الأربعاء، 17 سبتمبر 2014

الجزء الرابع


ف زاويه من الزوايه الاربعه اللي تحدد هـ البيت .. تحظن قفص الدياي الخاص بـ عمران .. وفوق هـ الزاويه بالضبط .. خصص عمران سورها .. عشان ييلس عليه كل ما حب انه يتنفس بعيد عن عيون البشر

ييلس هناك .. ويعطي ظهره لـ بيتهم ولـ كل المشاكل اللي فيه .. ويكتفي انه يتأمل العراقيب اللي ورا بيتهم ..

اراضي خاليه من البيوت .. خاليه من الناس .. خاليه من اي همس ممكن يزعج عمران ..

يطلق ريوله ف الهوا .. اما يحركهم يمين ويسار .. او انه ينزل وحده .. والثانيه يكتفي انه يظمها بحظنه رغبه من ضلوعه انها تهدي بعضها اذا ما التقت ..


اليوم .. كرر عمران يلسته .. بس هـ المره وهو يتنفس الفرح .. شبك اديه ف بعض .. وبدا ينقع صبوعه


فهد وهو ياي صوبه : وانته تستقبل .. تودع .. تظارب .. تتواعد .. اتبارك .. اتعزي .. على هـ السور ..
عمران ابتسم بدون ما يصد صوبه: انا ما اقدر اتنفس واعبر عن احاسيسي اللي ذكرتها ف هـ المواقف .. الا ع هـ السور ..
فهد: انزل انزل .. لا تجبرني اعفد واظارب وياك فوق السطح ..
عمران: اي سطح ..
فهد: سطح السور ..
عمران صد صوبه: وتفضحنا ويا اليران ..
فهد ابتسم : ويا هـ الراس .. تعال ..

سحب عمران ريله اللي مجابله البر .. ثبتها ع قفص الدياي وعقبها مسك ايد اخوه اللي كان مادنها له .. نقز من فوق القفص .. وقف جدام فهد وهو يتنفس بسرعه

عمران: استقبلك بـ اصدق احساس موجود هالحزه ف داخلي " خذ نفس من التعب " اشتقت لك ...

وحظنه ..

فهد: شخبارك ..
عمران: اخباري ف الحظيظ من يوم سافرت ..
فهد: لا تقووولي مشكلتني ويا ابوووك .. عمران توني ما كملت شهر من زواجي .. دخيلك لا تفشلني جدام حرمتيه ..
عمران: والله لعيوووونك .. ما اظاربت وياها غير مره وحده .. وع الخفيف ..
فهد: الله يهديك بس  ..!
عمران: والله هي جبرتني .. عيل الكلبه تقووول لي لا اتعب نفسك وتزقر البشجاره .. لاني موصتنها ماترد عليك
فهد: وهالموضوع يحتاي انك تظارب وياها ..
عمران: انا ما اظاربت .. بس نثرت ثيابي ف الصاله وقلت لها يا انتي تشلينهم يا عتيقه ..!
فهد: ومنو شلهم ..
عمران: مادري .. بس المهم اني جفتهم اليوم الثاني ف كبتي ..
فهد: يعني غسلولك اياهم غصبا عنهم .. ف ليش سويت هـ الحشره كلها ..
عمران: لاني لو ما كنت مسونها .. جان ما غسلولي اياهم اسبووعين .. عاد يرضيك اسبوعين ما يغسلون ثياب اخوك ..
فهد: لا والله مايرضيني لاني اعرف انك عقب هـ الاسبوعين ما بتلقى شي تلبسه ..!
عمران: لا والله ..
فهد: اصلا انته زين منها عتيقه تدخل حجرتك ..
عمران: لاتطنز هاه .. عقب الله يبليك ..
فهد: يبليني بالفوضى المعفنه اللي فيك ..
عمران: لا تكلمني بهـ الاسلوب.. انا اخووك .. والا الزواج نساك هـ الشي .. شرا ما نسّى غيرك ..
فهد رفع حياته: لا .. اظني انته اللي طاري الزواج يخليك تتوقع ان كل الناس اللي يتزوجون يستوون شرات ابوك ..
عمران: لا اتقول جذه .. ثر ابويه طيب .. بس مرات يستوي نحس ..
فهد: ههههههههه انتتته مووول مافيك ادب ..
عمران: ادبني ..
فهد: ودي بس القطو العود ما يتربا ..!
عمران: انا قطو ..!
فهد :لا والله محشوم القطو .. الا بعيير انته ..!
عمران: لانك معرس يديد بس .. والا جان شخبطت على ويهك وطرشتك عند حرمتك ..
فهد: يالسه داخل .. تادب وارمس عدل ..
عمران: يعني تباني اهد شخصيتي برع وادخل الفلا عشان ارمس حرمتك ..! وانا شو يخصني بها اصلا عشان ارمسها ..
فهد: انته حتى لو وقفنا عند اشاره حمرا جفت لك واحد ع السيكل .. نزلت الجامه وكلمته .. هـ المره تبا تقنعني انك ما بتكلم حرمتيه اللي بتعيش وياك ف بيت واحد ..
عمران: لا ما بقنعك .. لانك اذا اقتنعت والا ما اقتنعت ف هـ الشي راجع لك .. هذا اولا .. ثانيا .. ثرها بنت عمي .. ف لا تصدق عمرك وايد يعني انها حرمتك وتسوي لي حركات ومادري شووو ..

ودخل .. واخوه دخل وراه ..

فهد: جب ويا هـ الوييه ..
عمران: لا تعترض على امر ربك ..
فهد: اي امر ..
عمران: امر ويهي .. ثرني احلى من طووووولك القزززم يالقزززم ..

ضحك فهد وهو ماد ايده صوب اخوه ..

فهد: جب زييين ..

وقبل ما يكفخه .. شرد عمران وسار فوق وركض فهد وراه ... وصل عمران فوق وقبل ما يتوجه لـ حجرته وقف ..

عمران: اوه آسف ..
حصه: يالله .. تعتذر .. وبكل ادب ..!!!
عمران: السلام عليكم ..
عفرا بنص عين: وعليكم السلام..

نزل عمران راسه .. وياي يسير صوب حجرته .. حتى وان كانت شوق بنت عمه .. بس هو مش متعود وايد ع البنات رغم قوه العلاقه اللي تربطه بالشباب .. اتجدم خطوه .. بس وقفه فهد عقب ما مسكه من جتفه اليمين ..

فهد: تبا تشرد بعد لا ..
عمران: باجر بنكمل الشوط الثاني ..
فهد: ماشي انته اللي بديت المباراه ..
عمران بصوت واطي: لا تفشلني .. والا الحين اخذ نعالك احطه فوق المكتبه .. واجوفك شو بتسوي..
فهد: ههههههههههه والله يبااااالك خيزرااانه محنايه امنقطعه بملح ..
عمران: خيبه .. وانا شو قلت .. اذا انته قزم انا شو يخصني ..
فهد: بس جب لا تفضحني ..
عمران: اتصدق عاد مول ما اجوف قصرك

مشى فهد ويا اخوه صوب الكنبات وهو ماسكنه من جتفه ..

فهد: بس اسكت..
حصه: تستاااهل .. والله محد يعرف لك غير فهود فديته ..
فهد: كان مأذنج ..!
حصه: واااايد ..
عمران: لا تجذبييين ..
فهد: وليش تجذب .. جني مووول ماعرفك ..
عمران: عيل هدني يوم انك تعرفني فشلتني والله ..

وقبل ما يهده فهد .. ضحكت شوق من خاطرها .. ابتسم فهد وهو يفر عمران ع الكنبه ..

فهد: عقاب لك ..
عمران: والله مب ساير المدرسه ..
فهد: جيه ع كيفك هو ..
عمران: اذا عاقبتني والله مب ساير المدرسه ..
فهد: يوم بجووف عمي سهيل ياينك الصبح يوعييك .. قول له ما بسير ..
عمران: قوول له شو يعني اخاف من عمك انا..!!

سكت .. عقب ما قال كلمه عمك واستوعب ان بنته اللي ضحكت فجاه على جملته .. يالسه حذاله ..

فهد: انته ما تستحي والله .. مفشلنا ويا الكل ..!

وقف عمران بدون ما يرمس .. ومشى عنهم ساير صوب حجرته ..

شوق: حرام عليك فشلته ..
عفرا: منو تفشل .. عموور ..! صبري حرمت اخويه بعدج ما عرفتيه ..

