فيصل: وين موتري
هند: صباح النور
فيصل: اي صباح الساعه 11
هند: وانته حتى فالتوقيت الزمني مب فالح
فيصل: هند فكيني وين موتري
هند: صناعية انا متصل تسألني عن سيارتك ؟
فيصل: اففف استغفر الله، الحين امس مب انتي زعلتي وخذتيه عني ورحتي
هند يلست عالشبريه: لالا،،، لا فديتك حسن ألفاظك، انته اللي زعلت وانته اللي نزلت منها وخليتني، شو تباني اسوي ان شاء الله في نص الشارع، اشغل لي موفي واقعد اترياك ترجع !
فيصل: ويين وديتيه
هند: وديتها القاعة
فيصل: اي قاعه
هند: قاعة العرس، اللي كملت 3 شهور وانا عاطتنك من وقتي وحياتي، ولين اليوم ماسألتني عن اسمها، عشان سيارتك اليوم ياي تسألني اي قاعة
فيصل: انتي اوووفر دراما ثرج، انا مب فاضي لج فكيني وعطيني اسمها خلني اسير اييب الموتر
هند: سكر سكر، حتى لو قلت لك مابتعرف الاسم، بطرش لك اللوكيشن ع الوتساب وان شاء الله اتضيع
هند: ولد عمج مب معترف ان الحين الصبح
نوره: هذا كل حياته ليل ويا امه وابوه وين بيعرف الصبح
هند: اما في هاي صدقتي، وينج
نوره: بمر المكتب عندي شغل
هند: امطوله ؟
نوره: لا، ربع ساعه، يمكن اقل بعد
هند: عيالج وياج ؟
نوره: ويكند اليوم ومحمد فالبيت
هند: محمد فهد، فالبيت! اليووم ؟؟
نوره: اتفضلي حسديه
هند: شو احسد فيه من زين روتينه، خلصي وانسير الكوفي شوي
نوره: شو عندج
هند: اختيه وابا ايلس وياها، لازم يكون عندي شي؟
نوره: انتي راسج مايفضى حبيبتيه
هند: خلج من راسي الحين انا روحي مب فاضيتله
نوره تضحك: تمام بيننا
هند: يلا باي
مايد: امايه وينها
مانع: امايه فاضيه حقك عشان اتي هني اتجابل ويهك
مايد: ليش ويهي شو فيه، انجازات وطموحات واحلام
مروان: وماحققت ولا شي منها
مايد: اوووف " كفخ يبهته "
مروان: انته شو امسوي؟ اي عيد فيهم اللي يايبنه، عيد الفطر والا الاضحى
مايد: انا روحي عيد
مروان ضحك: وامايه اللي يايبه العيد
مايد: اتخيل عاد !
مروان: ارمس مايد،، شو امسوي
مايد: ابوك هني والا طالع
مانع: تحت يالس ويا امايه
مايد: توك اتقوول مب فاضيه !
مانع: مب فاضيه حق ويهك مب حق ابويه !
مروان: انته بتعترف شو امسوي والا
مايد: وانتو ليش كله شاكين فيني
مروان: اخلاقك ما اطمن
مايد: انا مب امسوي شي ابوك لي امسوي
مانع: عرس على امايه؟
مايد: انته ماتعرف اتفكر؟
مروان: لان المقدمه اللي عطيتنا اياها بالضبط شرات ويهك " وهو يطلع مبايله من جيبه " اسكت بس اقول اسكت
مانع: يعني شو
مايد: لا ما جحدنا، جحد البيت بكبره باللي فيه
مانع: يعني شو سار المحكمه واتبرا منا، والا طلعنا من الورث
مايد: انا ماقلت لك لاتفكر انته، لا تفكرررر
مروان: انته بترمس عدل والا انش لك انا
مايد: البارحه خالد ولد محمد فهد كان هني، مرت نوره اتشله وكانت هند اختها معاها، وامايه وقفت وياهن عند الباب، دخل ابويه منصدم من ويوهنا كلنا، يلست امايه، اتعرفه علينا واحد واحد
مانع: شو يعني !
مايد: حتى انا ماعرفني، حتى،،، ماعرف وين مكان حجرته
سكتو الاخوان منصدمين، يشوفون عيون بعض وهم يسمعون شي مب متقبلينه
مايد: زاد عليه الامر
مروان: واتقول السالفه جذه، بهالبروود !!
