أنا وقلبي هالمدينة - الجزء الأول

 
معمعة ورود وأصوات طرب وناس قلبها يستعد للفرح، كنت واقفة وسط طاولات مش مكتملة بتنسيقها وكوشة ناقصة، تنتظر لمسات أخيرة مني عشان أأدي واجبي اللي قررو أصحاب العرس اني أكون جزء من فرحهم يوم اختاروني انسق لهم، نبهني تيلفوني على مسج وصلني على برنامج الوتساب، ابتسمت وانا اشوفه امصور نص يبهته في الكيمرا وهو يتكلم بدون ما افهم منه شو يقول، رديت عدت الفيديو وانا احط التيلفون عند ذنيه عشان اسمعه، ضحكت، بعدت التيلفون عني وانا رايحه صوب الكيمرا اصور له ردي بنفس الطريقه اللي سأل بها، شفت نفسي في الكيمرا مع طيف شخص ثاني ماكان المفروض يكون!خلاني اهد التصوير والفيديو و ردّي، واصد صوبه، وقبل ما انطق بـ حرف، اتجدمت مني وهي اتحط راسها على كتفي
 
هند: اتولهت عليج
نوره مبتسمه: يايه لين هني عشان اتقوليلي انج اتولهتي عليه " ظربتها بصبعها على خشمها" يالنصابة!  
 
ابتسمت وسكتت، مسكتها من ايدها وانا لازلت مبتسه، وعند اقرب كرسي يلست هي، ويلست انا على طرف الكوشه اللي كانت شبه امخلصه
 
هند: اتجنن الكوشه نوره  
نوره: ذوقج اللي يجنن، بس قوولي،، شو عندج هني ؟
هند: لوو،، كان حيّ، كان بيكون متعلق فيه كثر مانحن متعلقين فيه؟
استغربت سؤالها، بس ماستنكرته، رديت ابتسمت وانا اجاوبها
نوره: لو كان حيّ، جان نحن كلنا ماتعلقنا فيه اصلا
 
نقاشاتنا هاي حية اكثر من صاحبها، حيه كثر ما ذكرياته في كل موقف عاشه معانا، لازالت تنبض بداخلنا
اتنهدت هند، وسرحت ف مكان ماقدرت اكون فيه معاها
 
نوره: ليش زعلانه
هند: ادورج في ربوع دبي
نوره: وكيف عرفتي اني هني
هند: بنت عمج
نوره: بنت عمي ما وصلت للحين، نشت طرشتج انتي بدالها
هند: بنت عمج امصرقعه، محد يشتغل معاها غير شخص امصرقع شراتج انتي وريلج
نوره ضحكت: البنت شغلها فوق الممتاز
هند: جاملي اكثر
نوره: السويج شو يسوي عندج ؟
حاست ثمها وهي اتركز كل نظرها ع السويج لي كان ف اديها
هند: الفاليه ماطاعو ياخذون السياره، قلت لهم اختيه هني حطو المبلغ عالحساب، قالولي ما يصحش!
نوره: وانتي شو يايبنج هني اصلا؟
هند: قوليلي شسوي وياه
نوره: يايه بـ سيارته
هند: كالعاده، اظاربنا ونزل من السياره في نص الشارع
نوره: ياربي، يهااال يهااال، اربي عيالي والا اربيكم انتو، اموقفه نصيبج كل هالسنين على واحد مثله، والحين يوم خذتو بعض الاخ كل مازعل وقف في نص الشارع ونزل من السياره، والاخت اتفضلوو!! مالجه توها من 3 شهور وطالعه ويا ريلها بـ جوتي !!
هند: الحين لو كان زعلان وامنزلني انا من السياره مب الجوتي بيفيدني اكثر منه !
نوره منصدمه: واتقولي بنت عمي امصرقعه، انتي شوو تطلعين عيل !
هند: انا مب احسن عنهم عايلة الميانين هاي اللي بدال ما افتك منها، انش اشربك عمري وياهم اكثر واوهق عيالي " فرت السويج " اندووج اتصرفي بالسياره ويلا قومي وصليني البيت دام خلصتي شغلج
نوره: وليش ماتردين بسيارته
هند: يولي، هذا كفو اوقف سيارته في حوي بيتنا !!
نوره: يولي !! امشي امشي اقول بس
هند: عيالج وينهم
نوره: هند عند امايه وخالد عند حرمت خالي
هند: زين عيل قومي نزليني البيت وشلي بنتج
نوره: لا فديتج  اول شي بمر بشل ولديه لانه ف دربي وعقب بمر بشل سميتج
هند: مابا اسير بيت قوم خالي
نوره: لا تسيرين هذو السويج خذيه وردي البيت
 