ووصل ابوهم ..

عبيد: السلام عليكم ..
فهد ابتسم: وعليكم السلام ..

اجدم من ابوه اللي رد له الابتسامه .. وباس راسه ..

عبيد: الحمدلله ع السلامه ..!
فهد: الله يسلمك ..
عبيد: ماشاء الله .. متى وصلتو ..
فهد: قبل ساعتين تقريبا ..
عبيد: شحالكم ..
فهد: تمام الحمدلله .. يسرك الحال ابويه

ونشت شوق من مكانها اجدمت منه وهي تسلم عليه واتبوس راسه ..!

شوق: اشحالك عمي ..
عبيد: هلا هلا ببنت اخويه .. شخبارج ابويه ..!
شوق: بخير وسهاله .. ربي يعافيك
عبيد: وشو فهد وياج .. عسى ما اذاج
شوق ابتسمت: الحمدلله
حصه: ابويه فهد فهد هذا .. مب هاك الغبي عمران ..
عبيد رفع حياته: مظاربه وياه شكلج ..!
حصه: لا والله ما يخصني .. فهد اللي زعله
عبيد: افا فهد .. امزعل اخوك ..
فهد: هو مستوي حساس بغيابي ..
عبيد: مشتاقلك .. اتقوم اتزعله ..!
فهد: ما زعلته والله..
عبيد: وينه ..!
عفرا: سار حجرته ..
عبيد: خلنا انسير انجوفه شوي .. واذا طلع صدق زعلان منك .. اتيي اتراضيه ..
فهد: ع هـ الخشم .. كم بو فهد عندي انا ..
عبيد: قول كم اخو عندي ..!

ابتسم فهد وهو يهز راسه بـ رضى .. مشى عنهم ابوهم وهو ساير صوب حجره عمران .. رفع ايده ودق الباب ..


عمران: لا تسوي عمرك ياي تعتذر .. سر حط راسك وارقد .. وخلني ارقد
عبيد: واذا قلت لك ما برقد قبل ما اجوفك ..!

فتح عمران عينه وهو منصدم .. عفد عن الشبريه وسار صوب الباب .. وفتحه لـ ابوه ..

عمران: آسف انا آسف..!
عبيد: جان قلت لي اتفضل .. جيه كلفت على عمرك ونشيت..!
عمران ابتسم:اتفضل ..
عبيد دخل: يقولون زعلان ..!
عمران: زعلان من منو ..!
عبيد: مني ..!

عقد عمران حياته .. وهو يطالع ابوه اللي معطنه ظهره ..

عبيد: شو هـ الفوضى اللي انت عايش فيها .. جيه ما تخلي البشجاره اترتب لك الحجره ..!
عمران: حتى لو رتبتها .. يومين وبدمرها ..
عبيد يلس ع الشبريه: تعال يلس ..

اجدم عمران يلس حذال ابوه اللي خذ نفس ..

عبيد: ان شاء الله مب مسوي هالخبصه كلها ف دراستك ..
عمران: والله تبا الصدق .. مسوي بس على اخف ..
عبيد: شد حيلك .. هاي آخر سنه لك .. وشرات ما اختك واخوك كملو دراستهم ف الجامعه انته بعد اباك تتخرج واتكمل دراستك..
عمران: ما اوعدك .. انا مب فالح كثرهم ..
عبيد: لا تحبط نفسك .. انته قدها ..
عمران: ابويه انا مخي .. مخ حمااار ..

ضحك عبيد وعقبها رفع ايده وحطها ع راس عمران ..

عبيد وهو يهز راس ولده : لا والله .. انته اذكاهم .. بس لو تعطي دراستك وقت اكبر من اللي ماجوفك تعطيه اصلا ..!
عمران ابتسم: والله اذاكر صفحه صفحتين .. عسى القط شي قبل الامتحان ..!
عبيد: وهالصفحتين ينجحونك .. معناته لو ذاكرت الكتاب كله .. بتييب نسبه عاليه ..
عمران: ف المدرسه يمكن .. بس ف الجامعه مستحيل ..
عبيد وقف: مافي شي مستحيل .. لو تبا شي بتوصل له .. وانته بتوصل للشهاده الجامعيه .. ع الاقل عشان امك .. مب عشاني

واجدم منه بدون لا يرد عليه ولده .. وبين عيونه .. طبع بوسه انمزجت بروح عمران اللي طلعت من داخله عقب ما طلع ابوه من الحجره ..بدون لا يزعجه الموضوع .. لان جسده .. سبق وان ودع روحه بـ موقف اقسى من اي موقف ..ممكن يمر به عمران ..!

..

ف بيت حميد ..

من صوب الدرسنج رووم .. طلع حريز وهو ينشف ويهه بالفوده

رفيعه: انا قايلتك بكنسل هالفوده املوعه جبدي قسما بالله ..
حريز: حرام توني شارنها ..
رفيعه: بكم شارنها ..!
حريز: هههههه والله ما دفعت فيها .. بس دفعت ف الحجره اللي سكنت فيها ..
رفيعه: لا تلوووع جبدي .. انا ما اخليك ترقد على فراش الفندق .. انته اتقوم تصرق لي فوده واتيبها عندي..!
حريز: ما صارقنها والله .. دافعلهم مال قارون ع الليله الوحده مالت عليهم ..
رفيعه: هههههههههه محد قالكم ..
حريز: شغل حراميه والله .. نحن لو نفتح لنا فندق بنربح ..
رفيعه: كل الناس يربحون ف مشاريعهم الا نحن
حريز: هزرج ليش ..!
رفيعه: من شغل الواسطات .. الا فلان يبا يسير ولا تاخذون عنه .. الا فلان يبا يودي عياله ولا تاخذون عنه .. بتدفع مال الصيانه والماي والكهربا من جيبك.. والناس لي تعرفهم هم الوحيدين اللي بيربحون ف الموضوع .. استجمام .. وسفر .. وسياحه .. ببلاش .. شو يبون بعد ..
حريز: بسوي لهم حوض وجاكوزي بعد ..
رفيعه: لا بالله كديت خير ..
حريز: هههههه صدقج والله هذا شغلهم هالاهل ..!

نشت عنه رفيعه وهي سايره صوب الباب ..

حريز: وين سايره ..
رفيعه: بسير اييب فطامي .. مصختها جوف الساعه كم ..!
حريز: عادي امايه بعدها واعيه ..
رفيعه: تعبت منها امك .. ادري بها مب متحملتنها .. بس مستحيه اتقول ..
حريز: تتعب من الكل الا فطامي ..
رفيعه: وايد لا تغتر ببنتك انته بعد .. ثرها عفريته ..
حريز: الله يحفظها ..
رفيعه: انته وين ساير ..!
حريز: بسير اجوف عمر لين ما تقنعين بنتج
رفيعه: ليش وينها عويش ..!
حريز: رااااقده .. دوامها باجر الساعه 8
رفيعه: هههههههه اختك يوم اداوم الساعه ثمان .. مخها يكون ظارب طول اليوم ..!
حريز: الله يعين سلامه اللي مجابلتنها ف الحجره ..
رفيعه: قصدك الله يعينا نحن .. باجر من الصبح بتحتشر علينا ف الجامعه ..

مشت عنه وهي تضحك بينها وبين نفسها .. وهو وقف ف نص الدرب .. بالضبط عند حجره عمر .. رفع ايده وبدا يدق الباب ..

حريز وهو يفتح الباب: عموور .. راقد ..!

دخل وهو مبتسم .. ويوم طاحت عينه على الحجره وزواياها .. سكر الباب .. وهو مركز عينه ع زاويه معينه .. بـ كل ألم  ..

بالضبط صوب اليمين .. بين الشبريه واليدار .. مثبت اطراف ريوله ع اليدار .. وباجي ريله .. حاطنها بطريقه ممكن تهدي الخوف اللي فيه بدون لا يعرف هو بنفسه .. شو السبب.. ايده رافعنها لويهه وكانه حاظن خده لكنها ف الاساس كانت تنتفض من الخوف نفسه اللي يجهل عمر اسبابه ..

وبينه وبين نفسه .. يتمتم بحروف غريبه .. وعبارات مالها معنى ..

خذ حريز نفس وهو ساير صوبه ..

حريز: عمر ..

