اليوم الثاني
طلع من باب المسيد..لبس نعاله.. مشى رايح البيت وسمع خطوات وراه..
صد حارب يطالع وراه .. ابتسم له سيف
سيف: سربراااااااااايز
حارب: امحق سربرايز..
سيف: افا..
هده حارب وراح..
سيف: انته بخبرك ما تلاحظ ان هـ اليومين موليه ما معطني ويه..
حارب: وشو تبا ف ويهي..
سيف: بلاك حروب
حارب: ماشي بن عمي
سيف: علينا!!..لي يجوفك يقول اكل عليك الدهر وشرب..
حارب: لاول مره احس اني بظلم ويهك لو شبهته بـ الفاظك
سيف: ههاي لان ويهي حليو ادري..ما علي شرات شعر عمور..حروب صدق اشفيك..
حارب: ماشي.. بسم الله ..
سيف: شكلك مب طبيعي..
حارب: استنسخو مني واحد صناعي .. ما سعمت ؟
سيف: وااايد متفيج تراك ..
حارب: والله محد متفيج غيرك..
سيف: انزين ليش ما ترمس..
حارب: سيييف اذا انت وايد متفيج تسولف .. اوقف هني اتريا عمك واسولف وياه
وهو ياي من بعيد يركض..
غانم: جي ودرتوني
سيف: نسيناك..
غانم: لا والله لو انا كنت طالع وحروب لي متفيزر هناك جان ما نسيته
حارب: سوالف مدارس..ازعل منه بعد شرايك
غانم مد صبعه الأخير: انا زعلان..
وسيف مد صبعه وشبكه ف صبع غانم: بالطقاق .. ازعل ودق راسك ف الطوفه..
غانم: حيوان .. ما تستاهل اشاركك الحجره حتى .. يا خسئت على قولت مايد
ابتسم حارب وراح عنهم .. وصلوا البيت وساروا صوب الحديقه وين عامر وفارس ومروان ..
عبدالعزيز اللي توه ياي : انتو الثلاثه ..
عامر: نعم انتو الاربعه ؟
عبدالعزيز: صليتوا ؟
عامر بطرف عينه: واللي كان واقف حذالك ياي يكبر ودزيته عشان توقف ولد اخوك المفلع منو ان شاء الله .. جني مسلم مثلا ؟
سيف: لا تسود ويهي انته ..
عامر: والله .. !
سيف: هيه ابويه محد بيصد عمك صوبي الحين وبيقول لي " غلظ صوته" اخووووك قليل ادب .. انزين والله ادري انه قليل ادب بس شو تبوني اسوي به ..
حارب: حسستني ..
عامر: الواحد مايعرف جيمة الشي الا عقب ما يفقده ..
حارب: مروان الثاني هذا ..
مروان: ترا ثلاثتنا بندش الشرطه ..
حارب: مالت عليكم وعلى طموحكم .. وسار
وصل عند باب الفله وياي يفتحه بس الباب اتبطل قبل لا يمد ايده حتى ..
حارب ابتسم: فديت هـ الويه ..
راشد من ورا : اي ويه بالضبط ..
حارب: انا ولا جفتك حتى عشان اتشك ولو واحد بالميه اني اتفداك ..
راشد: انت ماشفتني .. انت بس روحت ريحتي ..
حارب: هذا منو قاص عليه ..
شيخه: تسألني انا ..
وشل عنها ثاني ..
شيخه: لا والله .. !
حارب ضحك وصد عنها الصوب الثاني ياي يسير .. بس في صوت من بعيد منعه ..
بدور: ييبه داخل وبند الباب ..
رد حارب خطوتين لـ ورا وبند الباب .. مش بناء على طلبها بس لانه يدري انها بتبتدي تحشر الدنيا وما يبا اللي برع يسمعون ..
حارب: ليش ..
بدور: بدون ليش .. وده فوق وفكني من ويهه ..
حارب: كنت بطلعه برع وبفكج منه ..
بدور: حارب انا روحي مش ف المود .. وده فوق وخلصني ..
ييت بدش الحجره بس وقفت عقب جمله حارب
حارب: انتي اصلا متى كنتي ف الموود امايه ؟
بدور: نعم .. !