سكتت بدون لا ترد عليه، كل اللي سوته انها حاولت تتهرب من عيوني لانها تدري ان محد فاهم عيونها في هالحياه كثري
 
نوره: انتي خايفه ان ابويه يسأل عن سيارته وشو اتسوي في بيتنا؟
هند: ليش ابويه يعرف شكله عشان يعرف سيارته؟
نوره: على شو مظاربين هند !
هند: على خالج وعياله اللي تبيني اسير لهم البيت، نزل في نص الشارع بس لاني اقرب لهم بدون اختيار مني، طيب لو عرف اني سايرتلهم البيت باختياري !
نوره: بس هذيل اهلج
هند: المصيبه انهم اهلي، لو ماكانو اهلي جان ما انذليت هالسنين كلها وانا احب واحد الكل رافض زواجي منه وعقب ما خذني، فجأه اتذكر انهم اهلي اتخيلي بس !
 
سكتت ومشت قبلي، ومشيت انا وراها قبل ما اتخيل، قبل ما استوعب اصلا عشان اتخيل نفسي في ظروف قاعده اتحاسب عليها وانا عمري ماكنت جزء منها، ولا من خالي، ولا من عياله ! شو تكون حجم المأساة يوم ينقلها صاحبها لنا، ويطلب منا بكل هدوء ان نتخيلها بعد ما يخلص كلامه، وكأن ابسط اللي عشناه ف هالحياة هو الخيال اللي انخلق، عشان يخلينا نستمر فيها !
 
..
 
ف سيارة اتدور في ربوع دبي هالوقت بـ شكل شبه يومي، اتضم اثنين اقصى حلم لهم ف هالحياه سعادتهم وسعادة القلوب لي يحبونها، كان يسوق بهدوءه المعتاد، وكانت تتكلم وهي حاطه طفلة في حظنها
 
حصه: مب غاوي هالعصير
ناصر: خلي عصيري ماتاخذينه
 
وقبل ماتوصل ايده، ايدها كانت اسرع وهي تنمد صوب العصير اللي هو طالبنه على ذوقه، تاخذه وتبدا تشرب منه
 
حصه: والله حلو ذوقك
ناصر: ذوقي ف كل شي حلو ترا
حصه: بس ف العصير
ناصر ضحك: ذوقي مب حلو يوم اخترتج !
حصه: وين اخترتني، يوزوني اياك وانته ماتعرف شكلي
ناصر: عنج عاد، لا اقرب لج ولا تقربيلي، ذووقي اللي قاعده تشربين فيه العصير هو اللي اختارج
حصه: خلاص ذوقك حلو يوم اخترت العصير واخترتني
ناصر: والمزرعه
 
خذت نفس وهي تتلذذ بالشي لي ف اديها عقب ماعطت شويه منه حق الطفله لي ف حظنها، وعقبها حطت العصير مكانه، وهو يضحك عليها من خاطره، يتريا بس اللحظه اللي بتصد فيها صوبه وبتعلق بـ معلقه اطول من الدرب اللي هم فيه
 