صد عمر صوبه بكل ملامحه .. الا عيونه .. كانت مركزه بزاويه بعيده .. زاويه ما يشوفها ولا يسمعها ولا يحس باللي فيها غيره .. عشان يصدم حريز .. بضحكه طلعت من قلبه بدون اي سبب ..

اجدم منه حريز وهو يمسك ايده ..

حريز: قم انسير تحت ..
عمر: مابا مابا .. مابا اسير تحت .. مابا اسير تحت "سحب ايده عن حريز و بدا يهز راسه و إيده تنتفض بخوف" مابا اسير تحت ..
حريز: بترقد انزين ..!
عمر ابتسم : بترقد .. بترقد " ورد نزل راسه وهو مركز عينه بعيد عن حريز" هيه .. برقد ..
حريز: يلا انزين قم ..

نش وهو حاظن نفسه .. تجنبا لـ ايد حريز اللي ممكن يمسك به ايده .. او لـ اي حركه ثانيه .. تجبره يتجدم من حريز ويمسكه حتى لو كان بالغلط ..!

اجدم بكل هدوء من الشبريه .. وطاح عليها .. سحب حريز اللحاف من تحته .. ولحفه وهو يجوف اخوه بكل الم .. ثواني وهو مركز عينه على عمر .. اللي فجاه ينتقل من حال لـ حال .. عشان يفاجأ احساس حريز .. اللي كل ما ظن بـ ان اخوه تحسن .. ينصدم بشي يقهر احساسه ..!

طلع من حجره عمر .. وهو ساير حجرته .. بكل الم فتح الباب وسار صوب حرمته وبنته  ..

حريز: راقده ..!
رفيعه: وين ترقد هاي .. شاله الوانها وخرابيطها ويايه اتكمل هني  ..!
حريز: جيه ما وراها مدرسه باجر ..!
رفيعه: امبلى بس العفريته مب طايعه ترقد 
حريز ابتسم بـ الم: لا اتقولين عن بنتي عفريته ..

اجدم بكل هدوء ويلس ع الشبريه .. ثواني وعفدت عليه بنته ..

فطامي: بابا جوف هذا ..
حريز خذ عنها الورقه: شو هذا ..
فطامي: مُخرّج .. اليوم يابوه مدرثتنا ..
حريز عقد حياته: شو هـ المُخرّج ..!
رفيعه ضحكت: مهرج مهرج .. 
حريز ابتسم : مهرررج .. قولي مُ هـ رّج ..
فطامي: مو .. خرج ..
حريز: مب مخرج ..
فطامي: انته اثلا ماتعرف .. اثمه مخرج .. ييب ييب ورقتي ..
حريز: صبري بنعلقها  ..

نش حريز ويا بنته ومشى لين اخر الحجره وعقبها خذ يمين .. بزاويه بعيده قليلا عن عيونهم .. وين المكان اللي مخصصينه لبنتهم عشان تحظن اسرارها الطفوليه فيه ..

وقف .. وشل بنته وبيده الثانيه ماسك الورقه .. وقّف فطامي ع طاولتها الصغيره .. ومسك الورقه من زاويه .. ومن زاويه ثانيه .. مسكتها فطامي ..وعلقو الرسمه ع اليدار اللي مجابل طاولتها وكرسيها ..

حريز: واااو .. فديت بنتي انا ..

اجدم منها .. وهي بدورها حظنته وتعلقت برقبته . .

رفيعه يايه صوبهم: خلصتو ..!
حريز: خلصنا خلصنا ..
رفيعه: انزين .. والشطار شو يسوون هالوقت ..!
فطامي: ما يرقدون ..
رفيعه: لا يا حبيبتي .. لعبي على غيري .. يلا بسرعه ع شبريتج ..
فطامي: مابا اثير المدرثه
رفيعه: بدينا ..
حريز: مب لازم اتداوم انزين ..

سارت رفيعه صوبه وهي تسحب بنتها عنه ..

رفيعه: شكرا .. ويزاك الله خير على انك ما تفر مخها
حريز: خليها لااه ..
رفيعه: ماباها تتعود ..
حريز: يوم واحد ما بيخليها تتعود ..
رفيعه: كل يوم غيبها وقول لي يوم واحد .. وبعدين تيلس ف البيت شو اتسوي .. انا دوام .. انته دوام .. وامك اتداوم ف الخياييط ..
حريز: شكلي بفتح لها خياط هالحرمه بدال لا اتجابل حلال غيرها ..
رفيعه: انته كل شي بتفتح سر ارقد يلا ..
حريز: مانبا نرقد انزييين ..
رفيعه: مب على كيفكم .. صدعتني حريز .. يلا سر وخل البنيه ترقد ..
حريز: انزين انزين .. يلا مع السلامه ..
فطامي: بااااي ..!

ورفعت فطامي ايدها وهي اتسوي fly kiss حق ابوها اللي رد لها الحركه وهو مبتسم من قلبه .. وسار عنهم ..!


..


من شعره .. ماسكنه وهو يسحبه وراه .. وصل عند باب الشقه .. ايد وحده لاف ذراعها على رقبت ولده وهو حاط كل صبوعه ف شعره وماسكنه بقوه .. وبيده الثانيه .. ظهر المفتاح من جيبه وهو يفتح الباب ..

موزه: بلاكم بلاكم انتو الثنينه ..
علي: ادخل جدامي ..
هامل: مزعلتنه انتي ياي يراضيج بـ تيس ..! " وهو ياشر على عمره"

دخل علي وهو بعده ساحب هامل من شعره .. وبـ ريله شات الباب وسكره ..

هامل رفع ايده: السلام عليكم ..
علي: اسكت ..
هامل: السلام لله انزين ..
علي: قلت لك اسكت ..
هامل: اوكي السكوت من ذهب .. حلو بعد ..
علي كفخه على راسه: هامل قلت لك اسكت ..
موزه: احط لكم العشا ..
هامل: بعدج ما طبختيني انزين ..

اجدم علي من الكنبه وهو يفر هامل عليها ..

علي: اسمعني يا هامل ..
هامل: انزين بسمعك بس بشرط ..
علي: لا تحط لي شروط انطم واسمع
هامل: امايه لي الحق اني انش وما اسمعه .. جيه يقول لي انطم وانا مب عارف شو السالفه " وقف " والله المتهم بريئ حتى شو يسمونه ..
موزه: حتى شو ..!
هامل: حتى تثبت ديانته ..  
موزه:هههههههههه يلس انزين يلس ..
هامل: قوليله يعتذر والا بسير ارقد ..
علي: لا والله .. سر سر .. انته الغلطان وتباني اعتذر منك ..!
هامل: غلطاان ف شو انا .. ييت هناك وسحبتني من شعري ركبتني السياره بدون ما تقول لي شو السالفه .. ورديت نزلتني وانته ماسكني من شعري .. حد قالك ان ايدي ف راسي عشان تمسكه جذه وتسحبني منه ..!
علي: امويز سكتيه ويلسيه بالزين ..
هامل: لا تتعدى على حقوقي .. انا بس اقولها امويز ..!
علي: مووزه سكتي ولدج ويلسيه ..
هامل: لالا عصب عصب الوالد .. قام يقول ولدج وما يعترف اني ولده ..

اجدمت منه موزه وهي اتحط ايدها ع راسه وتيلسه

موزه: هامل بس اسكت ويلس ..
هامل: اسكت وايلس بدون سبب .. مسحوب من شعري بدون ذنب .. وفوق هذا .. غلطان
علي: اسمعني ..
هامل: ولو اني مابا اسمع .. بس يلا ارمس ..
علي عصب: بس خلاص .. مصختها يعني من الصبح ارمسك واترد عليه بكل استهبال ..!
هامل: اوكي اوكي .. انا آسف .. بس مب نحن متفقين .. ان انكلم بعض بكل احترام .. واذا واحد منا ما احترم الثاني .. الثاني له الحق انه ما يسمع له او ما يسوي اللي هو يباه ..!

سكت علي ثواني وهو يمسح بيده على ويهه .. عقبها خذ نفس ورد صد صوب ولده .. اما موزه هزت راسها بـ اسى وسارت صوب المطبخ ..

