الأربعاء، 20 نوفمبر، 2013

الجزء الـ33



قطعه من الصوف  .. يايه على هيئه خيمه ..  اجدم طيفها اكثر من الباب ووايج من العين السحريه .. 
تحت هـ الصوف .. راس لاف على رقبته شال .. ومغطي صدره و اديه وضلوعه بـ جاكيت غليظ .. وبـ آخر اطرافه .. لابس دلاغ يدفي ريوله من البرد اللي ظارب ف عظامه ..

فتح عمار الباب وعطاهم ظهره .. ماسمع الا ضحكه هزت المكان بكبره ..

عمار: جاااااااااااااب ..
عامر: هههههههههههههه يووووم انك مب قدددده .. شحقى متعني وساير ..
عمار: وين ولديه ..
فارس: عند امايه ..
عمار: جي ما يبتوه ..!
عامر بعده يضحك: عموه حالفه ما اطرشه عندك لين ما يتعافى .. قالت اذا يبا يجوفه خله ينزل ..
عمار طاح ع الكنبه: انا قادر اتنفس عشان انزل له .. والله ميت من البرد ..
عامر: ليكون مرضت ..
عمار: على وشك ..
عامر: الحمدلله والشكر .. سار فر ايده ف التهلكه ويلس .. الحين انته اونك ياي مرافق .. قمت وطحت علينا انته وولدك ..
فارس: ذليت الريااال ..
عمار: وعمتك جي ما ييت ..!
عامر: اتجهز اغراض عمي خالد ..
عمار: ليش ..!
عامر: مضطر يرجع لندن .. هو ودر شغله ويا هني .. الحين مجبور يسير اسبوع ع الاقل .. الله اعلم اذا كان شغل شرعي والا ..
فارس ضحك: وياااا ويييهك .. جي شو جايف ابويه ..
عامر: والله انا من يوم ما فتحت عيوني اجوفه يسير لندن بالشهور ويرجع دبي يومين .. ماعلييييه الله ساتر عليه لين الحين .. لازم بيي اليوم اللي بينفضح فييه ..
عمار: انته ياي هني اتحش ف الناس ..!
عامر: لا والله .. اصلا بسير عموه تباني .. بس ياي اوصل الاخ .. يباك ف كلمه راس "ووقف" والله والله .. آخر زمن بعد بين عمار وفارس كلمه راس .. انا ساير .. بس فروس دخيلك مب تتهور وتنزل وياه تزلج والا شي .. هذا ترا مخه واقف هـ اليومين .. يلا مع السـ....

وقبل ما يكمل وداعه .. فلعه عمار بـ مخده ظربت راس عامر من ورا .. ودقته بطرف الباب من جدام ..

عامر: الله اكبر .. اني ارى سوادا .. يخلو من اي لون آخر .. غربلات بليسك من عمار جانك طيرت الالوان اللي ف عيوني ..
عمار: اذلللللللللف زيييييين ..
عامر رفع ايده وحطها على يبهته: يلا باي باي ..

وسار ..

صد عمار صوب فارس وهو يضحك على عامر .. وفارس بادله النظره بـ ابتسامه ..

عمار: آمر ولد عمتيه ..
فارس: ما يآمر عليك عدو " خذ نفس" ابا اقولك شي .. وادري ان محد بيخليني ارمس على راحتي ف هـ الموضوع غيرك ..
عمار: قول ..
فارس تنهد: ابويه موقف كل شغله عشاني .. وامايه مودره البيت واخواني وخواتيه ويايه هني ومتحمله هـ البرد اللي ذابحنها عشاني .. وحتى انتو ما قصرتوا .. انته واخوك خذتوا اجازه ويتو هني عشاني .. ومروان وعامر" وابتسم" مستعدين يسوون اكثر من جذه عشاني ..
عمار: و شو سبب هـ المقدمه ..!
فارس: السبب .. هو اني اباكم اتردون البلاد ..
عمار رفع حياته: ليش .. يالسين على جبدك نحن ..
فارس ابتسم: لا والله .. بالعكس لو مب انتو مادري شو كان بيستوي بي ..
عمار: عيل ليش تبانا انرد .. وقبل ما تكلمني قلت بخليك ترمس على راحتك .. يعني مقتنع ان انا بأيدك .. وبقولهم يلا انرد البلاد وخلو فارس روحه هني ..!
فارس: لا .. مب هذا قصدي ..
عمار: عيل شو قصدك ..!
فارس: قصدي كلنا انرد البلاد ..
عمار: وعلاجك ..!
فارس: انا مافيني شي .. الحمدلله بديت اتعافى .. واذا على ريولي .. ثرني بديت بالعلاج الطبيعي .. والحمدلله تتحسن اكثر واكثر ..
عمار: بس علاجك ما خلص ..
فارس: بقدر اخلصه ف دبي ..
عمار: وهـ القرار .. ناقشته ويا الدكتور ..!
فارس: مب على كيفه .. حتى لو مارضى . بقطع علاجي وبرجع ..
عمار: انا اقول بعد .. لاني كلمته امس .. وقال محتاي يتم بعد شهر ثاني ..
فارس: خييبه .. مستحييل اتم ..
عمار: فارس ..!
فارس: عمار بس .. والله لاعت جبدي .. ماقدر اتم اكثر .. اصلا النفسيه هي نص العلاج .. وانا هني نفسيتي وايد تعبانه .. ابا ارد البلاد .. ايلس ف الحديقه اسولف واضحك وامزح وياهم ..
عمار: ونحن بعد نباك اترد تسولف وتضحك .. بس نباك اترد بريولك ..
فارس: يمكن الله مب كاتب اني امشي على ريولي مره ثانيه ..
عمار رفع حياته: ليش اتقول هـ الكلام .. انته مب اتقول انك بديت تتحسن ..
فارس: اقوول .. مجرد كلام .. بس ف الواقع ماحس بهـ الشي .. انا حتى ايد ما عندي عشان تساعدني .. متعب عامر ويايه .. والله انه يشلني ويتحمل ثقلي بس عشان احرك ريلي خطوه او خطوتين ..
عمار: واذا عامر والا انا والا اي واحد فينا .. ما شليناك واتحملنا ثقلك .. منو بيشلك وبيتحملك عيل ..!
فارس: بس انتو .. مب مجبورين ..
عمار: فارس شو هـ الرمسه .. كيف يعني مب مجبورين .. اذا اخوك طاح ف مشكله والا مرض والا استوا به شي .. انته مب مجبور توقف وياه ..!