حارب: جدولج فاضي هـ الوقت ما عندج مسلسل اتابعينه ؟
بدور: انت تحاسبني على اللي اسويه ؟
حارب: لا ما احاسبج .. الحين خلاص .. ماشي فايده .. بس لازم بيي اليوم اللي غيري بيحاسبج ..
راشد: حارب قم انسير فوق ..
بدور: لا خله خله .. واجدمت من حارب..الظاهر في كلام بقلبه ..
حارب ابتسم باستهزاء: امايه"تنهد"والله لو ارمس ما بخلص ..
بدور: حارب اقصر الشر وشل هذا وده فوق ..
حارب: تبيني اوديه فوق عند منو ؟ ترا اللي يالسه فوق وكانت تيلس معاه .. خلاص بتعرس..
بدور بدت تعصب: لا تحاول انك تستفزني يا حارب ..
حارب اجدم: استفزج ليش .. كل شي صار .. وانتهى ..
بدور: ماصار شي لين الحين .. وتعرفني عدل .. ف دقيقه وحده اقدر امنع كل شي ..
حارب: محد يقدر يمنع كل شي ف دقيقه .. غيره سبحانه ورفع صبعه لـ فوق ..
بدور: حارب .. وصرخت .. شل الولد وده فوق وفكني من ويهه ..
حارب: انتي تبين الفكه من ويهه وبس .. ليش معوره راسج وين اوديه ..
بدور اجدمت منه مدت اديها ويودت ويه ثاني : اكرهه .. تفهم شو يعني اكرهه ..
ومسكت ويهه بكل قوه وبدا ثاني يصيح .. اجدمت شيخه من حارب
شيخه: حارب ييبه ..
بدور سحبت ايد شيخه وفرتها : قومي عن ويهي انتي الثانيه .. قبل يومين ابوج تعب بسبتج .. يايه الحين تكملينها ..
حارب بصوت عالي: انتو ليش تحبون المشاكل .. نحن سايرين ورادين نحاول قد ما نقدر اننا نتجنب شوفتكم .. كرهنا حتى اليلسه ف البيت بسبتكم .. حاولتو اتكرهونا ف اختنا .. والحين تحاولون اتكرهونا ف ولد اخونا .. امايه والله مابترومين .. انتي عمرج ما حسيتي بدمج اللي يجري بعروقنا .. اما نحن حاسين بدمنا اللي يجري ف شيخه وثاني .. عشان جذه اقولج والله لو حاولتوا بعد وبعد .. ما بتقدرون ..
بدور وهي تصرخ: بس جب لاتعلي صوتك عليه .. هـ اللي قاصر بعد تراددني عشان عيال الشوارع هذيل ..
سكتت شيخه ونزلت راسها .. مب لانها مستحيه من رمسه بدور .. بس لانها ما تبا تشوف اخوانها وتدمع عينها غصبا عنها جدامهم ..
حارب: عيال الشوارع اللي ترمسين عنهم .. سببهم غلطه هم ما ارتكبوها .. غلطه ارتكبها ريلج وولدج عيال الشوارع هذيل جزء من لحمنا ودمنا .. حتى لو ما رضيتي .. حتى لو عايرتيهم طول العمر .. بيضلون منا وفينا .. ورافعين نفس الاسم اللي نحن رافعينه .. وابتسم ..واللي انتي بعد رافعتنه ..
طلع حارب وهو شال ثاني .. وطلع راشد وراه وهو ساحب شيخه من اديها .. بس رفضت شيخه انها اتسير وراهم ..
بدت الحشره عقب ما دشت الاستيشن ووقفت ف نص الحوي .. نزل منها واحد مبين من شكله انه ف الاربعين من عمره .. السواد مختلط بالبياض ف لحيته الغليظه شوي .. وملامحه جدا جميله .. نزل وهو مبتسم والكل فرحان وياه .. بدو مروان وفارس وعامر يرشون على السياره بالرش وينقعون المدافع ..
والكل اجدم منه وبدا يسلم عليه .. واولهم شمه اللي سارت صوبه وحظنته
شمه: بابااااااااااااااااااتي..
حارب: ينعن ابو التمثيل .. قريب الشهر وهي ما تدري عن ابوها الحين يايه .. وهو يقلدها .. بابااااااتي ..
