الأحد، 6 يونيو، 2010

بلوق منقّع


من كثر ما حاولت أنسى .. حاولت أنسى .. حاولت أنسى ( لاحظو التدرّج ف الموضوع .. هذي الواني لين ما اوصل للوزاره باذن الله ^__^ )


نسيييييييت وخلللللللللصت .. المفروض الحين احط نكي حاولت أذكر


يا ويح قلبي


امي تتصل بي اتقول لي يا فلانه يبي هذا وهذا وهذا من الفلا .. وتعالي اباج .. ثواني وانسى كل اللي طلبته مني وارد اتصل بها مره ثانيه .. وانا على اتم الاستعداد للهزاب .. احيانا انسى انها تباني واسوي لها طاف


امسات مترجيه المس تعيد لي الامتحان .. لان درجاتي مسوده ويهي هـ التيرم .. اترجيتها واترجيتها .. كان قاصرني بس احب ريلها لين ما رضت ووافقت .. داومت اليوم الثاني ونسيييت ان عليّه امتحان .. وبعد رسبت فيه


اليوم ابويه اتصل بي على آخر الدوام قال لي اظهر برع .. وقفت اهذر واهذر واهذر ويا اربيعاتي .. ونسييييت انه واقف اكثر من نص ساعه يترياني


قبل اسبوعين .. كنت ف الجامعه واتحرطم واتحرطم واتحرطم من اليوع .. وجني عيوز ماكلين عشاها .. رديت من الجامعه ع الساعه 4 وانا مزاجي متعكر من اليوع .. وصلت البيت .. لين ولين ولين .. صارت الساعه 6 .. فتحت لابتوبي ويلست اخلص اشغالي ع الساعه 7 يتني امي تسألني تقول لي جي ما تغديتي .. وجان اذكر الشي اللي ناستنه ..

من كثر ما تحرطمت والله اني نسيت اتغدى


من فتره ناسيه ان عندي بلوق .. ف يوم اذكرته وييت بحدر .. اي شي اكتب نكي وباسوردي يقول لي غلط ... وطلعت ناااااااااسيه الباسوورد


والصاعه الكبرى اني يوم كنت ثالث ثنوي .. اول يوم دراسي لي مرت المدرسه ع طالبه طالبه تسألها عن اسمها .. وصلت عندي قالت لي فلانه شو اسمج .. تميت واقفه مال خمس ثواني وانا ساكته .. قالت لي اللي حذالي حاولت بلاج.. ردي الحرمه تسألج .. ف سألتها .. اخبرج .. انا شو اسمي !!

ف بالي اسم ابوي بس والله اني نسيت اسمي واسم يدي


ايعقل هذا يا اقوام !!


امس مزاجي كان رايق على آخر درجه .. فتحت اللابتوب .. حطيت الآيس بلاندد حذالي .. حدرت بلوقي .. وسرت صوب هاك الشي اللي اسمه تخطيط .. تقريبا ساعتين ونص انا امسح ف هذا واشل ذاك واحط هذا حتى الاستايل غيّرته .. وظفت شي اسمه Box ويوم خلصت كل شي .. سرت عند save قال لي كلام طويل عريض مرتفع .. باللون الاحمر اللي ما يبين .. ما تفيجت اقراه نشيت ودقيت No لاتفاجئ بعدها


لا والله انصعقت الا مت .. يوم شفت ان كل شي امتسح .. قتله ويح قلبي .. لاتمزح ويايه .. كررت التنسيق مرتين وثلاث واربع .. وكل مره اشوف الشغل يمتسح ..


بياناتي .. استايلي .. خربطاني .. هوامشي


اصبح بلوقي كالصحراء القاحله .. يحتوي فقط على مواضيع خاليه من التنسيق .. يتخللها ( القرعه ) والقحط والتحكيين ( بمصطلحي الحاولّتي..يعني كحيان ^__^ )


تخيّلو .. صار بلوقي اسود وابيض كـ مخي النسّاي .. او عفوا بالضبط شرات نادي كلمه لي فجامعتنا يوم عطيناهم الدعوه لـ محاضره علي غانم الخاصه بمنتدى درايش .. نشو صوروه اسود وابيض ووزعوه >> زين جان قلتولي كنت بدفع جيمه الحبر لي مفورنه لنا ابونا زايد الله يرحمه !!


واصبحت انا كسيره .. عليله ... يطبق علي البيت اللي يقول فيه الشاعر .. هذا قراري وانت دور شراتي جرب يطير الطير لي ماله جناح >> يا امحق بلوووووق


في لحظه كرهت اللي كاتب هـ القصيده .. وكأنه يسهزأ في نكي .. ويقول لي .. واك واك واك ..

