..
راشد: ايهي علييينا .. بتصدقين صدقي ما بتصدقين بـ ....

سكت وابتسم .. عقب ماشاف احمد واقف جدامه وهو ماخذ القب اللي كان ف ايد مايد ويدوره بـ معنى " استعد يايتك الظربه"

راشد: لا صدقي الله يخليج عن اروح فيها ..!
مي: ههههههههه صدقت صدقت .. بس فكني خلني اسيير
مايد لوا على عمته : انتي كييف يايه ومودره اختنا ف المستشفى روحها ..
مي: ف المستشفى مب ف البر ..
مايد: حتى لووو .. منو سمممح لج ..
مي: جب زيين ..
مايد: خيبه .. عمي احمد عطها من القب اللي ف ايدك ..
احمد: بعطيك انته واخوك عشان تفكوني من لسانكم ..
عبدالله: اذا ع اللسان لازم تعطيهم كلهم ..
مايد:  ثر باجر عيالك بيكبرون وبيستوون اخس عنا .. بنجوف كيف بتعطيهم ..
عبدالله: بسم الله عليهم ..
مايد: بيتعلمووون وانا خالهم ..
عبدالله: انته بالذات ما بخليك اتيي صوبهم .. ولا بخليهم يعرفون منو مايد اصلا ..
مايد: جي على كيفهم .. ماخذين اسمي .. ومب معترفين بي بعد ..
غانم: ذبببحتنا انتتته ماخذين اسمي وماخذين اسمي .. على قولت منصور .. ماجد ..
مايد: ماجد ف روووسكم" صد صوب مي" عمووه .. اختيه شخبارها ..  متى بيرخصوونها ..!
مي: مااادري.. يا باجر او اللي عقبه ..
مايد: اختصار الحديث "صد صوب عبدالله" متى بناكل عيش ولحم ..
عبدالله: مب قبل ما احلقك ..
مايد وهو يهز مي ويصرخ: تحلقني ..! هزلت والله يا مايد بدر ..
مي: ذبحتنيييييييي مااااااااااايد .. بس فكنيييي اففف ..

دزته وطاح مايد ع الارض .. والباجيين يضحكون عليه .. ما يتأدب هـ الانسان .. لازم يعني يسوبه حركه عشان يصخ ..!



هناك تعليق واحد:

  1. غير معرف8:51 م

    ههههههههههههه قسم بالله انهم شرات شباب عايلتنا بالضبط ...روايتجج كلمة ابداع شوي عليها والله لو يلست اوصفها ما بخلصص .. الله يوفقج ي اختي يارب ..

    (اختج مروة)

    ردحذف