الجزء الـ11

على نهايه هـ الشهر .. خلصنا امتحاناتنا .. الربشه ف بيت عمي سهيل كانت باديه من اسبوع .. بس امايه.. كان يهمها مستقبل بناتها اكثر من اي شي .. عشان جذه .. جبرتنا نركز ف دراستنا .. وعقب ما نخلص آخر امتحان .. نفضى لـ العرس .. ونرتبش معاهم بدون ما نشل هم شي ..

كنت يالسه ع الأرض امجابله كبتي .. وريسه ساحبه كرسي مكتبي وهي مجابلتني وتطمش .. اما سلامه .. ف كانت مجابله الدريشه وهي تعدل ظفورها ..

ريسه: ليكون انتي العروس اللي بتنتقلين بيت عمي ..

عواش: خسي اسكن ويا خالتج ف بيت واحد ..

سلامه ضحكت: انتي ما تستحين باي ذا وي ..

عواش: خليت الحيا لج .. ينسلب حقي وتباني استحي .. يلا يلا .. والله خسي اسكت عنهم ..

رفيعه توها يايه: شو هذا ..

عواش: يعني شو ما تبني اكشخ ..

رفيعه: اكشخي بس مب تزهبين شنطه سفر ..

ريسه: الا هو يوم واحد .. بتسيرين اليوم .. باجر الصبح بتتحنين .. والظهر بتردين ..

عواش: منو قالج .. ابويه نحن بنتم هناك لين العرس ..

ريسه: على كيفج انتي .. شورج ف جيبج على قولت امايه ..

عواش: والله بيتكم ملل .. انا قايله حق امايه من اسبوع .. اني بفضي عمري حق الدراسه بس من تخلص امتحاناتي .. انا بسير بيت قوم عمي سهيل وانسو ان عندكم بنيه اسمها عواش ..

سلامه ضحكت: وشو ردت عليج ..

عواش: قالت لي اصلا انا من زمان ناسيه .. ادري ان مب من قلبها بس والله براويها

رفيعه: اندوكم انتو .. اتهدد امها

عواش تنهدت: الشباب ما بيكونون هناك ...!

ريسه: طبعا لا ..

عواش: متأكدات ..!!

سلامه: يمكن ف النهار يكونون موجودين اذا احتاجو شي من حجرهم .. بس آخر الليل بينطردون كل واحد وجلابيته .. بيسيرون يباتون بيت قوم خالوه لطيفه ..

رفيعه: لا بالله اخترشت اميه من وراهم ..

عواش: ههههههه والله لو انا مكانها .. بقفل الفله وبخليهم يباتون برع ف الملحق ..

ريسه: مجرمه ثرج ..

عواش: عيل يدمرون بيتي وانا محد .. خسي والله ..

رفيعه: منو قالج ان امايه بتبات بيت قوم خالوه ..

عواش: ما بتبات .. بس هي طول اليوم بتكون هناك .. ما بترد الا اخر الليل .. والله بتنصعق من مهند اللي غاسل لها الكنبات ..

رفيعه: هههههههههههه صدقج والله ..

سكرت شنطتي .. ووقفت ..

عواش: يلا انا خلصت .. بتلبس الحين وبظهر .. اللي بتي وياي حياها .. واللي ما بتي خلها اتخيس هني .. وتعفن لين ما عبدالجبار يقضي مشاوير امايه ويرد يشلها ..

كلامي هذا .. ماقام يصدمهن ابدا .. لان الصدمه كانت بتكون اكبر لو نشيت بهدوئي بدون ربشتي وحشرتي ..

صوب الشباب .. بالتحديد ف بيت سهيل ..

كعادته .. ماسك كيمرته وهو يدون الاحساس .. لصور .. تظل معانا لو فقدنا لذتها ف يوم .. عشان اتذكرنا بعنوان الفرح

سلطان: هـ الصوب هـ الصوب سعود ..

وجه كيمرته الدجتل صوب اخوه .. اللي بدوره رفعه ايده وهو يسوي حبتين ومبتسم ..

سلطان وهو حاظن كيمرته: اسمحي لي حبيبتيه .. هـ الاشكال قبل التعديل ماعلييه اتحملي ..

سعود: ما بخلييك اتصورني عقب التعديل .. سر دور لك معرس ثاني يتنزل انك اتصوره ..

سلطان: بصورك بدون ما تدري .. وبعرض صورك ف العرس ..

سعود: سوها انته بس .. جان ما سويتك ذبيحه وخليتك ع العيش اللي بينحط ع طاوله قوم فهد ..

فهد: لا انا مابا اكله .. لحمه ما يغريني ..!

سعود: هو فيه لحم اصلا ..! والله يدح ليل نهار .. ويوميا يتعشى من برع بالوجبتين والثلاث ولا يمتن ..

جواهر: الله اكبر عليييك ..

سعود: اماايه اليوم اووووف .. مسموح لي اقول واسوي كل شي .. حتى لو نشيت الحين قبرته انتي لازم اتصفقين عقب ما انجز هـ المهمه بدون لا تعلقين اي تعليق فرعي ..!

سهيل توه ياي: يلااا ..!

جواهر: لا الابو صاحي ولا العيال .. ولا نسايبهم ..!

علي: هههههه انا استثنتني عمتيه من جملتها الاخيره ..!

جواهر: انته خبل شراتهم بعد .. بس على اخف ..

هامل: امايه .. لا تخربيني .. انا يوم حد يكلم ابويه جذه جدامي .. اضطر اني اكون قليل ادب وياه ..!

علي كفخه ع راسه: عاد انته ما اتصدق " سحبه صوبه ولوا عليه" بتقص شعرك ..!

هامل: لا طبعا ..!

سعود: انته مب قلت ف عرس خالي سعود بخفه ..!

هامل: قلت برتبه .. بس مابا اقصه ..

موزه: جيه بتسيرون الحلاق اليوم ..!

سعود: لا باجر ..

موزه: معناته .. اترد البيت .. بدون هـ الكشه اللي ع راسك ..

هامل: شكلي مب حلو بالشعر القصير ..

موزه: مب على كيفك .. انا لايعه جبدي من شعرك .. اذا ييت باجر ومب مقصرنه لين ذنييك .. دور لك اللي بنجهز اغراضك ..

هامل: امايه والله مب حلووو يوم اقصره .. جذه احلى ..

موزه: جذه احلى .. اتسير اتيول وشعرك يطير وياك .. واليوم الثاني اطيح اسبوع ع الفراش ..

هامل: حبتيييييييييين .. ما بسير المدرسه ..!

موزه: جوفو ف شو يفكر ..! علي اقووولك جدام ولدك .. اذا رديته وهو مب خاف شعره .. دورولكم حد يكشخكم يوم العرس انته وولدك ..!

هامل: امايه بتكشخنا ..

جواهر: وانا فاضيه عاد اكشخكم انتو ..!

هامل: شو فيها .. مب انتي امنا ..

جواهر: هذي امك ..!

هامل: عيل ليش اتكشخييين خالي سعووود بس ..

جواهر: والله خالك سعود امزهبتله كل شي من اليوم .. يوم العرس مب متفيجه اجابل ولا واحد منكم .. ومبايلي بغلقه عشان ما تتصلوبي وتحشروني .. وين هذا ووين هذاك ..

يابر: افا ..

جواهر: خصوصا انته من الصبح اقولك سر شوف اغراضك عشان ما تحشرني .. وبعدك يالس ..

يابر: باجر باجر بجهزهم  

جواهر: باجر البنات بيكونن هني .. اذا واحد منكم طب هالبيت .. يا ويله ..

سهيل: امشوووو يلاااا ..

مشى الابو .. ومشو عياله .. ومشو معاهم رياييل بناته .. اتوجهو صوب الاستيشن اللي واقفه بـ اول الكاراج .. فتح سهيل الباب ووقف ..

سهيل: علي .. انته تعال يلس جدام ..!

سعود وهو واقف جدام: بو هامل حلف عليه اني ايلس .. احتراما لـ بشتي الاسود اللي يترياني ..