خالد: ههههههههه لا تحط عليها .. توني ما كملت ساعتين من نازل من الطياره مافيا دافع عني ولا ادافع عنه ..
شمه: والله اشتتتتتتتتتقت لك ..
خالد: شو سويتي ف الامتحانات ؟
شمه: الحمدلله .. انت دعيت لي ؟
خالد: اكيد ..
حارب: زيييييييين قومي قوووومي عن الريال .. غصب يدعي لج ؟ .. قال لج مب متفيج لج
شمه: يالخرااااااااط .. لا تجذذذذب
خالد: بس خلااااص ..
احمد يخاشمه: الحمدلله ع السلامه يالنسيب ..
خالد: الله يسلمك
عبدالعزيز بالفصحى: ابن عمي .. الحمدلله على سلامتك يا رجل ..
خالد مسير وياه: سلمك الله من كل شر يا ابا سعود
حارب ابتسم وهو يوايهه: الحمدلله ع السلامه عمي ..
خالد: الله يسلمك
عبدالرحمن: الحمدلله ع السلامه ابويه ..
خالد: الله يسلمك بو عوف ..
مروان: عمي الحمدلله ع السلامه .. نورت البلاد .. تقبل الله وعساك من العايدين والفايزين وكل عام وانته بخير .. وماتشوف شر
راشد كفخه على راسه: ساير الحج الريااااااال ؟؟
مروان: والله شدراني وين ساير وشو مسوي بالضبط .. تقبل الله صالح الاعمال وتجاوز عنا وعنكم السيئات .. قولو آمين والله الواحد مب ظامن عمره
راشد: انته ايييه .. جي شو ساير مسوي الريال
سيف: يوم اقولك مسودين ويوهنا هذيل شله الفساد ..
غانم: يأجوج ومأجوج .. والثالث منو ؟
حارب: حضرموت ..
غانم: هههههههههه حضرموت بعد شو ..
سيف: منو فيهم حضرموت ؟
حارب: هذا .. واشر على فارس اللي اجدم من ابوه وسلم عليه
فارس: الحمدلله ع السلامه ..
خالد مبتسم: الله يسلمك ..
حارب: عفانا الله جوفه .. حتى ما ابتسم ف ويه ابوه .. ياخي شفيك انته صدقه صدددددددقه الابتسامه
يلسوا ف الحديقه .. وعقبها يوو طارق ومنصور سلموا على ابوهم .. عقب دقايق وصلت عليا ويت مي واجدمت حمده بـ كل هدوء من ابوها وسلمت عليه .. سحبها خالد ويلسها حذاله وهو لاوي عليها .. واكتمل العدد عقب ما دش محمد من باب الحوي .. ومعاه واحد ..لا هو طويل ولا قصير مش دب لكنه مش ضعيف .. اسمراني وملتحي ..
هذا هو عبدالله ولد عمي ..
عبدالله + محمد:السلام عليكم ..
الكل: وعليكم السلام..
عبدالله: الحمدلله ع السلامه عمي
خالد: الله يسلمك..
محمد: وانا اقووول البلاد منوره اليوم
خالد ضحك: بوجودك
مايد: عمي شرايك تكتب هـ الجملتين ف ورقه الله يسلمك .. و بوجودك .. واتعلق الورقه على يبهتك .. والله احس انك ترمس وريجي انا اللي ينشف ..
خالد: انزين انا يوم برمس لا تشوف ثمي .. بند عينك
حارب:ولو اتبند ثمك بعد احسن ..
عليا: والله زين ما بغينا انشوفك ..
عبدالله ابتسم وصد صوب محمد: ثرها تقصدك ..
محمد: حشى عليه .. انا كل يوم امر واشوفها ..
عليا: لا تلف وادور .. انا اقصدك انته ..
عبدالله ييلس: عمووه ..
عليا: هيييه عمووه .. انزين كمل ..
سكت عبدالله .. نزل راسه وضحك ..
عليا: عيالك كلهم عيارين ..
احمد صد صوب خالد: ثرها تقصدك ..
خالد رافع حياته: لا والله ..
عليا: وانته فووووووووقهم بعد ..
مايد: لا والله قويه في حق عمي ..
