الجزء الـ25 (1)

كانت منسدحه ع الشبريه .. اتريح جسمها اللي تحس انه متكسر ..

يلست عقبها ع الشبريه .. صدت يمين صوب البلكونه .. شافت فله خالها بدر .. دمعت عيونها وردت طاحت ع الشبريه ..

بندت عينها .. ثواني واهتز فونها ..

شلت شمه الفون وفتحت محادثه الشخص اللي حاشرنها ..  

حمده: قبلي الاضافه ..

شمه: منو هاي ..!

حمده: قبليها وبتعرفين منو ..

شمه:عن الحركات نك شباب هذا ..

حمده: استغفر الله .. قبليها وبتعرفين منو ..

شمه: افففففففففففف

قبلت الاضافه .. وردت فرت الفون وبندت عينها .. ثواني و وعاها الفون مره ثانيه وهو يهتز

شمه وهي معصبه : استغفر الله العظيييييييييييييم

شلت المبايل وفتحت المحادثه ..

.......: اخت شمه .. 

شمه: نعم ..

.......: نعم الله عليج الغاليه .. 

شمه: عفوا منو معايه ..؟

.......: معاج خدمه دليل الوظائف الغاليه

شمه: شغل الحراميه وعدم المصادقيه هذا انا ما ادانيه ..

.......:لا فديتج.. نحن عندنا مصداقيه ف الكلام ..

شمه رفعت حياتها: منو انته

.......: واحد يبا يتعرف ..

شمه: اتعرف على غيري .. لا بعد فديتج .. اتفدوك 17 ينّي ان شاء الله

.......: ماقدر .. انا احبج انتي ..

شمه: حبك برص وداسك عفريت .. يلا يلا باي ..

.......: لحظه لحظه .. ليش عصبتي ..

شمه: مع السلامه ..

.......: شموووووووووووه لحظظظه ..

شمه: منو انتتتتتتتتتتته ..

.......: قسسم بالله شخص يحبج مووووت ..

شمه: افف والله مب متفيجلكم ..

.......: ياللي ما تستحين على ويهج .. شهر كامل مب شايفتني ولا تدرين عني .. وتقولين مب متفيجتلكم .. آه من قلب على قولت عامر ..

شمه شهقت وعدلت يلستها : شيييييييييييييييييييييييييخه ..!!!!!!!!!!

شيخه: لااااااااااا .. خدمه دليل الوظايف الغاليه .. وضحكت ..

شمه: مااااااااصخه والله .. صدددق كنت بحذفج ..

شيخه: ههههههههههههه والله مادري ان حمدوه ما خبرتج .. يوم قلتي منو معايه قلت بستهبل وياها شوي .. بسوي لها جو ..

شمه: حياااااااتي .. شخبارج ..

شيخه: بخير الحمدلله . انتي شحالج ..

شمه: الحمممدلله .. اشتقت لج يالدبببببببببببببببببببببببببببه ..

شيخه: ههههههه وانا اكثر ..

شمه: وييينج .. مختفيه لاحس ولا خبر ..

شيخه: شسوي .. فوني اتووووفى .. لا يرسل ولا يستقبل ..

شمه: الله يرحمه .. شيخو .. ماقدر اصبر عنننج ابا اسمع صوتج ..

شيخه: عطيني رقمج ..

شمه: لا والله ..!

شيخه: هههههههه قلت لج فوني خربان .. والله خربان فارتنه ولا ادري عنه .. ف الارقام اللي فيه ظاعت ..

شمه: انزييين ..

عطتها الرقم .. دقايق ورن مبايل شمه .. رفعته وشافت رقم من برع .. يعني اونها ماتعرف منو ..!

شمه: هلابك .. يا بعد حالي وعيني واصدق احبابي هلا .. باللي عجزت اوصل من ابعاد الوله بابه هلا باللي يموت من الغلا فيني .. ويحيابي هلا .. باللي اموت من المحبه فيه .. واحيابه هلابك .. كثر مامر الصباح الغث طلاّبي هلابك .. كثر ماحن المكان لجلسة احبابه .. اكمل ..!

