الجزء الـ21 (1)

المسا

فتح الباب اللي ورا  ف فله عليا .. اجدم ولده وايج من الباب ورد اطالع ابوه

ثاني: محدهم .. كلهم ثارو ..

عمار: انته سر فوق .. بتشوفهم ..

ثاني: انا خاف ..

عمار: اتخاف من شو ..

ثاني: هناك ريال كبييييييير ..

عمار عقد حياته: ريال كبير ..!

ثاني: هيه يعثب عليه .. كله يقول لا حشرون " لا تحشرون "

عمار ابتسم على لغه ولده: عبدالرحمن ..!

ثاني هز جتفه بـ معنى ماعرف

عمار: بتسير عند عموه مهره ..!

ثاني: لا ما بثير ..

عمار: والله .. عيل وين بتسير ان شاء الله ..!

ثاني: بثير عمي مروان ..

عمار: مروان ف المستشفى ..

ثاني: ثووله ابررره..!

عمار: وانته اي حد يسير المستشفى يعني يسووله ابره ..

اجدمو من دري الباب الرئيسي لـ فله عليا ويلسو هناك ..

عمار: شرايك اوديك عند الحرمه اللي تاخذ لك العاب

ثاني: بتوديني ألعاب .. ؟

عمار: والله انته وشطارتك .. يوم انك قدرت تخليها تتغير معايه انا شخصيا .. ف ممكن تخليها تتغير مع نفسها وحياتها ..

سكت ثاني لانه اصلا مافهم ولاشي من اللي قاله ابوه .. وسكت عمار وياه دقايق ..

عمار: ثنوي ..

ثاني: نعم ..

عمار: تعرف منو هـ الحرمه ..

ثاني هز جتفه: لا ..

عمار: هاي .. اميه ..

ثاني رفع حياته بـ براءه طفوليه: ماماتك .. !!

عمار ابتسم: هيه .. ماماتي

سكت ثاني ثواني ..

ثاني: بابا..

عمار: عيون بابا ..

ثاني: وين ماماتي انا ..!

عمار انصدم من سؤال ولده .. عقبها تنهد وحظنه: انا ماماتك ..

ثاني: اوييه .. اييه انته ريال ..

عمار ضحك: عادي .. ما يستوي اكون امك وابوك ..!

ثاني ابتسم بـ براءه ودز ابوه: اييه .. لا اغايضني " اتغايضني"

عمار: نعم نعم .. شو بعد لا تغايضني .. منو معلمنك ..

ثاني هز جتفه بـ معنى ماعرف .. ورد اجدم لـ حظن ابوه

سعيد توه ياي: السلام عليكم ..

عمار: وعليكم السلام ..

سعيد: شخبارك ..

عمار: بخير الحمدلله انته شحالك ..

سعيد تنهد: الحمدلله ..

عمار: بلاك..!

سعيد اجدم منه ويلس حذاله: قبل يومين كلمت ابويه وخبرته عن حادث فارس ..

عمار: انزين ..؟

سعيد: الضغط ارتفع عنده .. وتعب عليهم ..

عمار خذ نفس: استغفر الله .. وشخباره الحين ..

سعيد: نفسيته وايد تعبانه .. هو هناك وقلبه هني عند فارس ..

عمار: وانته قلت له عن كل شي بالضبط ..

سعيد: غصبا عني قلت له  .. انا اوردي مطرش التقارير .. وطيارتهم آخر هـ الاسبوع .. كيف يسافرون وابويه ما يدري ..

عمار: قلت له انهم بيسافرون..؟

سعيد: هيه .. وهو قال بيسير قبلهم هناك .. وبيرتب حجز الفندق .. وبدايه الاسبوع الياي موعده مع الدكتور ..

عمار: ان شاء الله تطلع رمستهم كلها غلط .. ويكون الموضوع بسيط ومايحتاي كل هـ الخوف اللي زرعوه فينا ..

سعيد: ان شاء الله ..

عمار: انته متى بتسير ..

سعيد: اليوم المسا .. باجر بتبتدي الدوره ..

عمار: بلاك سعيد .. شحقى مهموم جذه ..

سعيد: ضاجت بي الدنيا يا عمار .. 

