الأربعاء، 17 سبتمبر، 2014

الجزء الخامس

على يسار حجرتنا انا وسلامه .. بقعه رفضت اني اعطيها لـ سلامه او لـ اي شخص ثاني .. حتى لو كان جماد ..!
مثبته فيه مكتبي بـ طريقه جدا مرتبه .. وعلى يساره طاولتيه وكرسيه .. اللي اقضي معاهم اغلب وقتي بين كتاباتي الخاصه .. وقرايتي لـ بعض الكتب ..

شي واحد فقط .. هو اللي اسمح له يقتحم بقعتي ويخدش خصوصياتي .. عشان يمتزج مع همي .. مكون هم واحد .. اشتركو به قلبين ..

اللي هو هَم سلامه اختيه ..!

قطع بلاستيكيه .. مبعثره نفسها ع الطاوله .. ممتزجه معاه شريط التحاليل اللي انفرض ع سلامه اتسويه اربع مرات ف اليوم .. عشان اتابع مرضها .. او عفوا .. اتابع لها انا اياه ..!

لان اميه وابويه .. بس فالحين يهزبوني .. وكل ما اتاخرت عنها .. يخلوني انا وباب الحجره .. واحد ..!

لميت اللي قدرت ايدي انها اتلمه من قطع البلاستك .. واللي ما قدرت عليه .. لازال طايح ع الطاوله .. ومنه اللي خذ راحته وطاح ع الأرض ..!

سمعت صوت الباب وهو يندق .. وبكل عصبيه رفعت صوتي وانا اسأل ..

عواش: منوووو ..
حريز: انا فتحي الباب ..!
عواش سارت صوب الباب: خيير ..!!
حريز: مشغوله ابا اكلمج شوي ..!
عواش: وانتو ما تظهر سوالفكم الا يوم عمي سهيل يعزمنا ع المحمّر والمشمّر ..!  خير شو عندك ..!
حريز: طاعو هاي .. ويا ويهج اخوج انا اتادبي وكلميني عدل
عواش: ادري انك اخويه .. لانك لو ماكنت اخويه ما بجرأ وباخذ راحتي معاك جذه بالكلام ..
حريز ابتسم: ممكن ادخل ..
عواش: هووش قالد ..!
حريز: بتكلميني عدل والا اسير ..
عواش: ايفيييت ..!
حريز: رمسي عربيييييييييي
عواش: ههههههههه .. بذمتك ما فهمتها ..
حريز: اعتقد معناها هيه ..!
عواش: صححح .. انا قلت لك هيه .. وف البدايه قلت لك اهلا وسهلا ..  ويوم انك تفهم كلماتي التركيه جيه تستهبل ..!
حريز: جيه امج تركيه ..!
عواش: فديييت امك والله " وانا افتح له الباب" حياك اتفضل

دخل وقبل كل شي طاحت عينه ع الطاوله اللي ع يسار الحجره ..نفسها الزاويه اللي تعايزت ارتبها ..!

حريز: شو هـ الخرابيط ..!
عواش: تحس انها خرابيط ..!
حريز: اقصد فوضى بـ كلمه خرابيط..!
عواش: كنت برتب وبرد كل شي مكانه .. بس ازعاجك سبقني ..

اجدم اكثر .. سحب كرسي الطاوله ويلس عليه .. وبدا يجلب ف الدفتر اللي يحتوي على ارقام مختلفه ..

حريز: نتايج تحاليلها ..!
عواش: الدكتور يتابعهن اول بـ اول ..!
حريز: ليش ..!
عواش خذت نفس: ماتدري ان سلامه اجلت عرسها ..!
حريز: ادري ..!
عواش: عيل اشحقى تسأل ..
حريز: وايد تعبانه ..!؟
عواش: وايد اتكابر ..
حريز سكر الدفتر: فديتها والله ..!
عواش يلست ع الشبريه: وانته ياي تظرب لي حزن هني ..
حريز: عمر شخباره ..
عواش: اخووووك واختك .. عايشين وياك ف نفس البيت .. تسألني انا عنهم ليش ..! شو سجلهم الصحي انا..!
حريز رفع حياته: اول مره تتحرطمين عن شي يخص عمر ..
عواش: اتحرطم عن شي يخص سلامه انا الحين ..!
حريز: حتى سلامه ..
عواش: لانها امنرفزتني ويا ام ريلها
حريز بتذمر: خلينا ف موضوع عمر ..
عواش: بلاه عمر ..
حريز: انا اللي ياي اسألج بلاه ..!
عواش: يعني ما تعرف بلاه ..!
حريز: اعرف .. واعرف بعد ان حالته اطورت بشكل كبير .. بس اللي اشوفه غير .. انا كل ماحس ان حالته اطورت .. ادخل عليه فجاه الحجره انصدم ..
عواش: صار شي ..!
حريز: دخلت عليه بارحه امس.. شفته في وضع .. ما يسر ابدا ..
عواش: كان يكسر الالوان ..!
حريز: لا .. حاظن نفسه وهو ينتفض .. مره يضحك .. ومره يعصب .. مافهمته والله مافهمت حالته .. خفت ان يكون فيه شي .. ويوم سرت صوبه .. سحب عمره عني .. رفض اني امسكه .. ملامحه حسستني انه مشمأز مني .. ما يباني حتى ابتسم ف ويهه ..!
عواش: وانته منزعج من هـ الشي ..!
حريز: وايد .. واااااااايد " خذ نفس " ماقدرت ارقد بيومها ..
عواش: كان معصب .. لاني مايلست وياه .. دوامي كان الساعه 8 واضطريت ارقد من وقت ..! حريز .. عمر له عالم ثاني ..ما يشوفك بنفس الطريقه اللي انته اتشوفه بها .. ولا يحس شرات ما انته اتحس .. فلا تحاول ابدا انك تسحبه لـ عالمك .. اجبر نفسك وادخل انته عالمه ..!
حريز: بس يلسته ويانا .. واندماجه .. خلوني احس انه اتغير .. وبدا يتقبلنا اكثر ..
عواش: انته دخلت عليه ف وقت غلط .. هو كان عايش بينه وبين نفسه ف هاللحظه وفجاه دخل عليه شخص هو مب متعود عليه .. لا وفوق هذا انته اصلا ماتعرف تتصرف وياه ف كيف تباه يتقبلك ..
حريز: يعني هـ الشي طبيعي فيه ..
عواش ابتسمت: كل ما يكون دوامي اليوم الثاني 8 ادخل حجرته وبتلقاه ع نفس الحاله ..!
حريز: وانتي ليش مجرمه جذه ..!
عواش: هو متعلق فيني بـ درجه كبيره .. وانا منزعجه من هـ الشي ..
حريز: ليش ..
عواش: حريز .. اخاف ايي اليوم اللي يفتح فيه عمر عيونه .. وما يلقاني ..
حريز: جب زييين ..  

وفرني بـ شده حبوب سلامه .. ونش ساير صوب الباب ..!

