الأحد، 17 نوفمبر، 2013

الجزء الـ12 (1)


من أمس لين اليوم وايد مقالب استوت .. امس عقب ما تيمعنا المسا ف الصاله .. وصل برودكاست للكل .. فيه رابطين .. الرابط الاول مكتوب فوقه صاحب اجمل صوت ممكن تسمعه ف حياتك .. والرابط الثاني صورة هـ الشخص .. وكانت الصدمه ان الصوره .. صورة عبدالله ولد عمي ..

وغانم سار بياخذ لنا عشى .. هو ومروان .. ماكملو 10 دقايق .. رد غانم وهو معصب .. مادري منو مبنجر له تاير موتره ..

واكبر صدمه كانت لـ محمد يوم يابو له روضه بنته .. وهم قاصين شعرها لين ذنيها .. محمد يوم شافها انجلط .. على عكس ميثه اللي ودها اتقص شعر بنتها من زمان بس محمد ما يخليها

وحارب اللي تعشى وسار بيرقد شاف عند مخدته خريطه .. فيها كلوركس وشامبو وصابون تايد وفلاش

كل واحد كان ينصدم بالموقف اللي كلاه .. ويوقف ف نص الصاله ويتحرطم .. ونحن نوقف وياه ونضحك عليه..


خلص الويكند وقرب وقتنا يخلص ف هـ المكان ..

كانت الساعه 10 الصبح .. كنا يالسين ف الصاله بناء على طلب مي .. عشان يعرف كل واحد اسمه عند منو ..

عبدالعزيز وعبدالرحمن توهم يايين ..

سيف: اكتملنا .. يلا عموووه
مي: انته وايد اتحن .. سيف صدعتني
عامر: تبون شلّه ..
حارب: شلك طهف انت واخوك .. انطبو ..
عليا: اشحقى ادعي عليهم ..
حارب: ما ينجبوون عيال اخوج .. لازم تدعين عليهم .. والا ما بيفهمون ..
مايد: يلا لا نبا انسير نتسبّح ف الحوض.. عمووو خلصينا
مي: بسسسس سكتووو صدعتوني ..
سيف: متى بنقول الاسامي ..
مي: عقب ما يكتمل العدد ..
سيف: اتقصين علينا انتي .. العدد اكتمل ..
مايد: خليفه .. كيف كان ارقادك .. ان شاء الله ارتحت .. محد عفد عليك والا شاتك والا سوابك شي ..
خليفه: كل شي كان تمام وانته بعيد عني ..
مايد: احلف ..
مي: مايد قم افتح الباب ..
مايد: حاظرين على هـ الخشم .. ونش
سيف: طالبتلنا ريوق عموه ..
مي: اششش .. يلا اكتمل العدد

والكل صد صوب الباب .. يشوف منو الشخص اللي كمل عددهم .. وانصدمو كلهم يوم شافو بدور ..

بدور: السلام عليكم ..
الكل: وعليكم السلام ..

مررت بـ عيونها .. وكأنها ادور شخص امبينهم .. وعقبها يلست حذال عليا ..

مي: اوووكي .. نبدا .. كل واحد يقول اسم الشخص اللي شاك ان اسمه عنده .. وعقبها يقول هو عنده اسم منو .. وطبعا امجهزين هداياكم ..
عامر: اوكي انا ببدا ..
مروان: مستعيل يبا ياخذ بـ ثاره ..
وقف عامر .. اطالعهم كلهم وهو يدور الشخص اللي سوا به هـ الحركه ..
عامر: اسمي عند .. عبدالله ..
عبدالله ضحك: غلط ..
عامر: عن الخرط ..
مي كفخته: بلا هـ الالفاظ ..
عامر: لو ساب سيف جان ما قلتي لي شي .. عبوود اعترف ..
عبدالله: والله مب عندي ..
عامر: عيل عند منو .. انت اكثر واحد حاقد على شعري ..
حارب: اسم منو عندك..
عامر غمض عيونه : غنوم ..
غانم: مااااااااااااااااااااااااالت عليييييييييييييييييييييييك ... 
عامر: والله اللعبه تقووول خسسو ..
مي: بس ما تقول تبنجر له موتره .. وتخليه يحشر الدنيا ..
عامر: ما استانست غنوم .. !
غانم: استانست على شو مالت عليك ..
ضحك عامر .. سار صوب الباب و مايد وياه .. سحبولهم تاير ويوو صوب غانم ..
عامر: عوضا عن التاير اللي اتبنجر ..
مايد: وعوضا عن الاسبير اللي انصررق ..
غانم: صارقين تايري ورادين معطيني اياه مالت عليكم ..
عامر: كنا بنبدل لك الرنقات .. بس عرفنا ان ما بنحصل منك غير السب .. ف غيرنا راينا ..