مايد: وشو اللي بيتغير ف الواقع لو قلتها بـ حماس " شهق" تدري ان ابويه الباااارحه رد البييييت،،،، كلنا ندري انه مريض
مروان: ندري انه ممكن في يوم يدخل بيته ومايعرفنا، او مايدخل لانه اصلا بيكون امضيع بيته، بس ان اليوم هذا كان امس، هذا اللي مانعرفه
مايد وقف: لا اتحاسبني انا، اذا تبا اتحاسب حد، سر حاسب اخوك اللي متعود هاليوم من كل ويكند يكون موجود،، هني، الصبح يودي ابوك السوق والظهر يتغدا ويا امك، انا مب اخوكم العود تبلشوني، زين مني متحمل كتب الجامعة بعد تباني اتحملكم انتو ومشاكلكم
ضحكت امايه وهي تظربها على اديها
حصه: الريحه فايحه من راسي!
غايه: مب انتي حاطه دهن عود ويالسه ف البيت ؟
حصه: انا هاي ريحتي من شهر 11 لين شهر 3
غايه تضحك: وبس خلاص، خلص الشتا عندج
حصه: اترياه بس عشان دهن العوود
غايه: وانا اترياه بس عشان اكشخ بـ الوانه الدافيه هااي
حصه: وشو عندج كاشخه الحين !
غايه: وين ابويه
غايه: ليش ما ابين ؟؟
حصه: نزليها عن عيونج قبل لا انش اطلع عيونج من مكانها، نزليها اشوف
غايه تفصخ النظاره: وين ابويه ؟
حصه: انتي وين بتسيرين بكل هالكشخه والميكب ؟
غايه: والله مب مكان عام
حصه: وين بتسيرين !!
غايه: امم،، عند ريد
حصه: غايه!!!
غايه: البنت عندها تصوير وتباني اكون وياها
حصه: وليش انتي اتسيريلها، ليش هي ما اتيي
غايه: امايه البنت امزهبه الاستوديو والديكور كله عندها فالبيت، يعني مب معقوله اخليها اتشل كل هذا واتي عندي كل ما حبت اتصور بس لان ابويه مايعيبه اني اسير لهم البيت
حصه: انا مب كل مره بيلس اغطي عليج عند ابوج
غايه: وانا مب سايره مكان يخلي اي ابو يعصب على بنته اذا عرف انها سايره بيت عمها عشان اتغطين عليه امايه
حصه: وضع ابوج غير
غايه: ياربي، بس لو اعرف شو هالوضع اللي كل مايبنا طاري بنات عمي قلتولنا غير، وبعدين عمي وين موجود في هالحياه اصلا عشان اتكون له حياه عند ابويه والا عندي
حصه: مب ضروري الحياه اللي اقصدها هي الحياه اللي انعيشها اليوم
غايه: وانا ليش اتحمل نتيجه شي ماعشته، وكل السبب ان ابويه اخوه، وانتي حرمت اخوه !
نوره: مانزلت حتى، العامل ياني برع شل الاوراق وراح
هند: عشان جذه محمد فهد رضى يمسك عياله
نوره: عياله، ليش مايرضى؟
هند: العادة يمسك ملفاته، يجابل قضاياه، يصب كل اهتمامه في مشاكل المجتمع وهو امطنش مشاكل بيته
نوره: بيته مافيه مشاكل الحمدلله
هند: ماعنده بيت اصلا عشان اتكون فيه مشاكل
نوره: ليش تتكلمين باسلوب عوشه حرمت خالي، هي كـ ام مقهوره من محمد اللي رافض انه يسكن معاها فـ بيتها رغم وجود حجرته لين اليوم، وناش امأجر شقه، انتي شو اللي قاهرنج
هند رن تيلفونها: لحظه شوي اخر صبري يتصل
نوره: هندوو
هند: عيل اتشوفينه، سيارته من امس طايحه هناك وتوه يفكر فيها، انا بعد اباه يشل همي !
ضحكت عليها، حطت التيلفون عند ذنيها وقبل ماتتكلم، سألها
فيصل: وين السويج ؟
هند بهدوء: اوووه، اسفه، نسيت اردلك اياه
فيصل: ماعرفتي اتحطينه فالموتر، امخلتني ايي هالدرب كله واخرتها السويج عندج
هند: وانا شدراني ان ماعندك اسبير
فيصل: خلصيني،، وين السويج
هند: عند نوره
فيصل: ونوره وينها ؟
هند: هذي يالسه جدامي
فيصل: هند لا اتجننيني!!