عواش نشت وراه : انا ارمس جد ..
حريز: لا ابا جدج ولا عمج .. نشي نشي خلصي .. ما بنترياج نحن ..
عواش: اخرتني انته ..
حريز: لو ادري انج قليله ادب جذه وبتردين عليه بهـ الرد .. جان ما ضيعت وقتي معاج اصلا
عواش: فسر تفكيري بالطريقه اللي تباها .. بس انا مقتنعه بهـ الشي ..
حريز: فكيينا زيين .. يلا خلصي .. اذا قوم امايه طلعو الحين برايهم .. انا بظهر عقب وبوديج ويايه ..
عواش: فهم امك هـ الكلام .. انا لو نزلت لها بتصدعني الحين وجني انا اللي مأخرتنك .. رفيعه وينها ..!
حريز: سارت من زمان هي وسلامه ..
عواش: ريسه ..!
حريز: بتظهر الحين ويا عيالها وامايه ..
عواش: طاعو الخونه ..
حريز: انتي سيري رتبي مكتبج ..
عواش: والله حرمتك وخواتك سخيفات ..
حريز: وايد لا تتحرطمين .. خلصينا .. والا صدق بتنهزبين اذا عمر ماطاع يسير وياهم ..
عواش: انا بس اتخيل لو ماكنت بنتكم .. شو كنتو بتسوون انتو ..!
حريز: كنا بنيوزج عمر عشان اتمين طول العمر معاه ..!
عواش: فديييييييييييته والله .. سر سر وفكني من احلامك هاي .. خلني اخلص ..
حريز: انزين .. يلا باي ..

مشى عني وادري انه يضحك عليه بينه وبين نفسه .. بس لين اليوم انا مش قادره استوعب .. شو المضحك ف الكلام اللي اقوله ..!! 

..

عند بدايه الدري .. واقف واصابع ايده ادمبك ع الحدايد .. مش رغبه منه بـ اختلاق جو من الربشه .. لانه ف داخله ضغط .. اتجاوز الحد الطبيعي بدرجة ارتفاعه  ..!

ياسر: لابوها من سالفه .. شو اللي وهقني انا .. اففف ..

مشى صوب الدريشه .. وهو يطالع الجو المغبر .. ثواني .. وعقبها رد صوب الدري ..

ياسر يصرخ: يوووووووووووسف  ..!
يوسف من بعيد: ياي ياي .. والله العظيم ياي ..
ياسر: من نص ساعه اتقول لي هـ الكلام ..
يوسف: عنك عاد انا قبل ربع ساعه خبرتك تترياني ..
ياسر: يلاااااااا زيييين .. شو تتكشخ حق حرمتك انته ..!

وصل يوسف صوب الدري ووقف

يوسف: يعني عشر دقايق وايد تتريا بهن اخوك ..
ياسر: اخوي لو يستاهل بوقف له العمر كله ..
يوسف: بدينا بدييينا ..
ياسر: وعقب هـ التاخير كله .. نازل لي بـ الكندوره اللي مصلي بها ..
يوسف: لا والله مب نفس الكندوره ..
ياسر: غريبه عيل ما سرت بـ بنطلون وقميص ..
يوسف: عشان يفضحني ريل خالتك ..
ياسر: زين يسوي بك .. طوووف وخلصني..
يوسف: ع شو مستعيل ابا افهم ..!
ياسر: يوعاان .. ناش من اول الصبح مجابل البيت .. شراتك انته راقد لين حزه الاذان .. نشيت اتسبحت وسرت صليت ركعتين وييت .. ولا حضرت الخطبه ..
يوسف: وايد يرمس راعي المسيد ..!
ياسر فتح عينه:  راعي المسيد ..! جايف الريال ب كندورته وبشته مبسط عند المسيد ويبيع بَنَك ونخّيّ عشان اتقوله راعي المسيد ..!
يوسف: نسيت شو يسمووونه لا ..
ياسر: زين يوم مانسيت اسم المكان اللي تصلي به ..
يوسف: وين انسى .. وانا كل ما طلعت من المسيد .. امشي المشيه البطريقيه من الزحمه .. ف لين ما اوصل عند نعالي اقرا اللافته اللي مكتوب عليها اسم المسيد ..

ركب ياسر السياره وهو مبتسم ..

ياسر: وما تكلف على عمرك شوي .. وتقرا الاحاديث .. والا تستغفر لين ما تحصل نعالك ..
يوسف: يوم احصله احمد ربي .. بس يوم ينصرق .. ماخلي حد ماغربله ف قلبي ..
ياسر: الحمدلله انه ف قلبك .. والا جان افتضحت وياك انا ..
يوسف: ليش..!
ياسر: المره اليايه بدخل المسيد .. بيجوفون شكلي .. عبالهم انا اللي سابنهم .. وبيطيحون فيا ..
يوسف:انته بس خبرني منو اللي بيطيح فيه .. وانا اادب لك اياه ..
ياسر: شكرا .. وين سيارتك ..!
يوسف: ف الوكاله ..
ياسر: اي وكاله بالضبط..
يوسف: اقصد ف الكاراج ..
ياسر: هيه قول جذه .. وايد لا اطور نفسك ..بلاها ..!
يوسف: امس دعمتني حرمه ..
ياسر: انته المجتمع مغرم فيك .. كل يوم والثاني مسوي حادث.. بس انته ما تدعم حد .. هم اللي يدعمونك سبحان الله ..
يوسف: جفت عاد .. اخووووك حبووووب ..
ياسر: متى بتتادب وبتحس بالمسؤوليه .. مادري ..!
يوسف: انتبه انتبه عن تدعم الحين ..!
ياسر: جيه قالولك يوسف..
يوسف: على فكره .. لا تنسى اني اكبر عنك ..
ياسر: انته ما ذليتيني .. لو اكبر عني ب دهر مادري شو كنت بتسوي .. اييه اصحى .. ثرك اتنفست قبلي ب ربع ساعه .. بس هذا هو الفرق الوحيد بين عمرنا .. وليتك حسيت انك اكبر عني واستفدت من هالربع ساعه .. لا مكمل دراستك ولا مظهر لك سياره شرات الاوادم .. ولا اداوم اصلا شراتهم ..!
يوسف: سوق سووق زيين .. عورت راسي بـ سوالفك ..
ياسر: الله يهدييك بس ..

كـ اي اخوان علاقتهم طبيعيه بعض .. كانو ياسر ويوسف .. وكـ اي توأم .. اختلفت صفاتهم عن بعض .. كانت شخصياتهم..

اما شكلهم .. ف هو نسخه .. اتكررت مرتين ب ملامح كل واحد منهم ..!

..


صوت اليباب .. يقدر يسمعه اي شخص مجرد ما يدخل من باب الحوي .. وهو يحاول يسير الميلس .. اما ربشتهم .. ف كان يوصل صداها .. صوب اللي تيمعو ف الميلس ..!