سكت فارس ومارد عليه ..

عمار: الا اذا ما تعتبرنا اخوانك "ووقف"
فارس: انا ماقصد جذه ..
عمار: انا هذا اللي فهمته .. وهذا اللي قصدته انته بـ سكوتك " وقف وراه وحرك الكرسي" انسير فوق..!
فارس: لا ..
عمار: عندك شي ثاني تبا تقوله ..
فارس: الله يخليك لاتضغط عليه .. والله انته الوحيد اللي اقدر ارمسه .. لا اميه ولا ابويه ولاحتى عامر بقدر ارمسهم .. ادريبهم بيعصبون وبيزعلون وبيسولي سالفه .. انته حتى لو زعلت ما بتعصب وما بترد عليه بدون ما تفكر ..
عمار: ولاني افكر قبل ما ارد .. اقولك ما يستوي اترد البلاد .. اوكي اوكي .. بنقتنع انك متعبنا .. احسب كم شخص نحن .. انا وعامر امك وابوك .. اربعه .. ومب قادر تشوفنا جذه .. ف مابالك لو ردينا البلاد وشافوك جذه .. عبالك بيهدونك ف حالك .. كلهم بيكونون وياك .. كلهم بيسيرون المستشفى وياك وبيشلونك لانك مب قادر اتشل عمرك .. حزتها مب بس بتقول انك متعبنهم.. الا بتحس ان الكل يشوفك بـ نظره شفقه .. لا فيزيائيا بتقدر تتعالج ولا نفسيا كل شي فيك بيتدهور وبيتعب .. فارس .. انته اللي فكر بعقلك .. اذا مب قادر اتم هني عشان اختيه .. انسى انها هني .. واذا مب قادر اتشوفني انا لاني اذكرك فيها .. عادي انساني انا بعد .. وانا اوعدك بشل ولديه وبرجع البلاد .. بس .. لاتتهور وتتخذ قرار نتيجه عواطفك ..

سكت فارس ثواني .. عقبها .. رفع اديه وحطها على ايد عمار اللي ماسك بهن الكرسي ..

فارس: عمار .. ماتدري وجودك هني شكثر ساعدني .. اخوك رد البلاد بدون ما يسوي لي سالفه .. والحين ابويه بيسافر .. وعامر قلبي يعورني عليه يوم اشوفه مجابلني ليل نهار .. 
عمار: اخويه اللي ماسوالك سالفه والا انته اللي ما سويت له سالفه ..!
فارس: انا بس كنت اتغلى عليه ..
عمار: مشاعرك وايد تركيه  .. شكلك اتأثرت بالبرد .. لا الحين مضطرين انردك البلاد ونصلخ يلدك بالحر .. عشان تعرف كيف تتغلى مره ثانيه ..

ضحك فارس وهو يفتح الباب وعمار وراه يدزه .. سايرين تحت صوب عليا وخالد ..
حتى لو مارد عليه او ما علق على كلامه .. بس اقتنع باللي قاله عمار .. ولان فارس واثق ان راي عمار هو الراي الوحيد اللي بيفيده .. عشان جذه ما تردد ولا لحظه انه يكلم عمار بين اللي موجودين وياه ..

..

صوب جدول الماي ..

كانت يالسه وهي اتفر الحصى من الملل .. رغم بروده الجو .. والغيوم اللي تبشر بالمطر .. بس كـ عادتها امسويه طاف ومستمتعه باللي اتسويه ..
حست بوجود شخص وراها .. بس ما صدت ولا عبرت .. لين ما يا صوبها ويلس ..

رفعت حياتها واطالعته بـ نظره وردت تتأمل الماي ..


راشد: بنش اذا مب عايبنج الوضع ..
شمه: انا اللي يالسه صوب بيتكم.. و انا اللي لازم اقولك بنش اذا مب عايبنك ..
راشد رفع حياته: شو بعد يالسه صوب بيتنا .. من متى في حدود بيننا ..
شمه: تسألني انا .. انته اللي ياي يالس وتقول لي بنش اذا مب عايبنج ..!
راشد: ليش مستويه فلفل انتي ..!
شمه: شكلها عيونك الفلفل .. تشوفني فلفل ..
راشد: ماشاء الله .. عيوني فلفل .. عيوني نكديه .. عيوني ملانه وحزينه ..
شمه: شو يخصه ..!
راشد: لانها اتشوفج جذه .. ورفع حياته ..

صدت عنه شمه وما ردت عليه ..