سهيل: سر يلس ورا بالزين ..

علي: عادي خله ايي هني ..! انا بيلس ورا ماعندي مشكله ..

سهيل: انا عندي مشكله .. يلس انته هني .. وسعود وفهد وهزاع وسلطان .. يلسو ورا ..

يابر: ويابر وهامل .. جنهم هوووش .. اتفرونهم ف الدبه ..

سهيل: واللي بيرمس ..!

يابر: شو يسوي بعد ..!!! ماعندنا بيزات .. خلاااص فقرنا هالشهر ويا العرس ..

علي: ثرك دافع مال فستان وعباه وشيله ونعال وصالون ..

يابر: ههههههههههه متغصص علي ..

علي: صدق صدددق صددق .. فقرت .. ماشاء الله عرس شوق .. والحين عرس سعود .. هزاع من الحين اقولك.. ما تعرس قبل سنه .. ماعندنا بيزات نحن ..

فهد: ما ألومك .. انا اول عرس وظهري انكسر ..

علي: ياريال شال هم وحده انته بس .. انا حرمه وبنتين الله يحفظهن ..

يابر: يا كرهي لـ سوالف المعرسين .. يلا ركبو ..

سلطان: صورت اشكالكم ب كيمرتي .. ووثقت كلامكم بـ مبايلي .. خلني ارد البيت .. بخبر خواتيه عن كل شي ..

سهيل: منو قال انك بترد البيت انته اصلا .. يلا اركب ..

ركب سلطان .. عقب ماكان هو آخر واحد واقف برع السياره .. اتحرك سهيل .. وهم متوجهين صوب فله حميد .. يتعشون هناك .. ويطلعون بـ مسيره ثانيه .. لـ بيت لطيفه .. عشان يباتون هناك .. نظرا لـ احتلال بيت سهيل من قبل البنات اللي قررن يباتن فيه الليله .. لان من اول الصبح .. بتيهن المحنايه ..

..

بيت قوم بو سيف

فر فيصل الكرتون ف بدايه المطبخ .. وشاته بريله لين ما وصل للنص .. ووراه اخوه .. فر الكرتون هو الثاني .. بس نزل بمستواه .. وهو يدزه .. ويظهر اصوات سياره معاه ..

مانع: ربي لك الحمد ..

فيصل: احمد ربك انته شعليك .. نشتغل ع حساب ورث ابوك ثرنا ..

حامد: ههههههههه .. نشتغل ع حساب .. بدون حساب ..

فيصل: شو ها بعد ..

حامد: حساب الدكان .. اللي يتكود لين اخر الشهر .. ويوم بتي تدفع يقص عليك ب ثلث ترباع المبلغ .. هذا اخوك بالضبط شراته .. يكرفنا وهو يقول بعوضكم بعوضكم .. وعقب ما تطلع عينا شهر كامل .. يودينا مكان والا مكانين .. نتعشى وياه وانرد ..

فيصل: وانته مينون .. تباه يودر زوز وحمدان .. ويجابلك انته ..

مانع: فديتهم والله .. مادري عنهم هالاسبوع ..

حامد: نحن حتى السيره الطيبه .. ما يطرينا بها ..

فيصل: وانته عندك سيره طيبه .. كل سيرتك فضايح ..

حامد: اصلا انا لو ماكنت اخوك .. جان ما كانت لك سيره انته اصلا .. احمد ربك لاني رضيت اكون اخوك ..

مانع: وبالله متى وزعوك ع المجتمع .. عشان تتنقى منو يكون اخوك

حامد: سبحان الله .. وعلى نياتكم ترزقون ..

مانع: صاحي انته ..!

حامد: لا والله .. تعبان وهلكان .. وكل مفاصلي تشتكي .. بس انته ما تحس ..

مانع: هههههههههه يلا خلص .. وسر ارقد ..

حامد: ان شاء الله باباتي " ورد صوب الكراتين" اقوله تعبان .. يقول لي خلص وسر ارقد .. والله اشتغل عندكم انا ..

فيصل: انته الشغل مب متعبنك كثر التحرطيم ..

حامد: اصلا التحرطيم .. هو اللي امونسني .. والا سوالفكم اتييب المرض ..

مانع: مها وينها ..

فيصل: اشدرانا.. انته اخو مها ..

مانع: وانتو اخوان منو ..!

حامد: نحن اخواااااااااااااان سعووووووووووود فديييييييييته " وفر الكرتون " والله ماعندي سالفه امجابلنكم .. عزمني ع العشا ف بيت عمه بس ماسرت مالت عليه .. الحين بتصل به بقوله يمرني ..

فيصل: ههههههههه ياللحف .. خل الريال ويا هله .. نحن بنتعشى هني على حساب مانع ..

حامد: وليش مها ماتعزمنا .. شوي كرفنا لـ عرسها

مانع: ذلييييييييتها ذلييييييييييتها .. انا بعزمك .. وع المطعم اللي تباه بعد ..

حامد: صدق ..!

مانع: هيه صدق .. بس خلص ..

حامد: مابا .. اباها هي تعزمني ..

فيصل: سر قولها تعزمك ..

حامد: بسير .. ليش ما بسير " ومشى طالع من المطبخ" ثرها يوم تبا شي تطلبه منا .. بدون حيا ولا مستحى ..

مانع: هههههههههه الله يهديك بس ..

ونش سار ورا فيصل اللي لحق حامد .. دخلو الفله .. وصعدو فوق .. صوب حجره مها ..

حامد دق الباب: مهووووي ..

مها: نعم ..

حامد: شو نعم .. قولي اتفضل ..

مها: ادخل ..

حامد: هاي اتفضل ماقالت لي .. بعد اباها تعزمني ..

دخل حامد .. ودخلوا خوانه وراه ..

حامد: شخبارج ..

مها: الحمدلله ..

حامد: وشو نفسيتج ..

مها: غريبه .. تسألني عن حالي ..

حامد: لا اله الا الله .. تبيني اغثج يعني قبل عرسج بيوم ..

مها: لا دخييلك .. بس شو عندكم يايين ..

مانع: يايين انودع اختنا ..

فيصل يلس: يايين انجوف الحجره .. اتصدق حامد اكبر عن حجرتنا .. خلاص انا بنتقل هني ..

مها: على كيفك انته ..

فيصل: خلاص انتي طلعتي من ذمتنا .. شو تبين مالج شي هني ..

مها: حجرتي بتم ..

فيصل: مب على كيفج .. نصها بخليها لي .. والنص الثاني بحط بيت الباربي مال زوز ..

مانع: هههههههه يالله .. شو اللي خلاني اراويكم هالبيت ..

حامد: بيظربه زلزال .. بيشله عن بكره ابيه ..

مها: ممكن افهم شو تبون ..

حامد: يايين انجوفج لا اكثر ..

فيصل: جذاب .. يبا شي بس مستحي يقولج ..

مها: حامد يستحي .. من متى ..!

حامد: من يومي .. بس لو كنتي اختيه جان عرفتي ..

مانع: خلصووونا ..

مها: انا قلت يايين يغثوني ..

حامد: لا والله مب يايين انغثج .. يايين نتعشى ..

مها: اجوف في شي قابل للاكل هني ..

حامد: ماجوف شي ينهضم غير الورود المجففه ..!

مها: هههههه سر كلهم ..

حامد: جيه .. تيس داش عليج .. قولي من وين بتعشينا ..

مها: ماحيدني وعدتك ب عشا ..!

حامد: امبلى بس العرس نساج ..

مها: ماوعدتك عشان انسى ..

حامد: انزين يعني ما بتعشينا ..

مها: بلاك انته ..!!

مانع: هههههه هذا يوعان .. وحاشر الدنيا يبا حد يعزمه ..

مها: انزين انا بعزمكم .. بس هني .. مستحيل اطلع ..

فيصل: طبعا .. مستحيل تطلعين ..

حامد: جد بتعزمينا ..

مها: هيه والله .. سيرو طلبو من اي مكان تبون .. على حسابي ..

