مكـ ،، ــسّ { ــات ~

بمـا إنـي من زمااااااااااااااااااااااااان عن البلوق 

ف قلت برد بموضوع منوّع نوعا ما وما يحتاي أصف اعذار (=

أمسيه { فزاع } الشعريه .. كانت تقريبا قبل 3 سنين

من أجمل وأروع الأمسيات الشعريه اللي حضرتها في حياتي

إلقاء متميز .. كلمـات فوووق الخيال.. وحضور جماهيري كبير

ولكن ،، 

لم يقف العمل عند هذا الحد .. بل اندمج مع أنامل وأفكار وابداعات 

وأنتجوا أوبريت .. قليل في حقه كلـمه .. واااااو

زايــد و راشـــد 

هذا راشد بن سعيد وهذا زايد ابن سلطان .. رجال افعال من قبل اتنصب في مناصبها

 آل نهــيان و آل مكتوم

أنا نصي من مكتوم ونصي الثاني نهيان سمي اكرام قوم يفخر المجد مراتبها

سمي عمي وسمي بن زايد واسم حمدان اخوي عمي رئيس الدوله اللي بويه نايبها

ّ         

~ ، ~ ، ~ ، ~ ، ~

 حق الليله .. او ما يسمى بـ ( القرقيعان ) في اغلب دول الخليج 

مع نهايه شهر 7 خلصت تقريبا من أغلب الاشيا اللي كنت مخططه لها هـ الصيف

ف بدت عندي حاله اسمها ( الملل )

هـ الحاله غير موجوده في قاموسي .. نادرا جدا ما احس فيها ولله الحمد

لذا ما عندي أي خبره كيف ممكن للشخص الملان انه يقضي ع الملل

لفيت يمين يسار .. سرت فوق نزلت تحت .. طلعت برع ورديت داخل وانا بعدني ملاااانه

لين ما وصلت لـ حجره يسمونها بالعربي الفصيح { غرفه المعيشه }

يلست ع الكرسي .. وشفت حذالي اكياس مال الجمعيه مليانه

كانو تقريبا 5 اكياس .. ميمعينه اخواني الصغار ف ليله النص من شعبان او ما يسمى ف الامارات ( حق الليله )

فتحته ف اذا به جبس حلاوه ككاو

يعني سويتات وخربطان مما لذ وطااب

ف خطرت في بالي فكره جهنميه ..فكره ماظن تخطر على بال شخص  عاقل

>> محشومه حاولت

نشيت وفتحت الاجياس طلعت اللي فيها وصفيته جدامي

الحلاوه على صوب .. الككاو على صوب .. الجبس على صوب وسعّرت كل واحد

يلست وفرشت الحلويات جدامي وقلت اللي يبا يدفع وياخذ

هذا بـ نص    هذا بـ درهم    هذيل 2 بـ نص

صدقوني الصغاريه وقامو يركضون يسيرون ايبون بيزات وايون

اذن المغرب وبندت الدكان وعقب العشى نسييييت السالفه .. ع الساعه 12 فليل فتحت امي الاجياس جان تقول لها اختي الصغيره

والله حاولت بتعصب عليج اول ادفعي عقب خذي اللي تبينه

اصبح وجه امي احمر اخضر  اصفر  اللي طاير لونه

وقفت وبخفه مشيت على أطراف اصابعي عشان ما تحس فيا ومن فتحت الباب يايه اشرد صرخت امي صرخه

انتي قاصه ع الصغاريه حليلهم هم سايرين بيت بيت ايمعون وآخر شي تاخذينه واتبيعينه عليهم يالحراميه

من قالت آخر كلمه يلست انا ع الارض امسح دموعي من شده الضحك

صح انها فكره بايخه في نظر الوالده ^__^

وسوا لا يمكن لشخص انه يسويها

الا اني ظهرت بنتيجه .. يمعت مبلغ محترم .. حطيته ف الحصاله مالت التبرعات

واتبرعنا باسم كل من ترس بطنه من الحلويات اللي يمعه بعرق جبينه ونش اشتراه مني وهو خبر خير ان هذا كله ماله

^__^