ع الساعه خمس .. تحت ..
الشباب كانو يتسبحون ف الحوض .. شمه و مي وشيخه يراقبن روضه وثاني ونوره اللي كانو يسبحون بدايه الحوض .. صوب الصغاريه
1..2..3
ركض ونقز ف الحوووض ..
مروان: مااااادري وين تتحسبوون عماركم .. عمق الحوض شبر ونص وكل واحد شاد حيله ويناقز ..
منصور: ماجايفين خير تراهم ..
مروان: لا والا اللي هناك عاد ..
صد منصور صوب حوض الصغاريه .. وضحك .. ثاني يطلع من الماي .. اونه بيقلد غانم اللي كل شوي ينقز .. يوقف حذال شمه يحرك جتفه بطريقه بهلوانيه ويرد ينزل ف الماي بكل هدوء.. يعني نقز يعني ..
منصور: فدييته والله ..
مروان: من زمااان ما طفرته ..
وسار صوبه ..
مروان: ثنووووي ..
ثاني: لاتيووون عند انا .. انا ماحبش ..
مروان: انا اللي اموووت فيك .. تعال ..
ثاني: مابا ..
مروان: تعال والله بنعلب ..
شمه: يقص عليك بيغرقك ..
مروان: والله ما بغرقك اتقص عليك هاي.. جي تخوفينه انتي .. تعال لا ..
ثاني: لا قول هاي .. قول شمه ..
مروان: ان شاء الله الشيخ ثاني .. تعااال يلا بنلعب ..
عمار توه ياي وحاط الفوده ع جتفه: بلاك انته..
ثاني: جوف هذا ..
عمار: وين يبا يوديك ..
ثاني: هناكي .. واشر ع الحوض الثاني انا عاف.. " اخاف"
عمار جدم اديه وحطها ورا رقبة مروان..
مروان يصرخ: يالخااااااااااااااايس ..
عمار: شو عندك ويا ولديه ..
مروان: شل اييييييييييدك ..
عمار: جي تخوفه .. ؟
مروان: والله ان ما ودرتني بغرقه ..
عمار: انت اوقف عدل قبل عقب هدد ..
مروان: عماااااااااااااااااااااااار هدنيييييييييي ..
شمه صدت صوب شيخه: بلاه .. ؟
شيخه: نقطه ضعفه هـ المنطقه .. وايد يغار ..
شمه: اووونه .. ههههههههه زين يسوي به ..
عمار: قول له آسف ..
مروان: خسي والله انا اعتذر حق هـ الزعطوط ..
ثاني يصرخ: لا قووول ها .. انا ثاني ..
عمار ضغط بديه اكثر: بسررعه ..
مروان: عماااااااااااااااار يالخااااااااااااااااايس هدني ..
عمار: خايس بعد هاه "واجدم من الحوض" تبونه .. ؟
كلهم بصوت واحد: لاااااااااء ..
عمار: جنك حصايه في طريج المسلمين .. محد يباك
مروان: خيييييييبه يا عيال الذين .. ولا واحد فيكم ولد حلال .. !
سيف: غرقه غرقه ما نباه ..
طارق: ايه خالو مي قالت لا تبالغون ..
عمار ضحك وصد صوب طارق: انا ما العب وياه .. صدق بجتله ..
عامر: خسسسسئت .. شُلّت يدااااااااااااك .. هددده .. هدّووو عليك جلاب بوليسيه قول آمين ..
عمار: بخلص منه وبييك اصبر انته .. اللبان ما أدبك شكله ..
سكت عنه عامر .. غفله وركض صوب ثاني وسحبه من ايد شمه .. وقام ثاني يصرخ.. وشمه اتصرخ وياه
عامر: وحده بوحده ..
عمار: يا ويلك..
عامر: والله ان غرقت ربيعي .. بفر ولدك ف الحوض ..
عمار: سووها وجوف ..
عامر: عادي عندي ..
شمه: انته ايييييييييه .. طلع حرتك ف شي ثاني .. هد الولد ..
عامر: انتي ردي مكانج عن اغرقج الحين ..