احمد: الله يخس بليسكم من عيال .. جانكم مسودين ويهي ..
مروان: عمي والله حرام عليك .. فديته ولد عمي مب شرات باجي عيالك .. لا تدعي عليييه ..
سيف: احم احم ..
مروان: ماقصدك طبعا .. اقصد عبدالله..
غانم: شعليييه .. يدافعون عنك الحين بتناسبهم ..
صخ عبدالله وييه احمر هـ المره ..الكل حس انه اتفشل .. وحاول مايد انه يغير السالفه
مايد: هااااااه شو اجواء لندن ..
خالد: كشخه والله
مايد: معلوم .. ساير عند الشقر والحمر .. اكيد كشخه
خالد: والله ولا ستين شقره وسبعين حمرا يسوون ظفر ام سعيد
مايد: يا ولد .. صفر وصفق .. والباجين وياه .. تعجبني والله .. خاطري اطلع عليك يوم اكبر ..
عامر: وليش الحين انته شو .. ف القماط .. !
مايد: انا مستغرب من هـ الانسان والله ..
منصور: ليش
مايد: لان راسه ثجيل بسبة كشته .. بس دمه خفيف ..
عامر: سبحان الخالق المصور ..
مايد: اشوفك هـ اليومين وايد تذكر الله .. شو عندك بتموت .. !
عليا: بسم الله عليه
مايد: انزييييين بن سعيد .. ثرني نجحت ..
خالد: صدقتك ..!
مايد: طاعو
خالد: انت النجاح يشوف ويهك .. يقولك اعذرني الغالي مب مستواي
مايد مطلع عيونه : طاعو هذااااااااااا انتو .. متى بتعقل عمي انته متى بتعقل والله طلع اخس عن عياله مامنه فايده
عامر: سعيد نصيحه لوجه الله .. صدق صدق صدق لا تسكن حرمتك معاك ف البيت يوم بتعرس ..
سعيد: انته احتفظ بنصايحك لفنسك ..
عامر: افاااااااا بن عمي .. زين جذه تفشلني جدام الحريم
سعيد: اي حريم .. عماتك هنتينهن ..
حارب: واختك اللي رازه ويهها ..
شمه: على فكره .. اختيه بعد هني ..
حارب صخ ووسوا عمره ما يسمعها
عامر: اختك وينها ؟
شمه: تعال صدق شواخ وينها ..
..
ورا .. وين الحشيش اللي ف وسطه يجري جدول الماي .. كانت يالسه شيخه وهي حاطه ايدها على ريلها .. وتمسح دموعها اللي تنزل غصبا عنها .. وصلت بنت عمها عقب ما غفلتهم وسارت بدش من الباب اللي ورا بس شافتها يالسه اتصيح ..
اجدمت منها وحطت اديها على جتفها بكل قوه .. صدت شيخه صوبها .. وردت اطالعت جدام وهي تصيح ..
شمه: امج والا ابوج ؟
شيخه: منو فيهم اميه ومنو فيهم ابويه اصلا ؟
شمه: شو قالولج ..
شيخه: شمه انا تعبت منها ..
شمه يلست: ليش شو سوت بج .. شو قالت لج ..
شيخه حطت راسها على ريلها: دومها تقول لي وجدام الكل .. اني بنت شوارع شموه ..
شمه: ايييه عبالي عندج سالفه..
شيخه اطالعتها وردت صدت جدام ..
شمه: اسمحي لي بس خلها تولي .. هاي ما تحترم نفسها ولا تحترم ريلها ولا بيتها ولا عيالها .. تبينها تحترمج انتي ؟
شيخه: ماباها تحترمني .. بس لا تعق عليه هـ الرمسه ..
شمه: وعيالها بعد ما يبون حبها .. بس مايبونها تجرحهم ..
صدت شيخه صوب شمه وسكتت ..
شمه: والله اخوانج يعرفون يمثلون عدل .. اشوفهم يالسين ويانا يسولفون ويضحكون .. بس امبين ف عيونهم ان فيهم شي .. هم بامكانهم يسيرون حجرهم ويبندون الباب على عمارهم بس فضلوا انهم ييلسون ويانا بس لانهم عارفين عدل .. ان اللي بيسوولها كل هذا ما بتحس فيهم.. ف ليش يعورون راسهم وياها .. لازم بيي اليوم اللي بتحس فيه ..