حامد: قم قم فيصل .. مانع انته تم.. لا اتيي ويانا .. بتستوي مثالي وما بتخليها تدفع .. وبتقول انا بدفع عنها ..

مانع: ثركم ما تستحوون والله .. بدال ما انتو تعشونها .. اخر يوم لها ف البيت ..

فيصل: باجر باجر بنعزمها اخر يوم .. اليوم مب اخر يوم .. تاكلين شاورما لحم والا دياي ..

مها: بتطلبون شاورما يالفقر ..

حامد: باجر بنطلب يوم على حسابنا .. اخر الشهر ماعندنا بيزات .. الحين بنسير قيصر .. يلا يلا .. يبي محفظتج ..

ضحكت مها على هـ المهرجين الثنينه .. ونشت صوب الدرسنج رووم .. فتحت شنطتها وردت بـ محفظتها ..

مها: اندوكم ..

حامد: انودي المحفظه كلها ..!

مها: جوفو كم بيطلع ودفعو .. بس لو سمحتو مب اتضيعون محفظتي ..

حامد فتحها: ويييه تعال جوف .. ويقولون ماعندنا بيزات ..

فيصل: انا ماجوف غير صوره سعود ..

حامد ابتسم: افداااه هالسعود الخايس اللي مادري عنه .. قسما بالله براويه .. يلا يلا نش .. مانع ما بتيي.. ؟

مانع: عقب هالتهديد .. لا مب ياي .. اتوكلو ..

فيصل: احسن بعد .. يلا سلام ..

حامد: لحظه لحظه .. شو تبوون ..!

مها: اي شي .. كيفكم ..

حامد: اوكي .. اثنين كيفنا .. حق اميه وابويه خبز نان وبياكلون صالونه ويانا ..

فيصل: عازم قطاوه يالزطي .. ثره مب على حسابك ..

حامد: ماياكلون من برع ياخي اشحقى هالخساير .. يلا طووووف ..

نش حامد .. ونش فيصل وراه .. طالعين  من الحجره .. وهم شالين محظه مها ف ايدهم .. الشي اللي خلا مانع يوقف مكانه وهو رافع حياته ..

مانع: والله ما يستحوون هالثنينه ..

مها: ههههههه خلهم .. من زمان عن خبالهم ..

مانع: خبالهم موجود دومه .. انتي اللي مب موجود هابدا ..

مها خذت نفس: ممكن اتخليني بروحي ..

مانع: فيج شي ..

مها: لا .. بس مخي تعبان شوي .. محتايه ايلس روحي ..

مانع: اوكي ..

طلع عنها .. وردت هي.. لـ حاله الهدوء والاكتئاب اللي كانت فيه قبل لا يدخلون عليها اخوانها الحجره .. دقايق .. وعقبها نشت .. سارت صوب الشنطه اللي كانت عند بدايه الدرسنج رووم .. وردت اتكمل ترتيبها..!

..

ونحن بدينا للتو انرتب اغراضنا بيت قوم عمي سهيل ... بالتحديد ف حجره البنات اللي اغلب ما تكون فاضيه.. الا يوم يدق ف راسهن يباتن ف بيت ابوهن ..

كنت متربعه ع الشبريه .. ومزنه ماسكه بطاقه عرس سعود ف أيدها .. جاسفتنها ومسوتنها مايك .. وهي اتظهر صوت الايقاع ورا حشرتي ... وعند الباب كانت شوق حاطه أيدها ع خصرها .. هدت كل البنات اللي ف الحجره ووقفت تراقب حشرتنا نحن الهنتين

عواش: لما قلبي.. يحب لما .. يحب قلبو ولا يهوى مثيله ولا يعجب .. بكلماتي .. وجلساتي .. ولا خلوة مقيلي جمالووو في غرورووو .. يريد الشور شورووو لانو زين .. كملي مزنوووه ..

مزنه: عسى الايام تجمعنا وتتوقف دموع العين ..اسمع الجاسر .. يلا روووووووووووووح

عواش: عااااشت مزنووووه

مزنه: عاااااشت اممممج

عواش: ههههههههههههههه مااااااااااااالت عليج .. حق هالسوالف فالحه و ف الكلاس .. جنج اسد اللي ف حديقه حيوانات جميرا ..

رفيعه: ههههههههههههههههه عويش شو هالتشبييييه ..

عواش: والله جذه ملامحها شرات الاسد حاده ومركزه .. بس ماتسوي سالفه حق السير .. الريال يتفاعل ويحشر الدنيا وهي ويهها يقوله اذلف زيين مب متفيجتلك

ريسه: منو هاي .. مزنه..!!

عواش: وجيه منصدمه .. بلاااج ما عرفتيها هـ المزنه ف الجامعه

مزنه: جذابه جذابه بنت خالتيه .. لا تصدقينها ..

عواش: رييييسه اتخيلي .. السير يقولها حلي البروبلم .. اتقوله سير انته روحك بروبلم

ريسه: ههههههههههههه حلفي انتي بس ..

مزنه: تفضحيني يا عواش .. هاي آخر الثقه والصداقه .. زيين .. من باجر مب سايره وياج الجامعه .. دوري حد يوديج واييبج ..

عواش: يوديني وايبني ..!

ريسه: جيه انتي بشو اتسيرين واتردين الجامعه ..!

عواش: هاي اتسير واترد بـ خفي حنين

مزنه: ههههههههههههه قسسسسما بالله انج ماصخه وسخيفه انتي .. سيري ولي ما برقد حذالج ع الشبريه .. نزلي نزلي .. رفيعه تعالي مكانها

شوق: حلفن بس ..!

مزنه: شوفيها هاي ..

عواش: شدراني ..

شوق: لو سمحتن .. هنتيناتكن قومن عن الشبريه .. وفظنها حقي بالزين  

مزنه: نعم نعم ..

عواش: خير خييير ..!!  

غاليه: هـ الهنتين حتى قبل ما يسلمن على اصحاب البيت .. ين الحجره وحجزن الشبريه لهن

شوق: مشكلتهن يلا .. فظنها بسرعه .. والا بسير بيتنا..

مزنه: جيه فهد معودنج ترقدين ع ريش النعام ..

عواش: والا برستيجج ما يسمح لج ترقدين ع الأرض ..

شوق: لا وانتي الصادقه" حطت أيدها ع بطنها" هذا ما يسمح لي ارقد ع الأرض ..

خليت كل شي ف ايدي .. وبدون لا ارفع راسي .. ركزت نظري صوب شوق وانا اطالعها بـ صدمه .. ومزنه سحبت المايك من ثمها .. وحولت بطاقه سعود هـ المره لـ تلسكوب عشان الدايره اتحدد لها ملامح شوق ف عيونها .. اذا كانت صادقه والا ..

مزنه: جذابه جذابه هاي .. تبانا انفضي لها الشبريه .. ومب عارفه كيف تقنعنا ..

عفرا: انزين .. اترين عليها شهرين .. ويوم بتكرش .. اتحرطمن وقولن ما خبرتينا ..

عواش: انتي جذاااااااااااااااااااااااابه

شوق :هههههههههه والله العظييييم ..

عواش:حلفي حلفي ..

شوق: ويه بسم الله .. قلت لج والله

عواش: آآآآه يالخسسسسفه ...

نشيت سرت صوبها ..

عواش: مااااااااااالت ع اللي ف بطنننننج

شوق: ههههههههه جببب

عواش: خلاني اتنازل عن مبادئي اللي ما اتنازل عنها بـ سهوووله .. مبرووووك عليييج عواش الصغيرونه ..

شوق: روووحي زيين ..

عواش: غصبا عنج والله .. مب ع الفاضي بفضي لج الشبريه ..

غاليه وهي تزقرها بالفصحى: آه يا شَووووق

عفرا: موضوع شَووووق ..!!  

غاليه:بالبركه عليج حبيبتيه ..

شوق: الله يبارك فيج غلوي..