ضحك غانم وكفخ عامر على جتفه ..

مي: انزين غنوم اسم منو عندك ..
غانم بلع ريجه: عـ .. وسكت ..
مروان: عامر ..
عامر وقف: قول والله .. ييب التاير ما تستاهله
غانم: ههههههههه لا مب عامر .. عندي اسم عـ 
مروان: عمار .. عبدالرحمن ..
غانم: لا ..
مروان: عمو عليا ..
غانم: لاااااااااااااااااااااء ..
عبدالله وقف وسار صوبه: انته اللي اموووووووووزع صوووووورتييييييييي..
غانم يضحك: والله بس علييينا .. ما طرشتها حق حد غريب ..
مي تضحك: والله انكم مب صاحين .. عبدالله اسم منو عندك .. ؟
عبدالله: طارق ..
مي: وطارق .. ؟
طارق: حارب ..
حارب: يابن الذين .. اونك بعد تعرف تسوي حركات ..
طارق ضحك وسار صوبه .. عطاه خريطه حلوه ..
حارب: يا عيييني .. جبل طارق مب هيّن بعد .. تعال " سحبه ويلسه حذاله"
مي: حرووب ..
حارب: انا عندي اسم .. شخص واااااااااايد احبه ..
مايد: انته تحب كل حد ..
حارب: لالا .. هذا غير ..
مروان: جزء لا يتجزأ من خبالك .. ؟
حارب: اكيد ..
مروان: رشووود ..
ابتسم حارب وسار صوب اخوه .. عطاه ظرف ..
مروان: شو معطنه بيزات .. ؟
حارب: ما يخصكم ..
مي: راشد اسم منو عندك ..
راشد: عندي .. اسم .. واحد
مايد: انا عندي اسم وحده .. 
مي: منو هـ الواحد ..
راشد: اول شي بقولكم قصتي المأساويه .. بارحة أمس .. حطيت راسي ع الكنبه وقلت برقد .. اجلبت يمين يسار .. ما ياني ارقاد .. نشيت سرت حجره قوم مروان .. وانا شال خريطه الككاو ويايه .. كلهم كانو واعين الا شخص واحد .. ف شو اللي صار ..
مايد: شو اللي صار ..
راشد: قلنا بنسولف شوي .. وبناكل ككاو .. ف قمنا ناكل وانفر ناكل وانفر ..
مايد: وعقب .. ؟
راشد: خلص الككاو وتم شي واحد ..
مروان: اللي هو اللبنان ..
فارس: ف وزعه علينا..
منصور: ونحن ما جذبنا خبر ..
مايد: بس عقب ما ملينا منه..
مروان: فريناه ..
راشد: واكتشفنا ان الزباله اللي انفر فيها .. هي كشه عامر ..
عامر: يالكلاااااااااااب ..
احمد: انته لسانك وايد مستوي طويل ..
مي: مستوي ..! انا من يوم عرفته وهذا لسانه طويل ..
عامر: شو هـ الفكره الغبيه اللي مثل ويهك ..
راشد يضحك: والله كل اللي وياي قالولي سو اي حركه تجبر عمور انه يحلق .. وانا فكرت وفكرت وفكرت .. وما عرفت شو اسوي ..
عامر: ومنو هـ النذل اللي اقترح عليك هـ الفكره ..
راشد: والله ف هـ العايله ماشي انذل من ربعك ..
عامر شهق وصد صوب فارس ومروان اللي ضحكو من الخاطر ..
مي تضحك: خلاااااااااص عمووور صخ
عامر: حقوووووووووووووووودين .. انتو اصلا ما تستاهلون اني اكون اربيعكم ..
ضحك راشد وسار صوب عامر .. عطاه علبه شفافه فيها اشكال والوان واحجام مختلفه من اللبان..
مي: ههههههه سيف .. !
سيف: عيون سيف ..
مي: هـ الولد وايد ماصخ والله ..
سيف: آه كيفي .. اغازل عمتيه ..
احمد: قوول الاسم اللي عندك .. وخلصنا
سيف: عندي اسم .. هذااااك " وهو يأشر بـ حياته صوبه"
خليفه نش من مكانه ويا صوبه: هذاااك .. مب تارس عينك هذااك ماعنده اسم ..
سيف: وااابووويه .. خنقتني يالدب هدني ..
خليفه: وين سيارتي ..
سيف: تحت تحت .. يووود .. وعطاه السويج ..
خليفه: اعترف شو سويت بها..
سيف: ولاشي .. بس من نظافتها قلنا بنغسلك اياها ..
خليفه: هييه اتحسب بعد ..
سيف: قممم ذبحتني ..
مي: الحمدلله والشكر .. محححمممد ..
محمد: بعدهم ما خلصو ..
مي: كيفي انا ابا اعرف اسم منو عندك ..
محمد: كح كح كححح ..
مايد: حلو حلو ..
محمد: عندي اسم .. " ويطالع بطرف عينه " فارس ..
فارس شهق: كل هذااااااااااااااااااا "وسكت"
مروان وهو يضحك: يطلع منك يالمطوووووع .. ووين التديّن .. وين الحفظ .. وين الصلاه .. وين الاسلام .. انا كملت عنننه .. تراه يستحي من محمد بس شكله اتحمس اليوم وكان بيعق كم كلمه
مهره: جيييييي كفر اخويه ..
فارس: خلااااني ارد دبي واييب لي ثياب وايي .. الله يساااااااااااامحك بس
محمد: تتحسبون بس انتو اللي تعرفون تسوون حركات " وهو يضحك" خذ ..وعطاه الشنطه ..
فارس: شكرا .. ماباها
محمد: ههههههههه انته خذها وجوف شو فيها .. عقب قول ماباها ..
مي: والله انكممم  .. انزين فارس انته منو عندك ..