عمار: افا بس افا ولد عمي .. ونحن وين سرنا .. يا عمي خلك ف شغلك انته .. فارس مب ساير روحه .. معاه امك وابوك .. وربعه المخدّي .. وحارب وياهم .. واذا على خواتك واخوانك الصغار ثر ما يحتاي توصونا عليهم .. هذيل اخواننا وخواتنا ..

سعيد: تسلم عمار .. فيك الخير والله ..

عمار: اقول بلا هـ الافلام والمسلسلات ويلا قم خلص شغلك وهـ النفسيه غيرها .. استعد لـ باجر وخلك كوول بن عمي "وقف" وخلني اسير اشحت لي حد يمسك هذا ..

سعيد ضحك: عيل شمه وينها عنه ..

عمار: مادري به الماصخ .. مب طايع يدخل بيتكم ..

سعيد: وين بتوديه عيل ..

عمار: بجوف راشد والا حارب ..

سعيد: خلاص عيل .. اشوفك على خير ان شاء الله

عمار: ان شاء الله .. مع السلامه ..

مسك عمار .. ايد ولده ومشى ساير صوب سيارته .. فتح الباب .. ركب ولده وركب هو من الصوب الثاني .. حط مبايله عند اذنه .. وحرك السياره ..

عمار: الو ..  اقولك دوامي عقب نص ساعه بالضبط واذا تأخرت دقيقه وحده

راشد قطع عليه: بيفنشونك .. انا ف المستشفى ييبه ..

عمار: وانتووووووو شوو اداومون ف المستشفى .. نص الليل عافدين ع الريال .. خلاص ردو بيوتكم خلو الريال يرتاح ذبحتوووه ..

راشد: انا مب عند فارس ..

عمار: اوه اسمح لي .. انته حاله ثانيه ..

راشد: انته وولدك بتفكوني والا شو ..

عمار: حرام عليك والله بيمل من المستشفى .. لاعت جبده اصلا .. من المستشفى للبيت من البيت للمستشفى ..

راشد: والله شو انسوي يعني ..

عمار: غامضني والله خاطري اوديه الدوام ويايه ..

راشد: عشان صددددق يشلك المدير يفرك برع انته وهو .. يبيه زيين .. نص ساعه عقب بطلعه شوي بوديه الالعاب ..

عمار: تقص عليه انته ..!

راشد: فاااضي لك انا عشان اخرط .. والله بطلعه .. انته ييبه الحين لين 9 عقب بنظهر بلعبه وبعشيه وبرده البيت وبرررقده بعد .. كم ثاني عمار عندي انا ويا اسمه المنقع

عمار ضحك: ودك انته بـ واحد شرات ولديه

راشد: حد قال شي عن ويهه الخسف .. انا قلت اسمه المننقع ..

عمار: بس زيين .. دقايق وانا عند باب المستشفى .. انزل شله .. بعدين تعال ..!

راشد: وين ايي بعد ..

عمار: كيف بدخله .. انتهت الزياره ..

راشد يغني: رد الزياااااااااااااااااااااااره علينا  يا حلو الأطباع ما عدت أقوى فراقك أكثر من إسبوع..

عمار: جب جب يلا باي ..

راشد: هههههههههههه انا بدخله شعليك انته ..

عمار: ايه مب اتقص عليه تخلي ولديه تحت روحه .. وانته تسير فوق ..

راشد: احلف انته بس ..

عمار: يلا يلا انزززل وصلت انا ..

راشد: مسرع عمار

عمار: الله اكبببر ..

راشد: بخبر عليك عموه عليا

عمار: سر سر غثها .. ناقصه هي .. انته كمل عليها ..

راشد: والله انته اللي ناوي تكمل عليها ..

عمار: رشود صخ ويلا انزل بسرعه ..

راشد: زيين يلا باي ..

بند راشد وصد صوب ميره ..

راشد: بنزل شوي بييب ولد اخويه ..

ميره: ثاني ..!

راشد: هيه .. و عقبها بنطلع نلعب شوي ونتعشى ..

ميره: بتلعب وياه انته ..!

راشد: هيه .. بركبه الحصان اللي يدور وانا بركب وياه ..