مزنه اشرت عليها بـ البطاقه: من الحين اقولج .. ما تسيرين ولا تردين ولاتصيعين ولا اتغازلين ويانا .. انا من قبل ماداني المعرسات الحين بعد حامل وحالتج حاله .. يلا بووي يلا ..

شوق: مب على كيفج ..

رفيعه: هههههههههه تعالي تعالي يلسي .. واتنقي البقعه اللي تبينها ..

عواش:اول ثلاث شهور بس .. بنتحملج .. وبندلعج .. عقب الـ3 شهور .. بندفعج ظريبه كل شي استغنينا عنه وكل حركه خطيناها .. عشان انسوي لج اللي تبينه ..

موزه: ما ذليييتن اختييه انتن الهنتين ..

مزنه: وقد اعذرررررر من انذرررررررررررر .. والبادي اظلم ..

شوق طاحت ع الشبريه: جب زييين .. بيتنا وحجرتنا وشبريتنا .. وهـ الطرارات الهنتين .. يتشرطن ..

موزه: عفاري وين حصه اختج ..

عفرا: تحت الدري ويا ناعمه ورابعه ..

غاليه: ههههههههههه من اسمع طاري الدري .. اذكر هامل وهو يقول عنهن جواتي ..

موزه: وسلامه وينها ..!!!

غاليه: وانا اقوووول مفتقده حسها فديتها .. وينها ..

عواش: جذابه انتي ..

غاليه: والله صدق .. وينها ...

..

صوب بيت حميد .. وصل سهيل .. وهو فاتح الفتحه اللي فوق .. وظهر سلطان راسه ..

رد سهيل وقف عند الباب .. عقب ما وصلت اغلب السيايير ..

ياسر وهو يدق هرن : معررررررررررررسنا ..

ضحك سعود وهو ينزل الجامه

سعود: هلااااااااا ..

ياسر: انسير البحر ..

سعود: انزل انزل .. يبا يوديني البحر يسود ويهي ويردني ..

ياسر: عادي تان قبل العرس ..

نزل من السياره ..

ياسر: بنسوي حركه بما انك مغرم بالصيد .. بنصيد السمج الصغار .. وبنسويهم توزيعات لـ عرسك ..

سعود: وبدال ما تزفوني بـ دهن العود زفوني بـ ريحه السمج ..

ياسر صد صوب هزاع: اخوك مب جنه لبسنا وسار ..!  

سعود: خل الريال يتهنى ف احلى ايام حياته .. شو تبا به .. يلا انسير داخل ..

مشى سعود ورا ياسر .. وهم لاحقين باجي الشباب اللي دخلو الميلس قبلهم .. اما هزاع .. ف اتوجه للباب الصغير اللي ع يمين باب الفله الرئيسي ..وهو قاصد فله الحريم .. صوبها ..

فتح الباب بدون استئذان .. وابتسامته سبقته ..

هزاع: ادخل ..؟؟

سلامه: لا خلنا جذه ..

هزاع: عشان اتعذبيني .. اجوفج واسمع صوتج .. بس من بعيد ..

سلامه: روحك حطيت نفسك بهالموقف .. بسؤالك ..

هزاع: ما ظنيتج جاسيه ..!

سلامه: انا جاسيه ..!!

هزاع: لو مب جاسيه .. ما بتخلين قلبي معلق بج جذه .. وتجبريني كل مره أأجل العرس ..

خذت نفس بدون ما اترد عليه .. اجدم منها .. مد لها ايده .. وحظن ويهها بيد وحده ... وعقبها .. باسها على يبهتها ..

هزاع: احبج ..

مسكت ايده وهي تسحبها عن ويهها .. مشت معاه لين الكنبه وجبرته ييلس حذالها عقب ما يلست

سلامه: شخبارك

هزاع: بخير دامج ف حياتي ..

سلامه: واذا طلعت منها ..!

هزاع: وجيه تطلعين ..!

سلامه: مجرد سؤال ..

هزاع مسح بيده على ويهها: مالي حياه بدونج ..

سلامه: لا تقول هـ الكلام ..

هزاع: ولا تسأليني مره ثانيه هـ السؤال ..

سكتت .. وهي تصرق انفاسه من راحة انفاسه .. اللي نبهه بـ ازعاجها .. لـ سبب .. جاهلنه .. او يمكن .. متجاهلنه ..

مد أيده صوبها .. حطها على ايد سلامه وهو يمسكها بـ كل قوه ..

هزاع: مابا اوعدج اني اسوي لج عرس احلى من هالعرس .. وربشه اكبر من هاي .. ووو .. لاني واثق مهما دفعت ومهما كان العرس حلو .. ف جمالج .. هو اللي بيغطي على كل شي .. بس اوعدج اني ما استغنى عنج .. واعيشج حياه .. اكبر من اللي تمنيتيها..

سلامه خذت نفس وهي تبلع ريجها: انسير ..!!

هز هزاع راسه بـ لا ..

سلامه: بيحطون العشا عقب شويه ..

هزاع: عليهم بالعافيه .. واذا خايفه البنات يتعشن عنج .. ف برايهن .. بوديج احلى مطعم ..

سلامه: مابا اتعشى .. بس ابا اسير ..

هزاع: وانا .. ماباج تضايجين ..

سلامه: ومنو قالك اني مضايجه ..!!

هزاع: قلبي ..

سلامه: وعيونك شوا تقول ..!

هزاع: عيوني اتقول .. ان جدامي ملاك .. تعبان من داخله .. بس من برع .. يحاول يضحك بس عشان يكتم..

سلامه: عيل لا قلبك صدق معاك .. ولا عيونك .. بس شوف روحي اللي مغروسه فيك .. اذا قدرت تظهر منك .. وقدرت انك اتعيش بدونها .. حزتها مب بس بضايج .. الا بفقد روحي اذا فقدتك.. 

ابتسم هزاع من قلبه .. رد سحب اديها وجدمها من ويهه

هزاع: يا روووووووح هزاع انتي ...

في كل مره  يتأمل بها روحها .. ونظره عيونها .. يشوف فيهن طفله تبا اتقول .. اللي ماقدرو الغير يقولونه..!

صوب الشباب ..

وصلت سياره .. صاحبها دخل بكل هدوء.. بس  الشخص اللي وياه اصر الا انه يربش الجو .. مد ايده صوب السكان رغم انه ماكان يسوق .. وثبت ايده ع الهرن .. جبر كل اللي يالسين ف الميلس انهم يظهرون ايوون صوبه .. عقب ما استغربو من شكل السياره اللي مب متعودين عليها..

سعود واقف برع: لا تقووووووووووول ..

فتح عمران الباب .. وقبل ما ينزل .. وقف ع الدواسه وهو يغني بصوت عالي ..

عمران: للحب هذا قلب داخله قلبين .. قلبين لاغلى واعذب واطيب اثنين .. به قلب احلى عروس وقلب سعود .. ولفرحهم تنبض قلوب المحبين ..

وشي طبيعي .. اذا بدت ربشه عمران .. انجوف يابر يخترش وينظم معاه .. عشان يبدا الدويتو بين الاثنين .. والباجين يالسين يراقبونهم .. باستثاء واحد .. حب ربشتهم وبدا يدق ع بونيت السياره ..

يابر: هذا سمووو المجد والطيب سعود .. الليله حفرو ف قلوبنا حب سعود .. عااش واااااااااقف يووووسف ..

ضحك يوسف وهو مسير معاهم .. ويدق 

عمران: و جعلن زوااااااااااجك يومن هني .. عيدن لأهلك وخلانك .. والفرحه تمت ودامت هني .. يسعدك ربك بـ ايامك .. رب(ن) ودودن كريمن علي .. جاد بـ حليله أحلامك ..

يابر: يا سلام ..

عمران: بيتن فتح بالحلالي .. ويكمله دين وايمان .. و الحب قووول وفعالي .. سعوود يا اغلى انسان سعوود يا اغلى انسان

ضحك سعود عقب ما نزل الشخص اللي كانو يسوق .. اجدم منه وهو ياخذ نفس .. وحظنه ..