سكت فارس .. صد صوب بدور اللي طاحت عينه بعينها .. وبسرعه رد اطالع مروان وعامر ..

فارس: عندي .. اسم .. شيخه ..
وبكل هدوء نش .. سار صوبها .. وعطاها علبه متوسطه الحجم ..
ابتمست مي .. ومحد علق ع الموضوع ..
مي: وانتي ..
شيخه خذت نفس : امايه ..
الكل صد صوبها وسكت .. نشت شيخه .. عطتها علبه .. كبيره شوي .. وردت يلست مكانها ..
بدور: وانا عندي " سكتت شويه .. وردت رفعت راسها" عمار
رفع عمار راسه وهو منصدم .. يعني انتي اللي شليتي ولديه ..!
بدور ابتسمت وجنها سمعت الكلام اللي ف خاطره: هيه .. انا اللي شليت ثاني .. وينه ..

ثاني توه ياي وهو يفرك عيونه .. سار صوب ابوه وحط راسه ع ريله .. ابتسمت بدور واشرت له بـ ايدها بمعنى تعال .. سار صوبها ..

بدور: منو بدّل ثيابك ..
ثاني: شمه ..
بدور: زين تعال بقولك شي ..

شلته ويلسته ع ريلها والكل منصدم ويراقب الموقف بـ صمت .. اجدمت منه وهمست ف اذنه .. ضحك ثاني وصد صوبها

ثاني: بخبر عليج آبويه ..
بدور نزلته: ابوك هو ولديه يالهرم .. خذ

مدت اديها .. عطته خريطه كبيره شوي .. اجدم ثاني خطوتين وهو يسحب الخريطه وراه وهي تزحف ع الارض .. وعمار حاط عينه ف عين امه ومنصدم من آخر جمله قالتها .. وقف ثاني ف نص الصاله ورد صد صوبها ..

ثاني: أنا ماحبش ..
وركض سار صوب ابوه .. ودفن راسه بـ حظنه ..
ضحكت بدور من الخاطر .. والكل ضحك وياها .. ثاني يوم يقول هـ الجمله .. ايبها بـ طريقه اتخليك تضحك غصبا عنك ..