مزنه: وجييييييه ما خبرتوووونا .. انسوي له نثووور ..
موزه: شي نثور .. بس مب حقه ..
مزنه: عن النذاله ..
موزه: ما استوا شي انزين .. يوم بنسير نخطب رسمي  بنسوي له ان شاء الله ..
مزنه: وجذه بندق وبنرتبش ..
رفيعه: عاد انتي والمعلايه ماوصييج ..
مزنه: اكييد .. عيل كيف بنرتبش ..
غاليه: ويحليييك يا سعووود ..
موزه: الا يحليييلج يا موووزه ..
شوق: هههههههه يلس يلسه ع جبدها كل يوم يسألها وافقو .. ردو .. كلمتوهم ..!
فطيم: والحين ناشرين الخبر وهو حليله اخر من يعلم ..
مزنه: جيه وينه ..!
شوق: ف الدوام فديته ..
مزنه: اي دوام واليوم اليمعه ..!
شوق: عندهم شغل لازم يخلصونه حق يوم الاحد ..
مزنه: وهو ف الدوام وانتو ناشرين الخبر وهو حظرته خبر خير .. لو انا مكانه وامسويبي هـ الحركه .. من القهر بقولكم خلاص مابا اعرس ..
عفرا: موضوووعج انتي..!
رفيعه: انتي هبله عادي اتسوينها ..
لطيفه: غاليه اتصلي بـ اخوانج جوفيهم وينهم ..
غاليه: امييه عشر مرات متصله ف ياسر .. يوسف اللي ماخرنه ..
سلامه: عويش و حريز وعمر بعد اتاخرو ..
فطيم: يبالها ظرب هـ العويش .. !
مزنه: وانتي الله يهديج لازم اتحرضين ام حريز على عواش .. بدون شي ومتحلفتلها ..
فطيم: رافعه ضغطي هـ البنت والله .. ترقد ومتى ما شبعت نشت ويلا عاد اتريووها ..!
سلامه: لا حليلها .. نشت من وقت اليوم انا اللي اخرتها ..
فطيم: وانتي ييتي وهي بعدها ..!
رفيعه: حريز اللي اخرها ..
فطيم: هييه .. عقو على ولديه الحينه ..!
غاليه: وجيه عواش مب بنتج ..!
سلامه: اصلا هاي ام حريز وفطامي بس ..!
فطيم فتحت عينها: هااي ..!!
مزنه: بعد قولن اللمم لي خربن سلامه ..
ريسه: ههههههههههه والله لو هي مب ويا عواش ف حجره وحده جان ما اجرأت اتقول هـ الرمسه ..
فطيم: انتي وعويش امخربات بلد
مزنه: وانتن البلد لي مخربينه نحن ..! اصلا من يوم عرفنا هالعايله وهي خربانه .. ف شو اللي خربناه فيها بالضبط..؟  
فطيم: لا اله الا الله ع هالسان .. وانا ما افتك من عويش ف البيت .. عشان تظهرين لي انتي ..!!وتستلمين وظيفتها ..!
مزنه: اصلا نحن كل وحده منا اتغطي ع الثانيه بـ غيابها
ريسه: وتضايجن اذا قلنا عنكن لمم ..!
سلامه: حمدي ربج يت ع اللمم اللي هي صغار الذنوب .. وما سموج الغموس ..
مزنه: كنت بطرشج الـ hell  وانا مغمضه

ضحكت سلامه بدون ما اترد عليها .. وهي فاهمه عدل شو اللي تقصده مزنه بـ ردها ..! 

فطيم: جواهر وينها ..
غاليه: فديتها خالوه ف المطبخ ..
لطيفه: ويوم ان فديتها .. اشحقى يالسات هني .. ما تستحن والله .. نشن سيرن وياها .. جوفن شو تبا وشو ما تبا ..
مزنه: تبا اظارب بشاجيرها ع راحتها .. نحن ما ندخل بين الحاكم والشعب .. مافينا ابويه هاي امور اتودي ورا الشمس .. نحن انحب السوالف اللي تستوي جدام الشمس ..
شوق: هههههههههه مالت عليج .. نشي نشي ..

نشت شوق ووياها مزنه .. ونشن وراهن عفرا وغاليه .. ورفيعه .. وبنفس الوقت اتبطل الباب ودخلت عواش..

عواش: السلام عليكم ..
الكل: وعليكم السلام ..
فطيم: ولا اتنفسين حتى ..
عواش: ويدييه لييش ..!
فطيم: بعباتج اتسيرين المطبخ .. يلا بسرعه ..
عواش صدت صوب البنات: اتغديتن ..!
غاليه: لا ..
عواش: الشباب اتغدو ..!
غاليه: لا ..
عواش ردت صوب امها: معناته ان هـ القطار اللي متوجه للمطبخ .. الحين بينطلق يعني ما فاتني شي .. ليش معصبه وما تبيني اعق عباتي ..
فطيم: اشحقى متاخره وامأخره اخوج ..
عواش: اخوج هو اللي اتاخر واخرني .. اقصد ولدج ..
فطيم: هيه .. عقي على حريز الحينه ..
عواش: لا حول ولا قوه الا بالله
فطيم: وين عمر ..
عواش: سار الميلس ويا حريز ..
فطيم: حسبي الله ع شرج يا عويش .. حتى عمر فديته اخرتيه وياج ..
عواش: زين يوم اتفديتيه .. ما بغيتي .. والله احيانا احس انج ام حريز وبس .. نحن عيال ريلج ..
فطيم: جب زيين مسوده الويه .. يلا سيري المطبخ ..!
عواش: بعباتي .. ؟
فطيم: يا ويلج ان عقيتيها ..
مزنه: الوييل لك .. تعالي تعالي يابووج .. بنات يوسف اصلا ما يتناقشن .. لو تعورين راسج من اليوم لين باجر وياهن ما بتظهرين بنتيجه ترضيج ..
عواش: صدقج والله

مشت مزنه وهي ساحبه عواش وراها .. و فطيم مركزه عينها ع هالهنتين اللي غلطن ع الخوات بدون لا يحسن ان وحده منهن الام والباجيات خالاتهن .. اما البنات .. ف واقفات ويضحكن على تعابير فطيم ولطيفه اللي انظمت لها عقب ما استوعبت السالفه

ف المطبخ ..

غاليه: خالووووووووه جوااااااااااهر ..
جواهر: شلي السماط ووديه صوب الميلس .. عطيه واحد من الشباب .. ولا تتفلسفين وايد
غاليه: وانا قلت شي غير اسمج عشان اتفلسف .. والله محد المتفلسف غير ابوج اللي سماج جواهر ..
مزنه توها يايه: مسوووده الويه .. ثركن مب حافظات غير هالجمله كل ما عصبتن سودتن ويهنا
جواهر: والله محد مسود ويهنا غيركن
غاليه: استغفر الله
جواهر: يلا طووفي ..
مزنه:يعطييج العافيه خالوه .. متحمسه هااه حق عرس سعود من الحيين .. تبين اتنثرين عليه جرجير ورويد..!
عواش: هههههه بتنثر فص ثوم ..
مزنه: انزين سلفونا عيش مب مطبوخ .. بيض .. ملح .. اي شي .. نبا نرتبش لااه .. انتو ليش ملل جذه ..
موزه: ما حشرتيينا انتي ..! قلنا لج ما استوا شي .. مااا استوا شي ..
مزنه: ما استوا شي وانتو ناشين مخبرين امة لا اله الا الله كلها ..! والمعرس خبر خير ..!
شوق: ههههههههههه من الفرحه يا مزنوووه ..
مزنه دقت ع الثلاجه: بعدك اصغييير بعدك بدييه .. اكبر بالاول واتكبر علييه .. عود اتشمت بي حياتي من يصير براسك خير لا ما اتصير عيووون اغاتي يا مغرووور شلون تصير ..يلالا يلا .. روح رووح رح رح رووح ..واشططططح ..
جواهر: مزنوووه فكينا من صدعتج مب وقت ربشه الحيين ..
مزنه: يعني شو .. ولد خالتنا بيعرس تبيني اظرب حزن هني وايلس اقبل التعازي ..!
جواهر: عوذ بالله من هالفال مزنوووه .. طلعي طلعي برع .. شحقى يايه انتي اصلا
عفرا:ههههههههههه  مخلصين السلطه ..
جواهر: هيه اميه .. طرشيها صوب الشباب ..
شوق: وهذا ..!
جواهر: كل اللي ع هالطاوله جاهز .. يلا بسرعه وايد اتأخرنا عليهم ..
مزنه: والله وجنه الشباب يصرفون لهم راتب الطبخ كل يمعه ..
عواش: ما يحاتونا نحن كثر ما يحاتون الشباب .. لا وفوق هذا .. انتي اللي لازم تخدمينهم ..! بشاجير ابوهم نحن ..
جواهر: عن الهذره الزايده انتن الهنتين .. وحده منكن اتودي العيش والثانيه اتشل صينيه الروب بسرعه ..