سعود: مرررررررررررررررررحب عمي عبييييييييييد .. نور نور البييييييييت ..

عبيد: هلا سعود .. شخبارك ..

سعود: اخبارنا نحن ف الجرايد .. والتلفزونات .. انته اللي اخبارك .. عمي من زمااااااان عنك ..

عبيد: هههههههه هموم الدنيا ..

حريز: هموم الدنيا والضحكه شاقه " اجدم منه وهو يوايهه" شخبارك عمي

عبيد: بخير وسهاله ربي يعافيك ..

حميد وقف جدامه: ما بغينا انجوفك ..

عبيد: ييت عشان خاطرك ..

حميد: ولنا خاطر عندك اصلا ..!

سكت عبيد .. خذ نفس وعقبها اجدم من اخوه .. وحظنه ..

عبيد: شخبارك ..

حميد: بخير وسهاله ربي يعافيك .. انته اشحالك ..!

عبيد: طيب طاب حالك ..

عمران: لو سمحتو لو سمحتو .. بعيد بعيد عن الوالد .. بس شو هالكثر تبويس وبالاحظان .. الحمدلله قوم خالوه فطيم وخالوه جواهر مب هني .. جان راقبنا من الدريشه وصاحن من زمان ..

ونقز عن السياره .. نزل وسار صوبهم ولوا على ابوه وهو يغني

عمران: انا انا .. بغيررره .. انا بغيره ماقدر اقتنع .. بغييره .. صدقوني .. صدقوني  ماقدر اقتنع بغيره

يابر: انا حبيبي .. حبيبي ماقدر اقتنع بغيره

عمران: تدرون احبه من متى

يابر: من متى من متى ..؟

عمران: تدرون عشقته من متى

يابر: من متى .. من متى ..!

عمران: بو فهد احبه من متى .. ابويه احبه من متى .. حسبت الايام وطلع ..!

يابر: يوم ..!

عمران: لاء ..

يابر: يومين ..

عمران .. لالالالاء

يابر: ثلاث ..

عمران: بعد عد ..

ياسر: خلصوووونا ..

عمران: من يوم .. من يوم امه جابته ..

عبيد: بدينا بدينا بالعياره ...

عمران: يُقال في الشعر .. وجب ال.. " وصد صوب يابر" يابر شو يعني ان الشي تجذب فيه وايد بقصد شريف ..

يابر: هههههههههه اتبالغ اتبالغ ..

عمران: هيه وجب انك اتبالغ .. ف يعني من كثر ماحبك .. احس اني احبك .. من يوم ما يابتك امك ..

سهيل: هههههههههه يعني يوم كان عمري ست سنوات ..

عمران: يلا عاد .. لا تصغر عمرك يالشيبه .. يبا يقول الحينه انه اكبر عن ابويه بس ب ست سنوات ..

سهيل: ويمكن اقل بعد ..

عمران: عنننننننننك عاد ..

هزاع واقف عند باب الفله: لحظه لحظه .. عمران هالصوب هالصوب ..

عمران غطا ويه ابوه بذراعه: مانبا .. تحسدنا عقب .. عندك شي تعال هني عشان نظارب وياك .. هالشغل اللي من بعيد لـ بعيد .. انا مادانيه ..

هزاع: لا جد .. عمي عبيد هذا  ..!

فهد: ههههههه ذليتو ابويه ثركم ..

هزاع يا صوبهم: والله له وحششه ابوك القاطع ..

واجدم من عمه وهو يوايهه ..

عبيد: شحالك معرسنا الثاني ..

هزاع خذ نفس: بخير وسهاله ربي يعافيك ..

سعود: الحين شووو .. بتعشوونا والا ..

حميد: ههههههه حياكم حياكم ..

مشى سعود .. ومشو الباجين وراه .. او حذاله .. او جدامه .. امبين كل هالربشه .. الوحيد اللي ماعطتنه الذكريات فرصه انه يخترش معاهم .. سلطان .. شال كيمرته .. وهو يوجهها صوب شخص شخص .. ويصور هـ اللقطات .. عشان يحفظها .. بـ ذكريات اخوه الخاصه ..!

وشخص ثاني .. رفضت روحه انها تندمج مع هـ العالم الغريب .. عالمنا .. نحن البشر .. لان الطهر اللي انمزج به قلبه .. خلاه ملاك .. على هيئه بشر ....!

ورغم اني ما ببات ف البيت .. بس بعد كنت مطمنه .. لوجود يابر .. اللي متاكده انه بيغفلهم وبسير فوق صوب عمر .. ولوجود ابويه .. اللي غرس روحه .. بـ جسد عمر ..!!

بالباجر الصبح ..

الليت ظارب ف عيني والعرق يصل نتيجه المكيف اللي خافو انه يدبل مصاريف الكهربا ف نشو سكروه .. واليهال رايحين ورادين ع المطبه اللي مكونينها من ريلي .. والحشره ازعجت جمادات الحجره .. وما اكتفو بـ كل هذا .. سارو يابو كاس ماي .. وبدو يمطرون الغيمه اللي متمركزه فوق راسي من الصبح ..!

سلامه: نشيي نشيي الله يخسج .. والله بتأخرينا ..

مزنه: مالت الصالون قبل اشوي متصله .. دليتها البيت .. عشر دقايق وبتكون هني قالت لازم نبدا من وقت لان عددكن كبير  ..

عواش من تحت اللحاف: كلكن اتسبحتن ..

عفرا: كلنا خلصنا عويش يلا نشي ..

عواش: والله مسهرني حضراتكن لين الفير وتتحرطمن بعد " نشيت وانا افر اللحاف" اففف .. وعيالهم امسوين لي مساج مب طبيعي ف ريلي " كفخت ناعمه بالمخده" انتي انتي كسرتي ريلي بس قررري

موزه: يالطفسه لا اتمدين ايدج ع بنتي ..

عواش: ياخي شلي بناتج ونزلي تحت .. والله مخي يعورني من الحشره احس حد ظارب دريل ف مخي ..

مزنه: انتي ظاربين دريل ..!! انا دريل ومثبتين ف الفتحه مسمار ومعلقين عليه لوحه فنيه بعد ..

عواش:جب جب انتيييييييييييي.. رقدت ع الشبريه الخاينه وخلتني انا حليلي اكافح السمييت .. واتقول لي دريل .. والله اظرب دريل ف لسانج الحينه واخليج اتعيدين حساباتج ..

مزنه: شكلج ما استوعبتي الحياه بعد .. سيري اتسبحي بارك الله فيج ..

عواش: والله منتهييييييييييه ..

شوق: هذي الحرمه وصلت .. سلامه ادليها البيت ..

غاليه: ضيعيها شوي .. لين ما عواش تتسبح وتخلص ..

عفرا: موضوعج انتي ..! اصلا ما بتلحق اتخلصنا كلنا .. يعني عواش بتلحق تتسبح وتنزل ..

عواش: انزين مب ايي واشوفكن ماخذات كل النقشات الحلوه ..

سلامه: كيفج عاد .. متأخره .. لا تتفلسفين .. ورفيعه وريسه .. نزلن من زمان يحجزن حق بناتهن .. يعني الحق ما تلحق ..

عواش: الله يالدنيا .. الحين فطامي الزعطوطه و زوز الخنبسانه .. صارن احسن عني ..!

موزه: وانا بسير اختار حقي وحق بناتي .. وانتي خلي الرقاد ينفعج ..

عواش: انتي بالذات نقشج بيطلع وع ..

موزه: راسج اللي وع ...

وسارت ..

عواش فرت اللحاف: والله بنش عشانج بس .. وبنزل تحت عشان اغثج ..

عفرا: بدت بدت ..

عواش: ههههههههه احب اتقارض وياها ..

شوق: دخيلج لا تصدعينا ..

عواش: انتن اتصدعني عادي .. انا اصدعكن لا ..!

شوق: حرام عليج .. ولديه ما يتحمل ..