ناصر: خلاص خلاص اسحب الكلمه
حصه: والله ماتسحبها
ناصر: يابوي كل مره بطلب لي عصير غاوي وبعطيج اياه بدون ما اتكلم
حصه: صد صد صوبي
ناصر: بدعم
حصه: بتدعم شو وانته اتسوق 40، صد صووبي
ناصر: بتحلفين ان ماعندي ذوق
حصه: قارنتني بالعصير سكتنا لاني ماخذتنه عنك وقاعده اشربه، بس اتقااارني بالمزرعه !
ناصر: ماقارتنج فيها يابنت الناس، قتلج عندي ذوق فيها، وانتي مب طايعه اتصدقيني لانج مب طايعه اتين هناك اصلا
حصه: ولا افكر ايي
ناصر: كيفج، بس سألي البنات، كل ماوحده حست انها مضايجه ييت عندي هناك
حصه: انته كبرت وشيئين كبرو معاك، هَم بناتك والمزرعه
ناصر: وليش قلتي لي " هم " بناتك
حصه: ثرك اتقول، كل ما اضايجت وحده ييت عندك
ناصر اتنهد: البنات كبرن لدرجه انهن قامن يكتمن، مهمومات بس مايتكلمن
حصه: لاتخوفني ناصر، بلاهن بناتيه !
ناصر: للحين ولا وحده فيهن قالت لي اللي فيها، مهما كنت قريب منهن، اسلوبج غير حصه، محد يسحب الرمسه منهن غيرج
حصه: ماقدر على بناتك
ناصر: تقدرين! بس ماتبين اتعرفين لي فيهن وتنصدمين
حصه: احلف انك ماتعرف اللي فيهن
ناصر: والله اني ماعرف
حصه: مابسامحك لو تدري وماتخبرني ناصر !
ناصر: اتعرفين هالبنات شو بالنسبه لي في هالحياه، فاقد ضحكتهن حصه، يبتسمن بس عيونهن ماتبتسم
حصه: تقصد منو فيهن !
ناصر: الصغيره خليها، انا امرخي الحبل شوي معاها لاني اباها تتصفع في هالحياه، ابا الحياه شوي تقرصها واتربيها، اللي هاد حيلي التوأم وخصوصا اللي،،،، ماخذنها ولد عبدالله !
 
حصه اميه، وناصر ابويه! روحين انخلقنا منهم انا وهند توأمي، وغايه اللي تصغرنا بـ سنين طويله! شخصين عاشو في هالدنيا على ضحكتنا وكبرو عليها، والحين بس حسو انهم بدو يفقدونها بدون مايعرفون السبب، وهذا بس، اللي امخوفنهم علينا !
 
..
 
 
مكان صغير بس كبير بمحتواه، كبير بـ قلب صاحبه والناس اللي اتحبه، دخلت ريد وهي تفتح الباب بكتفها بعد ما عارضت الكتب اللي كانت شالتنها بـ اديها، قوة الباب !
 
ريد: سلام
فارس: اهلا بالمصوره المتكبره 
ريد: شل قشّك عني
فارس: على شو مستعيله؟؟
ريد: عندي تصوير
فارس: شو اتصورين، حفلة تخرج والا عقد قرآن !
ريد: عقبال ما ينعقد قرآنك ان شاء الله،، اصور شغل بنت عمك
فارس يضحك: وكتبي انا ماعرفتي اتصورينها
ريد: يوم بتعطيني كتاب ما اندم اني قريته عقب بصوره
فارس: شروطج وايد ريد، قولي شو اللي تبينه وبوفر لج اياه 
ريد: كيف شخص يبيع كتب ومايقرا
فارس: وشو اللي فيج وماقريته !
ريد: ويهي ماقالك اني يوعانه وابا آكل؟
فارس: جان رحتي الكوفي
ريد: تدري المنيو من يشوفني ماسكتنه اجلب فيه، يتسكر بروحه !
فارس ضحك: عيل تعالي خلينا انشوف الكتاب اللي قريتيه، اتسكر بروحه والا سكرتيه انتي
ريد: يوم ثاني ان شاء الله، الحين لازم اسير
فارس: انتي صدق عندج تصوير، والا تبين تتهربين مني لان ذوقي ف اختيار الكتب ماعيبج؟
ريد: ماقدر اجذب عليك، آخر واحد ماكملته
فارس: ليش
ريد: انته عاطني كتاب تاريخ، واليوم بداية نوفمبر، جو الشتا والاكل، وانا قلبي كل سنة مثل هالوقت مايحب  يقرا غير الشعر
فارس: اتنقى لج؟
ريد: اشوف، بس استعيل
فارس: حاضر
 