شيخه: لالا بس دخيلج .. خسرتيني ..

شمه: ياللي ما تستحين .. ولا تخيلين .. ولا تستاهلين اني اكون بنت عمتج اصلاااااااا

شيخه: ههههههههههههه حياااااااااااااااتي اشتقتتتتتتتتتتتتت لج واااااااااايد ..

شمه: دببببببببببببه وحددددددددددده

شيخه: ههههههههههههه ماتغيرتي شمووه ..

شمه: عداااال .. يعني انتي اللي تغيرتي ..!

شيخه: جببب .. وشووو جو دبي ..

شمه: اففف بدت بدت

شيخه: ههههههههههههههه والله البرد لا يطااااااااااااااااااق ..

شمه: محد قالج .. يوم كنت اقولج خذي لج شتوي اكثر ..

شيخه: بس جب ..

شمه: يجبج .. جفتي امايه ..!

شيخه بيأس: لا ..!

شمه: ليش ..!

شيخه تنهدت: من يومين وهي ف المستشفى "وابتسمت" وانا ماقدر اسير

شمه تغير شكلها: ريلج زفت ..!

شيخه: لاااا .. شو هـ السؤااااااال الغبي .. حد يسأل بهـ الاسلوب ..

شمه: والله صوتج حسسني جذه ..

شيخه: غبيه هـ البنت والله ف حياتها ما بتتعلم الرقه ..

شمه: ههههههه " رققت صوتها" شخباره وياج "ردت طبيعيه" حلو جذه ..!

شيخه: هيه حلوو ..

شمه: انزين جاوبي ..

شيخه: بخير الحمدلله ..

شمه: بخير بخير ...! والا بس تقصين عليه ..؟

شيخه: لا والله بخير بخير .. والحمدلله ..

شمه: مرتاحه وياه ..!

شيخه: وايد .. وعشان ماحس اني مب مرتاحه .. ماسرت ولا ابا اسير المستشفى ..

شمه: مافهمت ..

شيخه طلعت برع صوب البلكونه: شمه ماقدر اشوفه وهو مكسور "تنهدت" ادري اني بنكسر وياه ..

شمه تنهد وعقبها ابتسمت: اهم شي انج تكونين مرتاحه .. ودام انه زين وياج .. لا تتخبلين وتخلينه يحس ب شي ..

شيخه: وهذا اللي احاول اسويه شموه ..

شمه: يعني ما شفتي حد منهم ..!

شيخه: امبلى .. حارب ومروان يووني اول يوم مادري ثاني يوم..

شمه: وايد عليج ..

شيخه: انتي ليش ما ييتي وياهم ..

شمه: ايي شو اسوي ..

شيخه: اتيين عندي ويا ويهج .. شو بعد اتيين شو اتسوين ..

شمه: حق شووو اخسر 4000 تذكره واسير اتصور فوريه جني بقدم ف عمل عمال وفيزا .. وانتي ورا باجر بتين ..

شيخه: منو قالج اني بيي ورا باجر ..

شمه: افف اقصد يعني ماباجي شي وبتردين ..

شيخه متردده: شمه ..

شمه: خير ..

شيخه: ابا اقولج شي .. ماقلته حق حد لين الحين.. بس ماباج تعصبين ..

شمه: بلاج شيخو ..

شيخه: شموه انا ..

شمه: رمسي مالت علييج .. عقيتي لي قلبي ..

شيخه: والله ماباج تزعلين .. انا وايد احبج .. ومشتاقتلج يمكن اكثر مما انتي مشتاقتلي ..بس شسوي.. شمه والله مب بيدي .. انتي عارفه لو كان بيدي جان ما ييت هني اصلا ..

شمه: شفيج شيخه ..!

شيخه خذت نفس: شمه انا مابرجع الحين ..