ردت مزنه ترتبش وكل شوي تخبل حد وياها .. ضحكت عليها واجدمت من الطاوله وانا اسحب عنها صينيه الروب بكل هدوء .. بيد وحده رافعه عباتي اللي بدت اتخم لهم المطبخ وبيدي الثانيه شاله الصينيه .. مب عشان شي .. بس لان عفرا وموزه ما اكتفن بالمجامله .. ف يلسن ع الأرض وبدن يعابلن الجدور .. ف عشان ما انهزب سلمت امري لله ومشيت ويا الصينيه سايره صوب ميلس الشباب وانا عيني تراقب عباتي من تحت ..

عقب ما التقت عباتي السوده بكندوره حريز البنيه .. مديت ايدي وانا لايعه جبدي من هـ الحاله ..

عواش: خذ ..
ياسر: ثرني مب انا اللي طالب الروب عشان تتمنين عليه ..
عواش: اوه آسفه.. اتحراك حريز ..
ياسر: ولا حريز اللي طالب ..
عواش: اذا في حد المفروض يفهم ملامح ويهي ف هن امك وخواتها .. بس وييين اللي يحس ..! اتفضل ..

ابتسم ياسر وهو ماد ايده يسحب عني الصينيه وانا واقفه بكل لوعت جبد اترياه يخلص ..
وقبل ما يوصل الروب صوب الشباب .. انجلبت الصينيه واتحولت عباتي من اللون الاسود للون الابيض عشان اتجاري كناديرهم ..!!

عواش وهي فاتحه عيونها: شكرا جزيلا ..!
ياسر منصدم: آسف ..

ونزل ع الأرض يشل الملل ..

حريز طالع من داخل: بارك الله فييج .. انتي حد يعتمد علييج ...!
عواش: ماوصيكم عاد .. اطمشو وذلوني الحيين .. انزيين ..
رفيعه: ام لسااان انتي .. دووك خذ الصينيه ..

مدت إيدها .. وخذ حريز عنها الصينيه وعقبها سارت صوب ياسر ..

رفيعه: لا وواقفه بعد .. هو ايلقط وهي تطمش ..
عواش: اطمش ع الخياس اللي انا فيه ..  
رفيعه خذت عن ياسر الصينيه: عيل اشحقى واقفه جذه جنج وحده من اصنام قريش ..

وسارت عنهم ..

عواش: اختك .. وريلها .. لين آخر هـ السنه مستحيل يتمون على قيد الحياه ..!

مشيت عنه وانا ألمح ضحكته ف عيوني .. هو الوحيد اللي ما يستفزني اذا ضحك على كلامي .. وهو الوحيد اللي اصلا ما آخذ راحتي معاه بالكلام .. بس اليوم .. مزاجي ماعرف يميز بين الشخص اللي اقدر اتقبل كلامه والشخص اللي مستحيل اسمع له ..!

رديت صوب المطبخ وقبل ما اقول اي كلمه استلمتني خالوه جواهر

جواهر: وييه شو ها ..!
عواش: ها نتيجه اوامرج انتي وخواتج
جواهر: لسانج هذا يباله قص ..
عواش: والله خيستو عباتي وخيستو مخورتي .. شسوي انا الحين ..
موزه: عقي عباتج وسيري فوق ف حجره شوق .. خذي لج اي مخوره من مخورات شوق ولبسيها
عواش: شوق عرست وكنسلت ثيابها حقي انا ..!
عفرا: حمدي ربج انتي بعد ..
عواش: انزين ابا شيله  ..
شوق: بتلقين كل شي فوق سيري وفكينا ..
عواش: انزين ابا مرافق ..
شوق: مافي حد .. فوق .. كلهم ف الميلس ..
عواش: اخاف ..!
شوق: عن العبط ..
موزه: خذي وياج رابعه والا ناعمه ..
عواش: انا لو ربي بيستر عليه .. رابعه وناعمه بيفضحني .. شكرا ع الاقتراح .. وامري لله ..

مشيت عنهن وانا سايره صوب باب الفله اللي ورا .. حمدت ربي ان هـ الباب يدخلني صوب الدري دايركت بدون ما يجوفوني اللي ف الصاله .. يعني بوصل فوق وانا بعيده عن عيون امايه اللي متحلفتلي اليوم ..


ف ميلس الشباب ..

هزاع: وييين الروووب ..
ياسر بصوت واطي: هذا انته اللي طالب الروب .. ووهقتنا به ..
هزاع: وهقتك ب شو ..
ياسر خذ نفس: اقصد بها ..
هزاع رفع حياته: مغازل صينيه الروب انته ..!
ياسر:اقووول .. كمل غداك وانته ساااكت ..
هامل يظرب هزاع بكوعه: ليش ترمسون بصوت مب عالي ..
هزاع: مب عالي ..!! وانته حاشر نفسك بيني وبين اربيعي ليش ..!
هامل: انا بعد اربيعك...
هزاع: انته ربيع الاسرار الصغيره ..
هامل بصوت واطي: اهاا .. يعني سوالفكم ماصخه  
هزاع طلع عينه: اسسسسكت وكمل غداك عن اسويك روووب واهرس العيش فيك ..
ياسر:هههههههه ما تتادب لين ما تتهزا ..
هامل: اضحك اضحك .. محد يفر مخ خالي عليه غيرك ..
علي: هامل جيه محتشر  ..!
هامل: هذا يُفرق بين الربع ..

ضحك ياسر من خاطره على الكلمه الفصحى اللي دخلت عرض ف جمله هامل بدون لا يقصد هامل انه يدخلها .. بس من كثر ما يجابل يابر وثقافته .. بدا يتأثر بشكل ملحوظ ..