علي: انا آسف ..
هامل حط ريل ع ريل: اوكي الحين نحن متفقين .. يلا اتفضل حضره الوالد ..
علي: صار لك كمن يوم ف بيت يدك ..!
هامل: 3 الى 4 ايام ..!
علي: وبـ أمر منو ..!
هامل: امايه..
علي: امك ماعندها خبر ..
هامل سكت وهو فاتح عيونه: ازقرها خلني اسالها وعقب بنحكم ..!
علي: انزين " وهو يصرخ " موووزه ..
موزه يايه بـ صينيه تحظن كاسين عصير: من كبر الشقه يعني تباغم جذه ..!
هامل: هيه والله وايد صغيره ابويه شرايك تأجر الشقه اللي حذالنا وتفتحهم على بعض .. انا مضايج جذه
موزه: وانته اتقر ف البيت عشان اتحس بالضيج
هامل: اماايه مب انتي اللي قايلتلي برايك .. بات بيت يدك ..!
موزه: لا حشى عليه ..
هامل فتح عينه: اماايه .. خالي هزاع اتصل بج وخبرج .. وانتي وافقتي ..
موزه: والله ولا ادري عن خالك هاليومين
هامل سكت ثواني: اعترفو .. منو فيكم الجذاب ..
علي كفخه بالكوشن: اتادب وارمس عدل ..
هامل: والله هوووووو من يومين يقول لي انا اتصلت بـ امك وخبرتها وهي وافقت ..
موزه: هيه هو اتصل بي وخبرني عن اليومين اللي طافو .. بس انا ارمس عن البارحه واللي قبله
هامل: امم من عندي ..!
علي: تباني الحين اسبوع كامل ماخليك اتسير هناك .. واجبرك اتسير عند عيال عمك ..!
هامل: خييبه .. لهـ الدرجه الذنب اللي ارتكبته كبير .. عشان تعاقبني بهالعقاب البذئ ..
موزه: بذيء تنقال للألفاظ اللي مب زينه .. مب للعقاب ..
هامل: اللي هوووو .. عيل ما تسمعين ريلج ب شو يهددني .. الله يسامحك والله .. عقابك هذا يحرضني اني اكون ابو مول مب زين حق عيالي .. يعني اسوي بهم نفس اللي تسويه فيني ..
علي: اشرب العصير وانته ساكت .. ولا تتفلسف وايد
هامل: سديت نفسي مابا اشرب شي ..
علي: لا تسوي عمرك بريئ .. ماتكسر الخاطر ..
هامل: وين رابعه وناعمه ..!
علي: راقدات .. عيل شراتك انته اتهيت من بيت لـ بيت
هامل: اي بيييت لـ  بيت .. الا بيت يدي .. احوط من حجره لـ حجره .. حجره تستقبلني وحجرتين .. يطردوني منهن ..!
علي: دوااك..
هامل: ابو شريير
موزه: ما تبون تتعشون ..!
هامل: انا اتعشيت هناك ..
موزه: عيل خلص وسر ارقد ..
هامل: شنطتي ف السياره ..
موزه: وشحقى يايب ثيابك بعد .. جان خليتهم هناك بيغسلولك اياهم حق المره اليايه ..
علي: اي المره اليايه .. والله اسبوووع ما يرقد هناك ..
هامل: خيييييييبه ..
علي : يلا خلص وسر ارقد
موزه: يالله انتو الثنينه صدعتونا .. صخو بتوعون البنات ..
هامل وقف: والله بسير ارقد وانا شال بخاطريه ..
علي: انا اللي شال بخاطريه عليك وزعلان منك بعد ..
هامل: انا مازعلتك ..
علي: صار لك اربع ايام ما تدري عنا .. وفوق هذا مب مستاذن واتقول لي ما زعلتك ..!
هامل: انته تعرف اني احب اتم هناك اكثر من يلستي ف البيت ..
علي: مضايج من الشقه ..!
هامل: كنت مضايج بس الحين عادي .. تغير مزاجي ف بيت قوم يدي ..
علي: انا ما اعارضك .. بتبات هناك برايك .. بس استاذن .. مب اتصل بك ما ترد عليه ..
هامل: انزين انا آسف ..
علي: بس انزين .. وايد لا تعتذر..
هامل: انته زعلان " سار صوبه وهو يبوسه ع راسه " والله آسف ..
علي: قلت لك خلاص
هامل باس راسه: يعني رضيت
علي: شوو تقبل الحجر الاسود انته ..
هامل: حجر بطيخ هذا .. كجل ويقول لي الحجر الاسود ..
علي ضحك وهو يضربه: سر سر ارررقد ..
هامل: انزين بس بقول شي اخير ..
موزه: هامل ..!!
هامل: والله شي مهم ..
علي: قول ..
هامل: اللي ف السياره شنطه كتبي .. مب شنطه ثيابي .. امويز اتفائلت اني يايب ثيابي وبستقر عندها خلاص .. ما عليك امر بو هامل .. سر يبها لان انته الصبح عادي اتسوي لي طاف واتسير الدوام .. وطبعا انا برد ارقد اذا شنطتي وصلت دوامك  ..
موزه: والله اوديك لين دوامه اتشلها ..
هامل: لا اله الا الله ..
علي: ههههه الحين بسير ايبها سر ارقد ..
هامل: ما تامروني بشي ..!
موزه: سلامتك ..
هامل اجدم من امه وهو لاوي عليها: صدق ..!
موزه: انته خاطرك ف شي ..!
هامل: رضاكم ..!
موزه: قلبي راضي عليك دنيا واخره ..
هامل ابتسم وهو يبوسها ع راسها: فديتج امايه .. ياريت غيرج يتعلم ..

ضحك علي وهو يفره بالمخده ..

علي: وانا اقدر ازعل من اعز واقرب صديق لي ..
هامل: احلف اني اعز واقرب صديق لك ..!
علي: اتشك يعني ..!
هامل: من فتره وانته امجابل دوامك وربعك ولا تدري عني ..
علي: بس هذا مب معناته اني ناسي بـ انك اغلا ربعي .. او اني رابعت غيرك ونسيتك ..
هامل: يعني ماتحب دوامك كثري ..!
علي: تمزح انته ..! اتشبه دوام عقب كم سنه بتقاعد منه او بغيره .. ب ولديه وقطعه من قلبي ..!!

سحب ايده عن امه وهو ساير صوب ابوه ويحظه ..

هامل: الحييين استويت علي اللي اعرفه ..
علي ابتسم: مب ناوي ترقد ..!
هامل: ساير ساير .. يلا تصبحون على خير ..
موزه: وانته من هل الخير حبيبي ..

مشى هامل عنهم وهو ساير صوب حجرته .. اكبر عيالهم .. واقرب واحد لروحهم .. عقله بالنسبه لسنه كبير .. ولكن مع ذلك .. شي بداخله مب مستغني عن الطفوله اللي تجاري سنه ..

..

بالباجر الصبح

في زاويه بعيده عن حشره المدينه ... هناك بـ آخر اطراف دبي .. عالم مزدحم بـ ناس .. مختلفين بـ زحمتهم عن اي ناس ثانيين .. اعمار مختلفه .. تتزاحم ف هالمكان .. رغبه منها .. بـ انها تملي قلبها بعلم فرضه رب العالمين على خلقه وعبيده ..!

عشان تكسب العلم .. وتكسب الاجر باخلاص نيتها لربها سبحانه وتعالى ..

بالضبط .. صوب المدينه الجامعيه .. اللي تحظن جامعتي وجامعه بنات شلتي .. اقصد بنات اسرتي اللي انسى انهن اهلي كثر ماحب اني اعتبرهن صديقاتي يوم اخترش معاهن ف الجامعه ..


فتحت باب المصلى اللي احتليناه وسميناه باسمنا .. وانا ناسيه مخي ف البيت .. كـ عادتي كل صبح .. اذا كان دوامي الساعه 8 محد يجرا يرمسني او يعق عليه كلمه اتغثني عشان ما تظرب فيوزاتي وابدا اظارب وياهم بنظراتي اللي ما يتحملها بشر ..!

دخلت .. حطيت نعالي عند بدايه الزوليه .. و ع الطاوله اللي ع يميني .. حطيت اغراضي بكل ادب وترتيب..

امبين اليدار والطاوله .. زاويه تكفي لـ شخص واحد فقط .. احتلتها وحده انجوفها بين فتره وفتره ف هالمكان .. لكننا لين اليوم ما تعرفنا عليها .. رغم اني ماعتقد في حد يدخل هالمكان .. و ما يعرف عنا ..!


عواش: حسبنا الله سيؤتينا الله من فضله ورسوله .. انا الى الله راغبون
غاليه: وعليج السلام والرحمه ..