راشد: رد الامانه لراعيهــــــا حيرت قلبي وانا الحيـران
عمار: يغربل اغانيك بدال ما تسحب ولديه عنه
احمد: ايه ايه عن النذاله .. ياهل هذا ..
عامر: مب مشكلتي والله .. الكوره ف ملعب ابوه ..
عمار: تدري ان سويتها .. مب بس بغرقه .. بفره ف الماي وبدوسه بـ ريولي عشان يتم فتره اطول تحت الماي ..
مروان: يالخايس اخوك انا مب عدوك يالس تهدده فيني من الصبح ..
عمار: كيفك اتخيل عمرك تلعب ميت ..
اجدمت شمه بتسحب ثاني و اجدم عامر من الحوض وجدم ثاني اللي بدا يصيح ..
عمار يصرخ: هد ولدييييييييييه يالكلب ..
عامر: اذا اجدمت شمه اكثر والله افره ..
عمار يكلم شمه: خليه .. قومي عنه
شمه هزت راسها بـ لا ..
عمار: خليييه انتي .. بجوفه كيف بيفره ..
غانم: والله انكم مسرحيه ..
احمد: ان عقيت الولد ف الماي يا ويلك .. هده عامر ..
عامر: خله يهد ربيعي قبل ..
عمار: مالت عليك وعلى اربيعــ ....
وماحس الا بشخص دازنه هو ومروان .. وانجلبو اثنينتهم ف الحوض .. وثاني قام يصيح اكثر ..
فارس نفض اديه: زين جذه حليت القضيه .. لا انته تهدده ولا هو يهددك ..
عامر: شو الفايده عقيت مروان وياه ..
فارس سار صوبه وسحب ثاني عنه: هد الولد .. شو تتحسب عمرك انته شباب افغانستان .. آسرنه وتهددهم فيه..
عامر: قهرتني .. خاطري افرك وياهم ..
فارس: قم زييييين ..
طلع عمار من الماي .. ويلس على طرف الحوض .. صد صوب ثاني اللي من جاف ابوه صاح زياده ..
شمه وهي تضحك: سر ..
ثاني صاد صوبها ويصرخ: ماااااابا ..
شمه: ما بيسووبك شي سر ..
ثاني يضرب الارض بريوله: مابا شليني ..
شمه: عيب .. انته مب اتقول انا ريال ..
ثاني: شليييني ..
شمه: انزين بس خلاص ..
اجدم عمار منه وسحبه لـ حظنه .. ثاني شاف ابوه صاح زياده
عمار يضحك: خلاص بابا ..
ثاني وهو يشهق: شلني .. بثير بيتنا ..
عمار: فدييييت هـ الدموع .. خلاص حبيبي .. " وقف" وين فودته ..
شمه: لحظه ..
سارت صوب شيخه ومي
شمه: وين فودته
شيخه: وراي .. تحت فودة روضه ..
شلتها شمه وردت صوب عمار ..
مي: جنها امه .. وعمار ابوه .
شيخه: اتخيل بس ..!
مي: مب جنه بسهم ..
شيخه: مادري .. انا عادي عندي اذا بيتمون بتم وياهم ..
مي: معلوم بتمين .. مب عشانهم ..
شيخه: عن الحركااات عموه ..
مي تضحك: اخافهم يمرضون ..
شيخه: بنتج انتي ع الدقه ..
مي غطت ويهها بـ اديها: بدو يستهبلون ويرشونا بالماي .. يلا نشي ..
شيخه: يلا روضه تعالي ..
وفجأه .. كلهم صفقو وصفرو وبدو يصرخون ..
سعيد: وجنه الفندق مال ابوهم .. فشلتونا بس سكتوو ..
احمد: ما بغيتو اتون انتو الثنينه ..
عبدالرحمن: انا ياي اطمش ما بتسبح ..
مايد: عداال اخويه ..
عبدالرحمن: انته من متى ياي .. ؟
عبدالعزيز: انا متغدي هني ..
راشد يكلم خليفه: الصراحه.. خطييييييييييييير ..
مايد: شو الخطر ف الموضوع .. جنك واحد من المغازلجييه ..
خليفه: ههههههههه هاه شرايك راشد ..