Try again


عصبت .. وبندت البلوق .. وبندت كل شي كنت فاتحتنه ف ذاك الوقت .. كل اللي سويته .. اني طرّخت لابتوبي ( يعني بندته بالقو وطلع صوت جي .. طراااااااخ )


وسرت برع ( اقصد يعني برع الفله .. لان نحن فلتنا للنوم فقط .. اما يلستنا كلها في الميالس لي برع )


ويلست ويا الأهل .. وشربت عصير فرّش


وحمدت ربي انه قذف في قلبي حب هـ النك نيم ( حاولت أنسى )


لانسى كل ما حصل معي من تجارب مع هذا البلوق التعيس .. وابدأ بتنسيقه للمره السابعه بعد كل محاوله لي بترتيبه وحفظه من ثم قوله لي بكل بروده دم واعصاب .. فورمات ..


فآمنت برب العالمين .. وترجمت الكلمه عساس ان فور .. يعني فوّر لي دمي .. ومات .. يعني الشخص مات من القهر


فحاولت أنسى التجربه المره ويا البلوق المنقع .. ورديت من يد ويديد .. نسقته واعدّل فيه .. ليظهر بحله كحيانه (=


فاغفرو لي ذوقي المعنقش .. ("=




هناك 10 تعليقات:

  1. اهاهاهاهاهاهاهاهاهاهاهاهاهاااااااااااااااااااااااااااااااي

    اللهم لا شماااته ... باجر انا بسوي لي بلووق . اخااف يصير فيني نفس الشي . الله لاااا قاال يا رب ..

    عنبووه عوووش .. انا احيد عمري نساايه .. بس ما توصل اني انسى اسمي ..

    استغفري الله عسب يثبت عليج حفظج و عقلج . خخخخ

    قوية منج يا حاولت قوية ... هع هع

    بلووووقج حلوو والله .. و ستاااايلة روووعه شرااات راااااعيته .. هيع هيع

    ردحذف
  2. سوااااااااااااااالف .. ويا البلوق ها !!
    هههههههههههههههههههه,,
    " حاولت أنسى " هذا اسمج ,, و لو نسيتيه ترانا بنذكرج هههه أسولف ^^
    والبلوق ها وااايد احبه .. ومب معنقش ,, انا عايبني

    ردحذف
  3. غير معرف2:33 م

    ههههههههههـ انتي بكبرج منقعه

    لهالدرجه تنسين !!

    ماتوقعتج تنسين اسمج !!!

    الله يثبت العقل والدين هههههههـ

    سوي لج اجنده تذكرج بكل شي يالمخرفه

    ردحذف
  4. ههههههههههههههه

    مسكين حاالج يا حاولت
    ثرج سوااالج ويا هالبلوق المسكين ..

    الا ع طاري النسيان .. انا كنت اتحرى ان أناالوحيده اللي اتيني حالة النسيان هاي

    >> مره نسيت اسم الهمبا .. تخيلي انتي بس
    >> مره نسيت اسم ربيعتي اللي وياها مدري كم سنه و تميت اربع وراها عسب تنتبه اني ابا ارمسها .. و ما ذكرت اسمها الا عقب ما ودرتها خخخخخ

    يالله حبووبه GOOD LUCK ويا النسيان

    صراااحه النسيان نعمه

    ^^"

    ردحذف
  5. السلام عليكم

    أخيتي ارجو أن تأخذي التاج السلطاني من مدونتي فهو لكِ

    http://abeeronly.blogspot.com/2010/06/blog-post_12.html

    ردحذف
  6. هههههههههههه رائعه انتي وسوالفك تونس ..

    الله يعطيك العافيه ويوفقك يارب ..

    مدونتك حلوه اول مره ازورها

    وان شاء ماهي الزياره الاخيره

    سلام.

    ردحذف
  7. أزال المؤلف هذا التعليق.

    ردحذف
  8. three-washy

    وتبين استعانه بصديق بعد لا !!
    زين ياينج الدور .. اضحكي انتي بس اضحكي


    كوكي روكي

    قتلج اخليه حاولت أذكر ابرك لي <__<


    رندا الجنوبيه

    حياج الله .. اتشرف بتواجدج بيننا (=


    Godless Saudi

    كونت علاقه صداقه .. واخوه وامومه .. بس الله يعييين شو خبصنا وشو من فضايح بتظهر يوم الثلااث ^__^


    مشكورين ع المرور .. ما توقعت بلقى ردود افعال بهذا العدد(=
    اطمشو انتو بس شعليكم
    يومن لك ويومن عليك ^__^

    ردحذف