الأحد، 16 يناير، 2011

يرحم أيام زمان



كنا أطفال .. الاولاد ( بالفانيله والشورت ) والبنات بحسب طبقت كل منهم  .. اللي مطوره شوي تلبس تنوره وقميص واللي مسويه عمرها برنسيسه تلبس فستان بسيط .. واللي موليه بنت فقر و همها حواطه الفريج شراتي .. تلبس بجامه وادور
لا وتلقونها منطره بعد

كان يوم الخميس هو احلى يوم في حياتنا .. لاننا نجتمع في  البيت العود ( بيت يدي )
وعلى أذان العصر .. كل منا (عافد ) عند امه ويقول لها بنبره >> اطر لها طبله ذنيها<<

أبااااااااااااااااااااااااااا فلووووووووووووووووس

والأم يحليلها .. بكل هدوء تخرج من جيبها عشره دراهم

المحظوظ هو الاخ الكبير .. ف ( العشر ) يسلم في يده .. كي يضعه في جيبه ويقسمه على عدد اخوته الصغار
>> يا زعم ان يعتمد عليه عاد

ويتسابق الجميع للوصول الى ( الدكان ) >> بقاله
ويبدا الاخ الكبير .. بتقسيم المبلغ .. ليحظى كل منا بـ درهمين .. وعلى وجهه ابتسامه عريضه

نشتري اجمل وارخص الاشيا .. ونحرص على ان لا يتعدى قيمه ( الحلاوه .. او الجبس) النصف درهم
كي نستطيع شراء ( 4  ) قطع ويكون المجموع درهمان ..
كنا نعود للبيت ( بيت يدي ) ونجلس في ( الحوي ) حديقه المنزل
ونبدأ بتناول ألذ الحلويات
كنا نستمتع بأحاديثنا التي ( كانت سخيفه .. واسخف عنها ماشي ) ونستمتع بتناول الـ 4 قطع
اذا شوي هاه اطورنا .. وبغينا انسير حديقه والا مسرحيه .. يعطونا 3 دراهم =_=

رغم اختلاف المظاهر .. الا ان ذالك لا يعني اختلاف المبلغ

الى ان كبرنا وجاء هذا الزمن كي يغير الاشخاص .. رغم ان الام لم تتغير

ف امي التي كانت تعطينا درهمان عندما نذهب للبقاله .. أصبحت الآن تعطي 15  لاخي الصغير
عندما يذهب الى المدرسه ..
ومع أذان المغرب .. يحين وقت ذهابه الى البقاله ( اي بقاله .. والله البقاله ما اتييب راسه .. متعود يسير المحطه الحين ) وفي جيبه 20  ولربما  30 درهما

ومع اذان العشا .. يحين موعد تناوله لـ وجة العشاء الخاصه به من أي مطعم شاء .. كي يصبح نصيب اسرافه ف اليوم الواحد

60 درهم تقريبا

اي ما يعادل اسراف 6  عوائل من الذين كانوا يعطون ( العشر ) في يد الاخ الاكبر
كي يقسم الـدرهمان على كل طفل

رحم الله تلك الايام .. كنا نعيش على درهمان ونقسمهما على اربع قطع ( عشان اللي شاري اكثر عنا ما يخلص عقبنا ونح نيلس نطالعه )

ورحم الله طفولتنا ( كانوا يعطونا درهمين .. نسير الدكان ونشتري وفوق هذا كله بعد انيمع من هـ الدرهمين )

والله الحين بس كسرت خاطر عمري

=/

هناك 11 تعليقًا:

  1. هههههههههههااااااااي ... خس الله بليييسج عووش .. والله غرغرت عيوني ع هالذكريااات ... =")

    صدق توه احس انه نحن كنا مساكين والله .. =/ ..

    ردحذف
  2. غير معرف1:54 م

    الصراحة اشكرج على الاسلوب البسيط اللي تكتبين فيه
    خصوصا ايام الطفولة الحلوة ببساطتها
    وبالفعل اللي يستوي مع اخوانج مستوي مع كل اليهال في الزمن الحين ودايما اناقش الوالدة ليش الدلع الزايد وترد عليه وزمنكم غير ومنهم

    ردحذف
  3. يـــآاالله أياام و الله .. مع إن أمايه ما كانت اتخلينا نظهر برا البيت رواحنا هههههه

    كانت روحت الدكان من نصيب الأخو الأكبر ع قولتج ..
    و وحليله بعد يتشرا أغراض للبيت و خبز و ايرد

    هب الحين .. شوي ع كارفور و شوي المحطه و شوي مروحين يشربون كرك
    -_-""

    والله الله يرحم الثلاث دراهم اللي أمي كانت تعطيني إياهن ..
    لا بالتدريج بعد .. يوم كنا صدق صغار كانن درهمين للفسحه
    و يوم شوي أوني كبرت صارن 3 دراهم
    و لين الثانويه صارن 5
    و عاد دشينا الجامعه حدث ولا حرج -_-"" جيست الجبس بدرهمين ..


    لكن ما نقول إلى الله يرحمج يا أيام البراءه (=

    ردحذف
  4. اييييييه يرحم ايام زمان

    الأيام تمشي مثل البرق ,,

    ذكرتيني بحالي يوم كتبت هالخاطرة البسيطة !

    http://nostalgia-h.blogspot.com/2010/12/blog-post.html


    --------

    يسعدني متابعة مدونتك ^^

    ردحذف
  5. اعتقد أسلوب الحياه تغير ..
    كنا بسيطين في السابق ,.
    أما الحين الياهل عيشته صارت غير..
    حتى لعبه صار غير ..

    /

    بس بصراحه مافيه احلى من ايامنا ..
    رغم البساطه .. ورغم " الفقر " هههههههه
    كنا عايشين طفولتنا احسن مايكون .. لا واحسن من يهال الحين..

    عموما .. لا هان قلمكِ ..

    تحياتي ..
    نص قلب

    ردحذف
  6. غير معرف12:17 ص

    انا اتذكر يوم كنا واايد صغار كانوا يعطونا نص O.O وكان النص اييب شييين وعقب اطورنا قصدي غللا الدكان وكانوا يعطونا درهم ^^


    الحين صدقج والله حتى الــ 15 ما تيب راسهم ..


    وعلى طاري اللبس XD الحال من بعضه والطره تراها كانت موضه ^_____^

    خويتج : دزاستر

    ردحذف
  7. السلام عليكم ورحمة الله وبركاته

    رائع كلام جميل

    والماضي كان جميل وراعه

    ردحذف
  8. غير معروف.. حلاتها البساطه في كل شي (=

    نص قلب .. احلى مافي الموضوع ان كنا انعيش بـ بساطه وفقر
    حتى الدرهمين والثلاث دراهم بـ مذله كنا نحصلهم

    حي الله دزاستر .. منوره صديقتي ^__^
    الحين شفتي حد من اليهال ساير مكان وفي جيبه نص .. حتى اذا اشترا شي وردوا له نص من ظمن الخرده .. فرّه وسار

    ردحذف
  9. صباحكم خير وطيبة

    ومدونة جميلة ورائعة

    سرتني زيارتكم هنا

    دمتم بود

    ردحذف
  10. سلاااااموووو
    اهنيييك على مدونتكـ الخققققة
    *_^

    ردحذف