هند: استغفر الله " اتكلم نوره" وين السويج
نوره: عطيته محمد فهد !
هند: اووبس
نوره: شو بسوي به يعني! قلت حق محمد يتصرف
هند: اتعرف رقم محمد فهد ؟
فيصل: تستعبطين صح؟
هند: عيل اتصل به هو بيقولك وين السويج
وبدون مايرد عليها، سكر الخط وبكل هدوء ردت هند حطت التيلفون على الطاوله
نوره: واضحه حياتكم
هند: هذا وضعي معاه، بالضبط
ابتسمت وانا اميوده مبايلي في اديه، لفيت شاشته، راويتها هند
هند: شوو، حسدناه!
نوره: عشان اتعرفين شكثر عابد قضاياه وملفاته اكثر عن بيته " ابتسمت" عرفتي الحين ليش ماعنده بيت!
هند: محمد يحبج نوره، وانتي اتعرفين انه مايتقارن بحد
نوره: ولا انا اللي قارنته بحد
هند: يمكن طلعت له شغله ضروريه، يعني بعد مب معقوله بيسير المكتب ويا عياله، ف طبيعي بينزلهم عند امايه !
نوره: الشغله الضروريه سويج فيصل ريلج ؟
اتنهدت بدون ماترد
نوره: شو اللي قاهرنج هند ؟
هند: قلبي
نوره: الحقيقي والا المجازي
هند ابتسمت: الحقيقي يحب المجازي، والمجازي مايستاهل الحقيقي
نوره عقدت حواجبها: كلامج كبير هند
هند: قلتي لي مره قبل ما املج، ان حتى لو استوا ريلج وغثج عادي اتسبينه عندي
نوره: صح، بس انتي توج مالجه
هند: ثلاث شهور! المفروض امعرسه الحين
نوره: مب وايد عشان نظرتج صوبه تتغير بهالسرعه وكل الحب يتحول لـ سب
هند: احبه الحب اللي كان فيني قبل ما اخذه، وظل مثل ماهو حتى عقب ماخذته
نوره: مازاد؟
هند: هو ماتعنى عشان يزيده
نوره: اللي اعرفه انه يحبج ويباج
هند: وهذا اللي مب قادره اعرفه
نوره: احيانا، من كثر مانحبهم انكون متخيلين معاهم حياه اتفوق حتى احلامنا، وعقب ماناخذهم نكتشف ان الواقع بعيد عن اللي كان في خيالنا، هم مب سيئين بس نحن رسمنا لهم صورة وايد كبيرة في داخلنا، يوم يينا انركب الصورة عالواقع معاهم، طلع البرواز صغير، وتمت اطراف الصورة الكبيره برع، بدون ما يحتويها شي، هذا حالج، انتي من داخلج اتحبينه، وهو بعد يحبج، التفاصيل اللي اتصير بينكم الحين، مجرد سوء فهم لا انتي قادره تستوعبينه هو ولا هو قادر يستوعبج، مسألة وقت
هند: حتى، بعد السبب الاخير اللي اظاربنا عشانه ؟
ريد: اي مطر! هذا غضب، وهاي الـ " كفختها على ريلها" مينونه، ما اتعضت من غرق فرعون
ميره: هاه شو في !
غايه: شوو في!! صورنا وخلصنا ووصلنا عند فرعون، وانتي الحين تسألين شو في !
ريد: انتي اللي شو فيج
ميره: مرات، احس اني مب ف مكاني الصحيح
ريد: ف دوامج؟
ميره: ف قلبه
غايه اتصفق: آآآ يُبا، هاي هاااي بالضبط السوالف اللي احبها " اتربعت" بسرعه قولي اللي عندج لازم ارد البيت قبل ابويه !
ريد: وانا بعدل هالصوره عشان انزلها الحين بس عادي سولفي اسمعج
غايه: بس تدرين، زين يوم حسيتي، مابغيتي الصراحه نشف ريجنا ونحن انقولج
ميره: ليش اتقولين جذه
ريد: لان هو عمره ما كلمج عن اللي في قلبه عشان اتحسين ان لج مكان اصلا
ميره: في بعض العلاقات ما تنقال فيها كلمه احبج، لكن اتشوفين بعيونج كل شي يثبت الحب هذا!