راشد: رايي انك ما تتخقق وايد .. ويلا تعال ..
ضحك خليفه وسار صوب مي .. نوره من شافته ركضت صوبه وحظنته .. نزل لـ مستواها .. باسها وشلها..
مي: اتأخرت .. !
خليفه: سرت اتغديت بيت ابويه وما خلوني اظهر قبل الساعه 3.. ولين ما رديت البيت جهزت اغراضي وشليت الاغراض اللي تبينها
مي: انزين ولو سمحت ..
خليفه: ما اطوّل ف الحوض .. على هـ الخشم .. خذي هاي أغراضج .. " عطاها الخريطه .. وصد ورا" وهاي الشنطه فيها ثيابي .. وسويج موتري ويا اغراضج مب يظيع ..
مي: احسن خله يظيع ..
خليفه ابتسم: تبيني اتم هني الليله .. ؟
مي: ما بيستوي بك شي ..
خليفه: تعرفيني ماحـ....
مي قاطعته: مب وقت النقاش الحين .. او بـ الاحرى .. ما يحتاي نتناقش ف هـ الموضوع ..
جدمت مي اديها.. شلت عنه نوره وسحبت نظارته عن ويهه .. وسارت صوب شيخه اللي كانت تترياها عشان يسيرن فوق ..
اما ع البحر .. ف كان هـ الوقت بالذات .. لهم
حارب: من الصغر وانا اسيره " واشر عليها " خلّي ملك قلبي بيمناه ..
حمده صدت يمين ويسار: بس صخخخ ..
حارب: احبه والله واســ..
حمده مسكت اديه: حااارب
حارب: يا قلب حارب .. وروحه وحياته وعيوووونه لي يبصر بها دنياه انتي .. آمري
حمده: فديت عيونك ..
حارب باستهبال: continue please
حمده ابتسمت بـ عفويه وهزت راسها بـ لا ..
حارب: الا هـ الابتسامه .. والله تذبحني ..
حمده: اشش .. اختك وريلها ورانا ..
حارب: فكيني زين .. رواحهم طايحين مغازل ف بعض ..
حمده ضحكت: مايخصك بهم ..
حارب: يوم ان مايخصني بهم .. انتي جي مهتمه وكل ما قتلج شي سكتيني ..
حمده: لاننا مش ف ميلسنا ..
حارب: لو ادري ان السالفه جذه .. جان ما ييت وماخليتج اتيين ..
حمده: عن الحركات زين ..
حارب حاس ثمه: انزيين " سكت شويه" حمده
حمده: عيون حمده
ابتسم حارب .. جدم اديه .. ووحطها على اديها ..
حارب: رمسنا عن كل شي تقريبا .. الا هـ الموضوع ..
حمده: اي موضوع ..؟
حارب: العرس ..
حمده: في موضوع اهم عنه
حارب: واللي هو ؟
حمده: السكن..
حارب تنهد ووقف: رمسنا عنه اظن ..
حمده: بس ما وصلنا لـ حل يرضي الطرفين ..
حارب: تعرفين رايي ..
حمده: اعرف رايك ومب مقتنعه فيه .. وانته تعرف رايي ومب مقتنع فيه ..
حارب: يعني .. ؟
حمده: يعني لازم نوصل لـ حل ..
حارب: بيتنا .. مستحيل اسكن
حمده: بس انا مابا اطلع من هـ البيتين ..
حارب: اعتبري انج ماخذه واحد ماتعرفينه .. مب من الاهل ..
حمده تنهدت: مابا اسكن بروحي ..
شبك اديه باديها بـ قوّه ..
حارب: الحياه ف بيتنا صعبه .. جدا صعبه ..محمد اتحملها لـ سبب واحد .. لانه بدا يبني بيته .. وما عنده سيوله عشان يدفع حق شقه كامله ومصاريفها .. ويوفر حق البنا .. اما انا ما عندي بيت ابنيه .. ف بقدر افتح شقه مافي شي يمنعني ..
حمده: ما اقتنعت ..
حارب: تبين تعيشين ف بيتنا عشان تقتنعين ..