عقب ما خلصو سالفه اللعبه .. وعقب ما كل واحد عرف اسمه عند منو .. كل واحد منهم سار مكان .. اللي طلع ورد دبي .. اللي سار يرتب اغراضه واللي عايش حياته ونزل البحر .. واللي كالعاده حاشر الدنيا

خالد: الريال قال الساعه 5  لازم تطلعون ..
عليا: جي على كيفه .. !
سيف: حتى ويا الفندق تبا تظارب .. عموووه شووو انتي ..!
مروان: مرت عمي خالد ما تنلام .. عمي تدري ليش ما قبلونا لين الحين ..
خالد: يعرفونكم قله ادب .. ولا ستين دورة بتأدبكم ..
مروان: غلللط .. لانك اتسير لندن كل يوم والثاني .. ف شاكين فيك لاقدر الله ..
سيف: لاقدر الله بعد ليش .. ؟
خالد: انته من كثر ما ترمس عن السياسه شاطبين اسمك ..
مروان: عمي صدق صدق والله .. خلنا صريحين ..
خالد: ام سعيد .. وينه بدر اخوج .. قوليله ايي يشل هذا ويفكني منه ..
مروان: بدر خله راقد .. يرتاح يرتاح ف بيتهم .. لازم بيي اليوم اللي بيفكك مني لا تستعيل
خالد ابتسم: امريحنك هـ اليومين هاه .. 
مروان: لا اتغير السالفه ..
خالد: شو عندك ..
مروان: انته شو عندك ف لندن .. كل يوم والثاني مطيح فيها .. قول لي ماخذ وحده شقرا من هناك ..
خالد: والله ..!
مروان: الله يخليك .. اذا مسونها قول لها اجوف لي وحده من اهلها .. جذه شقرا .. وعيونها زرق ..
خالد: ما تستحي والله .. قم عن ويهي .. قم ..
فارس يضحك: قم انسير نتسبح ..
مروان: مالي بارض .. بسني لوني احترق ..
خالد: وشاد حيلك تبا اتسير الدوره بعد .. مب متحمل ساعه تحت الشمس ..
مروان: تعال صدق فارس .. اتخيل قبل ملجتك باسبوع اتصلو بك قالولك طلع اسمك ..
فارس ابتسم: بملج نفس اليوم وبسير ..
مروان: طاعو .. ما يستحي والله  ..

لبسه فارس وسار تحت .. فتح الباب وطلع .. وصل للحوض .. وف آخر لحظه غير راييه وفضل انه يسير البحر ..

نزل ومشى ف الرمل .. اجدم اكثر .. كانت يالسه ومعطتنه ظهرها .. اجدم منها وهو يلاعب اللي يالسه ف حظنها ..
رفعت مي راسها ادور الشخص اللي يضحك بنتها ..

مي:تضحك وياك !
فارس: ليش وحش ..
مي: الا هي الوحش .. ما تلعب ويا حد
فارس: شو تسوين هني ..!
مي: ماشي .. اغير جو ..
فارس: هـ الوقت عاد .. ! ما احترقتي ..
مي: لا .. الجو زين ..
فارس: فيج شي خالو ..
مي: لا ..
فارس: متأكده ..
مي ابتسمت: متأكده .. بتسبح ف البحر .. ؟
فارس: كنت ناوي اسير الحوض .. بس غيرت رايي .. قلت بتسبّح ف البحر هـ المره ..

وهم يسولفون ونوره تضحك وتحاول انها تشرد من شخص وتدفن راسها ف حظن مي ..

مي: يلسي ماما ذبحتيني ..
فارس: اصلا هاي ما ادري ويا منو تلعب

صد فارس وراه .. طاحت عينه بعيون شيخه .. ابتسمت .. واجدمت اكثر هي واخوها ..

عمار: شو تسوون هني ..
فارس: انا ياي اتسبح .. انتو اللي شوا تسون هني ..
عمار: انا ياي اطمش ..
فارس: قم نتسبّح ..
عمار: لا لا .. انته سر انا براقبك من هني ..

ويلس حذال عمته ..

مي: شيخو شلييها ذبحتني ..
عمار: ساحرتنها انتي .. حتى روضه وثاني ما يتخبلون عليج جذه..
شيخه: عيالكم ما يعرفون قدري ..

شلتها ومشت وياها سايره صوب البحر .. وفارس سار وراهن ..