والكل شارك ياسر الضحك

علي: لماذا يا صاح تفرق بين الربع ..
ياسر وهو يضحك: معذره يا هامل .. فلتسامحني ..
هامل وهو ينقل نظراته بين اللي يضحكون: ضحكتهم عليه .. ما بسامحك ..
ياسر: هههههه آسف والله آسف .. ماقصدت .. لو سمحتو اعتذرو من هامل بسرعه ..
فهد: ليش تضحكون ع الولد .. حلو انه يتعلم هـ الثقافه من الحين ..
يابر: ظنك الشخص اللي يتعلم الفصحى .. يعتبر مثقف ..!
فهد: اكيد ..
يابر: هاي لغتنا .. والمفروض تكون ف دمنا بدون لا ندرسها عشان انيي انلقب الشخص اللي يستخدم الفحصى ف كلامه بالمثقف ..
سهيل: بس انته فعلا مثقف بـ معلوماتك ..
يابر: لا تبالغ عاد ابويه ..
سهيل: يحتاي اتحداهم بك ..! 
سلطان وهو يكلم يابر: نش نش انته اغسل ايدك .. لازم اتفشلنا يعني ..
سهيل: ههههههههه ثركم تقرون انتو بعد ..!
سلطان: انا وهزاع وسعود عندنا مكتبه لـ كتبنا .. بس هذا مخه روحه مكتبه ..
حميد: الله يحفظه ويبارك ف علمه ..
سلطان: ايييه عمي .. اتخليييه يصدق عمره ..
علي: ماعلييك منه يابر .. يحق لك اتصدق عمرك والله ..
فهد: ياريت لو تاثر ع اللي مرابعنك ..
عمران: بدينا بدينا بالتحريض ..
فهد: هذا كتب المدرسه ما يدري عنها .. بعد احلم انه يقرا كتب ثقافيه..
عمران: وانته يوم انك ليل نهار تحشي مخي كلام سلبي .. كيف تباني افلح ..!
حميد: يلا بيأذن العصر عقب شوي .. نبا نلحق الصلاه ..
عمران: عمي بنصلي هني جماعه ..  مب لازم انسير المسيد
حميد: عاد انا ما بدخل المسيد الا وانت جدامي
عمران: والله اذا مصر ع رايك .. ف اتحمل العذاب اللي بييك ف اخرتك ..

وضحكو الشباب عليه ..

فهد: والله حتى الثقاااافه العاميه مايعرفها هذا ..
حريز: وانته حاس انك متفشل يعني .. ؟؟
حميد: خلصو يلا .. عقب الصلاه وراكم جم ..
هزاع: هييييييييه عاااد هذا اللي كنت خايف منه انا ..
يوسف: ههههههههه يحاتي المعبد ماله  
سلطان: والله يبتها يا يويسف .. معتكف الاخ ف هالصاله ليل نهار ..
هزاع: والله من يومين ما طبيت هـ المكان .. ولا سرت اطمن ع اجهزتي اذا منظفينهم والا مخلينهم يغبرون
يوسف: نحن بنظف لك اياهم ولا تزعل
مهند: تبا ب ماي والا بدون ماي ..
هزاع: شكرا .. انته اتصلي واتسير بيتكم .. اذا طبيت الصاله يا ويلك ..
مهند: لا تهدد .. ريل خالتيه اللي دافع فيها ..!
هامل: خالي هزاع وابويه سهيل واحد ..!  
هزاع: اشكر فنننك والله .. فديييته ويقولون عنه مب مثقف .. هذا يعق درر ويمشي اصلا ..
مهند: انا حاولت القط .. بس خريطتي فيها ثقب ..
هزاع: هههههههههه زييين انك لقطت كلمه ثقب من الثقافه اللي نرمس عنها من الصبح ..
حميد: اذن يلا نشوووو .. عاد لو ذابحيلكم خروف مادري شو بتسوون ..
يوسف: نغزه نغزه عمي سهييل ..!
حميد: والله اخويه ماقصر .. بس انتو اللي ماتشبعون ..
يوسف: نشينا نشينا .. يلا شباب ..


يا انهم ما ينشون .. او انهم ينشون كلهم ويسوون طابور عند المغاسل.. وكل واحد يقطع الثاني ف هالبقعه الضيجه ويحط عليه ويمزح معاه .. الا واحد منهم كعادته .. له طقوس خاصه مع الماي .. اذا ما خذ اكثر من خمس دقايق وهو يغسل ايده .. وما انفلع ع راسه بـ اي تحفه جريبه منه .. ما يخلص ..!

..

العصر ..

عقب الغدا والفواله ..

هم .. يقضون وقتهم ف الجم او الحوي .. او يسوولهم اي فعاليات خفيفه يستلمها ابويه وعمي سهيل عشان يخفون من صدعتهم وحشرتهم ..

ونحن نستسلم لـ الكسل والخمول اللي يجبر كل وحده منا .. تنسدح ف صوب ..او انحش ف الاوادم .. واليوم ما غير سالفه سعود .. ماخذه كل حاجتها من الكلام ..

الكل مرتبش .. يسولف ويضحك ويقطع سعود اللي لين الحين ما عرف بالخبر ..
الا انا ومزنه .. يالسات ع الدري .. ومخنا ف عالم ثاني .. وعفاري يالسه ورانا ..

عواش: مارد بعده ..!
مزنه: لا ..
عواش: متى بيرد ..!
مزنه: شدراني .. اليوم اسمع امايه اتقول يمكن الاسبوع الياي ..
عواش: خيبه من متى مسافر ..
مزنه: ساير يعالج ست الحسن .. عشان العيال ..
عواش: والله ابوج ما عنده سالفه ..
مزنه: حسيتي .. عنده بنيه شراتي وساير يدور غيري ف لندن ..!
عواش:لا جد يعني .. ماشاء الله صاف نص منتخب ف بيته .. وساير ماخذ الثانيه ولا بعد مودنها تتعالج حق العيال ..
مزنه: الشرهه مب عليه .. الشرهه على هـ الهبله اللي ماخذتنه .. والله صغيره يمكن 27 او 28 انتي مينونه مضيعه عمرج ويا واحد عياله البجر  اصغر عنج بـ 3 سنوات ..!
عفرا: عادي .. عندنا من هـ النسخه ف البيت ..
عواش: تعالي صدق .. شخبارها النسخه اللي عندكم ..!
عفرا: افف سكتي .. والله مابا اسبها .. 
عواش: ليش بعد ..
عفرا: مادري شو مشكلتها ياختييه .. يعني هي صح خايسه ويانا .. بس يوم اتشوف عمران تستجلب ..
مزنه ضحكت: هي اصلا جلبه ..
عفرا: لا صدق والله .. حاطه راسها بـ راسه .. تستمتع يوم ابويه يعصب عليه او يظربه ..
عواش: وابوج لين الحين يظربه ..
عفرا: آخر مره قبل عرس فهد باسبوع .. عمران اصلا يوم يضايج او يستهم .. يدوّخ وخشمه ينزف .. وهذيج الفتره كان مضايج .. اتخيلي سوت مشكله من لاشي .. وهو توه نازل من فوق ما يدري شو السالفه .. استقبله ابويه بـ كف محترم .. ادوخ وطاح علينا .. وابويه ولا اهتم لـ امره .. شلها ودخل الحجره ..
عواش: جذاااابه ..
عفرا: والله ..
عواش: ماحيييده عمي عبيد جذه ..!
عفرا: طيب .. والله انه طيب .. بس هاي الخايسه اتفر مخه وتغسل له اياه ..
مزنه: اعزمينا بيتكم مره ..
عفرا: حياج ف اي وقت ..
مزنه: ابا الوقت اللي هي اتكون موجوده فيه .. عشان اغسل لها شراعها الهرمه ..
عفرا: انا ابدا ما اتفيج لـ سخافتها ..
عواش: وحصوه ما تظارب وياها ..
عفرا: لا .. حصوه الوحيده اللي مقردنه ابويه .. ف هي ماتقدر اتفر مخه عليها ..
عواش: عن اتفر مخه على بنت عمي ..!
عفرا: تخسي الا هي .. اقولج هي بس ويا عمران جذه .. والا ويانا نحن عاديه جدا ..
مزنه:ما تظاربين وياها انتي
عفرا: احيانا .. اذا كانت امصختنها ويا عمران ..
عواش: لاه لاه لاه .. يعني انتي اونج ادافعين عنه
عفرا: اكييد .. اخويه .. ما قدر اشوفه كل يوم ينهان وينظرب عشانها ..