شيخه: بتحس ؟
شمه: صدقيني بتحس .. وباجر بتشوفين
انا عمري ما فكرت ف باجر .. شو ممكن يستوي وشو اللي يتريانا .. بش شموه دومها تجبرني اتخيل ولو لحظه شو اللي بيستوي باجر .. مرت الايام .. وبدا الموعد يقترب .. الربشه زادت ف البيوت الثلاث والفرحه بدت تعم .. اجهزت مهره وخذت لها فستان جاهز وراقي .. وميثه كانت اتساعدها في كل شي بدت اتشطب تقريبا وتخلص باجي اغراضها ..
ف دبي مول ..
يلس حارب وهو يتأفف وتمت شموه تطالعه ف ويهه وهي حاطه ايديها على خدها
حارب: نعم انتي الثانيه .. معجبه ؟
شمه: تعبان ؟
حارب:في حد بقر .. رضى انه يطلعكن انتي وبنت خالج وياه .. ومايتعب
شمه: والله انا ما يخصني خواتك اللي خمن السوق خم ..
شيخه: لا تجمعين ..
شمه: اقصد اختك ..
مهره: والله انا يايه اقضي حايتي .. انتن الررررزه
شمه: انا مب رزه انزين .. انا يايه ويا ثنوي
حارب: عدال .. جنه ثنوي ماحافظ الا ويهج هذا ..
شمه: لا تقووول هذا انزين ..
شيخه تضحك: والله انكم ميانين ..
حارب: شو تبون تاكلون ..
شمه: اي شي يسد رمقي..
حارب: يايبينج من الصحرا انتي ؟
شمه: والله حروب عطشااااااانه ابا شي بارد ..
مهره: انتو حتى ف السنتر تتحرطمون ..
شمه: شو تبينا انسوي عيل .. نقتبس دورج وانصير امهات قبل يومنا .. ليييش ابويه خلنا انعيش حياتنا
حارب: شيخه رجاء ..
شيخه: نعم ..
حارب: هـ الايام وايد بنطلع وبنسير وبنرد .. بليز بليز بليييييييييز هـ القلص لا اتيبينها وياج ..
شمه: احمد ربك اني ييت انزين .. كنت يالسه ويا اختيه بس اختك اترجتني عشان ايي
حارب: ترا اختيه البقره اللي ما تعرف تصرف ..
شيخه رافعه حياتها: انته ايييه يوم بتضارب ويا هاااي لا ادخلني بينكم انزيين .. ونشت
مهره: بعدين منو اللي ميت على ثنوي .. اشوفج من وصلنا وانتي اللي شالتنه .. منو اللي مسويه عمرها ام الحين ؟
شمه: ترا انتي بتعرسين وجذه لازم الحين يتعود علينا..
حارب: يتعود على خبالها
شمه: يا حارب يا ولد بو حارب .. رجاااااااااااء خلنا محترمين بعضنا جدام الاوادم ع الاقل
ضحكت شيخه ووقفت: مهرو .. نشي نشي هـ الثنينه ما منهم فايده .. يضاربون عقب يقولون انرد البيت
حارب: وين تبين اتسيرين ..
شيخه: هـ المحل..
حارب: ما شبعتي انتي ؟
شيخه: لا .. والله مب بعيد .. بنسير دقيقه وبنرد
حارب: دقيقه وحده ما اظن بتوصلين له .. تقول لي دقيقه وبنرد
شمه بطرف عينها: انا ما اقدر انش تعبانه
مهره: انتي يلسي جابلي ولد خالج لين ما انرد انتو دافنين بعض .. يلا شيخو نشي .. وهي طالعه كفخت شمه على راسها .. وانتي ايه جوفي ثنوي
شمه: راقد راقد .. سيري وانتي مطمنه ..
حارب: راسج يعورج والله توصين شموه ..
شمه: ما بينش .. توه راقد ..
مهره: اذا صاح سوي له حليب ..
شمه: ما بيصيح انتي سيري ..