راشد: ولدج تعبان ..!
شمه صدت صوبه: ثنووي ..!
راشد: هيه ..
شمه: بلاه ..
راشد: فيه حمى من امس ..
شمه: اونه ..
راشد: اقص عليج يعني ..!
شمه: منو قالك ..
راشد: ابوه الذكي ..
شمه: افف ليش يوديه وهو يدري ان الجو وايد بارد .. وثاني صغير ما يتحمل هـ البرد ..
راشد: يوم بيرجع سأليه ..
شمه: يوم بيرجع .. بتظارب وياه ..
راشد ضحك: ايوااا .. هاي شمه اللي اعرفها .. مب البراءه اللي كنتي متلبسه بها الفتره اللي طافت ..
شمه: لا والله ..!
راشد: جد .. انتي اذا ما عقدتي حياتج لمده يومين .. احس فيج شي غلط ..
شمه عقدت حياتها: والحين شو تحس ..!
راشد: الحين شمه ام لسان اللي ما كنت اتقبلها ..
شمه ضحكت: انته ما تستحي والله ..
راشد: والله ما أكرهك بس غاضب وزعلان بدربك زرعت الوفا .. وكان الحصاد حرمان خذلان
شمه: خيير ان شاء الله ..!
راشد: تعرفين كاظم الساهر ..
شمه: وييه شخباري .. بعدك تسمع له ..
راشد: لا .. هاي من بقايا الماضي ..
شمه: كنت معلق على وحده غيرها .. شو هي ..
راشد ابتسم: قاتلتي ترقص حافيه القدمين ..!

وضحكت شمه من خاطرها

راشد وهو يلحنها: قاتلتي ترقص حافية القدمين بمدخل شرياني .. من أين أتيت  .. وكيف أتيت .. وكيف عصفت بوجداني ..

وقام يلحن .. عقبها سكت شويه .. خذ نفس وفجأه طلع بـ غبار ثاني ..

راشد: على قلبيييييييييييييي ..

..

عامر: فوووووووووووووووق .. وييييييين فوووووووق ..!!!
عليا: ذبحتني كم مره اقولك يعني ..
عامر: والله دورته ومالقيته ..
عليا: احسسن ..
عامر: حشى .. مسويه الفندق بيييت .. تتحسب عمرها ف بيتها .. داسه الاغراض فوق الكبت ..
عليا: خالد الله يخليك .. شله وياك .. ماباه شلوه عني ..
خالد ضحك: بتي ويايه ..
عامر: لندن فيها مغازل ..!
عمار: شو هـ السؤال .. سر الهايد بارك .. وغازل على كيف كيفك ..
عامر: قول والله ..
عليا بتذمر : اييييييييه .. نحن قلنا هذا العاقل ..!
عامر: منو هذا ..! عموه تعرفين لو العقل انسان .. جان غسل ايده منا ..!
عليا: زين الحمدلله يوم انك تعرف ..
عمار: ابا اشوف ولديه يعني مب حاله ..
عامر: دواك .. اصلا محد يعرف يأدبنا غير عموه عليا ..
عمار ضحك ويلس ع الكرسي: ابا اشوووف ولدييه ..
عليا: ماشي يلا .. شل بعمرك وسر حجرتك ..
عمار: خييبه ..
فارس: حطتك ف راسها الحين شو يفكك منها ..
عمار صد صوب عامر وهمس ف اذنه: هاي طلعت اخس عن اخوها ..
عامر:لا تسب ابويه ..
عمار: لا وانته الصادق .. اقصد ابويه ..

ضحك عامر ورد صد صوب عليا ..

عليا: شو كنت اتقول له ..!
عامر: ولا شي .. كلمه راس بيني وبين ولد عمي .. هالحرمه ف كل شي متعنيه ..

شلت عليا الدلاغ وفرته ف ويه عامر ..

عامر: اخيييييييييييييييييييييج .. شو هـ الارف هذا .. ومسويه عمرها نظيفه .. فرت الدلاغ ف ثمي ..
عليا: عشان اتعرف كيف اتحط لسانك ف ثمك وتنطم
عمار: ما صاح عموه .. ؟
عليا: وين فديته .. من التعب مب مستوعب اصلا هو عند منو .. بس امس قبل ما يرقد صاح شويه .. عطيته ادول .. ورقد ..
عمار: فديته والله .. عموه والله ماصبر عنه .. حرام عليج ابا اجوفه .. قبل ما امرض
عامر: هههههههههه قبل ما امرض اونه ..
عليا: قتلك ماشي ..
عمار: فارس ياخي اتوسط لنا..
عليا: فارس حاله من حالك .. ان رمس يعرف اني بسكته ..
فارس: تباني افشل عمري عقب هـ الرد ..
عمار: عمي خاااالد ..
عامر: فكنا الله يخليك .. عمك خالد بس فالح يسوي فيها رومانسيه .. وحركات المعاريس اللي ف شهر العسل .. الا فديتها .. الا ما تسوونها.. الا " وغير صوته" دام عندي هـ القمر مالي ومال النجوم ..

ضحك خالد من الخاطر عليه .. ونش سار صوبه .. وعامر نش وسار صوب عمته واندس ف حظنها ..

عامر: الله يخلييييج عمووه .. والله ماتحمممل دفاااشه ريلج ..
عليا: قم عني قممم ..
عامر: عمووووه .. انني استغيييث .. اغييثيييينيي ..

وقبل ما ترد عليه عليا .. كفخه خالد ..

عامر صرخ: واااامعتصمااااااااااااااه ..

وكلهم ضحكو عليه .. باستثاء عليا اللي شلته وفرته بعيد عنها .. وبنفس الوقت سمعو صوت ثاني وهو يصيح ..

نش عمار من مكانه .. نقز بيسير الحجره بس وقفته عليا ..

عليا: على ويين على ويين ابويه .. يلس يلس مكانك ..
عمار: عموووه حرام عليج والله ..
عليا: ماااشي .. مب حرام .. يلس ..
عمار: عموووه ولدييييييييييه ..
عليا: وخير يا طير ولدك .. انته لو تعرف الحرام انته .. جان ما شليته وسبحته ف هـ الجووو ومرضت الولد..
عمار وهو يطلع مبايله من جيبه : عمووووووووه
عليا: يلا جب يلا .. مابا اسمع حسسسك ..