حمده: اقتنع بـ شو .. ؟
حارب: تقتنعين ان ابويه ما يحبنا .. ومايحب يشوفنا مرتاحين ومستانسين بـ حياتنا ..
حمده: مب لهـ الدرجه عاد ..
حارب: اوكي .. بنسكن ف بيتنا اسبوع بس .. وجوفي بعينج كل شي .. جوفيه كيف يظاربنا ويدعي علينا ولا تنصدمين اذا ف يوم من الايام مد ايده عليّه وظربني .. وانا ماعرف شو السبب حتى ..
سكتت حمده .. ماردت عليه ولا علقت على كلامه .. كل اللي سوته .. انها صدت صوب البحر واندمجت بـ الامواج بس لانها .. انصدمت من اخر جمله قالها حارب ..!
..
أذن المغرب .. والشباب طلعو من الحوض وسارو فوق ..
فارس و عامر وسيف ومايد .. طالعين من الحوض.. يدورون ف الشقه وهم خرسانين بـ الماي .. وعليا معصبه عليهم ..
عليا: وبعديين وياكم انتو .. نحن يايين نستانس ونغير جو والا يايين انجابل مرضى ..
مايد: انتي لا اتفاولين علينا نحن ما بنمرض ..
عليا: انتتته .. مسووود الويه .. قم اتسبح اشووف ..
مايد: انزييييين ماشي حماام فاضي .. وين نتسبح ف المطبخ .. !
عليا: لسانك هذا .. يباله قص .. انته واختك ..
مايد: الحيييين منو ياب طاري اختيه .. يوم ما تقدرين عليه .. لا تقولين اختك ..
نشت عليا من مكانها .. شلت علبه الكلنكس وفرتها على مايد اللي ما كان منتبه ..
مايد: آآآآآآآآآآآآآآآآآآي
عليا: وتسعميه احطبببه ..
مايد: تكسر ظلوع هذا ّ "واشر على فارس"
فارس ظربه على راسه: وانا شو يخصني ..
عامر: عموووه .. عيالج يتحسبون عمارهم ف البيت .. كل واحد ساعه كامله ف الحمام .. سعيد دخل الحمام الساعه 6:25 والحين الساعه 7 و ما طلع .. خيييييييييييييييييير ..!
عليا: متسبح بهـ الماي الوصخ ما تباه يتأخر ف الحمام .. !
سيف: سعيد سعيييد هذا .. عمور بلاااك .." وقف وعلا صوته وجنه بيظربه" هذا سعييييييييييييد ..
عليا: ويعللللللللللكم ما تسوووونه ..
فارس ضحك ونش: عامر عادي تذبحك وادش بك السجن عشان سعيد ..
سار فارس يجهز ثيابه .. ومايد رد يتقارض ويا عمته .. وعامر وسيف كل واحد منهم مدوخ من صوب ويبا يرقد ..
دقايق ورد فارس ..
فارس: امايه وين شنطتي ..
عليا: ف الحجره الصغيره اللي مجابله المطبخ ..
فارس: مب موجوده ..
عليا: شوفها ورا الباب .. او ف الكبت ..
فارس: دورتها ف كل الحجر مب موجوده
عليا: مادري وينها عيل .. انت روحك شالنها ..
فارس: انتي كنتي اترتبين الاغراض ..
عليا: ما دقيت شنطتك ولا ييت صوبها ..
فارس:امااايه ..
عليا: شووو امايه .. سر دورها ..
سار عنهم . .وبدون هود ولا هدا فتح الباب ودش .. وقام يدور
غانم: خير خير .. نبا نرقد نحن ..
فارس: مايايين حق الرقاد .. قم دور شنطتي ..
غانم: والله سر الحجره اللي ترقد بها .. خلهم يدورونها ياي عندنا نحن لييش
وقف وحط اديه ع خصره ..
فارس رافع حياته: اسمي عند منو ..
حارب: ونحن شدرانا ..
فارس: اعترفوا ..
محمد: انت ليش محتشر .. سر شوف اللي وياك ف الحجره يمكن واحد منهم داسنها عنك ..