مي: بطاقه الدعوه اغرتني ..
عمار: اي بطاقه .. !
مي رفعت حياتها: اللي عزمتني فيها ع المطعم ..
ابتسم عمار وصد صوب البحر ..
مي: بس ماقدر اطلع وياك ..  
عمار: ليش ..!
مي: لازم اسير اخلص امور بيتي .. اختار الاثاث وهـ السوالف
عمار: المسا بنطلع انزين ..
مي: برجع تعبانه ..
عمار: يوم واحد يعني .. ماتقدرين اتفضينه عشاني ..
تنهدت وسكتت عنه ..
عمار: بلاج ..
مي: ماشي ..
عمار اجدم منها وحط اديه ع جتفها: عموه ..
مي: احس بتعب لا اكثر ..
عمار: من ..!
مي: مادري ..
سكتت وسكت وياها ..
عمار: معناته لازم تطلعين ويايه عشان اتريحين شوي وياي.. مب ويا ريلج ..
مي ابتسمت : وين ولدك .. !
عمار: عند شمه ..
مي: وايد متعلق فيها ..
عمار: وااايد ..
مي: انته .. ما اتفكر تعرس ..
عمار ابتسم باستهزاء: شو اللي خلاج تسألين هـ السؤال ..
مي: ماشي .. افكر ف ولدك هـ الفقير ..
عمار: ولديه عايش حياته ..
مي: باجر بيكبر ..
عمار: عادي .. كلنا عشنا بدون ام ..
مي: ولانك عشت بدون ام ع قولتك .. تبا تعيشه هو جذه ..!
عمار: مب ذنبي ..
مي: ذنب منو عيل ..
عمار: تحسين الياهل لازم يعيش بين امه وابوه عشان يتربى صح .. !
مي: المفروض ..
عمار: بس نحن تربينا بين ام .. حياتها ويا اربيعاتها طلعات واعراس وعزايم .. والحين كبرت غير التلفزيون والافلام التركيه .. شي ثاني ماعندها.. وابو اللي لين يومج هذا من كثر ما هو مشغول بـ دوامه يحسسني انه واحد من أعضاء مجلس الأمه .. والحمدلله ما اختربنا ولا ظعنا
مي ضحكت على تعليقه : وتحس انك مرتاح جذه .. ؟
عمار: وايد ..
مي: ليش ..
عمار: لان الله عوضني بـ اخوان وخوات .. مافي مثلهم
مي: بس ولدك ما عنده اخوان ولا حتى خوات ..
عمار وقف: عنده ابو يحبه اكثر من اي شي ثاني ف الدنيا  .. وعنده ام .. بتظل اتحبه .. حتى لو كانت ابعيده عنه ..

وعطاها ظهره ..

مي: عمار..
عمار: مي لا اتكلميني عن هـ الموضوع .. الله يخليج ..
مي: تأجل العشى لين الاسبوع الياي .. 
عمار صد صوبها: اوكي بس ع شرط  .. ورفع سبابته
مي ابتسمت: بدون يهال ..
عمار هز راسه بـ هي .. ابتسم وسار عنها ..

..

ع البحر ..

كانت يالسه .. وحاطه نوره ف حظنها .. وهو .. اونه يتسبح جريب السيفه ..

شيخه: ادخل اكثر ..
فارس: مابا .. مرتاح جذه ..
شيخه: ثرني بغير مكاني ..
فارس: بلحقج ..
شيخه: بسير فوق ..
فارس: بيي وياج ..
شيخه: استغفر الله ..
فارس: وانتي ليش معصبه .. ارض الله واسعه .. واتنقى المكان لي يعجبني ..
شيخه: تدري لو حد شافنا ..
فارس: لا تحسسيني عاد .. خلهم يجوفونا .. الكل يعرف انج خطيبتي .. الا ابوج .. ما يفهم لغه البشر..
شيخه ضحكت: يفهم اي لغه عيل ..!
فارس: مادري .. والله ماجربت معاه ..
شيخه تنهدت: ولا تفكر انك اجرب ..
فارس: ليش ..!
شيخه: بايع عمرك ..!
فارس: عشانج .. هيه ..

طنشته .. وردت تلعب ويا نوره ..

شيخه منزله راسها تلاعب نوره: ممكن سؤال ..
فارس: اسألي ..
شيخه: انته ... خذتني .. لاني كاسره خاطرك ..
فارس: وافقتي عليه لاني كاسر خاطرج ..!
شيخه: خطبتني عشان الموقف ..
فارس: وانتي وافقتي عليه عشان الموقف ..
شيخه تنهدت: جاوبني على قد السؤال .. ليش ترد تسألني نفس السؤال ..
فارس:وانتي جاوبيني على نفس السؤال .. ليش تردين تسأليني سؤال ثاني ..

وقف وعطاها ظهره

فارس: خذتج غصبا عني .. انا ماباج .. بس .. قلبي يباج


وسار ..


..




ليست هناك تعليقات:

إرسال تعليق