شمه: متى عيل ..!

شيخه: هو يدرس .. وبيتخرج شهر سبعه

تغير شكل شمه وسكتت شويه

شمه: يعني بتمين لين شهر 7..

شيخه: هيه ..

شمه: اوكي .. الله يحفظكم 

شيخه: شمووه ..!

شمه: ببند عنج ..

شيخه: شمووه عن الحركات ..

شمه: والله ماقدر ارمس ..

شيخه: والله آسفه شمه .. بس مب بيدي ..

شمهك اصلا انا مضايجه من قبل ..

شيخه: ليش ..

سكتت شمه ثواني .. وردت رمست وهي صوتها متغير ..

شمه: شيخو .. عمار شل ثاني وطلعو من البيت ..

شيخه: نعم .. وين سار ..

شمه: مادري .. بس قال انه ما بيرد ..

شيخه: كلمتيه اليوم ..!

شمه: اتصلت مرتين ومارد عليه ..

شيخه: طيب ليش .. شو السبب ..

شمه: ثاني طاح واتعور .. امس ودوه المستشفى سووله خياطه ورقدوه .. اللي فهمته ان ابوج السبب .. بس شو السالفه بالضبط مادري ..

شيخه منصدمه: ابويه مطيح ثنوي..!

شمه: هيه ..

شيخه تنهدت: عطيني رقم عمار انا بتصل به ..

شمه: اوكي ..

شيخه: الحين انتي يالماصخه .. اتصيحين عشان عمار .. وانا يالظالمه صار لج شهر مب جايفتني .. ولا نزلتي دمعه من دموع التماسيح عشاني ..

شمه: انتي سكري بس وانا بصيح ..

شيخه ضحكت: ماااصخه شمووه .. والله احبببببببببج ...

شمه: وانا اكثثثثثر والله ..

..

ف دبي

نزل راسه يبند قميص ولده اللي يطالعه بـ الم .. بدون لا يبتسم ف ويهه حتى ..

عمار ظرب ثاني بصبعه على خشمه: حوو ..

ثاني وهو زعلان: لاقول حوو .. قول ثاني ..

عمار ابتسم: فديت هـ الثاني والله .. تعال

مد له اديه .. اجدم ثنوي من ابوه .. حظنه وحط راسه على جتفه .. سار عمار صوب الكنبه ويلس .. وحط ولده على ريله ..

عمار: تعبان ..!

ثاني: هني عورني " واشر على راسه"

عمار: فديتك .. ليته فيني ولا فيك ..

سكت ثنوي وسكت عمار وياه ..

عمار: وين تبانا انسير ..!

ثاني: عمي مروان ..

عمار: ساحرنك هـ المروان .. اجوفك هـ اليومين وايد تطريه .. بتسير ماكدونالز ..!

ثاني: لا ..

عمار: انسير البيت ..

ثاني هز راسه بـ لا .. ارتجفت شفايفه ودمعت عيونه

عمار مسح دموع ثاني بـ ابهامه: ما بنسير "جدمه منه وحظنه" ما بنسير ..

سكت ورد اتأمل ولده .. ثواني ورفع راسه عقب ما سمع صوت الباب وهو يندق ..

عمار: اتفضل ..

ميره: السلام عليكم ..

عمار: وعليكم السلام ..

ميره وهي تكلم ثاني: مرحبا ..

صد عنها ثنوي الصوب الثاني ومارد عليها ..

ميره: افا .. انزين انا شو ذنبي يعني متعنيه ويايه لين هني عشان تلبسني .. !

عمار: حرام عليج .. تعبان ولديه ..

ميره: فديته والله .. مايشوف شر ..

عمار: الشر ما اييج ..

ميره حطت الخريطه ع الطاوله: يبت له ككاو وجبس وهالخرابيط ..

عمار: صايم عن المأكل والمشرب والكلام ..

ميره: ويديه ليش ..!