سكت فارس عقب ما قال له محمد هـ الكلام .. لانه وايد يستحي منه .. ومستحيل اصلا يرد عليه .. بند الباب وبنفس الوقت وصل له مسج من رقم غريب
يقول له المسج :: لا ادور واتعور راسك .. شنطتك ما بترد لك لين السبت ..
سار صوب الصاله وهو متنرفز .. ماشاف حد غير راشد
فارس: شو تسوي .. ؟
راشد: ماشي .. كلهم ادوخو ورقدو ..
فارس: يايين بـ موترك والا بـ موتر حارب .. ؟
راشد: لا موتري ..
فارس: ممكن اتسلفني اياها .. ؟
راشد: افا عليك .. بس ليش .. وين بتسير ..
فارس: دبي ..
راشد رافع حياته: هاه .. !!
فارس: بسير بيتنا بييب لي ثياب .. مادري منو مخسس فيني وشال شنطتي ..
راشد: انزين اصبر يمكن بيردها ..
فتح فارس المسج وحط الفون جدام راشد .. قرا راشد المسج وضحك ..
فارس:ليكون انته ..
راشد: والله مب انا ..
فارس: عيل ليش تضحك ..
راشد: عيبتني الحركه .. اللي ماخذ الشنطه يعرفك عدل.. ويعرف انك مستحييل تلبس لبس حد .. ف قال بشوفه شو بيسوي ..
فارس: لا فديتك .. اللي ماخذ الشنطه ما يعرفني عدل .. ومايعرف اني ممكن ارد البيت اخذ لي لبس .. ومايدري بعد .. اني ممكن ارد البيت ولا اييكم بالمره ..
راشد: خيبه فرووس .. بس تدري اللي ماخذنها واثق انك مستحيل ترد دبي وما اتيينا ..
فارس: ليش ..
راشد حط راسه ع الطاوله: لانه يعرف انك مستحيل ترد دبي .. و في شخص مب موجود فيها ..
فارس: انته اييييييييييه ..
راشد: والله مب اناا .. ههههههههههههه بس يعني احلل وياك الموضوع .. انزين قول .. كيف بتسير .. ؟
فارس: شو كيف بسير .. ؟
راشد: جذه .. بـ فانيله وبرمودا .. جنك واحد من فريج المرر
فارس: اففف .. باخذ لي جلابيه من مروان اخووك ..
راشد: بترد دبي بـ جلابيه ..
فارس: راااااااااااااشد لا اتنرفزني زياااده ..
راشد: هههههههههه انزين يلا اترياك ..
فارس: ليش .. ؟
راشد: بيّ وياك ..
فارس: عادي بسير روحي ..
راشد: والله ما خليتك اتسير الا ريلي على ريلك ..
فارس: انته ايه لا تهدد و تستوي لي امايه ..
راشد: وانته لا تعاند وتستوي لي شيخو ..
سوّا فارس حركه بـ ويهه بدون لا يضحك وظهرت غمازته .. وسار بدون لا يرد على راشد ..
نزلو تحت .. ركبو السياره واتصل بـ اخوه
راشد: ألووو ..
حارب: هلا ..
راشد: شو راقد .. ؟
حارب: على وشك ..
راشد: انزين حروب .. انا ساير دبي ..
حارب: ها .. ؟ شو عندك ف د....
راشد قطع عليه: اششش .. مابا عمو تسمعك وتحشرنا ..
حارب: انا ف الحجررره .. شحقى ساير .. ؟
راشد: فارس بييب له ثياب ..
حارب: طاعوووو هذااااااااا ..
راشد: فضحتنا بس اسسسكت ..
حارب: انزيين .. شوي شوي ف الدرب ..
راشد: اوكي ..
حارب: يوم بتوصل عطني بنق ..
راشد: هذا اذا كنت واعي .. يلا يلا باي ..
وبند ..
فارس: يعني لازم تخبره .. ؟
راشد: ماقدر ماخبره ..
فارس: عدال..
راشد: احسسسه الهوا اللي اتنفسه ..
فارس: عن لا تحس بس ..
راشد: تعرف توأم بينهم نص ساعه او ربع ساعه او حتى ساعتين
فارس: هيه ..
راشد: انا وحارب توأم بيننا ثلاث سنين ..