هز عمار راسه بـ أسى وهو ميود مبايله ف ايده وطالع من الحجره .. وقف ف الممر .. حط الفون عند اذنه وابتسم ..

عمار: الو ..
شمه تنهدت: السلام عليكم ..
عمار: وعليكم السلام ..
شمه: شخباركم ..
عمار: نحن بخير .. الحمدلله ..
شمه: شو مسوين ..
عمار: الحمدلله .. انتي اشحالج ..!
شمه: بخير الحمدلله .. ثنوي شخباره .. يقولون مريض..
عمار: والله علمي علمج .. اللي قالج انه مريض خله يقولج عن اخباره .. انا ماعرف عنه شي ..!
شمه: ليش وينه ..!
عمار: اممممج شالتنه عني من امس .. مب طايعه اتيبه .. اتقول لي تبا اتشوفه تعال .. الحين يوم ييت .. صنفت .. قالت لي رد حجرتك ما تشوفه ..
شمه: ههههههه خيبه .. ليش ..!
عمار: آآآآممم ..
شمه:هـ الاممم وراها شي .. قول قول ..
عمار: والله السخييف ..
شمه: هيييه ..!
عمار: من يومين حاشرني الا ابا اتسبح ف الحوض ..!
شمه بـ صدمه: انزين ..!
عمار: امس نزلت وياه واتسبحنا .. يوم طلعته الا هو قالب من الثلج ..
شمه: ماشااااء الله عليييك ..
عمار: شسوي به .. حشر الدنيا .. فضحني ف الفندق .. ماتم حد ماعرف اني ابوه ..
شمه: هههههه حرام عليك .. ف هـ البرد ..
عمار: دواه يستاااهل .. خلاني انهزززب عيل ..
شمه: يوم ان دواه .. شحقى حاشر الدنيا وتبا اتشوفه عيل ..
عمار: والله من امسسس ما جفته ..
شمه: عيل انته بعد دوااك ..
عمار: حرام علييج ..
شمه: متسبب ف مرض الولد .. واتقول دواه .. وياي عندي تقول لي حرام عليج .. انته اللي حرام عليك والله ..
عمار: شكلي ما بتحمل اتم وياه اكثر ... بيخلص هـ الاسبوع وبنرجع ..
شمه: احسن ..
عمار ابتسم: تبينا نرجع ..
شمه تنهدت: كيفكم ..
عمار: خلاص عيل بنتم دام كيفنا .. انا قلت بنرجع لانج اشتقتي له ..
شمه: صدددق ..عيل ردووو ..
عمار: لا خلاص .. دام كيفنا بنتم ..
شمه: لالا ردووو ..
عمار: والله جااان على قرارات امج .. انا من باجر برد وياه بعد ..
شمه: ياريييت..
عمار ابتسم: اشتقتي له ..!
شمه: واااااايد ..
عمار اختفت ضحكته : يالله شل الحجره على راسه بـ صياحه .. اسمحي لي والله مضطر اسير له ..
شمه: اوكي ..
عمار: مع السلامه ..
شمه: مع السلامه ..

وحط ايده ع الجرس ..

عمار: ايييه عمووور يالخسسف افتح الباب ..
عامر فتح الباب: انته ساير تغازل تقول عني انا خسف لييش ..!
عمار: اغازل ف عينك ..
عامر: مادري عنك .. شليت مبايلك وطلعت برع
عمار دزه: جب زيين ..

وسار صوب الصاله ..

عمار: شووو بابا ..

واجدم منه .. قبل ما يشله .. سحب ثاني عمره من عليا وهو ماد ايده لـ ابوه .. اجدم عمار شله ويلس ع الكنبه ..

عمار: فدييت هـ الويه الاحمر ..
عليا: البركه فييك ..
عمار وقف: انا شو اللي خلاني ايي .. ارد حجرتنا مب ابرك لي ..
عليا: والله ما وديته ... سر روحك الحجره .. الولد ما توديه وياك ..
عمار: عمووووه ولدييييييه ..
عليا تصرخ: لانه ولدك اتنش تجتله .. تتحسب ما وراه حد .. محد  بيسأل عنه والا بيحاسبك عليه .. انته ما كملت اسبوع وياه ونشيت سبحته ف الحوض ومرضته .. انا لو اخليه عندك اسبوع ثاني شو بتسوي ف الولد ..

ويلست عليا تهزا عمار اللي ما قدر يرد عليها ولا قدر يحرك ريله حتى .. واقف وهو حاظن ثاني اللي يصيح .. ويستقبل تهزيئ عمته .. ومن صوب ثاني يسمع ضحكه خالد وفارس وعامر عليه ..!

..

ف دبي .. بالتحديد المسا ..