عمار: طفران وتعبان ولايعه جبده من نفسه حتى ..

ميره: شو مسوين به انتو .. لهـ الدرجه تعبان عشان يكره كل شي..

عمار ابتسم باستهزاء: ابويه اللي مطيحنه ..

انصدمت ميره شبكت اديها ف بعض وبدت اتنقع صبوعها ..

 ميره: احلف ..!

عمار: يعني ويهي يليق عليه انه يمزح وهو ف هالحال ..

ميره: ليش انزين ..!

عمار تنهد: لانه ولديه ..

ميره: عمار ..  

عمار: شفيج ..!

ميره: ثر "سكت شويه"بنت عمتيه ردت من السفر 

سكت عمار .. انصدم .. بس ما بين ابدا .. رد اطالع ولده وكأن الموضوع مب هامنه ..

عمار: وليش تخبريني انا ..!

ميره: لانها امسات ييت المستشفى .. وهـ الايام بتي بكثره .. وانته بعد اتي ..

عمار: ولا يهمج .. هـ الانسانه ما تعنيني شي ..

ميره: بس ثاني يعنيلكم انتو الاثنين ..

عمار شل ثاني ووقف: يعني لي انا وبس .. لانه .. ولديه انا وبس ..

ووقف عند الباب ..

عمار: يلا تعالي .. بيروغونا عقب شوي .. يبون الحجره حق مريض ثاني ..

ميره: انزين انته وين اتروم تسحب الشنطه واتشل ولدك .. يبها عنك انا بسحبها ..

عمار: لا تحسسيني عاد امشي ..

ميره: انته اللي لا تحسسني .. يبها ووايد لاتتحرطم ..

ضحك عمار .. ودر الشنطه ومشى .. اجدمت ميره سحبتها ومشت وياه ..

عمار: ييلس عندج..؟

ميره: والله مره بس يلس .. بس ما ادري اذا يلس عشاني والا عشان ........

عمار: رشود ..! انزين ليش ما تقولين اسمه ..

ميره حاست ثمها: انته ف كل شي متعني ..

عمار: يااارب صبرررك .. على فكره ميره ..

ميره: نعم عمار..

عمار: انا ف حياتي ما تحملت حد كثرج ..

ميره: احسن .. وانا ف حياتي محد هددني كثرك ..

عمار: لا اطمني .. اذا استمريتي بـ علاقتج مع راشد .. ف بتسمعين وايد تهديدات ..

ميره رفعت حياتها: شو قصدك ..

عمار: ماشي سلامتج .. امشي امشي ..

ميره: شل شل شنطتكم .. مابي وياكم ..

عمار: احسن يبيها ..

علقت ميره الخريطه اللي فيها الككاو والجبس ف الشنطه وهدتها ..

عمار: بعد ليش علقتيها شليها مابياكل ..

ميره جتفت اديها ورفعت حياتها: اذا ما كل عطه حق راشد .. بياكل ..

حطت اديها ع خصرها .. وعمار امركز عيونه عليها .. وعقبها مات من الضحك .. صدق محد قادر يغير مود عمار وهو مصعب او مضايج .. غير خبال ميره بنت خاله ..

ميره: ما يضحك ..

عمار وهو يضحك : شفيج انتي ..!

ميره: ولاشي .. اسير عند ابويه ابرك لي .. مضيعه وقتي وياك ..

عمار: ميره .. ما استهبل .. صدق شفيك ..

ميره رفعت حياتها: قلت لك ولا شي ..

عمار تنهد: اعرفج عدل .. سنين بيني وبينج .. مب يوم والا يومين .. عشان اتقصين عليه شرات ما تقصين على راشد واتقولين مافيني شي ..

ميره سكتت عنه وصدت الصوب الثاني ..

عمار: تعالي  ..

ميره: انا مب ناقصه حد يغثني اذا شافني وياك ..

عمار: هاي اللي بتسويلنا فلم هندي .. ما بنسير مكان بنطلع برع شوي بعيد عن جو المستشفى ..