فارس: هههههههه انته وحارب توأم بينكم مهره .. اقووول سووق سووق ..
..
تحت .. هناك .. في بقعه ف الظلام .. مافيها غير شخصين .. فوقهم القمر .. وبس ..
بلعت ريجها ويلست ..
بدر: شفيج ..
بدور: ولاشي ..
بدر: مليتي .. تبين اتردين دبي .. ؟
بدور: لا عادي .. تعرف هـ الرقم ..050*******
بدر: لا .. ليش ..!
بدور: لا ماشي ..
بدر: تبيني اطلع بياناته ..
بدور: لالا .. طرشولي مسج .. عقبها طرشولي مسج ثاني اعتذار .. بس قلت يمكن تعرفه ..
بدر: باجر الصبح لازم اطلع من وقت ..
بدور: ليش ..!
بدر: عندي اوراق ظروريه لازم اخلصها .. ترا امس ظاع عليه ..
بدور: ظيعته عشان خاطر عليا اختك ..
بدر: لا طبعا .. ظيعته عشان خاطرج .. رغم اني مستغرب من هـ الخاطر اللي خلاج اتصرين انج اتين وياهم..
بدور: وياهم ..! يعني ما تحس انهم عيالك يعني .. ؟
بدر: العيال اللي يكسرون كلمة ابوهم .. ما يستاهلون انهم يكونون عيال ..
وقفت بدور ..
بدر: على وين ..
بدور: بيطلع مسلسلي عقب شويه ..
بدر: احسن بعد .. نلحق نتعشى ونرقد .. عشان اظهر من وقت باجر ..
مشى .. ومشت وياه سايرين فوق .. وصلو لـ حجرتهم .. وقفت بدور تطالع ف ويه بدر .. وبدر يطالع ف ويهها ..
بدر: انتي طالبه .. !
بدور: لا .. بس لاعبه وياهم ..
بدر رفع حياته: منو اللي طالب عيل ..
بدور: الله اعلم ..
بدر: اخافه مال حرام ..
بدور ابتسمت باستهزا: لا اطمن .. حد من اهلك لي طالب ..
بدر: ليش .. !
بدور: جذه .. نلعب ..
بدر: ناس فاضيه والله..
بدور: وانا العب وياهم ..
بدر رافع حياته: انتي تلعبين وياهم .. !؟؟
بدور: تسليه ..
فتح بدر الباب .. وهو يطالع الريال ساحب العربانه اللي فيها اكلات متنوعه .. نصها من مطعم معروف والنص الثاني يمكن من الفندق نفسه .. حط الأكل ع الطاوله .. بطريقه مرتبه .. وحط ف النص باقه متوسطه الحجم .. وطلع
بدر: حركات ..
بدور: تعال كلّ ..
يلس ويلست وياه وهي عينها ع الباقه .. تبا تعرف بس .. منو اللي مسوي كل هذا .. !
..
ف الصاله .. خليفه يتحرطم .. وعامر ومايد المتفيجين يسمعونه .. اما الباجين عقب التعب والحوض والبهدله .. اللي سار يريح واللي سار يرقد له ساعه .. ساعه ونص لين العشا ..
خليفه: سيارتي يالهروووم سيارتي ..
عامر: ما بتموت لو حطيت راسك ورقدت هني .. عادي رشود بيستغنى عن الكنبه اللي يرقد عليها
خليفه: عن الحركات .. طلعو سويج موتري بسرعه ..
مايد: لو عندنا جان عطيناك وافتكينا من حشرتك ..
خليفه: شو اللي خلااااني العب وياكم ..
مايد: تو الناس ..
خليفه: عبدالعزيز وعبدالرحمن اكيد وصلو دبي الحين ..
مايد: واتسبحو واتعشو ورقدو ..
خليفه: مايد صخخخخخ ..
مايد: عمي خالد اوف كورس ما يقدر يعطيك سيارته وياه شمه وحمده وشيخه وسعيد وعمو عليا .. عمي احمد معاه سيف وغانم ومنصور وطارق وحرمتك وبنتك .. يعني انسى سيارته .. عبدالله وياه حرمته .. ومحمد ويا حرمته .. حارب مع باجي الوحوش اللي هم انا وفارس ومروان وراشد وهـ التنك لي جدامك
عامر: تنك ابووو حرمتك ..