عواش: ايييه .. ريسه وموزه ورفيعه حملن .. ولا جفناهن يتسخفن .. انتي لا تصدعينا .. وتدلعين علينا .. عندج شي .. يوم بتردين بيتكم عند ريلج طلعيه .. والله .. فاضيات نحن انجابل المعرسات والحمل .. لوعتن جبدنا والله ..

قلت كلامي .. وانا شاله بعمري وسايره صوب الحمام .. شو قالت شوق وشو تحرطمت وشو علقت.. الله اعلم ..!

ف بيت الاشعث الاغبر .. ريل خالوه لطيفه اللي ع الورق فقط ..

بالضبط .. ف الحجره اللي برع .. واللي ما بنتها خالوه لطيفه الا حق يمعت الشباب وحشرتهم وربشتهم ..

بعض الويوه كانت متكنسله تماما .. وبعضها .. كانت امسلمه ملامحها لربها شرات ما سلمت روحها .. عشان يتم راس خالي من الويه ..!

والبعض .. ماركه المخده مطبوعه على ويوههم .. وهم ناشين غصبا عنهم ..!

وواحد منهم .. ناش بكامل قواه العقليه وحاشر الدنيا ..

مهند: يلا يلاااا عيال عمي سهيل .. ابوكم يترياكم ..

سلطان: ابونا مزاجه راااااااااااايق ع الاخر والله .. انا بعدني ما استلمت ملامح ويهي ..!

يابر: انا بعدني ما استلمت مخي عيل ..

هامل: خالي هزاع وين بنسير نحن ..!

هزاع: شدراني يدك وين بيودينا ..

سعود: طاعو الويوووووه انتو بس ..!

هزاع: اشعليك .. معرس .. ناش مصحصح ..

سعود: ومتريق بعد ...

هزاع ساير برع: احلف انته بس ..

سعود ساير ورا اخوه: ههههههه والله .. نشيت اول الصبح .. جفت خالوه حاطه الريوق .. اتريقت وياها وسارت بيتنا ..

هزاع: نذل .. ولا وعيتني .. ولا لفيت لي ف كلنكس ..

يابر: عشان خالوه اتروغه من البيت ..

سهيل نزل الجامه: يلا تعالو ..

سلطان: سلم على باجي الشباب .. وقول حق امك واخوانك .. شكرا على حسن الضيافه ..

مهند: يلا يلا شردو ..

يابر: الى اللقاء ..

مهند امسير وياه: في أمان الله ..  

سعود فتح باب السياره: هالثنينه شو يسوون هني ..!

فهد: اركب بالزين ..

سلطان: والله كل واحد راقد ف بيتهم .. وامريح مخه واعصابه .. ونحن هني انكافح

علي: حد قالكم ما اتسيرون بيتوكم .. يايين هني ترقدون ..

يابر: نحن اخر ناس اترمسنا عن بيتنا ..

علي: ههههههههههه نسيت انكم مطرودين .. وهذا وياكم بعد ..

هامل: انا بيلس ورا .. اخر شي .. ابا ارقد ..

علي: قلت لك رد البيت وياي ..

هامل: برقد لين ما نوصل ..

سهيل: جيه امودنك بوظبي انا .. يلا ركبووو ..

هزاع: شخبارك ابويه ..

سهيل: هلا ابويه .. بخير الحمدلله .. انته اشحالك ..

هزاع: حالي .. هذو ..

صد سهيل صوبه وضحك عليه .. من التعب اللي فيه .. ما اتفيج يحط الغتره على راسه حتى .. لبس كندورته .. واتشحت له كاب من ياسر .. او عفوا .. صرقه من ياسر عن طريق مهند .. 

يابر: وانته جيه ان شاء الله راقد ف البيت .. والله غش ..

سهيل: والله انا محرم اغلب البنات .. وبعدين حجرتيه تحت .. مب فوق .. وعن التفلسف .. يلا .. دعاء الركوب ..

هامل: باسمك ربي وضعت جنبي ..

فهد: ههههههههه ركوووب السياره .. مب الشبريه ..

هامل: اوه نسيت ..

فهد: ههههههههه علي ولدك منتهي ..

علي: محد قاله .. دواه ..

سلطان وهو يمسح على ويه من التعب: سبحان الذي سخر لنا هذا .. وما كنا له مقرنين .. وانا الى ربنا لمنقلبون ..

كمل الدعاء .. وهو حاط راسه ع السيت .. ومغمض عيونه .. وعلي اللي يالس جدام .. يضحك .. على شكل سلطان وهامل .. اللي يلسو اخر شي .. بس عشان يرقدون بدون لا يأذيهم حد .. اما يابر ف يالس ف النص.. عيونه مفتوحه وبؤبؤها مودع الدنيا .. حذاله هزاع اللي نزل الكاب على عينه .. وسعود اللي ميود الفون ف ايده وهو مبتسم .. عاد معرس وفون ليله عرسه .. يعني ليش يبتسم ..!!

اما علي .. وفهد .. ف يالسين يطمشون ويضحكون .. لين ما سوا فهد حركه نذله .. سحب كيمره سلطان اللي كانت حذاله .. وبدا يصور الويوه اللي ما تشاهد ..

..

نزلت من فوق .. وانا مصحصحه ومرتبشه .. وف داخلي .. حماس .. ابا افرغه ف اي حد ..

عواش: ايي جولنار ..

مزنه: ايي جولنارين ..

غاليه: شو تقولن انتن ..!

مزنه: هي اتقول صباح الخير بالتركي .. وانا اقولها صباح الخيرات

عواش: ههههههههههه على كيفج انتي جولنارين اونه " عفدت صوب شوق" واااو .. والله لو اني احب اتحنى جذه .. جان صرقت نقشج ..

شوق: الحمدلله يوم انج ما تحبين ..

عواش: عجيييب .. وايد عيبني .. عليه بالعافيه ولد عمي ..

طلعت شوق عيونها .. وسويت لها طاف بدون لا احترم صدمتها .. وسرت صوب موزه اللي دايما وابدا .. اطفربها بكلامي ..

عواش: شو هـ النقش البااااايخ ..

موزه: محد طلب رايج .. قومي عني ..

عواش: مب حلو  " وانا اكلم الحرمه " شلي شلي ..

موزه: استغفر الله .. انا عايبني .. كملي كملي ..

عفرا: كان خاطري اتحنى اسمي ..

عواش: جان اتحنيتي ..

عفرا: اتخيلي .. سايره عرس ومتحنيه اسمي ..!

عواش: عادي انا يوم عرسي بتحنى اسمي واسمه ..

غاليه: بس الجف ..!

عواش: لا .. لين فوق ..

غاليه: شو هالاسم اللي بيوصل لين فوق

مزنه: اسمه واسم ابوه ويده ليييييييييين ادم

ضحكت من خاطري على مزنه .. والكل ضحك ويايه ..

عواش: يا يالهبله .. جذه ابيات شعر .. فيها اسمي واسمه ..

شوق: احلامج فوق السحاب انتي .. تعالي يلسي ..

عواش: ليش فوق السحاب .. انا لو ابا .. جان امعرسه من زمان ..!

مزنه: ماصخه لانج .. هالكثر تنخطبين ولا توافقين ..!

عواش: مابا ..

مزنه: وايد جايفه عمرج انتي ..

عواش: كيفي مابا ..

مزنه: مالت عليج وع اللي يخطبونج .. والله كلهم مزايين وانا طايح حظي كل اللي يخطبوني جنهم عبدالرب أدريس

بدت الحنه تخترب ف ايد موزه .. لا مب من عيني .. من كلام مزنه اللي ضحكت عليه موزه من الخاطر .. وايدها تنتفض مع احساسها اللي ماتحمل جملتها ..

موزه: الله ياااااااااااااااااااااااااااخذ ابليسج ..مزززززنه الله يخليييج سكتي .. سكتي والله ماقدر اتحملج..

عواش: مالت علييج .. 

مزنه:شووو .. مب يايزتلج الرمسه؟

عواش: وبسوي حركه بعد .. بوزع كتب ف القاعه .. والاستايل بخليه ألف باء تاء ..