غايه: وانتي شو اللي اتشوفنه؟
ريد: شافت ظرايبه معاها وهو يغار من واحد يضطر انه يتواصل معاها عالتيلفون عشان الشغل، رغم ان الريال يداوم ف جهة ثانيه
غايه: يعني انا ماباج بس بزعل اذا كلمتي غيري،، حلوو جوّه، قولي قولي شو اللي اتشوفينه خلينا نمشي معاج للاخر
ميره: اللي اشوفه شي، واللي اقراه ف عيونه شي، واللي احس فيه شي
غايه: واتصدقين منو فيهم
ميره: قلبي وعيونه
غايه: شايفه عيونه، مب من زينهن !
ميره: نوره اتقول انها حلوه
غايه: نوره عندها عيون محمد فهد لي مايشبه جمالهن شي ف الحياه، بتودرهن وبتمدح عيون هذا البومه!
ميره: بديتي !!
ريد تضحك: يعني مب معقوله انتي ونوره شايفينه لدرجه انكن قارنتن عيونه، وانا اختها، ماراوتني اياه غير مره وفي صورة كحيانه، لو يطلع جدامي فـ اي مكان مابعرفه !
غايه: من زينه عشان تحفظين شكله
ميره: غايه !!!
غايه: اوكي اوكي ما بسب، بس هو كله على بعضه مب حليو
ميره: لانج اتشوفينه ب عيونج وانا اشوفه بقلبي، ولاتناقشيني ف شي اشوفه بـ قلبي واتشوفينه انتي بعيونج
ريد هزت راسها: اوكي، وين امسافر؟
ميره: وشدراج انه امسافر
غايه: والله عرفت لج
ريد: طبعا،، وميره مزاجها متعكر ليش؟ امها صار لها سنين برع البلاد ولا عمرها افتقدتها، مايتعكر هالمزاج الا اذا حبيب القلب طلع من البلاد
ميره: والله اني ماحس بطعم الحياه ف هالبلاد بدونه
ريد: تدرين ليش؟ لانج اتهربتي من حياتج وشفتي كل شي حلو ممكن اتعيشينه ف هالحياه معاه، رغم انه لا بين لج اللي في قلبه بشكل صريح ولا هو اللي فتح اي موضوع يخص الارتباط معاج ولا حتى نغزج فيه، واحد يالس يتسلى معاج
ميره: مب هذا اللي مب امريحني
غايه: بعااد!! في شي اخس من كل هذا
ميره: كل مايسافر احس انه شخص ماعرفه، مب الشخص لي يكون جدامي بشعوره، مايكون بيننا تواصل، ولاتكون بيننا مشاعر، كل شي يوقف، واحس انه بينتهي يوم اتطول سفرته
غايه: ومجرد مايرجع اتردين وكأن شيئا لم يكن
ميره: قلبي مب بـ اديه
ريد: ولاشي ف الحياه بـ ادينا، لا الحب، لا الظروف، لا ام، لا ابو، ولا اخو حتى، انتم امعلقين اعذارنا فيهم، انحب لمجرد ان قلبنا يميل، ونيأس لمجرد ان روحنا استسلمت، لا! نحن عشنا ظروف اسوأ لو كنا واقفين عندها وقايلين مب بـ ادينا، جان ضحكتج هاي اللي هو ما يستحقها عمرها مانرسمت على ويهج، انتي رديتي لنفسج عقب كل شي عشتيه وانتي حتى ماكنتي اتعرفينه، وهذا يدل على شي واحد، انج قويه مثل ما انتي، لا وجوده يزيدج قوه ولا غيابه يضعفج ميره! " ابتسمت " خليني انزل هالصوره عالاقل
محمد ابتسم: وعليكم السلام ورحمة الله، اهلا
وقف محمد، اجدم منه وحظنه
محمد: اشحالك
فيصل: الحمدلله، انته اشحالك
محمد: بخير ربي يعافيك
فيصل: وين سويج موتري
محمد: تدري من متى مب شايفنك، وهالسويج يابك لين عندي، زين اتسوي فيك هند
فيصل: وانته تدري وساكت، بدال ما اتأدبها هاي بنت عمك يالس اتصفق لها
محمد: بنت عمك انته
فيصل: عمك ابو حرمتك
محمد: عمك ابو حرمتك وعمك اخو ابوك
فيصل: وانا عايف الاثنين
محمد رفع حواجبه: عشان سويج موتر!