خليفه: ويعني .. ؟
عامر: حط راسك وارقد انته الحين .. عقب العشى بقولك شو اتسوي ..
خليفه: اففففففففف ..
مايد: وجي طفران انته .. ما استوا شي .. كسبت اقامه ليله كامله معانا .. احمد ربك ..
خليفه: انا عندي شغل ..
مايد: شغلك يتأجل .. بس اهلك ما يتأجلون .. ارقد حبوب ..
وين سويج سيارته .. ومنو شالنه وليش .. ويين سيارته بكبرها اصلا .. مايدري .. !
هذا اللي منرفزنه من الصبح ومخلنه يتحرطم على هـ الثنينه
ف دبي ..
بالتحديد ف الجمعيه ..
راشد: خميييت الجمعيه الله ياخذ بليسك كل هذا ف شنطتك ..
فارس: والله ربحان اللي شالنها ..
راشد: انزين ما صرقها ..
فارس: يعني شالنها بدون شوري.. شو مسوي .. مسلفنها .. !
راشد: بيردها يالزط ..
فارس: زططط ويهك .. لا اتيي ويايه خلني اشرا روحي .. انته ما تخليني اتنفس
راشد: ههههههههه انزين بشوفك عند الكاشير ..
فارس: عقب ما اخللص واحاسب واحط الخرايط ف العربانه .. بتصل بك ..
راشد: والله .. كيفك .. انا ماعندي مشكله ..
فارس: اوك انا بسير فوق .. دير بالك مب تغازل ..
راشد: سر سر .. قالولك سيف والا غانم ..
اتحوط راشد ف الجمعيه .. شل له سله وبدا يحط فيها جبس وكاكاو وهـ الخرابيط عشان ما يبين عليه انه ياي يغازل صدق .. يحوط جذه بدون هدف .. ثلث ساعه تقريبا واتصل به فارس ..
وشافه عند الكاشير .. اجدم فارس بـ العربانه .. بدا يشل الاغراض ويحطها عشان يحاسب ..
وراشد وراه وهو يطالعه بـ نص عين ..
فارس: هذا اللي ماخذنه بس ..جبس وكاكاو وعصير ؟
راشد: عيل شراتك خام الجمعيه خم ..
فارس: اسكت والله مقهور ..
راشد: ادق رقم ابوك .. ؟
فارس: لا .. رقم امايه ..
راشد: اسميييها ربحاااانه من وراااك .. خااف ربك يوووميين .. بس يووومين وبنرد .. شامبو خاص .. ستين لك مليون ليفه .. وصابون 3 انواع .. خيييييبه وانقول حارب نحن ..
فارس: انته وين يعورك ..
راشد: قلبي ..
فارس: سلامت قلبك ..
راشد: قلبي يعورني على ابوووك .. انته كم مصروفك الشهري .. ؟
فارس: بذمتك رشود .. شكلي ما يضحك وانته تسألني هـ السؤال ..
راشد: الا يضحك ونص بعد ..
فارس: شكرا جزيلا ..
راشد: ههههههههههههههههههه عفـ .....
اختفت ضحكته فجأه .. عقب ما رفع راسه .. وعقب ما طاحت عينه بـ عين الشخص اللي واقف جدامه
صوره محفوره ف ذاكرته .. واقفه جدامه .. شرات ما كانت واقفه عند باب بيتهم ..
عقب ما انتبهت عليه .. وانتبهت انه شافها .. طلعت بسرعه من الجمعيه .. وراشد فر السله ..
فارس: على وين ..
راشد: ادفع الحساب او كنسل هـ الاغراض ماباهن ..
وركض ساير برع .. بس .. ما لحق عليها ..
كفخ اديه ف بعض وهو ف قمه القهر .. حتى ما سوا سالفه لـ فارس .. سار .. ركب السياره .. شغلها وحط راسه ع السكان .. وهو مقهور .. ومحترق من داخله ..
ليست هناك تعليقات:
إرسال تعليق