عفرا: موضوع الألف باء .. تاء

عواش: عشان اجسد هوايه القراءه .. واعطيها حقها ف عرسي..

غاليه: انا بسوي استايل البحر ..

عواش: شو بتستوين .. حوريه ..!

غاليه: هيه ..

مزنه: و ريلج اخطبوط

وبدت اتهز عمرها ب حركه اخطبوطيه عبيطه .. وجبرتني أهز راسي بـ اسى وانا اضحك عليها .. وهـ المره .. صدت موزه صوبنا وهي شاله علبه الكلنكس ..

موزه: بس صخن صخخخخن .. خربتن ايدي ب سوالفكن والله اضحك وايدي تنتفض .. الحرمه مب قادره تتحكم ..

مزنه: اضحكي ف قلبج انزين مب لازم تقهقهين ..

سلامه: مادري ليش يوم ندخل بيت قوم عمي سهيل .. فجاه الدكشنري ينجلب عندنا ..

غاليه: عاد دكشنريج انتي لا ينجلب .. دخيلج ..

سلامه: Go to hell

عفرا: زين جذه طرشتج الهل ..

عواش: من كثر ما اطرشنا الهل .. آخر شي بكرامتنا بنعق عليها الجمل اللي تغثها .. وبنسير صوب الهل .. بدون لا اطرشنا هي " صديت صوب موزه وانا محوله للتركي" باك باك .. حبيت الاستايل .. بس هالورده بايخه..

موزه: كيفي عايبتني ..

عواش: انزيين مب حلووه

موزه: انزيييين كيفي ..

عواش: وانا اقولج مب حلوووه .. يا سَن .. يا بِن

شوق: اتسبج هاي بالتركي ..

موزه: اشدراني شو اتقول .. بس يالسه حذالي عشان اتغثني " وصرخت " خالووووه فطيييم .. تعالي شلي بنتج ..

فطيم يايه من الباب اللي ورا: بلاكن ..

موزه: تعالي شلي بنتج الله يخليج ..

فطيم: اي بنت ..

موزه: اي بنت بعد .. في غيرها اللي حاشره الدنيا .. خالوه الله يخلييج فكيني منها ..

فطيم: عويش انتي ما تستحيين .. ما تخيلين شوي .. هالكبر ويتشكون منج ..؟

عواش: امايه وانتي تسمعين لـ هاي بعد .. هاي تحب تلفق عليه تهم باطله ..

عفرا: خيبه خيبه خيبه ..

عواش: وانتن يوم انكن حاجزات ادواركن .. جيه محتشرات ع راسي من الصبح .. والله لو رقدت وما عبرتكن وايد زين ..

فطيم: متى دورج ..

عواش: شدراني .. يوم بياذن المغرب يمكن ..

موزه: وانا اتحمل صدعتج هاي لين اذان المغرب .. والله لو خليتج معفنه ف رقادج وايد احسن ..

عواش: انزين ليش اتقولين عني معفنه ..!

فطيم: عويش .. نشي سويلنا جيز كيك ..

عواش حولت لهجتها للمصري: نعم يا اختي ..! 

غاليه: ثرها يوم تبدا تستوعب المواضيع وتنصدم .. اتغير من اللغه التركيه .. لـ اي لغه ثانيه ..

فطيم: قومي ..

عواش: نعم ياستّييييييييي

فطيم: منها تسوين شي بخاطريه .. ومنها تفكينا من صدعتج ..

عواش اتربعت بكل ادب: امايه يعني انا باجر لو عرست انتي ما بتحزنين عليه ..

ريسه: تحزن عليج ليش ..

عواش: لا يعني ما بتصيح ..

ريسه: لا طبعا..

عواش: عن الجذب ..

ريسه: حق شو اتصيح .. اصلا ما بتصدق تفتك منج ..

عواش: انزين .. دورن باجر حد يوديكن انتن وعيالكن .. اتصلن صيحن .. والله ماسويلكن سالفه .. مشتاقات .. سيرن حظنن مخدتيه وصيحن عليه ..

ريسه: يلا يلا .. فاضيات انصيح عليج نحن ..

عواش فتحت عيونها: عيل اييكن شور .. والله حتى مخدتيه بشلها .. ما بخلي لكن شي.. بس يلسن اتخيلن الفراغ .. مالت .. وانا شاله همهن بعد .. قلت برقد .. ما بنش ازعجهن واخذ دورهن .. بس ماتنعطن ويه ..

فطيم: عن الهذره الزايده عويش .. نشي سيري المطبخ ..

عواش: ماشي اغراض الجيز كيك ..

غاليه: سيري اشتري وتعالي ..

عواش: مابحصل ف الجمعيه .. لازم سبنس ..

غاليه: سيري انزين اسبنس ابتاون ..

عواش: نعم نعم .. خيير .. شو تتحرن .. عبدالجبار مالتكن انا ..

فطيم: مب من بعد المكان ..

عواش: امااااااااايه ..!

فطيم: نشي وعن الهيازه .. يلا ..

عفرا: نشي نشي .. انا بيي وياج ..

..

بين الحلاق .. ومحلات النعل .. وتغيير مخي السياره .. وخياييط الكنادير .. اتوزعو الشباب اليوم .. كل واحد يقضي آخر المشاوير اللي تمت له عشان يستقبل اليوم الخاص بسعود .. بفرحه سعود .. وبقلب سعود .. اللي صبر .. ونال ..!

عدسة الكيمرا تنتقل من شخص لي شخص .. عشان ادون ذكرياته وتجهيزاته الخاصه بـ عرس سعود عقب ما تحبس انفاسه بـ لحظتها ..

اول شخص يالس ع الكرسي اللي ع اليمين .. حاط راسه ع مسند الكرسي ورافعنه لـ فوق .. ومكينه الحلاق اتمر على اطراف ويهه .. اتحدد له ملامح كل شعره .. عشان تتخذ مسارها الصحيح في تشكيل شكله..

سلطان: هزاع .. يحاول يثبت القفل .. ليش شليت الزلف ..

هزاع: بس .. تغيير لعيون سعود ..

سلطان: بس اتصدق احلى عليك ..

هزاع: كل شي حلو عليه ..

سلطان: وهذا علي ريل موزووه ..

علي: غربلات بليسك .. يالس ف مكان عام وتفضح عن اسم حرمتييه ..!

سلطان: في حد غير هـ الاربعه اللي يحلقونكم ..!

علي: ولو كان في مواطنين ..

سلطان: شو يعني .. نحن مانعرف اسامي امهات المؤمنين ..! لو كان عيب .. جان ماعرفنا اساميهن ..

هامل: ثقاااافه يا حبيبي ثقااافه ..

سلطان: هههههههه وهذا هامل .. اللي حشّوو شعره ..

هامل: الله يسامحهم والله ..

سلطان: ويابر .. لحظه لحظه لحظه " نزل الكيمرا بدون لا يصوره" ابووووويه .. تعال شويه ..

مشى سهيل لين ما اتجدم من يابر وسلطان .. وقبل ما يسأل سلطان عن السبب اللي زقره عشانه .. فتح سهيل عينه وهو منصدم ..

سهيل: وانا يايبنك ويانا .. ودافع فيك عشان تستشور لي شعرك .. جيييه بنييه انته ..!

يابر: الاستشوار مب بس حق البنات ..!

سهيل: يابر شو هـ الحركه هااي ..!

يابر: ابا اثبت حركت الدييج ..

سهيل: انا قايلك اتحلق ..

يابر:والله الاسبوع اللي طاف خفيت شعري .. ما بخفه اكثر عن جذه ..

سهيل: ما بتخفه اتقوم تستوي لي دييج ..!

يابر: ابري ذمتك .. والا يرضيك تدفع لهم كلهم جيمه الحلاق .. وانا ما تدفع لي .. ما يستوي الموضوع مفتقر للعدل .. يعني بتتحاسب على هالشي ..

سهيل مسكه من شعره: والله اذا بتحاسب .. بتحاسب ع كشتك هاي "وهو يكلم الريال" اغسل اغسل شعره .. سووله حمام زيت ..