سكتت ميره وضحكت على راشد اللي رد عليها بـ كل استهبال ..

راشد: اممم ما بتطلعين ويانا ..!

ميره بنص عين: نعم ..!

راشد: بتردين البيت شو بتسوين ..

ميره: بحط راسي وبرقد ..

راشد: حلفي انج بتردين ترقدين..

ميره: مادري .. المهم يعني ..

راشد: يعني ما بنتأخر .. ساعه او ساعه ونص ..

ميره: ماعليه .. برايكم انتو ..

راشد: مب على كيفج .. صبري خلني اييبه وارجع لج ..

سار راشد عنها وهي مركزه  عينها ع الباب .. هذا الراشد .. مادري على شو ناوي .. لو شافتني امه وياه ..!!

..

طلع من الحمام .. نزل الفوده عن ويهه شافها راقده .. اجدم منها شل اللحاف عن ويهها ..

حمد: شيييييييييييييخه

شيخه: يا الله .. انا شو اللي بلاني بـ واحد مزعج شراتك ..!

حمد: نيتج الشينه .. نشي ..

شيخه: ماقدر .. موعني من الفير اليوم .. خلني ارقد ..

حمد: نشييي ..

شيخه: مابا اطلع .. مابا اسير مكان .. سر روحك .. والا اتصل بـ ربعك واظهر وياهم ..

حمد: مابا ..

شيخه: حمد ..

حمد: انا ابا اطلع وياج ..

شيخه: والله ماقدر .. راسي يعورني ..

حمد: بجوفين الدنيا .. وبتغيرين جو .. وبيخف الصداع .. نشي ..

شيخه: وين بنسير..

حمد: من زود ما ادلين الاماكن عاد عشان تسألين .. نشي ..

شيخه: مابا ..

حمد: ما اشتقتي حق اهلج ..

شيخه: افف .. ليش تسأل عنهم ..

حمد: والله انج اتضحكين .. لو كنتي اختيه ومسوتبي هـ الحركه .. كنت بطرش لج كف بالارامكس ..

شيخه: لا والله ...!

حمد: نشييييييييييي..

شيخه: احلف انته بس ..

حمد: نـ شّ .. يييييييييييييييي ..

شيخه: ما بنشش .. سر ويا ربعك..

حمد: ثرني بسير اغازل..

شيخه: انته اتهدد منو .. سر هذو الدرب .. والله انته اللي بتدخل جهنم انا ليش ..

حمد: خيييييييييبه..  بتنشين والا شوو ..

شيخه: على حسب المكان ..

حمد: انزين لو قلت لج اسمه بتعرفينه ..

شيخه: مب لازم اسمه اشرح لي اياه ع الاقل ..

حمد:مكان مسكر .. فيه ناس ..

شيخه: سنتر ..

حمد: لا .. فندق ..

شيخه رفعت حياتها: وشو بنسوي هناك ..!

حمد: بنسير انجابل ناس .. شراتنا ..

شيخه: شراتك .. جذه مزعجين .. لا شكرا عيل مابا ..

حمد: يالطفسه هههههههه " وفرها بالفوده " اقصد شراتنا يعني منا وفينا .. من هل البلاد ..

شيخه: خواتك ..

حمد عفد ع الشبريه: ييييييييس .. خواتيه ..

شيخه: آمنه وياهن ..!

حمد: هيه .. آمنه وريل آمنه وعيال آمنه ..

شيخه: احلف..

حمد: والله ..

شيخه: وجيييييييييي ما تقوووول من الصبح .. الحين بنش ..

حمد اختفت ضحكته: حلفي انتي بس ..

شيخه ضحكت: يااااخي حبيتها هـ الانسانه ..

حمد: ياااخي خلصيييينا انتي بس .. وانا براويج ..

شيخه: هههههههه ليش عصبت ..

حمد: كيفي ..

شيخه: حمممد ..

حمد: خلصي خلصي ..

شيخه: ما بخلص ..

حمد: شيخه أذيتيني ..

يلس ع طرف الشبريه وعطاها ظهره ..

شيخه اجدمت منه : ماقدر والله .. ما تهون عليه اشوفك زعلان ..

وحظنت رقبته

حمد: منو قالج اني زعلان ..