شفتها بطرف عيني .. وبدون ما ارد عليها مشيت لين اخر الزاويه ويلست ..

غاليه: وابويه وابويه .. عطتني النظره القاتله مالتها ..
مزنه: سكتي عنها .. لاتقتلج صدق الحينه ..
غاليه: امسات عيل دوام شيوووخ .. واليوم يايه جنج خطيب المسجد اللي ورا بيتنا ..
عواش بتذمر: خطيب شو ..
غاليه: آلمسـجد .. المسجد ..
عواش: والله ترمسين جنج عيوز ..  
غاليه: 15 سنه مجابله يدووه .. عقب ما توفت تبيني اخون فيها وما ارمس شراتها ..!
عواش: انا مب مقهوووره ع رمستج البايخه .. انا مقهووره ع تاريخ الميلاد اللي جمعني فييج ..
غاليه :والله يعني انتي ما تحبيني ..!
عواش: ماقلت لج ماحبج .. غلوي استوعبي الرمسه صح ولو مره ف حياتج ..
غاليه: حشى حشى .. جبريييت مداوم مب عواش ..
مزنه: وين سلامه ..!
عواش: الهرمه دوامها 11
غاليه: وجيه اتسبينها ..!
عواش يايه تيلس: غلوووي صخي عني .. والله مخي مب ف راسي .. يعني لو سويت بج شي محد بيحاسبني ..!
مزنه: تعالي تعالي يلسي حذالي ..
عواش: مب متفيجه حق السوالف ..
مزنه: تعالي انتي اباج ف كلمه راس ..

يلست حذالها .. وحطيت راسي ع جتفها وانا مسكره عيوني بدون ما اعبر نغزاتها وحركه جتفها اللي حاولت اتوعيني بها ..

عواش: بلاااااااج ..
مزنه: وانتي ماصدقنا افتكينا من اختج اللي كل ما اتيي المصلى ترقد .. اتنشين انتي تقتبسين دورها..  غاليه: عاد اختها ظاربه الرقم القياسي ف الرقاد ..
عواش: مايخصكن ف اختيه ..
مزنه: والله .. اسير الكلاس راقده .. ارد من الكلاس راقده .. اول الصبح راقده .. اخر الدوام راقده .. حتى ف الكلاس ترقد..
عواش: عنج عاد والله انتي اللي ترقدين ف الكلاس ..نحن ما نرقد  
غاليه: هاي اتسافر ف الكلاس ..
مزنه: وانتي شو اتسوين ..
غاليه: انا اغطي ويهي بالدفتر .. وارقد ..
عواش: هههههههه حلفي انتي بس ..
غاليه: والله .. اسير المكتبه .. ادور دفتر قياس ويهي بس عشان احطه ع ويهي .. وارقد ..
عواش: بارك الله فيج .. وساكتين عنج بعد ..!
غاليه: والله ابلواتي ما يصدقن اني احضر الكلاس ..
عواش: منو اللي ما يصدقن ..!
غاليه: ابلوااتي ..!
عواش:والله هـ الجامعه ما تنلام اذا راغتج .. صار لج 3 سنين يالظالمه ولين الحين ما تعرفين الفرق بين ابله ومس ..!
غاليه: ليش شو الفرق ..
عواش: نفس الفرق اللي بين المدرسه والجامعه ..
غاليه عقدت حياتها: هاي شو اتقول ..!
مزنه: عوااش خلج من هـ الخديه .. ويلسي جوفي هالفلم ... شو رايج فيه ..
عواش: مب متفيجه اتابع شي مزنوووه ..
مزنه: انتي جووفي ولا تتفلسفين ..!

فتحت عيني وانا ادور بوستر للفلم او اي تريلر بس كل اللي جفته صفحه وورد مكتوب فيها بصبوع مزنه"بقولكن شي"
غاليه بصوت عالي: قولي
مزنه كتبت: غربلات بليسج صخي .. مول ما حست البنيه اننا نرمس عنها ..
غاليه بهمس: بعدنا ما رمسنا عنها انزين .. ولا درينا اننا بنرمس عنها ..
مزنه: سمعن ..
غاليه: الحين نسمع والا نقرا ..!
مزنه: هاااااااااااااااااي اللي جداااااامكن ..
عواش: بلاها ..
مزنه: هي اللي خاطبنها سعود ..
غاليه بصوت عالي: اوووونه .. جذابه .. حلفي بربج .. منو قالج ..!


بلعت ريجي وانا صاده الصوب الثاني ادور مبايلي .. رغم اني ما احتايه .. ورغم انه كان ف حظني اصلا .. بس نظرا للموقف اللي حطتنا فيه غاليه .. اضطريت أألف لي اي جذبه عشان البنيه اللي متاكده اننا نرمس عنها .. ما تشك ف شي ..

وقفت .. ومشت صوب الباب .. ثبتت عمرها باليدار وهي تلبس نعالها .. وبنفس الوقت اتبطل الباب .. ودخلت شوق ..

شوق: السلام عليكم ..
الكل: وعليكم السلام ..
غاليه نشت: وااااااااااااااااااي فدييييييييييت العروووووس انا ...

وحظنتها ..

مزنه بدت ادق ع الطاوله : وسرااااااا الليل يا العاااشقييين ..
عواش: الله يغربل اغانيج  .. صخي فضحتينا ..
غاليه: فدييييتج والله .. الحمدلله ع السلامه شوقوووه
شوق: الله يسلمج غاليه ..
مزنه: مبروووك مبروووك " ورفعت أيدها" عقبالي ياااااااااااااارب
عواش: هالانسانه مستخفه " وحظنت شوق" الحمدلله ع السلامه حبيبتيييه ..
شوق: الله يسلمج عواش .. عقبالكن ياااارب ..
غاليه: آمييييييين
مزنه:الحين يوم قلت عقبالي .. طلعت مستخفه .. لاني ادور رزقي .. وهالهنتين اللي وحدن الدعاء مش مستخفات ..
عواش: كلكن مستخفات اصلا .. يلا انثبرن

مسكتها من اديها وانا اسحبها وراي .. بس وقفت شوق .. سحبت أيدها عني وهي رافضه انها تجدم ..!

شوق: لحظه لحظه .. اففف خلني اسلم ع البنيه ..
مزنه: ولا تقل لهما اف ..
شوق: لا والله ..! " وصدت صوب اللي معتكفه ف البقعه" شخبارج  
مها مبتسمه: بخير الحمدلله .. انتي اشحالج ..!
شوق: يسرج الحال فديتج .. شو كلاس ..!
مها: لا .. بسير اتغدا .. ربيعتيه تترياني ف الكانتين ..
شوق: اوكي عيل .. خلينا انشوفج .. منزرعات نحن هني 24 ساعه
مها: ان شاء الله .. مع السلامه
شوق: مع السلامه

طلعت مها .. وصدت شوق صوبنا ..  