ميره: وشحقى كل هذا ..

عمار ابتسم: لاني متعود على ميره اللي دايما تبتسم .. واذا ماكانت مبتسمه ف تكون حايسه ثمها بـ حركه جدا تقهرني .. بس ف كل الحالات .. تكون ميره هي الانسانه الوحيده اللي قادره اتضحكني واتغير مودي وانا ف اخس حالاتي .. ماتحسين الحينه اني المفروض ارد لها هالشي وانا اشوفها لاول مره ف حياتي وهي مكسوره من داخلها .. بس واقفه جدامي وتمثل انها قويه ..!

سكتت ميره .. نزلت دمعتها وبدت شفايفها ترتجف .. عورت قلب عمار وقطعته .. مشى ومشت وياه سايرين برع ..

..

كان يسوق بسرعه جنونيه وكل شي حوله ينبهه بهـ الشي .. بس حظرته مسوي طاف

رن مبايله .. رفعه بدون مايشوف منو اللي متصل .. رد عليه وحطه عند ذنيه

راشد: الو ..

حارب: الله يغربل ابليسك ان شاء الله .. خفففف السرررررعه ..

راشد: ههههههههههههه بلااااااك انته

حارب: رشود والله اسد الخط بويهك الحينه .. خففف بسرعه ..

راشد: انزين انزييين .. خفيييت ..

حارب: عطني بيت شعر رشودي

راشد: وانته متصل تسمع اشعاري ..

حارب: عطنييي ..

راشد: اخوي اللي على دربه تسير وتتعب الاخوان اخوي اللي تقدرني جميع الناس علشانه

انا لولا دماك اللي جرا بداخل الشريان لاقول اني بدونك موقعي مجهول عنوانه انا متعّود اخذ منك لامني مدحت انسان عسى اللي ماقدر يمدح جنابك يقطع لسانه ..

حارب: ويييه .. الفراق سوا بك جذه ..!

راشد: الشوووق الشوووق يا حارب ..

حارب: فديييييتك والله .. شخبارك ..

راشد: بخير وسهاله .. انته شحالك

حارب: دامك بخير .. انا بخير الحمدلله

راشد: دوووم ان شااااء  .. شو صحتك .. عسى ما تعاديت من مروان النحس بس

حارب: يحليله مروان .. من اول يوم وهو طايح ع الشبريه ..

راشد: زين تفتكون من حشرته ..

حارب: حرام عليك .. والله شكله يعور القلب ..

راشد: ادري به يوم يتعب .. موليه يطيح ع الفراش .. شويخ شخبارها ..

حارب: الحمدلله ..

راشد: شفتوها ..!

حارب: هيه وسوت لنا فلم هندي بعد ..

راشد: هههههه فديتها والله .. ماتغيرت .. احلوت اخسفت متنت ..

حارب: لا مثل ماهي ..

راشد: وريلها شخباره وياها ..

حارب: والله اتقول زين ..

راشد: وانته شو تحس ..!

حارب: انسان فنان والله .. حسيته وايد زين وياها ..

راشد: يلا الحمدلله .. وفارس شخباره .. شو قالوله الحين ..

حارب: والله بعده تعبان .. كان يشتكي من الم ف الظهر .. الحين يشتكي من ايده وظهره ..

راشد: الله يكون ف عونه ..

حارب تنهد: يقطع قلبي يا راشد يوم اشوفه .. من كثر الالم ما يرمس ولا حتى يبتسم ف ويهنا .. ومرات تشوفه يصيح ويأن .. والله احيانا ماقدر اشوفه واطلع برع ..

راشد: الله يحفظه ويشفيه ويرده بالسلامه يارب ..

حارب: آمين ..

راشد: وانته لا تسوي هـ الحركات .. امه وابوه مب ناقصين ..

حارب: والله احاول .. بس ماقدر .. احس اذا شفته اكثر .. عادي اصيح وياه ..