شيخه: تتغلى يعني ..

حمد ابتسم : تقريبا ..

شيخه: اذا جذه عيل من حقك ..

نشت شيخه .. خطفت جدامه وسارت الحمام .. وهو مركز عينه عليها ومبتسم ..

بدا يحس بنبض قلبه .. بدا يحس بـ حياته .. بدا يحس بالحب والفرح والسعاده واحلى المعاني اللي ف هـ الدنيا  .. واخيرا بدت شيخه تحسسه بالحب .. وبدت تبادله نفس الاحساس ..

..

ف السياره ..

عامر: لا تردوووني بيتنا .. مابا ارد البييييت .. مااابا اررررد البييييت

مايد: حشرتنا انته صخ ..

عامر: بلييييييييييييييييييييييييييييييييييييز .. سييييييف ..

سيف: وين تبون اتسيرون..!

مروان: اي مطعم اي كفتيريا اي دكان .. اي كراتشي دربار .. حتى لو شفت راعي المخبز هرّن له خله يوقف باخذ كرواسون وعصير مال مدرسه .. يوعاااااااااااااااااااااااااااااااان بصييح من اليوع

مايد: للعلم يعني .. اخويه يستنزل يوم ايووع ..

عامر: على فكره ثانيه .. الساعه 9 الحينه .. المفروض تكونون ارقود هـ الحزه ..

مروان: والله ما رقدت قبل ما اتعشى ..

سيف: انزيييييييييين وييين تبون تتعشون ..

عامر: انا ابا شي دسم ..

مايد: برجر ..!

عامر: تتمصخر انته .. اقولك دسم تقول لي برجر .. حبيبي البرجر بالنسبه لي خفايف .. مقبلات ..

انا ابا عيش .. باستا .. شي جذه ايدي تقطر منه ..

مروان: على فكره عامر ..

عامر: هلا بن عمي ..

مروان: انته اتلوع الجبد لـ درجه ان الشخص اللي يوعان كثري .. يشبع ..

عامر: عيل ردو البيت ..

مروان: ف راااسك ..

سيف: عيش وباستا ما يستوي تطلب جذه .. لازم تيلس ف المطعم ..

مايد: انزين ودنا اي مطعم ما عندنا مشكله ..

سيف: بتسيرون فستيفال ..

مروان: لالا سر مردف ستي احسن .. اقرب لنا ..

عامر: هيه والله تطلع من البيت تصعد الجسر.. توصل الستي .. تظهر من الستي تنزل من الجسر توصل البيت .. هذا مسوينه حق وقت الازمات .. شرات ازمه مروان مثلا مع اليوع

مايد: اي ازمات .. هاي محنه .. بتتحول مجزه اذا ما صخيت ..

مروان: زين يوم نصحته ..

مايد: والله عامر انته تعرف ربعك اكثر عني .. ما يحتاي اقولك شو بيسوي بك مروان اذا ما صخيت ..

سيف: صدعتوني والله .. حد يطلع وياكم انتو ..

عامر: مفتقد غانم حق المغازل ..

سيف: مغازل ف عيييينك .. راحت ايام المراهقه ..

عامر: كم وحده غازلتو ..!

سيف: شعرفني كل شهر 4..5

مايد: ول ..

مروان: انا مادري منو ظربني ع راسي وخلاني اودر فارس ويا غانم ..

سيف: ليش بياكله ..!

مروان: والله مادري شو ممكن يسوي به هـ الغانم..

عامر: لالا مروان .. غنوم كفو والله ف هـ المواقف .. يوم امرض .. ييلس عند راسي .. ما يخلي سيف يحط صبعه ع راسي حتى ..

مروان: اونه ..

عامر: هيه والله .. انته ترقد وهو يسهر ع راحتك ..

مايد: ماشاء الله .. حرس الرئاسه مب غانم ..

عامر: والله والله ما امزح ..

مروان: يعني اطمن ..

عامر: ارقد وآمن ..

مروان: انزين .. ان استوا بـ ربيعي شي .. على مسؤوليتك .. والله احسن راسك بدون ماي ..

مايد: خيييييييييييبه ..

سيف: تخييييييب العدو ان شاء الله يلا نزلو ..

..