سكت فيصل وهو متنرفز
محمد: لحظه لحظه، عصبيتك هاي ماتوحي انك عاطنها موترك بـ رضاك، اساسا هي ليش ماردت لك اياه، ليش عطته نوره ونوره عطتني
فيصل: قاصده اتبهدلني
محمد: شو اللي مستوي بينكم
فيصل: ولا شي
محمد: فيصل، انته متنرفز ان الموتر من امس عند هند، اذا انته مب عاطنها الموتر بـ رضاك كيف شلته، وليش السويج وصل حق نوره ومب انته سرت شليته من هند
فيصل: قلت لك ولا شي لا تدخل انته
محمد: اتأدب وانته اتكلمني
فيصل: آسف
حط محمد اديه في جيب كندورته رد طلعها بالسويج
محمد: اندوك، خذ سويج موترك
فيصل: لا تتنرفز مني محمد، ما اقصد
محمد: على ان لسانك وصخ، واخلاقك وصخه، بس ادري شكثر قلبك نظيف "ظربه على صدره" يلا سر وباجر مرني العصر
فيصل: عشان اتحاسبني!
محمد: عشان اتفاهم وياك
فيصل: اتفاهم الحين دام اني موجود
محمد: الحين انته متنرفز، وانا مب فاضي لك
فيصل: ليش ياي المكتب هالوقت !
محمد: وعليكم السلام حياك مروان
مروان: غاط عن العالم، شوو اللي يملج يستوي به جذه، عيل عقب العرس شو بتسوي انته
فيصل: بتقرا اسمي في صفحه الوفيات
مروان ضحك: استغفر الله
فيصل: يلا انا استأذن
محمد: بترياك باجر
فيصل: حاضر حاضر "وسار"
مروان: هذا المكتب حقنا والا حق قضاياك
محمد: انتو فضاياي بعد
مروان: كلام كبير
محمد: فكني ويلس
مروان يلس: ليش طلبت اتشوفني هني مب في الكوفي
محمد: الكوفي مكان الكل، اخاف اي لحظه حد يطب علينا، والكلام لي بقولك اياه مابا حد يسمعه غيرك
مروان: ليش شارد من امايه، اليوم السبت محمد، يوومها، مستحيل ما بتتغدا عندها، اصلا مستحيل ما بتودي ابويه السوق!!
سكت محمد ثواني، ورد اتنهد
مروان: بلاك
محمد: مهموم مروان
مروان: افا وانا اخوك، وهالهيس لي طلع قبل شوي ماعرف يطلعك من المود لي فيك، ياخي بيعني فالسوق
محمد: اشتريك بـ راس مايد
مروان ضحك: عن يسمعك روحه بينش يعرض راسه في امازون بدون كود خصم
محمد: شو وضع ابويه الحين
مروان: على،، قولت مايد،، جحد حرمتك واختها امس
محمد عقد حواجبه: نوره وهند !
مروان: وخالد ولدك فوقهم وامايه والبيت كله
محمد: ماقالت لي نوره
مروان: وليش اتقولك، كلنا ندري ان المرض زاد عليه
محمد: صح، فـ الكل متوقع ان في اي لحظه ممكن يوقف جدام ابويه ومايتعرف عليه
مروان: الا انته !
محمد: انا؟؟
مروان: من شو متهرب محمد
محمد اتنهد: كلكم اتعرفون ان المرض زاد عليه وممكن في اي لحظه ينسى حد منا، بس اللي محد يعرفه في مرض ابويه غيري، انه نسانا نحن اللي عايشين وياه، وقاعد يتذكر اوادم صار لهم سنين طلعو من حياته وراحو
مروان: سألك عن خالد؟؟
محمد: سألني عن هنادي يا مروان، سألني عن هنادي
مروان: منو هنادي ؟
محمد: عرفت ليش انا متهرب منه! مرض ابويه ندري عنه، بس اللي كاسرني هو الشي اللي محد يدري عنه
مروان: مستحيل محمد !
اتنهد محمد وسكت
مروان منصدم: مانساها !!!
محمد: المرض هذا لو كان يصيب القلب جان نساها، لكنه يصيب العقل يا مروان
مروان: محمد،، المفروض ينساها وهو مب مريض، المفروض ينساها وهو بكامل عقله
محمد: مرواان
مروان: وامايه ؟
محمد: ادعي ان ما اييب طاريها جدامها
مروان: غير الدعاء، شو اللي لازم اسويه !
محمد: ولاشي،، نحن ندرك الجنة بالدعاء فمابالك بـ باجي أمور الدنيا !!