راشد: انته اونك ساير مرافق. .

حارب: ليش المرافق ما يصيح .. ما يحزن .. ماعنده قلب ..

راشد: صيح صيح حبيبي .. بس مب جدامهم .. اتصل ب حرمتك وصيح عندها ..

حارب ضحك: والله انك ماصخ ..

راشد: مادري عنك ..

حارب: شخبارها اللي تقرب لك ..

راشد: ماعرف عن اخبارها ..

حارب: اونه ..

راشد: والله .. من يوم ماسافرتو .. وانا لا اكلمها ولا اشوفها ..

حارب: ليش اضاربت وياها ..

راشد: شحقى اضارب وياها .. انته اييه ليكون تتحرانا حبايب ونيلس انسوي سوالف هـ المغازلجيه ..

حارب ضحك: بتحلف انك ما حبيتها ...

راشد: الحب اللي ف بالك لا ..

حارب: افا..

راشد: وانتتته ليش ابا افهم

حارب: ابا اامن مسقبلك قبل ما اعرس واطلع من البيت ..

راشد عقد حياته: تطلع من البيت..!

حارب تنهد: يوم بنرجع البلاد بنتفاهم ..

راشد: نعم نعم ..

حارب: راشد مب وقته ..

راشد: وجي ما خبرتني من قبل..

حارب: شفت الظروف اللي مرينا بها .. مناسبه اني افتح وياك هـ الموضوع

راشد: لا .. مناسبه انك تخليني احب بنت الناس غصبا عني ..

حارب ضحك .. وسكت عن راشد ..

راشد تنهد: عمار طلع من البيت ..

حارب: قالت لي حمده .. بس شو السبب ..!

راشد: آآآخ .. والله مستحي اقولك ان ابوك ظارب ثنوي ..

حارب منصدم: نععععم ..!

راشد: لدرجه انه نزف ورقدوه ف المستشفى ..

حارب: احلف انته بس ..

راشد: والله العظيم ..

حارب: رشود مستحيل اللي تقوله ..

راشد: كان يرسم ع الاوراق .. وطلعت الاوراق مالت ابويه .. يوم وصل ابويه انا كنت اطفر ثنوي .. فر عليّه القلم .. وظرب القلم ف عيون ابويه بالغلط ..

حارب: انزين ..!                                                                                                     

راشد: نش وصفعه .. عقبها دزه ع الدري .. وانطر راسه

حارب: وانتتته شو خانتك ..

راشد: والله ..! انا اتصفعت قبله .. ودزاني ع الطاوله .. اتكسرت ظلوعي .. وماقدرت الحق عليه .. لين ما نشيت .. جد ابويه داز ثنوي ..

حارب: وعمار .. ؟

راشد: عمار عور لي قلبي يا حارب .. نزل من فوق شرات الميانين .. ركض وشل ولده بس ماقدر يمشي عقب .. عطاه حق محمد ووديناه المستشفى .. والله ثنوي يصرخ واحس عمار اللي يتألم ..

حارب تنهد: مالومه اذا طلع من البيت عيل ..

راشد: ومحمد بينتقل اخر هالاسبوع ..

حارب: اونه .. زين ماشاء الله ..

راشد: هيه ماشاء الله .. ومافي حد ف البيت غيري انا ومايد ..

حارب: يلا .. فتره وبنرجع ان شاء الله

راشد: وعقبها بتعرس وبتطلع

حارب: ذلني الحينه لين ما ارجع ..

راشد: لانك قاهرني بس مابرمسك الحينه ..

حارب:احسن .. انا لو ادري ان بعادي عنك بيعقلك جذه جان من زمان سافرت ..

راشد: جب جب .. يلا باي..

حارب: زعلت ..!

راشد: هيه بحط راسي ع المخده الحين وبصيح ..

حارب: هههههههههه سلم سلم ..

راشد ابتسم: الله يسلمك .. انته بعد سلم ..