سكتت وماعرف اصلا بـ شو ارد على عفرا اللي هـ اليومين بالذات .. بدت اتفضفض عن اللي فيها ..

وفجأه صدينا كلنا صوب الصاله عقب ما سمعنا صوت خالوه وخواتها .. وهن ايببنن ..!
وصوب الباب .. دخل سعود وهو مبتسم من الربشه والحشره .. ومشى ساير صوب شوق .. وهو يحظنها

سعود: الحمدلله ع السلامه ..
شوق: الله يسلمك حبيبي .. بس على فكره ..
سعود: شو ..!
شوق: هـ العرس والربشه مب حقي..
سعود: عيل ..!
موزه: وافقووو علييك .. وافقووو عليك .. بالبررركه ..
سعود: جذابه ..
مزنه: خيبه هههههههههههههههههههه
موزه: مالت عليك الشرهه عليه انا اللي من الصبح اقولهم سكتو .. ابا اكون اول وحده اتبشره ..
سعود: لا جد ..!
جواهر: بلاك مب مصدق ..
سعود: ردو عليكم ..!
شوق: وامايه اتفقت وياهم بعد عشان اتسيرون اتسون فحص الزواج ..
سعود: انتي واختج يالجذابات .. صدق ترمسن والا تخرطن عليه ..!
موزه: قم عن ويهي قم .. والله الشرهه عليه انا اللي واقفه من الفرحه ابا احظنك وابارك لك ..
لطيفه: سعود اميه بلاك منصدم .. جنك الا انته العروس .. وخطبك واحد مب متوقعنه ..
فطيم: صدّق صدّق حبيبي .. وافقو عليك واتفجنا انسير لهم عقب ما تظهر نتيجه الفحص ان شاء الله ..
سعود: وانتو متفجين ع كل شي وحاطيني انا امام الامر الواقع ..

ابتسم .. والباجين كلهم ضحكو عليه .. عقب كلام لطيفه كمل سعود التمثيل وكأنه هو صدق العروس ..
وامبين الكل .. اجدمت موزه وحظنته

موزه: مبروووك مبروووك حبيبي .. الله يتمم لك على خير ان شاء الله ..
سعود: آمين ..
مزنه: وجيه مستحي .. ليكون صدقت انك العروس ..!
سعود: صخي انتي ..!
عواش: وينه سلطان .. يلتقط هـ الصور التذكاريه .. سعود ويهه احمر وجنه هو العروس صدق ..!
سعود:ياللمم انتتتتن .. صخخخخخن ولا تخربن فرحتييه ..
عواش: اي فرحه يا عمي .. موافقه ع الطاير ما يستوي ..
مزنه: سيرو سوو الفحص انتو خلنا انشوف النتيجه من وجهة نظر الحكومه ويصير خير عقب ..
سعود: يالنحسات انتن سكتتتتن ..
غاليه: مبروووك ولد خالتييه ..
سعود: الله يبارك فييج غاليه ..
رفيعه: وانتو يا ما تعرسون .. او يا تعرسون كلكم مره وحده .. نحن على كم عرس بنلحق الحين ..!
جواهر: لاحقه على عرس واحد انتي شلي همه .. الثاني خليه على صوب ..

اختفت ضحكتي .. رغم اني حاولت ب اني ماخفيها .. عشان ما تنكسر نظرتي .. وتكسر قلب اختيه معاها ويمكن قلب اميه بعد ..!

الحين بس عرفت ليش سلامه طول الوقت ساكته .. الحين بس عرفت احساسها جيه ما شاركنا فرحتنا .. ومشاعرها جيه ما انمزجت بـ حشرتنا ..

اختيه بـ داخلها شي مكسور .. غير الخبر اللي كسرها وجبرها تأجل عرسها ..
اختيه بـ داخلها دم ممزوج بـ حزن لوثه .. اختيه بـ داخلها قلب .. ينبض بـ ألم .. متعبنه ..!

سلامه .. بداخلها نسبه من شي .. حرق دمها ..!

..

ف بيت بو سيف

ماسك الكتاب ف ايده وهو مندمج والفاضي يالس وراه وكل شوي يغثه ..

حامد: انزين ما تباني اييب لك صحن فول ..
فيصل: اباك اتييب لي صحن جب أأكلك اياه ..
حامد: هههههههه قم نظهر لاااه ..
فيصل: اتصل ف سعود خ يطلع وياك ..
حامد يلس وهو مبتسم بشغب: اتصدق استحي اتصل به ..
فيصل: ليش ..!
حامد: مادري .. على كثر مب مستانس انه بياخذ اختيه .. بس مستحي اكلمه..
فيصل: بس خلاص عرفت ليش مستحي ..
حامد: ليش ..
فيصل: لانك عارف ان اختك اتفشل ..
حامد رفع حياته: جب زيين ..
فيصل: اجذب عليك يعني.. بذمتك اسلوبها ما يفشل ..!
حامد: مب لهـ الدرجه عاد .. انته بس فالح تظارب وياها اربع وعشرين ساعه .. ولا مره يلست وياها وكلمتها عدل عشان تكلمك هي عدل .. ف طبيعي ما بتعرف شخصيتها ..
فيصل: زيين .. بما انك تعرف شخصيتها .. سر اشرحه لـ سعود .. والا عطه الكتيب مالها .. عن تفتر وتستنزل عليه ..
حامد: ودر عنك الرمسه البايخه هاي .. وقم نطلع
فيصل: ورايه امتحانات انته ما تفهم ..
حامد: الا وراك جسور وشوارع ..
فيصل: وانته ابا افهم .. جيه حاقد ع دراستي ..
حامد: ماداني تخصصك ..
فيصل: عاد هو اللي يدانيك .. اتصدق ..!

سكت حامد عقب ما سمع صوت الباب وهو يندق .. وبدون لا يكلف على عمره وينش من مكانه او حتى يسأل عن الشخص .. سمح له يدخل ..