شيخه: ها ويهي يا مهرو جان ما سمعتي صياح ثنوي عقب خمس دقايق وهو شال المول على راسه
مهره: انا هـ اللي خايفه منه .. بس بنجربها 10 دقايق
شمه: خمس دقايق شليهن ..طاف الوقت وانتي تتحرطمين .. يلااااااا سيري وخلصيني .. وبسرعه تعالي
شيخه: حاظرين عمووه .. اي اوامر ثانيه ؟
حارب: اسكريم .. برلاين البسكوت العود لو سمحتي
شيخه: حد قالك اني اشتغل عند ابوك .. والله تبا قم روحك اطلب لك .. وسارت ومهره وياها وهي تضحك عليهم ..
حارب: لا انا اللي اشتغل عند ابوج كل يوم اوديكن وايبكن
صدت شمه صوب حارب .. شافته يالس يطالعها وهو حاط ايده على خده
شمه: والله ههههههههه ولا جنكم اخوان .. هاي تقول ابوك وهذا يقول ابوج
حارب: هو متبري منا ..
شمه: لا والله ..
حارب: تدرين اني من3 ايام يمكن مب شايفنه
شمه: ول .. ليش عاد ..
حارب: انا ادخل هو يطلع .. انا اطلع هو يدخل ..
شمه: حتى وانته داخل وهو طالع ما تلتقي به ؟
حارب: ابدا ..
شمه: بس غلط اللي تسوونه ..
حارب: وشو الغلط ف الموضوع ؟.. اذا هو مب مهتم فينا وما يدري عنا حيين ميتين !
شمه وقفت : اي اسكريم تبا ؟
حارب: بتسيرين بروحج ؟؟
شمه: هذو باسكن ..
حارب: يلا قومي بيي وياج ..
شمه: لا تحسسني عاد .. هذو وراك خمس دقايق بسير وبيي
حارب صد وراه : زين سيري وانا براقبج ..
شمه: يلا قوول .. شو تبا ؟
حارب: ملك شيك لو سمحتي ..
شمه: بـ شو ؟
حارب: اي شي عادي ..
شمه: على ذوقي ؟
حارب: يلا بنجرب ذوقج
شمه: عيل بطلب لك .. وهاه على حسابي والله .. لا تصدق عمرك وايد .. ويوم برد بخبرك شو الغلط ف الموضوع
وقفت شمه
حارب: عن لا تصدقين عمرج انتي بس ..
يايه تسير وبنفس الوقت فتح ثاني عينه بكسل ..
حارب: سيري سيري ما بيصيح .. ربع ساعه بالنسبه له 3 او 4 ساعات .. خلاص شبع رقاد ..
شمه: فديييييييييت هـ العيون .. والله انه عسل هـ الولد ..
حارب: عن تشربينه ..
شمه وقفت وشلت ثنوي وياها
حارب: انتي اييه .. شو تتحسبين ولد اخويه ما وراه اهل ..
شمه: حروووب مافيا ارد عليك .. قتلك بطلب وبرد لك ..
حارب: انزين خليه ..
شمه: ماروم اقاوم عيونه ..
حارب: والله ..!
سوت له طاف وسارت باسكن وهي شاله ثاني اللي يالس ف العربانه .. مدوخ اصلا ومب مستوعب منو يدزه .. عشان جذه ما شغل الونان
وصلت .. وطلبت وهي مخليه ثاني على صوب .. خذ وقت لين ما يجهزون الملك شيك لـ حارب افندي .. عقب ما خذت الاسكريم والملك شيك لفت .. يت بتحط الملك شيك ف العربانه .. وبنفس الوقت نش شخص كان نازل بـ مستوى ثاني يلعب وياه .. ودق جتفه بـ ايد شمه .. انجلب الملك شيك قبل ما تحطه وانصب على راس ثنوي اللي كان يالس وحاط ايده ف ثمه ومنصدم من الشي البارد اللي انصب عليه
ومره وحده صاح من الخاطر
رفع الريال راسه بكل هدوء يطالع شمه اللي انصدمت عقب ما طاحت عينها بـ عيونه .. شلت عينها عنه وسارت صوب ثاني تشله ..
عمار: بيخيسج ..
شمه: برايه .. ولا انه يصيح
عمار: خليه عنج انا بشله ..