راح اتنفس الكتب اللي في الرف، ورجع لها بـ كتاب غلافه مب مميز، وقف وهو ماد لها ايده بالكتاب بدون لا يعطيها اياه
 
متى يشتفي منك الفؤاد المعذب
وسهم المنايا من وصالك أقرب
فبعد ووجد واشتياق ورجفة
فلا أنت تدنيني ولا أنا أقرب
ولي ألف وجه قد عرفت طريقه
ولكن بلا قلب إلى أين أذهب
 
ريد: باخذه
سحب ايده بالكتاب بعيد عنها مجرد ما مدت ايدها صوبه
ريد: يلا عاد
فارس: متى بتصورين كتبي
ريد: يوم بترضى اني اصورك
فارس: انا مب فاشنيستا
ريد: ولا انا ستيف ماكوري
فارس: منو هذا
ريد: ماتعرفه !
التفت حوله يتأمل الكتب، ورد ركز صوبها
فارس: ما مر عليه كتاب باسمه، او يتكلم عن شخصيته
ريد: اتعرف البنت اللي لقبوها بالموناليزا الافغانيه
فارس: ام عيون خضر
ريد: بالضبط، هو اللي امصورنها
فارس: يعني ولد ماكوري طلع احسن عنج، راح لين افغانستان عشان يصور هالبنت، وانا "ظرب بالكتاب على يبهتها" بكل تواضع اترجاج اتصورين كتبي، وانتي بكل غرور ترفضين 
ريد: ااي،، بتعطيني الكتاب والا اروح ؟
فارس: استعاره والا بتشترينه !
ريد: يستعيرون والا يشترون الحرف؟
فارس: اذا القلب وهو القلب، شي ناس تشتريه، وناس تستعيره
ريد: واللي يحب هو اللي يشتري لو شو ماكان السعر
فارس: عيل خلي الثمن هالمره عليه
ريد: لاحظ ان كل الكتب لي اشتريها منك، ثمنها عليك
فارس: يمكن لان ثمنج اغلى منها
ريد ابتسمت: بس قول امين قبل ماحد يدخل ويتحرانا حبايب
فارس ضحك: آمين
ريد: الله يرزقك باللي اتحب قلبك وتشتريه بـ اغلى ثمن تملكه " سحبت عمرها عنه" اشوفك فالبيت
فارس: على فكره، مابشوفج اليوم
ريد وقفت: ليش ؟
فارس: لانج مابتفضيلي دام هالكتاب طاح ف اديج
ريد: الله يرزقك باللي تفضى لك عيل
 
ضحك وراحت !
 
يمكن اقولكم انهم روحين قراب من بعض، يقرون ويوه بعض كثر ما يقرون حروف الكتب ويا بعض، بس الاكيد انهم اخوان، يملكون نفس القلب والشعور، اللي امخلنهم يعيشون هالايام والالام، بكل لحظاتها اللي يمرون فيها، واتمر فيهم
 
..
 
وقفت سيارتي في نص الحوي، صديت صوب هند اللي كانت امركزه راسها جدام واكتفت انها تطالعني بـ طرف عينها
 
نوره: لاتشوفيني جذه، بتنزلين 
هند: انا مايخصني، انتي حرمت ولدهم، اتوهق انا ليش 
نوره: خالج قبل ما اخذ ولده
هند: نوره والله مافيني
نوره: شو اللي مافيج انتي وجوتيج، بيت خالج، ولا يغرج الاسم ثره انسان أليف مب الحيوان المفترس اللي بيهجم عليج لو شافج، نززلي
هند: والله ولد عمج اللي بيهجم عليه لو عرف، نزلي بروحج، ولاتبلشيني ويا هالعايله
نوره: صاحيه انتي! اهلج يالطمه!! وبعدين انا بدون محمد فهد مستحيل انزل البيت كله شباب
هند: وانا الحين نيابه عن محمد فهد!! والا عشان لابستلج جوتي شفتيني واحد من الشباب؟؟ وبعدين حرمت خالج وينها
نوره: اخاف اتكون فوق، افتح الباب الشباب ف ويهي، نزلي فكينيي  
هند: اففف منج
 