حامد: ادخل مااااانع ..
مانع: وشدراك اني مانع ..!
حامد: لان امك وابوك مستوين لي روميو وجولييت  " واشر على الدريشه" مسويلهم جو رومانسي .. يالسين ف الحوي ويشربون جاهي والعرق يصل .. واختك مستحيل تدخل هـ الحجره وفيصل موجود ..
فيصل:لادخييلك عاد فيصل اللي ميت على اختك ..
مانع: ههههههههه .. شو اتسوي انته .. اتذاكر ..؟
فيصل: والواحد يقدر يذاكر ويا هذا ..!
مانع: عندك امتحان ..!
فيصل: هيه .. بس والله ماخلصت شي لين الحين ..
مانع: هذا مسبب لك ازعاج ..!
فيصل: وااااااااايد ..
مانع: انا بفضي لك الجو الحين " وهو يكلم حامد " قم تعال ..
حامد: مابا ..
مانع رفع حياته: اباك شوي .. نش ..
حامد: اتقص عليه لاه .. تتحراني حمدان
مانع: والله ولا تسواه ..
حامد بنص عين: وتباني ايي وياك بعد .. شو هـ الاخوان اللي مافيهم ادب ..
مانع: نش زيين فكي ..
حامد: مب ناش ..
مانع: حامد والله اباك ضروري .. قم تعال ..
فيصل: تباه صدق ..
مانع: هيه والله .. اباه ف كلمه راس ..
فيصل حط القلم ف الكتاب وبنده: قول اسمعك انا ..
مانع: خير ان شاء الله ..!
فيصل: انا وحامد واحد قول قول ..
مانع: كمل مذاكرتك انته .. سوالفنا هاي ما بتفيدك ..
فيصل: ليش بترمسه عن وصخ دنيا ..!
مانع: هههههههههه لا .. برمسه عن زهره الحياه الدنيا ..
فيصل صد صوب حامد: شو هي زهره الحياه الدنيا ..!
حامد: شدراني " وقف " بسير بجوفه شو يبا .. ويوم برجع بخبرك ..
مانع: اقوووولك كلمه راس .. وانته اتقول له يوم برجع بخبرك ..!
فيصل: انزين اعتبروني انا الراس ..
مانع: حط راسك ف كتابك وذاكر انته .. عن احطلك اياه انا .. واسكر الكتاب ع راسك
فيصل: آآي .. والله اتخيلت المعلومات طلعت من مخي وانته تهرس راسي
حامد وهو ساير ويا مانع: ذاكر ذاكر .. برجع لك بسوالف .. انما اييييه والله ولا بتخليك اتركز .. ف استغل غيابي ..
مانع ظربه: عيني عينك .. جدامي واتقول له انك بتفضح عن اسرارنا ..

طلع حامد من الحجره ويا اخوه .. ورد وقف

حامد: خير .. امر .. شو عندك وياها بعد ..
مانع: ويا منو ..
حامد: ام حمدان ..
مانع عقد حياته: اذا بتستهبل .. ف رد لـ فيصل .. مابا اكلمك ..
حامد: استهبل ليش .. وانته كل سوالفك عنها ..
مانع: استغفر الله  .. طوف طوف جدامي..

مشى وياه لين باب حجرته ورد وقف 

حامد: شو عندك..
مانع: ادخل انزين ..
حامد: لا .. انا ما اخلى بك .. الا والاثم واصل لين هني " واشر ع خشمه"
مانع: من افكارك الشينه ..
حامد دخل: شو هـ العلبه بالضبط ..
مانع: لاتتعبث بـ اللي ما يخصك ..
حامد: اي شي يخص اخويه يعني يخصني ..
مانع: هالكلام ينطبق على اخوك فيصل مب عليه انا ..
حامد: ليش انته شو .. ريل اميه ..! والله من اجرامك بديت احسك جذه ..
مانع: ههههههههه خله عنك ..
حامد: صدق شو هذا ..!
مانع: هذا حق زوز ..
حامد ابتسم: ثرني اخوك يعني ..
مانع: شو تبا .. بيت باربي ..!
حامد: فديتها والله .. متى بتيبهم ..
مانع: الاحد ان شاء الله اذا رضت امهم ..
حامد: مايقهرني .. الا يوم يقول لي اذا رضت امهم ..
مانع: اتخليني اندم اني افتح لك قلبي والله ..
حامد: قول قول انزين .. شو عندك .. عقب ما اسحب منك الرمسه بزعلك بس الحين مب وقت زعل ..
مانع: لا والله ..
حامد يلس ع الكنبه: اسمعك ..!
مانع: مابا افكارك الخايسه اتروح بعيد ..
حامد: هي اصلا بعيد .. بس اذا بتعطيني وقت ارابع لي كم مطوع يمكن ايبها جريب ..
مانع: هههههههه عن الحركات ..
حامد: اعترف لك من البدايه .. عشان ما اتقول لي غشيتني عقب
مانع خذ نفس: حمود ..
حامد: نعم ..
مانع: بسألك سؤال يخص سعود ..
حامد: شو ..!
مانع: مابا لف ودوران وجذب وتأليف ودجل ..!
حامد: زييين .. اسال
مانع: ام سعود .. تعرف امايه من قبل ..
حامد لا ..!!
مانع:مها .. تعرف وحده من خواته .. والا من اهله ..!
حامد: ماعتقد ..
مانع: عيل هو كيف خطبها ..
حامد: يا شينها الافكار السوده اللي ف راسك .. انتو بلاكم حاقدين على اختكم ..!
مانع: جاوبني .. بدون فلسفه لو سمحت ..
حامد: انته شاك فيها .. والا شاك ف سعود ..
مانع: انا بس اسأل عشان اطمن ..
حامد: انته انسان سخيف ..
مانع :بتجاوبني والا شو ..  
حامد: سعود يعرف ان نحن ماعندنا غير اخت وحده ..مره جافها وياي ونحن ف السينما .. ومره هني عند باب البيت ...
مانع: يا سلام يا سلام ..!  
حامد: كنا طالعين انا وهو ف سيارتي .. مرينا البيت انا نزلت وهو تم ف السياره .. طلعت مها جدامه وركبت سيارتها
مانع: وهو ماجذب خبر .. 
حامد: استغفر الله
مانع: انزين خلاص .. سر حجرتك ..
حامد: خلاص وافقت ..
مانع: على شو ..!
حامد: على زواجهم ..
مانع: موافق من اول يوم انا ..
حامد: عيل ليش هـ الفلسفه كلها
مانع: بس جذه .. مضيعت وقت .. زيييييييييين ..
حامد: اصلا انا ادري انك سخيف .. بس مادري شو اللي خلاني ايي وياك وايلس معاك مكان واحد .. ومادري ليش اصلا اسمعك لين الحين وما نشيت سرت حجرتنا ..
مانع كفخه بالكوشن: لسانك وايد طويل ..

ضحك حامد واستقبل كوشن اخوه .. وشله معاه وطلع من الحجره .. عشان يثبت لـ نفسه .. انه ماظهر من الحجره بـ خفي حنين ..!

يوم الاحد ...

فتحت عيني وانا حاسه بـ شي مب طبيعي كسر الروتين اللي اتعودت عليه من ازعاج سلامه لي كل صبح.. يلست ع الشبريه عقب ماصديت صوبها .. وشفتها تصرق انفاسها بسرعه وهي ميوده كاس ماي ف  إيدها ..