شمه: لا ما يحتاي .. ومدت اديها .. بس لو تشل هذا
خذ عمار عنها الاسكريم .. وسارت شمه وهي شاله ثاني اللي حاشر الدنيا بصياحه وعمار سار وراها
دشت الحمام وهي تتحرطم ..
شمه .. الله ياخذ بليسه .. لاحقني تقولون حرمته وهذا ولدنا .. شو سوا ف الولد والله فديته الجو كيف بارد وهذا نش وصب عليه الحليب وهو ثلج ..
بدلته .. ونظفت العربانه .. وحطت فيها لحاف ثنوي الغليظ عشان ما يخيسه مره ثانيه .. ويلست ثاني اللي قام يصيح زياده .. ما يبا ييلس وبـ نفس الوقت طفران .. ردت طلعت برع .. شافته واقف عند المحل اللي مجابل الحمام وحظرته ياكل الاسكريم بعد
شمه بـ عصبيه : تعال شله شوي ..
عمار اجدم منها وشل ثاني عنها وهو يحاول يسكته ويلاعبه .. ويلست شمه تسوي له حليب .. عقب ما خلصت رفعت راسها تزقره .. شافته حاط راس ثاني على صدره وهو يعطيه الاسكريم بس عشان يسكت .. يلست تتأملهم دقايق .. وكأنه ثنوي هو عمار يوم صغير .. وردت اتكلمه بـ عصبيه ومن غير نفس
شمه: ممكن اتيبه ..
عمار: ياكل ..
شمه: ف عز البرد ؟ .. يبه بيرقد ..
عمار: توه ناش .. جوفي ويهه مفلع ..
رفعت شمه حياتها .. ابتسم عمار ورد كمل الاسكريم .. مشت شمه وهو مشى وياها
شكله مطوّل ..! هذا اللي قالته شمه ف خاطرها ..
عمار: منو يايبنكم ..
شمه: حارب ..
عمار: منو وياكم بعد ؟
شمه: شيخه ومهره !
عمار: شيخه ومهره هني .. وهذا مطرشينه وياج انتي
شمه: ليش شو الفرق بيني وبين شيخه ومهره ..
عمار: لا بس اشوفه ملعوزنج ..
شمه: لو انت مب طالع ف ويهي وداعمني وصاب الميلك شيك عليه .. جان ما لعوزني ..
شلته ومشت .. وهو يمشي وياها ويرمس
عمار ابتسم: خاطرج ف الميلك شيك ؟
شمه: لا ..
عمار: صدق والله .. تعالي باخذ لج واحد..
شمه: مابا ..
عمار: قتلج تعالي.. وسحب العربانه عنها ..
شمه: والله مابا .. خلاص خلني اسير ..
عمار: انزين طوفي انا بدزه عنج .. انتي بتشلين ثنوي والا بتدزين العربانه !!
سكتت شمه عنه وسارت .. وهو وراها لين ما وصلوا للمطعم ..
شيخه: انتي سرتي تسوين اسكريم والا تشترين
مهره: ليش امبدله ثيابه ..
شمه: افف هذا سالفته سالفه .. شليه ..
عمار توه ياي: السلام عليكم ..
الكل: وعليكم السلام ..
شيخه: من وين طالعه الشمس اليوم ..
عمار رفع اديه فوق: من هني .. تسمحون لي ايلس ؟
حارب: حياك ..
نشت شيخه سارت صوب شمه .. ويلس عمار مكانها ..
حارب: هاي اللي سايره اتيب لي ملك شيك
صخ عمار وحط الاسكريم جدامه .. نش من مكانه عقاه ف الزباله ورد
شيخه بصوت واطي: اخوك مب صاحي والله
شمه ضحكت ..
عمار يلس وهو ينقل نظراته بين حارب وشيخه: تحشون فيا ؟
حارب: لا ما تحشون فيا
عمار: تعشيتوا والا بتتعشون ؟
مهره: بنتعشى ..
عمار: شو تبون ؟
حارب: وانت عطيتنا فرصه انقول شو نبا .. يالس وترمس بس .. جنك بالع راديو..
عمار ابتسم: من زمان مب يالس وياكم ولا مسولف ..
زقر الجرسون وخذ عنه المنيو ..
عمار: شوفوا شو تبون ..
شيخه: على حساب حارب ..