مهره: شوووف .. هذا لونه احمر .. يعني يوم بيكبر بيسمر .. اما هذا ف ابيض عنه ..
عبدالله: والله ماحس ان في فرق بينهم ..
مهره: امبلى .. الفرق كبير .. بس لانك ماتحس ابا ابين لك من الوانهم وانته بعد مب قادر اتميز ..
عبدالله: الشي الوحيد اللي لاحظته ان واحد منهم مشاغب ..
مهره: حلووو .. اي واحد ..!
عبدالله: مادري .. الحين رقود .. يوم بينشون بشوف منو اللي مب طايع يسكت .. بقولج اي واحد ..
مهره: لالازم تعررف اتفرق ..
عبدالله: باجر بيكبرون واكيد بعرف ..
مهره: باجر بيبكرون واذا ما عرفت زين بيطلعون عينك ..
عبدالله: لالا .. عيالي مؤدبين ..
مهره: توك اتقول واحد مشاغب ..
عبدالله: الحين لانه صغير .. بيبكر بيتأدب..
مهره: واذا ما تادب ..
عبدالله: بأدبه بالظرب ..
مهره: اففف اكره هـ الاسلوب ..
عبدالله: الظرب .. اسلوب من اساليب التاديب ..
مهره: لا دخييلك .. الا العنف .. والله وايد اكرهه من اللي شفته ف بيتنا ..
عبدالله: لا حرام عليج .. عاد انا ما بظربهم بـ عنف ..
مهره: ماااااشي .. ولا تفكررر اتمد اييدك عليهم ..
عبدالله: الريال لازم ينظرب والا كيف بيستوي ريال ..!
مهره: كون ابوهم واربيعهم بنفس الوقت .. وبتشوف عيالي فديتهم كيف بيستوون رياييل..
عبدالله ضحك: بستوي اربيعهم اذا عرفت افرق بينهم ..
مهره نشت عنه: والله ما يتشابهون .. انته بس ما فيك نظر ..
عبدالله طاح على ظهره: انا لو مافيني نظر جان ما خذتج ..
مهره ضحكت: لا اتلف وادوور .. انا بسير عند مي شويه وبرجع لك .. دخيلك انتبه عليهم .. واحد بسمع صوته ماشاء الله اذا صاح بيشل الدنيا على راسه .. اما الثاني حتى انته يمكن ما تنتبه عليه اذا نش ..
عبدالله اجدم منهم وهو يتأملهم: لا توصين .. انتي سيري وتعالي بتشوفيني انا على هـ الوضع ..
مهره: انزيين ..

وطلعت من الحجره .. سارت صوب حجره مي .. دقت الباب .. ووقفت ثواني ..

غانم توه ياي: ميّووه " واشر بـ ابهامه على ورا" برع ..
مهره: ف الحوي ..!
غانم: لا .. ف المطبخ ..
مهره: ف المطبخ شو اتسويي ..
غانم: سيري جان ما خبلو بها الحين ..
مهره: منو ..
غانم: كلهم ..
مهره ابتسمت: زيين .. يغيرون من نفسيتها شوي ..
غانم رد لها الابتسامه: وين التوأم ..
مهره: رقووود ..
غانم: افا ..
مهره: الله يخليييك خلهم .. والله ابا ارتاح شويه ..
غانم اطالع الساعه وهو يمشي وياها سايرين برع : زيين بعطيهم ثلث ساعه ..
مهره رفعت حياتها: عقب ثلث ساعه .. امهم وابوهم بعد بيرقدوون ..
غانم: يلا يلا والله شووو .. ما جفتهم اليوووم
مهره: طوول اليوم يصيحون اصلا .. لوعو جبدي والله ..
غانم: ليش بلاهم ..!
مهره: شدراني بهم .. مصاخه هذيل احفاد اخوك ..
غانم: والله محد مكبر راسهم ومدلعنهم جذه غير عبدالله ..
مهره: صدقك والله .. معودنهم ع الشل .. وتعال شوف يوم هو مب موجود .. انا اللي اتوهق ..
غانم ضحك: الله يحفظهم ويخليهم لج يا بنت اخويه ..
مهره: آميين " وفتحت باب المطبخ " ماشاء الله .. متيمعين هني ..
راشد: مالك عذر لو تعتذر ما عذرناك يكفي رجا لا ترتجي من يجافيك ان كانت الفردوس في كف يمناك القلب صار ابعد من اقلوب اياديك ..
مهره: هذا منو كلمه ..
حارب: هههههه هذا متعذب ويالس .. ماعليج منه .. حياج اختيه ..

ابتسمت مهره وسارت صوبه .. 
 

مهره: شو اتسووون ..
سيف: والله اللي تبينه بنت عمي .. اي عصير فرش .. عموه مي فاتحه كفتيريا اليوم ..
مهره: وانتو قاصين على عمتيه ..!
مروان: لا وهـ الصوب سندويجات بعد ..
مهره: والله مسوتلكم سالفه ..
مايد: لا تخربينها .. دام الله هادنها .. خليها اتكمل شغلها .. لانها عقب شوي بتفتر وبتظاربنا ..
مي: انته بالذات .. بشلك بفرك برع ..
مايد: عوذ بالله منك يا ابليس .. مهرو ما سميتي بالرحمن يوم ييتي .. يبتيهم وياج ..
راشد: والله اذا في حد بيبهم وياه .. ماظن بيقدر عليهم غير غانم ..
غانم: اعوذ بكلمات الله التامات من شر ما خلق ..
منصور: اول مره اشوف بليس يتعوذ من نفسه ..
غانم فتح عينه وصد صوب منصور: انا بليييس ويا ويهك انته " وهو يكلم طارق" اوووه جبل طارق شخبارك ..
طارق ابتسم: بخير ..
حارب: لو سمحت ما يخصك ف اربيعي .. طارق تعال هني ..
غانم: خله خله والله من زمااان عنه ..
حارب: قتلك ما يخصك ف اربيعي ..
غانم: يالبرقر .. شو الدراسه ..
حارب نش من مكانه وسحب طارق من اديه: مااايخصك ف اربيعي .. لا تتقارض وياه والا بسويك برجر مال حرام الحينه ..
غانم: انته كلت شي هناك مال حرام ..!
حارب:هههههههههه لا .. اختك كل يوم تفتح لنا علبه تونه واتسويلنا اياها بطريقه يديده ..
غانم: فدييتها عليا والله .. يعلكم ما تسووونها .. ميّوه حق منو اتسوين ..
مي: اسوي حق طارق ..
غانم: ف ايييييده سندووييجه ..
مي: خللله ياكل ولد اختيه .. عليه بالعافيه ..
غانم: انزييين انا ابا .. يوووعان ..
مي: اصبر بخلص وبسوي لك ..
غانم: مابااااا .. الحين الحين اتسوين لي .. قبل ما تخلصين ماله ..
مي: قم زيين .. يعني تباني اودر مال الولد واسوي لك انته ..
غانم: انا بعد صبي انزين .. ما اكسر خاطرج ..
مي: لا .. صخ ..
ضحكت مهره وسارت صوبها ..
غانم: فديتها بنت اخويه بتسوي لي ..
مهره: والله كان ودي بس .. اذا اتأخرت على ريلي بيرقد .. ف بسير اطمن على مستقبله وبرد لك ..
غانم: طاعو والله ..!
مهره: اذا ياااااع والا رقققد .. بينسى عياااالي .. بيصيحون فديتهم وانا ماعندي خبر ..
غانم: الحيييين انتيي .. اتفضلين هـ الزعاطيط الثنينه هذييل .. عليه انا عمممج .. ويين حقوق العم ..
راشد: لا .. تعال .. بتودر عيالها وبتخليهم يصيحوووون .. وبتجابلك انته ..
غانم: والله هاااي حقوق العممم ..
راشد: قممم زييين .. سر عرس وخذ لك حرمه اتجابلك .. وعقب قول حقوق ..
غانم هز راسه بـ اسى: آآآه هززززلت ..
مايد: هيه والله هززززلت يا مايد بدر ..