مزنه: البنيه مستحيل اطب هالمكان مره ثانيه ..
شوق: ليش .. وايد حشرتن الدنيا ..!
عواش: اي حشرنا الدنيا .. جمله كامله اتوزعت كلماتها ع يبهتنا نحن الثلاثه " اشرت على غاليه" نحن " اشرت على مزنه" نرمس" اشرت على عمرها" عنج ..
شوق: غربلاات بليسكن ..
مزنه: هاااي الهبله .. فضحتنا .. نحن نكتب ع الوورد اللي نبا انقوله .. وهي اترد علينا بصوت عالي .. لين ما تاكدت البنيه اننا نرمس عنها ..
عواش: شكلها كانت شاكه ان نقرب حق سعود .. و يوم شوق قالت لها ان نحن هني دوم .. تاكدت ..
غاليه: بس اتصدقين حليوه الهرمه ..
عواش: وجيه اتسبينها ..!
غاليه: ماداني اللي احلى عني ..
عواش: هههههههه والله انتي مب صاحيه
شوق: ماعليكن منها زيين .. شخباركن .. وشخبار الدراسه ..
مزنه: نحن بخير .. بس الدراسه لا تسألينا عنها ..
عواش: تدرين نحن رادات الجامعه عقب عرسج ومخنا بعده مرتبش .. مول ماكان لنا مزاج ندرس ..
غاليه: جيه يهمها هي .. تظرب خط لين الجامعه عشان كلاس واحد ف الاسبوع ولا بعد يوم الخميس .. وحضرتها سافرت اسبوعين وحطولها ابسنت مرتين بس .. مب نحن اني الجامعه ونحظر الكلاس عقب خمس دقايق .. والابسنت ناقع..
مزنه: عاد انتي بالذات مالج حق تتحرطمين .. اتيي الجامعه وتنسى اوقات كلاساتها .. بس تيلس هني حق الضحك والسوالف ..
عواش: بسم الله عليج انتي عاد .. مول مب شراتها ..
مزنه: لا يعني انا مهتمه شوي ..
عواش: امبين الاهتمام من الدفتر اللي اتيبنه ..
شوق: مزنوه اتييب دفتر .. اشك والله  
عواش: والله ما اتييب غير لابتوبها عشان اتابع افلامها التعيسه .. ويوم تتوهق .. اتي تاخذ دفتري .. تخيلي انتي بس .. دفتر واحد مشترك بين هنتين .. حق كل موادهن
مزنه: انزين الله يبارك ف العمل الجماعي ..
شوق: ههههههه من زمااااااااااان عنكن ويا ويوهكن ..
غاليه: قولي انتي هـ الطمه ما ردت عليكم ..
عواش: يا الله يا غاااليه .. حاقده ع البنيه من الخاطر ..
غاليه: ماتقبلها ..
مزنه: عاد خذ رايج هو ..
غاليه: هي حلوه .. بس ما تدخل الخاطر .. احسها خبيثه ..
عواش: خيبه .. بس صخي صخي .. لا ترمسين عن البنيه..
غاليه: انزين قولي ما ردو عليكم ..
شوق: مادري والله .. ما سرت بيت ابويه عشان اعرف اخر اخبارهم
غاليه: الحين انتي يايه الجامعه قبل ما اتسيرين بيت ابوج ..!
مزنه: اصلا الجامعه هي بيتنا الاول .. وبيتنا مجرد فندق .. حق الرقاد .. وريوق الصبح ..
عواش: هيه والله اهم شي ريوق الصبح .. والله اشتقت حق ريوق بيتنا..
مزنه: انتي اداومين يوم واحد ف الاسبوع الساعه 8 ومحتشره ..! عيل نحن شو انقول ..
عواش: يووميين يالظالمه يومين .. من 8 لين 4 العصر .. الله يغربل جداولهم ..
مزنه: العلم جهاااد ..
عواش: والله ما حسيت انه جهاد صدق .. الا عقب ما دخلت هـ الجامعه ..
شوق: فكني من طاري الجامعه الحين .. وقوووولن شو اخر اخباركن ..
مزنه: آخر اخبارنا .. وحده مالجه .. وحده بتعرس عقب شهرين .. ووحده هالاسبوع بييون يخطبونها ..
شوق: وانتي ماعندج غير سوالف الزواج ..!
مزنه: عيل حق شو انخلقنا نحن ..
عواش: عشان تدرسين يا حظييي ..!
مزنه: مابا ادرس .. انا اباااااااااااا اعرس ..!
غاليه: فكيينا زيين من هـ الطاري .. هذي وحده جدامج .. مستانسه انها معرسه .. عطيها شهر وبتي هني اتصيح واتسب ريلها ..
شوق: هههههههههههه ف راااااااااسج يالهرمه ..!
عواش: عووذ بالله شو هـ الفال .. بسم الله ع بنت عمي .. يلا يلسن وفكنا من صدعتتتكن

مسكت ايد شوق ومشيت وياها صوب الزاويه اللي مبعثرين فيها اغراضنا .. هـ المكان قمه فالفوضى .. والفضل طبعا .. وبلا شك .. يرجع لنا..!


..

من بعد ما فرضت قسوتها علينا وهي متمركزه بشكل عمودي ع سطح البقعه اللي انعيش بها .. سحبت الشمس نفسها لزاويه معينه .. عشان تريح نفوس .. كساها تعب الدوام وسيطر ع نفسها .. وترسم على ويووه اصحابها فرحه انتهاء يوم عملي مهما كان خفيف .. الا انه ما يخلو من التعب ..!

الا شخص واحد ..

حاط ريل على ريل .. وكل شوي يسحب فونه عن الطاوله يجييك الساعه ويرد يفره وهو متنرفز ..

يابر وقف: امايه بتحطون الغدا والا اسير ارقد ..
جواهر: لا اله الا الله .. انته شو يايبنك اليوم من وقت .. ماقلت بتتاخر ف الكليه ..
يابر: يعني شو ما تبيني اتغدا ف البيت ..
جواهر: تبا تتغدا اصبر لين ما يخلصون الغدا .. حاشر الدنيا من الصبح جنك من سنه مب متغدي ..!
يابر: والله يوعان وفيا ارقاد .. اذا بيتاخر الغدا قولولي اذلف وبذلف .. مب مخليني ساعه يالس هني وانتو اتقولون لي اصبر واصبر ..
سعود: ثرك مأجور ع الصبر .. مب محاسب عليه عشان تتحرطم ..!  
يابر: استغفر الله العظيم ..
سعود: اعتبر نفسك صايم ..
يابر وقف: لو صايم .. جان سرت رقدت مب يالس هني من الصبح .. والله العظيم لوعتو جبدي ..

وسار عنهم

سعود: روح روووح .. خلهم سلاطين النوم يتفاهمون مع فيوزاتك الظاربه .. نحن ما نعرف نتعامل معاهم  
جواهر: وانته جيه اتغثه ..!
سعود: اييه .. خله يزعل ويدق راسه ف الطوفه بعد .. ما تعرفين يابر وعناده انتي بعد ..!
جواهر رفعت حياتها: اتادب وارمس عدل
سعود: ما ردو عليج ..!
جواهر: امنو ..!
سعود: اقصد ما ردو علينا ..!
جواهر يلست: لا ماردو علينا..
سعود: هذيييل جنهم مصخوها ..
جواهر: قلنا لك خذ وحده من الاهل .. ساير عند الغريبه .. اصبر الحينه بعدك ف اول المشوار ما جفت منها شي ..!
سعود: القلب وما يهواااااااااااااااااااااا يا امييييييييييه ..
جواهر: ويديييه سعود .. اتكلمها انته ..!
سعود: من زمان .. ومتفق وياها ع الزواج بعد .. والحين يوم الله يسر .. خطبتها ..
جواهر: يا اللي ما تستحي على ويهك .. سودت ويهنا جدام العرب ..
سعود: اي سواد ويه هاللي ترمسين عنه.. ثرررج مال اول انتي ..! ابويه الحين كل واحد يخطب لـ نفسه ..
جواهر: و منو فيكم خطب الثاني ان شاء الله  .. انته اللي خطبتها والا هي اللي خطبتك ..!
سعود: طبعا انا .. ما اجوفيني اتريا ردها من شهر ..
جواهر: ما كملنا شهر بعدنا ..!
سعود: يعني ناويه اتعلقين الموضوع شهر ..
جواهر: وانا شو يخصني .. اتصل بها يوم انك اتكلمها واسألها عن رايها ..!
سعود: وانتي صدقتي اني اكلمها ..!
جواهر: ادري بك ما اتسويها ..
سعود: اكييد .. تربيه سهيل طال عمرج ..

جواهر صدت صوبه وعطته نظره بدون ما ترمس ..