حارب: يبلغ ان شاء الله .. مع السلامه

راشد: مع السلامه ..

بند عن  اخوه وفر المبايل ع السيت اللي حذاله وابتسم .. يالله شكثر مفتقد هالانسان ومفتقد حشرته .. مفتقد وجوده وعصبيته على حركاته واغانيه اللي يحشر بها الدنيا .. مر اسبوع على غياب حارب .. وراشد مب قادر يتحمل اكثر .. بعد هالمره يقوله بطلع من البيت بكبره ..!

..

ف السياره ..

يالس ع الارض و مثبت ايده بـ الدرج اللي يفصل سيت السايق عن السيت اللي حذاله .. ينقل نظراته بين ابوه وبين اللي خاتم الالعاب ع ويهها .. وهو حاط ايده على خده ..

عمار تنهد: ميره

ميره وهي بعدها اتصيح : انته والله اتضيع وقتي .. افتح الباب خلني اسير عند ابويه ..

عمار: ماقدر اخليج اتسيرين وانتي جذه ..

ميره: اففف لاتحسسني عاد انك وايد مهتم .. افتح الباب ..

عمار: ليش اتقولين جذه .. ؟

ميره: انته الوحيد من اخوانك اللي تعرفني من قبل .. وتعرف وضعي وتعرف الحاله اللي انا عايشه فيها.. تعرف ابويه شو فيه .. ومن متى .. حضرتك وايد وقفت معانا عشان الحين تقول لي ماقدر اخليج وانتي جذه..!

عمار: مشكلتج انج تحكمين ع الناس باللي تشوفه عيونج .. وانا نصحتج اتغيرين هـ الشي ..

ميره: احتفظ بـ نصايحك لـ نفسك ..  افتح الباب خلني اسير ..

عمار: انا كلمت الدكتور وشرح لي كل شي .. وقال لي ان انتي رافضه هـ العمليه " سكت شويه" ليش رافضتنها ..!

ميره: تبا تفهمني انك مهتم لـ امري وامر ابويه ..؟

عمار: انا مهتم .. حتى لو انتي مافهمتي ..

ميره: مشكور .. بس اهتمامك يا متأخر وايد .. عقب ما انتشر المرض ف جسمه .. وعقب ما وصل لآخر مرحله .. وعقب ما وصلت لدرجه اني اختار الطريقه اللي بيموت فيها ابويه "وصرخت" يا اني اخليه يستمر بالكيماوي .. لين ما يحرق كل شي بداخله ويموته .. او اني استعيل بـ موته واوافق ع العمليه

وصاحت من خاطرها ..

ميره: مابا اظيع ولا دقيقه .. اكثر عن الدقايق اللي ظيعتها معاكم .. ابا اتم معاه اكثر .. ابا اشبع منه وانا وادري اني مستحيل اشبع منه .. ع الاقل ابا ارضي ضميري .. واحس اني سويت له شي يخليه راضي عليه .. ابا اعرف انا شو مصيري عقبه .. كيف بعيش .. ويا منو بعيش .. ووين بعيش اصلا .. تدري ليش.. لان ما عندي اخو .. وادري ان اللي ما يسألون عني الحينه .. باجر بيوني يطالبوني بـ نصيبهم ف بيتنا " واشرت على عمرها" ف بيتي وبيت ابويه ..

حطت راسها ع الدرج اللي جدامها وردت اتصيح .. ما اجرأ عمار يعلق على كلامها او يرد عليها او يشاركها حتى ف شي .. هو يحس نفسه ضايع .. يحس انه وحيد ف هـ الدنيا وماله حد .. رغم ان اخوانه كلهم معاه ويحبونه اكثر من اي شي ثاني ف هـ الدنيا .. عيل ميره شو اتقول اللي صدق مالها اهل ولا اخوان ولا ام .. والحين اتشوف ابوها وبيت ابوها يروحون منها ..!

..