ومهره ما سوت لهم سالفه .. شلت الصحن وسارت صوب الباب .. توها بتطلع .. وشافت عبدالعزيز بويهها ..

عبدالعزيز: ماشاء الله متيعمين هني اليوم ..
مهره: حق الدح والحش ..
عبدالعزيز ضحك: شخبارج ..
مهره: الحمدلله .. انته شحالك ..
عبدالعزيز: بخير الحمدلله.. التوأم وينهم ..!
مهره: رقووود .. وان شاء الله ما ينشون قبل ساعه ياااارب ..
عبدالعزيز: امطفرين بج شكلهم ..
مهره: آآآه اسكت .. والله تعبت منهم ..
عبدالعزيز: الله يعينج على تربيتهم .. ويرزقج ويرزق ابوهم برهم ان شاء الله ..
مهره: آمييين ...

ابتسمت .. رد لها عبدالعزيز الابتسامه وسار صوب الباجيين .. اتجدم من مي لوا عليها وهو ياخذ السندويجه اللي جدامها وغانم يطالعه بـ صدمه ..

غانم: لا نامت اعين الجبناء .. صار لي ساعه يالظالم .. ياللي ما تخاف ربك ..
سيف قطع عليه: يالبرجر ..
غانم: اي برجر الا مطعم فاست فووود .. يالظالم حتى سلام الله مافريته علييينا .. يييت شليت سندويجتي ودحيييتها ..
عبدالعزيز: دحووك بـ ستين قب .. جب يلا جب
سيف: ماشاء الله .. القب يدح ..! من متى ..!

وعبدالعزيز ياكل ولا مسوي سالفه ..

غانم بتعبير : لا ناااااامت اعين الجبنااااااء يوووووما  ... ولااااا باااااااتت على حلم رغيدووو ..  وكيييييف تنااااام اووو  تهنى بغمض .. وقد اسهرتهااااا يا ابن الوليدوووو .. آآآه من قلب ..

والكل ضحك عليه .. صدق ما يليق عليهم يوم يبون يسوون عمارهم مثالييين.. يضيعون ابو اللغه ..!


..

نرجع لـ ألمانيا ولـ اهل المانيا ..

من يقول ان بروده الجو.. ممكن تطغي على حراره القلب ..
في كل سنه من هـ الفصل .. ايي الشتا ويسير بدون ما يأثر ف نفسي .. حراره قلبي اللي يسببها الجو المتوتر ف بيتنا .. ما تعطيني اي فرصه .. عشان استمتع بـ بروده الجو .. حتى لو فكرت اطلع برع واكسر الحاجز اللي بيني وبين الشتا .. وانا احاول احتظنه بدون حواجز .. ف دربي .. اشوف اشكال من الالم .. وشحنات من الغضب والقهر .. ينتهون .. بـ شوفتي لـ جزء من دمي ولحمي .. وهو حاظن عمره وطايح تحت المطر عقب ما ينطرد من البيت ..!

هذا اول شتا يمر عليه غير بكل طقوسه لاني بعيده عن كل شخص يسبب الالم لـ نفسي .. بعيده عن التوتر .. والغضب والقهر .. حتى لو كانت سما وحده تجمعني به عشان تذكرني بـ ايامي معاه وترد اتجدد حزني والمي ..

بس الحب اللي ف داخلي .. اكبر .. من كل شي .. وحتى اكبر من السما .. اللي جمعتني باللي تعلمت معاني الحب على ايده ..

حمد يا .. وعلمني كل شي من اول ويديد .. حمد ردني طفله .. اكبر وانمو واتعلم على ايده .. غير عندي وايد مفاهيم  ف الحياه .. وعلمني مصطلحات ف الحب .. ما كنت افقهها .. قبل ما يدخل حياتي..


بندت الفرن عقب ما حريت الحليب.. وصبيته ف كوبين .. شليت الصينيه وسرت صوب حجره حمد .. دقيت الباب ووقفت ..