يابر يضحك: كمل كمل بابا .. ماعليك منه هذا نفر وايد يتكلم ..

قبل ما تتوجه كيمرة سلطان للشخص اللي يالس ع آخر كرسي .. اتوجه سهيل بكبره صوبه وقلبه مبتسم..

سهيل: لاه لاه لاه ..

سعود: وايد متغير يعني ..!

سهيل: اصلا المعرس تلقائيا يحلو ف عرسه .. بعد ويين لو كان المعرس ولدييه ..

سعود ابتسم: الله لا يحرمنا منك ..!

سهيل: بس اظني في شخص ينافسك ..

سعود صد صوب فهد: لالا .. طوله ما يسمح له ابدا .. انه ينافسني ..

فهد: هههههههههه على قولتك .. لعيون عرسك بسكت عنك ..!

سعود: لا والله .. لعيوون اختييه بس مابا اشوه جمالك .. مافيا بعد ولي العهد يظهر ناقص ..

فهد فتح عينه: بسم الله ع ولديييه ..

سهيل: يلا خلصو .. ورانا مشاوير ثانيه ..

يابر: وين ناوي اتودينا عقب ..

سهيل: عقب ما نركب السياره بقولكم وين بنسير ..

علي: عمي شاغلنا عن حريمنا عشان اتهد حيلنا .. والمسا بنرجع لهن عشان ننصدم بطلباتهن اللي لازم انلبيها ..

سهيل: هههههههههه ماعلييك .. عندهن الدريول اليوم .. فاضي لهن يوديهن وين ما يبن .. عشان ما يحشرونكم ..

علي: والله لين اخر لحظه .. بيتصلن وبيقولن نسينا هذا .. وسر ييب هذاك ..

سهيل: عاد شرايكم انخسس بهن باجر .. نغلق مبايلاتنا وما نعبرهن ..

هزاع صفق: يا عيني يا عيني .. سمعو الابو كيف يحرض نسايبه ع بناته ..

فهد:هههههههههه لا والله ما يهونن علينا..

سهيل: انته بنسمح لك لان حرمتك تعبانه .. اما انا وعلي بنسويها ..

هامل: الصراحه .. حلوه الطبخه .. صبرو جان ما خبرت موزه عليكم ..

سعود: وانته حاطينك بيننا عميل ..! متعاون ..

هامل: اتحرضون على اميه .. وتبوني اوقف معااكم ..!

سعود: زين يوم اذكرت انها امك ..

هامل: انته يوم اتقول جذه تجبرني اصيح ..

سعود: يالحساس .. ليش ان شاء الله ..!

هامل: والله انا احب اميه انزين .. ليش تحسسوني اني عاق بها ..

هزاع: بس بس زيين .. عن اتصيح صدق .. خلصونا خلنا انرد .. شكله هـ السهيل ناوي يهد حلينا صدق..

سهيل: عاد انته ما وراك شي ..

هزاع: منو قالك .. انا بعد ورايه حرمه ..

هامل: فديتها خالوه سلامه والله .. شيخه الحرييم

انهد حيلنا .. وما تم فينا شي .. لا طاقه .. لا حماس .. لا ربشه .. ولا حتى لنا بارض انكمل يلستنا ف بيوتنا ..

كل حد رجع بيته ... عشان يوصل حجرته .. ويطيح ع شبريته .. بحيل مهدود .. رغبه من روحه انها تنال نصيبها من الراحه عشان اتنش باجر استعداد .. لـ يوم سعود .. اللي اترياه قلبه

سمع صوت الباب وهو يندق .. بدون ما يرفع راسه او يغير نظره الحب اللي بعيونه او حتى يكلف على نفسه ويسأل عن الشخص اللي يتريا اذن الدخول منه .. سمح له سعود يدخل ..

سعود: اتفضل ..

هزاع: ما رقدت ..!

سعود: مب قادر ارقد ..

ابتسم هزاع وهو يند الباب .. عقبها صد صوب الاخوه وهو لازال مبتسم .. واجدم منه ..

هزاع: معلووووم .. معرس وين بتقدر ترقد 

سعود يلس وهو ياخذ نفس: هزاع

هزاع: آمر ..

سعود: انا آسف ..

هزاع: على شو ..!

سعود: انته مضايج لان عرسي قبل عرسك ..

هزاع: عن الحركااات زيين ..

سعود: لا تمثل وايد .. انا اعرفك عدل ..

هزاع: لو تعرفني عدل ما بتقولي هالكلام .. لانك بتكون واثق ان فرحتك هي فرحتي ..

سعود: ولاني واثق ان حزنك هو حزني .. ف احس اني شال همك ..

هزاع: لا تشل هم حد .. فكر ف نفسك وبس ..

سعود: تحيدني اناني ..!

هزاع:بلاك انته .. حد اشتكا لك..!

سعود: قلبي قلبي يا هزاع ..

هزاع: ههههه وايد مستوي رومانسي اجوفك .. انطم ورد انسدح اجووف ..

سعود: تعال يلس ..

اجدم هزاع اكثر من اخوه ويلس ع الشبريه ..

سعود: شخبارها سلامه ..!

هزاع: الحمدلله ..

سعود: ابا الاخبار اللي اقصدها ..

هزاع تنهد: نسبه السكري مش منتظمه عندها ابدا .. مسببه ضغط كبير عليها ومضطرين انهم يسوولها عمليه .. بس ما يقدرون ..!

سعود: عمليه شو ..

هزاع: الماي الابيض .. نظرها بدا يقل بدرجه كبير " خذ نفس" ويمكن عقب فتره تفقده

سعود: وليش ما يقدرون يسولها العمليه ..!

هزاع: لان السكري مش منتظم .. ف ما تتحمل التخدير .. يمكن يرفع عندها الضغط او يسبب لها اي تأثير سلبي ثاني

سعود: عشان جذه اجلتو العرس ..

هزاع: هيه .. عشان جذه اجلناه ..

سعود: اسالك سؤال ..!

هزاع: اسال ..

سعود: ولو ما رد لها نظرها ..!

هزاع ابتسم: مستعد اصير لعيونها نظر طول عمري ..!

سعود ابتسم هو يحاول يغير جو اخوه: يا حيييج يا سلامه .. تعالي سمعي الرمسسسه انتي بس ..! اخو ريلج اللي ما يستحي ع ويهه خلاج نتعمين .. وريلج يبا يصير لج نظر "كفخه بالمخده" قووول بسم الله عليها .. قووول بعيد الشر .. قوول فيك ولا فيها مب " وهو يقلده" اصير لها عيوون.. والله عن تسمعك بتبيعك

هزاع: ههههههههه فديييتها والله " وطاح ع الشبريه"

سعود وهو حاط ايده ع خده:للعلم يعني انا ماسمحت لـ اي كائن حي ييلس ع هالشبريه غيرك .. اجوفك خذت راحتك وحطيت راسك وبتودع بعد ..

هزاع: اوووه نسينا انها حجره الزوجيه .. اتصدق بعدني رابط ويهك بالعزوبيه والصياعه يالفالتوه انته ..!

ونش عنه ..

هزاع: ما تامرنا بشي ..!

سعود: سلامتك ..

هزاع: تصبح على خير ..

سعود خذ نفس: وانته تصبح على يوم اجمل من اللي بصبح عليه انا .. الله ايسر اموركم يارب ويسعدكم

هزاع ابتسم : ولك بالمثل ..

سعود: انزين يا صحيح بخاري ومسلم .. ممكن اررقد يعني ..

هزاع: انزييين ويا هـ الراااس .. مع السلامه ..

سعود: مع السلامه ..

حط راسه سعود ع المخده وهو واثق انه ما بيقدر يرقد .. وهزاع .. طلع من الحجره وتم واقف عند الباب ثواني .. بس كل اللي سواه .. انه نزل تحت .. طلع من الفله .. ركب سيارته وطلع قاصد اي مكان ممكن يتنفس فيه ..!