سعود: وتربيتج انتي بعد بلا شك .. بس يعني امايه يوم الناس يخطبون .. بديهيا متى يردون عليهم اهل العروس ..!
جواهر: يوم توافق العروس ..
سعود: اقولج اموافقه ..
جواهر: وشو اللي يخليك تتاكد انها موافقه ..!
سعود: قصورها ترفضني ..!
جواهر: ثرك انته اللي ميت عليها .. هي مب متخبله ع ويهك الخسف ..!
سعود: انا خسف ..!
جواهر: اي شخص يتكبر ع الناس يعتبر خسف ..
سعود: انتي محد مسمم افكارج غير الكتب اللي تقرينها ..
جواهر: والله محد اللي مخه متسمم من الكتب غيرك .. جان طلعت على اخوانك .. يقرولهم اشيا مفيده .. انته ماغير ماسك لي كتاب ممو زين ومجنون ليلى ..
سعود: مجنوووون مها يا اميييه .. مجنونها ..!
جواهر: سعود انته تعرفها ..!
سعود: لا والله ماعرفها ..
جواهر: ماتعرفها وعاشقنها جذه ..! وبكل قوه عين اتقول لي احبها ..
سعود: انا بس جفتها مرتين يمكن .. بس خبلت بي يا اميه .. ماحسها بشر ..
جواهر: عنبوووك اسسستح شوي .. امك انا ..
سعود: عادي يابوي .. انتي مثل اربيعتي ..
جواهر: ليش عندك اربيعات انته عشان تشبهني بهن ..!
سعود: وانتي اليوم يالستلي بالمرصاد .. كل ما قلت كلمه اعربتيلي اياها بـ نيه شينه  
جواهر: تعرف اخلاقها ..!
سعود: بما انها اخت مانع وحامد وفيصل .. ف انا متاكد من اخلاقها ..
جواهر: الشيره المستقيمه .. لابد ان ينبت بها غصن مايل
سعود: يمكن اكون انا الغصن المايل ف الشيره المستقيمه .. اما هي .. مستحيل ..
جواهر: والله محد المايل غير اخوك العوي .. اللي مد البوز وسار يرقد ..
سعود: يابر مستحيل يرقد وهو يوعان .. تلقينه سار عند ربعه اللي يجوفونه وما يجوفهم .. عشان يهدونه شوي ..
جواهر: حسبي الله على شرك ..
سعود: خلي شري ف حاله .. وجاوبيني .. متى يعني بيردون علينا ..
جواهر: انته ما كلت قلبي ..!
سعود: ما وصلت لمرحله اليوع اللي وصلها يابر .. والا جان لحست مخج بعد ..
جواهر: جان على مخي .. ف انته لحسته وخلصت ..!
سعود شل البطاقه : شو هذا ..
جواهر: بطاقه تعبئه رصيد ..
سعود: ههههههههههه امايه .. لا عاااد .. مب لهالدرجه ماثره فيج اللغه العربيه .. بطاقه تعبئه رصيد عاااد..!
جواهر: يعني شو اجوووف انته بطاقه عرررس ..!
سعود: عرس امنو ..!
جواهر: بنت اخو ام احمد ..
سعود: ثرني عرفت احمد عشان اعرف امه وبنت اخوها ..!
جواهر: ويوم انك ما تعرفهم .. شحقى متعني وشال البطاقه وتسأل ..!
سعود: قلت يمكن اعرف حد .. وماعازمني .. عاد يرضيج اتفوتني الذبيحه ..!
جواهر: سر ازقر اخوك اللي بيفوّت هـ الذبيحه ..
سعود: ليش شو غدانا ..!
جواهر: برياني ..
سعود سكت شويه: يعني انتي اليوم بتسيرين هـ العرس ..!
جواهر: اختك ردت من السفر .. اذا ما مرتنا اليوم .. ف بسير ..
سعود: واذا مرتنا ..!
جواهر: بيلس وياها شوي وعقب بسير ..
سعود: يعني ف كلا الحالتين بتسيرين ..!
جواهر: الحرمه عازمتني ما تبوني اوجبها بعد ..!
سعود: انتي ماشاء الله عليج .. اموجبه نص الشعب .. باجر يوم بعرس مب تزعمينهم كلهم .. انا ماعندي بيزات ..!
جواهر: يعني يعزموني على اعراس عيالهم وما تباني اعزمهم على عرس ولديه ..!
سعود: عندج شي طلعيه ف عرس هزاع .. انا مب نشاد عن الدوله اللي ماسستنها انتي من صديقاتج
جواهر: استح ع ويهك زيين ..
سعود: ياخي كيفي .. حلالي وراااتبي اللي ميمعنه من سنيين  .. ماباهم يتعشون على حسابي
جواهر: زيين ميزانيه اربيعاتيه بخلي ابوك يدفعها ..
سعود: ماشي ماشي .. يلا عقب يحسدون جمال حرمتيه ..
جواهر: روووح زيين انته وحرمتك فوقك .. خلها توافق قبل .. عقب اتفلسف وقول حرمتيه وجمال حرمتيه ..!
سعود: بذمتج مب حلوه ..!
جواهر: حلوووه حلووه .. بس فكنا وسر بدل وازقر اخوك .. يلا بنتغدا ..!
سعود: جوفي .. انا بسير ازقره عشان ما تنكتب لي سيئه بـ عصياني لامرج .. بس اذا سمعتي حشرتنا عقب شوي .. تتحملين اللي يستوي .. والله اذا عاند واستهبل ع مخي .. ما بيجوف غير كف محول له المناظر اللي حوله لـ صواريخ عقب ما يفتر راسه ..
جواهر: خيبه اتخييب ابليس .. مخطط بعد ..
سعود: كييفج والله انتي وولدج السخيييييييف ..
جواهر: خلك عاقل ولو مره وحده ولا تتظارب وياه ..
سعود: اتحمل كل شي الا عناده ..!
جواهر: يعني تجبرني اصعد فوق ..!
سعود: هذو هزاع وصل .. وكليه المهمه ..
هزاع: السلام عليكم ..
جواهر+سعود: وعليكم السلام ..!
هزاع: مهمه شو ..!
سعود: سر ازقر يابر .. الغدا اتاخر عليه .. عصب وسار فوق ..
هزاع: لا حشى عليه .. انا ما اعرف اتعامل ويا مخه يوم يشوط ..!
سعود: جفتي امايه .. حتى هزاع اعقلنا .. ما يقدر على مخ يابر العنيد ..
جواهر: هذا اعقلكم ..!
هزاع: وانته ليش ما اتسير ..!
سعود: انا معرس ..
هزاع: وافقو عليك..!
سعود: بيوافقون ان شاء الله ..
هزاع: عيل لا تتفلسف وايد وسر له ..!
سعود: والله انا بيوافقون عليه ان شاء الله .. بملج الحين وبعرس ف اجرب اجازه اما انته من نيتك السوده.. عرسك اتاجل لـ ظروف غامضه الى اجل غير مسمى .. يعني لو ويهك ينفلع ماعندك مشكله..
هزاع: وازفك وانا بنص ويه ..! يرضيك ..!
سعود: في سبيل انك اتوعي يابر عوضا عني .. ف هيه والله يرضيني ..!
هزاع: ههههههههههه والله انك هرم ..
جواهر: لحظه لحظه .. عرسه اتاجل لـ ظروف غامضه ..! جيه تاجل ونحن ما عندنا خبر .. وشو هـ الظروف الغامضه هاي اللي خلته ياجل العرس لـ اجل غير مسمى ..!

سكت سعود اللي حس انه وهق اخوه .. وسكت اخوه اللي توه استوعب ان النقاش هذا يدور بوجود امهم..!

سعود: والله .. الأجل والاعمار بيد الله .. يعني كل شي قضاء وقدر والواحد لازم يرضى بالمكتوب ..
جواهر: اي قضاء واي قدر واي مكتوب ..! ارمسو انتو الثنينه .. شو اللي مستوي من وراي وانا آخر من يعلم..
سعود: لو لساني الفالت ما فضحهم .. ف كنتي بتكونين رابع من يعلم .. عقب هزاع وسلامه وانا طبعا ..
جواهر: السالفه فيها سلامه يعني ..!
سعود: اكيد .. يعني عرسها ف شي طبيعي انها بتعرف بموضوع التاجيل ..
جواهر: عسى ما تكون هي سبب التاجيل بس ..!

خذ هزاع نفس وهو ساكت .. وعقبها مشى عنهم وسار فوق ..

جواهر: وانا كل ما كلمته ويبت طاريها .. بوز وعطاني ظهره وسار ..
سعود: امايه خفي عليه الله يخليج ..
جواهر: وانا شو مستوبه عشان اخف عليه ..!
سعود: الريال يحب حرمته ومرتاح معاها .. وهذا اهم شي .. والا انتي ما تحبين اجوفينه مرتاح ..
جواهر: مرتاح مع وحده ممكن اتريحه .. مب وحده زايده عليه الهم ..
سعود: والله الزواج بكبره هم .. انا اللي بس خاطب واحس اني مهمووووم .. آآآه يا اميه .. شال هم موافقتها او رفضها ..
جواهر: قم قم عن ويهي انته واخوووك .. مأجلين العرس ومخبرين الكل .. وانا ولا جني امهم ..!
سعود: ام منو بالضبط .. ثرني بريئ من هالموضوع ف رجاء لا تشمليني ..
جواهر: اتصل ب اختك قولها يا اتي من وقت او ما اتي لاني بسير العرس .. الواحد ما يقدر يتنفس وياكم انتو .. اسير اجوف حياتي برع البيت وايد ابرك  ..!