حمد: تعالي حبيبتي ..
شيخه: والله اطورنا .. وقمنا انييب له الحليب لين جحره بعد ..
حمد يضحك: قصدج اطورنا .. وقمنا انسوي حليب ..
شيخه: هههههه لالا بالغت .. عموه قالت لي حري الحليب الطازج .. زيديه شكر وحطي فيه شويه نسكافيه .. بيستوي الحليب اللي هي تسويه بـ مقادير ثانيه ..
حمد: يعني انتي الحينه قاصه عليه .. حارتلي حليب مال السوبرماركت ويايبتلي ..
شيخه: اشربه .. اذا ما عيبك اوعدك اني اتعلم طريقه عموه ..
حمد: انزين ..

رفع الكوب .. جدمه من ثمه .. وارتشف منه ..

شيخه: هاه .. شرايك ..
حمد قبض اديه .. ورفع ابهامه بـ معنى " اوكي "
شيخه: امبين انه اوكي .. مب قادر اتحط الكوب واترد عليه حتى ..
حمد نزل الكوب وضحك: من البرد والله .. ابا اي شي يدفيني ..
شيخه: باجر مب السبت ..!
حمد: امبلى..
شيخه: عيل شو عندك تدرس .. خل عنك الكتاب وتعال يلس معايه شويه ..
حمد: صح ان اجازه .. بس هاي اخر سنه لازم اشد حيلي ..
شيخه: بااجر شد حيلك ..
حمد: باجر ولا بدق اي كتاب .. بفضي يومي بـ طوله لج ..
شيخه: اففف ..
حمد: لا تتأففين وايد .. شربي حليبج وانتي ساكته ..
شيخه:ههههههه تحسسيني اني ياهل وبترقدني عقب شويه .. شربي حليبج اونه ..
حمد وقف: والا تدرين .. لين ما نخلص الحليب "وجدم اديه" قومي نيلس ف الصاله ..
شيخه: احسن بعد ..

مسكت اديه ونشت وياه سايرين الصاله وهي شاله كوبها .. وريلها لاوي عليها ..

حمد: بلاج ..
شيخه: ما بلايه شي..
حمد: يالله اديج كيف بارده .. شحقى ما تلبسين جاكيت شويخ..
شيخه: ردينا على سالفه الجاكيت ..
حمد: عيل هذاك اليوم تتفننين .. اطيرين بالباب .. لين ما اندسيتي اخر شي ف الكبت ..
شيخه: لان حظرتك خوفتني ....
حمد: ههههههههه اصلا ما كنت اقصد .. يت بسوي لج حركه من ورا.. شفتج اندسيتي ف الكبت .. والله مت عليج من الضحك ..
شيخه: والله انك سخييف ..
حمد: لو امصورنج فيديو .. وامراونج .. جان ضحكتي على عمرج ..
شيخه: والله ما تتخيل كيف خفت .. قلت حرامي عافد عليه .. والحين بيجتلني .. انته لو كنت متأخر شوي ومب فاتح الباب .. جان صحت ..
حمد: خيبه ..
شيخه: اففف اسكت .. مابا جاكيت .. حريت وانا اذكر شعوري هذاك اليوم ..

يلس ويلست حذاله ..

حمد: ماانع بيرد البلاد الاسبوع الياي ..
شيخه: اووونه ..!
حمد: احسن .. والله تنسيينه شوي .. يفج عني ..
شيخه: انته صدق اتغار منه ..
حمد: تبين الصدق هيه ..
شيخه: ايه عن الحركات ..
حمد: كنت اغار اول الايام .. اما الحين لا .. وابتسم ..

حطت شيخه راسها على جتفه وهي تلعب ف كوب الحليب .. وهو بطرف عينه .. مندمج ب حركاتها وبراءتها ..

ما بتكبر .. حتى لو كبر همها .. حتى لو كبرت سعادتها .. ضحكها صياحها .. شغبها .. وحتى عمرها .. لو كل شي فيها كبر .. بتظل الطفله اللي شافها حمد اول مره ف عرسه .. وهي خايفه منه .. خايفه من الايام واللحظات .. وادور على شي يحظنها ويهدي خوفها .. بتظل وردته اللي قطفها من بد كل الورود ..


..


ف الحجره اللي تجمعهم وتجمع حبهم واخوتهم ..
كل واحد منهم .. كان طايح على شبريته وهو يطالع السقف .. مافي شي يتأمله .. بس مجرد ترتيب افكارهم وهم يشوفون السقف .. يكفيهم ..