حارب: حارب يايبنكم وناسنكم..
عمار: لاتخاف يالزطي على حسابي انا ..
حارب: قال زطي قال .. طلبوا اللي تبووون .. عصاير مقبلات سويتات ولا يمهكم والله ..
عمار: سر سر بس يرمس انا اللي بدفع ..
حارب: سنه يدي مب شايفينك ف يلس مكانك ..
عمار: ولانك من سنه يدك مب شايفني .. لازم اعزمك لانك شفتني ..
حارب: قم زين ..
عمار: حلفت عليك حروب .. انا اللي بدفع ..
حارب: انا لو دفعت .. ف لان انا اللي يايبنهن .. انته ما تقول لي ليش شاد حيلك تبا تدفع ..
عمار منزل راسه يطالع المنيو .. وبطرف عينه اطالع شمه اللي انتبهت على نظراته
عمار: عشان الميلك شيك ..
حارب: اي ميلك شيك ..
عمار: انته مب كان خاطرك ف ميلك شيك وبعض الناس ما يابولك .. ف انا قررت اني ادفع عنك عشان ما تتغصص زياده ..
حارب يضحك: عمريك عن الاستهبال ..
عمار: شو عمريك .. اصغر عيالك انا ..
شيخه: شموه يمكن اول مره تحظرين هـ المسرحيه .. بس نحن متعودين عليها ..
عمار: والله اشتقت لـ سخافه اخوانج شيخوه ..
مهره : والله اخواني ف البيت انت اللي ما نشوفك ابدا ..
عمار سكت عنها و زقر الجرسون: اخترتوا شو تبون ..
شيخه: وانت تخلي الواحد يختار .. من يلست وانت تهذر .. وقمت وزقرته بدون لا نختار شو نبا
عمار : زين وصد صوب الجرسون .. اصبر شوي .. يلا اختارن بسرعه ..
شيخه: انا ابا هذا .. رقم 21
عمار : مهاري ؟
مهره: مابا شي ..
عمار: بدينا بـ حركات المعرسات .. وانتي ..
شمه: شرات شيخه ..
عمار: حتى ف الاكل .. وانته .. حروب افندي ..
حارب بطرف عينه: .. هذا .. واشر ع الصوره ..
عمار: وين تبا انته .. نص الليل يبا عيش ..
حارب: وانت شحارنك ياخي .. انا بدفع طلبيتي ..
عمار يضحك: قم زين ..عصاير ما تبون ..
شيخه: لا قول الطلبيه حق الريال من العام واقف ..
عمار: مهره ؟
مهره: مابا شي ..
عمار: كيفكم عقب مب تقولون عمار زطي ..
خذ الجرسون الطلبيه ورد عمار صد صوبهم ..
شيخه: الله يخليك .. والله يوعانه لاترمس وايد اتيوعني زياده ..
عمار: شكرا على الاهانه في حق اخوج العود ..
شيخه: عفوا .. وحطت راسها ع الطاوله .. قم ييب لي ماي ..
عمار: جي ماقلتي كان بييب لج ..
شيخه: جذه .. اباك انته تنش
عمار: والله بشكار ابوج انا ..
شيخه: بتنش والا انش روحي ؟
عمار: اثنبري اشوف ..
شيخه: ييب حق شموه بعد ..
عمار: ما تبون ميلك شيك ..
شيخه: ذليتنا انته .. جانه ف خاطرك سر خذلك .. نحن ما نبا ..
عمار: قلت يمكن يعني
شيخه: لا ما نبا شي ..
نش عمار .. وعيون شمه عليه .. اول مره ف حياتها تشوفه بهـ الشخصيه وبهـ الاسلوب .. اصلا من زمان مب شايفتنه .. اكثر عن 4 شهور .. بس ماكان جذه يوم ييلس وياهم ف الحديقه كان يسولف ويا الشباب بالاشيا اللي تخصه .. او يجاوبك على قد السؤال اما اليوم يحط ويعلق ويمزح وكأنه اول مره في حياتها تشوفه .. رغم انهم بعاد عن امهم وابوهم .. ورغم المشاكل اللي ف حياتهم الا انهم على قلب واحد عيال خالها بدر ..
ليست هناك تعليقات:
إرسال تعليق