نزلت معاي وهي تتحرطم بنفسيتها الخايسه اللي مادري وانا اختها كيف متحملتنها، بلوم هالريل! مشيت لين الباب، بهدوء فتحته وجدمت ريولي، وقبل ما ادخل، دعمني طفل وهو يدفن راسه في طرف عباتي، شارد من شخص كبير، انتبه عليه قبل ما يدعمني هو الثاني
 
نوره: هوب هوب هوووووب
خالد يزاعج: مامااا شووفي هذذاا
مايد يتنفس بسرعه: اسف حرمت اخويه، انتي بس طلعي منها وخليني انا اتفاهم وياه
هند: والله مالوم اختيه يوم ماطاعت تنزل بروحها
مايد: عطني بسرعه
خالد: مابا بعطيك بسرعه
نوره: شو ماخذ عنه؟
عوشه: انته اتلعوزه واطفره، ويوم ياخذ شي عنك تقعد اتزاعج !
مايد: امايه والله العظيم بظربه
عوشه: لا تحلف عن انش انا الحين واظربك
هند: انته! اتهدد خالد جدامي، وجدام امه !
نوره: وانا اقدر عليه يعني! جان تقدرين عليه انتي، اتفضلي
عوشه: هذا منو يقدر عليه غير رب العالمين! مايد خل الولد وسر فوق، انا بقنعه وباخذه عنه وبيب لك اياه
مايد: ما اثق
عوشه: مايد !
مايد: خلاص انزين والله، بتم بس بسكت مابقول شي
عوشه: وليش اتم يوم مابتسوي شي
مايد: لاني ما اثق 
عوشه: ماتثق !!
مايد: فيه فيييه امايه والله مب فييج فيه هووو
 
اجدمت منه تكفخه لكنه ابتعد عنها بسرعه، وامبين الاثنين خالد واقف يضحك ويعلق على مايد بـ كل سخريه والثاني رايح صوب الدري يتوعد له ويهدده بـ اديه، يلس مايد عالدري، خوفا من ان خالد يشل اللي صارقنه عنه ويوديه معاه، فـ قرر يقعد هناك يراقب حلاله !
 
هند: حرمت خالي، يعني فوق ما ان البيئه اللي عايشه فيها كلها شباب وبعد مب صاحيين، يا بختج بهالخلفه يا عوشه
عوشه: شسوي اميه، هذا قَدَري في الحياه
 
ضحكت هند وهي تتجدم منها تحضنها من خاطرها، شوي وكفختها حرمت خالي على كتفها
 
هند: ليش ليش انا مب مايد
مايد: وانا سمعتي كل مكان خربانه!
عوشه: من زين سمعتك!
مايد: افأ
عوشه اتكلم هند: انتي ماتستحين ؟
نوره تضحك: لا!!
عوشه: عنبو حتى ف العيد ماتدخلين بيتنا !!
هند تضحك: فديتج حرمت خالي
عوشه: بس هاللي فالحه فيه، فديتج حرمت خالي وفديتج حرمت خالي
نوره: يلا عاد راضيها جان فيج خير
ضحكت هند وردت حظنتها 
هند: والله العظيم احب قلبج، والله والله احبببج
عوشه: عيااره،، تعالي يلسي
هند: يلا
نوره: هاي اللي حالفه ماتنزل معاي من السياره؟ شو اللي يلا انا مستعيله بسير
عوشه: مستعيله على شو، مالحقتي تغسلين الحوش والا الخمس حجر اللي ف الدور الثاني نسيتي اتهوينهن
نوره اتنهدت: حرمت خالي
عوشه: ولا كلمه، انا ضغطي هني هاه واصل من ريلج " اتأشر على خشمها" لا تزيديني انتي الثانيه
نوره: ياربي، شو اللي خلاني انزل اليوم بالذات وانتي مشحونه جذه
هند: والله تبين الصدق نوره" حطت ريل على ريل" زين اتسوي فيج حرمت خالي
نوره: ماعليه انا بروايج
عوشه: لاتهددين بنتي
نوره: الحين هند بنتج!! وانا صار لي ساعه واقفه هني اترجى! والفقير هذا اللي يالس ع الدري
مايد: الفقير هذا بتشفق ع الأمّة كلها ولا بتشفق عليه
عوشه: ضميري ميت صوبك استريح
نوره تضحك: هند يلا
عوشه: ماتقوليلي على شوو مستعيله
نوره: بمر بيتنا حرمت خالي، بشل بنتي 
عوشه: نشي نشي اميه نشي، دام بتمر اتشل بنتها ماقدر اقول شي " وهي اتقلدها " بيتنا !!
 