حارب: رشود ..
راشد: حروب ..
حارب: نعم ..!
راشد: حجزت..!
حارب: شو ..!
راشد: اقصد .. دورت
حارب: شووو ؟
راشد: شقه
حارب: لا ..
راشد: يعني ما بتطلع ..
حارب: امبلى .. بطلع ..
راشد صد صوبه: وبرجع ارقد ف الحجره روحي ..!
حارب: نعم انته .. ليكون مصدق عمرك يعني عقب ما اعرس بودر حرميته وبي برقد عندك ..
راشد: لا بس .. ع الاقل بتكون موجود ف البيت ..
حارب: حتى لو طلعت .. ما بخليك دقيقه وحده ..
راشد رد اطالع السقف: كلام ..
حارب: ليش اتقول جذه ..
راشد: لانك لو طلعت من البيت .. بتنشغل بـ حياتك وحرمتك وبيتك .. وبتنسى اخوانك ..
حارب رفع حياته: عساها ما اتدوم هـ الحياه اللي بتفرقني عنكم وبتنسيني اياكم ..
راشد: لا تقول جذه ..
حارب: ما تسمع رمستك المخبقه .. كيف يعني بنساكم ..
راشد: باقي شهرين على عرسك ..
حارب: ليش ما تعرس واتفكني ..
راشد: ماقدر .. انته خونت .. كنا متفقين ناخذ خوات ..
حارب: حلو انزين.. خذ اختها .. والا يالس ساعه وياها عند جدول الماي .. ع الفاضي ..
راشد رد صد صوبه: لا مب ع الفاضي .. بس مب على افكارك الخايسه ..
حارب ضحك ..
راشد: يالخايس .. " وفره بالمخده"
حارب: عيل شو كنت اتقول لها ..!
راشد: سوالف عاديه .. والا اول مره يعني اكملها ..
حارب: لا .. بس كنت اراقبكم من فوق .. ماحسها كانت سوالف عاديه ..
راشد: عطني عطني مخدتي ..
حارب: ليش عشان اترد تفلعني بها ..!
راشد: اذا بتكلمني جذه .. بنش اخنقك بها " ويلس ع الشبريه" انته بذمتك تتحسب قلبي فندق.. كم وحده تباني احب
حارب نقز ويلس هو الثاني: اووووونه .. يعني اتحب ..
راشد: لا .. ماحب حد .. بس انته ف البدايه كنت تباني احب ميره .. والحين لفيت على شمه .. خير ان شاء الله .. جي الحب جذه .. تعال وحب ..!
حارب: آآآآه .. انته مشاعرك متجمده..
راشد: احسسن .. ولا اني اسوي قلبي فندق ..
حارب: حب لك وحده .. اتخيلها حياتك .. ما بتحس ان قلبك فندق ..
راشد: سمعو هذاااا انتو .. انته سرررت هناك .. استخفيت موليه ورديت .. وكنا انقول مروان بعد ..والله طلع اعقل عنك .. سار استوا هادي ورد ..
حارب: اييه .. مروان فديته خله على صوب ..
راشد: ليش ..
حارب: نفسيته وااايد تعبانه ..
راشد: لاحظت عليه .. من شو ..
حارب:من يوم ما شافو بعض هالفاليع الثنينه .. وهم منجلبين عليه .. لا اختك الخسفه تعبره .. ولا ولد عمتك الاخسف ..
راشد: ما يكلمونه يعني ..!
حارب: ولا يصدون صوبه حتى ..
راشد: ليش هو شو يخصه ..!
حارب: تسألني انا ولا جنه اكثر واحد انظرب وكان بيموت عشانهم .. مالت عليهم بس لو يعرفون شكثر سوالهم وضحى عشانهم جان دقيقه وحده ما خلوه وهو جذه .. والله قاهريني ..
راشد: اييه .. هذيل ويا مروان وجذه .. باجر يوم بيردون البلاد وبيجوفون ابويه عيل شو بيسوون ..!
حارب: على طاري ابوك .. ما طلع لكم بـ هفه يديده ..!
راشد: لا .. صار لي اسبوعين مب شايفنه اصلا ..
حارب: اونه ..
راشد: والله ..
حارب: وامك ..!
راشد: ليش هي مب امك ..!
حارب: مادري ..
راشد ابتسم: انا بديت احس انها اميه ..
حارب: ليش ..
راشد: وايد اتغيرت يا حارب .. بدت تسأل عنا .. وتهتم لـ اخبارنا .. تخيل حتى يوم عمار سلم عليها قبل لا يسافر .. صاحت ..
حارب: جذااااااااااااااب ..
راشد: والله ..
حارب: لا تقووووول ..
راشد: انا حلفت وانته تقول لي لا تقوول ..
حارب: آآآآآخ .. فاتني نص عمري عيل ..
راشد: ليش ان شاء الله .. تتحسب اميه فلم عشان يفوتك اذا ما شفتها ..
حارب: جد جد يعني دموع ..
راشد: لاتيزاب .. اقوووولك فكني من ويهك وارقد ..
حارب: هذااا اللي ما يباني اطلللع من البيت ..
راشد: لازم ابتدي استخدم هـ المصطلحات .. عشان احس اني اكرهك وما ازعل وايد يوم بتطلع ..
حارب رد له مخدته: هههههههههه مالت عليك ..

حط راشد راسه وهو مب قادر يتخيل شي واحد .. مب قادر يتخيل ان بي اليوم وبيرقد على هـ الشبريه..ومابيلقى اخوه كل ما صد الصوب الثاني .. شرات الفتره اللي ما تخيل انه ينزل راسه وما يشوف فيها  شيخه راقده تحت ..
اليوم مفتقد شيخه .. مفتقد وجودها وحشرتها ورقادها عندهم .. وبي اليوم .. اللي بيفتقد حارب .. اللي يعتبره نصه الثاني ف كل شي ...

وحارب .. حط راسه .. وهو مب قادر يتخيل شي واحد .. مب قادر يتخيل ان قلب اخوه فعلا بدا يحب .. وبدا ينبض بالحب .. وايي ابوه باجر .. يذبح قلبه ويذبح حبه .. لان قلبه ينبض بحب انسانه .. مب من مستوا ابوه .. الا انها بـ مستوا قلب راشد .. وحبه وعقله اللي قدرت تصرقه ... راشد يحب ميره .. حقيقه ما قدر ينكرها حارب .. لكنه ما بيسامح نفسه باجر .. لو استوا بـ اخوه شي بسبب هـ الحب .. وهو يدري انه السبب الاكبر اللي خلا قلب راشد يتعلق بـ ميره ..


شو اللي ممكن يصير باجر .. شو من مواقف بتهدينا ايامنا .. وشو من احداث داستنها لنا بين صفحاتها.. وتتريانا نستقبلها ..

ليتها كانت صفحات .. نحرق منها اللي نتمنى نسيانه .. وانطفي نارها .. بـ دموع عيوننا ..!


ليست هناك تعليقات:

إرسال تعليق