مروان: ونعم بالله " اتنهد وقف " لا تفر الموضوع ف راسي وتتهرب، انته ولدها الكبير، البجر، الناس، اتسميها ام محمد، اتفضل يا محمد فهد وحلل ترتيبك امبيننا وقوم بواجبك
محمد: وانته الحين بتسير شو بتقولها
مروان: بقولها انك بتمر باجر
محمد: مروان
مروان: والا، تترياه هو يقولها !!
نوره: كلنا ندري بمرضه
هند: يعني شو، كل مره بينكرنا جذه، مابيعرفنا
نوره: كل مره؟ انتي ماتشوفينه الا كل سنتين مره، يعني لو مرضه مانساه اياج، السنتين بينسونه
هند: تطنزين !
نوره: ياربيي، بموووت منها هالريد
هند: ليش بعد
نوره: بذمتج هاي صوره !
هند: بنت عمج خلاص لا ملّه لا عقيده لا دين، فصخت الحيا بالمره
نوره: والله قلبي يعورني يوم اشوفها تعرض صور جذه، يعني البنت ريولها طالعه والقميص خفيف وخصلات شعرها واضحه من الاطراف، كل هذا اعلان حق اللبس
هند: ومن زين اللبس الخايس عاد ياريته حلو !
نوره: فتحي فتحي الباب
بدون ما اتكلم، مشيت لين غايه وانا متنرفزه، سحبتها من عباتها وانا رايحه الحجره معاها
غايه: انزين شوي شوي هنوده بتطييح
نوره: سكتي عني غايه ضغطي هني هننيي واصل منج
غايه: خلاص انزين هديني
نوره: اهدج!! هذا ولا انا ولا امايه ولا هند ولا حتى ابويه هادينج وانتي جذه! لو عيل امسرحينج جان شفتج ويا هوش ابويه ف المزرعه تسرحين وتمرحين
بدت شفايفها ترتجف مادري خوف والا من كثر ما امدلعنها ابوها، حظنتها من خاطري وانا اضحك
نوره: والله آآآآسفه
رفعت راسي اشوف غايه بطرف عيوني
نوره: تعالي يلسي
اجدمت مني واتربعت ع الارض
نوره: وليش مايلستي حذالي! خايفه اونج !
غايه: ليش انتي اتخوفين ؟
نوره: انتي اللي اتخوفين
ركزت عينها ف عيني وهي منصدمه
نوره: يوم شفتج شاله بنتي حسيت بـ خوف كبير في داخلي، اخاف تكبر باجر واتشوفج جدامها وانتي جذه، وتتعلم منج اشيا انا ماباها تتعلمها، اتشوف الغلط اللي ربيتها عليه، صح، واتشوف الحرام اللي كبرت عليه، حلال! وكل السبب انج خالتها
نوره: عمره الحرام ماكان حلال بس لان الكل قاعد يسويه، نحن نستقيم مثل ما الله امرنا في قرآنه وشرعه مانستقيم بـ مزاج رغبتنا ومجتمعنا ! غايه، ردج هذا ما بيشفع لج يوم اللي اكبر مني ومنج بيطرح عليج هالسؤال
غايه: ابويه هو اللي يجبرني اسوي كل هالاشيا من وراه
نشيت من مكاني، اجدمت منها وانا اتربع وياها عالارض، وهند بنتي في حظني
نوره: اتعرفين كم سنه بينج وبيني انا وهند! حتى ماقدر اقول انج من نفس الجيل، طبيعي تفكيرج بيكون غير ونظرتج للحياه بتكون غير، بس اللي اباج اتعرفينه، ان حتى اميه وابويه، كانو غير معاي انا وهند، وتماما غير معاج الحين، قاعدين يسوولج اشيا انحرمنا نحن منها، يعطونج اشيا كانت محضوره علينا، الحياه اللي انتي الحين عايشتنها ماتشبه حياتي انا وهند حتى يوم كنا في عمرج، لانهم جبرو نفسهم انهم يغيرون افكارهم عشان يقدرون يرضونج هاي تضحيه، لانهم ثقفو عمارهم عشان هم اللي يتغيرون ويعرفون كيف يربونج هاي تضحيه تستحق منج شويه، بس شوية احترام
غايه تضربها: اففف، سكتي عني
نوره ابتسمت: تبين اتصيحين ؟
غايه: لا
نوره: جذابه