عواش: بلاج ..
سلامه: ولا شي ..
عواش: انا توني فاتحه عيوني .. ف لو دسيت عنج شي تقدرين اتقولين عني مخرفه .. بس انتي مصحصحه .. ومستوعبه ان اللي ترمسج عواش .. وما بتقتنع بـ جوابج ..
سلامه ابتسمت: تعبانه شوي ..
عواش يلست: لا اداومين ..
سلامه: ماقدر عندي امتحان الساعه 11 .. وامايه بتشل الدريول وهزاع ماقدر اظهره كل يوم من الدوام
عواش: انا دوامي يبدا الساعه 12 ونص .. بنطلع من وقت عشان تلحقين ع كلاسج ..
سلامه: ردي رقدي .. انتي ما اتصدقين ان دوامج يكون متأخر عشان ترقدين .. ماعليج مني ان شاء الله ما بيستوي بي شي ..
عواش: لا تسوين لي سوالف .. ومابا اتعبج ومادري شو .. اصلا ماحصل بارك هالوقت .. ف لازم اسير من وقت ..
سلامه: لا تحاولين تقنعيني ..
عواش: والله عساج ما اقتنعتني .. بس ما اتسيرين الجامعه .. الا معاي ..
سلامه: عويش عن الحركات ..
عواش: تعالي صدق مزنوه دوامها 11 بعد وحاجزتني حضرتها من امس جني دريول ابوها .. يعني ف كلا الحالتين بظهر من وقت ..
سلامه: بسياره حريز ..!
عواش: لا .. بسياره ابويه اللي ظهرها امس من الوكاله ..
سلامه: هههههههههه حسيتي ان السؤال غبي ..
عواش: مادري عنج ..
سلامه اساندت ع الشبريه: نزلي تحت حاولي تقنعين امج وابوج ان مافيني شي .. بس مب داق ف راسي اسير الجامعه ..
عواش: اصلا هم بيجوفون ويهي .. بيقرون 50% تنزيلات ع الجذب .. يعني الجذب عندي بيكون بـ بيزه .. ف مستحيل يصدقون كلمه وحده مني ..
سلامه: ههههههه .. بس ف النهايه بطلعين عمرج من الموضوع
عواش: قومي تعالي وياي ..
سلامه: ماقدر .. راسي يدور واحس بـ ظباب على عيوني .. من بيسألوني شفيج بتدمع عيوني وبصيح .. هذا اذا ما طحت ..
عواش: لا حووووول ولا قوه الا بالله .. سويلنا مناحه انتي عاد من اول الصبح " وفريت اللحاف عني" امرنا لله.. خلنا انسير نطبخ لنا كيلو جذب لعيون سلامه المضببه ..
سلامه: ههههههه فديت عيونج والله ..
عواش: تقردين اول النهار هذا ما اييب راسي ثره ..

طلعت من الحجره وانا نازله تحت .. وقبل ما اوصل صوبهم .. استقبلتني ابتسامته الخبيثه اللي يحب يغايضني بها كل صبح اذا شافني واعيه هـ الحزه ..

حريز: فديت اختيه النشيطه ..
حميد صد صوبها: والله اتحراك تقصد سلامه .. هاي الهيزه وينها ووين النشاط ..
عواش يلست ع الدري: صباح الخير ..
فطيم: صباح النور .. شو عندج ..
عواش: انتو الواحد يعني مايستوي يشبع رقاد وينش ييلس وياكم بهدوء من اول الصبح ..
فطيم: وانتي وين تشبعين ارقاد انتي ..!
عواش: انتي وين بتسيرين ..
فطيم: الخياط ..
عواش: متى ..!
فطيم: الدريول سار يوصل ريسه وعيالها .. بيرد بيوصل سلامه وعقب بشله انا ..
عواش: انتي بتشلينه والا هو بيشلج ..!
فطيم: شو تبين انتي ..؟
عواش جافت الساعه وردت صوب امها: عفوا ام حريز .. بس انتي سايره اتنظفين الخياط والا تفتتحينه ..
فطيم: انتي شو عندج من الصبح ..!
عواش: لا عادي سيري الحين والله مافي مشكله ..
فطيم: عويش نشي كملي ارقادج .. لا تغثيني من اول الصبح ..
عواش: ما ترضى ع خياييطها .. بس انا بنتها شو اتسوي بي ..
حميد: ماشاء الله ناشه اليوم وانتي بكامل قواج العقليه ..
عواش: والله انا كل يوم انش بكامل عقلي .. بس شكلكم انتو اليوم اللي ناشين بعقلكم ..
حريز: هههههههه ماتستحين انتي والله ..
حميد: وين سلامه عنج عيل ..
عواش: وهذا اللي ابا اقوله من الصبح بس حرمتك مب معطتني فرصه ..
فطيم: وينها ..!
عواش: ما بتسير الجامعه الحين .. ف اذا بتشلين عبدالجبار برايج ..
فطيم: ليش بلاها ..
عواش: وما تقدر اتغيب الا اذا فيها شي يعني بسم الله عليها ..!
حريز: طبعا .. والا تتحرينها شراتج ..
عواش وقفت: كلاسها الاول اتكنسل .. عصبت عليها لانها حشرتلي الدنيا ووعتي ع الفاضي .. سوت لي طاف ورقدت وقالت لي انتي سيري خبري امايه اذا تبا اتشل الدريول ..
فطيم: وانتي ماشاء الله عليج مطيعه .. يتي خبرتيني بناء على طلبها ..
عواش: لانج امخلفه كتل سخافات .. الماصخه مب طايعه اتسكر الليت لين ما انزل اخبرج ..
فطيم: والله زين تسوي بج ..
عواش: خلاص .. طلعتو حرتكم فيا .. اسير ارقد ..!!
حميد: سيري سيري رقدي عفاريتج .. سيري ..
حريز: متى دوامج ..
عواش: الساعه 11 بظهر
حريز: ومتى بتردين ..
عواش: خمس .. ولا تتحرطم عليه دخيلك .. عندك شي قوله حق ابوك .. مع السلامه
فطيم: مب لسان عليها هـ البنت ..
حريز: جيه ما اتظهرولها سياره واتفكونا من حنتها ..!
فطيم: امعطلتنك عن اشغالك ..!
حريز: لاعادي .. ثرني اسوق الكامارو ..
حميد: عطها الكامارو وخذ عنها الاستيشن ..
فطيم: لا والله .. حلو حلو خبل بها انته الثاني وخلها تستخف وتسود ويهنا .. هـ اللي قاصر بعد اتسوق سياره شباب ..
حريز: ليش والاستيشن سياره منو عيل ..!
فطيم: الاستيشن ثجيله ومحترمه .. مب سبورتيه .. اتنش لك الهبله تسابق ويا الشباب ف الشارع وتشحف لك كم واحد ف الدرب ..
حريز:هههههههه اما ف هاي صدقتي امايه " وقف " بتكونين فاضيه الساعه 12
فطيم: سر سر انا بمر فطامي ..
حميد: ورفيعه منو بيوديها ..!
حريز: عقب ساعتين بيمرها يوسف ..
حميد: اذا عنده شغل برايه انا بوديها ..
حريز: لا هو اصلا بيودي غاليه بعد ..
حميد: برايه انا بوديهن ..
حريز: ويوسف شو من شغل عنده الله يخليك .. خله يجابلهن شوي ويخفف عن ياسر حليله ..
فطيم: ماقالو متى بيرد ابوهم ..!
حريز: امبلى هـ الخميس .. يلا امايه .. تآمروني بحايه ..
فطيم: سلامتك حبيبي .. شوي شوي ف الدرب ..
حريز: الله يسلمج .. مع السلامه ..
حميد: الله يحفظك ..

رغم اني رديت الحجره ف فتره .. المفروض اكون راقده فيها .. بس عيوني لين الحين واعيه .. تراقب هم سلامه اللي قدرت اتمثل جدامي انها رقدت .. بس قلبها لازال واعي

ينبض بتعب من اللي فيها .. وبخوف من مستقبل ماتدري شو يخفي لها من اسرار ..

ليتني كنت التعب اللي فيها عشان اهدي مخاوفها .. واسكن ألمها .. ليتني كنت الاسرار اللي تشغل بالها .. عشان اطمن قلبها ..

بس انا مجرد بشر .. مجرد اخت .. يذوب قلبها كل ما شافت تعب اختها .. وهو يصهر جسدها جدامها .. وما ملك بيدي شي .. غير الدعاء .. وشو اقوى من الدعاء عشان يرد القضاء ..!
  

ليست هناك تعليقات:

إرسال تعليق