وسارت عنه .. يلس سعود ع الكنبه وهو رافع راسه فوق .. ومغمض عيونه .. وعقبها خذ نفس ..

سعود: يالله .. عصبت العيووووز .. اذا شوق اللي مب جايفتنها من اسبوعين وراغتها قبل ما اتيي .. عيل شو بتسوي عقب اذا جافت هزاع " وقف " كالعاده .. مجزره ثانيه ضحيتها سلامه .. الله يعينها بس

صعد الدري .. وسار صوب حجرته .. وهو يتحرطم بينه وبين نفسه ..!

..

يوم الخميس ... هو احلى يوم بحياه اي شخص يعاني من ضغط الدراسه او العمل .. لكن بالنسبه للاشخاص اللي تجبرهم دراستهم وظروف عملهم انهم ما يلتقون بـ اهلهم الا ف هـ اليوم ..

ف يوم الخميس يعتبر لهم .. يوم لـ تتويج تعبهم .. بـ راحه تكسو قلبهم وتهدي بالهم وتجمعهم بـ اهلهم ..

وصل فيصل بيتهم.. وقبل ما يسير صوب حجرته يريح او يبدل .. وقف ف نص الصاله وعيونه ادور ع الملامح الوحيده ب هـ الكون .. اللي تغذيه السعاده .. من روحها ..!


فيصل : ولا جني آدمي منهم وفيهم ..حي الله بن آدم مخلوق من طين .. من حمأ مسنون "وصرخ" اماااااااايه
ام سيف: تعال تعال .. ف الحجره نحن ..

سار فيصل صوب الحجره وهو مبتسم .. ويوم طاحت عينه بـ عين امه .. اجدم منها وحظنها ..


فيصل: السلام عليكم يا عيووون فيصل ..
ام سيف: وعليكم السلام.. تعال حبيبي ..
بو سيف: تدري انك ضيعه ثلاثين حسنه ..
فيصل: لاني ما قلت لك ياعيون فيصل ..!
بو سيف: ههههههههه لانك ما كملت السلام  ..!
فيصل سار صوبه: شحالك ..!
بو سيف: يسرك الحال ابويه .. انته شحالك .. وشو الدراسه..
فيصل: الحمدلله .. كلنا امكملين بعض ..
بوسيف: معرسنها انته ..!
فيصل: وبخلف منها بعد ..
بو سيف: عوذ بالله منك ..
فيصل: هههههههه تعرف يوم انك تسوي شي يهد حيلك .. بس لانك اتحبه ..
بو سيف: الله يوفجك ان شاء الله .. واييسر لك امرك ..
فيصل: آميييين ..!
ام سيف: يوعان والا ماكل شي ف الدرب ..!
فيصل: لا والله ميت من اليوع .. وقفت عند محطه وحده فوّلت الموتر .. وسيدا شخطت لـ دبي ..
ام سيف: وليش هـ التهور ..
فيصل: هذا يسمووونه شوووق شوووق يا ام سيف ..!
ام سيف: الشوق هذا "واشرت ع صدرها" اما اللي انته اتسويه تهور وطيش .. يزيد اللي فيا

سكت فيصل عشان ما يكبر الموضوع ويجبر امه انها تذكر مواقف يتمنون انها تنساها حتى لو ماقدرت تنسى صاحبها .. لان روح صاحبها مستحيل تنسى ..

فيصل: بتغديني والا شو ..
بو سيف: وانته ما تعرف تتغدى روحك ..!
فيصل: والله اللقمه ما تنزل بدونها ..
يو سيف: يالعيار .. واسبوع كامل اتدح هناك ..
فيصل: بذمتك مب ضعفان ..
بو سيف: ضعفان والله ..
فيصل: عشان تعرف اني اكل بس عشان اسد رغبه اليوع اللي فيا .. بس الاكل ماله طعم بدووووون ام سيف ..
ام سيف: طوف طوف انته بياع رمسه اخس عن الحريم ..
فيصل: افا ..
ام سيف: يا فيصل امش وفكني ..

مشى فيصل وياها ساير صوب المطبخ.. 

فيصل: ليش معصبه ..
ام سيف: تدري ان اربيعكم خطب اختك ..
فيصل: اربيعي اللي مافيه مخ ..!
ام سيف: ليش ..!
فيصل: حد يخطب هاي ..!!!
ام سيف: وبعدين معاك انته .. كم مره قايلتلك لا ترمس عن اختك جذه ..
فيصل: انا ماصدق انها اختيه الا يوم انتي اتقولين اختك .. لانج شهدتي ع ولادتنا نحن الثنينه ..
ام سيف عقدت حياتها: شهدت على ولادتكم ..!
فيصل: والله سعود طيب وفنان وحبوب .. وفوق كل هذا دمه خفيف ..اما بنتج مافيها حرف من الحروف اللي ذكرتها ف صفات سعود ..
ام سيف: ليش حاقد عليها ..!
فيصل: مب حاقد عليها .. اختيه واتمنى لها الخير .. بس هو بعد اربيعي .. واعرفه اعدل .. ف متاكد ان مش مها الزوجه المناسبه له ..!
ام سيف: والطيبون للطيبات ..
فيصل: مها مب طيبه للدرجه اللي تخليج تغترين بها ..
ام سيف: ولا لئيمه للدرجه اللي تخليك تحقد عليها ..
فيصل: امايه والله مب حاقد عليها .. بس شخصياتهم مختلفه تماما .. لا هي تناسبه ولا هو يناسبها ..
ام سيف: اللي فيه الخير يجدمه رب العالمين ..
فيصل: ماردت عليكم ..!
ام سيف: مابا اضغط عليها .. خلها اتفكر ع راحتها ..!
فيصل يلس ع الكبت: ان شاء الله ما توافق ..
ام سيف:يالله يا فصيل .. !!
فيصل: ايي الرفض منها .. ولا ايي منه باجر عقب ما يكتشف شخصيتها ..
ام سيف: انته ما يخصك فيهم .. خلاص خلهم ع راحتهم ..
فيصل: راحت شو بالضبط ..
ام سيف: اقصد لا تتدخل بموضوعهم .. هم مب يهال .. لا هو مجبور ياخذها ولا هي مجبوره تاخذه ..
فيصل: زين .. ان شاء الله يعرسون وايبون عيال .. وعقب اتييج مطلقه ..
ام سيف: عوذ بالله من هـ الفال .. شل غداك وقم عن ويهي ..
فيصل: والله انا ف المطبخ .. انتي اللي شلي بعمرج وشسمه ..
ام سيف رفعت حياتها: وشسمه..!
فيصل: ويعني .. خليني اتغدا .. والله الواحد ما يعرف يرتاح ف هـ البيت .. يا زينها العين ويا زين اهلها .. ثرني من الاسبوع الياي بتم هناك ما برد لكم .. يوم انكم جذه .. والله ..!
ام سيف: احسن .. عشان افتك من حنتك ..!
فيصل: بذمتج بتفتكين مني " سكت شويه" ع العموم سيري الميلس .. انا نسيت اخبرج ..!
ام سيف: اتخبرني ب شو ..!
فيصل: اخبرج انج اتسيرين الميلس ..
ام سيف: منو هناك ..!
فيصل: امايه انا يوم ايوع ماحب حد يكلمني وايد ..
ام سيف: مسووود العين انته واخوك .. والله ماعرفت اربيكم ..
فيصل: فديتج والله وفديت تربيتج اللي مب مقدرينها ..

بدون ما ترد عليه .. عطته ظهرها ومشت سايره صوب الميلس .. بكل هدوء وتعب .. فتحت الباب وهي تذكر ربها ..

جدمت ريلها اليمين .. وقبل ما تجدم اليسار ..


اتجدمت الزينه بكل طفوله عشان تحظن تجاعيد .. تشهد على قسوه الزمن ببدن صاحبها ..  
و ام سيف نزلت بـ مستواها .. عشان تحظن ملامح .. تشهد على روح ولدها اللي تبنض بـ داخل بنته ..

ابتسمت بـ الم وهي حاظنه الزينه اللي ابتسمت ب شغب وهي تطالع اخوها اللي واقف حذال عمها ..


وكأنها اتقول لـ اخوها .. انا اجدمت قبلك و حظيت بـ حظن ام اللي ما حظيت ف حياتي بـ حظنه ..!

ليست هناك تعليقات:

إرسال تعليق