ضحكت من خاطريه عليها وانا فاهمه قصدها، حرمت خالي فهد، انسانه بـ بساطة شخصيتها وجمال اسلوبها قادره انها تتربع في قلبنا رغم فارق السن
 
هند وقفت: ماعليه حرمت خالي مره ثانيه ان شاء الله
عوشه: ماصدقنا انشوفج عندنا فالبيت واتقوليلي مره ثانيه متى بتتكرر هاي
نوره: مستعيلين والله، ابا ارد البيت قبل محمد
عوشه: محمد هذا قصه ثانيه عاده
مايد: قوليله امايه متحلفتلك جان ماتبا عمرك مرها انته بس
عوشه: صخ انته، انا ما قلت لك سر فووق شو اميلسنك هني
مايد: قاعد اراقب حلالي، والا تتحريني بخلي هذا بو راس مربع ياخذ التابلت مالي ويوديه وياه، والله لاركض وراه لين شقتهم اللي ف الدور الرابع حزتها محمد فهد بكبره ما بيفكه مني !
عوشه: محمد فهد بكبره محد بيفكه مني انا لو اشوفه
مايد: واخييرا حطت عليه وخلتني انا المسكين ف حالي
عوشه: يعلك ما تسواه
 
ضحكت هند وضحكت انا وياها على هالمايد وحرمت خالي اللي ردت تتحلف وتتوعد له، مشينا لين الباب وقبل ما اتمد هند ايدها صوبه اتبطل الباب، دخل خالي فهد، سلم علينا بـ ملامح ماعرفها، ردينا عليه، بملامح ماقدرت تتعرف على نظراته اللي استنكرت وجودنا، سحب خالد ايده عني، وهو يركض صوب يدّه، بدون لا تتغير ملامح خالي اللي روحه وضحكته في هالحفيد، واجدمت انا، احبه على راسه، وهو لازال على جبروته، بدون اي ابتسامه، اي كلمة، واي ردة فعل تثبت لنا انه انسان طبيعي ! 
 
نوره: اشحالك خالي
 
سحب عيونه عني وعن ولديه، وهو يركزهن على هند بنفس ملامح الاستغراب، وبدون لا يرد على سؤالي، صد صوب حرمته اللي، ابتسمت بـ الم، وهي تمد له ايدها عشان تصدمنا اكثر من نظرات خالي واستنكاره
 
عوشه: تعال فهد، هذا بيتك ادخل
مسكته من ايده وسحبته صوبها
عوشه: هذيل التوأم بنات حصة اختك، نوره وهند،، وهذا
 
بدون شعور منه، انتقلت نظرته لـ خالد اللي رد مسكني من ايدي اكثر وكأنه خايف من شي مب مستوعبنه او مب قادر يتقبله
 
عوشه: خالد " اتنهدت" حفيدك، ولد محمد ولدك، سماه محمد على خالد اخوه،،،
 
كنا واقفين بـ نفس الهدوء، هند مستنكره، مايد مستغرب، وانا منصدمه! في موقف اثبتت لنا فيه عوشه حرمت خالي وبشكل رسمي، ان خالي فهد
 
فقد ذاكرته !